A
van indenant lis iniziativis par domandâ la riunificazion dal
dipartiment de Loire Atlantiche cul rest de Bretagne storiche intune
regjon uniche, ma a compagnâlis dispès e je la rispueste repressive
des autoritâts francesis. Doi i câs sucedûts tes ultimis
setemanis.
Il blog di Internazionalitari al nas di une trasmission di Radio Onde Furlane e al fevele, cuntun tai nazionalitari, des nazions cence stât e des minorancis nazionâls de Europe.
20/08/15
Sami: celebrazions pe Zornade dai popui natîfs
Ai
9 di Avost e cole la Zornade internazionâl dai popui natîfs
proclamade de ONU che, dal 1994 incà, e je ocasion par meti in
evidence lis rivendicazions di chestis comunitâts in temis tant che
il rispiet dai dirits umans, la salût, la educazion e l’ambient.
Si calcole che, a nivel mondiâl, a sedin sù par jù 370 milions lis
personis che a partegnin a comunitâts ricognossudis tant che popui
natîfs, di chestis passe 300 mil a vivin inte regjon di Barents.
Propit inta cheste aree si son tignudis lis dôs iniziativis
principâls a nivel european par celebrâ la Zornade dai popui
natîfs, dutis dôs inmaneadis di organizazions sami. A Karasjok,
intal Nord de Norvegje, in plui dai sami l’apontament al à clamât
dongje ancje delegâts rivâts de Groenlande e de comunitât newari
dal Nepal. A Teriberka, intal Nord Ovest de Federazion Russe, si son
invezit dâts adun rapresentants di dutis lis comunitâts sami de
regjon di Barents.
Font:
Barents Observer,
12/08/15
Corsiche: Femu a Corsica e Corsica Libera si svicinin
Ai
9 di Avost si à sierade la edizion 2015 des Ghjurnate Internaziunali
di Corti che zaromai di agns a son un dai moments di confront
principâi tra diviers moviments nazionalitaris de Europe e de aree
mediteranie. Chest an, dut câs, la manifestazion e je stade ancje la
ocasion pal svicinament des dôs animis dal moviment nazionâl cors,
o sei chê indipendentiste rapresentade di Corsica Libera e chê
moderade di Femu a Corsica. Pai rapresentants dai doi partîts chê
di Corti e varès di jessi la prime di une schirie di riunions che si
proponin di svilupâ une convergjence su plui temis e di rivâ a di
une aleance eletorâl che e podarès cjapâ forme a partî dal secont
turni des prossimis elezions aministrativis.
Font:
Alta Frequenza,
10/08/15
Aragon: gnove politiche pal catalan
Tal
2013 il Parlament dal Aragon, cui vôts a pro de diestre spagnoliste
e regjonaliste (PP e PAR), al veve fate buine une gnove leç su lis
lenghis che e leve in buine sostance a dismantelâ il sisteme di
tutele inviât de leç dal 2009 e e scancelave fintremai il concet di
lenghe catalane par sostituîlu cu la definizion di “lenghe
aragonese proprie de aree orientâl”. Tra i prins pas dal gnûf
guvier aragonês, formât di socialiscj (PSOE) e dai nazionalitaris
de Chunta Aragonesista (CHA), si à la nassite di une direzion
gjenerâl di politiche linguistiche che e varà, tra lis altris
robis, di svilupâ une gnove leç su lis lenghis che, cun dute
probabilitât, e larà a recuperâ l’implant di chê dal 2009. Par
che il proviodiment al passi in Parlament, il guvier aragonês al
varà però di cjatâ la poie ancje di Podemos e IU che za a vevin
permetût cul lôr vôt la nassite dal gnûf esecutîf cence rivâ
però a di une aleance uficiâl.
Font:
El Mundo,
08/08/15
Paîs Catalans: multe de UEFA al Barça pes esteladas
La
presince intant de finâl de Leghe dai Campions des esteladas,
o sei des bandieris storichis dal sintiment nazionâl catalan, i à
costât ae societât di balon dal Barcelone une multe di 30 mil euros
de bande de UEFA. La sanzion, che te prime version e previodeve une
multe plui alte e la pussibilitât di sierade dal stadi, e à lassât
la societât catalane cu la bocje garbe. I rapresentants dal Barça a
àn cussì concuardât une serie di riunions tecnichis cui
funzionaris de UEFA par spiegâur che la esposizion des esteladas
plui che un messaç politic e rapresente un sintiment popolâr che al
à lidrîs antighis e che al à une largje difusion sociâl e par
chest nol varès di jessi sanzionât.
Font:
VilaWeb,
07/08/15
Macedonie: no des ONG al censiment prime des elezions
Passe
cuarante ONG de Macedonie, a partî de sezion locâl dal Comitât
Helsinki pai dirits umans, a àn cjapât une posizion unitarie
cuintri dal plan presentât dal prin ministri Nikola Gruevski par
tignî un censiment etnic prime des elezions anticipadis che si
tignaran intal Avrîl dal 2016. Subissât dai scandui, Gruevski al à
vût di acetâ che si torni a votâ in curt e che si riformi la leç
e lis listis eletorâls par evitâ gnûfs suspiets di imbrois. Ta
cheste clime di tension politiche un censiment etnic al riscje di
butâ benzine sul fûc massime se si calcole che i risultâts dal
censiment dal 2011 a vevin vût di jessi anulâts par vie des acusis
incrosadis di vê alterât i dâts, cui partîts de minorance
albanese che a vevin acusât la maiorance di vê calât il numar dai
membris di cheste comunitât e i partîts macedons che a acusavin i
albanês di vê falsificât a lôr vantaç i dâts cjapâts sù intai
comuns là che a vevin la maiorance. Ancje i membris de comission
eletorâl che e veve lavorât su chel censiment a visin dai pericui
che une gnove consultazion fate di presse e podarès puartâ e a
invidin a concuardâ cu lis istituzions europeanis la planificazion e
il davuelziment dal prossim censiment. Par intant, duncje, i ultins
dâts ricognossûts a restin chei dal 2002 cuant che il 64% de
popolazion al risultave slâf macedon, il 25% albanês e il rest al
jere formât di rom, turcs, serps e altris minorancis.
Font:
Balkan Insight,
05/08/15
Romanie: minorancis, il garant al tutele il stât e no i citadins
Il
Consei Nazionâl Székely, une des organizazions di riferiment de
minorance ongjarese de Romanie, al à segnalât ae autoritât di
garanzie rumene une gnove leç statâl che in buine sostance e
proibìs l’ûs public di bandieris o stemis des comunitâts locâls.
Pai rapresentants de minorance la normative e va cuintri de
Costituzion rumene e de Cjarte europeane sul autoguvier locâl e, par
chest, a domandavin al garant di jevâ la cuistion denant de Cort
costituzionâl. La autoritât di garanzie rumene e à però mostrât
di jessi impegnade a difindi plui il stât che no i citadins dal
moment che e à refudât la domande fate indenant dal Consei Nazionâl
Székely cu la motivazion che il dirit ae autonomie al è simpri
subordenât al interès statâl e che il principi di riferiment in
câs come chescj al è chel de unitât dal stât.
Font:
EFA,
05/08/15
Asturiis: gnove domande pe uficialitât de lenghe proprie
La
presidente de Academie de Lenghe Asturiane, Ana Maria Cano, e je
intervignude intant de scree de cuinte edizion de universitât estive
asturiane par domandâ che intal statût di autonomie des Asturiis si
previodi la couficialitât pe lenghe proprie. La soluzion dal
probleme linguistic intes Asturiis, e à dite Ana Maria Cano, e je
responsabilitât dai politics che a àn di impegnâsi pe plene
uficialitât dal asturian. Intal percors par rivâ a chest obietîf,
e à ricuardât la presidente de Academie, a son però altris
intervents di puartâ a bon fin tant che slargjâ l’ûs sociâl de
lenghe e otignî il ricognossiment di specialitât pal insegnament
dal asturian. Al è di dî che, propit su chest ultin teme, il
responsabil pe educazion dal guvier asturian, Genaro Alonso, al à
domandât al ministri spagnûl pe istruzion, Íñigo Méndez de Vigo,
il ricognossiment pal asturian inte suaze dal decret su lis
specialitâts: propueste che, prime di vê une rispueste uficiâl, e
varà cumò di jessi esaminade dal ministeri.
Font:
La Nueva España,
04/08/15;
El Diario, 06/08/15
Paîs Catalans: su Internet al va dilunc a cressi l’ûs dal catalan
Daûr
dal ultin scandai publicât de rêt dai webmasters indipendents
catalans, la percentuâl complessive dal ûs de lenghe catalane su
Internet e je dal 63,93%, o sei in cressite ancje se une vore
limitade rispiet al dât precedent. Intal rapuart che al compagne lis
cifris sul ûs dal catalan in rêt si segnalin ancje lis novitâts
che a interessin la presince de lenghe su Internet. Al è il câs,
par fâ doi esemplis, dal inseriment dal catalan inte aplicazion di
Google di traduzion automatiche des imagjins e de presince dentri di
WordReference di un dizionari di catalan.
Font:
Racó Català,
03/08/15
Paîs Basc: simpri plui euskara a Biarritz
In
Ipar Euskal Herria, o sei la part dal Paîs Basc che si cjate intal
stât francês, la citât di Miarritze / Biarritz e je une di chês
là che l’impegn a pro de lenghe basche al è stât plui fuart
ancje de bande de aministrazion publiche. Intun percors inviât za
uns vincj agns indaûr, lis aministrazions che a àn vuidât la
localitât basche a àn proviodût a meti fûr la segnaletiche in
forme bilengâl, a doprâ l’euskara inte comunicazion, a nomenâ un
delegât pe lenghe basche e a formâ il personâl ancje sul plan
linguistic. Cumò si à decidût di fâ un altri pas indenant cu la
nassite, chest Autun, di un servizi comunâl dut dedicât al euskara
formât di trê funzionaris. Si trate dal prin comun dal dipartiment
a indotâsi di un servizi di cheste fate.
Font:
Naiz:,
31/07/15
Cornualie: bilinguisim ancje tes stazions di polizie
Inte
gnove stazion di polizie di Truro, in Cornualie, la segnaletiche e je
dute bilengâl. Cundut che a fevelâ come prime lenghe il cornic al
sedi mancul dal un par cent de popolazion, la direzion de polizie e à
decidût che in dutis lis gnovis stazions dal cuarp la lenghe
corniche e varà di cjatâ intai segnâi visîfs la stesse dignitât
di chê inglese. Par chel che al rivuarde invezit lis stazions za in
vore, la segnaletiche e deventarà bilengâl a man a man che si
proviodarà ae sostituzion naturâl des tabelis.
Font:
The Mirror,
29/07/15
Iscriviti a:
Post (Atom)