Cul mês di Setembar a partissin lis primis dôs classis imersivis in lenghe corse metudis sù de associazion Scola Corsa. Une e cjate acet alì de scuele Simone-Peretti di Biguglia e chê altre te scuele primarie di Toga, a Bastia. L’intindiment dai ideadôrs dal progjet al jere chel di jentrâ tal sisteme des scuelis laichis parificadis che al gjolt dai finanziaments ministeriâi par paiâ i insegnants. Magari cussì no, la posizion manifestade di resint de cort costituzionâl francese sul insegnament imersîf e menace ancje i istitûts parificâts che a doprin chest sisteme. Cumò, duncje, la prioritât e je chê di garantî la cuvierzidure economiche al progjet. La stime dal cost pal prin an di ativitât e je sui 50 mil euros. Tes ultimis setemanis, in gracie di associazions culturâls, aministrazions locâls e impresis a son stâts tirâts sù 35 mil euros. Se si vûl procedi cu la iniziative, lis prossimis setemanis a deventin decisivis par Scola Corsa par rivâ a tirâ dongje ancje lis risorsis che a mancjin.
Il blog di Internazionalitari al nas di une trasmission di Radio Onde Furlane e al fevele, cuntun tai nazionalitari, des nazions cence stât e des minorancis nazionâls de Europe.
02/09/21
Corsiche: a mancjin risorsis par garantî lis classis a imersion
Paîs Basc: euskara e castilian lenghis propriis dal Osasuna
“Lis lenghis dal Club Atlético Osasuna a son il castilian e l’euskara e, duncje, a saran dopradis dutis e dôs in maniere normâl par dutis lis sôs ativitâts”. Cussì si vierç l’articul dal statût gnûf de societât di balon di Iruñea / Pamplona dedicât al bilinguisim che di cumò indenant al varà di caraterizâ lis ativitâts dal Osasuna e che al previôt ancje percors di formazion par judâ il personâl de societât e i siei zuiadôrs a imparâ la lenghe basche. La revision dal statût e à za superât i controi legâi e si insuaze tun progjet di valorizazion progressive dal euskara che si veve inviât cualchi an indaûr.