14/10/14

Paîs Catalans: il front sovranist al conferme il vôt dai 9/N

Lis dôs riunions dai partîts sovraniscj rapresentâts intal Parlament catalan, che si son tignudis ai 3 e ai 9 di Otubar, a àn confermât la volontât di mantignî ai 9 di Novembar la date dal referendum su la indipendence e di davuelzilu daûr des formis che il moment al permetarà. Cun di fat, la sospensive decidude dal tribunâl costituzionâl spagnûl pe leç su lis consultazions fate buine dal Parlament catalan e pal decret de Generalitat (guvier catalan) par clamâ dongje il referendum e impedìs di davuelzi la votazion in maniere normâl. Lis riunions a àn dut câs mostrât des divisions tra CiU, ERC, ICV-EUiA e CUP su la forme di vôt di doprâ: si va di un referendum inmaneât de Generalitat in plene sfide aes autoritâts spagnolis a di une consultazion davuelte dai comuns che e vedi plui un valôr simbolic che pratic. Ai 10 di Otubar, intune conference stampe clamade dongje par presentâ la gnove manifestazion rivendicative in program a Barcelone ai 19 di Otubar, lis organizazions Assemblea Nacional Catalana e Òmnium Cultural che a son daûr a vuidâ la mobilitazion popolâr pe indipendence a àn dite che no acetaran un referendum smamît che nol sedi inmaneât dal guvier catalan.

Paîs Catalans: mobilitazions pai 9 di Otubar

A son stadis dôs lis manifestazions che si son davueltis a València pai 9 di Otubar, fieste nazionâl dal Paîs Valenzian. La prime, partecipade di miârs di personis, e je stade inmaneade de Comissió 9 d’Octubre cu la adesion di organizazions (ACPV, BEA, FEV e altris), sindacâts (CCOO-PV, UGT-PV, Intersindical Valenciana) e partîts de aree nazionaliste e di çampe (ERPV, EUPV, PSAN, Compromís, Els Verds, SI) che a àn domandât un cambi politic e sociâl radicâl. Il guvier di diestre (PP) cumò al podê al è stât acusât di vê causât une politiche sociâl, economiche, ambientâl e linguistiche devastante. Rispiet ai agns stâts, intant de manifestazion si à vude une incressite des bandieris e dai slogans a pro de indipendence. Ae iniziative uficiâl inmaneade dal guvier valenzian e dai partîts spagnoliscj si à viodude invezit une partecipazion fuarte dai grups de estreme diestre che a àn fat mostre ancje di bandieris e simbui franchiscj.
Font: La Vanguardia, 09/10/14; VilaWeb, 10/10/14

Gales: pas in direzion di un curriculum pardabon galês

Il professôr Graham Donadson, che al à vût la incarghe dal guvier galês di meti jù des racomandazions par svilupâ un gnûf curriculum pes scuelis dal Gales, al à finît il so lavôr e al à inviât al ministri pe educazion Huw Lewis, la liste dai principis di fonde dal curriculum e, tra chescj, il superament dal concet di “seconde lenghe” pal galês. La associazion pe lenghe galese Cymdeithas yr Iaith Gymraeg e à judicât in maniere positive chest lavôr e si è mostrade convinte che cun chestis liniis di azion si puedi ufrî a ducj i fruts une educazion che i permeti di cjapâ sù la capacitât di comunicâ in maniere naturâl sei par inglês che par galês.
Font: Cymdeithas, 09/10/14

Bretagne: Facebook ancje par breton

Il breton al deventarà la 121esime lenghe uficiâl di Facebook. La gnove e je stade comunicade ai 3 di Otubar de stesse direzion de rêt sociâl. Il lavôr di traduzion al ven svilupât di un grup di volontaris là che si son dadis dongje cuatricent personis. La disponibilitât di Facebook a zontâ ancje il breton tra lis lenghis a disposizion dai utents e diven massime de pression fate dal grup popolâr “Facebook e brezhoneg”.
Font: France Bleu, 07/10/14

Paîs Catalans: atac dal guvier valenzian al catalan a scuele

Pe organizazion Escola Valenciana il decret di riforme dal insegnament intes scuelis primariis dal assessorât pe educazion de Comunitât Valenziane al è fûr leç par vie che al va cuintri dal statût di autonomie e de leç sul ûs e sul insegnament dal valenzian, o sei la varietât catalane fevelade ta cheste comunitât autonome. Il gnûf model scolastic inviât, e zonte ancjemò la organizazion, al va daûr di chel che al veve cirût di imponi ancje il guvier des Baleârs (in ducj e doi i câs al guvier e je la diestre spagnoliste), che juste cualchi zornade indaûr al è stât anulât dal tribunâl superiôr des isulis. Daûr dal decret, e spieghe Escola Valenciana, tes classis che a àn il catalan tant che lenghe veicolâr primarie si riscje di vê un 43% di insegnament par spagnûl, un 37% par catalan e un 20% par inglês, di maniere che ancje cui che al sielç di cjapâ un percors di studis par catalan si ricjatarès a vê il spagnûl tant che prime lenghe.
Font: La Vanguardia, 06/10/14; Mallorca Confidencial, 07/10/14

Russie: novitâts pe normative sui popui natîfs

La leç che e ricognòs i dirits des comunitâts nativis che a vivin intal Nord e intal Est de Federazion russe e lis normis che a regolin lis compensazions in câs che lis tieris là che a vivin chestis popolazions a patissin dams ambientâi a saran modificadis. La decision e je stade concuardade dai rapresentants dai ministeris competents e dal president de associazion che e met adun lis rapresentancis di chestis minorancis. Si à ancje decidût che i cambiaments legjislatîfs e altris tematichis che a tocjin i dirits des comunitâts nativis a saran concuardâts di un grup di lavôr permanent che al sarà metût sù di pueste.
Font: Finugor, 07/10/14

Paîs Basc: si slargje l’insegnament dal basc te Rioja

Un pôc par volte l’insegnament de lenghe basche al è daûr a cressi ancje ta La Rioja, regjon spagnole a confin cu la provincie basche di Araba. Cundut che l’euskara nol è lenghe proprie di chest teritori al va dilunc a aumentâ il numar di personis che par resons di lavôr o interès personâl a sielzin di imparâ il basc. In plui dai cors za in vore intal istitût uficiâl di studis linguistics e inte universitât popolâr di Logroño, a son stâts confermâts ancje i cors di euskara inviâts l’an passât in forme sperimentâl inte citât di Nájera là che al è cressût il numar di students che ju frecuentin. A curâ chescj cors e je la associazion Laminiturri cul jutori de organizazion basche HABE.
Font: Noticias de Álava, 04/10/14

Paîs Catalans: edizion in rêt da El País par catalan

Cui 6 di Otubar, il cuotidian spagnûl El País al à inviât ancje une edizion digjitâl par catalan. E je stade metude sù une redazion di pueste par meti adun i contignûts origjinâi dal gjornâl che a son po doprâts, almancul in part, ancje pe edizion su cjarte. A completâ la ufierte informative e je la traduzion di une selezion di articui publicâts inte edizion statâl. Lis traduzions a son fatis par mieç di un tradutôr automatic e po controladis di un grup di tradutôrs. E cres cussì la ufierte informative in lenghe catalane che tra cuotidians e rivistis, sei in edizion stampade che digjitâl, e je rivade aromai a cuatricent titui. A trasmeti par catalan a son invezit uns otante canâi televisîfs e plui di un centenâr di radios.
Font: Generalitat de Catalunya, 03/10/14

Paîs Basc: plan par cressi l’ûs dal euskara te Ertzaintza

Il guvier de Comunitât Autonome Basche al à metût jù il prin plan linguistic pe Ertzaintza, o sei la polizie autonome basche. Il document, che cumò al è al esam dai sindacâts di categorie, al varès di jessi fat bon tal zîr di pocjis setemanis. In dì di vuê, plui dal 60% dai agjents di chest cuarp nol è in stât di fevelâ par euskara. L’obietîf dal plan, duncje, al è chel di garantî i dirits linguistics dai citadins ancje cuant che si cjatin a vê a ce fâ cu la polizie. Par chest, tra lis variis azions programadis, si previôt un aument intal numar dai agjents in distac par imparâ la lenghe basche, in spiete di svilupâ un percors di formazion linguistiche specific pai membris di cheste fuarce di polizie.
Font: El Correo, 27/09/14

Galizie: gnûf imprest pe normalizazion dal galizian

Inte suaze de diesime seste edizion dai Incuintris pe normalizazion linguistiche inmaneâts in Galizie si à presentât ancje un gnûf portâl digjitâl che al ufrìs une largje schirie di imprescj par judâ ducj chei che a son impegnâts in ativitâts di normalizazion linguistiche. Il sît al ufrìs imprescj linguistics e materiâi didatics, esemplis di buinis pratichis e contats des realtâts impegnadis a pro de lenghe, leams a altris sîts utii, une bibliografie specialistiche e altri ancjemò.
Font: Código Cero, 25/09/14

Romanie: no dal guvier a di une regjon autonome magjare

Il prin ministri rumen, il socialdemocratic Victor Ponta, al à dite che il so guvier nol poiarà la propueste fate indenant de Union Democratiche Magjare in Romanie (UDMR) di creâ une regjon autonome intes trê provinciis de Transilvanie là che i ongjarês a son maiorance (Székelyföld), o sei chês di Kovászna / Covasna, Hargita / Harghita e Marosvásárhely / Târgu Mureş. Intal progjet dal partît di riferiment de comunitât magjare si previodin la nassite di un Parlament regjonâl e di un guvier locâl che il so president al puedi partecipâ aes riunions dal esecutîf rumen che al ordin dal dì a àn temis che a tocjin cheste aree de Transilvanie. Cun di plui, dentri de regjon autonome, la lenghe ongjarese e varès di jessi couficiâl. Al è cumò di capî trop che il no dal prin ministri al pesarà su la tignude dal guvier che fin cumò al gjoldeve ancje de poie de UDMR.
Font: Balkan Insight, 22/09/14

Estonie: la tv publiche e varà ancje un canâl par rus

Dopo vê stazât lis diviersis pussibilitâts su la taule, il guvier de Estonie al à decidût di lâ indenant cul plan par zontâ ae ufierte de radiotelevision publiche ERR un canâl televisîf par rus. Tal zîr di un pâr di mês la direzion dal grup e presentarà une analisi detaiade dai coscj par meti in vore il gnûf canâl che si volarès fâ partî intal Setembar dal 2015. L’esecutîf de Estonie al à ancje decidût di infuartî la presince de lenghe de minorance plui gruesse dal paîs ancje te radiofonie publiche e di meti chest an che al ven 390 mil euros pe produzion di un program informatîf setemanâl par rus.
Font: Baltic Business News, 19/09/14