27/09/14

Ara és l'hora! La vie catalane pe indipendence

Chest an a colavin juscj i 300 agns di chei 11 di Setembar dal 1714 cuant che la citât di Barcelone e veve di rindisi aes trupis francesis e spagnolis dopo di un assedi durât 414 dîs e di une resistence che e veve jevât la maravee e il rispiet di cetancj ator pe Europe. La memorie di chê resistence, che e jere nassude intal spirt dal “o volìn vivi libars o murî”, e je deventade une des fondis de rinassince nazionâl catalane e i 11 di Setembar a son deventâts la fieste nazionâl de Catalogne, plui cognossude tant che Diada.
L’inovâl dai 300 agns però al è vignût a colâ intun moment là che la voie di indipendence e je aromai maioritarie framieç de societât catalane e là che dôs organizazions – la Assemblea Nacional Catalana e l’Òmnium Culturala àn inviât dal bas un percors pe autodeterminazion che al à savût puartâ in place centenârs di miârs di personis e obleâ une buine fete de classe politiche catalane a cjapâ posizion a pro de indipendence e a impegnâsi tal procès par imbastî un referendum pe autodeterminazion che al varès di tignîsi ai 9 di Novembar.
Dopo de cjadene umane che l’an passât, chest an lis dôs organizazions a àn rivât a clamâ dongje a Barcelone 1.800.000 personis che a àn disegnât su doi dai viâi principâi de citât un grant “V” a strissis zalis e rossis (i colôrs de bandiere catalane) lunc undis chilometris e passe, cuntune impressionante dimostrazion di mobilitazion popolâr ma ancje di capacitât organizative. Compagn dal an passât, ancje ai 11 di Setembar dal 2014 Internazionalitari al jere alì e, achì disot, us propon un piçul reportage fotografic di chê esperience.

Pal inovâl dai 300 agns istituzions e realtâts associativis catalanis a àn inmaneât une grande cuantitât di events e di apontaments che a riclamin sei la storie di chei fats, sei il lôr insuazâsi intune costruzion dal avignî de Catalogne: mostris, percors storics e artistics, cunvignis, concierts, spetacui, events istituzionâi e popolârs.

 
La concentrazion plui alte di chestis iniziativis e je tor dai 11 di Setembar. Une vore utile la mostre “300 Onzes de Setembre” alì dal Museu di Storie de Catalogne par cognossi lidrîs, svilup e atualitât de Diada. La vilie dai 11 però a Barcelone e je une cuantitât di apontaments di no crodi. Impussibil viodiju ducj. Si va di chei di stamp plui culturâl e artistic, tant che il conciert de pianiste Clara Peya alì des ruvinis restauradis dal Born (cuartîr al centri di scuintris tra i plui dûrs intant dal assedi di Barcelone e sdrumât jù dopo de concuiste de citât) framieç dal losôr des cjandelis o il spetacul teatrâl “La ira dels peixos” intal parc de Ciutadella, scjassât di un rogan di lûs e di musichis …



  a chei di implant plui istituzionâi tant che l’omaç sot sere alì dal Fossar de les Moreres (là che a son sapulîts i muarts intant dal assedi dal 1714). Achì par solit si devin dongje i militants indipendentiscj e antagoniscj invezit chest an, pe prime volte, a jerin lis istituzions plui impuartantis de Catalogne, a tacâ dal president dal guvier Artur Mas, a rindi omaç in maniere uficiâl a chei muarts. E je stade une cerimonie blindade, cui Mossos d’Esquadra (la polizie catalane) che no fasevin svicinâ nissun, ma che a pene ladis vie lis autoritâts e à viodût une sdrume di int jemplâ chel piçul splaç dongje de glesie di Santa Maria par une celebrazion spontanie e popolâr.



La buinore de Diada, nuie di miôr par tacâ di lâ a fâ un zîr alì de place dal Arc de Triomf (dongje dai Passeigs de Lluís Companys e de Sant Joan) là che ogni an si dan dongje dutis lis organizazions impegnadis pe indipendence (di chês politichis a chês sportivis, di chês culturâls a chês gastronomichis) e là che a cjatin acet ancje rapresentancis di altris nazions cence stât.


Lassât chel sît par lâ intal cûr de citât, lis stradis a son plenis di personis cun samarretas (maiutis) indipendentistis e cun esteladas (bandieris indipendentistis) tignudis in man o picjadis intor. Ogni place e ogni crosere a deventin la ocasion par dâsi dongje e vosâ slogans a pro de indipendence. Al baste che un al buti li un "in-" che ducj chei altris si zontin cun "in-inde-independència!". Achì o sin in place Sant Jaume, juste denant dal palaç de Generalitat.


La citât e je plene di manifescj dai organizadôrs de manifestazion e di partîts indipendentiscj che a mostrin il percors che si vûl cjapâ, a tacâ dal vôt pe indipendence dai 9 di Novembar.


  
Par inmaneâ e gjestî une manifestazion come chê dai 11 di Setembar di chest an, la organizazion e à di jessi perfete. Si trate di formâ un grant V uman, lunc 11 chilometris dilunc de avinguda Diagonal e de Gran Via de les Corts Catalanes, e cu la sô spice in plaça de les Glòries. I 7 mil volontaris a son clamâts a judâ i plui o mancul 539 mil iscrits a cjapâ il lôr puest intes 73 tratis (trams) dal percors, dutis segnaladis di cartei, e a metisi in maniere di formâ, cu lis lôr maiutis zalis e rossis, une grande bandiere catalane.

 
La int si svicine ae sô postazion za dôs / trê oris prime. A tachin a jemplâsi i passaçs pedonâi che a dividin lis cuatri corsiis centrâls dai viâi di chês a passaç lent che a son in bande. Viodude la ore si profite par gustâ alc.

 
Po a tachin a jemplâsi ancje lis corsiis centrâls.


A rivin dongje ancje i gjigants tipics de tradizion catalane...


...e tes croseris principâls si placin i rapresentants dai 54 grups popolârs che a fasin sù i castellers.


Il parcè che la int si da dongje, lu disin a clâr i strissons metûts fûr dai organizadôrs...


...ma ancje i cartei che diviers di lôr si puartin daûr. A 'nd è di ogni fate, ancje di chei che fintremai l'ultin dai turiscj al rive a capî.


Ai iscrits che a formin il grant V, si zontin però cetancj di lôr. Ae fin si 'ndi contarà 1 milion e 800 mil. Lis stradis e lis placis si jemplin dal dut.

  
Il spetacul dal alt, là che si pues viodi miôr la grande bandiere umane, al è ancjemò plui biel. Su la Gran Via i arbui a pidimentin un pôc la vision, ma no son avonde risorsis par cjoli a nauli un elicotar! ;)




Che si le cjali dal alt o dal bas, chel istès e je une grande fieste di popul.


A rindi cheste zornade speciâl a son propit lis personis, di ogni etât, di ogni categorie sociâl, di ogni gjenar e orientament sessuâl, di ogni divignince. A son lôr a dâi anime e cuarp al progjet de indipendence catalane. A son lôr che a rivin a rindilu inclusîf e solidari. Lis lôr musis a son la rispueste miôr ai messaçs di pôre, al "no, parcè che di no", che a rivin di Madrid e di Bruxelles. Ara és l'hora!










22/09/14

Scozie: il no al vinç intal vôt su la indipendence

Ai 18 di Setembar, cuntune partecipazion al vôt che e à sfiliât l’85%, i scozês a àn decidût di restâ dentri dal Ream Unît. I no ae indipendence de Scozie a son stâts il 55,3%, ancje se in cualchi circoscrizion – tant che chê di Glasgow, la citât plui grande dal paîs – il vôt indipendentist al è stât maioritari. La vilie dal referendum, la pôre pal sucès dal sì al veve sburtât i rapresentants principâi dal front unionist (conservadôrs, laburiscj e liberâi democratics) a impegnâsi par garantî in curt spazis di autoguvier inmò plui larcs in cjamp fiscâl e des politichis sociâls no dome pe Scozie, ma ancje par Gales e Irlande dal Nord. Impegns che i scozês a domandin cumò di rispietâ prime des elezions politichis in program intal Ream Unît Inte Vierte dal 2015. Al podarès someâ paradossâl ma, cundut che il al à pierdût, il vincidôr vêr di chest vôt al è il prin ministri scozês dimissionari, l’indipendentist Alex Salmond, che sul imprin al veve proponût un referendum su la autodeterminazion propit cun chê di otignî plui podês pes istituzions scozesis.
Font: BBC, 19/09/14; The Guardian, 19/09/14; Naiz:, 19/09/14

Paîs catalans: 1,8 milions in place pe indipendence

Ai 11 di Setembar lis organizazions Assemblea Nacional Catalana e Òmnium Cultural a àn rivât inte imprese di inmaneâ la plui grande manifestazion viodude in Europe intai ultins agns cul puartâ a Barcelone 1.800.000 personis a àn domandât di podê votâ pe indipendence de Catalogne. Ancje cul sburt di chê iniziative, ai 19 di Setembar il Parlament catalan al à fate buine cuntune grande maiorance une leç su lis consultazions popolârs che i permet al president de Generalitat (guvier catalan), Artur Mas, di firmâ il decret par clamâ dongje il referendum su la indipendence ai 9 di Novembar. La volontât popolâr catalane si scuintre però cul dinei plui totâl ae consultazion che al rive des istituzions spagnolis. Cun di fat, ancjemò prime di viodi la leç e il decret sul referendum, il guvier spagnûl al veve za decidût di impugnâju denant dal tribunâl costituzionâl. Il braç di fier al promet duncje di lâ indenant e di jessi simpri plui grivi.
Font: VilaWeb, 11-19/09/14; Avui, 11-20/09/14