28/12/21

Paîs Catalans: in miârs in place par difindi il model imersîf

Miârs di personis – pe polizie locâl almancul 35 mil – a àn manifestât ai 18 di Dicembar a Barcelone par difindi il model di imersion linguistiche, daûr dal sproc “Ara i sempre, l’escola en català” (Cumò e simpri, la scuele par catalan). Organizade de plateforme Som Escola, la manifestazion e je partide di place Tetuan par rivâ fin li dal Arc di Trionf, là che si à let il manifest che al à sierade la iniziative. La proteste e je la rispueste ae sentence ratificade dal tribunâl suprem che e impon un 25% di castilian obligatori intes scuelis catalanis. A vierzi la manifestazion, che e veve il vert come colôr identificatîf, a jerin i rapresentants di Som Escola, dai sindacâts di categorie e di diviersis entitâts impegnadis pe lenghe. Daûr di lôr i rapresentants istituzionâi e politics, tant che il president dal guvier catalan (Generalitat), Pere Aragonès, e i delegâts di ERC, Junts per Catalunya, CUP e En Comú - Podem. Il pont finâl de manifestazion al è stât la leture di un manifest in difese dal model di imersion là che si à marcât che a àn di jessi “i professioniscj de educazion e no i magjistrâts chei che a àn di definî cuâl che al à di jessi il model che al garantìs lis competencis linguistichis dai students”.

Font: El Punt Avui, 18/12/21; VilaWeb, 18/12/21; Nació Digital, 18/12/21

Stât francês: il ministeri al autorize la imersion linguistiche

Ai 16 di Dicembar il ministeri francês pe educazion al à publicât une circolâr là che si declare che l’insegnament des lenghis minorizadis nol va cuintri de sentence de cort costituzionâl che, cul boçâ l’articul de cussì clamade leç Molac (leç organiche su la valorizazion e la promozion des lenghis minorizadis) che al permeteve il model a imersion dentri dal sisteme scolastic public, e meteve a risi la continuazion di chest model di insegnament. Il test al fisse obietîfs, cundizions e limits dal model a imersion. Il ministeri si impegne a sostignî la promozion e la difese des lenghis minorizadis inte scuele pûr che, ae fin dal percors educatîf, i students a dimostrin il stes nivel di cognossince de lenghe francese e di chê minorizade. Il timp dedicât a ogni lenghe al podarà cambiâ daûr des necessitâts o dal progjet educatîf di ogni istitût. Ta cheste suaze, il model imersîf al devente duncje une strategjie pussibile parcè che al permet chest risultât e si adate a chest implant organizatîf. Une altre cundizion fissade e je che il model a imersion al sedi opzionâl e che i gjenitôrs a dedin un consens informât pe iscrizion dai lôr fîs ai istitûts che lu ufrissin. La circolâr e autorize ancje a tignî une part dai esams finâi inte lenghe minorizade, ancje se no specifiche par cualis materiis. La gnove e je stade cjapade cun sodisfazion des organizazions impegnadis pes lenghis minorizadis che ta chescj mês a jerin stadis protagonistis di cetantis mobilitazions cuintri dal atac puartât al insegnament imersîf ancje se a stimin che, in ogni câs, la uniche strade par meti in sigurece chest risultât e sedi chê di une riforme costituzionâl.

Font: VilaWeb, 16/12/21; EiTB, 16/12/21

Bretagne: si domande un plan urgjent pe lenghe proprie

Lis trê rêts pal insegnament de lenghe bretone – Diwan, Div Yezh e Divaskell –, la organizazion Kelennomp! e il coordenament des associazions culturâls Kevre Breizh a àn dât fûr un comunicât unitari là che a domandin un plan urgjent pe lenghe proprie. In dì di vuê la spese pe lenghe e rapresente il 0,5% dal belanç anuâl de regjon aministrative Bretagne. Dut câs – a disin lis organizazions firmatariis – par tutelâ e rilançâ il breton al covente un invistiment che al sedi almancul il dopli di chel atuâl. Pal 2022 a domandin duncje une integrazion finanziarie di no mancul di 4 milions di euros. Ancje il stât però al à di fâ la sô part e, par chest, si domande che te gnove convenzion stât – regjon si definissin in maniere clare obietîfs e risorsis par garantî un slargjament dal insegnament de lenghe bretone. Par mantignî il numar atuâl di personis buinis di fevelâ par breton – a zontin – si à di rivâ almancul a 50 mil students che a frecuentin la filiere scolastiche bilengâl.

Font: Kelennomp!, 16/12/21

Paîs Basc: e cres la poie par un sôl model scolastic a imersion

Un unic model educatîf inclusîf, cul euskara tant che lenghe veicolâr, che al cjapi il puest dal sisteme scolastic atuâl fondât su la pussibilitât pes fameis di sielzi tra model A (par castilian cul basc come materie), B (bilengâl) o D (par basc cul castilian come materie). La propueste e je stade fate indenant ai 16 di Dicembar de plateforme Batuz Aldatu che e met adun un centenâr di agjents sociâi e che e cjape dentri lis realtâts plui impuartantis dal sisteme educatîf (tant che Ikastolen Elkartea, Hik Hasi, EHIGE e v.i.) e pal euskara (a partî di Kontseilua e AEK), e la maiorance sindacâl basche (ELA, LAB, Steilas, ESK, Hiru e v.i.). La iniziative e je stade pensade tant che contribût pe gnove leç su la educazion che il Parlament de Comunitât Autonome Basche al è daûr a meti adun e che e varès di jessi fate buine chest an che al ven.

Font: EiTB, 16/12/21

Paîs Basc: gnove mobilitazion a Iruñea pe educazion par basc

E je stade une vore partecipade la manifestazion che ai 16 di Dicembar e à scjavaçât lis stradis di Iruñea / Pamplona, dal palaç dal comun a chel dal Parlament de Navare, par rivendicâ il dirit ae educazion in lenghe basche e, plui tal detai, par che si garantissi la presince di almancul une scuele de infanzie a imersion in ducj i cuartîrs pamplonês. Daûr di cheste gnove mobilitazion al è il coordenament Haur Eskoletako Gurasoak fondât dai gjenitôrs dai fruts che a frecuentin lis scuelis citadinis. Des 16 scuelis de infanzie comunâls a pene une e ufrìs il model imersîf par basc, intant che altris trê a figurin come bilengâls ma a àn il castilian come lenghe dominante. A son cuartîrs, come chei meridionâi de citât, là che l’euskara nol è presint in nissune forme. Cundut di une domande fuarte pal insegnament par basc, a son areis de citât là che si àn cuatri scuelis de infanzie e dutis e cuatri par castilian. Cumò la aministrazion comunâl – che e je tes mans de diestre regjonaliste e spagnoliste – e je fintremai daûr a modificâ il profîl professionâl pal insegnament dal euskara, in maniere di ridusi il numar di chei abilitâts e justificâ cussì il tai dai puescj disponibii par basc. Lis fameis a àn domandât ancje un intervent uficiâl al guvier de Navare che al à la ultime peraule su la distribuzion des scuelis ma fin cumò nol è intervignût par fâi cuintri ae margjinalizazion di chês par basc.

Font: Noticias de Navarra, 16/12/21

Paîs Catalans: la Bressola e bat in tribunâl il comun di Perpignan

Il tribunâl aministratîf di Montpelhièr / Montpellier i à dât reson ae Bressola e blocât l’acuist dal convent di Sante Clare de bande dal comun di Perpinyà / Perpignan. La rêt Bressola – che te Catalogne dal Nord sot aministrazion francese e garantìs l’insegnament par catalan a 1.300 fruts – e veve za cjatât l’acuardi cui proprietaris e versât la prime part dal paiament par meti sù tal sît un istitût superiôr pal insegnament imersîf dal catalan. La aministrazion locâl, vuidade de diestre ultranazionaliste francese, sul imprin no veve contestât la iniziative ma al ultin moment util e veve esercitât il so dirit di prelazion sul acuist dal imobil motivant il so intervent cu la difese dal patrimoni storic de citât. Il tribunâl al à però dât tuart al comun par vie che lis argomentazions puartadis indenant par esercitâ la prelazion no jerin motivadis. La Bressola e à duncje tornât a inviâ la operazion pal acuist dal ex convent e inviâ la gnove scuele che, une volte a bon, i darà acet a tresinte arlêfs des secondariis.

Font: VilaWeb, 15/12/21; Jornalet, 16/12/21

Ocitanie: dôs iniziativis editoriâls di e par fruts e fantats ocitans

Fruts e fantats a son i protagoniscj di dôs iniziativis editoriâls digjitâls inviadis ta chescj dîs in Ocitanie. I arlêfs dal istitût “Fabre” di Rodés / Rodez a àn inviât la version par ocitan di Vikidia, la enciclopedie libare indreçade ai fruts tra i 8 e i 13 agns che si ispire a Wikipedia e che e je nassude tal 2015. Si trate di un progjet che par cumò al è disponibil in pocjis lenghis e ancjemò di mancul ta chês minorizadis. I students de scuele “Gaston Fèbus” a àn invezit metût sù un sît di atualitât par ocitan. La specificitât di cheste iniziative e je chê e je indreçade ai zovins e, tal stes timp, che e je scrite propite di lôr. Dutis e dôs a son viertis a ducj i fantats e i fruts di lenghe ocitane che a vuelin partecipâ.

Font: Jornalet, 15 e 17/12/21

Galizie: gnove campagne pe promozion de lenghe proprie

Il guvier galizian (Xunta) al à lançât la campagne “Saca o galego que levas dentro”, o sei tire fûr il galizian che tu âs dentri. L’intindiment al è di cressi framieç de citadinance la centralitât de lenghe proprie pe identitât galiziane e, di chê strade, sburtâ il so ûs. La campagne, partide des citâts di Coruña e Ferrol, e puartarà tes placis des citâts principâls de Galizie une struture mobile che e propon su trê dai cuatri lâts dai spiei là che la int e puedi rifletisi compagnade dal sproc de iniziative. La idee e je chê di fâ capî che ducj a puedin jessi protagoniscj de rinassince e de normalizazion de lenghe. Il zûc di spiei e di sprocs al permet ancje di fotografâsi e fâ zirâ la campagne su lis rêts sociâls. Une seconde part de iniziative e sarà invezit centrade su zûcs pai plui piçui che a ziraran pai parcs des citâts galizianis.

Font: O Portal da Lingua Galega, 14/12/21

Paîs Catalans: progjet par sburtâ il catalan tal cjamp juridic

Disevot istituzions e entitâts dal principât di Catalogne e di Andorra – a partî dai dipartiments di justizie dai doi guviers – a àn sotscrit une convenzion par sburtâ l’ûs dal catalan in ambit juridic par mieç de creazion di un portâl di imprescj linguistics e repertoris specialistics a disposizion dai professioniscj dal setôr e di ducj che a àn a ce fâ cul lengaç juridic. Compendium.cat al metarà adun risorsis e fuarcis des entitâts publichis, des universitâts e des associazions di categorie che a àn a ce fâ cun chest setôr. Il fin al è di favorî l’ûs e la cualitât dal lengaç juridic catalan, e dâi visibilitât a imprescj e risorsis che cumò a son sparniçâts e no simpri facii di cjatâ tant che dizionaris, frasaris e manuâi juridics, ma ancje modei di documents specialistics precompilâts. L’acuardi al è viert al contribût e ae adesion di ducj chei ents che a volaran zontâsi.

Font: Generalitat de Catalunya, 13/12/21

Cornualie: il program Go Cornish al tache a jentrâ tes scuelis

La scuele de infanzie “Treloweth” a Rysrudh / Redruth e je la prime a adotâ il program Go Cornish che si propon di ufrî a ducj i fruts la oportunitât di imparâ alc de lenghe corniche (kernewek) e di scuvierzi alc di plui sul patrimoni culturâl che le compagne. Il program al è organizât in trê nivei di dificoltât, al met a disposizion diviersis risorsis pensadis par adatâsi a varis components dal curriculum di studi e al è disponibil in forme gratuite. Un dai obietîfs dal progjet, volût e sostignût dal Consei de Cornualie, al è di fâ cressi framieç dai fruts, des fameis e dai insegnants la cussience de impuartance de lenghe proprie e di fâlu cuntun sisteme che al sedi divertent e acessibil par ducj. Il progjet al è stât cjapât sù cun entusiasim dai fruts de scuele, braurôs di incressi la lôr cognossince de lenghe proprie de Cornualie e di podêle insegnâ ancje ai lôr gjenitôrs che te grande maiorance no àn nissune cognossince di cornic.

Font: ITV, 10/12/21

23/12/21

Paîs Catalans: in cressi lis violazions dai dirits linguistics

La Plataforma per la Llengua e à publicât il rapuart su lis denunciis di discriminazion e violazion dai dirits linguistics fatis indenant ae organizazion vie pal 2020. In dut si fevele di 1.303 segnalazions, in cressi dal 79,7% rispiet al an prime (tal 2019 a jerin stadis 725): un record che dut câs al sarà superât inta chest 2021 dal moment che il parziâl des denunciis ricevudis al passe za lis 1.500. Par chel che si riferìs ai dâts dal 2020 lis segnalazions a rivuardin in primis la violazion de normative in vore: une situazion favoride sei de suaze legâl statâl che e penalize lis lenghis couficiâls, sei de debolece des istituzions autonomichis intal fâ rispietâ lis leçs di normalizazion linguistiche. I problemis no tocjin dome il setôr public ma ancje chel privât là che lis segnalazions a rivuardin massime lis impresis di servizi (23,1%) e la grande distribuzion (17,4%). Cuasi il 90% des denunciis al rive de Catalogne. Un tant al dipent ancje di une normative di tutele plui flape e di une cierte “assuefazion” ae violazion dai dirits linguistics che si à tal Paîs Valenzian e tes Baleârs.

Font: VilaWeb, 09/12/21

Corsiche: pas indenant pai 3 presonîrs cors in regjim di DPS

Al è stât judicât une vore positîf il risultât dai incuintris che si son tignûts ai 9 di Dicembar a Parîs tra une delegazion de Assemblee e dal esecutîf de Corsiche (cun delegâts di Fà Populu Inseme, Avanzemu, Core in Fronte e Corsica Libera), dai parlamentârs elets su la isule (trê deputâts e un senatôr nazionaliscj, e un deputât de diestre moderade) e des associazions di solidarietât cui presonîrs politics, e i presidents dai diviers grups politics rapresentâts intal Parlament francês. Al centri des riunions la eliminazion dal regjim di DPS (détenu particulièrement signalé) o sei chel di massime sigurece par trê membris dal cussì clamât “commando Erignac” (Pierre Alessandri, Alain Ferrandi e Yvan Colonna) che a son daûr a scontâ une condane al ergastul a Poissy, te regjon parigjine. Doi di lôr a son in preson zaromai di 23 agns e il tierç di 18 e, pe stesse leç francese, a varessin dirit di scontâ il rest de lôr condane tune preson dongje di cjase lôr, in Corsiche. Une pussibilitât dineade par vie che ur ven sprolungjât an dopo an il regjim di massime sigurece. Ducj i parlamentârs francês che a àn partecipât aes riunions, a non di dut o de maiorance dai membris dal lôr grup, si son declarâts a pro de eliminazion dal DPS pai trê presonîrs cors prime de fin dal an, in maniere che a puedin jessi trasferîts su la isule. La decision e je tes mans dal prin ministri francês Jean Castex ma il fat che la grande maiorance dal Parlament e sedi a pro de eliminazion de massime sigurece e varès di zovâ ae cause dai trê militants cors impresonâts.

Font: Corse net Infos, 09/12/21

 

Scozie: rûl centrâl dal Bòrd na Gàidhlig in timps di pandemie

Il rapuart 2020-2021 su la ativitât dal Bòrd na Gàidhlig – la agjenzie publiche pe lenghe gaeliche scozese – al marche la funzion centrâl che chest organisim al à davuelt par judâ i arlêfs che a studiin par gaelic intai mês de sierade des scuelis par vie de crisi sanitarie. Tancj di lôr a rivin di fameis o di ambients là che no si fevele la lenghe proprie e duncje al jere vitâl creâ e ufrî imprescj e ocasions par doprâ e esercitâ il gaelic. Intant dal ultin an, tal plen de pandemie il Bòrd na Gàidhlig al à ancje sostignût lis realtâts associativis dal teritori finanziant cun 280 mil sterlinis 53 progjets diferents, creant un font di pueste pes comunitâts locâls là che la lenghe e je ancjemò vive, finanziant struments digjitâi pal aprendiment dal gaelic e invistint su la assunzion di personâl di impleâ pe normalizazion de lenghe a nivel teritoriâl. La agjenzie e à ancje judât 67 autoritâts publichis a disvilupâ o infuartî i lôr plans pal gaelic. Intal ultin an il Bòrd na Gàidhlig al à ricevût 5,3 milions di sterlinis: 1,5 pal personâl e pai coscj di funzionament, 2,6 milions par finanziâ fonts e bants, e 1,2 pai diviers plans strategjics.

Font: Bòrd na Gàidhlig, 09/12/21

Galizie / León: 1.115 i students di galizian tra Bierzo e Sanabria

Intant de riunion di supervision dal protocol di colaborazion tra il guvier de Galizie e chel di Castilie e León su la promozion dal galizian si à fat il pont sul insegnament de lenghe proprie tal Bierzo e in Sanabria, regjons di lenghe galiziane ma leonesis sul plan aministratîf. Intal an scolastic 2021 – 2022 il numar dai fruts che a àn podût studiâ il e par galego al è cressût a 1.115: 32 in plui dal an prime. Plui dal 80% di lôr a frecuentin la scuele de infanzie o lis primariis. A son 19 i istitûts dal Bierzo e de Sanabria là che si studie il galizian, tra di lôr ancje il liceu linguistic di Ponferrada. La colaborazion linguistiche tra lis dôs comunitâts e va aromai indenant di vincj agns.

Font: O Portal da Lingua Galega, 06/12/21

Paîs Basc: manifest a pro de ufierte audiovisive par euskara

Ai 4 di Dicembar il coordenament Pantailak Euskaraz al à presentât un manifest a pro des produzions audiovisivis par basc che al gjolt de poie di uns 35 tra i principâi agjents sociâi impegnâts pal euskara. Il document al fâs indenant dîs propuestis par sburtâ la normalizazion de lenghe basche ancje tal cjamp des produzions audiovisivis. I firmataris dal manifest a domandin prin di dut un aument dai finanziaments publics pal setôr che al previodi ancje di infuartî la radiotelevision publiche EiTB tant che imprest pe normalizazion dal euskara. Si propon po di meti sù une plateforme di streaming pes produzions par basc intant che si spiete di regolâ par leç la presince de lenghe proprie tes plateformis che za a son in vore. Si sburte ancje pal disvilup di une serie di leçs di setôr che a favorissin la creazion, il dopleament, la sottitulazion e la presince di audiovisîfs par euskara.

Font: EiTB, 04/12/21

Paîs Basc/ León: anulât il plan pal euskara di Trebiñu

Il tribunâl di Burgos al à anulât il plan pe lenghe basche fat bon de aministrazion comunâl di Trebiñu / Treviño, isule aministrative de Castilie e León dentri dal teritori de Comunitât Autonome Basche. Pai judiçs a fâ test no je la difusion sociâl dal euskara ta chel teritori ma il fat che tal statût di autonomie castilian nol è nissun ricognossiment uficiâl pe lenghe basche e duncje la aministrazion locâl no varès dirit di cjapâ misuris pe normalizazion dal euskara. A front di cheste decision, il comun nol à inmò fat savê se al fasarà ricors al tribunâl superiôr di justizie de Castilie e León.

Font: Diario de Burgos, 04/12/21

Asturiis: intal 2022 dome il 0,04% dal belanç pal asturian

La manovre di belanç de Comunitât des Asturiis pal 2022 e previôt 2 milions e 205 mil euros pal asturian, cuasi 130 mil euros in plui dal an prime. In realtât, dal moment che si à vût un aument complessîf des risorsis a disposizion de Comunitât, la percentuâl dai fonts pal asturian rispiet al totâl dal belanç e reste simpri ferme sul 0,04%. I fonts a laran ai servizis di normalizazion linguistiche di une cuindisine di ents locâi, ae federazion dai conseis comunâi asturians, ae universitât di Uviéu / Oviedo, ae radiotelevision publiche RTPA, ae societât publiche che e gjestìs la promozion turistiche e culturâl, ae Academie de Lenghe Asturiane, e a di une serie di progjets di promozion de lenghe proprie. Cundut dal progjet di riformâ il Statût di autonomie cu la introduzion de couficialitât dal asturian, intal belanç no son stadis previodudis risorsis par concretizâ cheste novitât.

Font: La Voz de Asturias, 02/12/21

Gales: cu la pandemie câl te abilitât dai fruts di doprâ il galês

Cuasi dutis lis scuelis là che si dopre il galês tant che lenghe di insegnament a àn segnalât intal ultin an une diminuzion intes abilitâts linguistichis dai fruts. Un tant al è leât massime al fat che tancj fruts, tai moments plui dûrs de emergjence sanitarie, no àn vût la pussibilitât di praticâ la lenghe. Il probleme al à colpît in primis i students che lis lôr fameis a fevelin pôc o nuie par galês, ma ancje chei che a rivin di cundizions sociâls plui dificilis che no vevin imprescj digjitâi adats par seguî lis lezions di cjase (didatiche a distance) o no vevin familiârs in stât di judâju cui compits. Cheste situazion, compagnade de mancjance di ocasions di socializazion, e à fat in maniere che, une volte tornâts a scuele in presince, tancj fruts si vedin mostrâts in dificoltât cul ûs orâl dal galês.

Font: Nation Cymru, 01/12/21

Sápmi: comunitâts in azion cuintri dai gnûfs progjets eolics

Tai ultins agns al è cressût l’interès pes risorsis naturâls de Tiere dai Sami (Sápmi). Tra lis ultimis iniziativis si segnale il progjet di dôs compagniis energjetichis (la finlandese ST1 e la Grenselandet AS) che a volaressin fâ sù dai parcs eolics inte aree sami dal stât norvegjês. Une delegazion dal Consei sami e dal Parlament sami de Norvegje si son cjatâts cui dirigjents des dôs aziendis par motivâ la oposizion de popolazion locâl al lôr progjet e par lamentâ il compuartament dai lôr rapresentants sul teritori che, in plui di tentâ di stiçâ contrascj dentri des comunitâts locâls, a àn fintremai menaçât di espropriâ lis tieris dai contraris. La presince di un rêt di implants eolics te tiere dai sami, no dome no ur puartarès nissun vantaç, ma e metarès a risi l’ambient, la culture e la economie tradizionâl de popolazion locâl, a partî dal arlevament des renis. Intant dal incuintri i delegâts sami a àn metût su la taule ancje une sentence resinte de cort supreme de Norvegje che e anule lis concessions par doi parcs eolics inte Tiere dai Sami propite par vie che a violin i dirits ricognossûts ai popui natîfs des convenzions internazionâls.

Font: The Barents Observer, 01/12/21

Paîs Catalans: mobilitazion pal model imersîf catalan

La plateforme unitarie Som Escola – che e met adun uns cuarante sogjet impegnâts pe educazion in lenghe catalane – si è dade adun ai 29 di Novembar par decidi lis iniziativis par rispuindi ae sentence dal tribunâl suprem spagnûl che e impon un 25% di oris di insegnament par castilian intal sisteme scolastic catalan alterant in maniere significative il model imersîf in vore cumò. I membris dal coordenament a calcolin intolerabil che i tribunâi a regolin lis politichis educativis decidudis di une comunitât e a fasin savê che a metaran in vore cetantis azions tes prossimis setemanis par difindi un sisteme scolastic, come chel catalan, che al è ancje un imprest centrâl pe coesion sociâl. La prime iniziative in program e je une mobilitazion popolâr che si tignarà ai 18 di Dicembar a Barcelone, tal plaçâl dal Arc di Trionf.

Font: VilaWeb, 29/11/21

Europe: progjets pes lenghis de regjon Pireneus Mediterani

La associazion di cooperazion teritoriâl Euroregjon Pireneus Mediterani – che e met adun la regjon aministrative de Ocitanie (stât francês) e lis comunitâts autonomis de Catalogne e des Baleârs (stât spagnûl) – e à decidût di inviâ un grup di lavôr par sburtâ lis lenghis propriis di cheste aree de Europe, o sei il catalan e l’ocitan. Si tacarà cun doi progjets pilote. Il prin al ponte a promovi l’ûs des dôs lenghis tra i zovins intes rêts sociâls e tai gnûfs canâi di comunicazion. Il secont al vûl favorî il scambi di esperiencis intal insegnament des lenghis ai adults. E je al esam ancje une tierce iniziative dedicade al progjet di un tradutôr neuronâl pal catalan e pal ocitan.

Font: Generalitat de Catalunya, 29/11/21

Paîs Basc: a coventin spazis di interazion sociâl par euskara

Diviersis fameis di lenghe basche che a vivin in areis castilianizadis dal Paîs Basc e che i lôr fîs a seguissin un percors di studi a imersion par euskara a àn inviât il progjet Arnas Dezagun. La iniziative e à chê di sburtâ lis scuelis a no dividi in classis diviersis i fruts che a àn il basc come prime lenghe e lis aministrazions locâls a creâ dai spazis di interazion sociâl che a vedin l’euskara di lenghe primarie. Ta cheste maniere a cirin di evitâ che i lôr fîs, cemût che al sucêt cumò, a vedin pocjis o nissune ocasion di fevelâ la lenghe proprie e a passin al castilian. La creazion di classis e di spazis là che la lenghe di riferiment e je il basc e judarès ancje i fruts che a son daûr a imparâlu ma no àn ocasion, fûr des lezions, di doprâlu.

Font: Naiz:, 27/11/21

30/11/21

Paîs Catalans: il suprem al impon il 25% di castilian a scuele

Cundut che nol è jentrât intal mert de cuistion limitantsi a sostignî che no jerin i elements par un ricors, il tribunâl suprem spagnûl al à confermât la sentence de cort superiôr di justizie de Catalogne che e impon un 25% di lezions par castilian intal sisteme scolastic catalan alterant cussì in maniere significative il model imersîf in vore te Comunitât. Dut al jere partît intal 2015 cuant che il ministeri pe educazion spagnûl – in chê volte tes mans dal PP – al veve fat ricors cuintri de leç catalane pe educazion. Intal 2020 la magjistrature i veve dât reson in prin grât causant un cuintriricors dal esecutîf catalan.

Danimarcje: domande di compens pe snazionalizazion dai inuit

Sîs inuit – membris de comunitât native de Groenlande – a domandin un risarciment al stât danês pal tratament subît cuant che a jerin piçui. A son i ultins ancjemò in vite di un grup di 22 fruts che tal 1951 a jerin stâts puartâts vie des lôr fameis par jessi menâts sul continent dulà che, daûr des intenzions dal guvier di in chê volte, a varessin vût di jessi trasformâts in “bogns danês”. La isule, che cumò e gjolt di une grande autonomie dentri dal ream di Danimarcje, par buine part dal secul stât e je stade tratade tant che une colonie. L’esperiment fat su chel grup di fruts al veve chê di trasformâju tun esempli pal rest de popolazion native. Par chest si veve domandât a insegnants e predis di selezionâ chei calcolâts plui adats, slontanantju po de lôr famee e de lôr tiere, gjavantjur lenghe e tradizions propriis, e fasintju tirâ sù di fameis danesis.

Irlande: ancje Westminster in ritart cu la leç sul irlandês

A son une cincuantine i grups impegnâts pe lenghe irlandese che a àn sotscrit un apel public par domandâ al guvier britanic che al puarti in Parlament cence altris ritarts une leç su la promozion dal gaelic irlandês tes sîs conteis dal Ulster che a fasin part dal Ream Unît e par vê un incuintri urgjent su chest teme cui rapresentants dal esecutîf. In Jugn il segretari di stât pe Irlande dal Nord, Brandon Lewis, al veve sigurât che se lis istituzions nordirlandesis no vessin fate buine la normative dentri di Setembar, lu varès fat il Parlament di Londre vie pal mês di Otubar. Otubar al è passât, Novembar al è cuasi insom, lis sessions di lavôr in program a Westminster prime de fin dal an a son a pene une grampe e la leç sul gaelic no je stade inmò calendarizade. Un delegât dal esecutîf britanic al à sigurât che chest timp al ven doprât par meti jù un test che al minimizi il risi di emendaments e di un slungjâsi dai lavôrs de aule. Pe organizazion Conradh na Gaeilge però chest rimant continuât al è daûr a causâ une erosion de fiducie tal guvier di Londre, tant plui che lis istituzions britanichis si vevin impegnadis in maniere clare pe normative sul irlandês ancjemò tal 2006 cui acuardis di Sant Andree (Saint Andrews Agreement). I dirits rimandâts – a àn zontât – a son dirits dineâts.

Font: Irish News, 23/11/21

Gales: lenghe e crisi abitative tal pat tra guvier e Plaid Cymru

Il guvier galês vuidât dai Laburiscj al à sotscrit un acuardi trienâl cui nazionalitaris dal Plaid Cymru che al cjape dentri 46 areis di intervent. No si trate di un pat di coalizion ma di un plan di lavôr par rivâ a obietîfs condividûts che al lasse libars i firmataris di movisi in autonomie su chei altris temis. I contignûts dal acuardi a son stâts presentâts ai 20 di Novembar dal prin ministri galês, Mark Drakeford, e dal leader dal Plaid Cymru, Adam Price. Tra i ponts dal plan o cjatìn un intervent radicâl e imediât par frontâ la crisi de secondis cjasis e dai presits dai alozaments, diviersis azions pe transizion ecologjiche, l’inviament di un sisteme sociosanitari gratuit, une riforme de Assemblee nazionâl galese, l’insegnament curicolâr de storie dal Gales, la incressite dai spazis scolastics di e par galês, la difese de microtoponomastiche in lenghe galese.

Gales: in cressi la rêt dai centris a imersion linguistiche

Il guvier galês al à fat savê che si slargjarà la rêt dai centris a imersion in lenghe galese. Si trate di struturis educativis indreçadis massime ai arlêfs des primariis che no àn familiaritât cul galês e che, par mieç di chescj centris, a puedin cjapâ sù chês competencis che i permetaran po di frecuentâ lis scuelis bilengâls cence restâ indaûr. In gracie di une dotazion di 2 milions e 200 mil sterlinis si previôt la creazion di vot centris gnûfs in areis là che fin cumò no ‘nd jere e di infuartî altris struturis za operativis.

Font: Nation Cymru, 22/11/21

Scozie: tal 2022 la prime Setemane mondiâl dal gaelic

Inte Vierte di chest an che al ven si davuelzarà in Scozie la prime Setemane mondiâl dal gaelic (Seachdain na Gàidhlig). Tra i promotôrs principâi de iniziative al è il Bòrd na Gàidhlig, la agjenzie scozese pe lenghe gaeliche. La Setemane si propon di celebrâ la vitalitât dal gaelic e il so rûl inte societât moderne, cul fin di sburtâ la int a doprâ di plui cheste lenghe e di infuartî i leams tra lis comunitâts gaelichis in Scozie e ator pal mont. Il program complet de manifestazion al sarà presentât sul imprin dal 2022.

Font: The National, 21/11/21

Paîs Basc: in disinis di miârs in place pe Republiche Basche

Disinis di miârs di personis a àn jemplât lis stradis di Bilbo / Bilbao ai 20 di Novembar par rivendicâ une Republiche basche formade di citadins libars e compagns intune zornade segnade ancje dal ricuart dai doi militants de çampe indipendentiste Santi Brouard e Josu Muguruza, sassinâts propite ta cheste date dai GAL – i grups paramilitârs spagnûi –, il prin intal 1984 e il secont trê agns plui tart. La partecipazion ae manifestazion inmaneade di EH Bildu – la coalizion de çampe indipendentiste basche – e je lade cetant plui innà di ce che si spietavisi, confermant la capacitât di mobilitazion di cheste aree politiche. Ae iniziative a àn partecipât ancje rapresentancis di altris moviments nazionalitaris tant che il BNG (Galizie), Andecha Astur (Asturiis), la CUP, ERC e Més per Mallorca (Paîs Catalans). La manifestazion e je stade compagnade di une sdrume di bandieris baschis e navaris e di slogans a pro de indipendence e pai presonîrs politics. Intal intervent finâl, il coordenadôr gjenerâl di EH Bildu, Arnaldo Otegi, al à ricuardât cemût i bascs a son stâts bogns di fâi cuintri a dutis lis strategjiis metudis in at par fâju disparî come popul ma che il stât naturâl dai popui nol è la resistence ma la libertât.

Font: Naiz:, 20/11/21; La Vanguardia, 20/11/21

Paîs Basc: Euskaraldia si tignarà tal Novembar dal 2022

La tierce edizion di Euskaraldia, la iniziative che si propon di sburtâ l’ûs sociâl de lenghe basche, si davuelzarà dai 28 di Novembar ai 2 di Dicembar dal 2022. La gnove e je stade comunicade intant de presentazion fate ai 20 di Novembar a Iruñea / Pamplona. Il sproc de gnove edizion al è «Hitzez ekiteko garaia», ven a dî «timp di agjî cu la peraule». L’intindiment al è chel di incidi su lis normis sociâls che a pidiment l’ûs dal euskara proponint compuartaments linguistics gnûfs e di ufrî ae citadinance i imprescj miôr cambiâju. In chest sens, une des prioritâts de prossime edizion e sarà di infuartî i arigune, o sei i spazis dulà fevelâ par basc in maniere naturâl che a restaran in vore ancje dopo che la manifestazion e sarà finide. Pôc mancul di 180 mil personis a àn partecipât ae seconde edizion di Euskaraldia: un sucès che, pai organizadôrs, al pues aumentâ ancjemò di plui. Ancje par chest si à za tacât a lavorâ sui grups locâi che a rapresentin il spinâl de iniziative.

Font: EiTB, 20/11/21; Eusko Jaurlaritza - Gobierno Vasco, 20/11/21

Paîs Catalans: e nas la plateforme unitarie “Bon dia TV”

Lis trê Comunitâts autonomis cjapadis dentri tal spazi linguistic catalan a àn decidût di meti sù une plateforme televisive che e judi a infuartî chest lôr leam. Plui tal specific, la Corporazion Valenziane dai Mieçs di Comunicazion (CVMC), la Corporazion Catalane dai Mieçs Audiovisîfs (CCMA) e l’Ent Public de Radiotelevision des Isulis Baleârs (EPRTVIB) a àn inviât Bon dia TV, une plateforme digjitâl dulà condividi lis lôr produzions audiovisivis par di là dai confins aministratîfs. Par cumò si trate di un spazi là che lis trê televisions publichis – À Punt, TV3 e IB3 – a metin a disposizion i contignûts che a produsin in maniere autonome e te proprie varietât ma, in prospetive, si vûl elaborâ ancje une programazion informative e culturâl unitarie. Un tant al dipent però des risorsis economichis che la gnove iniziative e varà a disposizion e che, in spiete de aprovazion dai belançs dai trê guviers, a son inmò di fissâ. Vuê come vuê la cjadene televisive valenziane e gjolt di finanziaments publics par 66,9 milions di euros, chê catalane par 284 milions e chê baleâr par 33 milions.

Font: El Diario, 19/11/21

Man: iniziative par svicinâ la famee linguistiche gaeliche

Par iniziative de Bunscoill Ghaelgagh de isule di Man, dôs artistis a àn realizât une serie di cartulinis trilengâls pai fruts, adatadis ancje in formât di placât e dedicadis a siet temis diviers, o sei mangjâ, timp, emozions, animâi, colôrs, vistîts e splaze. Lis figuris a son compagnadis dai nons par manx, gaelic scozês e irlandês, ven a dî lis trê lenghis che a fasin part de famee gaeliche. Nassude di un viaç di studi in Irlande dal Nord fat dai fruts de Bunscoill Ghaelgagh intal 2019, cheste iniziative – ancje se piçule – e à un valôr simbolic impuartant. Lis cartulinis, di fat, a saran dopradis dai fruts de scuele a imersion de isule di Man par metisi in contat cun chei des scuelis gaelichis de Scozie e de Irlande par cognossisi miôr e infuartî i leams tra lis lôr lenghis.

Font: IOM Today, 19/11/21

Paîs Basc: lis ikastolas a proponin di slargjâ il model a imersion

Il Parlament de Comunitât Autonome Basche al è daûr a scoltâ in audizion une rie di esperts par tirâ sù dâts e parês pe gnove leç su la educazion che il guvier al ponte a meti adun chest an che al ven. Un dai temis centrâi al è chel dal euskara dal moment che, si ben che tai ultins agns a son aumentâts i students che a frecuentin il model a imersion o chel bilengâl, il nivel di ûs e di cognossince de lenghe si à sbassât. Se i nazionaliscj che a son cumò ae vuide dal guvier basc (PNV) si mostrin a pro di une riforme dal sisteme atuâl fondât su la pussibilitât pes fameis di sielzi tra model A (par castilian cul basc come materie), B (bilengâl) o D (par basc cul castilian come materie), Ikastolen Elkartea – entitât che e ten adun 111 istitûts scolastics a imersion dal Paîs Basc (Comunitât Autonome Basche, Navare e Paîs Basc setentrionâl) – e à proponût invezit di slargjâ il model imersîf doprât des ikastolas a dut il sisteme scolastic basc, sei public che parificât. Une linie – chê di slargjâ il model D a dutis lis scuelis – che e à cjatât in cunvigne ancje EH Bildu (çampe indipendentiste), o sei il secont partît par impuartance dal Paîs Basc.

Font: El Correo, 17/11/21

Paîs Basc: presentât il plan strategjic dal euskara 2021-2024

Ai 16 di Novembar il president dal guvier basc (lehendakari), Iñigo Urkullu, al à presentât al consei consultîf pe lenghe basche la agjende strategjiche dal euskara 2021 – 2024, ven a dî il plan plurienâl di politiche linguistiche fat bon dal esecutîf basc sul principi dal mês. A son trê lis liniis di azions principâls che il plan si propon di rivâi, ven a dî: incressi la cognossince de lenghe basche e aumentâ il so ûs sociâl, cuntune atenzion particolâr ai ambits socioculturâi, economics, digjitâi e de aministrazion publiche; movisi in direzion dal rispiet plen dai dirits linguistics e di une convivence linguistiche normâl; e infuartî la colaborazion interistituzionâl tra i teritoris di lenghe basche. Ogni obietîf al è compagnât di une rie di azions pratichis di meti in cjamp. Par controlâ la progression de agjende strategjiche si à ancje decidût di meti in pîts une comission formade dai rapresentants di ducj i dipartiments e lis agjenziis publichis clamâts a meti in vore il plan.

Font: Eusko Jaurlaritza - Gobierno Vasco, 16/11/21

Paîs Catalans: aument dai fonts pe politiche linguistiche

Il guvier catalan (Generalitat de Catalunya) al à cressût dal 28,3% lis risorsis pal dipartiment pe culture e si svicine al obietîf dal 2% dal belanç metût su chest cjamp. La Catalogne si conferme cussì une des comunitâts che e invistìs di plui in culture, cun finanziaments di setôr che a son plui alts de medie spagnole e ancje di chê europeane. Ta cheste suaze a son cressûts ancje i fonts pe politiche linguistiche che dai 31,2 milions dal 2020 a passin a 38,8 milions. A son invezit di 27,2 milions – il 17,3% in plui dal an prime – lis risorsis par miorâ la acessibilitât ae lenghe catalane e aumentâ i nivei di cognossince framieç de popolazion adulte e dai gnûfs rivâts. In cressi a son ancje i fonts pes produzions audiovisivis dopleadis o sottituladis par catalan, cun 5 milions di euros disponibii. Lis risorsis pe normalizazion dal ocitan aranês a son stadis cressudis dal 16% e chês pe difusion de lenghe dai segns catalane fintremai dal 114%.

Font: Generalitat de Catalunya, 15/11/21

18/11/21

Gales: si invistìs su lis scuelis a imersion, il câs di Caerffili

L’obietîf di incressi il numar des personis buinis di fevelâ par galês al è condividût di diviersis istituzions e, tra chestis, o cjatìn ancje l’esecutîf provinciâl di Caerffili / Caerphilly, une contee dal Gales sudorientâl cun sù par jù 180 mil abitants là che dome une persone su cuatri e fevele la lenghe proprie. La aministrazion provinciâl e à decidût in particolâr di pontâ su la scuele cul aumentâ i istitûts cul sisteme a imersion par galês. Inte suaze dal plan strategjic pe educazion imbastît dal guvier galês, l’esecutîf provinciâl al à programât invistiments par 6,4 milions di sterlinis in doi agns, come a dî cuasi 7 milions e mieç di euros. Dopo dal milion e 800 mil sterlinis za spindûts chest an par completâ la Ysgol Y Castell, chest an che al ven a varessin di rivâ insom i lavôrs par altris trê scuelis, intant che tal Fevrâr dal 2023 e sarà disponibile une cuinte scuele a imersion in maniere di rispuindi al cressi de domande e di stiçâ ancje altris fameis a sielzi chest percors pai lôr fîs.

Font: Nation Cymru, 10/11/21

Ocitanie: mobilitazion pal ocitan a scuele a Castras

La presince de lenghe ocitane te scuele publiche dal stât francês si ricjate a frontâ cetancj problemis, di chel pal reclutament dai insegnants fin ai pidiments e ai berdeis che a rivin dal ministeri pe educazion e di diviersis aministrazions scolastichis locâls. Par riclamâ la atenzion sui problemis specifics de sezion bilengâl de scuele publiche Louis David di Castras / Castres i gjenitôrs dai fruts che le frecuentin a àn inviât une petizion in linie che e à cjatât duarman la poie des associazions dai insegnants e des sezions teritoriâls dal Istitût di Studis Ocitans (IEO), de organizazion Òc-Bi, dal Centri Regjonâl dai Insegnants di Ocitan (CRÈO), e dal Centri Ocitan dal Paîs Castrês. No si trate dut câs dome di une iniziative di proteste ma ancje di propueste. La petizion, di fat, e propon la creazion di un grup di lavôr che al meti adun ducj i atôrs dal insegnament public dal ocitan, la creazion di une seconde sezion bilengâl e la vierzidure di un percors bilengâl ancje tal coleç locâl di maniere di dâi continuitât al insegnament de lenghe proprie.

Font: Jornalet, 08/11/21