19/05/17

Stât francês: impegn dal gnûf president pes “lenghis regjonâls”

Dopo des elezions presidenziâls dai 7 di Mai che a àn viodût la elezion di Emmanuel Macron, i ativiscj des comunitâts minorizadis dal stât francês a spietin cumò di viodi se il gnûf president al mantignarà lis promessis fatis intant de campagne eletorâl. Tal rispuindi aes domandis fatis indenant de Rêt Europeane pe Avualiance Linguistiche (ELEN) e di altris sogjets in prime linie pai dirits linguistics, Macron al à dite che il ricognossiment des cussì clamadis “lenghis regjonâls” al è un element impuartant di unitât dal stât francês e par chest, intai limits fissâts de Costituzion republicane, al covente fâ buine une leç che e garantissi il lôr ricognossiment juridic e un statût di tutele specific. Il candidât dal moviment En Marche! si à impegnât ancje a facilitâ il lôr insegnament intes scuelis e a slargjâ il lôr ûs intai servizis publics statâi e tai mieçs di informazion. No je la prime volte che un candidât ae presidence al cjape impegns su chest front in campagne eletorâl, dome che i risultâts dopo des elezions a son par solit ben lontans des promessis fatis.
Font: France3, 05-07/05/17

Stât spagnûl: gnove ofensive cuintri dal referendum catalan

Dopo des gnovis riferidis ai pas fats des autoritâts catalanis par comprâ lis 8 mil urnis che a coventaran pal referendum su la indipendence, il puartevôs dal guvier spagnûl, Íñigo Méndez de Vigo, al à fat savê che la procure dal stât e je za pronte par intervignî e al à menaçât consecuencis penzis ancje pes impresis che a vessin di jessi cjapadis dentri tal procès referendari. La declarazion e rive dopo che la procure leade ae Audiencia Nacional, erede dai tribunâi speciâi di ete franchiste, e à cjapât di smire lis aziendis informatichis e di sigurece contatadis dal guvier catalan par meti in pîts une agjenzie tributarie catalane indipendente di chê spagnole.
Font: VilaWeb, 05/05/17

Paîs Catalans: prins pas pe nassite de FEDÒC

Prin pas par imbastî la Federazion des Entitâts Ocitanistis dai Paîs Catalans (FEDÒC) che si propon di meti adun in maniere continuative i sogjets impegnâts intal promovi ator pai Paîs Catalans la lenghe, la culture e la identitât ocitane e di fâ di coordenament par svilupâ azions unitariis a pro de Ocitanie. A inviâ il percors a son stâts il Comitât pe Fradilance Ocitane-Catalane (CAÒC) e Òc Malhòrca, intant che la Associazion pe Difusion de Ocitanie in Catalogne (ADÒC) e il spazi televisîf #aranésòc a àn mostrât za l’interès par partecipâ ae federazion.
Font: Jornalet, 03/05/17

Asturiis: Podemos al sburte par infuartî la lenghe tes scuelis

Ai 3 di Mai il puartevôs di Podemos Asturies, Emilio León, al à comunicât che il so grup al à presentât intal Parlament une propueste par che il guvier des Asturiis al proviodi par decret a ricognossi la specialitât di lenghe asturiane tes scuelis primariis dal principât e di lenghe e leterature asturiane tes secondariis. La iniziative e ponte a sblocâ la situazion che cumò e impedìs di meti l’insegnament de lenghe proprie framieç des materiis curicolârs. Denant di cheste propueste si viodarà ancje cui che, tra PSOE e PP, al à pardabon a cûr la lenghe, dal moment che i doi partîts a àn passât i ultins agns a dâsi un cun chel altri la colpe de situazion atuâl ma cence fâ nuie par sblocâle.
Font: La Vanguardia, 03/05/17

Irlande: propueste di CnaG par mendâ la leç pe lenghe dal 2003

Ai 3 di Mai la organizazion pe lenghe irlandese, Conradh na Gaeilge, e à comunicât lis sôs propuestis par mendâ la leç su lis lenghis uficiâls de Republiche di Irlande cun chê di infuartî lis politichis linguistichis in maniere di fâi cuintri ae diminuzion dal numar di cui che al fevele par gaelic. Su la fonde des segnalazions dal comissari pe lenghe irlandese, Rónán Ó Domhnaill, si propon di sostituî il sisteme dai plans linguistics pe promozion dal gaelic cun nivei di tutele standard in vore in ducj i ents publics e che almancul il 20% dai dipendents publics che si cjaparà sù a vore di cumò indenant al vedi une buine paronance dal irlandês fevelât e scrit. Cun di plui, si domande che dute la modulistiche doprade dal public e sedi bilengâl e che i citadins a sedin libars di doprâ la forme gaeliche dal lôr non e de lôr direzion di cjase. Par chel che al rivuarde il Gaeltacht, o sei lis areis là che l’irlandês al è ancjemò avonde fevelât de popolazion, si propon che dentri dal 2020 ducj i servizis publics a sedin disponibii par gaelic.
Font: CnaG, 02/05/17

Paîs Catalans: câs di discriminazion linguistiche a València

Ancje la Rêt Europeane pe Avualiance Linguistiche (ELEN) e à pandût la sô solidarietât ae vicepresidente de zonte comunâl di València, Maria Josep Amigó, obleade a identificâsi denant de polizie pal sempliç fat di vê rispuindût par catalan, cundut che la normative in vore ancje tal Paîs Valenzian e previôt che nissun citadin al sedi discriminât pal fat di doprâ la lenghe proprie di chel teritori. Magari cussì no, a ricuardin i rapresentants de Rêt, si trate dome dal ultin episodi di une lungje schirie di abûs de bande de polizie spagnole tai confronts di cui che al dopre une des lenghis ricognossudis come couficiâls. Il câs, a àn fat savê, al sarà puartât cumò ae atenzion dal Consei de Europe e de Union Europeane.
Font: ELEN, 29/04/17

Macedonie: violencis etnichis intal Parlament

La crisi istituzionâl che za di mês e met sotsore la Macedonie e à vût un pic dramatic ai 27 di Avrîl cuant che uns dusinte militants leâts ae diestre nazionaliste (VMRO DPMNE) che tai ultins agns e à guviernât la republiche ex jugoslave a son jentrâts tal Parlament e a àn assaltât deputâts e gjornaliscj. Il belanç finâl al è stât di un centenâr di ferîts e tra di lôr ancje il leader dal partît sociâl democratic (SDSM), Zoran Zaev, e chel di un dai trê partîts de minorance albanese, Zijadin Sela. Il fat al è capitât juste dopo che, propit cui vôts dai sociâi democratics e dai trê partîts albanês, al jere stât elet come president de Cjamare dai deputâts, Talat Xhaferi, prin rapresentant de comunitât albanese a ocupâ cheste incarghe.

Irlande: leç sul gaelic, incuintri jenfri CnaG e DUP

Ai 27 di Avrîl une delegazion de organizazion Conradh na Gaeilge si à cjatade cun Arlene Foster, leader dal Democratic Unionist Party (DUP), e cun altris rapresentants dal principâl partît unionist de Irlande dal Nord par presentâur la lôr propueste par une leç organiche pe lenghe irlandese. A vuê a son za cinc i partîts che si son declarâts a pro di une leç organiche pal gaelic e, dopo des ultimis elezions, a rapresentin 50 dai 90 deputâts de Assemblee de Irlande dal Nord. L’intindiment de organizazion pe lenghe al è chel di cjatâ poiis ancje framieç de aree unioniste che fin cumò e je stade il pidiment principâl par rivâ a di une normative par tutelâ e par promovi l’irlandês. Dopo de riunion cui rapresentants dal DUP – judicade positive dal president di Conradh na Gaeilge, Niall Comer – la organizazion e à contatât il gnûf segretari dal Ulster Unionist Party (UUP), Robin Swann, par discuti ancje cun lui de propueste.
Font: CnaG, 27/04/17

Catalogne: sburt par incressi i cines par catalan

Il Parlament catalan al à fate buine une mozion presentade de CUP (Candidature di Unitât Popolâr) che e impegne il guvier a cjatâ un acuardi cu lis impresis dal setôr cinematografic par che uns 50% dai films distribuîts e proietâts in Catalogne a sedin dopleâts par catalan. La Assemblee e à domandât ancje che si garantissi che lis versions in lenghe catalane a sedin dadis fûr su ducj i supuarts e su ducj i canâi di distribuzion. Tal câs de Val di Aran si sburte invezit par che a sedin dadis fûr ancje versions sottituladis par ocitan aranês. Inte mozion si domande ancje plui presince dal catalan intai proviodiments judiziaris là che al è cjapât dentri il guvier de Catalogne e l’insegnament dal ocitan tant che materie opzionâl in dutis lis scuelis secondariis là che si lu domandi.
Font: La Vanguardia, 27/04/17

Aragon: aragonês a risi cul model educatîf in vore

Il model educatîf cumò in vore nol garantìs la sorevivence dal aragonês. E je la conclusion de ricercje svilupade de professore Iris Campos de Universitât di Zaragoza. La investigazion e à cjapât dentri insegnants, fruts e fameis di 55 localitâts dal Aragon setentrionâl, là che la lenghe proprie e je ancjemò avonde fevelade. In dut si stime che la lenghe e sedi cognossude e doprade cuntune cierte continuitât di uns 30 mil personis. L’insegnament dal aragonês a scuele al è jentrât in vore cul 1997 ma, inte plui part dai câs, al è stât metût framieç des materiis opzionâls che a previodin un massim di trê oris par setemane. Cundut de ande positive mostrade des fameis e dai fruts pal so insegnament, il 72,8% dai professôrs intervistâts al à declarât di no vê mai davuelte nissune ativitât leade al aprendiment dal aragonês, a front di un 25,9% che lu à fat ogni tant e di un 1,4% che lu fâs in maniere continuative. In 37 scuelis de infanzie l’aragonês al è curicolâr, ma cul passaç ae primarie al devente opzionâl. Dome cun chest an si à inviât une esperience par doprâle come lenghe veicolâr.
Font: Aragon Digital, 26/04/17

Galizie: in calâ la editorie par galizian

Daûr dai dâts comunicâts dal ministeri spagnûl pe educazion, pe culture e pal sport vie pal 2016 i libris publicâts par galizian a son stâts 1.211, in calâ dal 13,1% rispiet al an prime. A sbassâsi a son stâts ancje i titui voltâts par galizian, che dai 64 dal 2015 a son lâts jù ai 54 dal an passât (-15,6%). Rispiet a chê complessive dal stât spagnûl, la editorie in lenghe galiziane e rapresente l’1,5%.
Font: Consello da Cultura, 26/04/17