Galizie: in miârs in place pe lenghe galiziane

Ai 17 di Mai miârs di personis a àn sfilât pes stradis de Galizie par difindi la lenghe proprie daûr dal sproc “Máis que nunca, queremos galego!” (plui che mai o volìn e i tignìn al galizian!). La iniziative, imbastide de plateforme Queremos Galego, si è davuelte ta chel stes moment in cutuardis citâts diferentis de Galizie. La manifestazion plui partecipade si le à vude a Sant Jacum (Santiago de Compostela) cun passe 2 mil personis. In place si àn viodûts ancje i rapresentants di sindacâts e partîts tant che Confederación Intersindical Galega, Bloque Nacionalista Galego, PSdeG e En Marea. La iniziative e veve chê di denunciâ la situazion grivie de lenghe proprie, cul 23% dai fruts tra i 4 e i 15 agns che no son bogns di fevelâ par galizian, e di domandâ l’impegn dal guvier e des istituzions de Galizie par eliminâ i pidiments cumò in vore e sburtâ la lenghe te educazion, te sanitât, te justizie e tai mieçs di comunicazion.

Font: Galicia Hoxe, 17/05/19; La Voz de Galicia, 17/05/19

Paîs Basc: Puntueus e sburte la presince digjitâl dal euskara

In ocasion de Zornade dedicade ae presince de lenghe basche su Internet che e cole ai 17 di Mai la fondazion Puntueus, responsabile de gjestion e dal control dal domini .eus, e à invidât a incressi la ufierte e la domande di contignûts digjitâi in lenghe basche. In dì di vuê i sîts internet cun contignûts par euskara a son 26.663, o sei il 16% di chei in vore tal Paîs Basc. Cheste percentuâl e va sù cuasi al 90% pai sîts cun domini .eus. Il basc al va dilunc a cressi su la rêt come tal câs de Wikipedia là che i articui par euskara a àn passât aromai i 350 mil e a puartin cheste lenghe a jessi la 29^e plui doprade pe enciclopedie libare. Chel istès al è ancjemò cetant di fâ massime sul front dai contignûts audiovisîfs che a rapresentin plui dal 60% dal trafic di Internet.

Font: EiTB, 15/05/19

Albanie: plui dirits pai albanês di Macedonie e Montenegro

Inte riunion di guvier dai 10 di Mai l’esecutîf vuidât dal prin ministri Edi Rama al à decidût di slargjâ ancje ai citadins macedons e montenegrins di nazionalitât albanese i stes dirits di acès al lavôr dai citadins albanês. La misure e vâl dome par chei puescj di vore là che no si domande in maniere esplicite la citadinance albanese e e à un valôr plui simbolic che pratic. La stesse decision e jere stade cjapade ancjemò intal 2014 pai cossovans di lenghe albanese e pe minorance albanese che e vîf in Serbie. Il messaç che si vûl dâ al è chel di une Albanie vierte, ancje sul plan dal lavôr, a ducj i albanês, di là dal stât là che a son citadins. Par chel che al rivuarde la Macedonie dal Nord i albanês a rapresentin un cuart de popolazion totâl, intant che in Montenegro a son uns cinc par cent dal totâl.

Font: Balkan Insight, 14/05/19

Irlande: progjet di “Erasmus” intes areis gaelichis

In curt si inviarà te Republiche di Irlande un program sul model dal Erasmus che al permetarà ai students dai ultins agns dai istitûts superiôrs e des universitâts di passâ sîs mês a studiâ par irlandês intes areis de isule là che la lenghe proprie e je ancjemò doprade in maniere significative (Gaeltacht). La gnove e je stade comunicade dal ministri pe lenghe irlandese Seán Kyne che su chest progjet al à invistît 250 mil euros. Intant che a frecuentaran cors imersîfs par irlandês, i students a cjataran acet intes cjasis di fameis che a doprin cheste lenghe te vite di ogni dì. Ta cheste maniere a varan la pussibilitât di svilupâ lis lôr capacitâts linguistichis su plui nivei. Il progjet al varès di puartâ efiets positîfs ancje pes areis gaelichis de isule, sei sul plan economic che su chel sociâl.

Font: The Irish Times, 14/05/19

Paîs Basc: in miârs a Senpere pal Herri Urrats

Diviers miârs di personis a àn partecipât ae 36^e edizion dal Herri Urrats, la fieste des ikastolas dal Paîs Basc dal Nord sot aministrazion francese (Ipar Euskal Herria) che si è tignude ai 12 di Mai a Senpere / Saint-Pée-sur Nivelle. Chest an la manifestazion e veve chê di racuei fonts par finanziâ doi istitûts scolastics di Baiona / Bayonne. La iniziative e ven inmaneade une volte ad an de federazion des scuelis baschis Seaska che tal Paîs Basc dal Nord e gjestìs 36 istitûts e che e conte cuasi 4 mil arlêfs. Cul prossim an scolastic, la federazion des ikastolas e screarà une gnove scuele intant che il numar dai iscrits al cressarà di 200 students. In dì di vuê, viodude la scjarsetât di professôrs in rapuart al numar di arlêfs, Seaska e je impegnade intun braç di fier cul guvier francês par otignî almancul altris trente puescj di insegnant. Ancje intant dal Herri Urrats si à duncje batût su chest pont dal moment che, par cumò, di Parîs e je rivade dome la disponibilitât a ativâ cinc puescj in plui.

Font: EiTB, 12/05/19

Paîs Basc: lis propuestis di Kontseilua pal euskara in Navare

Ai 11 di Mai, te prospetive des elezions che si tignaran in Navare, il coordenament pe lenghe basche Kontseilua al à fat indenant aes diviersis fuarcis politichis in corse cuindis misuris di podê meti in vore te prossime legjislature par favorî la normalizazion dal euskara. Dilunc vie de legjislature che e je daûr a sierâsi lis politichis linguistichis a àn fat pas indenant impuartants, ma la strade di fâ e reste ancjemò lungje. Tra lis azions proponudis si à une riforme juridiche che e permeti di slargjâ la uficialitât de lenghe basche a dute la Navare, ma ancje infuartî lis azions par garantî l’ûs dal euskara dentri de aministrazion publiche, tutelâ i mieçs di comunicazion par basc, slargjâ la presince des scuelis a imersion o almancul bilengâls, e aumentâ lis risorsis previodudis pe lenghe.

Font: Noticias de Navarra, 12/05/19

Ocitanie: prime partecipazion eletorâl par Aran Amassa

Ai 26 di Mai, in plui des elezions europeanis e di chês comunâls, i eletôrs de Val di Aran – comunitât di lenghe ocitane cjapade dentri tal principât di Catalogne – a son clamâts a votâ ancje pal Consei gjenerâl di Aran, organisim di autoguvier tornât a nassi tal 1990 e infuartît che nol è tant sul plan dai siei podês. Di cuant che al è nassût, il Consei al è stât segnât di un bipartitisim rapresentât di Convergjence Democratiche Aranese, moviment conservadôr aleât de catalane CiU, e di Unitât di Aran, referent locâl dal partît socialist (PSOE / PSC). Chest cuadri avonde static al podarès cumò saltâ pe jentrade in sene de diestre spagnoliste leade a Ciudadanos e pe nassite di Aran Amassa, gnove organizazion politiche che e met adun lis diviersis animis de çampe ocitaniste e catalaniste.

Font: Jornalet, 11/05/19

Gales: in miârs in place a Cardiff pe indipendence

Ai 11 di Mai, in rispueste al apel dal coordenament All Under One Banner Cymru, miârs di personis a àn sfilât pes stradis di Caerdydd / Cardiff par domandâ la indipendence dal Gales. Si trate de prime manifestazion di cheste fate te storie resinte di cheste nazion dal Ream Unît. La iniziative e cjape ispirazion des marcjis pe indipendence inmaneadis intai ultins agns in Scozie. Ae manifestazion al à partecipât ancje il leader dal moviment nazionalitari galês Plaid Cymru, Adam Price, che al à ricuardât cemût che lis misuris di austeritât metudis in at dal guvier britanic e il pastiel de gjestion de Brexit a àn incressût la voie di autoguvier framieç de int. Un scandai jessût di pôc (ITV Wales) al mostre che almancul il 12% de popolazion al è a pro de indipendence dal Gales cuant che, juste cualchi timp indaûr, l’indipendentisim achì al jere un fenomen margjinâl.

Font: BBC, 11/05/19; The Guardian, 11/05/19

Europe: lis propuestis dal forum european des minorancis

Esperts, istituzions e entitâts rapresentativis des comunitâts minorizadis si son dâts adun a Bruxelles ai 6 e ai 7 di Mai pal prin forum european des minorancis inmaneât dal istitût “Tom Lantos” di Budapest intune cu la Rêt Europeane pe Avualiance Linguistiche (ELEN) e cun altris organizazions pai dirits linguistics. Intant dal forum si à mostrât cemût che aromai al sedi palês che i stâts no garantissin la tutele dai dirits previodûts de Cjarte europeane pes lenghis regjonâls o minoritariis e de Convenzion cuadri pe protezion des minorancis nazionâls e no si preocupin di fâlu dal moment che chescj tratâts no previodin sanzions. Ancje la mozion votade a grande maiorance dal Parlament european intal 2013 par une normative europeane su lis lenghis minorizadis no si à stramudade in nissune azion concrete. Par sblocâ cheste situazion ELEN e à duncje proponût la istituzion di un comissari european pes lenghis e di un osservatori internazionâl che al controli su lis discriminazions linguistichis, ma ancje une diretive europeane su lis lenghis minorizadis che e sedi vincolante, cun sanzions pai stâts che no le rispietin e che e previodi, tra lis altris, il sisteme de imersion linguistiche pes scuelis des areis là che si fevelin lenghis minorizadis. Fernand de Varennes, delegât speciâl de ONU pes minorancis, al à batût su la dibisugne di misuris concretis par fâi cuintri al slargjâsi dai atacs ai dirits umans, cu lis minorancis che simpri plui dispès a son vitimis dai discors di odi e dai populisims.

Font: ELEN, 10/05/19

Sardegne: ancje par catalan il sît dal comun dal Alguer

La aministrazion comunâl dal Alguer, citât sarde di lenghe catalane, e à dât fûr la gnove version dal so sît internet istituzionâl che, pe prime volte, al propon dongje dal talian ancje la version par catalan. Si trate di une des azions imbastidis par valorizâ la lenghe proprie e che si zonte al ufici linguistic comunâl inviât intal Jugn dal an passât e ae incressite des iniziativis culturâls dedicadis ae lenghe catalane.

Font: El Nacional, 10/05/19

Ocitanie: a Bordeaux primis viis cul non par ocitan

Ai 8 di Mai si à vude la scree des tabelis par ocitan di dôs des principâls stradis dal centri storic di Bordèu / Bordeaux (Boquèira e Sent Jacme). La iniziative e je stade promovude dal Ostau Occitan, sezion locâl dal Istitût di Studis Ocitans (Institut d’Estudis Occitans), ancje cun chê di stiçâ la aministrazion comunâl a procedi cu la tabelonistiche bilengâl ta chês altris viis de citât. Di segnalâ, in ocasion de scree, ancje la presince dal Front Popular per la Republica Occitana, gnûf moviment politic che si propon di meti adun lis fuarcis impegnadis par une Ocitanie indipendente e socialiste.

Font: Jornalet, 12/05/19

Paîs Catalans: altris 710 mil euros par promovi la lenghe

Te suaze des azions par promovi la lenghe proprie, la direzion gjenerâl pe politiche linguistiche dal guvier catalan e à metût fûr trê bants gnûfs cun chê di promovi l’ûs de lenghe catalane. Il prin al met a disposizion 460 mil euros pes fondazions e pes associazions cence fin di vuadagn; l’an passât cheste misure e veve permetût di svilupâ passe otante progjets sociâi di promozion linguistiche. Il secont bant, che al à une disponibilitât di 100 mil euros, al ponte ae difusion dal catalan intes gnovis tecnologjiis e tal 2018 al veve favorît l’ûs de lenghe proprie tune vincjine di imprescj tecnologjics, a partî di aplicazions e videozûcs. Il tierç invezit al à chê di sburtâ la traduzion par catalan di oparis no leterariis e al met a disposizion 150 mil euros. Cun chest canâl di finanziament, dal 2015 a vuê, si à sostignût la traduzion di 136 oparis.

Font: Generalitat de Catalunya, 07/05/19