Scozie: fonts par altris 36 progjets pal gaelic

La agjenzie scozese pe lenghe gaeliche Bòrd na Gàidhlig e à assegnât 413 mil sterlinis par 36 progjets a pro de lenghe proprie te suaze di un aument dai fonts previodûts de normative linguistiche. Tra i organisims che a àn ricevût plui risorsis o cjatìn il coordenament des organizazions des isulis ocidentâls (Comhairle nan Eilean Siar) par diviers progjets che a àn chê di infuartî lis competencis linguistichis e l’insegnament dal gaelic. A pro dal insegnament de lenghe inte aree des isulis ocidentâls al è ancje un progjet de universitât finanziât cun 33 mil sterlinis. Fonts a son pro previodûts ancje par iniziativis che si proponin di infuartî lis comunitâts di lenghe gaeliche che si son disvilupadis, massime tai ultins agns, in citâts tant che Edimburc, Glaschu / Glasgow o Dùn Dèagh / Dundee.

Font: Bòrd na Gàidhlig, 27/09/22

Scozie: plan pal gaelic, prins dâts de consultazion publiche

La agjenzie scozese pal gaelic Bòrd na Gàidhlig e à anticipât i prins risultâts de consultazion publiche sul prossim plan nazionâl pe lenghe gaeliche. Il 65% des organizazions e dai singui che a àn partecipât ae consultazion al à concuardât su la dibisugne di centrâ il plan su la incressite dal ûs dal gaelic e sul so insegnament. Ta chest sens si à marcât la impuartance di aumentâ lis iniziativis che a permetin di cressi la confidence tal doprâ cheste lenghe, di meti sù centris teritoriâi pal ûs e pe promozion dal gaelic e di sburtâ la sô presince tai mieçs di comunicazion e in rêt. Il stampon dal plan al sarà cumò riviodût daûr dai indreçaments rivâts de consultazion e, dopo dal esam de bande dal guvier scozês, al varès di jessi publicât inte sô version definitive tal Avrîl di chest an che al ven.

Font: Bòrd na Gàidhlig, 25/08/22

Europe: nuie fonts pal progjet IndyLan pes lenghis minorizadis

IndyLan – la aplicazion nassude cun chê di fâ cognossi lis lenghis minorizadis e lis comunitâts che lis fevelin – no sarà plui finanziade. Il progjet, disvilupât inte suaze de universitât Heriot-Watt di Edimburc, al veve di fat podût disvilupâsi in gracie dai fonts europeans dal program Erasmus+ che, cu la sierade progressive dai canâi economics leâts ae partignince ae UE, cumò no son plui disponibii. In plui di meti a disposizion elements lessicâi, fraseologjics, gramaticâi e di comprension auditive par tacâ a imparâ basc, cornic, gaelic, galizian, sami e scots, chest imprest al ufrìs ancje acès a informazions culturâls che a permetin di cognossi plui a fonts ancje i popui che a fevelin chestis lenghis. Cence fonts la aplicazion no podarà incressi i siei contignûts e nancje zontâ altris lenghis minorizadis europeanis. I siei ideadôrs a àn cussì decidût di meti a disposizion in forme libare il codiç dal program di maniere che altris comunitâts a puedin fâle lôr e impleâle par fâ cognossi la proprie lenghe e la proprie culture.

Font: Neofalantes, 18/08/22

Scozie: fonts par gnûfs operadôrs pe lenghe gaeliche

Par mieç di un font gnûf, la agjenzie pe lenghe gaeliche scozese (Bòrd na Gàidhlig) e à assegnât passe mieç milion di sterlinis par 21 progjets indreçâts a cjapâ sù a vore o a stabilizâ un lavoradôr dedicât al disvilup de lenghe. I progjets fats indenant a son stâts judicâts cussì bogns che la agjenzie e à decidût di dopleâ la dotazion economiche assegnade sul imprin. A ricevi i finanziaments a son stadis realtâts che a operin intal cjamp de culture, de istruzion e dal sociâl, sei tes areis là che il gaelic al è ancjemò fevelât di une part impuartante de popolazion tant che lis isulis ocidentâls, sei ta chês là che la lenghe e je daûr a jessi recuperade tant che la citât di Edimburc.

Font: Bòrd na Gàidhlig, 01/06/22

Scozie: sucès dai indipendentiscj tes elezions teritoriâls

Lis elezions che si son tignudis ai 5 di Mai in Scozie a vevin chê di decidi la gnove composizion dai 32 conseis provinciâi che la lôr competence e je centrade su la gjestion di une serie di servizis pes comunitâts locâls. Chel istès, il vôt al veve un valôr che al leve plui innà di cheste dimension e al jere tignût di indicadôr ancje par temis plui gjenerâi tant che il procès di autodeterminazion de Scozie.

Scozie: inviadis lis consultazions pal gnûf plan pal gaelic

Ai 27 di Avrîl al è stât publicât il stampon dal Plan nazionâl pe lenghe gaeliche. I citadins scozês a àn cumò trê mês di timp par stazâ il document e fâ indenant propuestis e coments. Il Bòrd na Gàidhlig – la agjenzie publiche pe lenghe gaeliche – e cjaparà po in esam il materiâl rivât e indi tignarà cont par revisionâ il Plan prime di presentâlu al guvier scozês pe sô aprovazion. In plui de consultazion in linie, il Bòrd na Gàidhlig al à programât ancje disesiet incuintris sul teritori par presentâ il document e tirâ dongje lis valutazions de int. Il Plan al vuidarà la politiche linguistiche a pro dal gaelic pe dade 2023-2028.

Font: Bòrd na Gàidhlig, 28/04/22

Scozie: prins pas pai curricola di gaelic lenghe moderne

La universitât dal Strathclyd (Oilthigh Shrath Chluaidh) e la agjenzie scozese pe lenghe gaeliche Bòrd na Gàidhlig a àn inviât une certificazion integrative pal insegnament (ATQ) che e permetarà ai professôrs di insegnâ gaelic intes scuelis superiôrs inte suaze dal curriculum di lenghis modernis. Il gaelic si zonte cussì ai curricola di castilian, francês e todesc. La certificazion e rivarà ae fin di un percors formatîf di 18 mês, part in presince e part in linie, e i permetarà ai professôrs che le otegnin di insegnâ gaelic come lenghe moderne ai students des superiôrs slargjant cussì lis pussibilitâts dai zovins di formâsi ta cheste lenghe che la sô cognossince, massime tai ultins agns, e ufrìs ancje buinis ocasions di lavôr. A son vot i insegnants che a àn aderît al prin cors di formazion pilote. Lis scuelis là che a insegnin a àn za garantît che, une volte otignude la certificazion, a inviaran dai curricola specifics di gaelic lenghe moderne.

Font: Bòrd na Gàidhlig, 22/03/22

Scozie: rûl centrâl dal Bòrd na Gàidhlig in timps di pandemie

Il rapuart 2020-2021 su la ativitât dal Bòrd na Gàidhlig – la agjenzie publiche pe lenghe gaeliche scozese – al marche la funzion centrâl che chest organisim al à davuelt par judâ i arlêfs che a studiin par gaelic intai mês de sierade des scuelis par vie de crisi sanitarie. Tancj di lôr a rivin di fameis o di ambients là che no si fevele la lenghe proprie e duncje al jere vitâl creâ e ufrî imprescj e ocasions par doprâ e esercitâ il gaelic. Intant dal ultin an, tal plen de pandemie il Bòrd na Gàidhlig al à ancje sostignût lis realtâts associativis dal teritori finanziant cun 280 mil sterlinis 53 progjets diferents, creant un font di pueste pes comunitâts locâls là che la lenghe e je ancjemò vive, finanziant struments digjitâi pal aprendiment dal gaelic e invistint su la assunzion di personâl di impleâ pe normalizazion de lenghe a nivel teritoriâl. La agjenzie e à ancje judât 67 autoritâts publichis a disvilupâ o infuartî i lôr plans pal gaelic. Intal ultin an il Bòrd na Gàidhlig al à ricevût 5,3 milions di sterlinis: 1,5 pal personâl e pai coscj di funzionament, 2,6 milions par finanziâ fonts e bants, e 1,2 pai diviers plans strategjics.

Font: Bòrd na Gàidhlig, 09/12/21

Scozie: tal 2022 la prime Setemane mondiâl dal gaelic

Inte Vierte di chest an che al ven si davuelzarà in Scozie la prime Setemane mondiâl dal gaelic (Seachdain na Gàidhlig). Tra i promotôrs principâi de iniziative al è il Bòrd na Gàidhlig, la agjenzie scozese pe lenghe gaeliche. La Setemane si propon di celebrâ la vitalitât dal gaelic e il so rûl inte societât moderne, cul fin di sburtâ la int a doprâ di plui cheste lenghe e di infuartî i leams tra lis comunitâts gaelichis in Scozie e ator pal mont. Il program complet de manifestazion al sarà presentât sul imprin dal 2022.

Font: The National, 21/11/21

Man: iniziative par svicinâ la famee linguistiche gaeliche

Par iniziative de Bunscoill Ghaelgagh de isule di Man, dôs artistis a àn realizât une serie di cartulinis trilengâls pai fruts, adatadis ancje in formât di placât e dedicadis a siet temis diviers, o sei mangjâ, timp, emozions, animâi, colôrs, vistîts e splaze. Lis figuris a son compagnadis dai nons par manx, gaelic scozês e irlandês, ven a dî lis trê lenghis che a fasin part de famee gaeliche. Nassude di un viaç di studi in Irlande dal Nord fat dai fruts de Bunscoill Ghaelgagh intal 2019, cheste iniziative – ancje se piçule – e à un valôr simbolic impuartant. Lis cartulinis, di fat, a saran dopradis dai fruts de scuele a imersion de isule di Man par metisi in contat cun chei des scuelis gaelichis de Scozie e de Irlande par cognossisi miôr e infuartî i leams tra lis lôr lenghis.

Font: IOM Today, 19/11/21

Scozie: font par sburtâ il gaelic intes tieris comunitariis

Il Community Land Scotland, cu la poie dal Bòrd na Gàidhlig (la agjenzie publiche pal gaelic scozês), al à ativât un font gnûf (Gaelic Community Fund) che si propon di stiçâ sul plan finanziari iniziativis inovativis indreçadis a incressi l’ûs dal gaelic intes comunitâts locâls des isulis ocidentâls e des Highlands scozesis là che la lenghe e je inmò fevelade. I finanziaments a laran in particolâr aes ativitâts davueltis intes areis gjestidis in maniere comunitarie. Vuê come vuê si stime che in Scozie lis tieris comunitariis si slargjin su passe 225 mil etars cuntune popolazion di diviers miârs di abitants.

Font: Press and Journal, 23/08/21

Scozie: incuintris publics pal gnûf plan pal gaelic

Vie pal mês di Jugn la agjenzie pe lenghe gaeliche scozese Bòrd na Gàidhlig e davuelzarà cinc incuintris sul teritori par tirâ sù propuestis, valutazions e coments sul stampon dal gnûf Plan nazionâl pe lenghe gaeliche che al varà di saltâ fûr intal 2023. I apontaments a saran dedicâts a temis specifics, ven a dî al ûs dal gaelic intes isulis ocidentâls e tes areis rurâls là che al è ancjemò lenghe vive, intes areis urbanis e tes grandis citâts, inte Rêt e tai canâi sociâi, framieç dai zovins e tra chei che a fevelin dome par inglês ma a vuelin svicinâsi a cheste lenghe. Par vie de pandemie l’acès a chescj incuintris al sarà limitât ma, chel istès, si podarà contribuî cun materiâi mandâts vie pueste eletroniche o, se e sarà avonde domande, ancje cun altris iniziativis publichis. Cheste fase di scolte e di confront, si zonte aes valutazions za racueltis cuntun cuestionari in rêt che al jere stât lançât ai 10 di Dicembar dal an passât e a di un prin confront cu lis comunitâts locâls davuelt intal 2020.

Font: Bòrd na Gàidhlig, 24/05/21

Scozie: si infuartìs la maiorance parlamentâr indipendentiste

Lis elezions pal Parlament scozês dai 6 di Mai a àn infuartît la posizion dal SNP e a àn garantît al front indipendentist une clare maiorance parlamentâr. Il Partît Nazionâl Scozês al à otignût 64 deputâts, un in plui des elezions stadis e a pene un in mancul de maiorance assolude in Parlament. Il scuintri si à zuiât massime tes 73 circoscrizions eletorâls che e je dividude la Scozie là che il vôt si à polarizât di une bande sul SNP e di chê altre sul candidât dal front unionist che al ufrive plui pussibilitât di sucès: propit achì i Nazionaliscj scozês a àn vût il 47,7% dai consens e sfiliât il milion e 300 mil preferencis. Divierse invezit la situazion pal vôt sul listin nazionâl là che cundut dal 40% di preferencis, par vie dal mecanisim di compensazion cul vôt des circoscrizions, il SNP al à otignût dome 2 dai 56 puescj disponibii. Tal listin il Partît Nazionâl Scozês al à vût un câl di consens dal 1,4% rispiet aes elezions stadis: vôts che a son lâts a finî su Alba, il gnûf partît indipendentist vuidât dal ex leader dal SNP Alex Salmond, che però cul 1,7% des preferencis nol à vût nancje un elet. La maiorance indipendentiste e je dut câs sigurade dai 8 parlamentârs otignûts dai Verts, doi in plui de volte stade. Il moviment aleât di guvier dal SNP al à concuistât plui dal 8% dai vôts intal listin nazionâl.

Scozie: il SNP al propon di meti sù areis gaelichis ricognossudis

Il SNP al à manifestât la intenzion di invistî su la lenghe gaeliche inte prossime legjislature. In particolâr si ponte a lavorâ su trê liniis principâls, a partî di une riorganizazion des funzions e des struturis dal Bòrd na Gàidhlig, la agjenzie che e coordene la politiche linguistiche pal gaelic. La seconde linie di azion si centrarès invezit su la educazion cul sburtâ la nassite di gnovis scuelis a imersion ator pe Scozie e cul aumentâ i insegnants e i materiâi educatîfs par gaelic. Une tierce ipotesi di azion e je di creâ des areis gaelichis ricognossudis (Gàidhealtachd), sul stamp di chês che za a esistin in Irlande, là che il gaelic al sedi prime lenghe e al sedi disponibil in ducj i servizis pai citadins. Al è di dî però che si trate di declarazions fatis in plene campagne eletorâl e che, di plui bandis, si a metût in dubi la volontât di metilis pardabon in vore a elezions finidis.

Font: The Herald, 14/04/21

Scozie: pai sondaçs si varà un Parlament pro indipendence

Cul svicinâsi dai 6 di Mai, in Scozie e jentre tal vîf la campagne pes elezions che a varan di decidi la composizion dal Parlament nazionâl e puartâ ae formazion dal gnûf guvier. I sondaçs fats vie pal mês di Avrîl a son avonde dacuardi tal assegnâi al SNP une maiorance relative che e varès di puartâi un numar suficient di deputâts par guviernâ la Scozie ancje te prossime legjislature. Il Partît Nazionâl Scozês si cjate ben denant di chei altris massime tes proiezions pal vôt circoscrizionâl, intant che tal vôt regjonâl al pararès che une part dai siei eletôrs si spostin in part sui Verts – moviment aleât di guvier dal SNP e a pro de indipendence – e in part sul gnûf partît Alba, vuidât dal ex leader dal SNP Alex Salmond. La nassite di chest partît intal Fevrâr dal 2021 e ven cjalade cun interès propit par capî trop consens che al pues spostâ dal Partît Nazionâl Scozês. Pal moment i sondaçs a dan indicazions contrastantis tra cui che lu met fûr dal Parlament e cui che i assegne fintremai cinc elets che a podaressin meti a risi la maiorance dal SNP. Par chel che al rivuarde i partîts unioniscj, i scandais eletorâi a metin denant i Conservadôrs ancje se di pôc rispiet ai Laburiscj, cui Liberâi Democratics avonde indaûr. Par cumò, dut câs, nissun di lôr al menaçarès la maiorance dal front indipendentist.

Font: BBC, 13/04/21; Daily Record, 14/04/21

Scozie: stampon di leç par tornâ a votâ su la indipendence

Il guvier scozês al à dade fûr la propueste di leç par un secont referendum su la indipendence. Il test al rivarà al esam dal Parlament dentri de prime metât de prossime legjislature ma dome se i indipendentiscj dal SNP, che a son cumò al guvier, a tornaran a vê la maiorance tes elezions in program intal mês di Mai. Chê di un altri referendum e je une propueste che e cjate cuintri sei i partîts unioniscj britanics (Laburiscj, Liberâi Democratics e Conservadôr) che l’esecutîf di Londre. Tal 2014 i “no” a di une Scozie indipendente a jerin stâts il 55% ma, in dì di vuê, a son doi argoments in plui a pro de indipendence, ven a dî la Brexit cui siei efiets, e ducj i impegns cjapâts dal front unionist par convinci i scozês a restâ tal Ream Unît che no son stâts mantignûts.

Font: BBC, 22/03/21

Scozie: gnovis risorsis par sburtâ l’ûs comunitari dal gaelic

Il Bord na Gàidhlig, la agjenzie pe lenghe gaeliche scozese, al à decidût di assegnâ 212 mil sterlinis a trê realtâts che a operin intes Ebridis e ta chês altris isulis ocidentâls par assumi dai operadôrs che a lavorin dentri des comunitâts locâls cun chê di incressi, massime framieç dai zovins, lis ocasions par doprâ la lenghe proprie e par sburtâ il so ûs dentri des fameis intun moment là che la crisi sanitarie e limite lis ocasions di socializazion e lis ativitâts intes scuelis a imersion. Altris 154 mil sterlinis a laran intes isulis e tes areis plui ocidentâls des Highlands là che il gaelic al è ancjemò doprât come lenghe di comunitât par infuartî i plans linguistics par sburtâ l’aprendiment, la promozion e l’ûs de lenghe proprie.

Font: Bòrd na Gàidhlig, 18/03/21

Scozie: 2020 an di pas indenant pal Bord na Gàidhlig

Ta chescj dîs il Bord na Gàidhlig al à fat un belanç des ativitâts davueltis vie pal an. La agjenzie pe lenghe gaeliche scozese e à podût zovâsi di une disponibilitât di 5 milions e 200 mil sterlinis metudis fûr dal guvier scozês. Plui in detai, 2 milions e mieç a son lâts a finanziâ i fonts pal disvilup dal gaelic, 1 milions e 600 mil i coscj principâi de agjenzie e 1 milion e 100 mil i plans linguistics di ents e istituzions. Un dai progjets gnûfs inviâts vie pal an al è stât Cleachdi, une campagne par incressi l’ûs sociâl de lenghe proprie che dut câs, viodude la ecezionalitât di chest 2020, e à coventât a sostignî massime i fruts e i fantats che a studiin il gaelic ma no rivin di fameis là che cheste lenghe e je di cjase. Vie pal an si à vude ancje la incressite dai sogjets publics che a àn inviât o infuartît i lôr plans linguistics internis e dai funzionaris che a operin cun cheste lenghe. Des 85 azions che il plan de agjenzie al previodeve pal 2020, 73 a son stadis puartadis insom, 8 a son cuasi completadis e 4 a son stadis rinviadis al 2021.

Font: Bord na Gàidhlig, 16/12/20

Scozie: propueste urgjente par sostignî il gaelic intes isulis

Chest Astât la universitât des Highlands e des Isulis e à dât fûr un studi che al previôt la fin dal ûs sociâl e de trasmission dal gaelic intal zîr di pôcs agns intes isulis ocidentâls de Scozie, ven a dî là che ancjemò si lu dopre con continuitât inte vite di ogni dì. Denant di cheste prospetive un grup di lavôr trasversâl vuidât dal deputât Alasdair Allan si à confrontât in maniere direte cu lis comunitâts locâls; di chescj incuintris a son saltadis fûr diviersis propuestis racueltis intun rapuart che al è stât consegnât ai 16 di Dicembar al ministri cun deleghe pe lenghe gaeliche, John Swinney. La idee di fonde che e sta daûr de iniziative e je che la politiche linguistiche metude in vore in dì di vuê no ten avonde cont des resons profondis de pierdite de lenghe tes isulis ocidentâls, ven a dî il câl demografic, la mancjance di ocasions atrativis di lavôr e i problemis abitatîfs. Il teme de lenghe al à duncje di jessi centrâl intes politichis lavorativis, residenziâls e socioeconomichis par cheste aree dal paîs. In câs contrari si larà al colàs di chel tiessût sociâl che fin cumò al permetût di tignî vive la lenghe.

Font: Press And Journal, 16/12/20

Scozie: prin pas pal gnûf Plan pe lenghe gaeliche

Ai 10 di Dicembar la agjenzie pe lenghe gaeliche scozese Bòrd na Gàidhlig e à lançât un cuestionari in rêt che al coventarà par racuei lis propuestis e lis osservazions di ducj i sogjets interessâts a dî la lôr sul prossim plan gjenerâl pe lenghe. Un dai compits di fonde de agjenzie, di fat, al è chel di prontâ ogni cinc agns il Plan nazionâl pe lenghe gaeliche che il guvier scozês al à po di fâ bon e che al rapresente la fonde de programazion des politichis linguistichis. Il cuestionari al è il prin pas di chest percors. Il materiâl tirât sù i coventarà al Bòrd par meti adun un prin stampon di Plan che po, tal Autun di chest an che al ven, al sarà metût a disposizion dal public par trê mês par racuei valutazions, critichis e propuestis di mende.

Font: Bòrd na Gàidhlig, 10/12/20