02/05/17

Galizie: presentade la gnove edizion di Correlingua

E je stade presentade ta chestis zornadis la gnove edizion de Correlingua, la corse pe lenghe galiziane partecipade dai fruts e dai fantats di ducj i ciclis educatîfs e inmaneade de CIG-Ensino, de Associazion Sociopedagogjiche Galiziane (AS-PG) e di A Mesa pola Normalización Lingüística cu la poie di diviersis aministrazions locâls. La manifestazion si davuelzarà dai 2 ai 16 di Mai, cun partence di Monforte de Lemos e rivade a Estrada dopo di vê scjavaçât buine part de Galizie. La presentazion uficiâl e je stade compagnade de premiazion dai trê concors peâts a Correlingua e che a rivuardin il fumut, il video e il manifest de manifestazion.
Font: Sermos Galiza, 18/04/17

Ream Unît: vôt anticipât, efiets in Scozie e Irlande dal Nord

Ai 19 di Avrîl il Parlament britanic al à ratificât la decision dal guvier vuidât di Theresa May di clamâ dongje elezions anticipadis pai 8 di Jugn (la scjadince regolâr e sarès colade ai 7 di Mai dal 2020). Pe prime ministre al covente tornâ a votâ par dâi ai Conservadôrs une maiorance inmò plui largje che i permeti di superâ i pidiments metûts des oposizions al percors dûr sielzût dal guvier britanic par puartâ fûr il Ream Unît de Union Europeane. Cundut dal vantaç che i sondaçs i dan ai Conservadôrs, chei altris partîts no àn jevât masse problemis ae convocazion des elezions anticipadis. Se la campagne eletorâl e sarà duncje centrade sul teme des modalitâts di jessude de Union, in Scozie il teme centrâl al sarà chel dal secont referendum su la indipendence domandât dal esecutîf e dal Parlament scozês. I indipendentiscj dal SNP, che tes elezions stadis a vevin otignût 56 dai 59 deputâts che la Scozie e mande intal Parlament di Londre, si cjatin a vê di frontâ un compit pardabon dificil, o sei chel di confermâ il lôr sucès. Ogni pas indaûr, di fat, al sarès interpretât dai partîts unioniscj come une manifestazion dai scozês di no volê un altri referendum su la indipendence. I nazionaliscj scozês però a àn almancul une arme di podê zuiâsi, o sei la muse rote de prime ministre britaniche che dopo vê dite di no a di un secont referendum parcè che al coventave centrâ dute la atenzion de politiche su la Brexit, no à vût scrupul a clamâ dongje elezions anticipadis. Cun di plui, il vôt al cole intun moment dificil ancje pe Irlande dal Nord là che no si à inmò cjatât un acuardi par un gnûf guvier e si riscje di tornâ ae aministrazion direte di Londre.
Font: The Guardian, 18-19/04/17; BBC, 18-19/04/17

Turchie: plui risis pai curdis dopo dal referendum

La organizazion internazionâl pai dirits umans Human Rights Watch e à invidât il president turc Recep Tayyip Erdoğan e lis istituzions dal paîs a meti fin ae schirie di procès injuscj che a àn puartât ae condane di disinis di rapresentants politics e istituzionâi, gjornaliscj, insegnants e oms di culture de comunitât curde. Pe organizazion, di fat, si trate di azions judiziariis svilupadis dome in gracie dal stât di emergjence che al va dilunc di mês in Turchie e che a van a violâ i dirits umans ricognossûts a nivel internazionâl. Nancje un mês indaûr Human Rights Watch e veve criticât lis istituzions turchis par vê arestât 13 parlamentârs dal Partît Democratic dal Popul (HDP), la formazion politiche di riferiment de comunitât curde, e par vê comissariât plui di 80 Comuns aministrâts di membris de oposizion curde. Ta cheste clime persecutorie, e zonte la organizazion pai dirits umans, la incressite dai podês intes mans dal president definide cul referendum costituzionâl votât ai 16 di Avrîl e che il so davuelziment nol à rispietât lis garanziis di coretece fissadis a nivel internazionâl, e riscje di zontâ ancjemò plui violazions ai dirits de comunitât curde e des oposizions democratichis.
Font: Ekurd Daily, 18/04/17; EFA, 18/04/17

Galizie: ancje la ARIGAL si promôf par galizian

Ai 17 di Avrîl si à presentât il gnûf sît internet de ARIGAL, la associazion galiziane dai agregâts che e cjape dentri plui dal 90% des impresis de Galizie impegnadis tal produsi, te trasformazion industriâl e tal comercializâ materiâi di risulte de piere. Par mostrâ la sô atenzion e il so leam cun ogni aspiet de Galizie, la associazion di categorie e à volût che il so sît gnûf al fos di plante fûr in lenghe proprie e cul domini .gal che al marche lis realtâts espression de comunitât galiziane. Un segnâl che la campagne inviade dal guvier par sburtâ l’ûs dal galizian inte economie e tache a dâ i prins risultâts ancje fûr di chei setôrs, tant che la enogastronomie, là che la lenghe proprie e veve za cjatât un ciert acet intune logjiche di valorizazion dal leam diret cu la tiere e duncje cu la naturalitât e la bontât dai prodots.
Font: Lingua.gal, 17/04/17

Bretagne: incursion indipendentiste te campagne eletorâl

La campagne eletorâl pes presidenziâls francesis e je stade la ocasion par une azion dimostrative dai indipendentiscj bretons. Vie pe gnot dai 11 di Avrîl membris dal coletîf clandestin Dispac’h a àn taponât i panei eletorâi dai diviers candidâts cun manifescj bilengâi che, in non de identitât nazionâl bretone, a invidin a no votâ pe France e a mobilitâsi pe indipendence de Bretagne. Intune gnot sole i ativiscj a àn rivât a picjâ sù i lôr manifescj in 28 comuns, dilunc di une distance di cent chilometris tra lis provinciis di Finistère, Côtes d’Armor e Morbihan.
Font: France Bleu, 12/04/17

Paîs Basc: decret su la toponomastiche bilengâl in Navare

Si sierarà ai 8 di Mai la dade di partecipazion publiche al progjet di leç fat indenant dal guvier de Navare su la toponomastiche uficiâl. Il test dal decret al vûl procedi cu la normalizazion grafiche e ortografiche dai nons des comunitâts locâls che a formin la Navare, in particolâr par chel che si riferìs ai nons par basc che no simpri a rispietin la forme e la grafie uficiâl dal euskara. Cun di plui si previôt une normalizazion de segnaletiche uficiâl che, tal câs di toponims bilengâi, e à di meti par prin il non par euskara te aree bascofone e che e slargje la pussibilitât di scrivi il non par euskara ancje te aree no bascofone. Une pussibilitât, cheste ultime, che e à fat saltâ sù la diestre nazionaliste spagnole che le à piturade come il tentatîf di baschizâ ancje lis areis de Navare là che la presince de lenghe e je margjinâl.
Font: Euskarabidea / Nafarroako Gobernua, 12/04/17; Pamplona Actual, 19/04/17

Paîs Catalans: volontaris pe lenghe, passe 10 mil cubiis gnovis

Vie pal 2016 il program di volontariât pe lenghe imbastît de direzion gjenerâl di politiche linguistiche de Catalogne al à puartât ae nassite di passe 10 mil cubiis formadis di une persone che e fevele in maniere fluente par catalan e une altre che e je daûr a imparâ la lenghe par un totâl di plui di 200 mil oris di conversazion par catalan. Il numar di cubiis formadis al è in linie cun chel dal an prime. Lis gnovis iscrizions al program a son stadis 5.967, pal 70% e passe feminis. La formazion di cubiis linguistichis e à interessât 210 localitâts de Catalogne ancje se la plui part si è centrade inte aree di Barcelone.
Font: Generalitat de Catalunya, 12/04/17

Sardegne: iniziative par promovi il cine tes lenghis propriis

Ai 30 di Avrîl si à la ultime zornade par presentâ i progjets cinematografics de prime edizion di Kentzeboghes, concors imbastît par sburtâ la produzion di curtmetraçs e di documentaris fevelâts almancul pal 60% intune des lenghis o des varietâts feveladis in Sardegne, ven a dî sart e catalan ma ancje galurês, sassarês e tabarchin. La iniziative e je stade metude adun de Società Umanitaria - Cineteca Sarda di Casteddu / Cagliari, de associazion Babel, di Eja TV e di Areavisuale Film. Il concors al è dividût in dôs sezions, une pes scuelis e une pai autôrs. I films che a vessin di jessi metûts adun su la fonde dai progjets premiâts a saran po presentâts in anteprime tal Babel Film Festival, manifestazion di riferiment pes produzions cinematografichis intes lenghis minorizadis e intes varietâts linguistichis locâls.
Font: La Cineteca Sarda, 09/04/17

Sápmi: indenant cu la lote su la pescje tal Deatnu

Dopo di chel finlandês ancje il Parlament norvegjês al à fat bon l’acuardi pal disfrutament de pescje dilunc dal flum Deatnu / Teno / Tana che al scjavace la tiere dai Sami (Sápmi) a cjaval tra i doi stâts. Il progjet al à cjatât la oposizion dure des comunitâts nativis rapresentadis sul plan istituzionâl dai Parlaments sami di Norvegje e Finlande dal moment che al larès a violâ i dirits umans e chei storics di cheste comunitât. Lis dôs istituzions si son dadis adun cumò par domandâ la poie di altris popui natîfs e di organizazions internazionâls. Diviers esperts si son za fats indenant par ufrî lis lôr competencis legâls ai singui e aes associazions di pescjadôrs che a puedin svantâ dirits su la pescje tal flum. I rapresentants dai Parlaments sami a àn fat savê che a poiaran lis causis che a vessin di jessi inviadis ta cheste suaze e che a fasaran apel pe tutele dai dirits dai sami denant de ONU e des istituzions europeanis.
Font: The Barents Observer, 06/04/17

Irlande: gaelic in calâ ancje tal Gaeltacht

Daûr dai ultins dâts uficiâi publicâts dal ufici centrâl pes statistichis de Republiche di Irlande la percentuâl de popolazion in stât di fevelâ par gaelic e je la plui basse di setante agns incà. I citadins che a declarin di savê fevelâ par irlandês, di fat, a son 1.761.420 e par cjatâ un dât piês si à di lâ indaûr al 1946. Inmò plui penze e je però la situazion intal Gaeltacht, o sei lis areis là che l’irlandês al è ancjemò fevelât in maniere cuotidiane de popolazion locâl. Ta chestis areis la percentuâl di chei che a doprin la lenghe ogni dì e je colade al 21,4% cuntune pierdite dal 11,2% intal zîr di cinc agns. Pes organizazions pe lenghe cheste e je la dimostrazion plui dramatiche di ce che si denunciave za di agns, ven a dî che la strategjie plurienâl pe lenghe imbastide dal guvier irlandês e je dal dut ineficiente, ancje par vie de scjarsetât des risorsis invistidis par metile in vore.
Font: Irish Times, 06/04/17