18/04/14

Scozie: l’indipendentisim si infuartìs

Ai 12 di Avrîl, inte suaze dal congrès dal SNP, il prin ministri scozês Alex Salmond al à fat il pont su la campagne referendarie che si sierarà ai 18 di Setembar cul vôt pe autodeterminazion de Scozie. Salmond al à marcât cemût che a sedin i stes aversaris de indipendence cu lis lôr menacis a dâ un sburt ae campagne pal sì. Cun di fat, a fuarce di dî che la indipendence e puartarès la Scozie ae miserie, che le metarès fûr de Union Europeane e de NATO, che le lassarès cence sterline o euro, che e sarès une catastrofe pe sigurece internazionâl, i partidants dal no a àn dât un grues contribût ae campagne pe indipendence e, se intal Novembar dal an passât i sondaçs a mostravin un 38% di sì pe indipendence e un 62% di no, in dì di vuê i sì a son cressûts al 46% e i no a son lâts jù al 54%. Par recuperâ il disvantaç che ancjemò al reste, il SNP al ponte massime su dôs cjartis, ven a dî il vôt dai laburiscj e chel des feminis. Tal prin câs Salmond al ricuarde che il sì nol è un vôt pal SNP, ma un vôt par une Scozie indipendente là che laburiscj e nazionalitaris a son la grande maiorance e duncje nol sucedarà plui che un guvier conservadôr, come chel che al è cumò a Londre, al imponarà lis sôs decisions suntune Scozie che no lu à votât. Par chel che al rivuarde lis feminis, il prin ministri scozês al à presentât gnovis misuris che a saran metudis in cjamp par evitâ che lis feminis si cjatin penalizadis intal mont dal lavôr.
Font: BBC, 12/04/14; VilaWeb, 12/04/14; El País, 11/04/14

Paîs Catalans: mobilitazions par difindi la scuele par catalan

Sabide ai 12 di Avrîl cuatri manifestazions a àn scjavaçât lis stradis di València par dâsi adun denant dal palaç de Comunitât autonome cun chê di difindi la scuele publiche e massime chê par catalan. La proteste – coordenade de organizazion Escola Valenciana, de Plataforma per l’Ensenyament Públic e dal istitût “Ciutat de Cremona” – e je dome une des iniziativis metudis in cjamp par fâi cuintri ae decision dal guvier de Comunitât Autonome Valenziane di taiâ cent e cincuantedôs classis, la plui part cun insegnament par catalan. A inviâ la mobilitazion a jerin stâts i gjenitôrs dai fruts e i insegnants de scuele “Ciutat de Cremona” di Alaquàs che di cuasi doi mês a son daûr a ocupâ l’istitût; une azion che e je stade po imitade ancje in altris localitâts (Ontinyent, Castelló e València) e che e menace di slargjâsi simpri di plui a front de posizion dure de maiorance di guvier (PP) che no je disponibile a tornâ su la sô decision e che e à refudât ducj i tentatîfs di modifiche dal proviodiment fats indenant des oposizions. L’atac nol è dome al sisteme de scuele publiche, e spieghe Escola Valenciana, ma soredut a chê par catalan, viodût che a son diviers i câs denunciâts dulà che a front de presince sei di classis par spagnûl, che par catalan, il guvier al à fat pressions par sierâ chestis ultimis ancje cuant che a jerin lis plui frecuentadis.
Font: VilaWeb, 10-13/04/14; Levante, 10/04/14

Paîs Catalans: no dal Parlament spagnûl ae consulte sovraniste

Nissune sorprese intal vôt dal Congrès spagnûl che ai 8 di Avrîl al jere clamât a decidi sul trasferiment al Parlament catalan des competencis par podê davuelzi il referendum su la indipendence de Catalogne. Cuntune grande maiorance formade dai partîts spagnoliscj (PP e PSOE in primis), il Parlament di Madrid al à dite di no ae propueste di leç. A chest pont, al à comentât il prin ministri spagnûl Mariano Rajoy (PP), la consulte sovraniste che il guvier e il Parlament de Catalogne a vuelin puartâ indenant e je cence altri dubi ilegâl. No le pensin cussì però a Barcelone là che, la dì dopo dal vôt dal Congrès spagnûl, intant di un dibatiment intal Parlament catalan, sei il president de Generalitat, Artur Mas, sei i partîts sovraniscj a àn confermât la volontât di davuelzi il referendum. Il trasferiment des competencis e jere dome une strade, al à spiegât Mas, e se chê no je pussibile si ‘nt cjaparà une altre.
Font: Naiz:, 08-09/04/14

Montenegro: i albanês in place par separâ Tuzi

Ai 6 di Avrîl a Tuzi, in Montenegro, si è tignude une manifestazion inmaneade dai partîts albanês di oposizion – il Forum Democratic pe Integrazion e la Aleance Democratiche – par rivendicâ il dirit di cheste citât a vê un comun par so cont. In dì di vuê Tuzi, cui siei 13 mil abitants che pe plui part a partegnin ae minorance albanese, al è dome un dai cuartîrs de capitâl Podgorica. Al è di agns che la comunitât albanese e domande un referendum par trasformâ Tuzi in comun, ma dutis lis promessis vudis fin cumò no àn ancjemò puartât a di un cualchi risultât. Intant de proteste, i rapresentants dai doi partîts a àn invidât ducj i albanês che a àn une incarghe istituzionâl a lassâle fintremai che Tuzi nol deventarà comun. La rivendicazion e je stade fate indenant di membris de diaspore albanese ancje intant de visite dal prin ministri montenegrin intai Stâts Unîts.
Font: Balkan Insight, 07/04/14

Rom: inte UE cuintri des discriminazions plui peraulis che fats

E jere ancje la ministre rumene pal lavôr, Rovana Plumb, al incuintri european dai rom che si è tignût la prime setemane di Avrîl a Brussels. Dai dodis milions di rom che si stime che a vivin intai paîs de Union Europeane, passe 600 mil a son a stâ in Romanie. La cifre dut câs e je calcolade par difiet dal moment che, a front dai prejudizis e des discriminazions che si cjatin a patî, tancj rom a àn miôr no declarâ la lôr partignince etniche. Intal so intervent, la ministre rumene e à ricognossût che al è ancjemò tant ce fâ, ma e à ancje rivendicât risultâts positîfs inte lote par gjavâ i rom des cundizions di puaretât là che dispès a vivin e par ufrîur pussibilitâts di lavôr. I impegns par combati la discriminazion cuintri dai rom però a restin pôc plui di une promesse, al contint il Centri european pai dirits dai rom (ERRC) e il dât al ven confermât ancje dai rapuarts di Amnesty International là che si invide i paîs de Union Europeane a trasformâ lis racomandazions e i principis enunciâts in politichis concretis.
Font: Balkan Insight, 07/04/14

Paîs Basc: gnove mape sociolinguistiche dal euskara

La assessore pe educazion Cristina Uriarte e il delegât pe lenghe basche Patxi Baztarrika a àn presentât la cuinte mape sociolinguistiche dal euskara che ogni cinc agns e fâs il pont su la evoluzion dal ûs de lenghe basche intes trê provinciis che a formin la Comunitât Autonome Basche. Daûr dal document, che si fonde sui dâts dal censiment dal 2011, il 70% dai zovins sot dai vincj agns al è in stât di fevelâ par basc a front dal 20% di trente agns indaûr. Invezit, se si cjape in esam dute la popolazion disore dai cinc agns, chei che a fevelin par euskara a son il 36,4%, intant che la lenghe e reste discognossude pal 44% dai citadins de CAB. Un dât negatîf al è ancje chel de diminuzion dal ûs dal euskara in famee. L’obietîf de politiche linguistiche de Comunitât, e à duncje ricuardât la Uriarte, al reste alore chel di infuartî l’ûs dal basc e di creâ gnovis oportunitâts e ocasions par doprâlu.
Font: Naiz:, 07/04/14

Gales: galês doprât pôc inte Assemblee Nazionâl

Ai 3 di Avrîl la associazion pe lenghe galese Cymdeithas yr Iaith Gymraeg e à dât fûr un rapuart sul ûs de lenghe proprie intai lavôrs de Assemblee Nazionâl dal Gales. Cundut che un tierç dai membris dal organisim a son in stât di fevelâ par galês, l’an passât si lu à doprât a pene pal 12% dal timp. In pratiche la stesse percentuâl di cuant che, intal 1999, la Assemblee e je deventade operative. Al è però ancje di zontâ che l’ûs de lenghe al cambie a fuart daûr de partignince politiche, cussì i deputâts conservadôrs le doprin par a pene il 2% dal timp, laburiscj e liberâi democratics pal 6% e i nazionalitaris dal Plaid Cymru pal 54% dal timp. La Cymdeithas e lamente duncje un ûs ancjemò masse bas dal galês in aule, ma ancje intai rapuarts esternis de Assemblee. Cun di fat, no dome i plans linguistics dal organisim a son fers di doi agns, ma si va dilunc a publicâ i ats uficiâi par galês dome dopo che a son za jessûts par inglês, di maniere che i citadins a son sburtâts a acedi ai ats ta cheste ultime lenghe.
Font: Cymdeithas, 04/04/14

Asturiis: prime radiocronache te RPA par asturian

Dopo di agns di imobilisim, tes ultimis setemanis la RPA, o sei la radio publiche dal principât des Asturiis, e à scomençât a dedicâi ae lenghe proprie spazis e tematichis che fin cumò a jerin lassadis dome al spagnûl. Cun di fat, se ai 17 di Març al è tacât il prin notiziari informatîf cuotidian par asturian, ai 5 di Avrîl cheste lenghe e je stade doprade pe radiocronache de partide Compostela – Real Uviéu. Un event saludât in maniere positive ancje de Xunta pola Defensa de la Llingua Asturiana che di agns si bat par vê un servizi radiotelevisîf public par asturian. Sperìn che cheste radiocronache, a àn zontât i rapresentants de Xunta, no sedi un event isolât e che in curt l’asturian al vegni doprât par comentâ altris partidis di balon, garis ciclistichis e altris sports e, magari, no dome par radio, ma ancje par television.
Font: InfoAsturies, 04/04/14

Ucraine: rapuart su la situazion des minorancis nazionâls

I ultins acjadiments che a àn scjassât la Ucraine a àn sburtât il Comitât consultîf dal Consei de Europe che al viôt de metude in vore de Convenzion cuadri pe protezion des minorancis nazionâls a visitâ chest paîs e a cjatâsi cui rapresentants di tredis comunitâts di minorance, ven a dî afghans, armens, azeris, bulgars, ebreus, gagaus, gjeorgjians, karaims, kazachis, lezghins, moldâfs, ongjarês, polacs, rom, rumens, rus, tatars, tazics e uzbecs. Di chest viaç, che al è durât dai 21 ai 26 di Març, al è jessût un rapuart publicât ai 3 di Avrîl.

Cechie: propueste pal insegnament de lenghe rom

Il partît conservadôr cec TOP 09, cumò ae oposizion, al à proponût un progjet di leç par che intes scuelis elementârs si ur insegni ai fruts rom un pocjis di materiis ancje te lôr lenghe proprie. Un tant, a disin i autôrs de propueste, cun chê di superâ chê baridure linguistiche che ae lungje e sburte tancj fruts rom a bandonâ la scuele adore. Il progjet, che al varès di jessi discutût in Mai inte comission parlamentâr pe educazion, al à cjatât une poie avonde largje. Dut câs al è ancje cui che al à pôre che daûr di cheste propueste e sedi in realtât la volontât di creâ classis di pueste pai fruts rom, inviant cussì une forme di segregazion scolastiche.
Font: Radio Prague, 02/04/14

Paîs Catalans: cine par catalan, revision de leç

Il guvier catalan al à fate buine la modifiche de leç sul cine dal 2010 daûr dai indreçaments rivâts de Union Europeane che a previodin che lis peliculis che a rivin dai paîs membris no vedin di rispietâ i oblics leâts al dopleament o ae sottitulazion par catalan. La modifiche e permetarà ancje di adatâ il test ai cambiaments tecnologjics che ta chescj agns a àn interessât il setôr audiovisîf. Il test al à cumò di passâ al esam dal Parlament prime di jessi fat bon in vie definitive. Par sburtâ la presince dal catalan ancje intai films che a rivin dal rest de Europe, l’esecutîf catalan al pontarà duncje sui finanziaments e sul acuardi cun distributôrs e gjestôrs des salis cinematografichis.
Font: Generalitat de Catalunya, 01/04/14

Gales: proteste cuintri dal plan edilizi dal Gwynedd

Centenârs di personis si son dadis dongje a Caernarfon ai 29 di Març par protestâ cuintri dal plan di svilup urbanistic che al previôt passe 8 mil alozaments gnûfs, di chi al 2026, intes regjons galesis dal Gwynedd e di Ynys Môn / Anglesey. A inmaneâ la manifestazion e je stade la organizazion pe lenghe galese Cymdeithas yr Iaith Gymraeg che, juste cualchi zornade prime, e veve presentât la sô propueste par cambiâ la normative su la planificazion edilizie in maniere di protezi lis comunitâts che a àn il galês tant che prime lenghe. La Cymdeithas e domande di blocâ il plan fintremai che no si varà stazât la dibisugne vere di alozaments gnûfs inte aree. Se e je vere che e je une cierte domande di edilizie residenziâl a coscj bas, e spieghe la organizazion, il risi al è che lis personis che a podaran permetisi di paiâ pai alozaments gnûfs a rivaran di fûr e, inte plui part, no fevelaran par galês. Lis esperiencis fatis fin cumò, di fat, a confermin cheste ipotesi e a testemoneâlu a son ancje i dâts dal ultin censiment che intal Gwynedd a mostrin il sbassâsi des personis che a fevelin par galês.
Font: BBC, 29/03/14; Cymdeithas, 31/03/14