Lis
elezions aministrativis che si son davueltis ai prins di Mai in
Scozie a àn premiât sei il Partît Nazionalist Scozês (SNP) che i
laburiscj. I citadins a jerin clamâts a sielzi i aministradôrs des
32 provinciis scozesis cui lôr passe 1.200 conseîrs. Par vie dal
gnûf mecanisim eletorâl proporzionâl dome 9 provinciis a àn savût
daurman cui che lis guviernarà, intant che par dutis chês altris,
là che nissun partît al à vût une maiorance assolude, si à di
spietâ che des tratativis tra i partîts a jessin des aleancis di
guvier. Sul front des percentuâls di vôt e dai conseîrs elets, il
risultât miôr al è chel dal SNP che al à otignût une medie dal
32,7% des preferencis e 424 elets, 57 in plui des elezions stadis.
Subite daûr si placin i laburiscj cul 31,5% dai vôts e 394 conseîrs
elets, ven a dî 58 in plui de ultime volte. Il Labour al à però
otignût la maiorance assolude in cuatri conseis provinciâi, a tacâ
di chel di Glaschu / Glasgow, e al è il partît di maiorance
relative inte capitâl Edimburc. I nazionaliscj, invezit, a
concuistin pe prime volte al prin colp doi conseis, ven a dî chei di
Dùn Dèagh / Dundee e dal Aonghas / Angus. I conservadôrs si fermin
al 13,3% des preferencis e a otegnin 115 conseîrs, 16 in mancul des
ultimis elezions; chel istès a deventin decisîfs pe formazion des
maiorancis in diviersis provinciis. A paiâ il presit plui alt a son
però i liberâi democratics che a sbrissin jù in cuarte posizion
intes preferencis, cun a pene il 6,4% dai vôts, e che a rivin a elei
dome 71 conseîrs, 80 in mancul de volte prime. Bon risultât invezit
pai verts che si cjatin cun 14 conseîrs elets, cuasi il dopli di
chês altris elezions. La presince di candidâts indipendents dai
partîts tradizionâi e je fuarte massime intes Highlands e tes
isulis, ven a dî il cûr de aree gaeliche. Lis listis indipendentis
a otegnin di fat la maiorance assolude tes isulis Arcaibh / Orcadis,
tes Sealtainn / Shetland e ancje tal Consei des Isulis Ocidentâls
(Comhairle nan Eilean Siar). Ancje ta chescj teritoris i nazionaliscj
a cressin e, te provincie de Roinn na Gàidhealtached / Highland, a
concuistin 22 conseîrs (5 in plui) cuintri dai 35 indipendents (un
in mancul), dai 15 dai liberâi democratics (6 in mancul) e dai 8 dai
laburiscj (2 in plui).
Font:
BBC, 04-05/05/12
Nessun commento:
Posta un commento