26/09/20

Paîs Catalans: celebrâts i 15 agns dal domini .cat

Ai 16 di Setembar la fondazion PuntCAT e à celebrât i 15 agns de nassite dal domini .cat che, juste ta chê stesse zornade dal 2005, al veve vût il vie libare dal organisim internazionâl che al autorize e al controle i dominis web (ICANN). Chel catalan al è stât il prin domini assegnât a di une comunitât linguistiche e nazionâl minorizade. Ta chescj 15 agns a son stâts regjistrâts passe 108 mil sîts cun chest domini.

Font: Generalitat de Catalunya, 18/09/20

Galizie: propueste par un canâl par galizian pai fruts

A Mesa pola Normalización Lingüistica e à comunicât che e presentarà une propueste no di leç di iniziative popolâr intal Parlament de Galizie cul obietîf di impegnâ il guvier de comunitât autonome a cjapâ dutis lis misuris che a coventin par che la radiotelevision publiche galiziane (CRTVG) e meti sù un canâl in lenghe proprie dut dedicât a fruts e fantats. La situazion e je lade in piês an dopo an e, in dì di vuê, la programazion par galizian dedicade ai plui zovins e je a pene il 4,6% dal totâl. Par che la iniziative e puedi concretizâsi al covente cumò sostignî la propueste cuntune racuelte di firmis che e impegnarà tai prossims mês A Mesa e altris coletîfs che a poin cheste bataie. Une prove gjenerâl in chest sens e je stade fate in rêt là che in a pene cuatri dîs la organizazion e à tirât sù 8 mil adesions.

Font: A Mesa, 17/09/20

Cornualie: di Londre nuie bêçs pe lenghe corniche tal 2020

Par tacâ a dâi sostance ai impegns cjapâts cul inseriment de comunitât corniche tra chês tuteladis par mieç de Convenzion cuadri pe protezion des minorancis nazionâls, vie pal 2019 il guvier britanic al veve assegnât al Consei de Cornualie 200 mil sterlinis: 150 mil par promovi la cognossince e l’ûs de lenghe proprie e 50 mil par azions di promozion culturâl. Chest an, invezit, nol rivarà nancje un franc. La conferme si le cjate te rispueste mandade al president dal Consei de Cornualie, Julian German, dal ministeri pal guvier locâl e pes comunitâts. Cun di fat, se di une bande l’esecutîf britanic al sigure il so impegn par sostignî e promovi il cornic, di chê altre bande al fâs savê che chest an no saran trasferîts al Consei de Cornualie fonts par cheste finalitât. Te stesse letare si conferme po che al sarà il guvier di Londre e no lis autoritâts locâls a rapresentâ la Cornualie intal consei britanic – irlandês des lenghis minoritariis e nativis.

Font: Cornish Stuff, 16/09/20

Gales: secondis cjasis plaie ancje pe lenghe

Il consei comunâl di Nefyn al à domandât al guvier galês di inviâ une gnove politiche par chel che si riferìs aes secondis cjasis e, plui tal detai, di previodi che cui che al vûl comprâ une cjase pes vacancis o par trasformâle tun AirBnB al vedi bisugne de autorizazion des autoritâts locâls su la fonde di une planificazion specifiche pe edilizie residenziâl e che, tal câs che al vegni autorizât, al vedi di paiâ tassis plui altis. Cun di plui si domande ancje di garantî la prioritât di acuist pe int dal puest. Chest comun, compagn di altris localitâts galesis, si ricjate di fat a vê di frontâ un aument simpri plui fuart de domande di cjasis di comprâ e dal lôr presit. Tra lis consecuencis di cheste situazion si à che la int dal puest e massime i zovins no son plui in stât di frontâ il cost par cjolisi une cjase e a son obleâts a lâ vie. Ta cheste maniere i paîs a pierdin a man a man la int che e je nassude e cressude alì par lassâi il puest a int di fûr che e ven alì se e ve ben juste par pôcs mês ad an. Un tant al rapresente un colp cetant dûr ancje sul plan linguistic e areis là che il galês al è ancjemò la prime lenghe a riscjin di deventâ simpri plui anglofonis e di pierdi la lôr identitât. Pes aministrazions locâls il guvier galês nol dediche avonde atenzion a cheste situazion e lu invidin a intervignî cun urgjence par fermâ cheste plaie che e va cuintri ancje dai progjets di difese e di incressite de lenghe proprie che, a peraulis, l’esecutîf al dîs di vê.

Font: Nation Cymru, 16/09/20

Paîs Catalans: RTVE Catalunya e doplee lis oris par catalan

La sede catalane de radiotelevision publiche spagnole, RTVE Catalunya, e à presentât la gnove stagjon 2020-2021 che e mostre diviersis novitâts rispiet al an passât. Une di chestis e je che lis oris di emission par catalan si doplearan. Cun di fat, se l’an passât si vevin 24 oris par setemane di contignûts in lenghe proprie, chest an lis oris setemanâls par catalan a saran 48. La maiorance des trasmissions in lenghe catalane a saran centradis su 6 oris in dì dividudis in trê fassis orariis diferentis.

Font: Generalitat de Catalunya, 15/09/20

Corsiche: iniziative par impuartâ il model scolastic basc

Tra i 12 e i 14 di Setembar une delegazion di professôrs e aministradôrs locâi cors e à visitât il Paîs Basc setentrionâl (Ipar Euskal Herria) par studiâ plui di dongje il sisteme des scuelis imersivis par euskara gjestidis de federazion Seaska. Si trate de rêt che e ten adun une cuarantine di istitûts scolastics che a van de scuele de infanzie fintremai lis secondariis là che l’insegnament al è fat in lenghe basche. Dal 1994 incà, chestis ikastolas a son stadis ricognossudis come scuelis parificadis. Chest al vûl dî che, ancje se si trate di struturis privadis gjestidis in gjenar des associazions dai gjenitôrs, i professôrs a son paiâts dal stât centrâl e lis struturis a son metudis a disposizion o paiadis des aministrazions locâls. In dì di vuê, a cjapin dentri plui o mancul il 10% dai students dal Paîs Basc setentrionâl. A front de riforme Blanquer e di altris atacs al insegnament des e tes lenghis minorizadis dentri dal stât francês, in Corsiche si à decidût di provâ a rispuindi inviant un model scolastic come chel basc. Il prin pas al varès di jessi fat chest an che al ven cu la partence di dôs scuelis de infanzie a imersion, une a Bastia e chê altre a Biguglia.

Font: CorseNetInfos, 15/09/20

Ocitanie: altris dâts de ultime inchieste sociolinguistiche

Ancjemò tal Jugn di chest an l’Ufici Public de Lenghe Ocitane (ÒPLO) al veve presentât i risultâts plui impuartants di une inchieste sociolinguistiche che e veve cjapât dentri i teritoris di lenghe ocitane des regjons aministrativis de Gnove Aquitanie e de Ocitanie, tal stât francês, e de Val di Aran, intal stât spagnûl. In plui dai ûs linguistics, la inchieste e veve indagât ancje il rapuart de int cu la lenghe proprie. Il dât plui significatîf al jere che il 92% dai intervistâts si declarave a pro di politichis par valorizâ l’ocitan. La inchieste e va dut câs indenant a ufrî dâts interessants che a varessin ancje di coventâ par planificâ lis politichis linguistichis. Par esempli, se e je vere che tai ultins agns si stime une diminuzion tor dal 4% intes personis che a fevelin par ocitan, di chê altre bande e je cressude la volontât dai gjenitôrs e dai nonos di trasmeti la lenghe. E se e je vere che l’ocitan al reste fevelât massime in ambient familiâr, si à po viodût che l’element culturâl, massime chel de musiche e dai bai popolârs, al da un contribût impuartant a svicinâ la int ae lenghe e che lis rêts sociâls par ocitan a son simpri plui frecuentadis. La inchieste e ufrìs ancje un spieli dal aprendiment dal ocitan a scuele, là che si passe dal 49% di fruts che a àn vude cheste pussibilitât intal dipartiment dai Alts Pireneus al 1% di chei de Cruesa / Creuse.

Font: Le Populaire du Centre, 15/09/20

Galizie/León: iniziativis pai dirits linguistics intal Bierzo

La domande dal coletîf culturâl Fala Ceibe di mendâ il regolament gjenerâl dal consei provinciâl dal Bierzo – aree di lenghe galiziane che si cjate te comunitât di Castilie e León – par dâi al galizian un status di couficialitât e je stade cjapade sù ancje de Coalición por El Bierzo (CB). Il moviment politic al à fat indenant une petizion par che tal regolament si previodi in maniere esplicite il bilinguisim aministratîf. Il statût de comunitât di Castilie e León e la normative locâl a ricognossin za la lenghe galiziane e a previodin misuris di tutele ma, tai fats, si è ben lontans di une paritât tra galizian e castilian. Cheste iniziative e à stiçât la Unión dal Pueblo Leonés (UPL-Bierzo) a proponi une modifiche al regolament che e previodi ancje la difese de lenghe asturiane leonese che e je fevelade te part orientâl dal teritori provinciâl.

Font: León Noticias, 11/09/20; La Nueva Crónica, 18/09/20

Paîs Basc: a Baiona cuintri dai atacs ae scuele basche

Il dinei dal distret scolastic teritoriâl di vierzi une classe basche a imersion alì de scuele publiche di Hiriburu / Saint-Pierre-d’Irube e je stade la ultime gote che e à discjadenât la proteste des realtâts impegnadis inte promozion de lenghe proprie tal Paîs Basc sot aministrazion francese (Ipar Euskal Herria). La decision e à puartât a interogâsi ancje sul avignî des 38 classis imersivis za in vore, ancje parcè che la ofensive cuintri dal euskara a scuele si palese in diviersis manieris. Baste pensâ, par esempli, che dai 15 gnûfs professôrs che a àn completade la formazion par basc 11 a son stâts assegnâts a catedris par francês. Par protestâ cuintri di chescj atacs ae lenghe basche inte educazion, la organizazion Euskal Konfederazioa – che e met adun lis realtâts che a operin pal insegnament dal basc a scuele – e à decidût une zornade di mobilitazion pai 10 di Otubar a Baiona / Bayonne. In particolâr, ta chê zornade, e je stade programade une cjadene umane che e scjavaçarà une part de citât.

Font: Sud Ouest, 10/09/20

Paîs Catalans: a València jutoris pal catalan tal cumierç

Il comun di València al à decidût di intervignî in maniere ative par promovi la lenghe proprie tes ativitâts comerciâls de citât. Par chest al à publicât un bant che al met a disposizion un totâl di 50 mil euros. Si trate di risorsis che a laran aes buteghis, ai locâi e a chês altris ativitâts comerciâls citadinis che a dopraran il catalan (te sô varietât valenziane) inte tabelonistiche interne e esterne, te publicitât, tal materiâl promozionâl, tai sîts internet, tes etichetis, tai menûs e vie indenant.

Font: El Periòdic, 09/09/20

Ream Unît: Europe critiche sul rispiet dai dirits linguistics

L’ultin rapuart dal Consei de Europe sul rispiet de cjarte europeane des lenghis regjonâls o minoritariis de bande dal Ream Unît al palese no pôcs ponts critics. La situazion plui penze e je chê leade ae Irlande dal Nord là che zaromai di agns si spiete une leç organiche di tutele dal gaelic irlandês che, par altri, e jere part ancje dai acuardis di pâs dal Vinars Sant. Il document al segnale ancje la inazion dal esecutîf britanic in mert ae promozion dal cornic e al invide Londre a trasferî competencis e risorsis pe politiche linguistiche al guvier locâl. Par chel che al rivuarde il galês, i setôrs là che si invide a intervignî cun plui fuarce a son chei de sanitât, de assistence, de educazion privade e dal guvier locâl. In mert al gaelic scozês si invide invezit a intervignî massime su lis radios e lis televisions comerciâls. Tra lis notis positivis, invezit, si à lis politichis metudis in at des autoritâts locâls pe varietât gaeliche fevelade ti isule di Man.

Font: The Guardian, 08/09/20

10/09/20

Bretagne: al cres te scuele catoliche l'insegnament dal breton

Cul gnûf an scolastic al cres l’insegnament par breton inte scuele parificade catoliche. In dì di vuê cuasi il 42% dai students di chest teritori al frecuente istitûts scolastics confessionâi, la percentuâl e je invezit un pôc plui basse par chel che al rivuarde la filiere bilengâl o imersive par breton che e cjape dentri sù par jù 5.500 arlêfs suntun totâl di 15 mil. Vie pal 2019 lis classis bilengâls a jerin presintis in 105 istitûts catolics (77 primariis e 28 secondariis), cun chest an a son 9 in plui. Lis novitâts, dut câs, no finissin achì viodût che cun chest an l’istitût superiôr di formazion dal insegnament catolic al à screât un gnûf master bilengâl par cui che al vûl fâ il mistîr dal insegnant o dal formadôr.
Font: Ouest France, 03/09/20

Gales: eletôrs laburiscj in maiorance pe indipendence

Daûr dal ultin sondaç curât di YouGov, i galês che a votaressin sì intun referendum su la indipendence a son il 32%, il 8% in plui dal 2017. Al podarès someâ pôc se nol fos che par agnorums a dilunc l’indipendentisim in Gales al è stât un fenomen margjinâl e che za di cualchi an il so atrat al va dilunc a cressi. Il scandai al mostre però ancje altris dâts che a meretin atenzion. Il prin al è che l’indipendentisim al è fuart massime tra i zovins, cuntun 43% di favorevui te fasse di etât jenfri i 18 e i 24 agns. Un altri dât al è che, pe prime volte, l’indipendentisim al è deventât maioritari framieç dai eletôrs laburiscj. Il 51% di lôr, di fat, se si votàs doman su la indipendence al disarès di sì. Un 55% al è po dacuardi sul fat che a decidi se fâ o no fâ un referendum su la autodeterminazion e vedi di jessi la Assemblee Nazionâl dal Gales (Senedd) e no il Parlament di Londre.
Font: Nation Cymru, 03/09/20

Corsiche: U Ghjurnalettu, il cuotidian par cors pai fruts

Il portâl informatîf Corse Net Infos (CNI) al à inviât inta chestis zornadis il sît U Ghjurnalettu che si zonte ae ufierte informative principâl. Si trate di un cuotidian in rêt pensât di pueste pai fruts tra i 5 e i 12 agns e fat dut par cors. In plui des gnovis a son ancje materiâi ludics e spazis di aprofondiment calibrâts su la etât dai letôrs. I curadôrs de iniziative a fasin savê di jessi seneôs di ricevi propuestis e segnalazions in maniere di miorâ formis e contignûts par vignî incuintri aes dibisugnis dai fruts.
Font: Corse Net Infos, 02/09/20

Finlande: petizion pe difese des areis tradizionâls sami

Ativiscj sami a àn consegnât ae ministre finlandese pal ambient e pe clime, Krista Mikkonen, lis passe 37 mil firmis racueltis in mancul di trê mês par domandâ al guvier de republiche nordiche di no autorizâ estrazions inta chel cuar di tiere che si cjate strent jenfri Svezie e Norvegje. Si trate di une part dal teritori storic dai sami che, par secui e secui a dilunc, lu àn doprât pal arlevament. Lis migrazions des renis e i passons che a doprin a cambiin an par an daûr dal andament climatic e, duncje, l’arlevament tradizionâl di chescj animâi nol è compatibil cu lis ativitâts estrativis. La rame finlandese de compagnie minerarie neerlandese Akkerman e à za fat esplorazions e mapaduris aeromagnetichis che a segnalin la presince ta cheste aree di ram, cobalt e nichel e, tal Avrîl di chest an, e à otignût de agjenzie statâl competente une prime opzion pal disfrutament minerari. Pal moment i responsabii de multinazionâl a disin che a coventin ancjemò esplorazions e al è masse adore par capî se il model di disfrutament minerari che si doprarà al sarà compatibil o no cul sisteme di arlevament tradizionâl dai sami.
Font: The Barents Observer, 02/09/20

Flandris: sindics e gjenitôrs a domandin il flamant a scuele

I sindics di cinc comuns des Flandris francesis a àn domandât aes autoritâts scolastichis di tornâ a garantî l’insegnament de lenghe flamande tes scuelis primariis dal lôr teritori. Al è za di un an, di fat, che la ore setemanâl di lenghe flamande e je stade gjavade. A sostignî la domande a son ancje i gjenitôrs dai fruts che, in part, a àn decidût di iscrivi i lôr fîs a scuele par di là dal confin, inte Belgjiche, là che in classe si studie sei flamant che francês. Aministradôrs e gjenitôrs a batin sul fat che, in plui di mantignî vive la lenghe proprie, cul insegnament dal flamant si da une oportunitât in plui ai fruts che un doman a volessin lavorâ te Belgjiche o tai Paîs Bas.
Font: BFM Régions, 02/09/20

Montenegro: in cressi lis tensions etnichis dopo dal vôt

Lis elezions dai 30 di Avost in Montenegro a àn assegnât une lizere maiorance in Parlament ai trê principâi grups di oposizion, metint in minorance il Partît Democratic dai Socialiscj (DPS) dal president Milo Djukanović. Dopo dal vôt, massime te aree setentrionâl là che e vîf la plui part de minorance bosgnache musulmane, si àn vûts ats di vandalisim e agressions cuintri di personis o proprietâts di cheste comunitât. Djukanović al à acusât la oposizion, che e cjape dentri ancje i partîts filoserps, di jessi daûr di chestis violencis par vie des sôs ideis nazionalistis estremis. I dirigjents dai moviments di oposizion a àn invidât i lôr eletôrs a meti fin aes celebrazions in place pe vitorie eletorâl in maniere di evitâ lis provocazions e i incidents che il Partît Democratic dai Socialiscj al varès vantaç di vê. Lis istituzions religjosis de comunitât bosgnache, par esempli, a àn za domandât aes autoritâts montenegrinis di intervignî par difindi la minorance musulmane. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe, passe il 8% bosgnache e un 5% albanese.
Font: Balkan Insight, 02/09/20

Paîs Basc: presentade la campagne “Hurrengoan euskaraz!”

Il guvier e 36 aministrazions locâls de Navare si son dâts adun cu la rêt dai euskaltegis publics e privâts par promovi la stagjon 2020-2021 dai centris di insegnament de lenghe basche pai adults. Vie pal mês di Setembar la campagne promozionâl e sarà presinte su internet, su lis rêts di comunicazion sociâl, sui cuotidians e su lis radios de Navare. Il teme de campagne di chest an al è “Hurrengoan euskaraz! / La prossime par basc”. Vie pal an 2019-2020 i iscrits ai 30 euskaltegis de Navare a àn superâts i 6 mil. Pal tierç an di file l’ent governatîf di politiche linguistiche al à previodût ancje misuris di jutori economic par cui che al frecuente i cors, cuntune disponibilitât che e je lade sù a 190 mil euros (40 mil in plui dal an passât). Tal 2019 a jerin stâts un miâr i students che a vevin gjoldût di chestis sovenzions.
Font: Noticias de Navarra, 31/08/20

Paîs Catalans: gnûf tradutôr neuronâl catalan - inglês

Softcatalà al à publicât un gnûf tradutôr automatic inglês - catalan e catalan - inglês basât su la tecnologjie des rêts neuronâls. Par un pôcs di mês il servizi, che al è disponibil in forme gratuite, al sarà in prove in maniere di cjapâ sù coments e sugjeriments dai utents. Par intant al larà indenant a jessi operatîf ancje il tradutôr precedent che si poie su tecnologjie Apertium. Il gnûf tradutôr neuronâl al varès di garantî sei une cualitât plui alte des traduzions, sei la pussibilitât di voltâ tescj plui luncs.
Font: Generalitat de Catalunya, 28/08/20

Paîs Basc: passe 300 gjornaliscj par un guvier bascofon

Passe tresinte gjornaliscj a àn sotscrit un manifest là che si domande che ducj i membris dal gnûf guvier e lis incarghis principâls de Comunitât Autonome Basche a sepin fevelâ par euskara. A presentâ al public il document, ai 27 di Avost, a son stâts doi tra i nons plui cognossûts de stampe basche, ven a dî Martxelo Otamendi (Berria) e Maite Artola (Euskadi Irratia). Chê de informazion e je une ativitât essenziâl me, par fâle te maniere plui eficace e corete pussibile, il gjornalist al à di rivâ ae risultive de gnove e duncje aes personis che indi son la origjin. Chescj, a lôr volte, a àn l’oblic di informâ la opinion publiche. Dut câs, il fat che diviers dai responsabii istituzionâi de Comunitât Autonome no fevelin par basc, al pidimente il lavôr dai mieçs di comunicazion che a operin inta cheste lenghe e al fâs dam ai citadins, cemût che si à podût comprovâ ancje di resint cu lis comunicazions su la pandemie.
Font: EiTB, 27/08/20

Gales: galês plui debul intai ats de Assemblee Nazionâl

La Assemblee Nazionâl dal Gales e à decidût di cambiâ il sisteme di archiviazion dai verbâi des riunions plenariis e di chês des comissions. Prime i ats a jerin proponûts intun test unic cu lis versions par inglês e par galês une dongje la altre, a man çampe la lenghe doprade pal intervent e a drete la traduzion. Cumò invezit si pues sielzi di lâ su la version bilengâl, su chê dome par inglês o su chê dome par galês. Tes intenzions de Assemblee cheste gnove soluzion e à chê di meti lis dôs lenghis suntun plan di avualiance perfete ma, cemût che a segnalin i esperts, il risultât nol è chel. Prime cu lis dôs lenghis dongje, ancje se in maniere involontarie o in forme passive, il letôr al incresseve lis sôs capacitât linguistichis. Cul gnûf sisteme invezit, cui che al è interessât dome al inglês al pues fâ di mancul di calcolâ il galês. Ven a dî che, cun chest sisteme, la avualiance e je dome formâl ma te sostance si va a favorî la lenghe plui fuarte.
Font: BBC, 25/08/20

Asturiis: IpA e domande plui pês pal asturian tai concors

La organizazion Iniciativa pol Asturianu e domande che l’asturian al cjati spazi tai bants e tai concors metûts fûr dal guvier des Asturiis. Tal valutâ lis domandis – a zontin – al covente che si tegni cont ancje dal ûs de lenghe proprie e de toponomastiche bilengâl cemût che, par altri, za e previodarès la normative linguistiche. Si trate di une operazion che e permet di valorizâ l’asturian cence che chest al puarti coscj in plui pe aministrazion publiche. A stiçâ cheste domande al è stât un bant su la promozion turistiche dât fûr dal assessorât che al viôt ancje des politichis linguistichis là che no si veve nissun riferiment ae lenghe proprie.
Font: La Voz de Asturias, 24/08/20

31/08/20

Paîs Catalans: simpri plui leçs che a discriminin il catalan

Contrari dai indreçaments rivâts dal Consei de Europe e de OSCE, lis istituzions spagnolis a son ladis indenant a doprâ dome il castilian par informâ su la pandemie in at e tes ordenancis par limitâ la sô difusion, lassant di bande lis lenghis couficiâls. A segnalâlu e je la organizazion catalane Plataforma per la llengua che e à inzornât il so monitorament su la discriminazion linguistiche te legjislazion. Cussì al ven fûr che, tra Avrîl e Jugn, lis normis jentradis in vore intal stât spagnûl che a discriminin lis lenghis propriis a son stadis 28, e a van a zontâsi aes 25 za fatis buinis tai prins trê mês dal 2020. Si trate di 17 leçs statâls e di 11 comunitariis, ta chest ultin câs la discriminazion e je la consecuence dal dinei dai guviers di Madrid a ricognossi catalan, basc e galizian come lenghis uficiâls dongje dal castilian.
Font: PFPLL, 19/08/20

Galizie/León: mobilitazion intal Bierzo pe couficialitât

Il coletîf culturâl Fala Ceibe al à domandât al consei provinciâl dal Bierzo – aree di lenghe galiziane che si cjate inte comunitât di Castilie e León – di mendâ la leç che e regole la vite de aministrazion locâl par ricognossi al galizian un status di couficialitât. Tant il statût de comunitât di Castilie e León che la normative locâl a ricognossin za la esistence de lenghe galiziane e a previodin ciertis misuris di tutele. La modifiche che si domande e je duncje indreçade a garantî la paritât di tratament tra galizian e castilian intes ativitâts aministrativis. Cheste mobilitazion e rive cualchi zornade dopo che la plateforme civiche A Quinta e à inviât une campagne par che il Bierzo al puedi jentrâ a fâ part come gnove provincie de comunitât autonome de Galizie.
Font: Lugo Xornal, 19/08/20

Galizie: fonts par voltâ 94 oparis dal o par galizian

Tal 2020 il guvier de comunitât autonome de Galizie al à assegnât 200 mil euros par voltâ dal e par galizian un centenâr di produzions editoriâls. Plui tal specific, cun chestis risorsis si larà a tradusi in lenghe proprie 70 oparis scritis in altris lenghis, intant che 24 lavôrs jessûts par galizian a saran voltâts par castilian, francês, inglês, portughês, talian o todesc. Cheste ativitât e cjape dentri une vincjine di cjasis editoris.
Font: Cultura Galega, 19/08/20

Macedonie: acuardi par un prin ministri albanês

Ai 18 di Mai si à cjatât l’acuardi che al conferme il sociâl democratic Zoran Zaev tant che prin ministri de Macedonie dal Nord. A sostignî il gnûf esecutîf a saran ancjemò une volte il Partît Sociâl Democratic (SDSM), che tes elezions anticipadis dai 15 di Lui al à otignût 46 deputâts, e la Union Democratiche pe Integrazion (DUI), che cui siei 15 elets e reste il partît plui votât de minorance albanese (che e rapresente un cuart de popolazion totâl de republiche balcaniche). A sostignî chest pat di guvier al è ancje il Partît Democratic dai Albanês. La maiorance e varà cussì a disposizion 62 dai 120 membris dal gnûf Parlament. Par otignî la poie de Union, Zaev al à vût di acetâ che a fâ di prin ministri tai ultins cent dîs prime de fin de legjislature al sedi un membri de comunitât albanese.
Font: Balkan Insight, 18/08/20

Asturiis: la Xunta e critiche la politiche linguistiche de RTPA

La Xunta pola Defensa de la Llingua Asturiana e à criticât la politiche linguistiche de RTPA – la Radio Television dal Principât des Asturiis – ma ancje la decision dal guvier locâl di assegnâi ae emitente 200 mil euros par meti in onde programs par asturian. Cundut che la normative in vore e previôt che la radiotelevision publiche e contribuissi a normalizâ l’ûs de lenghe proprie e che la emitente e ricêf za 23 milions di euros ad an pes sôs ativitâts, cul assegnâi chestis risorsis in plui, in sostance, l’esecutîf al da par scontât che la RTPA e vedi di trasmeti par castilian. Pe Xunta cun chescj fonts si varès invezit di finanziâ, a miezis cu la RTPA, la creazion di un servizi par dopleâ o sottitulâ par asturian produzions audiovisivis indipendentis di meti in onde su la emitente.
Font: Astur News, 15/08/20

Bretagne: progjet par unî in digjitâl 18 radios bretonis

Il consei superiôr dal audiovisîf francês al à dât il so parê positîf al disvilup dal progjet «Radio BOA», acronim di Breizh On Air. Si fevele de nassite di une cussì clamade radio regjonâl digjitâl che e metarès adun disevot emitentis radiofonichis associativis bretonis. Si trate des realtâts che za a aderissin al coordenament des radios locâls e associativis de Bretagne. Il progjet, che al varès di deventâ operatîf intal 2022, al permetarà di meti sù un canâl digjitâl che al metarà a disposizion informazions che a cjapin dentri dut il teritori de Bretagne e che al trasmetarà tes diviersis lenghis di chest teritori, ven a dî breton, francês e ancje gallo, o sei la varietât linguistiche neolatine fevelade te part plui orientâl de Bretagne.
Font: Actu.fr, 13/08/20

Irlande: la polizie no rispiete lis normis su la lenghe

Un rapuart publicât ai 12 di Avost al segnale che la polizie di stât irlandese (An Garda Síochána) no à fat nissun progrès rispiet aes racomandazions fatis indenant ancjemò undis agns indaûr par garantî i dirits linguistics dai citadins che a son a stâ intal Gaeltacht, o sei lis areis là che l’irlandês al è ancjemò lenghe di ûs comun. In particolâr, dal personâl di polizie in servizi ta chestis areis – o sei 99 agjents – dome 35 a àn une cognossince suficiente dal irlandês. Il comissari pe lenghe irlandese, Rónán Ó Domhnaill, si veve cjatât ancjemò l’an passât cui responsabii dal cuarp par cirî di superâ chest probleme ma lis sôs propuestis di intervent a vevin cjatât une rispueste dome dopo di siet mês e, ancje ta chel câs, cence di nissun impegn specific. Chest ultin rapuart al à confermât che la polizie no fâs nuie par rispietâ la normative linguistiche e i oblics previodûts inte leç che e regole il cuarp. Il comissari al à duncje decidût di puartâ la cuistion denant de comission di justizie clamade a judicâ chest gjenar di violazions de leç.
Font: Irish Times, 12/08/20

Man: finanziament public plen pe scuele a imersion

Declarât “estint” intal 2009 de UNESCO, ancje se no son plui personis che lu àn di prime lenghe in realtât il manx – la lenghe de famee gaeliche che si fevele te isule di Man – inta chescj agns al è daûr a vivi une sorte di resuriment. Tra i protagoniscj di cheste rinassince e je ancje la Bunscoill Ghaelgagh, la scuele primarie a imersion fondade 19 agns indaûr e gjestide de organizazion privade Mooinjer Veggey. A front di chest lavôr fondamentâl, cumò il guvier de isule al à decidût di ricognossile come part dal sisteme scolastic public. Chest al vûl dî che di cumò indenant al proviodarà a assumi e a paiâ in maniere direte i insegnants e il personâl tecnic e aministratîf dal istitût. Cun di plui, su la fonde dai risultâts de scuele, si resone su la pussibilitât di inviâ un percors similâr ancje pal cicli secondari de istruzion.
Font: Manx Radio, 05/08/20

Scozie: in cressi lis risorsis pal gaelic

Il Bòrd na Gàidhlig, la agjenzie scozese de lenghe gaeliche, al à fat un belanç des sôs ativitâts inte prime part di chest 2020. Cundut dai pidiments leâts ae pandemie, la agjenzie e je daûr a lavorâ cun 68 tra aministrazions e ents publics pal disvilup di plans linguistics specifics, e à assegnât fonts par un milion di sterlinis a di une sessantine di organizazions impegnadis pe lenghe proprie e e à creât un canâl di finanziament di pueste par chês tra di lôr che a son stadis plui colpidis dai efiets de crisi leade al Covid-19. I bogns risultâts des ativitâts di promozion de lenghe si ju viôt ancje dal aument dal 10% intal zîr di un an dal numar dai arlêfs che a studiin in scuelis cul gaelic veicolâr e dal 5% dai professôrs che a doprin cheste lenghe par insegnâ.
Font: Bòrd na Gàidhlig, 04/08/20

06/08/20

Paîs Basc: proteste corâl in difese de imersion a Hiriburu

Ai 23 di Lui, intant di une conference stampe, la organizazion Ikas-Bi – che e coordene la rêt des scuelis bilengâls intal Paîs Basc sot aministrazion francese (Ipar Euskal Herria) – e à denunciât l’atac in at cuintri dal sisteme educatîf par basc. Di là de menace che la riforme Blanquer e puarte al insegnament scolastic superiôr intes lenghis minorizadis, a discjadenâ la proteste e je stade massime il dinei dal distret scolastic teritoriâl a vierzi une classe basche a imersion alì de scuele publiche di Hiriburu / Saint-Pierre-d’Irube. Une decision judicade incomprensibile sei de bande dal personâl scolastic che dai gjenitôrs viodût i risultâts une vore bogns vûts fin cumò cul insegnament imersîf. A poiâ la domande de gnove classe al è ancje il sindacât SNUipp-FSU. Ai 17 di Lui il consei dai elets locâi al à votât ae unanimitât par che si ledi indenant cu la sperimentazion di classis a imersion. Ai 21 di Lui la organizazion Euskal Konfederazioa e à domandât un incuintri urgjent cu lis autoritâts scolastichis distretuâls e pôc dopo, sei la direzion dal ufici public de lenghe basche (OPLB) che rapresentants politics locâi a àn scrits ai ministris pe educazion e pe culture par segnalâ la menace che cheste decision e rapresente pe lenghe basche.
Font: Mediabask, 23/07/20

Paîs Catalans: par valenzian ancje in universitât

E je partide, alì de universitât “Jaume I” di Valencia, la campagne «ae universitât par valenzian: cence complès!» che si propon di promovi lis iscrizions par valenzian e par valorizâ e infuartî la presince di cheste varietât catalane intal ambient universitari. L’intindiment al è di superâ i complès che in cualchi câs a compagnin l’ûs de lenghe proprie e doprâle pardut ancje dentri de universitât: par dâ lezions, par studiâ e pe part aministrative. Cheste iniziative, a zontin i ideadôrs, e vûl contribuî al plurilinguisim sociâl che al è une ricjece par dute la comunitât.
Font: El Periodic, 23/07/20

Cravuazie: deputâts des minorancis dentri dal gnûf guvier

Ai 23 di Lui il Parlament cravuat al à votât la fiducie al gnûf guvier vuidât di Andrej Plenković che cul so partît – la Union Democratiche Cravuate (HDZ) – al veve otignût la maiorance relative tes elezions politichis dai 5 di Lui. Par rivâ a otignî la poie di almancul 76 dai 151 deputâts de assemblee, Plenković – che al partive dai 66 elets otignûts de HDZ – al à sielzût di no sbelançâ il guvier a diestre aleantsi cul Moviment Patriotic (DPMS) di Miroslav Škoro – che i varès puartât 16 parlamentârs – ma di meti adun une coalizion moderade che si poiàs sui vôts di dôs piçulis formazions di aree liberâl (il Partît dal Popul Cravuat e i Riformiscj) e sui vôt deputâts des minorancis (serps, ongjarês, rom, talians, albanês, cecs e slovacs), che a deventin cussì decisîfs pe tignude dal guvier. Cheste situazion e varès duncje di favorî politichis plui atentis ai dirits linguistics e nazionâi di chestis comunitâts. Il Partît Democratic Indipendent Serp (SDSS), che cui siei 3 elets al devente une des fuarcis plui impuartantis di cheste coalizion, al contribuìs al guvier cuntun dai cuatri vicepresidents che al à ancje la deleghe su dirits umans e des minorancis.
Font: Balkan Insight, 23/07/20

Paîs Catalans: protocol par un model inclusîf di catalan

L’Istitût di Studis Catalans (IEC), la Academie Valenziane de Lenghe (AVL) e la Universitât des Isulis Baleârs (UIB) a àn sotscrit un protocol gjenerâl là che si metin lis fondis par une cooperazion che e puarti a disvilupâ un model normatîf de lenghe catalane che al sedi unitari ma, tal stes timp, al tegni cont lis diferencis che a son tes trê varietâts di riferiment dopradis ta chescj teritoris.
Font: Generalitat de Catalunya, 20/07/20

Galizie: tai pesant ai fonts par promovi la lenghe proprie

Un dai prins ats cjapâts dopo de rielezion di Alberto Núñez Feijóo (PP) ae vuide dal guvier de Galizie al è stât di taiâ di uns 60% une des liniis di finanziament principâls par tutelâ e valorizâ il galizian. Si trate dai fonts par promovi la lenghe tes aministrazions locâls che a son passâts dai 245 mil euros dal 2019 ai 100 mil di chest an. Par solit chescj finanziaments a jerin decidûts vie pal mês di Jugn ma, chest viaç, si à comunicât la lôr entitât juste cuatri dîs dopo des elezions dai 12 di Lui. Chest tai, ancje se cetant plui penç, al puarte indenant un procès che al jere za tacât di un pôc di timp: baste pensâ che i fonts a jerin 300 mil intal 2014 ma son stâts roseâts vie un toc par volte.
Font: Galicia Confidencial, 20/07/20

Paîs Catalans: portâl di insegnants youtubers catalans

Al à non Youtubers docents il progjet che al met adun intune plateforme digjitâl unitarie i canâi gjestîts di professôrs che a ufrissin contignûts formatîfs par catalan par mieç di Youtube. Il portâl al è organizât daûr dai diviers nivei educatîfs (di chel infantîl fintremai la universitât) e par materiis, in maniere di facilitâ la ricercje di ce che al interesse di plui. L’obietîf al è chel di dâi plui visibilitât a materiâi che za a jerin in rêt ma in forme sparniçade e di sburtâ altris insegnants a aderî al progjet e a meti a disposizion di ducj lis lôr cognossincis. La plateforme e cjape dentri professôrs che a rivin, in plui che de Catalogne, ancje dal Paîs Valenzian, des isulis Baleârs e di Andorra.
Font: Generalitat de Catalunya, 20/07/20

Gales: azion par cressi lis multis in difese dai nons par galês

Trê conseîrs che a partegnin al gnûf Partît Nazionâl Galês (Welsh National Party) a àn inviât une campagne par sburtâ il consei regjonâl dal Gwynedd a mendâ la normative che e previôt une multe di 55 sterlinis par cui che al cambie il non di une proprietât eliminant la denominazion origjinarie par galês. A front di diviers episodis là che si à vude la scancelazion de toponomastiche storiche galese, i trê aministradôrs a domandin che la multe e sedi cressude cussì tant di discoragjâ altris azions di cheste fate. Prime di partî cun cheste iniziative legjislative, i trê a vevin za inviât une petizion popolâr che e à cjatât la poie di 17 mil personis.
Font: Nation Cymru, 17/07/20

Stât spagnûl: riclam al ONU sul rispiet dai dirits umans

In ocasion de session periodiche de ONU dedicade ai dirits umans, i rapresentants di uns vincj stâts a àn domandât al ream di Spagne di rispietâ il dirit di espression e di assemblee, di riviodi il codiç penâl e la normative su la sigurece. A sburtâju ta cheste direzion a son stadis massime lis reazions des autoritâts spagnolis al procès di indipendence de Catalogne. Su chest teme e je intervignude alì dal consei pai dirits umans de ONU ancje ELEN (European Language Equality Network), la Rêt Europeane pe Avualiance Linguistiche, che e à domandât di riviodi il crimin di “sedizion” doprât par criminalizâ ativitâts pacifichis e di ats di semplice disubidience civîl e di garantî une inchieste indipendente sul ûs ecessîf de fuarce metût in at des fuarcis di polizie statâls intant dal referendum dal prin di Otubar dal 2017 e des protestis cuintri de condane dai dirigjents indipendentiscj catalans. ELEN e à po invidât lis autoritâts spagnolis a rispietâ pardabon la cjarte europeane pes lenghis regjonâls o minoritariis e a meti fin ae discriminazion sistematiche des lenghis couficiâls massime te aministrazion de justizie e tai rapuarts cu la polizie.
Font: ELEN, 16/07/20

Galizie: A Chave par valorizâ lis risorsis digjitâls par galizian

Un progjet che si propon tant che pont di incuintri de comunitât galiziane par valorizâ e par slargjâ i spazis digjitâi in lenghe proprie. Al è l’intindiment di A Chave (la clâf), un gnûf portâl che al met adun sîts, canâi informatîfs e materiâi digjitâi par galizian. La iniziative, in plui di meti al centri la lenghe, e mostre une atenzion particolâr pal ambient naturâl cu la ufierte ancje di repertoris lessicâi e materiâi dedicâts a chest teme.
Font: Galicia Confidencial, 16/07/20

Slesie: diesime cuarte marcje pe autonomie

Ai 14 di Lui si à davuelte te citât di Katowice la diesime cuarte marcje pe autonomie de Slesie, iniziative inmaneade dal partît Ruch Autonomii Ślaska, membri de Aleance Libare Europeane (EFA). Par vie des limitazions imponudis a cause de pandemie, chest an, ae manifestazion a àn podût partecipât dome 150 personis. Tai intervents che a àn sierât la iniziative si à rivendicât ancjemò une volte la autonomie di cheste regjon storiche che, pe plui part e je cjapade dentri tal stât polac, e il plen ricognossiment de sô identitât specifiche. In chest sens si à, par esempli, domandât che tal censiment uficiâl in program chest an che al ven si puedi identificâsi come slesians.
Font: EFA, 15/07/20

Paîs Catalans: 68% des app dai supermarcjâts par catalan

Inte suaze dal progjet Emmarca’t Supermercats dal guvier catalan al è jessût ancje un studi su la presince de lenghe proprie tai 42 grups di distribuzion comerciâl plui impuartants che a operin sul teritori. Il 46,2% di chestis cjadenis e ufrìs la pussibilitât di comprâ in linie: tal 68,4% dai câs il catalan al è presint ad in plen come opzion linguistiche, intant che intun altri 10,5% dai câs si lu cjate dome in forme parziâl. Se si cjale invezit ai sîts internet di chescj grups comerciâi, il catalan al è disponibil come lenghe di navigazion tal 71,1% dai câs (che al va sù al 73,7% se si calcole ancje chei che a àn dome cualchi contignût inta cheste lenghe). Il 52,4% des cjadenis e à une aplicazion par telefonie mobile: tal 63,6% dai câs e je disponibile in forme integrâl par catalan e tal 4,5% in forme parziâl.
Font: Generalitat de Catalunya, 14/07/20

20/07/20

Paîs Basc: te CAB al cres EH Bildu ma il PNV al reste prin

Tes elezions par rignuvî il Parlament de Comunitât Autonome Basche, che si son tignudis ai 12 di Lui cuntune partecipazion dal 52,86% dai citadins, EAJ-PNV al è stât il partît plui votât cul 39,12% dai consens e 31 elets, trê in plui des elezions dal 2016. Il salt indenant plui grues lu à fat però la çampe indipendentiste basche (EH Bildu) che e je passade di 18 a 22 deputâts cuntun consens dal 27,84%. In tierce posizion si son plaçâts i socialiscj (PSE-EE) cul 13,64% dai vôts e 10 elets, un in plui de volte stade. Al à pierdût teren Elkarrekin-Podemos che si à fermât a pôc plui dal 8% dai consens, pierdint 5 dai 11 parlamentârs che al veve. Daûr, cul 6,75% dai vôts e 5 elets (3 in mancul de volte stade), e je rivade la coalizion de diestre spagnoliste formade di PP e C's. Cundut che nol à cjapât nancje il 2% dai vôts, Vox al à otignût un deputât e al è jentrât pe prime volte tal Parlament de CAB. Su la cjarte a son trê lis coalizions di guvier pussibilis, une di stamp nazionâl cun EAJ-PNV e EH Bildu, une di stamp progressist cun EH Bildu, Elkarrekin-Podemos e PSE-EE e une riedizion de aleance tra EAJ-PNV e socialiscj. Viodudis lis posizions manifestadis ancje intant de campagne eletorâl e je propite cheste ultime opzion la plui probabile.
Font: Naiz:, 13/07/20; El País, 13/07/20

Galizie: PP al guvier ma il BNG al tripliche i consens

Alberto Núñez Feijóo al è stât confermât pe cuarte volte ae vuide de Galizie intes elezions che si son tignudis ai 12 di Lui cuntune partecipazion dai citadins di cuasi il 59%. Il PP si manten duncje salt al guvier di cheste Comunitât autonome e al conferme i 41 elets che al veve otignût ancje tal 2016 e che i dan la maiorance assolude in Parlament. Ce che al salte plui al voli ta chestis elezions al è però il risultât dal BNG. Cun di fat, il partît nazionalitari galizian al à cjapât cuasi il 24% dai vôts e al à triplicât i siei rapresentants in Parlament che di 6 a son passâts a 19. Un altri dât di pês al è chel rapresentât dal sfantâsi di Galicia en Común – la aleance galiziane là che al jere cjapât dentri Podemos – che no à nancje rivât a jentrâ in Parlament cuant che tal 2016 (cul non di En Marea) e veve vût 14 elets. A completâ il cuadri dai parlamentârs si àn i 15 elets socialiscj (PSdeG), un in plui de volte stade.
Font: El Correo Gallego, 13/07/20; El País, 13/07/20

Bretagne: dibatiment su la riunificazion in consei regjonâl

Ai 10 di Lui il consei regjonâl de Bretagne si è dât adun par cjapâ in esam il rapuart su la riunificazion de Loire Atlantiche metût adun di une comission vuidade dal vicepresident de assemblee, Jean-Michel Le Boulanger (PS), e de conseire di oposizion Isabelle Le Bal (MoDem). Cundut che al è un toc de Bretagne storiche, di uns setante agns incà il dipartiment de Loire Atlantiche al fâs part di une regjon aministrative diferente e ducj i tentatîfs di riunion a son stâts blocâts des autoritâts statâls. Il document presentât in consei al propon tredis azions di podê meti in cjamp za di cumò cence mudaments legjislatîfs, cinc a àn une nature simboliche (meti adun ducj i cinc dipartiments de Bretagne storiche tes rapresentazions cartografichis, te tabelonistiche, tai studis statistics e ta chei pai progjets di disvilup, definî une ipotesi di cuadri finanziari comun), altris cinc a tocjin il cjamp economic e promozionâl (contribuî a finanziâ lis associazions culturâls e pe lenghe che a operin te Loire Atlantiche, sburtâ l’ûs de marcje “Bretagne” e infuartî la poie aes realtâts che a operin ancje ta chel dipartiment, favorî la promozion turistiche e il disvilup di infrastruturis unitariis), altris dôs a àn une dimension istituzionâl (rilançâ la comission miste Regjon Bretagne – Loire Atlantiche, invidâ ancje i rapresentants dal dipartiment ai apontaments culturâi e istituzionâi “bretons”) e, in fin, davuelzi un referendum là che a sedin i citadins de Loire Atlantiche a disi se a son a pro o cuintri de riunificazion.
Font: Agence Bretagne Presse, 10/07/20; Le Telegramme, 10/07/20

Lituanie: bandidis lis emissions de television russe RT

La comission pai mieçs di comunicazion dal guvier lituan e à decidût di improibî sul teritori statâl lis emissions dal grup RT, rêt televisive controlade de Federazion Russe. La sô programazion e jere cjalade soredut de comunitât russe che e rapresente la minorance principâl dal paîs baltic. La motivazion uficiâl par metile al bant e diven di une segnalazion dai servizis lituans che le lein a di un oligarche rus iscrit te liste nere de Union Europeane. Intai fats, si le calcole un imprest centrâl pe propagande dal Cremlin in Europe, massime framieç de diaspore russe e des minorancis russofonis che a vivin in diviers stâts europeans.
Font: Euronews, 09/07/20

Ucraine: la gnove leç linguistiche al esam de cort costituzionâl

La cort costituzionâl de Ucraine e je daûr a esaminâ la leç linguistiche fate buine l’an passât che e impon l’ûs dal ucrain inte plui part de vite publiche. La normative e previôt che i citadins a vedin di doprâ la lenghe statâl intes ativitâts politichis e aministrativis e cuant che a àn a ce fâ cun magjistrâts, operadôrs sanitaris, militârs, professôrs e personâl scolastic, funzionaris di bancjis e di societâts controladis dal stât. La leç e previôt po che almancul il 90% dai programs televisîfs al sedi par ucrain. Il proviodiment al è stât impugnât di un grup di rapresentants de comunitât russofone che si cjate a jessi la plui colpide des novitâts puartadis di cheste leç. Si à di fat di calcolâ che il 15,8% de popolazion de Ucraine al fevele dome par rus, il 12,3% al dopre cuasi simpri il rus e il 24,9% al dopre te stesse misure rus e ucrain. Intant dai lavôrs de cort un trop di politics e militants nazionaliscj al à inmaneât une proteste denant dal tribunâl par difindi la leç di chê che e ven calcolade une manovre de Russie par destabilizâ il paîs. Al è di dî che cuintri de leç a vevin cjapât posizion ancje i rapresentants di altris comunitâts minorizadis – tant che ongjarês e rumens –, i esperts dal Consei de Europe e l’alt comissariât de ONU pai dirits umans.
Font: RFE RL, 09/07/20

Gales: operadôrs de scuele cuintri de leç sul curriculum

La gnove leç sul curriculum scolastic e je rivade al esam de Assemblee Nazionâl dal Gales framieç des critichis. Il test al previôt che inglês e galês a sedin ducj i doi curicolârs ma al permet aes direzions dai istitûts di meti l’inglês obligatori za prime dai siet agns menaçant cussì ancje lis scuelis a imersion. Aes protestis de organizazion pe lenghe Cymdeithas yr Iaith e dal partît nazionalitari Plaid Cymru cumò si à zontade ancje la letare vierte là che passe cuatricent tra insegnants, dirigjents scolastics e operadôrs de scuele a domandin ae ministre pe educazion Kirsty Williams di gjavâ de leç i articui che a infuartissin inmò di plui la posizion dal inglês sul galês.
Font: Nation Cymru, 08/07/20

Cravuazie: cul cressi de diestre serps plui debui

Tes elezions politichis cravuatis dai 5 di Lui, la Union Democratiche Cravuate (HDZ) e à infuartît la sô posizion cun passe il 37% des preferencis e 66 elets, cinc in plui di chei otignûts intal 2016. Chel istès la formazion di centri diestre no à avonde parlamentârs par guviernâ di bessole. Il so president, Andrej Plenković, al varà duncje di cirî dai aleâts par formâ un guvier di coalizion. Par tirâ dongje i dîs deputâts che i mancjin par otignî la maiorance in Parlament la soluzion plui pratiche e sarès chê di une aleance cul gnûf Moviment Patriotic (DPMS) vuidât di Miroslav Škoro – che al à concuistât cuasi l’11% dai consens e 16 parlamentârs – che e puartarès però inmò plui a diestre il baricentri dal guvier. Plui dificil un acuardi cu la liste Most (il puint) – ancje chê di diestre – che, in plui di no vê funzionât inte legjislature stade, i puartarès dome 8 deputâts (rispiet ai 13 des elezions dal 2016). E à pierdût cetant teren invezit la coalizion de centri çampe vuidade dal Partît Sociâl Democratic (SDP) che e je colade di 54 a 41 parlamentârs. Sul front progressist si à invezit di segnalâ il risultât dal gnûf moviment ecologjist Možemo! che aes sôs primis politichis al à sfiliât il 7% dai vôts e otignût 7 deputâts. I risultâts eletorâi no ufrissin masse pês ai 8 deputâts des minorancis: 3 pal Partît Democratic Indipendent Serp (SDSS) e un parom pe Union Democratiche dai Ongjarês di Cravuazie (HMDK) e pai rapresentants di rom, talians, albanês e cecoslovacs. Al è po di dî che, tal câs di aleance tra HDZ e Moviment Patriotic, al è dificil di previodi un miorament dai rapuarts cu lis comunitâts minorizadis e massime cun chê serbe.
Font: Euronews, 07/07/20

Paîs Catalans: il program di VxL al sfilie lis 150 mil cubiis

Al va dilunc a cressi il program di volontariât pe lenghe (VxL) sburtât de direzion gjenerâl di politiche linguistiche de Catalogne e gjestît dal Consorzi pe normalizazion linguistiche. La iniziative e à chê di judâ a fevelâ par catalan cul cubiâ personis che a àn une cognossince limitade de lenghe, e a àn duncje bisugne di fâ pratiche, cun volontaris che invezit a àn une buine competence linguistiche e lis judin a doprâ in maniere corete il catalan. Dal 2003 – cuant che il program al è scomençât – al Dicembar dal 2019, a son nassudis plui di 144 mil cubiis linguistichis. Se si calcolin ancje i prins sîs mês dal 2020, la cifre e passe lis 147 mil. Tal 2019, pe prime volte, il numar di cubiis nassudis al à passât lis 11 mil intun an sôl. Come par solit la partecipazion feminine e je une vore alte e, tal 2019, lis feminis a àn rapresentât il 72,6% dai iscrits gnûfs. A cressi e je ancje la modalitât virtuâl dal program, nassude tal 2017, che si poie su videoconferencis e che fin cumò e à puartât ae nassite di cuasi un miâr di cubiis intune trentine di stâts ator pal mont.
Font: Generalitat de Catalunya, 07/07/20

Irlande: a coventin plui docents pes scuelis a imersion dal Nord

Sul prin tacâ di Lui al è stât presentât al consei dai ministris britanic il rapuart dal comitât di esperts dal Consei de Europe su la Cjarte europeane des lenghis regjonâls o minoritariis cun riferiment ae situazion de Irlande dal Nord. Il prin element marcât dal document al è che la politicizazion dal gaelic irlandês e va dilunc a pesâ sui ûs publics e su la promozion di cheste lenghe. Sul plan specific de educazion, a front di une incressite progressive dai fruts iscrits aes scuelis a imersion, e aumente ancje la dibisugne di insegnants e di struturis scolastichis. L’invît dai esperts al è duncje di cressi il numar di scuelis publichis a imersion e di infuartî il sisteme di formazion par preparâ professôrs in stât di insegnâ lis lôr materiis par irlandês. Une altre dibisugne sintude e je di aumentâ la programazion radiotelevisive par gaelic dentri de emitente publiche BBC.
Font: BBC, 04/07/20

Irlande: a Martin e Calleary la responsabilitât sul Gaeltacht

Al è un ciert marum framieç des comunitâts dal Gaeltacht – o sei lis areis là che l’irlandês al è ancjemò doprât in maniere significative – e des organizazions impegnadis pe lenghe pal puest scjars che chestis tematichis a àn vût inte formazion dal gnûf guvier irlandês. A Catherine Martin, segretarie vicjarie dai Verts, i è stât assegnât un ministeri che al cjape dentri mieçs di comunicazion, turisim, art e culture, sport e Gaeltacht, intant che a Dara Calleary (Fianna Fáil) i è stât afidât un sotsegretariât cun deleghis su Gaeltacht, lenghe irlandese e sport. A jessi contestâts no son lis personis – dal moment che si trate di doi deputâts che a fevelin benon par gaelic e a àn une posizion ative pe lenghe – ma il fat che ancjemò une volte il teme de lenghe e des comunitâts gaelichis nol è stât calcolât avonde rilevant di meretâsi un ministeri specific. Al contrari chestis competencis a son stadis metudis intun ministeri che al à di viodi za di cetantis deleghis, sfruçonadis po ancje tun sotsegretariât.
Font: Irish Times, 02/07/20; The Independent, 08/07/20

Asturiis: plene citadinance al asturian intal Parlament

Cun 27 vôts a pro (PSOE, Podemos, IU e Foro), 13 cuintri e 5 astignûts, il prin di Lui il Parlament des Asturiis al à mendât il regolament de Assemblee par permeti ai deputâts, ai membris dai guvier locâl, ai funzionaris e aes personis che a vessin di intervignî intant dai lavôrs parlamentârs di fevelâ par asturian. In realtât, i deputâts a vevin za la pussibilitât di doprâ la lenghe proprie ma il test dal regolament al veve dai element di ambiguitât doprâts par contestâ chest dirit. La mende fate buine de Assemblee e gjave ogni spazi di dubi e e slargje chest dirit a ducj chei che a intervegnin in Parlament. La modifiche e à cjatât la oposizion dai partîts de diestre spagnoliste e in particolâr di Vox.
Font: Público, 01/07/20

Stât francês: comunâls positivis par nazionalitaris e regjonaliscj

La Federazion des Regjons e dai Popui Solidaris (RPS) e la Aleance Libare Europeane (EFA) a àn manifestât dute la lôr sodisfazion pai risultâts otignûts dai moviments nazionalitaris e regjonaliscj intes elezions aministrativis francesis che il secont turni si è tignût sul finî di Jugn. I sucès principâi a rivin de Corsiche là che i candidâts nazionalitaris a àn concuistât diviersis aministrazions locâls disledrosant ecuilibris politics che a duravin di agnorums, come tal câs di Portivechju / Porto-Vecchio (cu la elezion a sindic di Jean-Christophe Angelini, segretari dal Partitu di a Nazione Corsa) o di Biguglia, in plui di confermâsi ae vuide de citât di Bastia. Lis listis sostignudis di Euskal Herria Bai a àn invezit concuistât diviers comuns dal Paîs Basc setentrionâl tant che Uztaritze / Ustaritz , Urruña / Urrugne e Ziburu / Ciboure, intant che in plui di cualchi aministrazion locâl de Catalogne dal Nord si à vût la vitorie dal moviment Oui au Pays Catalan. La Union Démocratique Bretonne e à vût cetancj elets, une part di lôr e fâs part des aleancis ecologjistis e progressistis che a guviernaran i centris principâi de Bretagne, di Naoned / Nantes e Roazhon / Rennes, di Brest a Sant-Brieg / Saint-Brieuc. Risultâts impuartants a son rivâts ancje pal Partit Occitan, pal Mouvement Région Savoie e par Unser Land. Al è di dî che i moviments nazionalitaris e regjonaliscj a àn contribuît ancje al sucès dai ecologjiscj in diviersis grandis citâts tant che Bordèu / Bordeaux, Liyon / Lyon, Marsilie e Strasburc.
Font: Regions et Peuples Solidaires, 30/06/20; EFA, 01/07/20

Albanie: leç di tutele des minorancis al esam dal Parlament

E je rivade al esam de comission parlamentâr competente la gnove propueste di leç di tutele des minorancis linguistichis metude adun dal ministeri dal interni de Albanie. Il test, che al varès di jessi fat bon in vie definitive prime de fin dal an, al previôt pai membris des minorancis ricognossudis il dirit di doprâ la lenghe proprie tes aministrazions locâls là che chestis comunitâts a rapresentin almancul il 20% dai residents. Ta chestis areis il bilinguisim al sarà in vore ancje pe toponomastiche locâl, pe segnaletiche stradâl e pai nons des viis. Tra lis comunitâts minorizadis principâls ricognossudis des autoritâts albanesis o vin grêcs, montenegrins e arumens.
Font: Albania News, 23/06/20

04/07/20

Ocitanie: il 90% dai citadins al domande politichis pal ocitan

L’Ufici Public de Lenghe Ocitane (ÒPLO) al à presentât i risultâts di une inchieste sociolinguistiche che e à cjapât dentri i teritoris di lenghe ocitane des regjons aministrativis de Gnove Aquitanie e de Ocitanie, tal stât francês, e de Val di Aran, intal stât spagnûl. I dâts miôr a rivin propit di cheste valade pirenaiche dulà che za di agns a son in vore politichis di tutele e di promozion de lenghe proprie. Cun di fat, te aree aranese, l’86% de popolazion al capìs l’ocitan, il 63% lu lei, il 61% lu fevele e il 39% al è bon di scrivilu. Tes dôs regjons dal stât francês a pene l’1% des personis al sa scrivi par ocitan, il 6% al è in stât di fevelâlu e il 8% di leilu. Divierse invezit la comprension de lenghe che e je dal 28% in Gnove Aquitanie e dal 40% in Ocitanie. La inchieste e va però plui innà dai ûs linguistics. Par esempli, si ven a savê che il 90% e passe dai intervistâts si declarin a pro di politichis par valorizâ la lenghe proprie. Par chel che al rivuarde l’insegnament a scuele, se l’81% dal campion al è dacuardi, dome il 41% al pense che la lenghe e vedi di jessi doprade de scuele de infanzie ae universitât, intant che un 12% al pense che e vedi di fermâsi al cicli superiôr e un 28% aes primariis.
Font: Jornalet, 25/06/20

Galizie: propueste par normalizâ il galizian te istruzion

Ai 23 di Jugn la organizazion A Mesa pola Normalización Lingüistica, intune cun diviers coletîfs atîfs intal cjamp de scuele (CIG-Ensino, Anpas Galegas, AS-PG, CSIF, Nova escola Galega, STEG), e à fat indenant une propueste che si propon di sburtâ la lenghe galiziane intal sisteme educatîf. L’implant si fonde su doi modei scolastics di meti in vore a seconde dai diviers nivei educatîfs e de situazion sociolinguistiche dai teritoris. Si tache di un model che al partissi cul 50% des materiis insegnadis par galizian par incressi in maniere progressive cheste percentuâl. Chest sisteme al ven proponût pes scuelis de infanzie e pes primariis. Un tant cul fin di preparâ i students a frontâ une educazion secondarie là che il galizian al sarès doprât pe plui part des materiis. Daûr de propueste, il galizian al varès di jessi la lenghe di ûs tant pe comunicazion interne che par chê esterne des scuelis e, par chest, si previôt un plan di formazion specific pe comunitât educative. Si propon po che tai concors pai insegnants a sedin previodudis des provis obligatoriis par galizian.
Font: Galicia Confidencial, 23/06/20

Paîs Basc: in vore la gnove ordenance sul euskara a Iruñea

Ai 22 di Jugn e je jentrade in vore la gnove ordenance comunâl che e regole l’ûs de lenghe basche te aministrazion publiche di Iruñea / Pamplona. La norme e fisse un bilinguisim asimetric che al penalize in maniere fuarte l’euskara. Par esempli, i citadins a van dilunc a podê indreçâsi ai uficis comunâi ancje par basc, ma no si ur garantìs une rispueste te stesse lenghe. Rispiet ae normative precedente, la presince dal euskara te publicitât comunâl si sbasse dal 100 al 25%. Intai concors pal personâl dal comun, si gjavin i puescj là che si domandave la cognossince de lenghe basche che e ven calcolade juste come un merit in plui e dome par ciertis posizions.
Font: Navarra Información, 22/06/20

Paîs Catalans: limits al ûs dal catalan, proteste a València

Ai 22 di Jugn la Intersindical Valenciana e à inmaneât un at di proteste denant dal tribunâl superiôr di justizie de Comunitât Valenziane par manifestâ cuintri de sentence che va a anulâ 14 dai articui de gnove leç sui ûs linguistics inte aministrazion publiche. Tra i articui scancelâts si à ancje chel che al previôt l’ûs dal catalan intes relazions istituzionâls tra la Comunitât Valenziane, chê de Catalogne e chê des Baleârs, cundut che a son dutis trê tieris di lenghe catalane. Pe Intersindical la sentence no dome e met sot atac l’autoguvier e lis competencis dal esecutîf valenzian ma e va fintremai cuintri de jurisprudence definide di altris sentencis dal tribunâl suprem e di chel costituzionâl. Ae proteste a àn aderît ancje la Plataforma per la Llengua, Decidim e Esquerra Republicana del País Valencià.
Font: La Vanguardia, 22/06/20

Aragon: la Chunta e domande emissions par aragonês

Il moviment nazionalitari Chunta Aragonesista (ChA) al à domandât ae aministradore uniche de radiotelevision publiche spagnole RTVE, Rosa María Mateo, di mantignî l’impegn che si veve cjapât di rispietâ dutis lis lenghis dal stât e di garantî contignûts par aragonês intes trasmissions de sede locâl de emitente statâl. La Mateo e à ricuardât che tai ultins agns lis trasmissions dal centri teritoriâl de RTVE in Aragon a àn vût avonde atenzion ae lenghe proprie ma e à ricognossût che no si le à mai doprade in maniere veicolâr intai programs.
Font: La Vanguardia, 21/06/20

Stât francês: gnûf apel cuintri de “riforme” Blanquer

La riforme dal sisteme scolastic superiôr e il cussì clamât “plan des lenghis” volûts dal ministri francês pe educazion, Jean-Michel Blanquer, a varan consecuencis dramatichis su lis filieris bilengâls e sui spazis za limitâts di insegnament des lenghis minorizadis. A denunciâlu, za di timp, a son dutis lis organizazions e lis realtâts che a operin par chestis lenghis dentri dal stât francês. Cussì cemût che e je, a ricuardin, la riforme e va fintremai cuintri di chei nivei di tutele de diversitât linguistiche e culturâl ricognossûts de Costituzion francese, dal codiç de educazion e des convenzions internazionâls. Dut câs, fin cumò, lis manifestazions di place, i confronts cui uficis ministeriâi e lis letaris inviadis al ministri no àn vût nissun efiet. Ai 13 di Fevrâr, il ministri al à fintremai otignût che in Parlament si boçassin ducj i emendaments che a pontavin a tutelâ lis lenghis minorizadis. Cumò, duncje, il coletîf Pour que vivent nos langues – che al met adun uns 35 organizazions alsazianis, arpitanis, baschis, bretonis, catalanis, corsis, flamandis e ocitanis ativis inte promozion des lenghis propriis – al à scrit un apel diret al president de Republiche francese par che al intervegni. L’apel al è stât sotscrit ancje di un centenâr tra europarlamentârs, senatôrs e deputâts elets intal stât francês. I autôrs de iniziative a àn po fat savê che, cul slizerîsi des misuris limitativis in cjamp par frontâ la emergjence sanitarie, a tornaran ancje a inmaneâ azions di place par fâi cuintri ae riforme.
Font: Pour que vivent nos langues, 18/06/20

Paîs Catalans: bant par sburtâ il catalan tes mostris dal cine

Cun chê di incressi i contignûts audiovisîfs sottitulâts par catalan intai festivals e tes mostris di cine che si davuelzin ator pe Catalogne, la direzion gjenerâl di politiche linguistiche dal guvier catalan e à ativât une gnove linie contributive specifiche indreçade ai organizadôrs di chestis iniziativis. La disponibilitât economiche e je di 140 mil euros e cui 23 di Jugn si à vierzût la pussibilitât di presentâ domande. Cheste azion si zonte al bant di un milion e 700 mil euros za in vore pes societâts di dopleadure e par chês di distribuzion par aumentâ la ufierte di contignûts audiovisîfs dopleâts o sottitulâts par catalan. A cjaval jenfri Jugn e Lui a son fûr ancje i bants par promovi la cognossince e l’ûs dal ocitan aranês (70 mil euros) e de lenghe dai segns catalane (45 mil euros).
Font: Generalitat de Catalunya, 18/06/20

Paîs Basc: gnûf tradutôr neuronâl juridic aministratîf

Dopo che, sul finî dal 2019, il guvier de Comunitât Autonome Basche al à metût fûr il tradutôr automatic neuronâl Itzuli, cumò l’Istitût Basc di Aministrazion Publiche (IVAP-EJGV) al à disvilupât une version di chest imprest specializade in lengaç juridic e aministratîf. Par fâlu a son stâts zontâts ae base di dâts uns dîs milions di tocs voltâts intai ultins vincj agns dal ufici di traduzion dal istitût. Dopo di un prin periodi di prove, il tradutôr al è cumò a disposizion par dutis lis istituzions che a son interessadis a doprâlu. Come ducj i tradutôrs, si trate di un imprest che al da une man ma nol pues sostituî il lavôr dal om e i tescj che al prodûs a àn simpri di jessi revisionâts di une persone cu la juste competence linguistiche.
Font: Eusko Jaurlaritza, 17/06/20

Paîs Catalans: tal InformeCAT lis emergjencis linguistichis

Ai 17 di Jugn la organizazion Plataforma per la llengua e à presentât l’InformeCAT 2020, il rapuart anuâl che al met adun i cincuante dâts plui significatîfs par presentâ il stât di salût de lenghe catalane. Cundut che no mancjin i elements positîfs, il document al marche massime dôs emergjencis linguistichis. La prime si riferìs al ûs sociâl bas de lenghe intes grandis citâts dai Paîs Catalans: te aree metropolitane di Barcelone dome il 35% de popolazion al fevele cun continuitât par catalan e ta chê di València a fâlu al è il 34,8% (percentuâl che e cole al 15% se o calcolìn dome la citât). La seconde si riferìs aes politichis publichis che a mostrin la mancjance di coordenament tra lis diviersis comunitâts di lenghe catalane ma soredut une azion discriminatorie de bande des istituzions statâls. A dimostrâlu a son lis 134 normis fatis buinis vie pal 2019 là che si discriminin lis lenghis couficiâls a vantaç dal castilian, o la incressite dal 85,7% jenfri 2018 e 2019 des denunciis par discriminazion linguistiche de bande des fuarcis di polizie, o ancje l’aument dal 15% tra 2017 e 2019 des pagjinis istituzionâls dal guvier spagnûl che a tratin catalan e valenzian come lenghis diviersis. Il rapuart al palese ancje une cierte disinformazion framieç de popolazion sui siei dirits linguistics che e favorìs duncje un ûs sociâl plui bas de lenghe catalane.
Font: PFPLL, 17/06/20

Sápmi: prins pas in Svezie pe comission su la veretât

«Un pas storic intal percors par dâi visibilitât aes violazions e ai abûs che i sami a àn patît dilunc vie de storie e che si cognòs ancjemò masse pôc.» A son lis peraulis de ministre svedese pe culture, Amanda Lind, tal compagnâ il finanziament che il guvier al à assegnât al Parlament Sami par imbastî l’implant di lavôr de comission pe veretât e pe riconciliazion clamade a fâ cognossi lis violencis patidis des comunitâts sami e a disvilupâ percors par superâ lis feridis che si son lassadis daûr. La Assemblee sami e varès di finî il so compit dentri dal Març di chest an che al ven e, dome in chê volte, la comission e podarà dâsi dongje e tacâ a lavorâ. La popolazion sami – stimade tra lis 100 e lis 150 mil personis – e je dividude des frontieris statâls tra Norvegje, Svezie, Finlande e Federazion Russe e cheste e je za une des problematichis che a pesin su cheste comunitât che vie pai secui si à cjatade espropriade des sôs tieris, in cualchi câs fintremai depuartade, e vitime di politichis e compuartaments di stamp razist, come il slontanament sfuarçât dai fîs par tirâju sù cuntune lenghe e cun costums diviers di chei des lôr fameis.
Font: The Barents Observer, 17/06/20