04/09/15

Ocitanie: gnove mobilitazion antimilitariste tal Larzac

Vie pai agns ’70 la provincie ocitane dal Larzac e je stade al centri di une massive campagne antimilitariste che e je stade une vore impuartante pal svilup dal nazionalitarisim ocitan e che dopo dîs agns di lote si è sierade cul bloc dal progjet che al voleve doprâ cheste aree par un poligon di tîr di passe 13 mil etars. In chê volte la lote e jere stade inviade di un centenâr di contadins e di arlevadôrs dal puest. Il Larzac al torne cumò intes miris dal esercit francês che al vûl trasferî achì une brigade de Légion Étrangère logade tai Emirâts Araps Unîts dopo cuasi cincuante agns di presince in Zibuti. Daûr dal progjet dal ministeri de difese, cul 2016 il Larzac al varès di dâi acet a 450 legjonaris che po, intal zîr di cualchi an, a varessin di rivâ a di un miâr. Cuintri di cheste ipotesi, dopo di une prime petizion sotscrite di cualchi miâr di citadins là che si domande al president francês François Hollande di anulâ il progjet, cumò si è dât dongje ancje un coletîf che al coordenarà la gnove bataie antimilitariste dal Larzac.
Font: Jornalet, 27/08/15

Cossovo: prin acuardi su la Assemblee dai comuns serps

Ai 25 di Avost a Bruxelles il prin ministri serp Aleksandar Vučić e chel cossovan Isa Mustafa a àn cjatât un acuardi di fonde tra i doi paîs su telecomunicazions, energjie, associazion dai comuns serps e su la gjestion dal puint sul Ibar che al divît la part serbe e chê albanese di Mitrovica. I doi prins ministris a àn però dât ae stampe indicazions contraditoriis sui ponts a pene concuardâts, massime su la cuistion de associazion dai comuns serps. Par Vučić chest organisim al sarà indotât di assemblee, di esecutîf e bandiere, al varà competence su salût, svilup economic, planificazion urbanistiche e educazion, e al podarà ricevi finanziaments de Serbie. Par Mustafa invezit al varà competencis plui limitadis e nol varà un esecutîf. Cumò, par rivâ a di un statût vêr de assemblee, si calcole che a coventaran almancul cuatri mês.
Font: Balkan Insight, 26/08/15

Paîs Basc: riforme par infuartî l’euskara in Navare

Te prime riunion dal Consejo Navarro del Euskera dopo des elezions che a àn puartât une coalizion nazionalitarie progressiste al guvier de Navare, si à dât il vie libare ae propueste di riforme di Euskarabidea, la agjenzie pe lenghe basche. Il document al previôt di infuartî lis competencis e la struture di chest organisim autonom in maniere che al puedi meti jù un plan strategjic pal svilup dal euskara, promovi la presince publiche e istituzionâl de lenghe basche, e cressi la colaborazion cui ents locâi e cul associazionisim par aumentâ l’insegnament dal euskara e il so ûs inte societât. In buine sostance si vûl trasformâ Euskarabidea intal cûr vêr de politiche linguistiche in Navare e ancje par chest si centraran alì dutis lis risorsis che il guvier al met pe lenghe basche.
Font: Diario de Navarra, 26/08/15

Irlande: scuintris su IRA e Sinn Féin a menacin il procès di pâs

Cun riferiment al sassinament di doi ex membris dal Esercit Republican Irlandês (IRA), Kevin McGuigan e Jock Davison, il comandant in cjâf de polizie nordirlandese George Hamilton al à declarât che l’IRA al esist ancjemò cundut che la sô struture no je plui ative inte lote armade, che no esistin provis di une sô responsabilitât intai doi sassinaments che a van invezit leâts aes ativitâts de dissidence republicane, e che il Sinn Féin – par agns considerât il braç politic dal IRA – al mostre di colaborâ inte ricercje dai responsabii. Di dutis chestis declarazions, i aversaris politics dal Sinn Féin si son picjâts dome al riferiment su la esistence dal IRA e lu àn doprât par atacâ il partît di riferiment dai republicans irlandês. Il leader dal Sinn Féin, Gerry Adams, dopo vê marcât che l’IRA nol esist plui come moviment armât e che nol è pericul che al torni, al à denunciât che, cun atacs di cheste fate, par resons eletorâls si met a risi dut il procès di pâs. Cun di fat i analiscj a concuardin sul fat che il Sinn Féin al podarès otignî un grues risultât intes prossimis elezions in program inte Republiche de Irlande e duncje , in plui de rivalitât storiche cui partîts unioniscj dal Nord, al è viodût tant che une menace ancje dai partîts dal Sud.
Font: Naiz:, 26/08/15

Gales: scuintri tra Cymdeithas e comun sul galês a Cardiff

Scuintri dûr a Caerdydd / Cardiff tra i rapresentants locâi de Cymdeithas yr Iaith Gymraeg e la aministrazion citadine. Intal rispuindi aes critichis de associazion sul gnûf plan di svilup locâl, il puartevôs dal Consei comunâl Phil Bale al à dât fûr un document là che si declare che “l’ûs de lenghe galese nol fâs part dal tiessût sociâl de citât” e che duncje “intal plan no coventin misuris specifichis pal galês”. Declarazions di cheste fate, a àn rispuindût de Cymdeithas, a mostrin une ignorance profonde sul teme e a jevin dubis sul ategjament e su lis politichis des autoritâts e dai funzionaris comunâi. Pe associazion no si à dome di tignî cont che la lenghe e je inlidrisade in diviersis areis de citât, ma ancje che la int e domande une presince plui fuarte dal galês. Tant plui che fâ sù gnovis urbanizazions là che no si previodin scuelis par galês e là che i nons de stradis a son dome par inglês al vûl dî dineâ ae prossime gjenerazion fintremai la pussibilitât di viodi, scoltâ e doprâ la lenghe. La Cymdeithas e à duncje sigurât che e larà dilunc a fâ pressions sul Consei comunâl par che al riviodi il plan e e à domandât al ispetorât su la planificazion che al è cumò daûr a esaminâ il test di no fâlu bon.
Font: BBC, 25/08/15; Cymdeithas, 25/08/15

Bretagne: vincj dossiers pes elezions regjonâls

Cui prins di Setembar si inviarà in Bretagne la campagne eletorâl pes prossimis elezions regjonâls in program ai 6 e ai 13 di Dicembar. Cun chê di stiçâ il dibatiment democratic e di fâ cjapâ posizion ai diviers candidâts su temis centrâi pal avignî di cheste tiere, la plateforme Construire la Bretagne e à decidût di compagnâ la campagne eletorâl cu la publicazion di vincj dossiers monografics là che, dongje di une analisi de situazion, si proponin ancje dai percors di svilup specifics pe Bretagne. I documents a frontaran temis tant che economie, energjie, lenghe, traspuarts, agroalimentâr, culture, tecnologjie e v.i. Il prin, publicât ai 28 di Avost, al è dedicât al teme de riunificazion de Bretagne. Chei altris a jessaran ogni cinc dîs in maniere di publicâ dute la serie tor de fin di Novembar.
Font: Agence Bretagne Presse, 25/08/15

Montenegro: puescj di vore publics, minorancis discriminadis

Daûr dai dâts dal ultin censiment, in Montenegro i montenegrins “etnics” a rapresentin il 45% de popolazion totâl ma inte aministrazion publiche a son il 74%. I serps, che a son il 28% de popolazion, a rapresentin dome l’11% dai dipendents publics. I albanês a ocupin il 2,5% dai puescj di vore de aministrazion publiche, ma a son il 5% de popolazion. Ancje lis comunitâts plui piçulis tant che bosgnacs, rom e cravuats a son sotrapresentâts intal public. Un cuadri che al à pôc a ce viodi cu la legjislazion montenegrine che e previôt che i membris des minorancis a sedin rapresentâts in maniere proporzionâl inte aministrazion publiche. A denunciâ cheste situazion al è un rapuart dal ministeri pai dirits umans e des minorancis che al à esaminât passe 140 organisims publics statâi e locâi. Za di timp partîts e organizazions des comunitâts serbe e albanese a segnalin che i puescj di vore intal public a son assegnâts discriminant lis minorancis e che, par dâur acès a chescj puescj di vore, a vegnin fatis pressions su serps e albanês par che si declarin montenegrins.
Font: Balkan Insight, 24/08/15

Scozie: la çampe indipendentiste e lance RISE

Lanç uficiâl ai 29 di Avost par RISE – Scotland’s Left Alliance, la gnove aleance de çampe indipendentiste scozese. Dopo mês di confronts e di discussions, militants di organizazions di çampe tant che il SSP, ativiscj cuintri de austeritât e antiraziscj, sindacaliscj, rapresentants dal mont culturâl e di chel universitari si son dâts adun ta chest gnûf progjet che al vûl dâi vôs e rapresentance ancje politiche a ce che al è plui a çampe dal SNP. Daûr dal acronim RISE (Respect, Independence, Socialism, Environmentalism) si cjatin i cuatri ponts di fonde dal progjet, ven a dî: une societât plui juste di dulà che si bandissin razisim, sessisim e altris formis di discriminazion; une Scozie indipendente, republicane e fûr de NATO; un svilup alternatîf al neoliberisim e al capitalisim; une ecologjie sostenibile là che l’ambientalisim al è centrâl intal cambiament de societât.
Font: Left Project, 23-29/08/15

Asturiis: la XDLA e domande plui visibilitât pe lenghe

La Xunta pola Defensa de la Llingua Asturiana e à invidât lis istituzions a profitâ dal Día d’Asturies, che al cole ai 8 di Setembar, par tacâ a dâi une gnove visibilitât ae lenghe proprie dal paîs. Chest al vûl dî – a disin i rapresentants de Xunta – doprâ l’asturian tant che prime lenghe inte promozion di cheste zornade, ma ancje profitâ di chest apontament par valorizâ cui che al lavore inte industrie culturâl des Asturiis che e da di vore a cetancj di lôr e che e à di vê un puest centrâl inte programazion pal avignî. La organizazion e invide po ancje la radiotelevision publiche de comunitât (RTPA) no dome a confermâ i spazis pal asturian intal palinsest de zornade, ma a dâi plui evidence ae lenghe proprie ancje te sô programazion ordenarie, tant plui che no son pôcs i documentaris e i curtmetraçs za disponibii par asturian e mai lâts in onde.
Font: Exunta, 21/08/15

Paîs Catalans: in cressi lis iniziativis pal ocitan

A cressin in Catalogne lis iniziativis svilupadis dal guvier par infuartî la cognossince de lenghe e de culture ocitane. Cundut che dentri dai confins aministratîfs de Catalogne, l’ocitan al è fevelât di sì e no 5 mil personis inte aree de Val di Aran, intai ultins agns lis istituzions catalanis a àn aumentât la tutele e la promozion di cheste lenghe. Cussì, in ocasion de edizion 2015 de Universitât Estive Catalane (Universitat Catalana d’Estiu) che si è tignude a Prada de Conflent, la direzion gjenerâl di politiche linguistiche dal guvier catalan e à inmaneât ancje doi cors su la culture ocitane. Cun di plui, inte suaze de iniziative, si à dât acet ancje a un dai apontaments de Mostre dal Cine Ocitan.
Font: Generalitat de Catalunya, 19/08/15

Scozie: si slargje la ufierte scolastiche par gaelic

E va dilunc a slargjâsi in Scozie la ufierte scolastiche par gaelic. Cun di fat, in gracie di un invistiment di 7 milions di sterlinis, e je stade vierte une gnove scuele cul gaelic tant che lenghe veicolâr inte aree di An Caol / Caol, dongje de citât di An Gearasdan / Fort William. La gnove struture, indotade dai servizis plui modernis, e je stade progjetade par podê jessi slargjade cul cressi dal numar di iscrits e, daûr dai progjets dal Consei des Highlands, e varès di deventâ il centri scolastic di riferiment pal gaelic par dute la regjon di Loch Abar / Lochaber.
Font: BBC, 19/08/15

Cravuazie: vie lis tabelis par serp di Vukovar

Il consei comunâl di Vukovar al à decidût che lis scritis par serp (alfabet cirilic) a saran gjavadis des tabelis istituzionâls e de segnaletiche stradâl de citât e che par otignî documents par serp dai uficis comunâi si varà di paiâ une soretasse. La decision e je stade fate buine cul vôt dai conseîrs de Union Democratiche Cravuate (HDZ) e e à cjatât la poie dai nazionaliscj cravuats e dai grups di veterans. La leç statâl su lis minorancis e previôt l’ûs couficiâl de lenghe minoritarie te segnaletiche e tai rapuarts cu la aministrazion publiche cuant che i membris de comunitât minoritarie a son almancul un tierç de popolazion totâl e, daûr dal ultin censiment, a Vukovar il 34,8% de popolazion al è serp. La decision, in plui de oposizion socialdemocratiche de citât, des organizazions antifassistis e dai rapresentants de minorance serbe, e à jevât ancje lis protestis uficiâls dal guvier di Belgrât.
Font: Balkan Insight, 18/08/15

Corsiche: 40 agns di Aleria, un inovâl discomut

Ai 22 di Avost a colavin i 40 agns dai fats di Aleria, un dai moments fondatîfs dal moviment nazionâl cors moderni e ancje un dai plui dramatics. Dopo che un grup di militants di Azione Reghjunalista Corsa al veve ocupât la aziende vinicule assegnade a un pied-noir (francês de Alzerie) par denunciâ la sô responsabilitât intune gruesse fraude sul vin, lis istituzions francesis a vevin rispuindût cu la ocupazion militâr de aree e cuntun assalt là che a vevin pierdût la vite doi poliziots. Chei fats e la repression che i veve vignude daûr a son tra lis fondis de nassite dal Front di Liberazion Nazionâl Cors. Edmond Simeoni, un dai protagoniscj di chel episodi e president de associazion “Aleria 1975”, al veve fat savê che in ocasion dal inovâl no si varès vude nissune memoreazion. Une sielte, al veve spiegât, nassude de volontât di no ufrî sponts di division e di scuintri ae vilie des elezions teritoriâls in program in Corsiche. Chel istès disinis di personis si son cjatadis sul sît di chei fats par ricuardâ i 40 agns di chel episodi, tra di lôr diviers rapresentants dal moviment Ghjuventù Independentista.
Font: Corse Matin, 13 e 23/08/15