Il Consei regjonâl dal Gwynedd al à fat bon un plan di un milion e 100 mil sterlinis che al previôt di meti sù doi gnûfs centris a imersion in lenghe galese e di infuartînt un tierç. Si trate di struturis educativis indreçadis ai arlêfs des primariis e des secondariis che no àn familiaritât cul galês. Cun lezions imersivis par cuatri dîs par setemane par une dade tra lis vot e lis dîs setemanis, a permetin ai fruts che a rivin di fameis anglofonis di cjapâ sù chês cognossincis che i coventin par lâ indenant cui studis intes scuelis galesis dal teritori. In dì vuê i centri imersîfs a son cinc: Dolgellau, Eifionydd, Llangybi, Maesincla e Penrhyndeudraeth. Il progjet al previôt di sierâ cheste ultime struture, di vierzint une a Bangor e une altre a Tywyn e di potenziâ chê za in vore a Eifionydd. Par deventâ operatîf, il plan al à cumò dibisugne dal vie libare dal guvier galês al finanziament.
22/06/21
Bretagne: il plan di Naoned par sburtâ la riunificazion
Il comun di Naoned / Nantes al à clamât adun i rapresentants des realtâts associativis in prime linie pe riunificazion de Bretagne – o sei Bretagne Réunie, Agence Culturelle Bretonne e A La Bretonne – par presentâur il so program par rivâ a chest obietîf. Cundut che al è un toc de Bretagne storiche, di uns setante agns incà il dipartiment de Loire Atlantiche al fâs part di une regjon aministrative diferente e, fin cumò, ducj i tentatîfs di riunion a son stâts blocâts des autoritâts statâls. La strade di une consultazion direte par che la int e puedi manifestâ la sô posizion in mert e je dineade dal guvier francês che le calcole di incostituzionâl e par chest si studie la pussibilitât di une propueste di leç di puartâ in Parlament. Par discrosâ cheste cuistion e resonâ su la tematiche il comun al metarà sù in curt une comission di pueste. Une altre iniziative, che invezit si môf plui sul plan simbolic, e je chê di inmaneâ a Naoned / Nantes dai Zûcs Bretons di podê fâ cul supuart de Federazion Sportive Bretone.
Font: Agence Bretagne Presse, 10/06/21
Paîs Catalans: progjet par infuartî il catalan a scuele tes Baleârs
Il guvier des Baleârs al à fat bon un progjet di leç che al va a riformâ il sisteme educatîf e che, tra lis altris robis, al blinde l’insegnament dal catalan cul oblic che almancul il 50% des materiis al sedi insegnât inte lenghe proprie des isulis. Une linie che e à cjatât la oposizion de diestre spagnoliste, a partî di Vox che al à za fat savê che al impugnarà il test denant de cort costituzionâl. L’intindiment dal progjet di leç al è che, ae fin dal cicli dal oblic, i students a vedin la stesse fluence par catalan e par castilian, in plui di une buine competence tune lenghe foreste. Il test nol fronte dome il teme linguistic ma al previôt ancje une incressite progressive de ufierte publiche e gratuite de educazion infantîl e invistiments su la digjitalizazion. Cun di plui, intal zîr di cualchi an, si volarès rivâ a impleâ il 5% dal prodot interni sporc des isulis pal sisteme educatîf.
Font: La Vanguardia, 09/06/21
Sápmi: impat penç sui sami dal bloc de pescje dal salmon
Il flum Deatnu / Teno / Tana al scjavace la tiere dai Sami (Sápmi) e par 256 dai siei 361 chilometris al fâs di confin jenfri Finlande e Norvegje. Si trate de aree cu la plui alte biodiversitât di salmons e par chest e je mete di cetancj pescjadôrs che a rapresentin une des risorsis principâls pe economie dal teritori. Di diviers agns incà però la popolazion di chest pes e je daûr a calâ e cussì il guvier norvegjês al à decidût di imponi un bloc totâl de pescje dal salmon di Mai a Dicembar dilunc dal flum, dai siei afluents e de aree di mâr dulintor de sô bocje, convincint ancje la Finlande a fâ compagn. Si trate di un colp dûr ae economie locâl che, par vie de crisi sanitarie, e veve za pierdût buine part de stagjon de pescje dal 2020 e dal cumierç transfrontalîr. Chel istès la popolazion locâl e à cjapât avonde ben la decision lamentantsi però pe sielte dai timps, o sei par vie che la decision e je stade cjolte cuant che lis struturis turistichis locâls a jerin za dutis prenotadis. Ce che invezit al è stât cjapât une vore mâl al è il fat che, pe prime volte, il bloc de pescje al è totâl, ven a dî che no si permet nancje aes comunitâts sami che a vivin ad ôr dal flum di pescjâ daûr dai sistemis tradizionâi. Si trate di une decision imponude dal alt cence nancje consultâ i orghins di autoguvier dal teritori e che – e no je la prime volte – no ten in nissun cont la culture e lis tradizions de popolazion indigjene che a son invezit tuteladis par leç.
Irlande: plan cuincuenâl par sostignî il gaelic tal Gaeltacht
Udarás na Gaeltachta, la agjenzie di stât responsabile pal svilup economic des areis gaelichis, e à presentât un plan cuincuenâl che si propon di invertî la pierdite progressive de lenghe irlandese ancje ta chei teritoris – il cussì clamât Gaeltacht – là che il gaelic al è inmò fevelât in maniere significative. La propueste si poie su la creazion di puescj di vore atratîfs, tant che chei de industrie digjitâl, che a permetin di mantignî sul puest la popolazion locâl zovine e cualificade e magari di fâle rivâ dongje ancje di inaltrò. Un altri element al è chel di infuartî il turisim linguistic cu la creazion di progjets e pacuts turistics mirâts. Par chest plan la agjenzie e à a disposizion doi milions e 750 mil euros che i si zontin altris 650 mil euros assegnâts dal guvier di Dublin a Foras na Gaeilge, la organizazion publiche che i sta daûr ae promozion dal irlandês.
Galizie: il Consei Economic e Sociâl a pro de lenghe proprie
Intant de sô ultime assemblee plenarie, il Consei Economic e Sociâl de Galizie al à cjapât une posizion clare par sburtâ l’ûs de lenghe proprie in ducj i cjamps de vite sociâl e economiche. Prin di dut al covente infuartî, sei sul plan legâl che formâl, il dirit dai citadins a doprâ il galizian intai rapuarts cun impresis, agjenziis di servizis e ativitâts economichis. Lis aministrazions publichis de Galizie – al dîs il Consei – a àn di garantî il dirit a doprâ la lenghe proprie e par chest a àn di disvilupâ misuris legâls che a rindin concret chest dirit che par cumò al reste su la cjarte e dâ il bon esempli, di une bande cul sigurâ ai citadins la pussibilitât di relazionâsi cun lôr par galizian e, di chê altre, cul rapuartâsi in maniere prioritarie cun chês aziendis che a garantissin la avualiance linguistiche.
Font: Galicia Confidencial, 07/06/21
Gales: prin plan linguistic intune scuele di polizie
La scuele di polizie dal Gales setentrionâl e à elaborât il so prin plan linguistic là che si fissin i impegns a pro de lenghe galese e pal rispiet dai dirits linguistics di citadins e agjents. Il document al è stât metût adun cul cuarp di polizie dal Gales setentrionâl e al à une impuartance ancje simboliche dal moment che lis scuelis di polizie no son tra i sogjets clamâts par leç a vê di indotâsi di un plan linguistic. Lis primis misuris dal plan, tant che la traduzion par galês dai documents e dai materiâi didatics principâi, a àn za tacât a jessi metudis in vore. In plui di garantî l’ûs de lenghe proprie cul public, la scuele si impegne a sostignî cun percors di pueste i agjents e chei altris funzionaris di polizie che a fevelin o a vuelin imparâ il galês.