04/08/09

Ossezie meridionâl: e torne a alçâsi la tension


Il ministeri pe difese rus al à fat savê di jessi pront a doprâ la fuarce par difindi la Ossezie meridionâl. La declarazion e rive daspò dai incidents dai ultins dîs là che si àn vûts diviers scuintris a fûc te zone de capitâl de Ossezie dal Sud causâts di milizians gjeorgjians. Pes autoritâts de piçule republiche caucasiche, che si è autoproclamade indipendente intal Avost dal an passât, la Gjeorgjie e sarès responsabile ancje di tîrs di mortâr su la Ossezie. In câs di altris provocazions – a àn fat savê lis autoritâts russis – o intervignarìn cu la fuarce des armis par difindi la popolazion ossete e il cuarp militâr rus presint inte regjon.
Font: RIA Novosti, 01/08/09

Sahara Ocidentâl: il Maroc al torne a fevelâ di autonomie

In ocasion dal discors uficiâl pai siei dîs agns tant che re dal Maroc, Mohamed VI al à comunicât il progjet di regjonalizâ il paîs. Tal zîr di cualchi mês une comission consultive e varès di meti jù un plan che al puarti al decentrament dai podês. Pal sovran marochin il pont di partence al varà di jessi chel di meti in pîts une struture regjonâl autonome intes “provinciis dal Sud”, ven a dî il Sahara Ocidentâl ocupât in maniere ilegâl dal esercit marochin vie pai agns ’70. Il progjet di meti sù une regjon autonome pal Sahara Ocidentâl al jere stât fat indenant ancjemò un doi agns indaûr, ma al cjate la contrarietât dal Polisario, il moviment di resistence dai saharawi che di passe trente agns si bat pe indipendence di chel teritori. I saharawi, di fat, a domandin, daûr di ce che a previodin diviersis risoluzions de ONU, che inte regjon si davuelzi un referendum su la autodeterminazion. Il plan marochin, in chê volte, al veve cjatât il bon acet sei dal Stâts Unîts che de Spagne (ex colonizadôr), ma cumò la situazion e je cambiade cu la aministrazion vuidade di Barack Obama. Par cirî une soluzion, il mediatôr ONU pal Sahara ocidentâl, Christopher Ross, al à clamât dongje une gnove schirie di incuintris tra la delegazion marochine e chê saharawi che si davuelzaran in Avost in Austrie.
Font: El País, 30/07/09; Món Divers, 31/07/09

Moldova: i comuniscj a pierdin la maiorance in Parlament


Lis elezions anticipadis che si son davueltis ai 29 di Lui in Moldova i àn gjavât la maiorance al Partît Comunist che, intai ultins agns, al veve guviernât la republiche ex sovietiche. Cun di fat, i Comuniscj a àn otignût il 44,7% des preferencis e 48 dai 101 puescj in Parlament. I Liberâi Democratics, cul 16,4% dai vôts, a àn cjapât 17 parlamentârs; i Liberâi, cul 14,4%, a ‘nd àn otignûts 15; il Partît Democratic, cul 12,6%, a ‘nd à vûts 13; e la Aleance Moldova Nestre, cul 7,4% des preferencis, e à elet 8 deputâts. I Comuniscj a àn fat savê di jessi pronts a frontâ la legjislature dai bancs de oposizion e, a chest pont, la uniche alternative di guvier pussibile e je formade di une coalizion tra ducj chei altris partîts. Nancje cheste coalizion, dut câs, e permetarà di elei il prossim president de Republiche, dal moment che par fâlu e covente une maiorance di 61 vôts. Par superâ chest probleme, duncje, si podarès fintremai viodi un pat jenfri i Comuniscj e il Partît Democratic, vuidât dal ex comunist Marian Lupu. La sconfite dal Partît Comunist, dut câs, e podarès tornâ a impiâ la tension sei in Transnistrie, regjon a maiorance russe che si è autoproclamade indipendente, sei inte regjon autonome de Gagausie. Diviers rapresentants dai front liberâl, di fat, a àn dite di volê risolvi une volte par dutis la cuestion de Transnistrie, intant che i gagaus a son stâts definîts “une ulçare” intal cuarp dal stât.
Font: RIA Novosti, 30-31/07/09; Nationalia, 30/07/09; Món Divers, 30/07/09

Ladinie: nissune modifiche dal statût di autonomie cence ladins


La propueste di un referendum su la autodeterminazion dal Sud Tirôl, fate indenant dal vicepresident dal Parlament austriac Martin Graf (FPÖ), e à tornât a impiâ lis polemichis sul argoment sei in Austrie che in Sud Tirôl. Pes istituzions e pai partîts talians la cuestion no je in discussion; ai partîts sudtirolês, invezit, la propueste no displâs, massime a chei de diestre nazionaliste. Sul argoment, dut câs, a son intervignût ancje i ladins par bocje di Albert Pizzinini, president dal moviment “Ladins Dolomites”. I ladins no son ni talians, ni austriacs – al dîs Pizzinini – e, duncje cualsisei modifiche al statût di autonomie al à di fâ i conts ancje cun lôr e al à di puartâ a di un aument dal nivel di autoguvier di cheste comunitât.
Font: Noeles, 29/07/09

Irlande: riforme dal setôr public, preocupazion pal avignî dal gaelic


Lis associazions in prime linie pe difese e pal svilup dal gaelic irlandês si son cjatadis intune riunion di emergjence par pandi dute la lôr preocupazion pes consecuencis che il progjet di riforme dal setôr de aministrazion publiche presentât ta chescj dîs al ministeri pes financis de Republiche irlandese al podarès vê su la lenghe. La lôr stesse pôre e rive ancje di Foras na Gaeilge, la Agjenzie di promozion dal gaelic irlandês. Il progjet di riforme, di fat, al previôt ancje la eliminazion dal dipartiment pes politichis di comunitât, pai afârs rurâi e pal Gaeltacht e il passaç des sôs competencis a diviers ministeris. Se cussì al ves di jessi – a disin lis associazions pe lenghe – si riscje che lis politichis pal gaelic a vegnin fruçonadis ancjemò di plui e che il prossim plan plurienâl pal svilup de lenghe al vegni blocât. Daûr dal progjet di riforme, une part des competencis e varès di passâ al ministeri pe educazion che, par esempli, i fâs cuintri aes scuelis irlandesis a imersion che a son chês che a àn puartât i risultâts miôr pe lenghe. A riscjâ cu la propueste di riforme a son ancje lis scuelis estivis di gaelic che, in plui di sburtâ la lenghe, a dan un jutori ae economie des zonis mancul svilupadis dal Gaeltacht. Lis associazions pal svilup de lenghe a invidin il guvier irlandês a no fâ bon il progjet di riforme almancul ta chês parts che a menacin il gaelic. In câs contrari – a zontin – si butarà vie dut il lavôr fat a pro de lenghe massime intai ultins agns.
Font: Gaelport, 27-28/07/09

Galizie: manifest cu lis liniis par promovi il galizian


Intant de cuinte edizion dal cors estîf “Traballando en lingua”, metût adun de Universitât di A Coruña, dal Coordenament dai lavoradôrs pe normalizazion linguistiche (CTNL) e dal Comun di Carballo, al è stât metût jù e publicât un manifest che, in 15 ponts, al propon un model di lavôr pe promozion dal galizian. Intal document si dîs che “si à di indotâ i discors su la lenghe di contignûts gnûfs, imagjinatîfs, modernis, clârs, rigorôs, inclusîfs” e che la promozion de lenghe e à di jessi leade “a valôrs sociâi positîfs e ae costruzion di une justizie sociâl che e garantissi pussibilitâts di svilup reâl par ducj i sogjets disvantazâts”. Il test al invide dutis “lis aministrazions publichis e lis istituzions a davuelzi i compits di promozion de lenghe che i vegnin dâts de leç” e al ricuarde che la politiche linguistiche e à di jessi stabile e “no à di dipendi des opzions politichis di cui che al guvierne o dai risultâts eletorâi” parcè che la lenghe e je un patrimoni coletîf e no di part. Sul front dal insegnament si sburte pal ûs veicolâr de lenghe tant che sisteme principâl par imparâle pardabon e si refude il model di segregazion dai students daûr de lenghe che si volarès imponi.
Font: Vieiros Galiza Hoxe, 27/07/09

Corsiche: la Assemblee e dîs di no ae uficialitât dal cors


Cuntune maiorance di 28 a 19, la Assemblee regjonâl de Corsiche e à boçât la mozion fate indenant di Corsica Nazione Indipendente che e domandave pal cors il status di lenghe uficiâl su la isule. A votâ cuintri de mozion a son stâts i rapresentants dai partîts francês che a àn dite che par rivâ ae uficialitât dal cors si à di lâ in maniere graduâl e cence azions che a puedin jessi interpretadis come un atac ae lenghe francese. Uniche ecezion e je stade chê dal Partît Comunist che, invezit, si è declarât a pro de couficialitât des dôs lenghis. Ducj a favôr de mozion i indipendentiscj e i autonomiscj cors.
Font: Radio Alta Frequenza, 21/07/09; Món Divers, 22/07/09

Ongjarie - Romanie: protocol pe difese des minorancis


Ai 14 di Lui il Comitât di esperts rumen – ongjarês sul coordenament des minorancis nazionâls al à sotscrit un protocol pe tutele de comunitât rumene in Ongjarie e di chê ongjarese in Romanie. In particolâr, il guvier di Budapest si impegne a imbastî in curt des misuris par garantî une rapresentance parlamentâr de minorance rumene. La Ongjarie si à impegnade ancje a judâ dal pont di viste economic la publicazion e la difusion di tescj par rumen e dai periodics di cheste minorance. Il guvier rumen, invezit, al à sigurât la sô disponibilitât a sburtâ l’insegnament dal ongjarês, ancje a nivel universitari, e a viodi de cuestion des proprietâts de comunitât ongjarese nazionalizadis dopo de seconde vuere mondiâl. No si à cjatât nissun acuardi, invezit, su la presince di rapresentants de minorance e di misuris di tutele, tant che la segnaletiche bilengâl, ta chês areis là che la comunitât ongjarese e rapresente mancul dal 20% de popolazion.
Font: Divers.ro, 20/07/09

Romanie: nassude la associazion dai gjornaliscj rom


Ta chestis setemanis si è dade dongje in Romanie la Associazion dai Gjornaliscj Rom (AJRr). L’obietîf principâl di chest grup al è chel di miorâ la cualitât dal rapuart jenfri mieçs di comunicazion e rom, par esempli cun cors par operadôrs de informazion che ur permetin di superâ i stereotips e i prejudizis su cheste comunitât. Cun di plui, si ponte ancje a controlâ cemût che i mieçs di comunicazion a frontin lis notiziis leadis ai rom e a segnalâ i câs là che a son dadis intune maniere no obietive. La associazion e sviluparà ancje dai cors di formazion par gjornaliscj rom.
Font: Divers.ro, 20/07/09

Corsiche: manifest pal dirit al avignî


A son professôrs universitaris e inteletuâi cors i prins firmataris dal Manifest pal dirit al avignî de Corsiche, presentât cualchi zornade indaûr a Corti intant dai apontaments de “Universitât Citadine”. Il document al è indreçât a ducj – citadins, aministradôrs, associazions, istituzions – cun chê di inviâ une riflession gjenerâl sul futûr de isule: un futûr che si pues programâ miôr, si dîs intal manifest, dome se si capìs la Corsiche di vuê. No par nuie, un dai problemis marcâts intal document al è propit chel de incapacitât dai aministradôrs de isule a capî lis domandis che a rivin dai citadins. Il pont centrâl dal manifest, di fat, al è chel de sovranitât popolâr, de rivendicazion de identitât culturâl corse e di un statût istituzionâl gnûf pe Corsiche. Il test, dut câs, al fronte une vore di tematichis: de pression speculative su lis cuestis ae gjestion marcantilistiche des risorsis de isule, de crisi di valôrs ae mancjance di une vision euromediteranie che e ledi plui innà dal rapuart sterp Corsiche - Stât.
Font: Radio Alta Frequenza, 2o/07/09; Nationalia, 20/07/09

Paîs Catalans: a Perpignan si da dongje un partît rom


Ta chestis zornadis si è dât dongje a Perpinyà / Perpignan, inte Catalogne Nord, un partît che al ponte a rapresentâ a nivel locâl i interès de gruesse comunitât rom che e vîf ta cheste citât. Cun di fat, si calcole che a sedin 15 mil i citadins di Perpignan che a partegnin a cheste comunitât. Il gnûf sogjet politic al è stât batiât “Union et Rassemblement de la Population Gitane” e al è vuidât di Germain Soles che al è ancje il president de Associazion dai Zitans de France. L’obietîf dal partît al è chel di sburtâ la aministrazion locâl a ocupâsi di plui de comunitât rom e des sôs problematichis. La presince di cheste comunitât a Perpignan e rimonte almancul al secul XV e tancj di lôr a doprin tant che lenghe di ogni dì il catalan.
Font: La Clau, 17/07/09; Nationalia, 21/07/09

Cornualie: progjet di leç pe autonomie presentât a Westminster


Il deputât liberâl democratic Dan Rogerson al à presentât intal Parlament di Londre un progjet di leç che al ponte ae autonomie de Cornualie. Il test al propon di trasferî al Consei de Cornualie, nassût cualchi mês indaûr de union dai sîs distrets cornics, une schirie di competencis gjavadis in part dal Parlament britanic e in part dai ents e des istituzions locâls. In particolâr, daûr dal progjet, il Consei al varès di cjapâsi sù lis competencis che a rivuardin la educazion, la edilizie abitative, la agriculture, il patrimoni storic e culturâl, e la economie sostignibile. Se il guvier britanic i à ricognossût ae Scozie e al Gales un dirit di autoguvier plui grant par vie des lôr carateristichis storichis e culturâls particolârs – al spieghe Rogerson – alore nol pues dineâ chel stes ancje ae Cornualie, che e rapresente une nazion par so cont dentri dal Ream Unît. La propueste e je stade viodude in maniere positive dal Mebyon Kernow, il partît nazionalist cornic, par vie che e varès di inviâ une discussion su la domande di plui autoguvier che e rive de Cornualie. I nazionaliscj però a cjatin la propueste limitade dal pont di viste dai contignûts e a domandin che la Cornualie e vedi une Assemblee nazionâl sul model galês o, inmò miôr, un Parlament come chel scozês. La propueste di leç e varès di jessi esaminade dal Parlament britanic ai 16 di Otubar.
Font: This is Cornwall, 13/07/09; BBC, 14/07/09; Món Divers, 28/07/09