06/08/15

Paîs Catalans: presentât il rapuart sociolinguistic sul 2014

Il guvier catalan al à presentât il rapuart di politiche linguistiche che al piture la situazion de lenghe proprie intal 2014. L’element marcât intant de presentazion al è che, cundut dai mudaments demografics che a àn interessât la Catalogne intai ultins agns, il catalan al va dilunc a mantignî il so atrat. Se si calcolin lis personis dai 15 agns insù, il 94,3% de popolazion dal principât al capìs il catalan, l’82,4% al è bon di leilu, l’80,4% al è in stât di fevelâlu e il 60,4% di scrivilu. In tiermins gjenerâi al significhe che in Catalogne a fevelin la lenghe proprie passe 5 milions di personis (il catalan al è però fevelât ancje intal Paîs Valenzian, intes isulis Baleârs, inte fasse orientâl dal Aragon, in Catalogne Nord e inte citât sarde dal Alguer). Rispiet al 2013 i letôrs di cuotidians par catalan a son cressût dal 6,8% e a son cumò il 42,1% de popolazion; il consum di musiche par catalan al è dal 13,3%; intant che in ambient universitari, il 76,5% dai students al studie par catalan. Il studi al permet ancje di lâ plui a fonts intes dinamichis di trasmission de lenghe intes “gnovis” fameis catalanis, al ven cussì fûr che il 60,2% dai catalans che a àn dome un gjenitôr natîf de Catalogne al fevele ai fîs par catalan, intant che il 27,5% dai catalans che ducj i doi i gjenitôrs a rivavin di fûr al dopre la lenghe cui fîs.
Font: Generalitat de Catalunya, 30/07/15

Turchie: par Erdogan finît il procès di pâs cul PKK

Il president de Turchie Recep Tayipp Erdogan al à declarât di considerâ finît il procès di pâs inviât inte Vierte dal 2013 su iniziative dal PKK, il Partît dai Lavoradôrs dal Kurdistan. Cundut dal bloc unilaterâl des azions armadis de bande de vuerilie curde, il nivel de repression al è cressût a man a man che e aumentave la fuarce de resistence curde intal Rojava, o sei il Kurdistan “sirian”. A butâ benzine sul fûc al è stât il sassinament a Suruç (Tal Kurdistan “turc”) di 32 zovins impegnâts a sostignî la cause curde intal Rojava intun atentât atribuît al Stât Islamic. Ae repression violente des protestis ator pe Turchie pe posizion ambigue des autoritâts di Ankara tai confronts dal Stât Islamic i son vignudis daûr azions armadis atribuidis al PKK. La Turchie e à cussì decidût di rispuindi a chês che e calcole tant che “menacis teroristichis” doprant la aviazion par bombardâ lis postazions dal PKK intal Kurdistan irachen (azion che e à causât disinis di muarts pe plui part civîi) e proponint la creazion di une fasse di interdizion cuintri dal Stât Islamic inte Sirie setentrionâl. La linie turche e à cjatât la poie de NATO, ma par tancj di lôr – ancje tra i diplomatics europeans – la operazion e somee pensade plui par pidimentâ lis miliziis curdis dal Rojava, in prime linie cuintri dal Stât Islamic, che no cuintri chest ultin.
Font: Ekurd Daily, 28-30/07/15; Naiz:, 28/07/15

Cossovo: paritât linguistiche dal serp dome su la cjarte

La leç sul ûs des lenghis, fate buine tal 2006 cuant che il Cossovo al jere inmò sot aministrazion internazionâl, e garantìs al albanês e al serp il stes status intes istituzions cossovanis e chel stes al vâl ancje pai alfabets latin e cirilic che a son doprâts par scriviju. L’ultin rapuart de OSCE al segnale però che intes istituzions dal paîs no si à un plen rispiet dal dirit di comunicâ par serp. La leç dal 2006, al spieghe il rapuart, e je metude in vore dome in part par vie dal implei di risorsis finanziariis e umanis no suficientis, di une sotvalutazion de normative de bande di diviersis aministrazions locâls e de mancjance di volontât politiche. A sclarî ben il cuadri al è un episodi capitât ai 27 di Lui cuant che la comission parlamentâr pe legjislazion no à tignût cont des propuestis fatis indenant dal ministri pes comunitâts locâls par vie che il test al jere scrit in alfabet cirilic.
Font: Balkan Insight, 28/07/15

Galizie: in miârs ae manifestazion sovraniste unitarie

A son stadis sù par jù 25 mil lis personis che ai 26 di Lui a àn manifestât pes stradis di Sant Jacum di Galizie (Santiago de Compostela) in ocasion dal Dì de patrie galiziane. Pe prime volte la iniziative e je stade inmaneade di une comission organizadore espression de societât civîl là che i partîts a àn aderît, ma cence jessi i protagoniscj dal at. Ae manifestazion a àn partecipât rapresentants di Anova, BNG, Compromiso por Galicia, Esquerda Unida e di altris grups plui piçui de aree sovraniste e indipendentiste. Il puartevôs de comission organizadore, il scritôr Suso de Toro, al à mostrât sodisfazion pe partecipazion ae manifestazion e al à sburtât i sogjets politics che a àn aderît a dâsi dongje intune liste sovraniste uniche in ocasion des prossimis elezions gjenerâls in program dentri de fin dal an. Cundut des divisions che a esistin framieç dai partîts, no son mancjâts i segnâi positîfs par lâ ta cheste direzion. Une disponibilitât al dialic e je rivade ancje de federazion galiziane di Podemos cundut che i siei rapresentants principâi no àn partecipât ae manifestazion.
Font: Galicia Hoxe, 27/07/15

Grecie: i problemis dai turcs de Tracie presentâts ae EFA

Sul finî di Lui un delegât de Aleance Libare Europeane (EFA) si è cjatât cuntune rapresentance des organizazions culturâls e educativis de minorance turche de Tracie. E je stade la ocasion par fâ il pont su la situazion grivie che cheste comunitât si cjate a vivi in Grecie. Tra lis bataiis principâls si à chê identitarie, dal moment che la minorance no pues nancje doprâ il tiermin “turc” par identificâsi, e chê scolastiche là che a di une ufierte linguistiche e culturâl une vore puare si zontin cumò ancje altris pidiments: al è il câs de leç su la educazion fate buine in Dicembar che e impedìs l’insegnament a cui che si è formât intal forest colpint cun fuarce propit cui che al parten ae comunitât turche.
Font: EFA, 27/07/15

Ocitanie: prins pas pe Assemblada Nacionala Occitana

Si è tignude a Rodés / Rodez la assemblee costituente de Assemblada Nacionala Occitana (ANòC), organizazion che in maniere trasversâl e integradore si propon di tirâ dongje la maiorance dal moviment associatîf, politic e sociâl ocitan cun chê di dâi un sburt al recupar de cussience nazionâl. Si ponte duncje a rivâ a di un ricognossiment de Ocitanie tant che nazion e dal so dirit ae autodeterminazion. Dilunc di chest troi, che si previôt lunc e dificil, si sviluparan però ancje altris azions, a tacâ dal promovi l’ûs de lenghe ocitane. La prossime riunion par lâ indenant cul percors organizatîf de Assemblee al è stât fissât pai 25 di Otubar a Montpelhièr / Montpellier.
Font: Jornalet, 25/07/15

Paîs Catalans: aministrazion publiche baleâr, plui pês pe lenghe

Il gnûf guvier progressist e nazionalitari des isulis Baleârs al à inviât il percors di riforme de leç su la funzion publiche che l’esecutîf precedent – espression de diestre spagnoliste – al veve modificât intal 2012 gjavant la cognossince de lenghe catalane de liste des capacitâts domandadis par jessi cjapâts a vore inte aministrazion publiche. La gnove riforme e tornarà invezit a meti il catalan tra lis cognossincis domandadis. Par recuperâ i atacs ae lenghe puartâts indenant dilunc vie de aministrazion precedente, il gnûf guvier baleâr al à ancje metût lis fondis par un acuardi di colaborazion cu la Catalogne che, dopo agns di slontanament, al permetarà di svilupâ un impuartant scambi sul plan linguistic e culturâl.
Font: EuropaPress, 24/07/15; El Mundo, 27/07/15

Asturiis: gnûfs tais ai media par asturian

Il guvier asturian al à decidût di taiâ ancjemò une volte i finanziaments previodûts pal ûs e pe promozion de lenghe asturiane intai mieçs di comunicazion. I contribûts a passin cussì dai 127 mil dal an passât ai 80 mil di chest an, cuntun tai che al è tor dal 37%. Sbassâts ancje i fonts pe produzion discografiche par asturian e par galizian (doprât te part plui ocidentâl de comunitât asturiane). Ta chest câs il tai al è cuasi dal 17% ma, rispiet a doi agns indaûr, i finanziaments si son smiezâts.
Font: Asturies.com, 23/07/15

Armenie: su la strade de cuote garantide pai yazidis

La comission parlamentâr che e je daûr a meti jù il stampon di riforme de Costituzion de Republiche armene e à anticipât un pôcs dai contignûts dal test che la Assemblee e sarà clamade a votâ sul finî dal 2015. Un dai mudaments previodûts al è chel di une rapresentance garantide tal Parlament pes minorancis ricognossudis. Se cheste riforme e passarà, duncje, te prossime Assemblee a podaressin cjatâ puest ancje doi rapresentants de comunitât curde yazide che in Armenie e conte sù par jù 40 mil personis. Un ricognossiment no di pôc pai yazidis che, massime par vie de lôr confession religjose leade al zoroastrisim, a son stâts al centri di cetancj maçalizis (di chei metûts in at un secul indaûr in Turchie a chei puartâts indenant in dì di vuê dal SI tra Iraq e Sirie) e persecuzions. Si stime che in dut i yazidis a sedin plui o mancul un milion e mieç sparniçâts tra Iraq, Sirie, Turchie e republichis caucasichis.
Font: Ekurd Daily, 21/07/15

Gales: S4C si infuartìs su la rêt

Ai 20 di Lui la television publiche par galês S4C e à lançât une gnove aplicazion che e permet di viodi la programazion de emitente sei in direte che su domande su diviers smartphones e tablets. Ancje il sît de rêt al è stât rinovât par facilitâ la ricercje e l’acès ai programs e par adatâsi in maniere automatiche ai diviers visôrs. Cundut dal avignî malsigûr sul front dai finanziaments, S4C e va dilunc a infuartî la sô ufierte intal setôr des gnovis tecnologjiis che cualchi setemane prime e veve viodût ancje la nassite di un canâl su iPlayer. La television galese e à ancje comunicât i dâts riferîts ai utents vûts vie pal 2014: la medie dai spetatôrs setemanâi si è sbassade dal 6% in Gales ma, a nivel gjenerâl, e je cressude dal 10%. L’aument al è stât invezit dal 31% framieç di chei che a cjalin la television su internet.
Font: Cable.co.uk, 21/07/15

Paîs Basc: seconde stagjon pe campagne Poziktibity

Il guvier de Comunitât Autonome Basche al à inviât la seconde stagjon dal progjet Poziktibity che si propon di infuartî l’ûs dal euskara dentri de societât. Il progjet che, in plui di un sît internet dedicât, si svilupe su Facebook, Twitter, Instagram e altris rêts sociâls, al à il so cûr intune serie di videos che a promovin l’ûs de lenghe basche. L’an passât lis campagnis promozionâls di Poziktibity si vevin poiadis su personalitâts di grant riclam tant che zuiadôrs di balon, oms di spetacul e v.i., chest an invezit si ponte su la proposizion di situazions di vite cuotidiane e di protagoniscj comuns cun chê di sburtâ dut intun lenghe e valôrs che a insiorin la vite di ogni dì, a partî di chel de condivision.
Font: EiTB, 17/07/15