16/07/21

Paîs Catalans: presentât il program pe Diada dal 2021

I rapresentants de Assemblea Nacional Catalana, dal Òmnium Cultural e de Associació de Municipis per la Independència – lis organizazions de societât civîl catalane protagonistis de lote pe indipendence – a àn anticipât il program pe Diada, o sei la fieste nazionâl catalane, dal 2021. Ai 11 di Setembar di chest an si tornarà a di une manifestazion che, cundut dal rispiet des misuris di sigurece sanitarie, si movarà di place Urquinaona al parc là che si cjate il Parlament de Catalogne. Lis iniziativis pe Diada si zontaran a chês in program il prin di Otubar par ricuardâ il referendum tignût intal 2017. Lis dôs datis simbolichis e lis iniziativis programadis a saran peadis dal stes sproc, o sei “lluitem i guanyem la independència” (lotìn e concuistìn la indipendence), par sburtâ lis istituzions catalanis a continuâ pe strade inviade cul referendum. I organizadôrs des mobilitazions a àn sclarît che i indults concedûts a nûf dai dirigjents indipendentiscj impresonâts no fermaran la lote dai catalans pe autodeterminazion.

Font: VilaWeb, 08/07/21; Naiz:, 08/07/21

Galizie: numars in cressi pal progjet “21 días co galego e +”

Il program “21 días co galego e +”, inviât dal guvier de Galizie par promovi l’ûs de lenghe proprie framieç dai zovins, intai prins trê agns che al è operatîf al à interessât aromai passe 9 mil students di 24 centris educatîfs. La iniziative e je indreçade ai students des superiôrs e e previôt che, par 21 dîs, i zovins a sedin sostignûts intal doprâ simpri il galizian sei dentri che fûr de scuele. Il program al è cressût an dopo an e dai 1.400 partecipants de dade 2018-2019 si è passâts ai 4 mil di chest an scolastic. Intai students che a àn aderît ae iniziative si à viodût che e je aumente la fluence tal doprâ il galizian (ancje tai canâi sociâi), che e je cressude la cussience linguistiche e che si àn infuartîts i leams dentri de comunitât educative.

Font: Lingua.gal, 07/07/21

Corsiche: sucès pe prime edizion di A Currilingua

Inmaneade dal coletîf Parlemu Corsu, domenie ai 4 di Lui si à tignude la prime edizion di A Currilingua, une corse sul model de Korrika basche pensade par cjapâ sù fonts pe promozion de lenghe proprie. Sù par jù 400 personis a àn corût suntun percors di 90 chilometris dilunc de part orientâl de isule, di Borgu / Borgo a Sulinzara / Solenzara. Ae iniziative, che e je durade plui o mancul dodis oris, no àn partecipât dome citadins ma ancje associazions sportivis e culturâls, coletîfs locâi e ativitâts economichis. Par partecipâ si veve di comprâ un dai chilometris de corse e, ae fin, a son stâts racuelts plui di 10 mil euros che a saran doprâts par iniziativis a pro de lenghe, tant che la vierzidure di classis a imersion o il jutori a centris di formazion. Denant dal sucès di cheste prime edizion, za si pense a imbastî la prossime che – a disin i organizadôrs – dal sigûr si disviluparà suntun percors plui lunc.

Font: Corse Net Infos, 07/07/21

Paîs Basc: revision de spese par promovi l’euskara

Il guvier de Comunitât Autonome Basche al à inviarà une revision de spese a pro de lenghe basche puartade indenant de Comunitât stesse e des aministrazions locâls. Si fevele di une cifre che, dome pe promozion, si môf sul ordin dai 100 / 110 milions di euros ad an. Tal zîr di sîs mês si cjaparan in esam i belançs dal ultin an, ma ancje lis convenzions, i contribûts e i organics impleâts su chest front. Daûr di ce che si à dit, cheste revision e je leade ae volontât di impleâ lis risorsis inte maniere miôr pussibile par rivâ ai obietîfs che si proponisi. Cun di fat, al dîs l’esecutîf, al è zaromai di cualchi an che i invistiments su la lenghe no puartin ae incressite che si sperarès intal numar di personis che a doprin l’euskara. In dì di vuê si stime che dome un tierç de popolazion de Comunitât al dopri il basc come prime lenghe cundut che chei che a saressin in stât di fâlu a son di plui. La revision si propon duncje di capî se si pues impleâ in maniere plui eficace i invistiments pal euskara.

Font: El Independiente, 06/07/21