10/04/12

Stât francês: disinis di miârs in place pes lenghis minorizadis

Grande partecipazion pe zornade di mobilitazion che si è davuelte sabide ai 31 di Març par sburtâ il guvier e il parlament francês par fâ buine une leç che e garantissi i dirits linguistics des comunitâts minorizadis che a vivin ta chest stât. La manifestazion plui partecipade e je stade chê di Tolosa / Toulouse là che si à calcolât la presince di passe 30 mil di lôr e di un bon numar di aministradôrs locâi rivâts di dute la Ocitanie e ancje de Catalogne setentrionâl. Propit ta chest ultin teritori, inte citât di Perpinyà / Perpignan, si è tignude invezit la iniziative plui origjinâl de zornade, ven a dî un “lipdub” (un video musicâl popolâr) pe lenghe catalane che al è lât indenant par dôs oris cu la partecipazion di passe 7 mil personis, tra di lôr aministradôrs locâi, professôrs, scritôrs, artiscj e grups sportîfs e associatîfs de Catalogne dal Nord. La iniziative e je lade plui innà di ogni prevision e e à ancje segnât il record dal mont par numar di partecipants a di un “lipdub”.

Paîs Basc: miârs di personis tra Iruñea e Bilbo pal Aberri Eguna

La dì di Pasche di 80 agns indaûr, si jere ai 27 di Març dal 1932, passe 65 mil bascs si jerin dâts dongje par celebrâ pe prime volte l’Aberri Eguna, o sei la Zornade de Patrie Basche. Cheste fieste di rivendicazion metude in pîts dal nazionalisim basc e je lade dilunc a davuelzisi, par cetancj agns in clandestinitât, e chest an si è ricjatade a ricuardâ inovâi impuartants. Di fat, dongje dai siei 80 agns di storie, l’Aberri Eguna dal 2012 al è colât tai 500 agns de concuiste de Navare, ultin toc dal Paîs Basc a pierdi la sô indipendence, e tai 75 dai bombardaments nazifassiscj su lis citâts baschis di Gernika e Durango. Cun di plui, la celebrazion di chest an e je la prime dopo de decision di ETA di meti fin ae lote armade e propit chest acjadiment al è chel che plui di ducj al à segnât chest Aberri Eguna.

Scozie: comunicâts i dâts su la consultazion britaniche sul referendum

Il guvier britanic al à comunicât ta chestis zornadis i risultâts de consultazion publiche sul referendum pe indipendence de Scozie, intant che chê inviade dal guvier scozês si sierarà ai 11 di Mai. Tra i dâts principâi de consultazion dal guvier di Londre o cjatìn che il 75% dai sogjets che a àn rispuindût a vuelin che inte schede pal referendum si vedi une domande sole sul status costituzionâl de Scozie e che il 70% al à miôr che il vôt si davuelzi il prime pussibil, come che al volarès il guvier britanic. Suntun pont, invezit, si à une cierte vierzidure pe posizion mostrade dal esecutîf scozês, ven a dî la pussibilitât di votâ intal referendum ancje pai fantats di 16 e 17 agns. Cun di fat, il 44% di chei che a àn partecipât ae consultazion imbastide dal guvier britanic si è declarât dacuardi cun cheste propueste.
Font: BBC, 04/04/12

Gales: in vore la gnove comissarie pe lenghe

Cui 2 di Avrîl la gnove comissarie pe lenghe galese, Meri Huws, e à tacât la sô ativitât. La figure dal comissari e je stade metude in pîts cu la gnove leç linguistiche fate buine l’an passât e e cjape il puest dal Ufici pe lenghe galese che al à sierât la sô ativitât cul mês di Març. L’obietîf principâl dal comissari al è chel di promovi l’ûs de lenghe galese e di intervignî par rimovi ce che invezit lu pidimente. Lis liniis che cheste incarghe e je clamade a tignî tant che riferiment di fonde a son dôs: cui che al è a stâ in Gales al à di podê vivi in maniere normâl la sô vite doprant il galês; e la lenghe proprie dal Gales no pues jessi discriminade rispiet al inglês.
Font: BBC, 02/04/12; Comisiynydd y Gymraeg, 04/12

Paîs Basc: si vûl tornâ a meti in vore Udalbiltza

Sindics e assessôrs comunâi di Bildu, Aralar, NafarroaBai e Abertzalen Batasuna si son dâts dongje a Irun cun chê di tornâ a inviâ il progjet Udalbiltza. Viodude la gnove clime che si vîf in Euskal Herria, si vûl tornâ a meti in vore la assemblee che e meteve adun i aministradôrs elets in ducj i comuns che a componin il Paîs Basc, di là dai confins aministratîfs e statâi che in dì di vuê ju dividin. La esperience di Udalbiltza e jere nassude intal 1999 cu la partecipazion di cuasi 2000 aministradôrs bascs che a rivavin di partîts politics diviers, ma che a vevin voie di lavorâ adun par afermâ la esistence di Euskal Herria come nazion e par sburtâ un procès democratic e dinamic pal svilup nazionâl des comunitâts baschis. La repression metude in at des autoritâts spagnolis cu la scuse de lote cuintri di ETA e veve colpît a fuart ancje cheste istituzion e le veve puartade a sfantâsi. Cumò duncje si vûl tornâ a inviâ il progjet e si à za tacât a inviâ la racuelte des adesions.
Font: Gara, 31/03/12

Irlande: problemis intal Nord pai segnâi stradâi bilengâi

Il ministri nordirlandês pai traspuarts, Danny Kennedy, al à decidût che no saran metûts fûr segnâi stradâi bilengâi che a sedin scrits, in plui che par inglês, ancje par irlandês o par scots, o sei la varietât linguistiche fevelade in Scozie e in ciertis parts de Irlande dal Nord. Su la cuistion e jere stade inviade ancje une consultazion publiche, là che i doi tierçs di chei che a vevin rispuindût si vevin declarâts dacuardi cul ûs dai segnâi bilengâi. Chel istès, Kennedy al à decidût di blocâ la iniziative sei par vie dai coscj, ancje se nol à volût fâ savê trop che e sarès costade la operazion, sei par altris resons che nol à specificât. Il suspiet al è che daûr di cheste decision a sedin ancjemò i prejudizis cuintri dal irlandês puartâts indenant di cetancj membris dai partîts unioniscj. Cun di fat Danny Kennedy, in plui di partignî al Ulster Unionist Party, al è ancje un membri dal Ordin di Orange, che par agns al è stât protagonist des politichis setariis in Irlande dal Nord.
Font: BBC, 30/03/12

Galizie: in linie dizionari cun 50 mil vôs

La Academie Reâl Galiziane e à rinovât di plante fûr il so sît internet e lu à jemplât di servizis gnûfs pai utents. La novitât plui impuartante e je dal sigûr la publicazion in linie dal so dizionari che al ufrìs 50 mil vôs là che, dongje dal lessic patrimoniâl, si àn ancje i neologjisims e repertoris lessicâi specialistics. Dongje dal dizionari, sul sît si puedin cjatâ ancje risorsis impuartantis par cognossi la leterature galiziane e un aventari dai fonts archivistics conservâts de Academie.
Font: Galicia Hoxe, 30/03/12

Irlande: al cres il numar des personis che a fevelin par gaelic

Daûr dai dâts dal ultin censiment il numar des personis che a fevelin par gaelic al è cressût inte Republiche de Irlande. Il 41,4% des personis, ven a dî pôc mancul 1 milion e 800 di lôr, al à declarât di jessi in stât di fevelâ par irlandês, o sei il 7,1% in plui rispiet al dât otignût intal 2006. Dut câs, a pene l’1,8% tra di lôr a fevelin ogni dì par gaelic, intant che il 2,6% lu dopre almancul une volte par setemane e un altri 12,2% lu fevele a scuele. Tra i 77 mil irlandês che a doprin la lôr lenghe proprie ogni dì fûr di scuele, un tierç al vîf intal Gaeltacht, o sei lis areis là che il gaelic al à ancjemò une presince significative. Ta chestis areis il numar di chei che a san fevelâ par irlandês si svicine al 70%, cuntun aument dal 5,2% rispiet al 2006.
Font: Irish Times, 30/03/12; Gaelport, 30/03/12

Paîs Basc: colaborazion jenfri CAB e Navare su la lenghe basche

La ativitât di promozion de lenghe basche in Navare e podarà poiâsi ancje su la colaborazion tra la Comunitât autonome di cheste regjon e la Comunitât Autonome Basche. Daûr dal protocol di inteste sotscrit dai rapresentants des dôs entitâts, si varà une condivision intal sisteme di valutazion e di ricognossiment des competencis linguistichis, intal ricognossiment dai titui, intal svilup terminologjic, inte traduzion di tescj di leçs statâls e comunitariis, e intai programs internazionâi di divulgazion de lenghe basche. Cun di plui si varà une colaborazion ancje intal cantin dal insegnament de lenghe pes personis adultis.
Font: Diario de Navarra, 30/03/12

Cossovo: e torne a cressi la tension tra serps e albanês

Dopo de decision de Serbie di cjapâ dentri ancje il Cossovo intai teritoris là che ai 6 di Mai si davuelzaran lis elezions aministrativis, e je tornade a cressi la tension jenfri serps e autoritâts cossovanis. Il sindic di Vitina, doi funzionaris dal stes comun e un poliziot locâl a son stâts arestâts intant che a tornavin in Cossovo de Serbie e a àn di rispuindi de acuse di stiçâ l’odi e la intolerance etniche. Un tant parcè che a vevin cun lôr materiâl pes elezions aministrativis serbis. I magjistrâts cossovans però a son daûr a viodi se zontâ ancje la acuse di atentât al ordin costituzionâl. Cheste azion e à jevât la rabie dal guvier di Belgrât che al fevele di arescj di nature etniche che a àn dome chê di spaurî la popolazion serbe dal Cossovo. Tes zornadis seguitivis al arest dai cuatri serps, ancje lis fuarcis di polizie serbe a àn operât diviers arescj di albanês dal Cossovo cun acusis lis plui diferentis. Intant che la tension e cres, il Parlament european al à fate buine une risoluzion là che al invide il guvier di Belgrât a fissâ in curt une date par inviâ lis discussions su la jentrade de Serbie inte Union, ma si lu invide ancje a no slargjâ lis elezions aministrativis intes areis serbis dal Cossovo. Intal test si segnalin sei i pas indenant fats de Serbie par jentrâ inte UE, sei i ponts critics come il nivel di tutele pes minorancis nazionâls judicât inmò masse debul.
Font: Balkan Insight, 29-30/03/12

Galizie: si slargje la rêt di promozion dal galizian

Cu la adesion di altris 19 sogjets si slargje la rêt dai ents locâi impegnâts intal promovi la lenghe proprie de Galizie. Si trate di 16 comuns, un consorzi turistic, un coleç di avocats e une fondazion. Cui ultins rivâts, cumò la rêt e cjape dentri 116 entitâts. Tra lis iniziativis che a interessin cheste rêt o cjatìn ancje il progjet “FalaRedes”, partît di un pâr di setemanis, che al previôt uns 250 apontaments dilunc vie dal an che a pontin a creâ spazis par imparâ e par doprâ la lenghe galiziane.
Font: Xunta de Galicia, 28/03/12

Paîs Basc: al cres il numar di fruts che a studiin par euskara

I ultins dâts comunicâts dal istitût basc di statistiche su lis adesions ai diviers modei di insegnament inte Comunitât Autonome Basche (an scolastic 2010/2011) a mostrin une incressite des fameis che a sielzin pai lôr fîs un percors là che l’euskara al è centrâl. Il 60% di fat al à sielzût il model D, ven a dî chel là che l’insegnament al è dut par basc fûr che lis oris di spagnûl e di une altre lenghe foreste, il 22% al à optât pal model B, là che l’insegnament al è bilengâl, e dome il 17% pal model A, chel là che il basc al è presint dome tant che materie. Cheste tindince e larà dilunc a cressi dal moment che, plui la etât dai fruts e je basse, plui a son i gjenitôrs che a sielzin un model cuntune presince fuarte de lenghe basche. Cun di fat, inte scuele de infanzie il model D, chel dut par basc, al è stât sielzût dal 73% des fameis, chel bilengâl dal 23% e chel par spagnûl a pene dal 4%.
Font: Diario Vasco, 26/03/12

Asturiis: tes elezions e vinç la çampe, ma cence numars par guviernâ

Lis elezions anticipadis intes Asturiis a àn viodût il sucès dai partîts di çampe, ma cun numars no suficients par guviernâ. Il partît socialist (PSOE) al è stât il plui votât cul 32% des preferencis che i àn garantît 17 puescj inte assemblee regjonâl, doi in plui rispiet aes elezions precedentis, intant che Izquierda Unida (IU) e à sfiliât il 14% dai vôts e elet 5 dai siei, un in plui de volte prime. Plui che premiâ la çampe però, cun chest vôt i eletôrs a àn volût punî i partîts di diestre che intal 2011 a vevin otignût la maiorance ma no jerin stâts bogns di meti sù un guvier stabil obleant duncje i citadins a tornâ a votâ. Il Foro Asturiano Ciudadano (FAC) al à cjapât pôc mancul dal 25% dai vôts, cuasi il 5% in mancul dal 2011, e 12 puescj intal parlament regjonâl, cuatri in mancul de volte prime. I popolârs (PP) invezit a son rivâts sul 21,5% e a àn mantignût i 10 elets che a vevin otignût intes elezions dal 2011. L’unic altri partît che al sarà rapresentât inte assemblee asturiane al è Unión Progreso y Democracia (UPyD), ancje chest di diestre, che cun cuasi il 4% dai vôts al à rivât a elei un dai siei.

Cravuazie: preocupazion pai nivei di razisim cuintri des minorancis

Inte suaze dal so intervent inte zornade internazionâl cuintri des discriminazions, il difensôr civic cravuat al à riclamât la atenzion sui nivei une vore alts di razisim che si àn ancjemò in Cravuazie. Cheste figure istituzionâl, metude sù cuntune leç dal 2009, e à il compit di intervignî par difindi i dirits umans e i interès dai citadins. Almancul un tierç des denunciis fatis indenant al so ufici si riferissin a câs di discriminazion raziâl. Al centri di chescj episodis discriminatoris a son massime rom, serps e altris minorancis plui piçulis. La discriminazion si pues viodile intai discors raziscj che si cjatin sui sîts internet, intant di manifestazions sportivis, ma ancje intai compuartaments di ciertis istituzions. Pal difensôr civic cravuat si à duncje di incressi la cussience dai citadins su chest probleme e di intervignî cun misuris plui fuartis cuintri des discriminazions.
Font: Balkan Insight, 21/03/12