Aragon: no di Madrid al aragonês come classe di insegnament

Il tentatîf dal esecutîf dal Aragon di otignî une classe di concors pal insegnament dal aragonês si à cjatât denant dal “no” dal ministeri spagnûl pe educazion. La motivazion dade par chest dinei e je che nol è avonde che si trati di une lenghe minorizade ricognossude e tutelade ma, par otignî il ricognossiment di une categorie di insegnament specifiche, al covente che cheste lenghe e sedi ricognossude ancje come couficiâl. Intal câs dal Aragon chest al oblearès a mudâ il Statût di autonomie, cuntun percors lunc e par nuie sempliç. A cambiâ la linie dal guvier di Madrid no à coventade nancje la sigurazion che la Comunitât dal Aragon e varès cuviert jê ducj i coscj pai insegnants ricognossûts. In dì di vuê l’aragonês – che si stime che al sedi cjacarât o almancul cognossût dal 3% de popolazion de Comunitât – al è za presint come materie di insegnament a scuele ma i 21 professôrs che lu insegnin (tra scuele de infanzie, primariis e secondariis) si cjatin intune posizion lavorative precarie che ju sburte a cirîsi une ocupazion plui garantide.

Font: Heraldo, 14/09/22

Aragon: si slargje la ufierte di aragonês a Huesca

Si slargje la ufierte di aragonês inviade te seconde metât dal an academic stât alì de sede universitarie di Uesca / Huesca. Par dut l’an academic 2022 – 2023 i students che a studiin alì, di là de facoltât frecuentade, a podaran integrâ tal lôr percors di studi specific il cors di lenghe aragonese. Si previodin doi nivei formatîfs che lis lôr lezions a saran disponibilis par ducj e doi i semestris di studi. Cun di plui, ancje par chest Astât, la sede distacade de universitât di Zaragoza e à inmaneât un cors in linie di inviament ae lenghe aragonese che al permet ancje di aumentâ i credits formatîfs di cui che lu frecuente.

Font: Heraldo, 27/07/22

Aragon: at par istituî la specialitât di insegnament dal aragonês

Il guvier dal Aragon al à dade fûr une ordenance là che si regole la modalitât par acedi al puest di professôr di lenghe aragonese. Il document al fisse i nivei di competence linguistiche che a coventin par aspirâ a chest puest e i criteris di selezion. Cun chest at l’esecutîf aragonês si propon di procedi par mieç de sô autonomie legjislative a ricognossi la specialitât di insegnament dal aragonês. La soluzion e je stade sielzude ancje par vie dal precedent asturian: il guvier des Asturiis, di fat, al è zaromai di timp che al prove, cence sucès, a fâ modificâ dal ministeri spagnûl pe educazion il decret su lis specialitâts. Lis autoritâts di Madrid a motivin il lôr dinei cul fat che l’asturian nol è ricognossût de Comunitât autonome tal so Statût come lenghe uficiâl. Une situazion che e vâl ancje pe lenghe proprie dal Aragon.

Font: Asturies.com, 12/05/22

Aragon: prin centri di interpretariât pal aragonês

Al è stât metût sù alì dal ex munistîr di Casbas de Huesca il prin centri di interpretariât pal aragonês (Zentro d’Interpretazión de l’Aragonés “Ana Abarca de Bolea”). Si trate de prime struture stabile pal studi, pe promozion e pe difusion de lenghe proprie dal Aragon. In plui de pussibilitât di davuelzi diviersis ativitâts culturâls, il centri i da acet a di une esposizion permanente su la storie dal aragonês e su la culture veicolade par mieç di cheste lenghe.

Font: Diario del Alto Aragon, 06/05/22

Aragon: si slargje il studi dal aragonês te universitât

Ducj i students dal campus di Uesca / Huesca a podaran, za a partî di chest mês di Març, integrâ tal lôr percors di studi specific il cors di lenghe aragonese. Cheste pussibilitât e jere previodude dome par cui che al studiave linguistiche ma cumò la sede distacade de Universitât di Zaragoza e à decidût di permeti a ducj i students, di là de facoltât frecuentade, di meti la introduzion ae lenghe aragonese tal lôr plan di studis. Il cors al ufrìs lis cognossincis di fonde su la lenghe, su la sô evoluzion storiche e su la sô gramatiche, intune cui prins elements di comunicazion scrite e orâl par aragonês.

Font: Heraldo, 20/02/22

Aragon: l’aragonês si zonte aes lenghis di lavôr de CTP

La Comunitât di Lavôr dai Pireneus (CTP) e introdusarà in maniere progressive l’aragonês inte suaze di chest organisim internazionâl di cooperazion transfrontaliere che al met adun lis regjons e lis comunitâts autonomis dal Aragon, de Catalogne, de Ocitanie, de Gnove Aquitanie, de Navare, de Comunitât Autonome Basche e il Principât di Andorra. La decision e je stade cjapade dal comitât esecutîf de Comunitât di Lavôr su domande dal guvier dal Aragon. L’aragonês si zontarà cussì aes lenghis di funzionament za ricognossudis di chest organisim. Ancje il sît internet de Comunitât di Lavôr – che in dì di vuê al è disponibil par basc, catalan, castilian, francês, inglês e ocitan – al sarà voltât inte lenghe proprie dal Aragon.

Font: Ara Info, 22/10/21

Aragon: atac ai organisims di politiche linguistiche

Intai ultins agns lis autoritâts dal Aragon a vevin cressût lis ativitâts par tutelâ e par promovi lis lenghis propriis ma il Parlament locâl al à votât a pro di une misure che e va juste te direzion contrarie. La Assemblee e à di fat poiât a maiorance une propueste fate indenant di Vox, il partît de estreme diestre spagnoliste, par eliminâ la direzion gjenerâl di politiche linguistiche dal guvier dal Aragon, l’Istitût Aragonês pal Catalan e l’Istitût pal Aragonês. La uniche oposizion fuarte a cheste linie e je rivade dai rapresentants de federazion locâl di Podemos / Podèm. La asse de diestre spagnoliste pes lenghis propriis si le à viodude a clâr propit intant dal intervent di un dai deputâts di Podemos / Podèm, Nacho Escartin. Cuant che, in plui che par castilian, al à fevelât ancje par aragonês e par catalan, i parlamentârs dal PP i àn vosât cuintri e chei di Vox a son jessûts de Aule.

Font: Jornalet, 14/09/21

Aragon: aplicazion par fâ cognossi la leterature par aragonês

Ai 21 di Avrîl, inte suaze de Zornade dal Aragon, si à presentade la aplicazion LiteARAtura che si propon di slargjâ l’acès ae leterature in lenghe aragonese. La iniziative e nas de colaborazion jenfri la direzion pe politiche linguistiche dal guvier dal Aragon e une aziende informatiche. La aplicazion e met a disposizion dutis lis oparis par aragonês za disponibilis in formât digjitâl, lis biografiis di passe tresinte autôrs e un spazi di pueste pes cjasis editoris che a lavorin par fâ cognossi la leterature aragonese. L’archivi al sarà integrât cun gnovis oparis a man a man che a saran digjitalizadis e, tra chestis, ancje chês de colezion Isabel de Rodas che e cjape dentri tescj classics voltâts par aragonês. L’intervent dal guvier locâl al à permetût intai ultins agns di moltiplicâ lis iniziativis par meti a disposizion dai citadins materiâi e servizis linguistics par aragonês.

Font: Heraldo, 21/04/21

Spagne: fate buine une part de PNL pe avualiance linguistiche

Il Parlament spagnûl al à fate buine, ma dome in forme parziâl, une propueste no di leç (PNL) pe avualiance linguistiche presentade de coalizion de çampe indipendentiste basche EH Bildu cu la poie di altris partîts nazionalitaris bascs, catalans e galizians (JxCat, CUP, ERC, PDCAT, Compromís, PNV e BNG) e de çampe spagnole (Podemos e Más País). La iniziative e cjapave spont dal manifest «Libertât, avualiance, democrazie» fat indenant intal Fevrâr dal an passât des organizazions principâls impegnadis pai dirits linguistics (Ómnium Cultural, Plataforma per la Llengua, Acció Cultural del País Valenciá, Obra Cultural Balear, CIEMEN, Kontseilua, A Mesa pola Normalización Lingüística, Iniciativa pel Asturianu e Nogará) che si son cjatadis cui parlamentârs favorevui al test ae vilie dal vôt. A jessi aprovâts a son stâts dome i contignûts de propueste che a àn vût ancje la poie dal PSOE. A passâ, par esempli, al è stât l’impegn a favorî la riforme dai Statûts di autonomie par rivâ a ricognossi la uficialitât des lenghis propriis in ducj i teritoris là che a son feveladis, come il basc in ciertis parts de Navare o il galizian intes Asturiis e in Castilie León, o di chês che ancjemò no àn chest status, tant che asturian e aragonês. Il Parlament spagnûl al à dite di sì ancje al ûs di chestis lenghis tes aministrazions locâls che fin cumò, par diviersis resons, no garantivin chest dirit. Boçade invezit la domande che i funzionaris statâi in servizi tai teritoris cun lenghe proprie a vedin di cognossi chestis lenghis. Nuie ce fâ nancje par meti fin ae imposizion dal castilian inte normative statâl e garantî la plene avualiance linguistiche.

Font: EiTB, 09-11/03/21; Consello da Cultura Galega, 12/03/21

Aragon: un altri acuardi par sburtâ l’ûs des lenghis propriis

Ancje tal imprin di chest 2021 il guvier dal Aragon al va indenant a firmâ acuardis di colaborazion cun realtâts associativis dal teritori par sostignî e sburtâ progjets a pro des lenghis propriis di cheste comunitât, ven a dî l’aragonês e il catalan. Plui tal specific, l’ultin pat sotscrit al è chel cul sindacât SOA STA (Sindicato Obrero Aragonés - Sendicato d’os Traballadors e Traballadoras d’Aragon), che al veve za tacât a movisi su chest front massime sul plan de formazion. La colaborazion e previôt: la partecipazion dal sindacât al program di socializazion linguistiche Agora x l’aragonés; la inclusion des lenghis propriis intes campagnis, intes ativitâts e tes publicazions sindacâls; e la organizazion o la poie a progjets di formazion linguistiche dai siei associâts e, plui in gjenerâl, dai lavoradôrs aragonês.

Font: El Economista, 13/01/21

Aragon: imprescj digjitâi par sburtâ la lenghe proprie

Cun chê di sburtâ la lenghe proprie, il guvier dal Aragon al à metût fûr la aplicazion par telefonie mobile Agora x l’aragonés che e favorìs l’acès a diviersis risorsis linguistichis disvilupadis ta chescj agns. Par mieç di une aree privade la app e permet ancje di meti in contat tra di lôr lis personis che a àn gole di cjacarâ par aragonês. A disposizion dai citadins e je po la version beta di TraduZe, il program che al permet di voltâ par aragonês tescj, documents e pagjinis web. Il tradutôr al è disponibil sul portâl “Lenguas de Aragon” intune cul dizionari Aragonario, materiâi didatics, formularis bilengâi e altris imprescj e informazions utilis par cui che al dopre o al à gole di imparâ l’aragonês.

Font: La Vanguardia, 10/12/20

Stât spagnûl: iniziative legjislative pe avualiance linguistiche

Une propueste no di leç pe avualiance linguistiche e je stade presentade tal Parlament spagnûl dai partîts nazionalitaris bascs (EH Bildu, PNV), catalans (JxCat, CUP, ERC, PDCAT, Compromís) e galizians (BNG) cu la poie ancje di Podemos e Més Madrid. La iniziative e cjape spont dal manifest «Libertât, avualiance, democrazie» che al jere stât fat indenant in Fevrâr des organizazions principâls impegnadis pai dirits linguistics (Ómnium Cultural, Plataforma per la Llengua, Acció Cultural del País Valenciá, Obra Cultural Balear, CIEMEN, Kontseilua, A Mesa pola Normalización Lingüística, Iniciativa pel Asturianu e Nogará). L’obietîf al è chel di rivâ a di une legjislazion che e garantissi pardabon il dirit dai citadins a vivi te lôr lenghe proprie. Cun di fat, di là des declarazions di principi, a son ancjemò cetantis lis situazions là che chest nol è pussibil, a partî dai rapuarts cu la aministrazion centrâl dal stât e de justizie.

Font: Nos Diario, 03/12/20

Aragon: gnûfs acuardis par sburtâ l’ûs des lenghis propriis

Il guvier dal Aragon al à sotscrit acuardis di colaborazion cun vot realtâts associativis diviersis cun chê di saborâ e sostignî progjets che a favorissin lis lenghis propriis di cheste comunitât, ven a dî l’aragonês e il catalan. Plui tal specific, i pats a interessin cinc sindacâts (UGT, CCOO, STEA, OSTA e UAGA-COAGA), l’ordin dai editôrs dal Aragon (Aeditar) e lis organizazions Plena Inclusión Aragón e CEOS-Cepyme Huesca. I acuardis gnûfs si zontin a chei sotscrits tai mês stâts cun plui di trente ents locâi e sessante associazions. La colaborazion si centre te partecipazion dai diviers sogjets intai programs di socializazion linguistiche tant che Agora x l’aragonés. L’obietîf al è ancje chel di sburtâ chestis entitâts a doprâ lis lenghis propriis intes lôr ativitâts editoriâls, di formazion e promozionâls.

Font: Diario del Alto Aragon, 25/11/20

Aragon: la Chunta e domande emissions par aragonês

Il moviment nazionalitari Chunta Aragonesista (ChA) al à domandât ae aministradore uniche de radiotelevision publiche spagnole RTVE, Rosa María Mateo, di mantignî l’impegn che si veve cjapât di rispietâ dutis lis lenghis dal stât e di garantî contignûts par aragonês intes trasmissions de sede locâl de emitente statâl. La Mateo e à ricuardât che tai ultins agns lis trasmissions dal centri teritoriâl de RTVE in Aragon a àn vût avonde atenzion ae lenghe proprie ma e à ricognossût che no si le à mai doprade in maniere veicolâr intai programs.

Font: La Vanguardia, 21/06/20

Aragon: sierât l’ufici pe lenghe aragonese di Uesca

Cui 30 di Mai l’ufici pe lenghe aragonese (OLA) di Uesca / Huesca al à sierât. Cun di fat i fonts pe sô ativitât no son stâts confermâts intal belanç pal 2020 par vie che, al è stât spiegât, lis prioritâts a saressin altris. Il cost anuâl dal servizi al jere a pene di 21 mil euros, plui altris 7 mil pes sôs azions di promozion. La motivazion no je duncje di nature economiche ma politiche. Il PSOE – che al vuide la citât cuntun guvier di minorance – al à concuardât la sierade dal progjet cul partît de estreme diestre spagnoliste Vox par otignî la sô astension intant dal vôt sul belanç. Cualchi mês prime, simpri par garantîsi une cualchi poie de bande de diestre spagnoliste (PP, Ciudadanos, Vox), i socialiscj a vevin fat gjavâ i cartei che a devin il benvignût in citât par castilian e par aragonês. La sierade dal ufici, al à comentât il partît nazionalitari Chunta Aragonesista, e palese il dispresi che chescj partîts a àn pe lenghe proprie e pe culture dal Aragon. A fâi cuintri ae sierade dal ufici al jere stât ancje il grup progressist Aragón Sí Puede.

Font: Heraldo de Aragón, 01/06/20

Aragon: al è daûr a rivâ il prin tradutôr automatic dal aragonês

Ai 27 di Fevrâr e je stade presentade la prime version di “TraduZe”, il prin tradutôr automatic dal aragonês che al è cumò inte fase de sperimentazion. Si trate di une iniziative che si insuaze tun progjet european fat adun cun bascs e ocitans che si propon di disvilupâ tecnologjiis informatichis intes lenghis propriis dai trê teritoris interessâts. Simpri par chel che al rivuarde l’aragonês, si à prontât il prototip di sintesi vocâl che al sarà disponibil dentri de fin di Març e il tierç inzornament dal “Aragonario”, il dizionari di aragonês in rêt che al è rivât a passâ lis 23 mil jentradis. Il numar dai utents di chest imprest informatic al è cressût in maniere significative e, in dì di vuê, al conte une medie di un miâr di consultazions par dì.

Font: El Periodico de Aragón, 27/02/20

Asturiis / Aragon: prins esams di certificazion linguistiche

Il guvier des Asturiis al à convocât pal mês di Mai i prins esams di certificazion di lenghe asturiane. Lis provis a saran viertis a di un massim di 500 personis. Chês che a passaran i esams a podaran doprâ i certificâts come titul di merit intai concors fats des aministrazions locâls. L’esecutîf des Asturiis al à fat bon intal Jugn dal an passât il decret che al fisse i nivei di competence tal ûs dal asturian daûr dai criteris fissâts dal cuadri comun european di riferiment pes lenghis, e plui tal specific pai nivei di base A1 e A2, par chei mezans B1 e B2, e pal C1. Dopo dal prin esam, che al interesse il nivel B2, il guvier si è impegnât a davuelzi almancul une session di esams ad an par ogni nivel. L’asturian al jere restât l’ultin tra lis lenghis minorizadis dopradis intal ream di Spagne a no vê une certificazion, cun di fat lis primis provis pal aragonês si son davueltis prime de fin dal 2019 cu la partecipazion di 473 personis. Ta chel câs i esams a interessavin trê nivei: l’A2 (là che al è passât il 79,07% dai candidâts), il B1 (che al à vût il 49,09% di promòs) e il B2 (cul 71,94% di candidâts che a àn otignude la certificazion).

Font: El Comercio, 04/02/20; La Voz de Asturias, 06/02/20

Aragon: test par aragonês sul boletin uficiâl di Huesca

Il boletin uficiâl de provincie di Uesca/Huesca al à publicât il test par aragonês dal regolament dai premis dal festival internazionâl dal documentari etnografic dal Sobrarbe. Si trate di un dai prins esemplis dal ûs di cheste lenghe tes publicazions uficiâls des istituzions aragonesis. Al è un at simbolic che al rapresente però un pas indenant impuartant intal procès di normalizazion de lenghe proprie dal Aragon che ta chescj ultins agns, rivade aromai cuasi sul pont di disparî, e je al centri di diviers iniziativis di riscuvierte e di promozion.

Font: El Periódico de Aragón, 15/01/20

Aragon: passe un milion di visitis par “Lenguas de Aragón”

A doi agns de sô ativazion, il sît Internet “Lenguas de Aragón” al à passât il milion di visitis. La medie di utents che lu vierzin ogni dì e je tor dai tresinte ma e je cressude in maniere progressive cul cressi dal sît stes. Il portâl dedicât ae lenghe aragonese e al catalan dal Aragon al ufrìs gnovis di atualitât, informazions su lis ativitâts e i progjets de direzion gjenerâl di politiche linguistiche dal guvier dal Aragon, imprescj didatics che a puedin jessi discjariâts o doprâts in rêt, un archivi sonôr cun cuasi 2 mil regjistrazions e un dizionari che al volte 17 mil vocabui dal castilian al aragonês. L’interès pes lenghis propriis dal Aragon al è daûr a cressi ancje fûr di cheste comunitât autonome cemût che al mostre il numar di utents dal sît che a vivin fûr dal stât spagnûl.

Font: Diario del Alto Aragon, 21/12/19

Aragon: rispueste di Charramos Aragonés ai atacs ae lenghe

La plateforme Charramos Aragonés e à presentât ricors aministratîf cuintri de decision de aministrazion comunâl di Uesca/Huesca di tirâ vie i cartei che a devin il benvignût in citât par castilian e par aragonês. Intal câs che il comun al resti fer su la sô posizion, a àn fat savê che a cjaparan la vie judiziarie. A lôr parê no si pues tornâ indaûr sul vôt comunâl dal 2016 che al ricognosseve la citât come part de aree di ûs tradizionâl dal aragonês. Cun di fat, ridusi o eliminâ dirits linguistics ricognossûts al larès cuintri de suaze legâl fissade cu la ratifiche de Cjarte europeane des lenghis regjonâls o minoritariis. Tant plui che, ancje se l’aragonês al è fevelât di une part minoritarie de popolazion citadine – cemût che si à dite par justificâ il ritîr dai cartei bilengâi –, une sentence dal tribunâl costituzionâl spagnûl e spieghe che la protezion garantide de leç a di une lenghe minorizade e vâl di là dal numar des personis che le fevelin.

Font: El Diario, 28/10/19