Finlande: pas indenant inte difese dai dirits dai Sami

Cuant che tal 2017 i guviers di Finlande e Norvegje si vevin metûts dacuardi pal disfrutament de pescje dilunc dal sisteme fluviâl dal Deatnu / Teno / Tana che al scjavace la tiere dai Sami (Sápmi), i rapresentants des comunitâts locâls si vevin dâts adun par rivendicâ il dirit di viodi di lui e di gjestîlu in maniere autonome cence dal intervent e dal control dai stâts e a vevin decidût une serie di azions par lâ ta cheste direzion. Un pas indenant inta cheste bataie al rive di une sentence dal tribunâl distretuâl finlandês che al jere clamât a judicâ cinc ativiscj sami che a vevin pescjât intal flum cence tignî cont des gnovis regulis. I cinc a vevin basât la lôr difese sui articui de Costituzion finlandese che a garantissin ai Sami il dirit di mantignî e di svilupâ la lôr culture. Tant che part centrâl de culture sami la pescje tradizionâl – a disevin i cinc – no podeve jessi limitade de gnove normative statâl. Ai 6 di Març il tribunâl al à calcolât che no fossin resons validis par impedî aes comunitâts locâls di pescjâ cui sistemis tradizionâi e ju à duncje assolts des acusis. I ativiscj si spietin che la sentence e vegni impugnade in maniere di puartâ la cuistion denant de cort supreme. Cuntune sentence favorevule a chel nivel si crearès di fat un precedent che al larès a garantî i dirits di dutis lis comunitâts sami.

Font: The Barents Observer, 07/03/19

Paîs Catalans: inchieste sul ûs dal catalan inte sanitât

La lenghe doprade sul imprin dal personâl sanitari e pese a fuart su la sielte linguistiche dai pazients. Daûr di une ricercje fate de organizazion Plataforma per la Llengua al ven fûr che in Catalogne tra il 70 e il 90% des personis che a àn a ce fâ cu la sanitât publiche si adatin ae lenghe doprade dai operadôrs dal setôr. In dì di vuê il catalan al è doprât dome dal 33,5% dai utents ma cheste percentuâl e larès sù al 53,5% se il personâl sanitari al butàs la peraule par catalan. Se po si calcole che al è plui facil che cui che al fevele par catalan al passi al castilian cuant che al à ce fâ cun cualchidun che al dopre cheste lenghe che no il contrari e che cheste tindince e cres a man a man che e cale la etât des personis, la Plataforma per la Llengua e à elements par pontâ il dêt inmò cun plui fuarce cuintri de decision de magjistrature spagnole di boçâ lis misuris cjapadis de Generalitat par meti il catalan come prime lenghe di ûs inte sanitât publiche. Misure che pal tribunâl e risultave “arbitrarie” ma che, su la fonde di cheste ricercje, e dimostre a clâr la sô impuartance pe tutele de lenghe proprie de Catalogne.

Font: Plataforma per la Llengua, 07/03/19

Irlande: in vore par une gnove leç sul ûs dal gaelic

Il ministeri pe culture, pal patrimoni storic e pes areis gaelichis dal guvier irlandês al è daûr a lavorâ suntune gnove normative par regolâ l’ûs de lenghe irlandese te aministrazion publiche. Daûr des anticipazions fatis fin cumò si larà a previodi che il 20% dal personâl cjapât sù a vore tal setôr public al vedi une buine competence linguistiche ancje par gaelic e che ducj i uficis publics in vore tes areis gaelichis de isule (Gaeltacht) a vedin l’irlandês tant che lenghe di servizi. In dì di vuê la Republiche di Irlande e à 320 mil dipendents publics tra aministrazions locâls, servizis sociosanitaris, scuele e fuarcis di polizie, ma il proviodiment al varès di tocjâ dome lis gnovis assunzions.

Font: RTÉ, 07/03/19

Galizie: partide di Lugo la proteste in difese de lenghe proprie

La plateforme Queremos Galego, che e met adun passe 700 realtâts impegnadis pe lenghe galiziane, e à decidût di inviâ une mobilitazion par protestâ cuintri de decision dal tribunâl superiôr spagnûl che al à refudât il ricors dal comun di Lugo cuintri di une sentence che e scancelave une part significative de ordenance di normalizazion linguistiche fate buine de aministrazion locâl. La ordenance e jere stade aprovade ae unanimitât dal consei comunâl che, dopo de prime sentence, le veve tornade a votâ ancjemò une volte simpri cul acuardi plen dai siei membris. Par Queremos Galego, a front dal ricognossiment costituzionâl dal galizian tant che lenghe proprie e couficiâl de Galizie, no si pues acetâ che un tribunâl al limiti lis misuris operativis che a coventin par garantî cheste uficialitât, massime cuant che nol interven su chês normis che a dan prioritât al castilian e a condanin il galizian a di une cundizion di minorizazion. La prime azion di proteste si à davuelte ai 6 di Març cuntun presidi denant dal palaç comunâl di Lugo. La campagne e larà indenant cun altris iniziativis a nivel locâl par rivâ po ai 17 di Mai a di une mobilitazion che e tocjarà dutis lis citâts principâls de Galizie.

Font: A Mesa, 06/03/19

Ocitanie: mobilitazion pal ocitan a scuele ancje in Provence

Dopo des mobilitazions che a àn interessât la aree centrâl de Ocitanie, la proteste cuintri de riforme dal sisteme di istruzion superiôr imbastide dal guvier francês e je daûr a spostâsi in Provence. L’implant de gnove normative al menace di eliminâ des scuelis secondariis i spazis di insegnament intes lenghis minorizadis e diviersis direzions scolastichis, poiantsi su cheste riforme, a àn za decidût di taiâ lis oris e i puescj di insegnament dedicâts a chestis lenghis. Une decision di cheste fate e je stade cjapade ancje dal distret scolastic di Ais de Provença / Aix-en-Provence. Par chest il coletîf dai insegnants di ocitan al à decidût di clamâ adun une iniziative di proteste che si davuelzarà ai 20 di Març denant de direzion scolastiche di Ais.

Font: Jornalet, 06/03/19

Montenegro: a Tuzi sucès de aleance albanese

L’an passât, ae fin di une lungje bataie, la aree di Tuzi e je tornade a deventâ un comun autonom dopo che tal 1957 e jere stade cjapade dentri intal comun di Podgorica, la capitâl dal Montenegro. A sburtâ pal resuriment dal comun e jere stade massime la minorance albanese che ta cheste aree e je maioritarie. E propit une aleance di listis albanesis e à vinçût lis primis elezions aministrativis dal gnûf comun che si son tignudis ai 3 di Març. La aleance albanese e à elet 16 dai 32 conseîrs comunâi intant che il Partît Democratic dai Socialiscj e i siei aleâts – cje a son maioritaris in Montenegro – si son fermâts a 15 elets. La aleance eletorâl albanese e varès di rivâ a guviernâ il comun di Tuzi in gracie de poie dal conseîr elet inte liste di oposizion Montenegro Democratic. La cuistion e jere cussì sintude che une vore di membris di de comunitât albanese che a lavorin ator pe Europe e fintremai tai Stâts Unîts a son tornâts di pueste par votâ pe coalizion di listis albanesis.

Font: Balkan Insight, 04/03/19

Paîs Basc: acuardi par cressi i fonts pai media par euskara

Ai 4 di Març il guvier de Comunitât Autonome Basche e chei des provinciis di Araba, Bizkaia e Gipuzkoa a àn cjatât un acuardi sui jutoris ai mieçs di comunicazion in lenghe basche che al puartarà a 10 milions e mieç di euros il totâl dai contribûts pe dade 2019-2021, cuntune incressite di passe 3 milions rispiet ai agns stâts. La iniziative e partìs dal ricognossiment de impuartance centrâl che i media a àn intal promovi l’euskara e de funzion strategjiche che, ta chest cjamp, a davuelzin i media privâts. La plui part des risorsis – ven a dî 7,8 milions – e larà dilunc a rivâ dal guvier de Comunitât Autonome. L’acuardi al regole miôr il setôr e al previôt che lis provinciis a metedin lis risorsis e a curedin i bants pai media scrits che a àn une difusion locâl, intant che la Comunitât Autonome e viodarà di chei a difusion soreprovinciâl, des radios, des televisions e dai mieçs di comunicazion che a operin su la rêt. Ta cheste suaze a jentrin, ancje se cuntune convenzion specifiche, i jutoris pal cuotidian in lenghe basche Berria.

Font: Diario Vasco, 04/03/19

Europe: mostre sul catalan autorizade in fin dal Parlament

Il Parlament european al è tornât su lis sôs decisions e al à autorizât la esposizion intai siei spazis de mostre metude adun de Plataforma per la Llengua su la lenghe catalane che sul imprin al veve decidût di censurâ. Dopo de denuncie publiche fate indenant de organizazion stesse e de evidence che la vicende e à vût su diviers mieçs di comunicazion, lis istituzions dal Parlament european a àn decidût di autorizâ la mostre. La scree uficiâl si le à vude ai 4 di Març ancje cu la partecipazion dal ex president catalan Carles Puigdemont che si cjate cumò in esili inte Belgjiche. Il president de Plataforma, Òscar Escuder, al à ricuardât che al è dificil calcolâ di minoritarie une lenghe come il catalan doprade di sù par jù 10 milions di personis (la diesime cuarte plui fevelade de Europe) ma che, viodude la situazion che si cjate a vivi tai cuatri stâts là che e je presinte, e reste fûr di dubi une lenghe minorizade.

Font: Plataforma per la Llengua, 04/03/19

Paîs Catalans: 110 cines dopleâts par catalan intal 2018

Dilunc vie dal 2018 la direzion gjenerâl di politiche linguistiche dal guvier catalan e à sostignût il dopleament par catalan di 110 luncmetraçs e la sottitulazion di altris 469 cines e di 380 pontadis di diviersis seriis televisivis. Si trate di produzions audiovisivis ladis in onde su plateformis tant che Movistar+ o FilminCat, distribuidis su dvd o blu-ray o proietadis in salis cinematografichis. In particolâr, par chel che al rivuarde lis proiezions intai cines, i films dopleâts par catalan a son stâts 41 e tra chescj ancje trê tra i cinc plui viodûts ator pe Catalogne. Par chest setôr il guvier catalan al previôt dôs liniis contributivis: une indreçade aes impresis distribudoris pes proiezions intes salis e une pe distribuzion seguitive. In dì di vuê, l’archivi des produzions audiovisivis ziradis, dopleadis o sottituladis par catalan creât intal 2015 al conte 4.833 luncmetraçs e 201 stagjons di seriis diviersis.

Font: Generalitat de Catalunya, 28/02/19

Irlande: in vore a Cill Dara il prin plan linguistic di contee

Ai 28 di Fevrâr si à presentât in forme uficiâl il plan cuincuenâl pe lenghe irlandese de contee di Cill Dara / Kildare che al cuvierç la dade che e va dal Zenâr dal 2019 al Dicembar dal 2023. Il plan al fisse une serie di obietîfs specifics, lis azions progressivis che a coventin par rivâ a chei risultâts e i sogjets clamâts a metilis in vore. Si trate dal prin plan linguistic plurienâl imbastît di une contee irlandese e al nas di un lavôr di doi agns puartât indenant cuntun confront cu lis comunitâts locâls, cu lis organizazions pe lenghe e cu lis istituzions statâls. La domande di servizis par irlandês e je daûr a cressi – al à spiegât il referent pes politichis linguistichis dal guvier locâl, Donnacha MacDiarmada – e il plan si propon propit di lâ ta cheste direzion.

Font: CnaG, 27/02/19

Stât spagnûl: in vore par une agjenzie tributarie plurilengâl

Daûr di ce che a fasin savê fonts dal guvier spagnûl, la agjenzie tributarie statâl e je daûr a voltâ servizis, informazions, programs, procediments, formularis, modei e canâi di navigazion dal so portâl Internet ancje tes lenghis couficiâls dal stât. Il percors al è stât inviât e, dongje de plateforme di traduzion automatiche za in vore tal sît, la agjenzie e je cumò in vore a svilupânt une altre par voltâ i materiâi disponibii sui canâi di interazion eletroniche cui citadins. L’intindiment al è chel di rivâ insom dentri di cheste Vierte, in timp duncje pe presentazion des gnovis declarazions dai redits. La operazion e interesse il catalan, ancje te sô variante valenziane, e il galizian ma no il basc dal moment che i contribuents de Comunitât Autonome Basche e de Navare a rispuindin a agjenziis tributariis separadis di chê statâl.

Font: El Confidencial Digital, 26/02/19