23/12/17

Paîs Catalans: inmò maiorance indipendentiste in Catalogne

Lis elezions pal Parlament catalan clamadis dongje dal guvier di Madrid ai 21 di Dicembar a àn tornât a dâi la maiorance aes fuarcis indipendentistis. Cun di fat, cundut di une campagne eletorâl condizionade de sospension dal autoguvier de comunitât autonome e de presince di diviers candidâts in preson o in esili, i citadins catalans a àn assegnât 70 dai 135 puescj disponibii in Parlament ai partîts sovraniscj e, plui in detai, 34 a son lâts a Junts per Catalunya – liste vuidade di Carles Puigdemont (president deponût cumò in esili a Bruxelles) e che si poie massime sul PDeCAT – 32 a ERC (che il so leader Oriol Junqueras si cjate ancjemò in preson preventive) e 4 ae CUP. Il partît plui votât però al è stât Ciudadanos che al à otignût il vôt di un catalan su cuatri e 37 deputâts in Parlament. Il sucès dal partît vuidât di Inés Arrimadas al è rivât massime su la piel dal PP: il partît tradizionâl de diestre spagnoliste al è di fat colât di 11 parlamentârs a 3. A completâ il front unionist a son po i 17 deputâts dal PSC. Catalunya en Comú-Podem – formazion a pro de autodeterminazion ma contrarie a di un percors unilaterâl di indipendence – e à invezit otignût 8 deputâts. I gnûfs elets a jentraran in cjarie dentri dai 23 di Zenâr e a varan po uns cuindis dîs par inviâ la discussion su la presidence.

19/12/17

Paîs Basc: blocât l’aument dal euskara tes scuelis di Pamplone

Une sentence dal tribunâl superiôr di justizie de Navare e boce il mudament dal model linguistic decidût de aministrazion comunâl di Pamplone in dôs scuelis de infanzie de citât. Dopo agns che si domandave di cressi i puescj disponibii cul model a imersion in lenghe basche, il guvier locâl al veve riformât la ufierte scolastiche citadine puartant i puescj disponibii par euskara di 164 a 408 e sbassant di 255 il numar di chei par castilian o par castilian e inglês. Un intervent che però, pe magjistrature, nol a rispietât il percors previodût de leç.
Font: EiTB, 12/12/17

Montenegro: ricognossiment internazionâl pal montenegrin

Ae fin di un percors durât nûf agns, lis autoritâts dal Montenegro a àn otignût un codiç ISO pal montenegrin (CRN). Chest ricognossiment i da un valôr di uficialitât internazionâl a cheste lenghe che, fin cumò, e vignive calcolade une varietât dal serp. La costituzion di chest paîs balcanic za tal 2007 i assegnave al montenegrin il status di lenghe uficiâl, status che si veve po slargjât intal 2011 a dut il sisteme scolastic public cundut che, propit intal censiment di chel an, il 44% de popolazion al declarave di fevelâ par serp a front di un 36% che al indicave il montenegrin come lenghe proprie. Cun chest gnûf passaç, il montenegrin si infuartìs ancje sul plan internazionâl, intant che i partîts di oposizion e diviersis organizazions a denunciin un aument des discriminazions cuintri di cui che al dopre la lenghe serbe.
Font: Balkan Insight, 12/12/17

Irlande: apel pe difese dai dirits dai irlandês dal Nord

Passe dusinte tra personalitâts dal mont academic, dal sport e de culture nordirlandesis a àn sotscrit un apel al prin ministri de Republiche di Irlande, Leo Varadkar, par che al intervegni par tutelâ i dirits de comunitât nazionaliste e republicane dal Nord a front dal faliment dai tentatîfs par meti in vore ad in plen i contignûts dal acuardi di pâs dal Vinars Sant e di chel seguitîf di S. Andree. In dì di vuê – a denunciin i firmataris – la comunitât nazionaliste nordirlandese no gjolt ancjemò dai stes dirits di chê unioniste. Dopo des elezions di Març, i partîts di riferiment des dôs comunitâts – Sinn Féin e DUP – no àn ancjemò rivât a cjatâ un acuardi di guvier. Tra i ponts di scuintri plui dûrs si à, par esempli, la aprovazion di un leç di tutele e di promozion pe lenghe irlandese.
Font: BBC, 11/12/17

Corsiche: maiorance nazionalitarie cence pareli te Assemblee

Tal secont turni des elezions pe gnove Coletivitât Teritoriâl uniche de Corsiche che si son tignudis ai 10 di Dicembar la coalizion nazionalitarie Pè a Corsica e à otignût un risultât cence precedents. Cun di fat, cul 56,5% dai vôts e à otignût 41 dai 63 puescj disponibii inte Assemblee de isule, a front dai 10 elets de diestre regjonaliste, dai 6 de diestre stataliste (Les Républicains) e dai 6 dal partît dal president francês Emmanuel Macron (La République en marche). I cors a àn duncje premiât in maniere clare la azion dal guvier vuidât di Gilles Simeoni che al met adun i nazionaliscj moderâts di Femu a Corsica e i indipendentiscj di Corsica Libera e che, tra i ponts di fonde dal so program, al previôt la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie. A front de conferme massive par cheste maiorance l’esecutîf di Parîs nol pues lâ indenant a dineâ lis nestris rivendicazions – al à comentât il president de Assemblee stade, Jean-Guy Talamoni – in câs contrari o varìn di passâ aes mobilitazions popolârs e di denunciâ il compuartament de France ator pes capitâls europeanis. Par intant, un prin impegn pal esecutîf cors al sarà chel di gjestî la metude in vore de Coletivitât Teritoriâl uniche che si inviarà il prin di Zenâr dal 2018 de fusion tra la Coletivitât precedente e i dipartiments de Alte e de Basse Corsiche e che e rapresente un sogjet dal dut gnûf inte architeture istituzionâl francese.
Font: Le Monde, 11/12/17

Ocitanie: diplome universitari ocitan a Bordeaux

La universitât Bordeaux Montaigne (Bordèu Montanha) e à ativât un diplome universitari ocitan specializât in culture, patrimoni artistic e spetacul. I cors a son in program tra il Març e il Lui dal 2018 ancje cu la pussibilitât de frecuence a distance. La iniziative e nas de colaborazion jenfri la universitât e l’ufici public pe lenghe ocitane (ÒPLO).
Font: Jornalet, 10/12/17

Paîs Basc: in 11 mil a Parîs pai dirits dai presonîrs bascs

A jerin almancul 11 mil lis personis che ai 9 di Dicembar a àn sfilât pes stradis di Parîs daûr dal strisson cu la scrite “Bakea Euskal Herrian: orain presoak” (Pâs intal Paîs Basc, cumò i presonîrs). La iniziative e je stade inmaneade dai cussì clamâts “Artesans de pâs” che te Vierte di chest an a vevin facilitât la consegne dal arsenâl di ETA aes autoritâts francesis. L’obietîf de manifestazion al jere chel di sburtâ il guvier di Parîs a meti fin aes misuris ecezionâls in vore cuintri dai presonîrs bascs e, plui in particolâr, di domandâ il trasferiment dai presonîrs intes struturis carcerariis plui dongje dal Paîs Basc, la liberazion di chei che a patissin di malatiis seriis, la concession de libertât condizionâl cui stes criteris in vore pai criminâi comuns e la eliminazion dal status di DPS che al incrès lis misuris punitivis. La manifestazion e gjoldeve de poie di passe un miâr di conseîrs e rapresentants politics elets intal Paîs Basc sot aministrazion francese e a sfilâ in prime linie a Parîs a jerin rapresentants di ducj i partîts politics, gjavât il Front National. Un esempli di condivision e di trasversalitât che i organizadôrs a sperin che si puedi espuartâ ancje te part dal Paîs Basc cjapade dentri intal stât spagnûl.
Font: Naiz:, 09/12/17; EiTB, 09/12/17

Moldova: scuintri sui programs radiotelevisîfs rus

Ai 7 di Dicembar il Parlament moldâf al à fat bon un codiç su lis emissions radiotelevisivis che al previôt che no si puedin mandâ in onde contignûts che a rivin di stâts che no àn ratificât la convenzion europeane su la television transfrontaliere. In buine sostance la norme si propon di eliminâ chê che il Partît Liberâl Democratic, cumò al guvier, al definìs “propagande russe”. In plui di minorancis significativis che a àn il rus come prime lenghe, la plui part de popolazion de Moldova e cognòs ancje il rus e duncje dutis lis emitentis principâls a trasmetin cetancj programs ta cheste lenghe, programs che pe plui part a rivin de Federazion Russe o che si poin su materiâi e fonts di chel paîs. Diviers organisims di control a segnalin cemût che cheste situazion e fasi passâ cence mediazion la linie dal Cremlin su cetancj temis sensibii. Il president de Moldova, il filorus Igor Dodon, al à fat savê daurman che nol firmarà la leç. No sarès però la prime volte che il so “no” al ven superât di un intervent de cort costituzionâl che lu suspint dal mandât il timp che al covente par ratificâ il proviodiment. Di là dai siei contignûts politics, la gnove leç e va però ancje a limitâ l’acès de popolazion di lenghe russe a programs radiotelevisîfs te lôr lenghe. Ancje par chest, il guvier de regjon autonome de Gagauzie al à dite che nol metarà in vore la gnove norme e nol imponarà nissune limitazion ae programazion par rus.
Font: Balkan Insight, 08/12/17

Finlande: comitât pe riforme de legjislazion sui Sami

Il ministeri finlandês pe justizie al à metût sù il comitât che al à di riformâ la leç istitutive dal Parlament sami. Il test de gnove propueste di leç al varà di jessi metût jù dentri dal Avrîl dal 2018 e al varà di tignî cont sei dai oblics costituzionâi e di chei internazionâi in materie di dirits umans, sei de declarazion de ONU sui dirits dai popui natîfs. La iniziative e jere domandade di timp des comunitâts sami che a sperin che cheste riforme ur dedi plui fuarce, massime par chel che al rivuarde l’autoguvier e la pussibilitât di contribuî in maniere determinante intes decisions che a rivuardin i Sami, a partî di chês su la gjestion des tieris e des aghis dulà che a vivin.
Font: The Independent Barents Observer, 05/12/17

Paîs Catalans: Spagne batude sul front judiziari a Bruxelles

Intant che si svicine la date des elezions pal Parlament catalan e che la campagne eletorâl e je condizionade a fuart des misuris repressivis metudis in at dal guvier di Madrid cuintri des istituzions autonomis, la atenzion e reste pontade sui aspiets judiziaris de vicende. Dopo vê confermade la preson preventive cence cauzion par doi dai membris dal guvier catalan – Oriol Junqueras e Joaquim Forn – e pai presidents de ANC, Jordi Sànchez, e dal Òmnium Cultural, Jordi Cuixart, il judiç dal tribunâl suprem spagnûl che al à in man il procediment cuintri dal indipendentisim catalan, Pablo Llarena, al à decidût di ritirâ i ordins europeans di arest e di consegne cuintri dal president catalan Carles Puigdemont e di cuatri membris dal so esecutîf (Antoni Comin, Meritxell Serret, Lluís Puig e Clara Ponsatí) cumò in esili a Bruxelles. La decision e je stade cjapade par pôre che la magjistrature belgjiche, tal câs che e acetàs la estradizion, e limitàs i reâts che i cinc a podevin jessi clamâts a rispuindi. A Bruxelles duncje il câs al è za stât archiviât e lis misuris cautelârs cuintri dai cinc rapresentants catalans a son stadis ritiradis. Intant, par tignî impiade la atenzion de Europe su la Catalogne, ai 7 di Dicembar il distret european de capitâl de Belgjiche al à viodût a sfilâ pes sôs stradis disinis di miârs di catalans – 45 mil daûr des fonts di polizie – che a àn domandât ae Europe di dâsi une sveade e a àn stiçât lis istituzions comunitariis a no voltâsi di chê altre bande. Al è di dî che lis manifestazions no mancjin a Bruxelles, ma al è râr di viodint di cussì partecipadis, massime se si pense di dulà che a rivavin i partecipants.
Font: Naiz:, 04-14/12/17; VilaWeb, 07/12/17

Asturiis: ents locâi a pro de uficialitât dal asturian

In dì di vuê i conseis locâi che a àn cjapât une posizion uficiâl a pro de uficialitât dal asturian a son vot – Avilés, Bimenes, Castrillón, Llena, Mieres, Noreña, Uviéu e Xixón – e a rapresentin passe 650 mil personis, o sei il 62,79% de popolazion des Asturiis. Al è zaromai di agns che si domande une riforme dal statût di autonomie par che al asturian e al galizian fevelât te part plui ocidentâl di cheste comunitât ur vegni ricognossût un status di plene uficialitât dongje dal castilian, ma nissun dai guviers in cjarie fin cumò al à inviât chest procès. Par solit il dinei al jere motivât cu la mancjance di une domande sociâl suficiente. Cumò però, a disin lis organizazions impegnadis pe uficialitât dal asturian, cheste scuse no à plui mani. Cun di fat, dongje dai ents locâi che a rapresentin cuasi doi tierçs de popolazion, a declarâsi a pro de uficialitât a son 31 dai 45 deputâts che a formin il Parlament asturian (socialiscj, Podemos, Izquierda Xunida, Foro). A chest pont, duncje, i tocje al esecutîf decidi se lâ dilunc a blocâ la riforme o fâ sô une rivendicazion che e gjolt de poie de maiorance dai elets.
Font: Asturies.com, 04/12/17

Paîs Basc: lenghe de sanitât, in 188 mil a àn miôr l’euskara

Sul imprin dal 2017 il guvier de Comunitât Autonome Basche al veve inviât une campagne par invidâ i citadins a indicâ cuale lenghe che a vevin miôr di fevelâ cui miedis e cui operadôrs dal servizi sanitari (Osakidetza). L’intindiment al jere chel di garantî il plui pussibil i dirits linguistics ancje te sanitât publiche là che, intai ultins dîs agns, i dipendents cuntune competence suficiente par doprâ l’euskara a son cressûts e a rapresentin sù par jù un tierç dal totâl. In dì di vuê a son 188 mil i citadins che a àn za dât la lôr preference al ûs de lenghe basche. A chest pont, il guvier de CAB al varà di cirî di adatâ il sisteme sanitari in maniere di relazionâ il plui pussibil i citadins che a àn sielzût l’euskara come prime lenghe cui operadôrs sanitaris che a àn il profîl linguistic just.
Font: La Vanguardia, 02/12/17

05/12/17

Corsiche: sucès storic dai nazionalitaris cors tes teritoriâls

Sucès storic de coalizion nazionalitarie Pè a Corsica tal prin turni des elezions dai 3 di Dicembar pe gnove Assemblee isolane. Cun di fat, la coalizion - formade dai nazionaliscj moderâts di Femu a Corsica e dai indipendentiscj di Corsica Libera - e à cjapât il 45,36% dai vôts intant che chês altris listis a son restadis cetant indaûr (diestre regjonaliste al 14,97%; diestre stataliste al 12,77%, LREM al 11,26%, intant che chês altris no àn nancje passât il soiâr dal 7%). Pè a Corsica e à plui che dopleât i vôts cjapâts intes elezions dal 2015 e si prepare duncje a guviernâ la gnove Coletivitât Teritoriâl uniche che si inviarà il prin di Zenâr dal 2018 cu la fusion tra l'ent regjonâl e i doi dipartiments che si divideve la isule. Par Gilles Simeoni, che al vuide la coalizion nazionalitarie, il vôt al è un segnâl une vore fuart su la volontât di autoguvier dai cors che a Parîs no podaran plui fâ fente di no viodi. Il secont turni des elezions al è in program ai 10 di Dicembar.
Font: Le Monde, 04/12/17

Europe: iniziativis a pro dai presonîrs catalans

Une delegazion di 16 deputâts dal Parlament European formade di rapresentants di diviersis areis politichis e à domandât in maniere uficiâl di podê visitâ i rapresentants dal guvier catalan e i presidents des dôs organizazions plui impuartantis dal indipendentisim catalan che si cjatin inmò impresonâts in diviersis struturis carcerariis di Madrid par vie de lôr part intal procès di autodeterminazion de Catalogne. La domande e fâs part di une iniziative inviade dal grup formât di uns 30 europarlamentârs par favorî il dialic tra il guvier di Madrid e lis istituzions catalanis. Par cumò però la visite e je stade impedide des autoritâts spagnolis.

Cossovo: sburt par ricognossi i gorans come minorance bulgare

Dopo vê otignût che te gnove leç su lis minorancis nazionâls fate buine dal Parlament albanês ai 13 di Otubar si ricognossès la esistence di une minorance bulgare, lis autoritâts di Sofia a domandin cumò che ancje il Cossovo al fasi chel stes pas. Al centri de rivendicazion a son i gorans, une comunitât su lis 50/100 mil personis di lenghe slave e di religjon musulmane che e vîf in trente paîs de regjon di Gora a cjaval tra Cossovo, Albanie e Macedonie. Almancul dai agns ’90 dal secul stât incà cheste popolazion e je stade rivendicade prime come part de comunitât serbe, po macedone e cumò bulgare. Sul plan sientific e linguistic la sô partignince no je masse clare e e lasse duncje la puarte vierte a interpretazions variis. La int dal puest si ricognòs intune identitât regjonâl gorane e dome une part e rivendiche la sô partignince a di une comunitât nazionâl plui grande. Diviers di lôr a àn acetât la ufierte di ricevi ancje la citadinance bulgare, massime par vie che cheste ur permeteve di vê libertât di circolazion inte Union Europeane. La Bulgarie però cumò e sburte plui a fuart e e vûl che ancje il Cossovo al procedi al ricognossiment uficiâl dai gorans come minorance bulgare, ricuardant aes autoritâts dal paîs che il guvier di Sofia al podarès dâ une man intal procès di integrazion inte UE. Il ricognossiment però al dipent ancje de volontât dai gorans stes, dal moment che la normative cossovane e previôt che a sedin lôr cuntune racuelte di firmis a lâ ta cheste direzion.
Font: Balkan Insight, 27/11/17

Paîs Catalans: Baleârs, si propon un ufici pai dirits linguistics

Il moviment MÉS per Menorca al à presentât un emendament al progjet di leç di belanç pal 2018 fat indenant dal guvier des Baleârs là che al propon la creazion di un ufici pai dirits linguistics, sul model di chei za in vore in Catalogne e te Comunitât Autonome Valenziane. L’intindiment al è chel di sostignî lis personis che a son stadis discriminadis sul plan linguistic, di fâ informazion sul teme dai dirits linguistics, di tignî di voli la situazion e publicâ rapuarts periodics in proposit e, su la fonde des problematichis vignudis fûr, fâ indenant propuestis normativis che a cirin di superâlis.
Font: La Vanguardia, 28/11/17

Gales: operadôrs dividûts su la sanitât par galês

La organizazion Cymdeithas yr Iaith Gymraeg e à inviât ae gnove ministre galese pe lenghe Eluned Morgan une letare vierte sotscrite di un biel trop di professioniscj e di operadôrs de sanitât che a domandin che intai nivei di tutele minime dal galês si previodi che ducj i servizis sanitaris primaris e di prossimitât a vegnin garantîts ancje par galês. Cun di fat, cemût che si spieghe tal document, plui une persone e je debule o in situazions di emergjence e plui al è impuartant vignîi incuintri cul ûs de lenghe che e à miôr di doprâ. Un concet che al ven ricognossût ancje de sezion galese dal ordin dai miedis (BMA) che però e lamente cemût che, par esempli, in dì di vuê no si vedin avonde miedis di famee cuntune competence linguistiche suficiente par cuvierzi dut il Gales. Par chest a invidin la ministre a meti prime il criteri des cognossincis medichis di chel des competencis linguistichis.
Font: Wales On Line, 27/11/17

Paîs Basc: presentât Euskaraldia par promovi l’ûs de lenghe

Ai 23 di Novembar istituzions de Comunitât Autonome Basche e de Navare e coletîfs impegnâts a pro de lenghe a àn presentât Euskaraldia, une iniziative che si propon di incressi l’ûs sociâl de lenghe basche. Par 11 zornadis, dai 23 di Novembar ai 3 di Dicembar dal 2018, dutis lis aministrazions comunâls e i citadins che a aderissin ae campagne si impegnaran a doprâ la lenghe basche in ogni ocasion pussibile. Nancje inviade la iniziative, a son za uns cuarante i comuns che a àn declarât la intenzion di partecipâ, ma al è timp fintremai Març par aderî. I citadins a podaran invezit dâ la lôr adesion fintremai Setembar. Intant de iniziative, par facilitâ l’ûs dal euskara, a varan intor dai distintîfs che a specifichin se a son in stât di fevelâ la lenghe o pûr se a son dome bogns di capîle ma a àn gust che si ur feveli par basc.
Font: Noticias de Navarra, 24/11/17

Paîs Basc: propueste di acuardi di EH Bildu a PNV e Elkarrekin

EH Bildu, la coalizion de çampe indipendentiste basche, e à presentât un progjet di acuardi nazionâl indreçât al PNV e a Elkarrekin Podemos par fâi cuintri ae “involuzion democratiche” vuidade dal guvier spagnûl di Mariano Rajoy. La propueste e je chê di formâ une maiorance alternative che si poi su trê elements: autoguvier, dirits sociâi e convivence. Denant dal atac cuintri des istituzions catalanis, la coalizion sovraniste basche e sburte par un rapuart di libare adesion e avualiance jenfri Paîs Basc e stât spagnûl che al superi la dimension de autonomie par garantî ad in plen i dirits politics dai bascs. Il progjet al previôt ancje di lavorâ adun par scancelâ la ecezionalitât juridiche che in dì di vuê e viôt ancjemò centenârs di bascs in preson o in esili.
Font: Naiz:, 24/11/17

Macedonie: rinviade la gnove leç linguistiche

In Macedonie si slungje il percors par fâ buine la gnove leç su lis lenghis previodude intal acuardi di guvier tra i Sociâi Democratics e i partîts de comunitât albanese che lu sostegnin. Dopo dal vie libare dât dal Parlament in prime leture, cumò il test al veve di jessi votât une seconde volte ma i emendaments presentâts de oposizion de diestre nazionaliste (VMRO DPMNE) a varessin sprolungjât i lavôrs parlamentârs e ritardât il vôt de riforme dal sisteme judiziari. Une prospetive che no i plaseve masse ae Comission Europeane che, par bocje dal so delegât Johannes Hahn in visite a Skopje ai 20 di Novembar, e à fat capî che la normative su lis lenghis no je une des prioritâts de UE. Il percors de leç al è stât duncje rinviât a dopo de aprovazion des normis sul sisteme judiziari. I albanês a rapresentin un cuart de popolazion de Macedonie: in dì di vuê la lenghe albanese e je duncje couficiâl in ducj i comuns là che cheste comunitât e rapresente almancul il 20% de popolazion. La gnove leç e larès a incressi il status de lenghe ancje là che i albanês no rivin a cheste percentuâl.
Font: Balkan Insight, 24/11/17

Galizie: si lavore par un cuotidian par galizian

In dì di vuê Sermos Galiza al è l’unic setemanâl par galizian distribuît intes ediculis, al è ancje il plui impuartant portâl informatîf inte lenghe proprie de Galizie, cun passe 140 mil utents censîts intal Otubar stât, e al à tacât a publicâ libris. Il progjet editoriâl al ponte però a slargjâsi ancjemò di plui. Cun di fat cumò a fasin savê di jessi daûr a lavorâ par rivâ a publicâ un cuotidian: un progjet che al podarès deventâ realtât intal 2019.
Font: Sermos Galiza, 24/11/17

Irlande: gaelic lenghe cuotidiane dome pal 1,7% de int

I dâts riferîts al censiment dal 2016 a mostrin che dai 4 milions e 750 mil abitants de Republiche de Irlande a son a pene 73.803 chei che a doprin ogni dì il gaelic irlandês, o sei l’1,7% de popolazion. Dal moment che tal 2011 a jerin 77.185, si pues stimâ une diminuzion di cuasi l’un par cent par an. Il 20% di lôr al è a stâ a Dublin, plui di un cuart dal totâl al vîf invezit intal Gaeltacht, o sei lis areis de isule là che la lenghe e je plui doprade. I dâts a cressin e no di pôc se si cjale invezit a chei che a disin di jessi bogns di fevelâ par gaelic, ma che no lu doprin ogni dì: la situazion miôr si le à inte contee di Gaillimh / Galway, là che il 49% de popolazion al sarès in stât di fevelâ par irlandês; i vegnin daûr lis conteis di an Clár / Clare cul 45,9% e di Corcaigh / Cork cul 44,9%.
Font: Irish Central, 23/11/17

Lussemburc: misuris par infuartî il lussemburghês

Il consei dai ministris dal Lussemburc al à dât il vie libare a di un progjet di leç che si propon di valorizâ la lenghe proprie e di infuartî la sô presince inte societât. Tra lis misuris previodudis si à la nomine di un comissari pe lenghe che al varà di ocupâsi di racuei e di centralizâ lis informazions sul ûs dal lussemburghês de bande des scuelis, dai citadins e des istituzions dal paîs. Il progjet al cjape dentri ancje un centri linguistic par dâ informazions sul lussemburghês e par promovi iniziativis culturâls e events leâts a cheste lenghe. Il test al varà cumò di passâ pe cjamare dai deputâts pe sô aprovazion definitive. Il Lussemburc al ricognòs cheste varietât gjermaniche come lenghe nazionâl in zonte dal todesc standard e dal francês.
Font: Wort, 17/11/17

25/11/17

Paîs Catalans: indipendentiscj dividûts aes elezions dai 21D

Un dai risultâts otignûts dal guvier di Madrid cul clamâ dongje elezions autonomichis in Catalogne ai 21 di Dicembar al è di marcâ lis divisions che si àn dentri des fuarcis politichis impegnadis pe indipendence de Catalogne. Cun di fat, si ben che si è daûr a lavorâ par definî dai ponts condividûts intal program, la aree indipendentiste si presentarà aes elezions cun almancul trê listis diferentis: di une bande al è il PDeCAT che al propon un secont esecutîf vuidât di Carles Puigdemont e al cîr di dâ dongje fuarcis ator de liste Junts per Catalunya; o vin po ERC che e à decidût di no continuâ la esperience di Junts pel Sí ma di presentâsi par so cont; e, par finî, e je la CUP che e manten la sô candidature autonome ancje se vierte a altris sogjets de aree libertarie e radicâl dal indipendentisim.

Paîs Basc: sì ae leç sul ûs dal basc tes aministrazions de Navare

Ai 15 di Novembar il guvier de Navare al à fat bon il decret che al regole l’ûs de lenghe basche intes aministrazions e intai ents publics de comunitât autonome. L’intindiment dal proviodiment, che al è il risultât di un procès lunc di compartecipazion, al è di rispuindi al dirit dai citadins di jessi assistûts ancje par euskara. Il decret al ten cont des trê areis linguistichis che e je dividude la Navare e al previôt che te aree bascofone a sedin garantîts ducj i dirits linguistics che a divegnin de couficialitât dal euskara, che te aree miste si garantissi ai citadins il dirit di sielzi la lenghe che a àn miôr, e che te aree no bascofone si vedin dai spazis di comunicazion ancje par basc. La responsabile des relazions citadinis e istituzionâls dal guvier, Anna Ollo, e à spiegât che si ponte cussì a dâi une rispueste concrete ai passe 80 mil citadins de Navare che in chest moment no puedin jessi seguîts dai ents publics inte lôr lenghe proprie. Par vê une idee de situazion atuâl baste pensâ che dai 160 mil dipendents publics de Navare a son a pene 160 i puescj là che si domandave la cognossince de lenghe basche. Il câs piês al è chel dal servizi sanitari regjonâl là che dome par 1 dai 6.142 puescj si previôt il bilinguisim come competence par lavorâ. Il decret al previôt duncje ancje une planificazion dal personâl che e tegni cont dai profîi linguistics.
Font: Naiz:, 15/11/17

Gales: indipendence di S4C a risi cul acuardi cu la BBC

La organizazion pe lenghe Cymdeithas yr Iaith Gymraeg si mostre preocupade pal gnûf acuardi in program tra la television in lenghe galese S4C e la radiotelevision publiche britaniche BBC che al puartarès cheste ultime a incressi la sô influence sei sul plan aministratîf che editoriâl. L’acuardi al previôt, par esempli, che plui de metât dal personâl de emitente galese al lavori dai studis de BBC e che il so segnâl al sedi emetût de television britaniche. Di cheste strade, e dîs la Cymdeithas, la BBC e varà il control totâl de television galese, un obietîf che il guvier conservadôr di Londre al è daûr a lavorâi parsore di vot agns incà. Pe organizazion galese, la uniche strade par evitâ che S4C e pierdi la sô indipendence e je chê de devoluzion al Gales dal setôr radiotelevisîf.
Font: Cymdeithas yr Iaith Gymraeg, 14/11/17

Irlande: Gaeilge24 cun passe 30 mil students

A son stâts passe 30 mil i students che ai 14 di Novembar a àn aderît a Gaeilge24, une sorte di sfide proponude de organizazion Conradh na Gaeilge che e previôt che cui che al partecipe al vedi di fevelâ pardut, cun ducj e par une zornade interie par irlandês. La iniziative si propon di incressi la cussience linguistiche dai students e, tal stes timp, di impegnâju a slargjâ l’ûs de lenghe proprie te comunitât là che a vivin. No je une azion di pôc se si pense che, ancje cuant che al ven studiât a scuele, l’irlandês nol à vite facile fûr di chel ambient. I students a rivin di 320 scuelis diferentis sparniçadis ator pe isule e, pe prime volte, dutis lis 32 conteis de Irlande a àn almancul un istitût che al partecipe.
Font: CnaG, 13/11/17

Finlande: Pirita Näkkäläjärvi nomenade “Sami dal an”

Il premi dedicât al Sami dal an in Finlande al è stât assegnât a Pirita Näkkäläjärvi, responsabile dal servizi informatîf in lenghe sami de radiotelevision publiche YLE tra il 2012 e il 2016. Il ricognossiment si propon di dâi une visibilitât a nivel statâl ae culture di cheste comunitât minorizade e ai siei rapresentants plui vivarôs. Par Pirita Näkkäläjärvi, premiâ une operadore de informazion al pues judâ a mostrâ trops che a son ancjemò i pidiments par fâ rivâ a ducj i citadins finlandês la vôs dai sami. Sul plan formâl – e à dite la zovine – i sami a àn plene libertât di espression, ma te realtât si àn inmò tancj tentatîfs par cidinâju e un ûs sistematic de disinformazion cuintri di cheste comunitât, cence che il guvier al fasi nuie par impedîlu.
Font: The Independent Barents Observer, 12/11/17

Paîs Basc: te CAB al cres l’ûs dal basc in ambient scolastic

Ai 10 di Novembar a son stâts presentâts i risultâts dal progjet Arrue dedicât al ûs dal euskara in ambient scolastic inte Comunitât Autonome Basche che al elabore i dâts sociolinguistics cjapâts sù tal 2015. L’ûs complessîf de lenghe de bande dai fruts tra i 9 e 10 agns al sfilie il 60%, o sei un 3% in plui rispiet a cuatri agns prime, intant che tra i fantacins sui 13-14 agns al è dal 42,3%, in aument dal 2,4% rispiet ae inchieste precedente. Se si cjale plui in detai i doi risultâts si viôt che cuasi l’80% dai fruts des cuartis de primarie a doprin l’euskara in classe cui lôr professôrs, il 68,2% lu dopre cui compagns in aule, e il 40,9% cui chei altris scuelârs intant dai moments di ricreazion. Pai fruts plui grancj si à un ûs dal 70% cui professôrs in classe, dal 38,3% cui compagns in aule e dal 23,6% cui students tai spazis ricreatîfs de scuele.
Font: La Vanguardia, 10/11/17

Paîs Catalans: Baleârs, cors di catalan pai dipendents publics

Il gnûf plan di formazion de lenghe catalane imbastît de scuele de aministrazion publiche des Baleârs (EBAP) al previôt sù par jù un miâr di puescj intai cors di catalan pal personâl des aministrazions publichis des isulis. I cors disponibii a interessin i nivei A2, B1, B2, C1, C2 e lengaç aministratîf. I numars di puescj par ogni nivel a van dai 90 ai 150 a seconde de domande specifiche e des frecuencis dai cors precedents. Par facilitâ la partecipazion ai cors dal personâl in ativitât su lis diviersis isulis, par cierts nivei di certificazion a son in program ancje cors telematics o cun mancul presincis obligatoriis.
Font: La Vanguardia, 09/11/17

Aragon: plan par promovi l’aragonês ancje a Zaragoza

La aministrazion comunâl di Zaragoza si à indotade di un plan di promozion dal aragonês. Ta cheste citât, di fat, a vivin 7 mil des 25 mil personis che a fevelin la lenghe proprie dal Aragon. Une des liniis di azion decidudis e previôt la promozion de lenghe par mieç di une programazion di apontaments dentri des fiestis locâls ma ancje cu la istituzion di une Zornade de lenghe aragonese. Sul plan educatîf, si à za inviât in cuatri centris civics citadins dai cors par imparâ la lenghe come prin pas par une scuele municipâl par insegnâ l’aragonês. Une tierce aree di intervent e je chê de visibilitât de lenghe ator pe citât, prin di dut cul doprâ l’aragonês intun pocjis des campagnis di comunicazion dal comun, e po cun segnaletiche bilengâl in 16 stradis plui leadis ae aree di presince tradizionâl de lenghe.
Font: El Periodico de Aragón, 08/11/17

Paîs Catalans: rapuart su la politiche linguistiche de Catalogne

La direzion gjenerâl di politiche linguistiche dal guvier de Catalogne e à publicât il rapuart anuâl su la politiche linguistiche che, dongje des azions metudis in at dal esecutîf, al ufrìs un panorame detaiât su la cognossince e sui ûs dal catalan e di chês altris lenghis feveladis intal principât. La informative e presente ancje indicadôrs gnûfs sul stât di salût de lenghe tant che l’ûs intal setôr comerciâl e ta chel digjitâl, o su la interazion jenfri nivel di cognossince dal catalan e distribuzion de popolazion imigrade. Intal rapuart si marche la impuartance di lâ indenant cui cuatri as principâi di intervent fissâts dal guvier, o sei cognossince, coesion, consum e cooperazion, cuntun acent particolâr su la formazion par catalan des personis nassudis fûr de Catalogne. Sezions di pueste a son po dedicadis al ocitan, fevelât massime te Val di Aran, e ae lenghe dai segns catalane.
Font: Generalitat de Catalunya, 06/11/17

Tatarstan: proteste par domandâ il tatar curicolâr a scuele

Ai 6 di Novembar si à vude une manifestazion di proteste a Kazan, capitâl dal Tatarstan, par domandâ l’insegnament curicolâr dal tatar intes scuelis di cheste republiche autonome de Federazion Russe. Cundut che la Costituzion di chest teritori e previôt pal tatar un status di couficialitât adun cul rus, il so insegnament intes scuelis nol è obligatori e in tancj di lôr a studiin dome par rus. Intant de manifestazion un dai ativiscj pe lenghe al è stât arestât de polizie.
Font: RadioFreeEurope-RadioLiberty, 06/11/17

11/11/17

Gales: cambiât il ministri pe lenghe galese

Il prin ministri galês, il laburist Carwyn Jones, al à decidût un rimpast di guvier che, tra lis altris novitâts, al à puartât a cambiâ ancje il responsabil pe lenghe galese. Al puest di Alun Davies e je cussì rivade Eluned Morgan. La gnove e à cjatât il bon acet de organizazion pe lenghe Cymdeithas yr Iath Gymraeg che e à invidât la ministre a cambiâ direzion rispiet a cui che al jere prime di jê e a rinunciâ ae eliminazion de figure dal comissari pe lenghe par pontâ invezit a infuartî la normative cumò in vore. Cun di plui si le invide a sveltî il procès par superâ l’insegnament dal galês come lenghe seconde par rivâ a di un model scolastic unic cul galês veicolâr.
Font: BBC, 03/11/17; Cymdeithas yr Iaith Gymraeg, 03/11/17

Irlande: autoguvier simpri plui a risi tal Nord

Il segretari di stât pe Irlande dal Nord, James Brokenshire, al à fat savê che il guvier britanic al è daûr a imbastî la leç finanziarie par cheste part dal Ream Unît e che le fasarà buine dentri de fin dal mês. La misure, che e rapresente il prin pas in direzion de pierdite dal autoguvier e de aministrazion direte di Londre su lis sîs conteis nordirlandesis, e je stade motivade cu la dibisugne di garantî la continuitât dai servizis publics gjestîts fin cumò des istituzions de Irlande dal Nord a front de incapacitât dal DUP e dal Sinn Féin di formâ un guvier condividût. I acuardis di pâs a previodin di fat che a formâ l’esecutîf de Irlande dal Nord a sedin i partîts plui votâts des dôs comunitâts che si divît cheste part de isule, o sei chê unioniste e chê nazionaliste irlandese. Dopo di une crisi istituzionâl che si strissinave di Zenâr incà, ai 30 di Otubar al scjadeve il tiermin par cjatâ un acuardi di guvier. Par Brokenshire e jere duncje sante scugne evitâ di cjatâsi cence belanç pal 2018, ma chest nol vûl dî che lis tratativis no vedin di lâ indenant e se tes prossimis zornadis si ves di cjatâ un acuardi, Londre e je pronte a lassâ che al sedi il gnûf guvier locâl a prontâ la finanziarie. Un dai ponts là che DUP e Sinn Féin no rivin a cjatâ un acuardi e je la leç su la lenghe irlandese, sostignude de plui part dai partîts nordirlandês ma che e je contrastade dai unioniscj che no vuelin che l’ûs dal irlandês al sedi garantît in ducj i servizis publics. I republicans dal Sinn Féin a ricuardin però che la leç pal irlandês e jere previodude ancje dai acuardis di pâs e che duncje il guvier di Londre al à di clamâ i siei aleâts dal DUP a rispietâ chest impegn.
Font: Irish News, 01/11/17

Gales: si sbassin lis venditis dai libris par galês

Daûr dai dâts comunicâts dal Consei dal libri galês dal 2011 al 2017 la vendite di libris in lenghe galese e je lade indenant a calâ. Chei par fruts a son passâts di 234 mil a 196 mil cuntune diminuzion dal 16% a front di un aument dal 63% di chei par inglês che, chel istès, a restin une vore distants rispiet a chei par galês, cun 36 mil copiis vendudis intal 2017. Inmò plui marcât il câl intai libris par grancj, là che si à passâts di 145 mil a 118 mil, o sei il 18% in mancul. Ta chest câs però ancje chei par inglês a àn vendût di mancul e a son lâts jù dai 152 mil dal 2011 ai 130 mil di chest an (-14%). Pai operadôrs dal setôr al è un efiet des politichis di austeritât che a àn ridusût lis disponibilitâts economichis dai citadins e lis risorsis par cui che al lavore ta chest cjamp. Dongje di vendi mancul libris, di fat, ancje il numar des librariis dal Gales si à sbassât dal 15% intai ultins dîs agns. Par finî, un dât di segnalâ al è che, dopo di un ciert interès pai libris digjitâi (e-books), tai ultins agns i letôrs a son tornâts a chei su cjarte.
Font: BBC, 30/10/17

Macedonie:sucès di SDSM e DUI tes aministrativis

Il secont turni des elezions aministrativis in Macedonie che si à tignût ai 29 di Otubar al à confermât la tindince za viodude dôs setemanis prime intant dal prin turni e al à premiât i doi partîts di guvier. Intes areis a maiorance macedone la vitorie e je lade fûr di dubi ai sociâi democratics (SDSM) dal prin ministri Zoran Zaev che dopo des 39 aministrazions concuistadis intal prin turni a àn vinçût 18 dai 35 comuns ancjemò di assegnâ, intant che la diestre (VMRO DPMNE) dal ex premier Nikola Gruevski e à otignût tra prin e secont turni a pene 5 comuns. Inte part dal paîs a maiorance albanese a fâ di paron e je stade la Union Democratiche pe Integrazion (DUI), cumò aleade dai sociâi democratics al guvier, che e à vinçût 11 ents locâi a partî de citât di Tetovo. Chei altris doi partîts di riferiment de comunitât albanese – BESA e la Aleance pai Albanês – a àn invezit di contentâsi di une aministrazion parom.
Font: Balkan Insight, 30/10/17

Ocitanie: partîts aranês preocupâts pes menacis al autoguvier

Ai 30 di Otubar si à dade dongje in forme urgjente e straordenarie la comission pai afârs istituzionâi dal Consei Gjenerâl di Aran formade dai puartevôs dai trê grups politics presints inte assemblee di cheste valade ocitane cjapade dentri tal principât di Catalogne. I membris de comission a àn criticât la metude in vore dal articul 155 de costituzion spagnole, l’impresonament e la persecuzion judiziarie dai rapresentants dal guvier e des istituzions catalanis. Lis azions decidudis dal guvier spagnûl a àn lassât il Consei Gjenerâl di Aran cence di un interlocutôr istituzionâl par svilupâ la leç sul trasferiment di competencis e su la incressite dal autoguvier de valade. La comission e à duncje decidût di blocâ il procès in spiete di viodi ce che al sucedarà cu lis elezions autonomichis dai 21 di Dicembar. Par evitâ pas indaûr intal procès si à ancje proponût di formalizâ un acuardi istituzionâl tra dutis lis fuarcis politichis aranesis.
Font: Conselh Generau d’Aran, 30/10/17

Aragon: al cres l'aragonês a scuele, ma la lenghe e je a risi

L’insegnament dal aragonês a scuele al finìs vincj agns. Si jere tal an scolastic 1997-1998 cuant che, in gracie di un acuardi tra il guvier teritoriâl e lis aministrazions locâls, intes scuelis di cuatri localitâts dal Aragon 250 students e 4 insegnants a tacavin a confrontâsi cu la lenghe proprie. In dì di vuê l’aragonês al è studiât di plui di un miâr di fruts des primariis e des secondariis, i insegnants a son 20 e al è cressût ancje il numar des localitâts là che si insegne la lenghe, cence dismenteâ la sô presince ancje in diviers centris pe infanzie. Magari cussì no cheste incressite de presince de lenghe tes scuelis si compagne cul so calâ te societât. Daûr dai dâts analizâts di resint de associazion aragonese di sociologjie al ven fûr che in dîs agns l’ûs de lenghe proprie tal Aragon al è passât dal 18,6% al 5,3%.
Font: El Periódico de Aragon, 28/10/17 e 01/11/17

Paîs Basc: za plui di 25 mil iscrits ai euskaltegis de CAB

Tra Setembar e Otubar, intant de prime fase di iscrizion, a son stadis 25.080 lis personis che si àn notadis intai euskaltegis de Comunitât Autonome Basche, intant che si stime che altris 10 mil a podaressin iscrivisi di chi ae Vierte di chest an che al ven. Plui de metât des iscrizions intai centris di insegnament de lenghe basche pai adults si le à vude in Bizkaia (13.340), intant che in Gipuzkoa si son notâts in 7.637 e in Araba in 4.103. Doi tierçs dai iscrits a son feminis. Inte leç finanziarie pal 2018 il guvier de Comunitât Autonome Basche al à proponût di incressi sei lis risorsis pai centris, sei i jutoris pes personis che ae fin dai cors a vegnin promovûts.
Font: 20 minutos, 27/10/17

Castilie e León: Fala Ceibe al domande plui impegn pal Bierzo

Il coletîf Fala Ceibe al domande aes istituzions e ai partîts politics de Galizie di incressi il lôr impegn par difindi l’insegnament e l’ûs dal galizian intal Bierzo, regjon leonese là che e vîf une comunitât che e fevele cheste lenghe. Si domande in particolâr une azion plui fuarte par convinci il guvier di Castilie e León a ricognossi tal so statût la couficialitât dal galizian. Cun chest ricognossiment al sarès plui sempliç rivâ al ûs de lenghe proprie tes istituzions provinciâls e tes aministrazions locâls, ae incressite dal so ûs intes scuelis dal teritori e al ûs dal bilinguisim inte toponomastiche. Fala Ceibe al invide l’esecutîf galizian a meti in vore ancje azions diretis tant che la promozion unitarie e in forme bilengâl dai sîts turistics che si cjatin tra Galizie e León, o la publicazion de publicitât istituzionâl par galizian sui mieçs di comunicazion dal Bierzo.
Font: Galicia Confidencial, 24/10/17

Ocitanie: proteste de Calandreta in difese dai contrats assistûts

Calandreta, la rêt des scuelis a imersion par ocitan, e à manifestât ai 21 di Otubar a Bordèu / Bordeaux par protestâ cuintri de decision dal guvier francês di taiâ i contrats assistûts, ven a dî contrats sostignûts in part di risorsis publichis par vie de lôr utilitât sociâl. Intal stât francês lis scuelis intes lenghis minorizadis a son ricognossudis, ma no son parificadis ad in plen cun chês publichis e duncje, par podê funzionâ, a àn di zovâsi di chest gjenar di contrats. Il tai decidût dal guvier di Parîs al riscje cussì di meti a risi la ativitât di chestis scuelis. Lis protestis e lis mobilitazions che si vevin vudis in Setembar ator pe Bretagne a vevin permetût di rivâ a di une moratorie par mantignî i contrats assistûts pai lavoradôrs des Diwan, o sei lis scuelis a imersion par breton. Ancje su la fonde di chest precedent, i ocitans a domandin une misure similâr pes lôr scuelis a imersion. In dì di vuê, Calandreta e cjape dentri 62 scuelis e 4 coleçs.
Font: Jornalet, 23/10/17

02/11/17

Impresonade la plui part dal guvier democratic de Catalogne

Vuê, joibe ai 2 di Novembar, la judice de Audiencia Nacional, Carmen Lamela, e à fate buine la domande de procure gjenerâl dal stât e e à decidût l'impresonament diret, cence pussibilitât di cauzion par vot membris dal guvier catalan: Oriol Junqueras (vicepresident), Jordi Turull (presidence), Josep Rull (teritori), Meritxell Borràs (aministrazion), Raül Romeva (politiche foreste), Carles Mundó (justizie), Dolors Bassa (lavôr) e Joaquim Forn (interni). E à po decidût la preson ancje par Santi Vila - membri dal guvier catalan che si veve dimetût prime de declarazion di indipendence - ma tal so câs cuntune cauzion di 50 mil euros. Cuintri di lôr e je stade metude in at la stesse politiche di dispersion za doprade cuintri dai presonîrs bascs e ju à sparniçâts in cinc presons diviersis. La judice e à fate sô la domande de procure ancje par chel che si riferìs ai membris dal guvier catalan che si cjatin cumò a Bruxelles, ven a dî il president Carles Puigdemont e i conseîrs Antoni Comin, Meritxell Serret, Lluís Puig y Clara Ponsatí. Cuintri di lôr e à dât fûr un ordin di arest internazionâl. Lis acusis a son par ducj di ribelion, sedizion e malversazion.
Cun chestis decisions la plui part di un guvier elet in maniere democratiche si cjate impresonât par vie che al à metût in vore l'impegn che si veve cjapât intant de campagne eletorâl, ven a dî inmaneâ un referendum su la autodeterminazion de Catalogne e, tal câs di vitorie dai sì, inviâ la strade par rivâ a di une Republiche catalane indipendente.
Font: VilaWeb, 02/11/17; Ara, 02/11/17; Naiz:, 02/11/17


27/10/17

Paîs Catalans: il Parlament catalan al proclame la Republiche

Intal dopodimisdì dai 27 di Otubar il Parlament catalan - cun 70 vôts a pro, 10 cuintri e 2 blancs - al à fate buine la propueste di Junts pel Sí e de CUP che e previôt la nassite de «Republiche catalane tant che stât indipendent e sovran, di dirit, democratic e sociâl». La votazion si à davuelte in forme segrete cu la partecipazion dai deputâts di Junts pel Sí, CUP, SíQueEsPot e dal indipendent Germà Gordó, intant che i deputâts socialiscj (PSC), popolârs (PP) e dal grup dai Ciutadans a vevin bandonât la aule. La risoluzion votade e fâs sô la declarazion di indipendence che e jere stade sotscrite dai doi partîts de maiorance ai 10 di Otubar. La forme dal vôt segret e je stade sielzude cun chê di evitâ azions penâls cuintri dai singui che a votavin pe indipendence. In forme palese, invezit, e je stade votade - cun 71 vôts a pro, 8 cuintri e 3 astignûts - la partence dal procès costituent de gnove Republiche. Chest at al impegne il guvier a meti in vore daurman dutis lis risorsis umanis, publichis e sociâls par dâi cuarp a di un «procès costituent democratic, fondât sui citadins, trasversâl, partecipatîf e vincolant che al varà di puartâ a meti jù e a aprovâ la Costituzion de Republiche». Juste fûr de aule dal Parlament si son dâts adun diviers centenârs di sindics catalans par dâi la lôr poie ae declarazion di indipendence. Chel stes a àn fat miârs di citadins che a àn po saludât cun gjonde la decision dal Parlament.

26/10/17

Paîs Catalans: Madrid e espropriarà lis istituzions catalanis

Dopo vê refudât cualsisei dialic cu lis istituzions catalanis o cualsisei sorte di mediazion, sabide ai 21 di Otubar, intune riunion straordenarie, il consei dai ministris spagnûl al à decidût di meti in vore in maniere la plui largje pussibile l’articul 155 de Costituzion cun chê di gjavâi ae Catalogne ogni forme di autoguvier. Il prin ministri spagnûl Mariano Rajoy al à justificât l’ûs di une misure mai doprade fin cumò cu la “disubidience ribel, sistematiche e cussiente” de Generalitat acusade di azions che “a atentin in maniere grivie ai interès gjenerâi de Spagne”. Ancje se i detais no son stâts ancjemò presentâts, si fevele di un comissariament totâl dal guvier e dal Parlament de Catalogne: tal prin câs i podês a varessin di passâ tes mans dai ministeris di Madrid e tal secont câs dal Senât spagnûl là che il partît di Rajoy (PP) al à la maiorance assolude. Al covente po ricuardât che intes ultimis elezions politichis i trê partîts spagnûi che a poin la metude in vore dal articul 155 – PP, PSOE e C’s – no àn vût nancje un senatôr elet in Catalogne e no àn duncje nissune legjitimitât par cjapâ decisions su chest teritori. Tra lis misuris in program si fevele ancje dal passaç dai Mossos d’Esquadra sot dal comant diret dal ministeri pal interni spagnûl e dal control dai mieçs di comunicazion publics de Catalogne, o sei TV3 e Catalunya Radio. Cun di plui, Rajoy al à anticipât la intenzion di clamâ dongje dentri di sîs mês gnovis elezions in Catalogne ma nol à spiegât ce che al sucedarà se i catalans a sielzaran di gnûf une maiorance indipendentiste e se, par evitâlu, si metaran fûr leç i partîts nazionalitaris compagn di ce che si veve fat agns indaûr intal Paîs Basc. Al sarà il Senât spagnûl a dâi il vie libare definitîf aes misuris decidudis dal guvier spagnûl intant de riunion fissade pai 27 di Otubar.

Paîs Basc: acuardi par svilupâ plui articui par basc su Wikipedia

Il guvier de Comunitât Autonome Basche e la associazion dai utents di lenghe basche di Wikipedia (Euskal Wikilarien Kultura Elkartea) a àn sotscrit un acuardi che, dentri dal 2019, al previôt la redazion di plui di un miâr di articui di alt nivel cualitatîf indreçâts massime ai students tra i 12 e i 16 agns. Wikipedia e je di fat la enciclopedie plui lete intal mont e e je aromai un riferiment ancje pai students. L’acuardi al previôt che il guvier al invistissi 200 mil euros ad an pai prossims trê agns e che al lavôr a partecipin ancje universitâts, istitûts educatîfs e culturâi dal Paîs Basc. Pai articui a son stâts selezionâts uns 1.600 temis che a partegnin a cuindis cjamps diferents: matematiche (100), storie e gjeografie (300), lenghis (50), economie (100), plastiche e audiovisîfs (150), biologjie e gjeologjie (200), culture sientifiche (50), temis di gjenar (70), culture classiche (100), musiche, bal e teatri (150), fisiche e chimiche (170), tecnologjiis inteligjentis (40), leterature (50), filosofie (50), e educazion fisiche (50). In dì di vuê l’euskara al è al trenteunesim puest a nivel mondiâl par contignûts presints su Wikipedia cun passe 280 mil articui.
Font: EiTB, 19/10/17

Corsiche: uficializade la nassite di Femu a Corsica

Ai 15 di Otubar a Corti / Corte i delegâts dai partîts Inseme per a Corsica, PNC e A Chjama Naziunale a àn uficializât la decision di trasformâ la lôr coalizion eletorâl intun moviment politic unitari là che si son dâts dongje ancje rapresentants di moviments associatîfs come Pudemu e de societât civîl corse. Ae assemblee fondative di Femu a Corsica a àn partecipât uns 1.200 personis. Il progjet al jere stât anticipât tor de metât di Lui dal president dal esecutîf de Coletivitât Teritoriâl Corse, Gilles Simeoni, cun chê di meti sù un partît di guvier in stât di tirâ dongje ancje cui che nol rive de militance nazionaliste. La coalizion nazionalitarie Femu a Corsica e je al guvier de isule dal 2015 in aleance cu la coalizion indipendentiste Corsica Libera.
Font: Alta Frequenza, 16/10/17

Gales: economie plui fuarte par difindi la lenghe tes areis rurâls

Il guvier galês al è cumò daûr a definî une strategjie par incressi lis oportunitâts di lavôr intes areis rurâls dal paîs – Sir Gaerfyrddin / Carmarthenshire, Ceredigion e Gwynedd in primis – in maniere di judâ i zovins a costruîsi alì la lôr cariere professionâl e la lôr famee. A dîlu al è stât il ministri pe lenghe galese, Alun Davies, ancje se pal moment nol à dât informazions plui in detai par capî cemût che si pense di rivâi a chest obietîf. Par vie de emigrazion interne il numar des personis che a fevelin par galês al è daûr a sbassâsi tes areis tradizionâls di ûs de lenghe e al cres invezit tes citât plui grandis tant che Caerdydd / Cardiff. Par difindi la aree storiche de lenghe si resone duncje su cemût eliminâ lis resons che a puartin a emigrâ, a tacâ di chês economichis. Za di timp, simpri cun chest obietîf, lis organizazions pe lenghe a sburtin il guvier galês par che al incressi i puescj di vore publics propit ta chestis areis dal paîs.
Font: BBC, 15/10/17

Paîs Basc: cul gnûf plan linguistic, simpri plui euskara te UPNA

La Universitât Publiche de Navare (UPNA) e à presentât il so plan 2017-2019 pe lenghe basche che si propon di incressi la presince dal euskara ancje ta chês areis là che fin cumò al cjatave pôc spazi. Tai ultins agns a son stâts fats pas indenant impuartants intal ûs de lenghe sei tal insegnament che te aministrazion, ma cumò si vûl che il basc al deventi simpri di plui un valôr ancje cuant che si finìs la universitât. Par chest un dai prins obietîfs al è chel di infuartî lis relazions cu lis impresis, in maniere che cui che al fâs il so percors di studi par basc al puedi po acedi a puescj di vore là che cheste lenghe e je valorizade. Il plan al ponte a svilupâ l’ûs dal basc ancje te ricercje e tal cjamp sientific: tal prin câs cuntune incressite dai rapuarts cui centris di ricercje de Comunitât Autonome Basche là che l’euskara al è za lenghe veicolâr, tal secont câs cul sburtâ la publicazion e la difusion di tesis, articui e altris lavôrs sientifics par basc. Sul plan de internazionalizazion, invezit, si lavorarà par strenzi rapuarts cun universitâts e istituzions europeanis là che si doprin lenghis minorizadis. Si ponte ancje a incressi la presince dal euskara te imagjin esterne de universitât e intai elements domandâts par lavorâ inte struture.
Font: Noticis de Navarra, 14/10/17

Europe: ELEN e da la sô poie ae iniziative Minority Safepack

ELEN – la Rêt Europeane pe Avualiance des Lenghis – e à decidût di dâi la sô plene poie ae iniziative Minority Safepack. Si trate di une iniziative citadine europeane inviade de FUEN, o sei la Union Federâl des Nazionalitâts Europeanis, par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane. Par che la Comission Europeane e cjapi sù lis propuestis fatis indenant al covente che la iniziative e sedi poiade di un milion di personis ator pe Union. ELEN si à duncje impegnade cu lis realtâts associativis che le componin a dâ une man inte racuelte des firmis. La scjadince par tirâ sù lis adesions e je chê dai 3 di Avrîl dal 2018.
Font: ELEN, 13/10/17

Gales: critichis ae ipotesi di eliminâ il comissari pe lenghe

La organizazion pai dirits linguistics Cymdeithas yr Iaith Gymraeg e je intervignude a muse dure cuintri de ipotesi dal guvier galês di eliminâ la figure dal comissari pe lenghe. La critiche si à infuartide dopo de publicazion de ultime relazion dal stes comissari là che si fâs il pont sul andament dai dirits linguistics in Gales. Propit cumò che i servizis linguistics a tachin a cressi in gracie dal lavôr dal comissari pe lenghe – e dîs la Cymdeithas – al sarès pardabon di stupits abolî cheste figure.
Font: Cymdeithas yr Iaith Gymraeg, 12/10/17

Irlande: par CnaG masse pôcs i fonts pal gaelic tal belanç 2018

Inte leç finanziarie pal 2018 il guvier irlandês al previôt un finanziament complessîf di doi milions e mieç di euros pe lenghe gaeliche e pes aministrazions des areis là che cheste lenghe e je ancjemò fevelade in maniere significative (Gaeltacht). Magari cussì no, e dîs la organizazion pe lenghe Conradh na Gaeilge, la planificazion di chestis risorsis e je stade fate cence nissun confront cui organisims impegnâts inte promozion de lenghe e cence tignî cont dai lôr conseis. Cussì se al è positîf che si vedin cressudis lis risorsis pe planificazion linguistiche tal Gaeltacht, i passe otante sogjets che a lavorin a nivel locâl pe lenghe, a partî de organizazion Foras na Gaeilge, si ricjatin cui fonts sbassâts o taiâts. Conradh na Gaeilge e à duncje domandât l’intervent diret dal prin ministri, Leo Varadkar, par che si impegni a mendâ cheste situazion.
Font: CnaG, 11/10/17

Ucraine: leç su lis lenghis contestade ancje de Ongjarie

Dopo des tensions cu la Romanie, cumò e je la Ongjarie a tignî cjalt il scuintri diplomatic cu la Ucraine su la leç des lenghis fate buine in Setembar dal Parlament ucrain. La gnove normative e previôt che l’insegnament intes scuelis secondariis a imersion des comunitâts minorizadis si davuelzi pe plui part par ucrain cul ûs des lenghis locâls limitât dome a cualchi materie. Pes autoritâts ucrainis la leç e rispiete i criteris in vore in Europe pe tutele des minorancis linguistichis e par chest e à domandât une opinion legâl al Consei de Europe. No le pense cussì il guvier di Budapest che al domande aes istituzions comunitariis di riclamâ la Ucraine al rispiet dal acuardi di associazion sotscrit cu la Union Europeane. Si stime che in Ucraine e in particolâr te regjon de Transcarpazie a vivin uns 140-150 mil ongjarês. Lis dôs comunitâts minorizadis plui gruessis a son chê russe, che e conte sui 8 milions di personis, e chê rumene cun sù par jù 400 mil personis. Critichis pe leç su lis lenghis a jerin rivadis ancje de Federazion Russe, de Polonie e de Moldova.
Font: BBC, 10/10/17

17/10/17

Ajuda Catalunya, Salva Europa

Il video «Jude la Catalogne, salve la Europe» metût adun de organizazion Òmnium Cultural par rispuindi al arest di Jordi Cuixart e di Jordi Sánchez. Nol è nuie altri di zontâ.



Autodeterminazion catalane, a rivin i prins presonîrs politics


 

A tornin a saltâ fûr presonîrs politics ancje in Catalogne (A tornin parcè che za a 'nd è stâts ancje dopo de cussì clamade transizion democratiche). Cun di fat, la magjistrade de Audiencia Nacional, Carmen Lamela, e à decidût l'impresonament cence cauzion pai presidents des dôs entitâts principâls dal indipendentisim catalan Jordi Sànchez (ANC) e Jordi Cuixart (Òmnium Cultural) acusâts di “sedizion” cun riferiment aes manifestazions popolârs che si vevin davueltis ai 20 di Setembar a Barcelone par protestâ cuintri dal arest di 14 funzionaris dal guvier catalan leâts ae organizazion dai referendum. «I doi investigâts - si lei intal document che al decît di metiju in preson - a àn davuelt une funzion centrâl intai fats in cuistion cul partecipâ in maniere ative ae convocazion des manifestazions, mostrantsi come i promotôrs principâi des stessis, restant in prime linie dilunc vie di dut il dì.» Cun di plui, pe magjistrade, al esist ancje il pericul che Sànchez e Cuixart a puedin ripeti il reât che a son acusâts.
Il comandant de polizie catalane, Josep Lluís Trapero, e la intendente dal cuarp, Teresa Laplana, ancje lôr acusâts dal stes reât, a son stâts lassâts libars ma cun misuris cautelârs (oblic di firme ogni cuindis dîs, ritîr dal passepuart, oblic di jessi reperibii par telefon).
Mobilitazions cuintri dal impresonament dai doi Jordis a son daûr a davuelzisi in dute la Catalogne e no dome. Sot misdì miârs di personis si son dadis adun denant dai municipis dal paîs, la adunance principâl si le à vude a Barcelone in place Sant Jaume cu la partecipazion dai membris dal guvier catalan, di rapresentants dal comun di Barcelone e di Taule pe Democrazie (che e cjape dentri, tra i altris, ancje i sindacâts CCOO e UGT de Catalogne). Altris iniziativis a son za in program pai prossims dîs.
Font: Ara, 17/10/17; VilaWeb, 17/10/17; Naiz:, 17/10/17

Chi disot i videos regjistrâts di Jordi Cuixart (Òmnium Cultural)  e di Jordi Sànchez (ANC) prime di presentâsi denant de Audiencia Nacional intal câs che al fos decidût di arestâju.