Cravuazie: inmò menacis cuintri de comunitât serbe

A van dilunc in Cravuazie i atacs e i ats di menace cuintri de minorance serbe e dai siei rapresentants. In diviersis citâts cravuatis di fat a son stâts sbregâts vie i manifescj metûts fûr dal Partît Indipendent Democratic Serp (SDSS) pes elezions europeanis dai 26 di Mai intant che a Split nazionaliscj cravuats a àn jemplât i manifescj cun scritis di menace e cun sprocs ustaša (moviment fassist responsabil dal sassinament di plui di 80 mil tra serps, rom, ebreus e antifassiscj intant de seconde vuere mondiâl). Milorad Pupovač, referent dal Partît Indipendent Democratic Serp, al à invidât i siei conazionâi a no fâsi spaurî e a rispuindi a chestis menacis cuntune fuarte partecipazion al vôt. Intes elezions europeanis la comunitât serbe de Cravuazie e je rapresentade ancje di un secont moviment politic, o sei la Aleance Democratiche dai Serps. Chê serbe, cun passe 180 mil membris, e je la plui grande minorance nazionâl presinte in Cravuazie. Te stesse zornade des elezions pal Parlament european, in Cravuazie si vote ancje par rignuvî i Conseis des minorancis nazionâls che a rapresentin i interès des cutuardis comunitâts ricognossudis. Ta chestis elezions i iscrits a votâ a son in dut 255 mil.

Font: Balkan Insight, 03/05/19

Paîs Catalans: ICE pal rispiet dai dirits intal stât spagnûl

Ai 2 di Mai, intune conference stampe che si à tignude a Bruxelles, la Assemblea Nacional Catalana e il Consell per la República a àn presentât une gnove azion par internazionalizâ il conflit politic jenfri Catalogne e stât spagnûl. Si trate di une iniziative citadine europeane (ICE) che si propon di impegnâ lis istituzions comunitariis a meti in vore cuintri dal ream di Spagne lis sanzions pai stâts membris responsabii di violazions dal tratât di Lisbone e, in particolâr, dal articul 2 che al previôt il rispiet de dignitât umane, de libertât, de democrazie, dai dirits umans e di chei des minorancis. La iniziative – a àn dite i proponents – no vûl punî i citadins spagnûi ma judâju a infuartî lis lôr istituzions in sens democratic. La vicende catalane e à di fat metût in evidence violazions gjeneralizadis dai dirits politics dai citadins e des minorancis e e à palesât la politicizazion des istituzions judiziariis. La ICE e previôt un an di timp par cjapâ sù un milion di firmis ator pe Europe par obleâ la Comission Europeane a intervignî sul teme. Ae conference stampe di presentazion de iniziative a àn partecipât ancje il president Carles Puigdemont e altris membris dal guvier catalan in esili.

Font: ANC, 02/05/19

Finlande: ferovie artiche, il Consei de Laponie al sbelee i Sami

Ai 29 di Avrîl il Consei regjonâl de Laponie, in Finlande, al à decidût di fâ buine une variante al plan regoladôr teritoriâl par cjapâ dentri ancje la prevision dai spazis che a coventin pal passaç di une ferovie che e ledi de citât di Rovaniemi, in Finlande, a chê di Kirkenes, in Norvegje. Di une gnove linie artiche che e pei la rêt feroviarie atuâl cul Mâr di Barents si fevele za di agns ma par cumò no si à ancjemò nissun progjet e i stes esperts dal ministeri pai traspuarts finlandês a stimin che in dì di vuê no sedin risorsis par inviâ une opare di cheste fate. La idee de ferovie artiche e jere stade contestade fin dal principi dal Parlament Sami de Finlande, dal Consei Sami (organizazion no governative che e promôf i dirits e i interès di cheste comunitât) e des associazions dai arlevadôrs di renis dal moment che la linie e larès a taiâ areis di passon e trois migratoris fondamentâi par chescj animâi, dant un colp une vore dûr sei ae economie tradizionâl che ae culture des popolazions locâls. Il Consei regjonâl de Laponie (che, cundut che al aministre une regjon che e fâs part des tieris storichis dai sami, al ufrìs une rapresentance margjinâl a cheste comunitât) nol à tignût in nissun cont lis resons de comunitât native e, prime di cjapâ la sô decision, no si à nancje confrontât cui rapresentants sami. Pai aministradôrs regjonâi, di fat, i sami no gjoldin di nissun dirit di veto su lis sieltis di planificazion dal teritori e no je nissune leç che ju oblei a discuti cun lôr di chestis decisions.

Font: The Barents Observer, 30/04/19

Stât spagnûl: politichis, sucès dai partîts catalans e bascs

Lis elezions politichis che si son tignudis ai 28 di Avrîl intal ream di Spagne a àn assegnât la maiorance relative al PSOE che cun cuasi il 29% dai consens al à otignût 123 dai 350 puescj disponibii tal Parlament di Madrid. Tes elezions dal 2016 al veve vût dome 85 elets. Il cressi dai socialiscj al à un spieli te colade dai popolârs (PP) che a son passâts di 137 a 66 deputâts. Te aree a diestre dal cuadri politic spagnûl si à vude di fat une redistribuzion dai vôts che e à premiât Ciudadanos (Cs) cun 57 elets (a ‘nt vevin 32) e i neofassiscj di Vox che a jentrin in Parlament pe prime volte cun 24 deputâts. A çampe invezit i socialiscj a àn recuperât pês a dam di Unidos Podemos lâts jù di 71 a 42 elets. Chestis elezions a àn segnât però ancje il miôr risultât di simpri tes politichis dai partîts sovraniscj catalans e bascs.

Paîs Catalans: indenant cu la pratiche linguistiche tes buteghis

Chest an a son sù par jù 4 mil lis ativitâts economichis de Catalogne che a àn aderît al program di pratiche linguistiche metût adun dal Consorzi pe Normalizazion Linguistiche (CPNL). La pratiche linguistiche e je une ativitât indreçade a cui che al partecipe al program di volontariât pe lenghe e ai students dai cors par adults e si propon di judâ a svilupâ lis competencis orâls par catalan e a incressi la confidence tes propriis capacitâts. Dilunc vie dal 2018 a son stâts 6.421 i students e i volontaris che a àn fat pratiche linguistiche cun chest sisteme. Lis buteghis e lis ativitâts comerciâls di prossimitât a son lis miôr par fâ pratiche. La maiorance des ativitâts economichis si son mostradis sodisfatis di vê aderît al program.

Font: Generalitat de Catalunya, 26/04/19

Paîs Catalans: “Apparella’t” al rive ancje tal Alguer

Ai 27 di Avrîl e je disbarcjade ancje tal Alguer la aplicazion “Apparella’t” metude adun de organizazion Plataforma per la Llengua cun chê di facilitâ lis conversazions par catalan e la formazion di cubiis linguistichis sul model dai volontaris pe lenghe operatîfs za di agns in Catalogne. Si trate duncje di un imprest pensât par infuartî l’ûs sociâl de lenghe e che, in gracie di un sisteme di gjeolocalizazion e di criteris specifics di selezion, al jude a cjatâ la persone miôr par podê esercitâsi a fevelâ par catalan. Dopo di jessi stade presentade ator pai Paîs Catalans la aplicazion e je stade presentade ancje te uniche localitât sarde là che si fevele ancjemò par catalan.

Font: PFPLL, 26/04/19

Bretagne: un sît e une app pe economie par breton

La associazion Mignoned ar Brezhoneg e je daûr a svilupâ un portâl e une aplicazion par fâ cognossi lis ativitâts economichis e i professioniscj che a doprin la lenghe bretone. La iniziative e à un intindiment dopli, o sei valorizâ e promovi lis realtâts che a doprin la lenghe proprie ancje pal lôr lavôr e fâ cognossi a cui che al fevele par breton lis ativitâts economichis che a ufrissin servizis ancje ta cheste lenghe. Pal moment e je stade metude in vore une version sperimentâl dal portâl ma, par mieç di un finanziament partecipatîf, si ponte a lançâ ai 8 di Jugn la version definitive dal sît e po ancje la app. A vuê a son za plui di un centenâr lis ativitâts economichis che a àn aderît al progjet che al gjolt ancje di une partecipazion economiche de Union Europeane.

Font: ABP, 26/04/19

Paîs Catalans: dopo 10 agns e rive la sentence dal TC su la LEC

Il tribunâl costituzionâl spagnûl al à decidût di anulâ diviers articui de leç de educazion (LEC) fate buine dal Parlament de Catalogne intal 2009 che e regole il sisteme scolastic di chest teritori. A fâ ricors cuintri de normative autonomiche al jere stât il Partido Popular (PP) subite dopo de aprovazion de leç. Il tribunâl i à metût però cuasi dîs agns par dâ fûr la sô sentence. I magjistrâts spagnûi a àn anulât i articui che a regolin la educazion primarie, chê secondarie, il curriculum e la struture dal cuarp docent par vie che a laressin a semplificâ e no a integrâ la normative statâl in materie. Cundut dai tais pençs, il tribunâl costituzionâl nol à anulât il model a imersion in vore in Catalogne cemût che e domandave la diestre spagnoliste. Chel istès, e interven la organizazion catalane Plataforma per la Llengua, il model a imersion al reste sot menace dal moment che al reste in pîts l’oblic di garantî un cuart des oris di insegnament par castilian tai câs di students che lu domandin, di maniere che a son diviersis lis scuelis ator pe Catalogne là che il model a imersion nol è aplicât. La sentence, e zonte po la organizazion pe lenghe, e mostre une volte di plui che la Catalogne no gjolt di un autoguvier che i permeti une vere sovranitât su temis centrâi come chel de educazion.

Font: El Nacional, 25/04/19; PFPLL, 25/04/19

Ucraine: fate buine in Parlament la gnove leç linguistiche

Il Parlament de Ucraine al à fate buine une leç che e impon l’ûs dal ucrain inte plui part de vite publiche. La normative, passade cun 278 vôts a pro e 38 contraris, e previôt che i citadins a vedin di doprâ la lenghe statâl intes ativitâts politichis e aministrativis e cuant che a àn a ce fâ cun funzionaris de aministrazion publiche, magjistrâts, miedis e operadôrs sanitaris, militârs, professôrs e personâl scolastic, funzionaris e dipendents di bancjis e di societâts controladis dal stât. Cualchi ecezion e je previodude pes cerimoniis religjosis e par cualchi servizi sanitari. La leç e previôt po che almancul il 90% dai programs televisîfs al sedi par ucrain; percentuâl che si sbasse al 50% tal câs di mieçs di comunicazion su cjarte e gnovis publicazions. Dut chest intun stât là che il 15,8% de popolazion al fevele dome par rus, il 12,3% al dopre cuasi simpri il rus e il 24,9% al dopre lis dôs lenghis inte stesse misure. Pes autoritâts russis la aprovazion de leç e contribuìs a infuartî la crevadure te societât. L’alt comissariât de ONU pai dirits umans al stime che diviers elements de normative a ledin cuintri dai standards internazionâi sui dirits umans. Il gnûf president ucrain, Volodimir Zelenskij, che al à il rus come lenghe native, al à dite che al tamesarà ben il test par viodi che no sedin elements di incostituzionalitât.

Font: The Guardian, 25/04/19

Scozie: plan dal guvier par frontâ i efiets de “Brexit”

Intun intervent denant dal Parlament, la prime ministre scozese Nicola Sturgeon e à marcât cemût che tai ultins trê agns il guvier e lis istituzions britanichis impegnadis intal procès di jessude dal Ream Unît de Union Europeane (Brexit) no vedin mai tutelât i interès de Scozie e che il sisteme di decentrament dai podês cumò in vore al vedi dimostrât di no jessi adat a gjestî cheste crevadure dal status quo. Di là des opinions di ognidun su la indipendence – e à zontât – la Brexit e à palesât il deficit democratic che si à tal Ream Unît e che a coventin duncje fondis plui saldis par fâ sù l’avignî de Scozie. La prime strade di bati e je chê di blocâ il procès di jessude de UE ma, se no si ves di rivâ a fermâlu, la Scozie e à di cjapâ une strade divierse. Ta cheste prospetive la Sturgeon e à fat savê che si inviarà un confront trasversâl tra i partîts scozês par resonâ su cuâi podês che a àn di jessi trasferîts al Parlament de Scozie par difindi i interès sociâi e economics dai scozês e che si metarà sù ancje une Assemblee dai citadins rapresentative de societât scozese par contribuî a cheste discussion. Il guvier scozês invezit al larà a imbastî une leç che e fissi principis e regulis par un gnûf referendum che al previodi ancje la pussibilitât de indipendence. A chel pont si lavorarà par otignî dal Parlament di Londre i podês par davuelzi la consultazion referendarie.

Font: Scottish Government, 24/04/19

Cornualie: prin stampon dal plan linguistic 2019-2022

Il Consei de Cornualie al à metût jù un plan trienâl par saborâ l’ûs dal cornic a cjaval tra il 2019 e il 2022. Il document si insuaze te strategjie decenâl pe lenghe corniche inviade tal 2015. Il plan si svilupe su cuatri areis: status, cul obietîf di rivâ al ricognossiment uficiâl ma ancje cun azions par dâi visibilitât publiche ae lenghe; acuisizion, cun misuris pal insegnament e l’aprendiment de lenghe; corpus, cu la incressite des risorsis par favorî l’ûs dal cornic; e ûs comunitari. In gracie des azions dal prin plan linguistic si à vude une cressite de lenghe te tabelonistiche des stradis e dai edificis, tes publicitâts e tai materiâi di comunicazion, intant che no si àn fats pas indenant cul insegnament dal cornic e cul so ûs public. Il Consei de Cornualie al à ancje domandât al guvier britanic un impegn economic pe lenghe par permeti la formazion dai insegnants, la produzion di materiâi didatics e il svilup di mieçs di comunicazion e di servizis di traduzion in lenghe.

Font: Cornwall Live, 24/04/19

Irlande: gnûf program par insegnâ plui materiis par gaelic

Dopo di vê lançât une iniziative par slargjâ l’ûs curicolâr dal gaelic intes scuelis secondariis dal Gaeltacht (lis areis là che l’irlandês al è ancjemò fevelât in maniere significative), il ministri pe educazion de Republiche de Irlande, Joe McHugh, al à comunicât che cul mês di Setembar si inviarà un program pilote fondât sul sisteme CLIL (Content and Language Integrated Learning) che al permetarà ai students di studiâ ciertis materiis par mieç di une lenghe divierse di chê doprade pal insegnament. Cun chest program si ponte in particolâr a doprâ l’irlandês come lenghe di insegnament ancje tes scuelis cul inglês veicolâr. Tal an scolastic 2019/2020 il program al interessarà 22 tra scuelis de infanzie e primariis par slargjâsi po, tal 2020/2021, ancje a altris ciclis educatîfs e a un numar plui alt di istitûts.

Font: The Journal, 23/04/19

Galizie: pe prime volte un cine par galizian a Cannes

Tra i films in concors inte edizion 2019 dal festival di Canas / Cannes si à pe prime volte ancje un cine in lenghe galiziane. Si trate dal luncmetraç “O que arde” (Chel che al bruse) dal regjist Óliver Laxe che, par altri, tai agns stâts al veve za partecipât al festival cun altris dôs oparis vincint ancje il grant premi de setemane de critiche (cul film “Mimosas”). “O que arde” al è ambientât intes areis plui internis des monts de Galizie e, ancje par chest, il regjist al à sielzût di zirâlu par galizian. Il cine al tocje ancje il teme dai fûcs intai boscs che a rapresentin une des plaiis de Galizie.

Font: Faro de Vigo, 19/04/19

Aragon: primis certificazions uficiâls pal aragonês

A son 161 lis personis che a àn otignût pe prime volte une certificazion uficiâl in lenghe aragonese. Il procès che al à permetût di svilupâ i percors di formazion e di esaminazion al jere stât inviât de direzion gjenerâl di politiche linguistiche dal guvier dal Aragon intal Novembar dal 2015. Aes primis provis di esam uficiâls che si son tignudis tra Fevrâr e Març inte scuele uficiâl di lenghis (EOI) di Zaragoza a àn partecipât uns cinccent candidâts. Lis certificazions a interessin i nivei B2, B1 e A2 dal cuadri comun european di riferiment pes lenghis.