21/06/13

Paîs Basc / Galizie: ricognossûts i dominis .eus e .gal

Intal 2005 a jerin stâts i catalans a vierzi la strade dal ricognossiment di un domini internet che al identificàs ancje su la rêt la lôr specificitât linguistiche e nazionâl, ma cumò il grup di nazionalitâts cence stât che al à vût il stes ricognossiment si è slargjât e, dopo che in Mai e jere stade la Bretagne a otignî il so domini internet specific, il mês di Jugn al à puartât chest stes risultât ancje pal Paîs Basc e pe Galizie. Cun di fat l’ICANN, l’organisim internazionâl che al controle i dominis su la rêt, al à comunicât di vê fatis buinis lis domandis pes estensions .eus e .gal. I galizians a vevin tacât il lôr percors pal ricognossiment intal 2007 cu la costituzion de associazion PuntoGal e la campagne pe racuelte di adesions e di risorsis par rivâ a otignî un domini propri; i bascs a vevin cjapât la stesse strade intal 2008 cu la nassite de organizazion PuntuEus, là che lis letaris “eus” a stan par euskara, o sei la lenghe basche, element primari pe identitât dal Paîs Basc. I dominis gnûfs a saran cumò a disposizion di chei sîts internet che a doprin chestis dôs lenghis o che si ricognossin e a svilupin la culture e la identitât di chestis dôs comunitâts.
Font: Gara, 15/06/13; Galicia Hoxe, 15/06/13

Carelie: i carelians a vuelin il status di “popul natîf”

I carelians a àn di jessi ricognossûts tant che popui natîfs inte regjon euro-artiche di Barents, inte Federazion Russe. E je cheste une des domandis di fonde jessudis dal setim congrès dai carelians che si è tignût ai 7 di Jugn a Pryazh. Il status di “popul natîf” di fat al garantirès a cheste popolazion dai nivei plui alts di tutele rispiet a chei di cumò. A preocupâ i carelians e je massime la diminuzion simpri plui marcade de lôr comunitât che dal 1989 al 2010 e je calade cuasi dal 50%, intant che chei tra di lôr che a fevelin par carelian si son sbassâts dal 50,6% al 36,8%. Une situazion leade ancje ae condizion economiche de lôr tiere là che la ricjece principâl, o sei i boscs, e ven sfrutade di compagniis forestis che a lassin ae comunitât locâl dome i fruçons dai lôr vuadagns.
Font: Finugor, 13/06/13

Paîs Catalans: dossier sui câs di discriminazion linguistiche

Ai 12 di Jugn la Plataforma per la Llengua, organizazion in prime linie pai dirits linguistics dai catalans, e à rindût public un rapuart là che a son presentâts cuarante câs di discriminazion serie par vê doprât la lenghe catalane cun rapresentants des aministrazions publichis. Si trate di episodis sucedûts a cjaval tra il 2007 e il mês di Mai dal 2013 e che a àn cjatât pôc o nissun spazi intai mieçs di informazion. Si va dal câs di une vedue che no i è stade dade la pension par vie che e veve presentât il certificât di muart dal so om par catalan a chel di un pari che i è stade dineade la custodie de fie par vie che il judiç lu acusave di fevelâ ae frute par catalan par slontanâle de mari. Un numar grues di episodis a viodin tant che protagoniscj in negatîf i poliziots de Guardia Civil responsabii di denunciis e di agressions verbâls e fisichis cuintri di personis che ur rispuindevin par catalan. Cualchi câs al rivuarde ancje episodis di discriminazion capitâts inte sanitât e inte scuele.
Font: VilaWeb, 13/06/13

Romanie: la riforme regjonaliste e preocupe i ongjarês

La Aleance Democratiche dai Ongjarês in Romanie (RMDSz), partît di riferiment de comunitât magjare che e vîf ta chest paîs, e à menaçât di tornâ a puartâ la int in place se la propueste di riforme regjonaliste che e rive dal Parlament di Bucarest no sarà metude di bande. I rapresentants de minorance ongjarese, che a vevin domandât une riforme costituzionâl par permeti la nassite di regjons autonomis tes areis là che la maiorance de popolazion e parten a minorancis nazionâls, si cjatin invezit denant di un progjet di riforme che al previôt che lis provinciis a maiorance magjare a vegnin cjapadis dentri in regjons là che la popolazion rumene e sarès maioritarie. La Aleance Democratiche dai Ongjarês in Romanie e à duncje fat savê che e inmanearà manifestazions di place tant che chês fatis intal 1968 cuant che Ceausescu al veve provât a abolî la provincie autonome ongjarese di Marosvásárhely / Târgu Mureş. Pal prin ministri vicjari Liviu Dragnea lis declarazions de Aleance a son pericolosis e la comunitât ongjarese no à di vê nissune pôre di cheste riforme.
Font: Politics.hu, 12/06/13

Paîs Basc: un plan pe pâs fat indenant dal guvier de CAB

Intune conference stampe che si è tignude ai 11 di Jugn a Gesteiz, il lehendakari (prin ministri dal guvier de Comunitât Autonome Basche) Iñigo Urkullu al à presentât la propueste par un Plan di pâs e di convivence che la sô version definitive e sarà pronte pal mês di Otubar. Cun di fat il test al è viert ai contribûts che a rivaran dai diviers grups rapresentâts intal Parlament de CAB. Il document al partìs des lidrîs dal conflit basc par cjatâ fûr lis azions di inviâ par superâlu. Tra lis 18 liniis di azion proponudis si cjatin chês su torture e violazion dai dirits umans, presonîrs, ricognossiment e risarciment des vitimis e v.i.

Slovachie: dimissions dal comissari pes minorancis

Il comissari dal guvier slovac pes minorancis nazionâls, László Nagy, espression de comunitât ongjarese e elet intes filis dal partît di oposizion Most-Híd, al à decidût di dimetisi de sô incarghe. Daûr di cheste sielte e je la decision de maiorance parlamentâr di boçâ l’emendament sul ûs des lenghis des minorancis nazionâls che al previodeve che la segnaletiche bilengâl e fos presinte ancje intes stazions feroviariis dai paîs là che almancul il 15% de popolazion al parten a di une minorance ricognossude. Par Nagy l’emendament al rapresentave un pont di fonde par capî la vierzidure de maiorance di guvier intai confronts des comunitâts minorizadis de Slovachie.
Font: Finugor, 11/06/13

Galizie: gnove tv par galizian su internet

Ai 11 di Jugn e à tacât lis trasmissions Irmandade TV, une gnove television su internet par galizian. Si trate, a àn spiegât i fondadôrs, di une television nazionaliste, sovraniste e di çampe che e dopre il galizian tant che lenghe veicolâr e che e à chê di judâ a democratizâ la informazion. La prime trasmission trasmetude e je stade “O debate” dedicade ai confronts e aes intervistis su la situazion sociâl, politiche e economiche de Galizie.
Font: Galicia Confidencial, 10/06/13

Irlande: intal Nord prime radio par scots e seconde par gaelic

Cu lis ultimis cinc licencis autorizadis a son cumò disesiet lis radios comunitariis ativis in Irlande dal Nord. La novitât plui impuartante di chestis ultimis concessions si riferìs ae lenghe doprade pes trasmissions. Di fat, tra lis gnovis radios o cjatìn fUSe FM, la prime radio nordirlandese a doprâ il scots, varietât linguistiche impuartade vie pai secui stâts dai colons scozês, e Raidió G, la prime radio a doprâ il gaelic irlandês fûr di Béal Feirste / Belfast. La emitente gaeliche e je di fat logade a Machaire Rátha / Maghera inte aree meridionâl de contee di Doire / Derry.
Font: BBC, 10/06/13

Cossovo: domandade la reciprocitât pai albanês de Serbie

Il Parlament cossovan al à fate buine a grande maiorance une risoluzion che e domande che ai albanês che a vivin inte valade di Preševo / Presheva, in Serbie, a vegnin ricognossûts i stes dirits che i serps dal Cossovo a àn otignût su la fonde dai acuardis tra i doi paîs sotscrits che nol è tant cu la mediazion de UE. In particolâr pai comuns a maiorance albanese de Serbie si domandin misuris di autoguvier plui fuartis, dirits scolastics e linguistics plens, e canâi di finanziament specifics.
Font: Balkan Insight, 06/06/13

France: pas indenant pes lenghis “regjonâls” te scuele

Ai 6 di Jugn la Assemblee francese e à aprovât in maniere definitive il progjet di leç su la riforme de scuele, za fat bon cualchi zornade prime dal Senât. Il test finâl al ricognòs pe prime volte in maniere uficiâl la pussibilitât dal insegnament bilengâl intes scuelis statâls pes cussì clamadis “lenghis regjonâls”, o sei basc, breton, catalan, cors, ocitan e todesc alsazian. Chestis lenghis a vegnin definidis part vive dal patrimoni de France e a puedin jessi dopradis ancje in forme veicolâr par insegnâ altris materiis. Cun di plui, intal orari curicolâr al varès di cjatâ puest, dongje des lenghis, ancje l’insegnament des culturis “regjonâls”. Sul plan formâl il stât francês no si veve mai sburtât cussì indenant intal valorizâ lis lenghis minorizadis inte scuele, ma tra i rapresentants di chestis comunitâts plui di cualchidun al à miôr spietâ di viodi cemût che la leç e sarà metude in vore e al segnale la mancjance di ogni riferiment al insegnament par imersion puartât indenant des scuelis associadis tant che lis calandretas ocitanis, lis ikastolas baschis, lis brassolas catalanis e lis diwan bretonis.
Font: Agence Bretagne Presse, 05/06/13; VilaWeb, 06/06/13

Corsiche: il FLNC al menace di ricjapâ la lote armade

La visite in Corsiche dal ministri francês dal interni, Manuel Valls, e à saborât ancjemò di plui la clime di tension vivude su la isule e à dât un colp dûr ae sperance che il guvier di Parîs al vignìs incuintri aes rivendicazions linguistichis e di autoguvier de Corsiche. Se lis istituzions de isule no àn platât il lôr marum pal messaç di sieradure totâl rivât dal rapresentant dal guvier francês, il Front di Liberazion Nazionâl Cors, moviment armât che za di timp al veve decidût di lassâ cidinis lis armis, al à dât fûr un comunicât là che al fâs savê di jessi pront a tornâ a cjapâlis sù par che la France e ricognossi i dirits nazionâi dai cors. Il comunicât al sarès dut câs di atribuî dome a di un grup dissident dal Front cognossût tant che “FLNC dai 22 di Otubar”.
Font: Le Monde, 04/06/13; Alta Frequenza, 05/06/13; Corsica Infurmazione, 05/06/13

Aragon: comuns de Franja adun pal catalan

Dopo che il Parlament dal Aragon al à fate buine une gnove leç su lis lenghis che e va a scancelâ fintremai il non dal “catalan” par sostituîlu cu la definizion di “lenghe aragonese proprie de aree orientâl”, i rapresentants di uns trente comuns e di trê conseis provinciâi si son dâts adun il prin di Jugn a Mequinensa par sotscrivi une declarazion in difese de lôr identitât linguistiche catalane. Si trate di aministrazions che a fasin part de cussì clamade Franja d’Aragó, o sei la fasse orientâl dal Aragon là che la lenghe proprie e je il catalan. Inte declarazion i aministradôrs firmataris si impegnin a fâ aprovâ intai ents che a rapresentin mozions dulà che si domande al guvier aragonês di ritirâ la gnove leç su lis lenghis e di tornâ a clamâ la lenghe catalane cul so non. Cun di plui, tal câs che il guvier regjonâl nol torni sui siei pas, si impegnin a cjapâ dutis lis stradis judiziariis par blocâ la leç e tornâ ai catalans de Franja i lôr dirits linguistics.
Font: Generalitat de Catalunya, 04/06/13

Gales: conference nazionâl sul avignî de lenghe

Il prin ministri dal Gales, Carwyn Jones, al à anticipât la intenzion di inmaneâ une conference nazionâl sul avignî de lenghe galese che si tignarà ai 4 di Lui a Aberystwyth. L’apontament al à chê di cjapâ dentri il numar plui alt di contribûts, di buinis pratichis, di ideis e di opinions par judâ a meti adun la strategjie linguistiche dal guvier galês pai prossims agns. Sîs i setôrs là che l’esecutîf al vûl centrâ la discussion, ven a dî: famee, zovins, comunitâts locâls, puescj di vore, servizis par galês e tecnologjie. La tindince a pierdi la lenghe propit intes areis rurâls là che il galês al jere plui fuart e domande une revision des politichis pe lenghe e, par un teme cussì impuartant, al à dite il prin ministri Carwyn Jones nol è avonde scoltâ ce che a àn di dî lis organizazions pe lenghe. Propit chestis ultimis però – a tacâ de Cymdeithas yr Iaith Gymraeg (Societât pe Lenghe Galese), organizazion in prime linie inte difese dai dirits linguistics – a àn invidât l’esecutîf galês a no fermâsi aes discussions, ma a meti in vore azions concretis cemût che si domande zaromai di timp.
Font: Wales On Line, 31/05/13; Cymdeithas, 06/06/13