09/06/09

Groenlande: vitorie storiche de çampe indipendentiste

Internazionalitari 05 2008


Al è un cambiament storic chel jessût des elezions politichis dai 2 di Jugn in Groenlande. Il partît socialdemocratic Siumut, che al à guviernave la isule artiche dal 1979 (an di conession de autonomie), al à patît une sconfite une vore pesante par man de liste de çampe indipendentiste Inuit Ataqatigiit (Comunitât Inuit). Propit i indipendentiscj, che a àn vût il 43,7% des preferencis e dopleât i lôr vôts, a saran cumò clamâts a formâ il gnûf guvier groenlandês. Intal Landsting, il Parlament autonomic, Inuit Ataqatigiit al varà une rapresentance di 31 deputâts; i socialdemocratic dal Siumut a ‘nt varan 9 (26,5% dai vôts, il cuatri par cent in mancul dal 2005); i conservadôrs dal Partît Democratic 4 (12,7% des preferencis, cuasi il dîs par cent in mancul rispiet aes ultimis elezions); i liberâi dal Atassut 3 (10,9% dai vôts, sù par jù la metât dal 2005); e i centriscj dal Kattusseqatigiit Partiat 1 (3,8% des preferencis). La çampe indipendentiste – vuidade di Kuupik Kleist – e sarà cumò clamade a gjestî lis 33 gnovis competencis otignudis cul referendum dal Novembar dal an passât e, tra chestis, il control des risorsis naturâls de isule (tant che petroli, gas, e aur) che cul ritirâsi dai glaçârs a saran plui facilis di sfrutâ. Si trate, duncje, di un altri pas indenant in direzion de plene indipendence de Groenlande de Danimarcje.

Font: Politiken.dk, 03/06/09; Gara, 04/06/09


Paîs Catalans: insuficiente la ufierte scolastiche par catalan

Internazionalitari 05 2008


Dilunc vie dal an scolastic 2008 – 2009 dome 138.223 dai 445.335 fruts che a frecuentin lis scuelis de infanzie e primariis dal Paîs Valenzian a àn podût studiâ par catalan. Chest par vie che dome intal 43% dai 1.726 istitûts scolastics publics e privâts dal Paîs si cjate une ufierte scolastiche par catalan. Come a dî che a saressin cuasi 100 mil i fruts che a volaressin, ma no puedin studiâ par catalan. A denunciâ cheste situazion e je la organizazion Escola Velenciana che e à ancje presentât un studi là che si mostre cemût che, se a ‘nt vessin la pussibilitât, il 55% dai gjenitôrs a sielzaressin il model scolastic par catalan. Il president de organizazion, Diego Gómez, al à duncje invidât il guvier valenzian (che al è tes mans dal PP) a proviodi di slargjâ la ufierte formative par catalan e al à ancje fat savê che Escola Velenciana e je pronte a sapontâ ancje par vie judiziarie chei gjenitôrs che a domandin che i lôr fîs a puedin studiâ par catalan. Simpri su chest teme, la organizazion e je daûr a inmaneâ une manifestazion che si davuelzarà ai 18 di Jugn a València cuant che si sierarà la iniziative des 70 mil cartulinis indreçadis al president valenzian par une scuele che e sedi pardabon plurilengâl.

Font: Vilaweb, 02/06/09; Món Divers, 02/06/09


Paîs Basc: EA si spache, al nas Alkarbide

Internazionalitari 05 2008


Su la sene basche si fâs indenant un gnûf sogjet politic. Al varà non Alkarbide (Relazion) e al varès di meti jù lis sôs fondis organizativis e strategjichis dentri de fin dal an. A comunicâ la gnove al è stât Iñaki Galdos, intune cun altris dirigjents de formazion politiche Eusko Alkartasuna de Gipuzkoa. Za di timp il partît al jere scjassât di contrascj internis leâts aes liniis di azion e aes aleancis puartadis indenant, ma dal sigûr i ultins risultâts eletorâi negatîfs a àn favorît la division. Il grup autôr de crevadure al conteste massime la decision di lavorâ par trasformâ il partît tun centri di riferiment pe çampe indipendentiste basche. Alkarbide al declare di volê tornâ ai valôrs di fonde di Eusko Alkartasuna, o sei chei dal nazionalitarisim socialdemocratic. I rapresentants dal gnûf sogjet politic a àn ancje declarât che no lassaran i puescj che a ocupin inte aministrazion provinciâl de Gipuzkoa.

Font: Gara, 02-05/06/09


Ossezie meridionâl: elezions politichis no ricognossudis de UE

Internazionalitari 05 2008


Lis elezions politichis che si son davueltis ai 31 di Mai in Ossezie meridionâl a àn dât la vitorie al partît dal president Eduard Kokoiti cul 46,38% des preferencis, che i permetin di vê 17 parlamentârs elets. Il Partît Popolâr al à vût, invezit, il 22,58% des preferencis e 9 parlamentârs; il Partît Comunist il 22,25% dai vôts e 8 parlamentârs. Si trate des primis elezions daspò de autoproclamazion de indipendence de Gjeorgjie. Pai osservatôrs internazionâi il vôt si è davuelt cence incidents e daûr des normis internazionâls. Pai rapresentants de Union Europeane, che no ricognossin la indipendence dal paîs, si trate di elezions no legjitimis e, duncje, cence nissun valôr.

Font: RIA Novosti, 01/06/09


Galizie: lis gnovis liniis di politiche linguistiche dal PP

Internazionalitari 05 2008


L’assessorât pe istruzion dal guvier galizian (che, cu lis ultimis elezions, al è tes mans dal PP) al è daûr a imbastî lis gnovis liniis di politiche linguistiche. Daûr des primis informazions, dutis lis scuelis a varessin di vê dôs materiis par galizian (siencis sociâls e lenghe galiziane) e dôs par castilian (matematiche e lenghe castiliane). La lenghe veicolâr dal rest des materiis e varès di jessi decidude in autonomie dai conseis scolastics di ogni istitût. Ta chest cuadri, il parê dai gjenitôrs al varès dome un valôr consultîf. Intai fats, e je la denuncie che e rive di plui bandis, cheste ipotetiche libertât di sielte si trasformarès intune posizion di vantaç pal castilian, contrari di ce che al previôt il Plan di normalizazion linguistiche.

A favorî il castilian a son ancje i prejudizis in vore cuintri di dutis lis lenghis minoritariis, come chel – marcât ancje di une part de stampe locâl – che lis materiis sientifichis, tant che chimiche o fisiche, no si puedin insegnâ par galizian. Par smentî chestis afermazions al è intervignût un grup di sienciâts galizians, ducj colaboradôrs dal CERN (Centri European di Investigazion Nucleâr), che a àn puartât il lôr esempli tant che ûs de lenghe galiziane tant che imprest di comunicazion sientifiche di alt nivel.

Font: Galiza Hoxe, 01/06/09 e 27/05/09


Norvegje: la diestre e vûl la abolizion dal Parlament sami

Internazionalitari 05 2008


Il FremskrittsPartiet (Partît dal Progrès) norvegjês al vûl che il Parlament sami al sedi abolît e che si limitedin i dirits e i nivei di autoguvier des popolazions sami de Norvegje. Cun di fat, intant dal so congrès anuâl, la formazion politiche di diestre (la seconde par impuartance intal paîs) e à dite che nissun grup etnic al à di vê “privileçs” rispiet al rest dai citadins norvegjês. L’aument de agressivitât dal partît al è leât, cun dute probabilitât, aes rivendicazions simpri plui fuartis dai sami sui dirits di gjestion e di disfrutament des lôr tieris nativis.

Font: Galiza Hoxe, 30/05/09


Bretagne: la int e domande plui autonomie

Internazionalitari 05 2008


Daûr di une inchieste davuelte de CRAPE (Centri pes Ricercjis su la Azion Politiche in Europe) e di altris organisims specializâts (ESF e CNRS) la maiorance dai bretons e domande plui podês pe aministrazion regjonâl. A declarâlu al è il 51,9% dai intervistâts, intant che il 31,1% al stime che la Regjon e vedi za i podês juscj. Il 4,6% al volarès, invezit, une Bretagne indipendente. Sul front identitari, il 50% dal campion al pense di jessi sei breton che francês inte stesse misure; il 22,5% si sint plui breton che francês; il 15,4% plui francês che breton; il 9,3% dome francês; e il 1,5% dome breton.

Font: Agence Bretagne Presse, 29/05/09


Romanie: arumens adun pe fieste nazionâl

Internazionalitari 05 2008


Ai 23 di Mai, in ocasion de lôr fieste nazionâl, si son dâts dongje a Bucarest membris e rapresentants des comunitâts arumenis de Romanie. A vierzi lis celebrazions e je stade la Assemblee gjenerâl de comunitât arumene che, sul finî dai siei lavôrs, e à fat bon un document che le impegne a lâ indenant cu lis azions par difindi e promovi la lenghe e la culture dai arumens, ma soredut a lavorâ par otignî il ricognossiment di minorance nazionâl che fin cumò no i è stât dât. Pal guvier di Bucarest, di fat, l’arumen al è dome un dialet dal rumen. Ae celebrazion a àn partecipât ancje rapresentants istituzionâi di altris comunitâts e arumens che a vivin intal forest.

Font: Eurolang, 29/05/09


Irlande: atac mortâl di grups lealiscj intal Nord

Internazionalitari 05 2008


Cemût che al sucêt dispès, in Irlande dal Nord, cuant che a son i grups republicans a puartâ indenant atacs mortâi si à une largje cuvierzidure mediatiche, invezit cuant che a fâlu a son grups lealiscj la situazion e je biel che divierse. Al è ce che al è sucedût ai 24 di Mai a Cúil Rathain / Coleraine cuant che un trop di 40 personis al è jentrât tun cuartîr nazionalist cu la scuse di celebrâ la vitorie dai Rangers di Glasgow (scuadre scozese che e à cetancj tifôs framieç de comunitât unioniste nordirlandese, invezit inte comunitât nazionaliste irlandese si tife dispès pal Celtic di Glasgow). Il grup, armât di macis e vosant slogans pro UDA (Ulster Defence Association, la plui gruesse organizazion paramilitâr lealiste), al à agredît dutis lis personis che si cjatavin par strade. Un om (Kevin McDaid di 49 agns) al è stât pacât a muart e un altri (Damian Fleming di 46 agns) al è stât ferît in maniere une vore serie. Intal atac a son stadis feridis ancje altris personis, tra di lôr ancje une femine insinte. I responsabii dal atac a àn podût movisi cence che la polizie nordirlandese e intervignìs, cundut che e jere in alerte propit pe pussibilitât di atacs di cheste fate. Ancje par chest, duncje, la proteste che si à jevade de bande de comunitât nazionaliste e je stade inmò plui fuarte. “Nol è plui spazis pes scusis” al à dite il conseîr locâl dal Sinn Féin, Billy Leonard. “Denant di chest atac setari, e covente une condane clare e cence dubis de bande di ducj i rapresentants politics unioniscj”, al à zontât il vice prin ministri nordirlandês, Martin McGuinness, ancje lui dal Sinn Féin. A condanâ l’atac mortâl e je stade ancje une part de UDA: al è il câs de South East Antrim Brigade che e à fat savê che e je pronte par consegnâ lis armis che e à ancjemò in man.

Font: AP/RN, 28/05/09; The Guardian, 31/05/09


Cossovo: par MRG e AI lis minoracis a son discriminadis

Internazionalitari 05 2008


La organizazion internazionâl pai dirits umans Minority Rights Group e à publicât un rapuart su la situazion in Cossovo là che si denuncie la situazion di esclusion politiche, sociâl e economiche che a vivin lis comunitâts di minorance. Cun di plui si lamente che chestis comunitâts si cjatin a patî limitazions di moviment, scjars acès ai mieçs di informazion e la mancjance di educazion superiôr inte lôr lenghe proprie. A front di cheste situazion, cetancj di lôr a son obleâts a emigrâ. Cheste situazion e interesse in particolâr rom, serbis, turcs, goranis, bosgnacs e cravuats.

La discriminazion des minorancis in Cossovo e je confermade ancje dal ultin rapuart di Amnesty International. Tal stes document la organizazion internazionâl e denuncie ancje i câs di discriminazion che si àn in Serbie, dulà che a jessi plui colpîts a son rom e albanês.

Font: Nationalia, 27/05/09; Món Divers, 28/05/09; Balkan Insight, 29/05/09


Rom: la estreme diestre ceche e domande la “soluzion finâl”

Internazionalitari 05 2008


Inte sô propagande pes elezions europeanis, il partît de estreme diestre ceche Národní Strana (Partît Nazionâl) al à proponût une “soluzion finâl” pai rom che a vivin intal paîs. La plui part dai partîts cecs e à criticât il spot par vie che al riclame propit il tiermin doprât dai naziscj che, dilunc vie de seconde vuere mondiâl a àn sassinât centenârs di miârs di rom intai cjamps di stermini. La radiotelevision publiche e à decidût di no trasmeti il messaç par vie che lu calcole une incitazion al odi raziâl. Cheste decision e je stade doprade dai rapresentants dal Národní Strana par domandâ che lis elezions a vegnin anuladis. Il partît di estreme diestre al dîs che la “soluzion finâl” che al propon no si riferìs al maçalizi di cheste popolazion, ma ae sô depuartazion sfuarçade in Indie, di dulà che i rom a saressin partîts secui indaûr.

Font: Món Divers, 26/05/09



Crimee: organizazion di riferiment pe diaspore tatare

Internazionalitari 05 2008


Il prin incuintri mondiâl dai tatars de Crimee, che si è davuelt te capitâl de regjon te seconde metât dal mês di Mai, si è sierât cu la nassite dal Congrès Mondiâl dai Tatars de Crimee, une organizazion che e metarà adun lis diviersis associazions de diaspore tatare intal mont. Ai lavôrs dal congrès a àn partecipât i rapresentants di 162 associazions ativis in 12 stâts diferents. La diaspore massive dai tatars de Crimee e je leade massime aes deportazions massivis ordenadis di Stalin tai agns ’40 dal secul stât.

Font: Ukrinform, 25/05/09; Nationalia, 27/05/09