Il
ministeri irlandês pes areis gaelichis al à comunicât la partence
di gnovis iniziativis a pro dal gaelic inte suaze de strategjie pe
lenghe irlandese pe dade 2010 – 2030. Si trate di dodis azions
pensadis par judâ lis fameis dal Gaeltacht, o sei lis areis là che
il gaelic al à ancjemò une presince significative, che a àn chê
di tirâ sù i lôr fruts par irlandês. Si tacarà cuntune campagne
par spiegâ i vantaçs dal cressi i fîs par gaelic che e scomençarà
za a partî dai servizis pe maternitât. Si previodin po jutoris e
servizis in plui pes scuelis gaelichis, pai cjamps estîfs e pai cors
di formazion indreçâts ai fantats che a fevelin par irlandês.
Materiâi e risorsis linguistichis a saran po metûts a disposizion
par mieç di un gnûf portâl digjitâl. Cun di plui il Gaeltacht al
sarà dividût in 19 areis di planificazion linguistiche in maniere
di svilupâ intervents plui specifics daûr des esigjencis diviersis
di ogni teritori.
Propit i
plans di politiche linguistiche che a varessin di permeti di svilupâ
lis strategjiis di promozion de lenghe a mostrin però di jessi intun
moment dificil. Cun di fat, daûr dal comissari pe lenghe irlandese
Seán Ó Cuirreáin, cetantis aministrazions e dipartiments publics
no àn inzornât i lôr plans di politiche linguistiche e no àn
inviât gnovis azions di tutele dal gaelic. Une situazion che e je
testemoneade ancje dal aument des protestis pe mancjance di servizis
linguistics. Fintremai des areis dal Gaeltacht a rivin segnalazions
di segnaletiche dome par inglês e di mancjance di personâl in stât
di doprâ la lenghe locâl intai uficis publics.
Font:
Gaelport, 01/05/12; Irish Times, 25/04/12
Nessun commento:
Posta un commento