22/12/15

Corsiche: nazionalitaris pe prime volte al guvier de isule

Chê dai 17 di Dicembar e je stade une zornade storiche pe Corsiche cu la elezion tant che president dal guvier regjonâl dal nazionalist moderât Gilles Simeoni e di un esecutîf formât di siet membris di Femu a Corsica e di doi di Corsica Libera. Pôc prime, ae presidence de Assemblee regjonâl corse si veve vude la elezion dal nazionalist radicâl Jean-Guy Talamoni. E je la prime volte che i nazionalitaris a son ae vuide de Regjon. Intal secont turni des elezions regjonâls dai 13 di Dicembar la coalizion nazionalitarie Pè a Corsica, formade dai nazionaliscj moderâts Femu a Corsica e dai indipendentiscj di Corsica Libera, e veve otignût il 35,34% dai vôts e 24 dai 51 conseîrs che a formin la Assemblee regjonâl plaçantsi denant dal centri çampe (28,49% dai vôts e 12 conseîrs), de aleance de diestre republicane (27,07% dai consens e 11 elets) e dal Front National (9,09% dai vôts e 4 conseîrs). Za la sere des elezions intes citâts principâls de isule si vevin vudis manifestazions spontaniis par fâ fieste pe vitorie storiche de aleance nazionalitarie.
Font: Alta Frequenza, 14-17/12/15; Jornalet, 14/12/15; Le Monde, 14-15/12/15

Stât francês: nazionalitaris cuasi cence rapresents tes regjonâls

Gjavade la Corsiche, lis elezions regjonâls intal stât francês a àn lassât cence rapresentance cuasi ducj i moviments nazionalitaris che si vevin presentâts. In diviers câs, come pe Catalogne Nord o pe part setentrionâl dal Paîs Basc la inclusion di chescj teritoris in Regjons aministrativis cetant plui grandis e à discoragjât fintremai la partecipazion di candidâts nazionalitaris. In Bretagne la coalizion sovraniste Oui la Bretagne vuidade di Christian Troadec e je stade la cuarte plui votade tal prin turni, ma cul so 6,71% no à vût acès al secont turni là che si è imponût cul 51,41% dai vôts il candidât socialist Jean-Yves Le Drian. Di segnalâ la partecipazion ancje di un candidât indipendentist, Bertrand Deléon, che però nol à passât l’1% des preferencis. Des trê grandis Regjons che a dividin la Ocitanie, chê de Provence – Alps – Côte d’Azur e sarà guviernade dal centri diestre (in gracie dal ritîr intal secont turni dal candidât socialist par evitâ une vitorie dal Front National), intant che la vitorie e je lade al front progressist sei inte Regjon Aquitanie – Limosin – Poitou-Charents, sei in Lenghedoc – Roussillon – Sud Pireneus. Te coalizion di centri çampe che e à vinçût inta cheste ultime Regjon al è stât elet ancje Patric Roux dal Partit Occitan. Te Regjon aministrative che e ten dentri Alsazie, Lorene, Champagne e Ardenis si presentave ancje la liste nazionalitarie Unser Land che intal prin turni e à cjapât il 4,73% inte circoscrizion gjenerâl, ma in Alsazie e je stade tra i partîts plui votâts.
Font: Jornalet, 14/12/15; Agence Bretagne Presse, 14/12/15; Le Monde, 14-15/12/15

Stât spagnûl: elezions politichis, passe 25 deputâts sovraniscj

Lis elezions politichis dai 20 di Dicembar intal stât spagnûl a àn metût fin al bipartitisim che si veve formât dopo de colade dal franchisim e a àn produsût un fruçonament dal vôt che al rint dificil formâ un guvier. Cul 28,72% dai vôts il PP al reste la formazion plui votade e al rive a otignî 123 elets; daûr a rivin il PSOE cul 22.01% dai consens e 90 deputâts, Podemos cul 20,66% dai vôts e 69 elets, e Ciudadanos cul 13,93% des preferencis e 40 elets. Par chel che al rivuarde i partîts espression di nazionalitâts minorizadis , i risultâts plui significatîfs a rivin de Catalogne là che lis dôs formazions leadis al indipendentisim catalan, ven a dî ERC e Democràcia i Llibertat, a àn otignût i prins 9 deputâts e i seconts 8. Al è di segnalâ po che Podemos si è presentât in diviersis comunitâts autonomis tant che sogjet di riferiment par une part dal vôt nazionalitari: al è il câs de Catalogne cul non di En Comú Podem e cun 12 elets; dal Paîs Valenzian cu la coalizion Podem-Compromís e 9 deputâts; de Galizie come En Marea (Podemos-A Nova-EU) cun 6 elets. Par chel che al rivuarde la Comunitât Autonome Basche i nazionaliscj moderâts dal PNV a àn otignût 6 deputâts e i indipendentiscj di EH Bildu 2.
Font: El País, 21/12/15; Naiz:, 21/12/15; VilaWeb, 21/12/15

Paîs Catalans: tes Baleârs a cressin lis emissions tv par catalan

Cui 17 di Dicembar si à slargjade la ufierte televisive par catalan des Baleârs. Cualchi an indaûr, cuant che si veve vût il passaç al sisteme digjitâl, l’esecutîf di diestre che al guviernave in chê volte lis isulis nol veve fat nuie garantî la vision di diviersis emitentis che a trasmetevin de Catalogne. L’intervent dal gnûf guvier progressist – nazionalitari des Baleârs al à permetût cussì di tornâ a viodi i canâi par catalan Super3 dedicât ae programazion pai fruts, Canal 33 di tai culturâl, e 3/24 cun informazions in direte 24 oris su 24.
Font: Ultima Hora, 18/12/15

Stât francês: propueste di leç su lis lenghis minorizadis

Une propueste di leç su lis lenghis minorizadis fate indenant dal deputât breton Paul Molac e sarà discutude tal Parlament francês ai 14 di Zenâr. A nancje doi mês dal bloc de ratifiche de Cjarte europeane des lenghis regjonâls o minoritariis de bande dal Senât, cheste iniziative e ponte a infuartî la presince di chestis lenghis te scuele, tai media e tai spazis publics. In plui di slargjâ lis oris pal insegnament des lenghis minorizadis, la propueste di leç e permetarès ancje aes coletivitâts teritoriâls di finanziâ lis rêts privadis di insegnament a imersion tant che lis ikastolak baschis o lis diwan bretonis. La normative e larès po a promovi e a razionalizâ l’ûs des lenghis propriis inte segnaletiche e inte comunicazion des aministrazions publichis locâls. Sul front dai media, si ponte invezit a incressi la programazion intes lenghis locâls su la radiotelevision publiche che cumò e je di 400 oris par an su France 3 (600 pe corse Via Stella) e di cualchi ore su France Bleu.
Font: Agence Bretagne Presse, 17/12/15

Asturiis: lenghe proprie e sport, lis azions dal guvier

Il guvier asturian al à inviât une campagne par saborâ l’ûs de lenghe proprie intal sport. Tra lis iniziativis insuazadis ta cheste campagne o cjatìn la cronache in direte par asturian su la radio publiche (RPA) di diviersis partidis di balon e la presince de lenghe intes comunicazions audio e intai strissons dai stadis o des arenis là che a zuin lis plui impuartantis societâts sportivis asturianis, dal balon masculin e feminin ae baletalzei e al hockey.
Font: El Comercio, 16/12/15

Paîs Catalans: lenghis e funzion publiche, propueste tes Baleârs

Intune conference stampe che si è tignude ai 14 di Dicembar, i rapresentants dal Partît Socialist, di Podemos, di Més per Mallora, di Més per Minorca e di Gent per Formentera a àn comunicât di vê presentât une propueste di leç par tornâ a meti la cognossince dal catalan tant che element necessari par podê lavorâ intune aministrazion publiche des Baleârs. Cun di fat, dopo de modifiche de normative su la funzion publiche fate buine te legjislature stade dal guvier di diestre, la cognossince de lenghe proprie des isulis e jere deventade facoltative par cui che al lavore intun ufici public. Chel istès, i partîts che a àn presentât la propueste a àn invidât ancje il PP a poiâle in maniere di superâ l’ûs de lenghe tant che imprest di lote partitiche. L’intindiment des fuarcis che a poin il gnûf guvier progressist – nazionalitari al è chel di fâ buine la gnove leç dentri di Fevrâr di chest an che al ven.
Font: La Vanguardia, 14/12/15

Galizie: problemis tal ûs de lenghe, i dâts di A Mesa

La organizazion A Mesa pola Normalización Lingüistica e à ricevût vie pal 2015 pôc mancul di dusinte denunciis di episodis là che si à impedît o pidimentât il dirit di doprâ la lenghe galiziane. Intal 51% dai câs si trate di problemis saltâts fûr intai rapuarts cu lis aministrazions publichis: plui de metât cun riferiment ae Comunitât autonome de Galizie e il rest cun uficis galizians de aministrazion statâl e cun ents locâi. Par chel che al rivuarde invezit i sogjets privâts che a davuelzin un servizi di interès public o lis realtâts economichis plui grandis, lis segnalazions a àn interessât massime Gas Natural-Fenosa, Abanca, Audada, Ikea e Vueling.
Font: La Voz de Galicia, 14/12/15

Paîs Catalans: iniziative par promovi il zuiâ par catalan

La Federazion dai gjenitôrs dai arlêfs de Catalogne e zirarà aes passe 2.200 associazions che a fasin part de organizazion dutis lis informazions e i imprescj che a fasin part de campagne “I tu, jugues en català” imbastide dal Consorzi pe normalizazion linguistiche. La iniziative, che e vûl sburtâ l’ûs dal catalan intai zûcs, e propon ancje une aplicazion par celulârs che e permet di cognossi ducj i zûcs eletronics e tradizionâi za disponibii par catalan e lis passe 400 buteghis che a aderissin ae campagne.
Font: La Vanguardia, 11/12/15

Serbie: no si risolf la crisi sui libris pe minorance albanese

E reste vierte la crisi dai tescj scolastics pe minorance di lenghe albanese che e vîf inte aree di Preševo / Presheva e Bujanovac, in Serbie. Ai 10 di Setembar il guvier cossovan e chel serp a vevin cjatât un acuardi par permeti aes dôs minorancis – chê albanese in Serbie e chê serbe in Cossovo – di doprâ libris di test mandâts des lôr comunitâts nazionâls di riferiment. I passe 100 mil tescj mandâts des autoritâts cossovanis a restin però blocâts inte dogane di Preševo cundut che za di timp lis scuelis de aree serbe a maiorance albanese a segnalin di no vê avonde libris pai students e ancje chei no inzornâts. E intant che il ministri serp pe istruzion al va dilunc a no incuintrâ e a no rispuindi ai rapresentants de minorance di lenghe albanese, chel pai forescj al à dite che chei tescj no saran mai doprâts in scuelis de Serbie dal moment che a fevelin di un stât cossovan indipendent e che a piturin di erois i milizians dal UÇK.
Font: Balkan Insight, 10/12/15

Gales: tais intal belanç 2016 pe lenghe galese

Intal belanç pal 2016 dal Gales si previodin 25 milions e 600 mil sterlinis pe lenghe proprie, o sei il 5,9% in mancul des risorsis metudis vie pal 2015. Chest tai al à fat saltâ sù il grup militant Dyfodol i’r Iaith, che al acuse il guvier di vê tradît lis sôs promessis pal galês. Ancje la organizazion Cymdeithas yr Iaith Gymraeg si mostre une vore preocupade par cheste decision che e va juste de bande contrarie di ce che al coventarès, o sei un invistiment su la lenghe di almancul l’1% dal belanç, o sei plui o mancul 150 milions di sterlinis. L’esecutîf galês si difint cul dî che, a front di tais che a tocjin ducj i setôrs, dongje dai bêçs pe lenghe inte scuele, tai media e tes aministrazions, al à metût plui di un milion di sterlinis dome pes azions diretis di promozion de lenghe intes comunitâts locâls.
Font: BBC, 09/12/15

Lituanie: il sît dal ministeri pai forescj ancje par polac

Dai 9 di Dicembar il sît internet dal ministeri pai forescj de Lituanie al è disponibil ancje par polac, in plui che par lituan, rus, inglês e francês. La gnove si propon doi obietîfs, ven a dî di facilitâ la cooperazion cu la Polonie e di vignî incuintri ae comunitât di lenghe polache che e vîf in Lituanie. Polacs e rus a son lis dôs comunitâts di minorance plui gruessis dal paîs baltic.
Font: The Baltic Course, 09/12/15

Tracie/Grecie: atac ae sede dal partît turc DEB

Un trop di discognossûts, leâts cun dute probabilitât al estremisim nazionalist grêc, al à vandalizât a Gümülcine/Komotini la sede dal partît DEB che al difint lis rivendicazions de minorance turche che e vîf inte regjon greghe de Tracie. L’atac al rive juste cualchi zornade dopo che il partît al veve comunicât che al varès tacât a tirâ sù firmis par protestâ cuintri de violazion dai dirits de minorance turche in Grecie. Il stât grêc nol ricognòs la esistence di nissune minorance nazionâl o linguistiche dentri dai siei confins, ma dome di une minorance di religjon musulmane. I turcs de Grecie a gjoldin duncje di cualchi tutele linguistiche minime dome in gracie de lôr partignince ae comunitât musulmane ricognossude. La cort europeane di Strasburc e à za condanât plui voltis la Grecie par vê proibît di regjistrâsi a organizazions dome pal fat di doprâ tal lôr non i adietîfs “turc”, “macedon” o riferiments a altris comunitâts minorizadis. Cheste clime chauviniste e à favorît ancje diviers episodis di violence e di discriminazion cuintri dai ativiscj des comunitâts minorizadis.
Font: EFA, 08/12/15

Sardegne: ae Regjon la gjestion des risorsis de leç 482/99

Lis normis pe metude in vore dal Statût di autonomie de Sardegne che a son stadis fatis buinis ai 4 di Dicembar dal Consei dai ministris talian i permetaran ae Regjon di vê cualchi spazi di autonomie in plui su lis politichis linguistichis. Tra lis primis novitâts si varà il passaç ae Regjon de gjestion direte dai fonts de leç statâl 482/99 su lis minorancis linguistichis assegnâts dal guvier talian pe lenghe sarde e par chê catalane dal Alguer. Fin cumò a decidi il ripart di chestis risorsis al jere il dipartiment pai afârs regjonâi dal guvier talian. Un pas dal gjenar al jere za stât fat agns indaûr cu la Regjon autonome Friûl – Vignesie Julie pai fonts assegnâts aes lenghis furlane, slovene e todescje.
Font: Unione Sarda, 05/12/15

18/12/15

Stât spagnûl: il costituzionâl al boce l’at sovranist catalan

Il tribunâl costituzionâl spagnûl al à declarât cence valôr juridic l’at fat bon dal Parlament catalan ai 9 di Novembar par inviâ il procès pe costruzion de Republiche catalane. Intune sentence tra lis plui sveltis mai jessudis dal tribunâl costituzionâl di Madrid (la impugnazion de leç sul abort, par fâ juste un esempli, e je in spiete di passe cinc agns), i magjistrâts spagnûi ducj dacuardi a àn decidût che la declarazion concuardade di Junts pel Sí e CUP no je compatibile cu la Costituzion dal ream di Spagne e cul Statût di autonomie de Catalogne massime parcè che e va cuintri dal principi che la sovranitât i parten al “popul spagnûl” e no pues jessi obiet des decisions dal Parlament di une comunitât. Une sentence di cheste fate e jere za stade metude in cont dai partîts indipendentiscj catalans che a àn duncje fat savê che a laran distès indenant cul procès. In chest moment, par altri, il grop centrâl par Junts pel Sí e CUP al è chel di cjatâ un acuardi par formâ il guvier catalan clamât po a gjestî chest procès.
Intant, cui voi pontâts su ce che al sucêt in Catalogne, diviers partîts nazionalitaris dal stât spagnûl a àn sotscrit il manifest ‘Los pueblos tenemos la palabra’ là che a rivindichin il dirit dai singui popui cjapâts dentri intal stât spagnûl di decidi in forme democratiche il lôr avignî e di imbastî procès costituents. Il document al è stât sotscrit di EH Bildu, BNG, Unidad del Pueblo, CUP, ERC, Andecha Astur, Izquierda Castellana, Puyalón de Cuchas y Més per Mallorca.
Font: VilaWeb, 02/12/15; El País, 02/12/15; Gara, 04/12/15

Paîs Basc: model scolastic basc maioritari pai arlêfs “imigrâts”

Dai 2.681 students tra i 6 e i 16 agns che a rivin di fûr de Comunitât Autonome Basche e che a àn tacât chest an il lôr percors intal sisteme educatîf di cheste comunitât la plui part, ven a dî 1.163, si son iscrits intal model D, o sei chel cul euskara tant che lenghe veicolâr, altris 736 ta chel bilengâl e dome 782 tal model cul spagnûl come lenghe di riferiment. Se e je vere che e reste ancjemò une part dai gjenitôrs che a rivin di fûr a vê miôr il model scolastic par spagnûl, te grande part dai câs si ponte a incressi il percors di integrazion dai fruts par mieç dal model par basc o di chel bilengâl.
Font: Diario Vasco, 30/11/15

Bosgne: a tornin a cressi lis tensions cui serps

Al torne a cressi il scuintri dentri de Bosgne tra lis autoritâts federâls e la Republika Srpska, o sei la entitât aministrative a maiorance serbe. Dut al partìs de decision des autoritâts serpis di celebrâ tant che fieste nazionâi i 9 di Zenâr, o sei la date che intal 1992 e jere stade proclamade la Republika Srpska. La normative che lu previôt e je stade però boçade de cort costituzionâl che le à considerade discriminante par chês altris comunitâts de federazion e i à dât sîs mês aes autoritâts serbis par mendâ la leç. Dut câs la decision e à crevât in doi la cort cui trê judiç internazionâi e i doi bosgnacs che a àn votât cuintri de leç e i doi judiçs serps e i doi cravuats che a àn votât a pro. A front di cheste situazion i dirigjents dai principâi partîts de Republika Srpska si son dâts adun ai 29 di Novembar e, di une bande, a àn concuardât di domandâ ae Assemblee federâl di clamâ dongje un referendum popolâr su la fieste e, di chê altre bande, i àn dât 120 dîs di timp par riviodi la composizion de cort costituzionâl eliminant i judiçs internazionâi. Chest gnûf scuintri al va a incressi la tension che za di timp e je tra lis diviersis parts de federazion e e va a blocâ ogni tentatîf di riforme istituzionâl.
Font: Balkan Insight, 30/11/15

Sardegne: coordenament su “minorancis” cun Trentin e Friûl

Intant dal apontament dal festival european Suns dedicât aes arts performativis in lenghe minorizade che si è tignût a Casteddu / Cagliari, si à vût un incuintri tra la assessore regjonâl pe lenghe e pe culture sarde Claudia Firino e i siei coleghis Gianni Torrenti dal Friûl – Vignesie Julie e Giuseppe Detomas dal Trentin – Sud Tirôl. Ta cheste riunion si à decidût di meti sù un coordenament tra lis regjons dal stât talian là che si àn “minorancis linguistichis” che al tegni di voli lis politichis linguistichis in vore e che al meti in cjamp imprescj e azions in comun pe promozion des lenghis propriis. Il coordenament al varès di partî in ocasion de prossime riunion de comission culture de conference taliane stât – regjons. Intant dal incuintri in Sardegne i trê assessôrs a àn invidât il Parlament talian a sierâ in curt il percors di ratifiche de Cjarte europeane des lenghis regjonâls o minoritariis che si strissine di agns cence mai rivâ insom.
Font: RAS, 30/11/15

Paîs Basc: dirit di decidi, risoluzion dal Parlament de Navare

Ai 27 di Novembar il Parlament de Navare in riunion plenarie par frontâ il teme dal dirit di decidi al à fatis buinis a maiorance dôs risoluzions cul vôt a pro di Geroa Bai, EH Bildu, Podemos e Izquierda – Ezkerra e chel contrari di popolârs, socialiscj e UPN. La prime e mostre la volontât dal Parlament di fâ buine une leç su lis consultazions che e previodi la pussibilitât pai citadins de Navare di esprimisi ancje sul dirit di decidi. La seconde e propon di vierzi un procès partecipatîf e parlamentâr di revision dal statût di autonomie par decidi sul status de Navare e par incressi lis competencis gjestidis a nivel locâl. Su la taule e je ancje la cuistion de semplificazion dal percors par dâ adun Navare e Comunitât Autonome Basche intal câs che si rivi a di une riforme de costituzion spagnole. Ancje ta chest câs a fâi cuintri a cheste ipotesi a son i partîts spagnoliscj (PP, PSN) e la diestre regjonaliste (UPN).
Font: Naiz:, 27/11/15

Slovachie: scuelis ongjaresis a risi cu la riforme de istruzion

La riforme scolastiche in discussion in Slovachie e menace di colpî ancje lis scuelis magjaris che si cjatin massime inte aree meridionâl dal paîs, là che e vîf une significative minorance di lenghe ongjarese. I rapresentants dal partît di riferiment de comunitât (MKP – Partît de Comunitât Magjare) a àn segnalât che se la leç no sarà blocade o emendade si riscje di ricjatâsi cence plui scuelis publichis cul ongjarês tant che lenghe di insegnament, ma a àn ancje dite che no àn la fuarce par sburtâ il Parlament slovac a cambiâ direzion. Su la cuistion al è intervignût il president dal comitât pai afârs forescj dal Parlament di Budapest, Zsolt Németh, che al à dite a clâr che par mantignî buinis relazions jenfri Ongjarie e Slovachie al covente che lis scuelis de minorance no vegnin tocjadis.
Font: Politics.hu, 27/11/15

Gales: protestis cuintri dai tais decidûts di Londre par S4C

Dilunc vie de campagne eletorâl il partît conservadôr britanic si veve impegnât a difindi i fonts e la indipendence editoriâl di S4C – la television par galês associade ae BBC – ma cumò il guvier di Londre, che al è propit intes mans dai Tories, al à in program di taiâ i finanziaments pe emitente televisive galese. Si à duncje tornade a inviâ une mobilitazion cuintri dai tais che e met adun sei organizazions tant che la Cymdeithas yr Iaith Gymraeg, sei parlamentârs galês a partî dai nazionalitaris dal Plaid Cymru che a domandin che lis risorsis e lis competencis pe radiotelevision in lenghe galese a sedin trasferidis ae Assemblee nazionâl dal Gales. Fintremai il deputât conservadôr Guto Bebb al à criticât l’intindiment dai siei coleghis di partît par vie che al pant un messaç cetant negatîf sul impegn dai Tories pe lenghe galese.
Font: Daily Post, 26/11/15

Paîs Basc: a cressin lis risorsis pal euskara in Navare

La assessore pes relazions istituzionâls dal guvier navarês Ana Ollo e à presentât al Consejo Navarro del Euskera lis liniis principâls di intervent pe lenghe basche in program pal 2016. Il braç operatîf di chestis azions al sarà Euskarabidea, o sei la agjenzie pe lenghe basche, che chest an che al ven e varà une dotazion di un milion e mieç di euros, plui dal dopli dal an passât cuant che al guvier de Navare e jere ancjemò la diestre regjonaliste e spagnoliste. A cressi a saran ancje lis risorsis pal insegnament dal euskara pai adults e pe presince de lenghe intai mieçs di comunicazion che, di mancul di 40 mil euros intal 2015, a passaran a 250 mil. Inte suaze de gnove politiche linguistiche si previôt ancje di recuperâ la colaborazion cun Eusko Ikaskuntza, la academie pai studis bascs, e cun Euskaltzaindia, la academie de lenghe basche, che e cjaparà un finanziament di pôc mancul di 100 mil euros.
Font: Noticias de Navarra, 25/11/15

Asturiis: aument lizêr dai fonts pe politiche linguistiche

Daûr dal test presentât dal guvier asturian, il belanç pal 2016 al previôt lis stessis azions di politiche linguistiche za programadis pal 2015, ma al zonte ai obietîfs di otignî ancje la partence dal procès di svilup di un plan di promozion linguistiche e la incressite dal ûs de lenghe proprie te radiotelevision publiche asturiane. Sul front economic, i fonts pal asturian a passin di 1.552.684 a 1.570.664 euros, cuntune incressite dal 1,2%. Pe Xunta pola defensa de la llingua asturiana si trate però di une cifre ridicule e insuficiente, viodût che e rapresente sì e no il 0,04% dal belanç de comunitât.
Font: Asturies.com, 23/11/15; El Comercio, 27/11/15

Paîs Catalans: dome il 12% des sentencis par catalan

Inte suaze de seste zornade sul ûs dal catalan inte justizie inmaneade dal consei dai avocats de Catalogne a son stâts presentâts i ultins dâts su la presince de lenghe proprie tai tribunâi de comunitât. Intal 2014 lis sentencis dadis fûr par catalan a jerin a pene il 12,2% dal totâl, in diminuzion dal 0,2% rispiet al an prime. A nivel provinciâl la situazion miôr e je chê di Girona cuntun 35,2%; i vegnin daûr Lleida cul 25%, Barcelone (12,4% a nivel provinciâl, 8,7% te aree municipâl) e Tarragona là che si va jù fintremai al 2%. Un tant al palese il contrast tra la realtât sociâl e chê judiziarie: di fat – al ricuarde il president dai avocats catalans – cundut che la maiorance dai documents che a tachin il procès judiziari a rivin des aministrazions publichis e dai privâts par catalan, une volte che a jentrin inte dimension juridiche a passin al castilian.
Font: Abogacia.es, 20/11/15

Sami: prin program di dotorât in partence in Norvegje

Intal mês di Març dal 2016 al varès di partî il prin program di dotorât in lenghe e leterature sami dal college universitari di Guovdageaidnu, in Norvegje. La diference tra cheste e chês altris universitâts e je che achì no si fevele dome di insegnâ lenghe e leterature sami, ma si dopre cheste lenghe ancje pal insegnament e pe aministrazion. Cumò, cu la partence dal dotorât, si spere di infuartî l’ûs dal sami ancje tant che lengaç sientific. Il college, che i da acet ae comunitât di students sami plui grande, al veve tacât tal 1989 cun cors di sami par insegnants, par zontâ po a man a man cors universitaris e masters.
Font: Hettema, 20/11/15

03/12/15

Gales: galês “seconde lenghe” di superâ ancje pal prin ministri

Une delegazion de Cymdeithas yr Iaith Gymraeg, organizazion in prime linie te difese dai dirits linguistics, si è cjatade cul prin ministri galês Carwyn Jones par frontâ il teme dal insegnament dal e par galês. Cemût che al veve fat cualchi timp indaûr il ministri pe educazion, ancje Carwyn Jones al à ricognossût che il model dal insegnament dal galês tant che seconde lenghe nol à puartât i risultâts che si sperave. Intal gnûf curriculum scolastic che il guvier al è daûr a svilupâ si ponte duncje a superâ chest model e a slargjâ in maniere progressive l’ûs dal galês veicolâr. Toni Schiavone, referent de comission pe educazion de Cymdeithas, al à preseât lis peraulis dal prin ministri e al à invidât il guvier a movisi cence altris ritarts par cheste strade.
Font: Cymdeithas, 19/11/15

Paîs Basc: gnove iniziative di Trebiñu par integrâsi cun Araba

Il consei comunâl di Trebiñu / Treviño, isule aministrative dentri de Comunitât Autonome Basche che e fâs part de regjon Castilie e León, al à fate buine une gnove iniziative par facilitâ il passaç dal so teritori ae provincie basche di Araba. Si trate di une risoluzion che e ricognòs il Parlament spagnûl tant che unic sogjet competent par decidi su la modifiche dai confins aministratîfs. Cun chest at si spere di superâ il podê di veto esercitât fin cumò des istituzions de Castilie e León. La deliberazion e je stade poiade di dutis lis fuarcis politichis rapresentadis intal consei comunâl, fale il PP che si è astignût. Al è di agnorum che cheste comunitât e bat par podê aderî ae Comunitât Autonome Basche che i sta dulintor, ma si à cjatade simpri denant dal no des autoritâts castilianis.
Font: Naiz:, 18/11/15

Scozie: app par sburtâ i fruts a cjantâ par gaelic

La agjenzie gaeliche pes arts (Pròiseact nan Elan) e il Consei des Isulis Ocidentâls de Scozie (Comhairle nan Eilean Siar) a àn svilupât une aplicazion gratuite e un sît internet par judâ i fruts a imparâ e a cjantâ lis cjançons gaelichis. Si trate di imprescj che gjenitôrs, insegnants e educadôrs a puedin doprâ par svicinâ lis gnovis gjenerazions al cjant par gaelic e, di chê strade, par rindi inmò plui atrative cheste lenghe.
Font: BBC, 18/11/15

Paîs Catalans: tes Baleârs al torne il volontariât linguistic

La direzion gjenerâl di politiche linguistiche des isulis Baleârs e à decidût, in gracie de colaborazion cu la associazion culturâl Paraula, di tornâ a inviâ il program di volontariât linguistic. La iniziative e met in contat une persone che e à voie di esercitâsi cul catalan cuntune che lu fevele come prime lenghe. Lis cubiis linguistichis a judin sei a miorâ lis capacitâts linguistichis, sei a integrâ lis personis che a àn mancul familiaritât cu la lenghe.
Font: 20 minutos, 17/11/15

Cravuazie: minorancis e regjonaliscj cul front progressist

Lis elezions politichis che si son tignudis sul imprin di Novembar in Cravuazie no àn produsût une maiorance clare in stât di guviernâ il stât. La HDZ (Union Democratiche Cravuate), cui siei 59 parlamentârs, e je stade la plui votade ma no somee in stât di cjatâ aleâts par formâ un guvier. Most, la tierce liste plui votade, si è viodude boçâ la propueste di un guvier di “unitât nazionâl” e, fûr di cheste opzion, e refude cualsisei acuardi. La aleance vuidade dal partît sociâl democratic, che e à otignût 56 elets, e je duncje impegnade a cirî di meti adun une coalizion di guvier. Par fâlu e à però di rivâ a cjatâ la poie di almancul altris 20 parlamentârs. Par cumò la disponibilitât par meti sù un gnûf guvier progressist e je rivade dai vot deputâts espression des minorancis nazionâls dal paîs, dai trê elets de formazion regjonaliste Dieta Democratica Istriana, di trê deputâts dai partîts dal sindic di Zagabrie Milan Bandic e dal ex ministri pe economie Radimir Cacic, e ancje di un parlamentâr espuls di Most. Une poie esterne e podarès invezit rivâ dal partît conservadôr Aleance Democratiche Cravuate de Slavonie e de Baranja (HDSSB).
Font: Balkan Insight, 16/11/15

Paîs Catalans: catalan lenghe “abituâl” dal guvier valenzian

La comission interdipartimentâl su lis politichis linguistichis de Comunitât Autonome Valenziane e à decidût che la varietât catalane fevelade intal Paîs Valenzian e sarà la lenghe di comunicazion “abituâl” des istituzions autonomichis. Il catalan al sarà duncje doprât in maniere progressive sei tes comunicazions internis dal guvier valenzian, sei ta chês cun chês altris istituzions de comunitât. Par judâ i dipendents publics a meti in vore chest percors si larà a elaborâ une vuide dai ûs linguistics e un plan di compagnament che ur metarà a disposizion imprescj e ativitâts formativis.
Font: La Vanguardia, 16/11/15

Friûl: imprescj linguistics pal furlan te aministrazion publiche

La aministrazion de Regjon Autonome Friûl – Vignesie Julie e à decidût di meti in cjamp une azion di politiche linguistiche par facilitâ l’ûs de lenghe furlane intai ents publics de aree furlanofone. Cu la colaborazion de societât informatiche regjonâl Insiel, la aministrazion regjonâl e à cjolt a nauli par un an de cooperative Serling un servizi di traduzion automatiche di alt nivel che al permet di voltâ dal talian al furlan documents aministratîfs e altris tescj par judâ i dipendents de regjon, dai comuns, des aziendis sanitariis e di altris struturis publichis a doprâ la lenghe furlane. In plui dal tradutôr, i dipendents publics a varan acès a un coretôr ortografic furlan e al grant dizionari bilengâl talian furlan che al ufrìs passe 60 mil lemis furlans.
Font: RAFVG ARC, 16/11/15

Ocitanie: si è inviât l’Ufici public de lenghe ocitane

Joibe ai 12 di Novembar a Tolose, intai spazis dal retorât, si è insedât l’Ufici public de lenghe ocitane (OPLO). Ae prime riunion, clamade ancje a fissâ il program des ativitâts e lis liniis di spese dal gnûf organisim, a àn partecipât ancje diviers conseîrs de Aquitanie e dai Pireneus di Mieç, o sei lis dôs regjons che a àn decidût di metilu sù. L’ufici, che il percors pe sô nassite al è stât avonde tribulât, al è clamât a svilupâ une politiche unitarie a pro de lenghe ocitane. Nol è tant che ancje la regjon de Alvernie e à decidût di aderî a cheste gnove struture, intant che la Provence e à fat savê di jessi interessade a fâlu.
Font: Jornalet, 12/11/15

Paîs Basc: in Navare a tornin i fonts pai cors di basc pai adults

Tra lis novitâts puartadis de coalizion nazionalitarie che e à cjapât il puest de diestre spagnoliste intal guvier de Navare si cjatin ancje i finanziaments pal insegnament de lenghe basche (euskaldunizazion) ai adults. Ai 11 di Novembar, di fat, al è stât publicât il bant che al assegne passe 130 mil euros pai cors invernâi. Al jere dal 2012 che il guvier de Navare al veve smetût di assegnâ fonts par chestis ativitâts. L’insegnament dal euskara pai adults par solit al ven puartât indenant di entitâts tant che euskaltegis o gau-eskolas che a àn cheste ativitât come fin principâl.
Font: Diario de Navarra, 11/11/15

Carelie: ativist sot procès par vê fevelât di indipendence

Vladimir Zavarkin, conseîr intun comun de Carelie, al è sot procès cu la acuse di vê saborât il separatisim di chest teritori de Federazion Russe. Intant di un intervent public, dopo vê criticât il governadôr Alexander Khudilainen e lis autoritâts russis acusantlis di disfrutâ la Carelie cence dâ rispuestis aes dibisugnis dal teritori, Zavarkin al veve dite che se il guvier rus nol ves abadât aes domandis dai carelians al sarès stât il câs di inmaneâ un referendum su la separazion di chest teritori de Federazion Russe. Par acusis similârs nol è tant che lis autoritâts russis a àn condanât a trê agns di preson l’ativist tatar Rafis Kashapov.
Font: Finugor, 11/11/15

Cossovo: blocât il percors de associazion dai comuns serps

La cort costituzionâl dal Cossovo e à blocât il procès di creazion de Zajednica, la Assemblee dai comuns serps, che e rapresente il passaç centrâl dai acuardis sotscrits in Avost a Bruxelles dal prin ministri serp Aleksandar Vučić e di chel cossovan Isa Mustafa. In cambi di une plene integrazion intal Cossovo, il pat firmât al previôt la nassite di une Assemblee che e tegni adun i comuns cossovans a maiorance serbe cun competence primarie su salût, svilup economic, educazion e planificazion urbanistiche e cun finanziaments che a rivin ancje de Serbie. Il percors legjislatîf pe nassite di cheste istituzion al è stât però pidimentât plui voltis de oposizion ultranazionaliste cossovane che e à fintremai tirât lacrimogjens intant des riunions dal Parlament par impedî la sô aprovazion. Il president cossovan al à cussì decidût di puartâ il test denant de cort costituzionâl par che si esprimi su la sô legjitimitât. La sentence de cort e je spietade pai 12 di Zenâr. La impugnazion dal progjet di leç e à però jevât la asse de comunitât serbe dal Cossovo e des autoritâts di Belgrât.
Font: Balkan Insight, 10/11/15

Jersey: plui lenghe proprie intes scuelis de isule

Cun chest an che al ven il jèrriais, o sei la varietât linguistiche normande fevelade in Jèrri / Jersey, al varà plui spazi tes scuelis de isule. Ta chescj mês, di fat, al è daûr a jessi formât un grup di insegnants plui grant di chel disponibil fin cumò. La formazion, curade dal ufici pal jèrriais, e je poiade dal guvier locâl che le à metude dentri intal gnûf program culturâl pal prossim an scolastic.
Font: BBC, 10/11/15

Scozie: sburt par incressi la produzion di BBC Alba

Il consei provinciâl des Highlands al à fat so l’apel de MG Alba par incressi la produzion de television publiche in lenghe gaeliche di BBC Alba. La emitente televisive, metude sù intal 2008, e pues contâ suntun public di 700 mil spetadôrs par setemane. In dì di vuê però il 73% des sôs emissions a son replichis. La produzion origjinâl e je di mancul di cuatri oris e mieze par setemane. MG Alba, che e lavore adun cu la BBC inte emitence par gaelic, e domande di rivâ almancul a dîs oris par setemane. Il contrat di servizi cu la BBC al scjât ai 31 di Dicembar di chest an che al ven, l’intervent des aministrazions publichis al pues duncje judâ a meti dentri intal prossim contrat la incressite de produzion televisive par gaelic.
Font: BBC, 06/11/15

Sardegne: il Comun di Casteddu al slargje l’ûs dal sart

Il consei comunâl di Casteddu / Cagliari al à fat bon il gnûf statût dal ent che al previôt novitâts significativis ancje pe lenghe sarde. L’articul 12 de gnove cjarte comunâl, fat bon cu la poie unanime dai conseîrs, al impegne l’ent a promovi l’implei dal sart tant che lenghe di ûs cuotidian, a partî des comunicazions istituzionâls cui citadins. Il statût al va duncje te direzion di meti in vore la leç statâl e chê regjonâl su lis lenghis “minoritariis” intal sens plui larc. Ta cheste suaze e jentre ancje le prevision dal bilinguisim visîf cu la presince dal sart dongje dal talian inte toponomastiche e te segnaletiche stradâl.
Font: Sardinia Post, 03/11/15

26/11/15

Paîs Catalans: su la strade de Republiche catalane

E je une situazion in plene evoluzion chê che si è daûr a vivi ta chescj dîs in Catalogne. Lunis ai 9 di Novembar il Parlament al à votât cun 72 vôts a pro e 63 cuintri la declarazion elaborade adun di Junts pel Sí e CUP che e invie il percors pe costruzion de Republiche catalane. Une declarazion che si è insiorade ai 6 dal mês di une zonte che e impegne il gnûf guvier catalan a blindâ i dirits sociâi di fonde cul meti in vore dome lis misuris decidudis dal Parlament de Catalogne cence tignî cont des leçs spagnolis che a limitin chescj dirits. Chest al vûl dî, par esempli, garantî lis tutelis catalanis in materie sanitarie, energjetiche e di alozament e no meti in vore la gnove leç spagnole su la educazion o la cussì clamade “leç bavai”. La diestre spagnoliste – Ciudadanos e PP – adun cui socialiscj (PSC) e à presentât ricors al tribunâl costituzionâl cuintri de declarazion, cence rivâ però a fâ suspindi la riunion dal Parlament clamade dongje par votâ l’at. La votazion si è davuelte duncje ai 9 di Novembar, ancje se il guvier spagnûl al veve comunicât ancjemò prime dal vôt che la declarazion e sarès stade impugnade daurman denant dal tribunâl costituzionâl. In gracie de gnove normative fate buine propit dal PP spagnûl, la impugnazion e puartarà in automatic ae sospension dal at e dai siei efiets.
Font: VilaWeb, 09/11/15; Naiz: 09/11/15; El Pais, 09/11/15

Paîs Basc: il guvier dal PNV al sbasse i fonts pal euskara

Tal analizâ lis vôs dal stampon de leç finanziarie pal 2016 de Comunitât Autonome Basche, il cuotidian Gara al à segnalât che, se la manovre e ves di jessi confermade, e sarà chê che e met mancul risorsis pe lenghe basche dai ultins cuindis agns. Pe promozion dal euskara a son di fat previodûts 104,4 milions di euros, o sei il 0,95% dal belanç complessîf de Comunitât, cuant che l’an passât par cheste vôs si veve metût il 0,97% e tal 2014 l’1%. Cheste erosion dai bêçs pal euskara no diven di une disponibilitât complessive plui basse di risorsis che in realtât a son cressudis. La cuistion e je stade puartade in Parlament dai rapresentants de çampe indipendentiste basche (EH Bildu), ma de bande dai rapresentants dal PNV, i nazionaliscj moderâts cumò al guvier inte Comunitât, no je rivade nissune spiegazion in proposit.
Font: Naiz:, 05/11/15

Cornualie: unanimitât in Consei sul plan pe lenghe

Il Consei de Cornualie, ducj dacuardi, al à fat bon il plan trienâl par promovi la lenghe proprie. Il plan pal cornic al ponte prin di dut a sburtâ il so ûs dentri de aministrazion publiche cuntune incressite de sô visibilitât sei intal scrit che te comunicazion verbâl cui citadins. Si previôt duncje di sburtâ il personâl dal Consei e dai uficis publics che i fasin riferiment a doprâ almancul cualchi frase par cornic in maniere di rindi la lenghe une presince cuotidiane. In Cornualie si calcole che a sedin uns 5 mil lis personis in stât di fevelâle, 400 di lôr une vore ben. L’interès pal cornic al va però dilunc a cressi e si stime duncje che il bon esempli dât des istituzions publichis al puedi jessi imitât di altris sogjets publics e privâts. Si tacarà duncje cun ce che al è di plui sempliç: segnaletiche e tabelonistiche bilengâl ator pe Cornualie, presince paritarie dal cornic te cjarte intestade e tes scritis uficiâls dal Consei, salûts di benvignût e piçulis frasis in lenghe proprie de bande dai dipendents publics, cors in rêt par imparâ lis fondis dal cornic, facilitazions par cui che al dopre ancje cheste lenghe e vie indenant.
Font: BBC, 04/11/15

Paîs Catalans: tes Baleârs si torne ae normalizazion linguistiche

Ai 3 di Novembar il Parlament des Baleârs al fate buine une propueste par mendâ la leç su la normalizazion linguistiche. Il proviodiment, poiât dai partîts nazionalitaris e di chei progressiscj (PSIB, Podemos, Més, PI) e contestât de diestre spagnoliste (PP e Ciudadanos), si propon di recuperâ il percors di normalizazion linguistiche pidimentât cuant che il PP al veve in man il guvier des isulis. Si trate di infuartî la presince dal catalan inte aministrazion publiche, tal sisteme educatîf e tai mieçs di comunicazion par compensâ la situazion di disavualiance che si cjate a patî rispiet al spagnûl. Tra lis azions in program o vin ancje la modifiche de leç su la funzion publiche in maniere di tornâ a meti la cognossince dal catalan tant che element necessari par podê lavorâ intune aministrazion publiche.
Font: Mallorca Diario, 03/11/15

Paîs Catalans: progjet par stiçâ la leture di rivistis par catalan

La associazion des publicazions periodichis par catalan (APPEC), che e ten adun i editôrs di uns 150 rivistis publicadis ta cheste lenghe, e la direzion gjenerâl di politiche linguistiche dal guvier de Catalogne a àn inviât il progjet “T’agradarà llegir en català” che si propon di saborâ la leture di rivistis par catalan. La iniziative e partìs cuntune azion di prove che e previôt la distribuzion di 9 mil numars di rivistis par catalan su argoments i plui diviers in 300 ambulatoris e centris medics sparniçâts par un centenâr di citâts e paîs de Catalogne.
Font: Generalitat de Catalunya, 30/10/15

Aragon: lis associazions a sburtin par une lenghe comune

Lis organizazions impegnadis pe promozion dal aragonês a àn sotscrit un document unitari là che a domandin al guvier de comunitât di impegnâsi par un plan di normalizazion di cheste lenghe. Prin di dut a domandin che si puarti insom il percors inviât intal 2006 par rivâ a di un gnûf implant ortografic pal aragonês e che si ledi a valorizâ sei il model di lenghe standard, sei lis varietâts di riferiment de lenghe. Un tant al permetarà ancje di dâi fondis siguris aes azions par promovi la lenghe te aministrazion publiche e te scuele. Si domande po di svilupâ un sisteme di certificazion linguistiche daûr dal cuadri comun european di riferiment pes lenghis in maniere di vê un criteri ricognossût par selezionâ il personâl clamât a insegnâ il e par aragonês.
Font: Aragon Digital, 29/10/15

Paîs Catalans: Milmots al valorize ancje il lessic locâl

Intai Paîs Catalans al è stât lançât Milmots, une plateforme interative che e à chê di fâ cognossi e di condividi il lessic locâl dal catalan. Chest gnûf imprest informatic al permet ai utents di meti dentri peraulis e frasis specifichis dal lôr paîs o de lôr aree in maniere di svilupâ une bancje dâts che e permeti di savê cuale che e je la difusion gjeografiche di ciertis peraulis o mûts di dî e di cognossi il lessic carateristic di altris lûcs dai Paîs Catalans.
Font: Generalitat de Catalunya, 29/10/15

Serbie: tescj cossovans blocâts, proteste tes scuelis albanesis

Insegnants e students di lenghe albanese dai comuns di Preševo / Presheva e Bujanovac, in Serbie, a àn decidût di boicotâ lis lezions par protestâ cuintri di chel che a calcolin l’ostruzionisim des autoritâts serbis sui libris di test par albanês. La scjarsetât di tescj pe scuele te lôr lenghe e veve puartât lis organizazion de comunitât albanese a domandâ un jutori al ministeri pe educazion dal Cossovo. I 103 mil libris mandâts des autoritâts cossovanis a son però blocâts di Setembar intai magazens de dogane di Preševo / Presheva e i invîts fats al prin ministri serp e al ministri pe educazion par che a intervegnin no àn dât risultâts. La uniche rispueste rivade di Belgrât e je che i libris di test par podê jessi doprâts a àn prime di passâ pal tamês des autoritâts scolastichis. Il guvier cossovan al acuse però chel serp di vê rot l’acuardi cjatât propit sul imprin di Setembar par permeti aes dôs minorancis – chê albanese in Serbie e chê serbe in Cossovo – di doprâ libris di test che a rivin des lôr comunitâts nazionâls di riferiment.
Font: Balkan Insight, 28/10/15

Paîs Basc: za in 55 mil par vê un miedi euskaldun

Cun chest an al à tacât a jentrâ in vore inte Comunitât Autonome Basche il secont plan gjenerâl dal euskara che al previôt gnovis pussibilitâts par cui che al fevele par basc. Tra lis novitâts previodudis si à ancje chê di sielzi l’euskara tant che lenghe di riferiment par dutis lis comunicazions cul sisteme sanitari public. Jenfri Avrîl e Setembar a son za 55 mil lis personis che a àn sielzût cheste opzion, pe plui part (79%) inte provincie de Gipuzkoa là che la lenghe e je plui fuarte. La pussibilitât di sielzi la lenghe di riferiment no je però ancjemò cognossude di ducj e duncje il guvier basc al à chê di inviâ dentri de fin dal an une campagne di pueste par informâ su la novitât. Ancje i operadôrs sanitaris a puedin comunicâ cuale che e je la lenghe che a àn miôr di doprâ: fin cumò a son uns tresinte chei che a àn indicât l’euskara.
Font: El Mundo, 28/10/15

Stât francês: fermade la ratifiche de Cjarte des lenghis

I tentatîfs par che il stât francês al ratifichi la Cjarte europeane des lenghis regjonâls o minoritariis a son lâts strucs ancjemò une volte. Cun di fat, ae vilie de riunion dal Congrès francês, ven a dî Senât e Assemblee adun, là che si varès vût di votâ su la metude in vore de Cjarte, il Senât al à fate buine une mozion cuintri dal test di ratifiche par impedî che al rivàs al esam dal Congrès. Cuintri de mozion a àn votât i senatôrs socialiscj, ecologjiscj e comuniscj, ma i lôr 155 vôts no son stâts avonde par bati i 179 des diestris. Cun di fat, fale par cualchi dissident, i Républicains (ex UMP) di Nicolas Sarkozy e la UDI a àn votât in bloc par fermâ la ratifiche. Doi i obietîfs di cheste azion, ven a dî: fâ inçopedâ il president François Hollande che si veve impegnât a fâ ratificâ la Cjarte e tignî batût su la linie jacobine che e viôt intes lenghis minorizadis une menace pe identitât e pe unitât de Republiche francese.
Font: Libération, 27/10/15; Le Monde, 28/10/15

Galizie: un decret dal guvier al ridûs il galizian a scuele

Il plan par meti in vore il decret sul plurilinguisim vie pal an scolastic 2015/2016 al sbasse la presince de lenghe galiziane te grande part dai istitûts là che il proviodiment al sarà metût in vore. Il decret dal guvier galizian al previôt l’ûs veicolâr ancje dal inglês, ma la plui part dai istitûts là che al sarà metût in vore e à decidût di doprâ cheste lenghe par une des materiis che fin cumò a jerin par galizian. Il stes decret al previodeve che in câs dal gjenar si dopràs il galizian veicolâr par une altre materie, dome che l’esecutîf vuidât dal PP nol à fat rispietâ cheste cundizion. A denunciâlu al è il sindacât CIG-Ensino che al domande che il decret al vegni scancelât e che al so puest si dedi fûr un proviodiment che al rispieti e che al promovi la lenghe proprie de Galizie dentri des scuelis.
Font: Galicia Confidencial, 27/10/15

Gales: sburt par incressi la multimedialitât par galês

Ativiscj pe lenghe galese a àn presentât intal Parlament britanic une propueste par incressi il servizi audiovisîf par galês cuntune plateforme multimediâl che e slargji contignûts, imprescj e modalitâts di difusion plui innà di ce che in dì di vuê a produsin S4C e Radio Cymru. Tai ultins agns, di fat, si à vude une incressite massive di televisions e di radios par inglês, intant che il galês al à vût di fermâsi a une emitente televisive e une radio. Doprâ la multimedialitât par incressi i servizis al judarès ancje a svicinâ di plui i zovins ai prodots audiovisîfs par galês.
Font: Wales On Line, 27/10/15

05/11/15

Stât francês: in miârs in place pes lenghis propriis

Sabide ai 24 di Otubar miârs di personis a àn partecipât aes mobilitazions inmaneadis in diviersis localitâts dal stât francês par fâi cuintri al centralisim statâl e par domandâ un ricognossiment uficiâl des nazionalitâts, des lenghis e des culturis storichis che si cjatin tal so interni. Lis manifestazions principâls si son davueltis a Montpelhièr / Montpellier pe Ocitanie (10 mil personis), a Baiona / Bayonne pal Paîs Basc setentrionâl (5 mil personis), a Karaez / Carhaix pe Bretagne (3 mil personis), a Aiacciu / Ajaccio pe Corsiche, a Strasburc e a Metz pe Alsazie e pe Lorene. La iniziative e rive ae vilie des riunions dal Parlament francês par decidi su la ratifiche de Cjarte europeane des lenghis regjonâls o minoritariis.
Font: Agence Bretagne Presse, 25/10/15; Jornalet, 25/10/15

Paîs Basc: 4 agns cence violence di ETA, ma no dal stât

Intune conference stampe fate in ocasion dai cuatri agns de fin de ativitât armade di ETA, il puartevôs di Sortu, moviment di riferiment de çampe indipendentiste basche, Pernardo Barrena al à fat il pont su la situazion politiche tal Paîs Basc. Ancje cun riferiment a ce che al è daûr a sucedi in Catalogne, par Barrena al covente sburtâ sul percors pe indipendence. Par chel che al rivuarde il svilup dal procès di pâs, il puartevôs di Sortu al à dite che al è mancjât dal dut il contribût dal guvier spagnûl e dai partîts spagnoliscj (PP e PSOE). Cun di fat, se ETA e la aree radicâl basche a àn rinunciât a ogni forme di violence, il stes no si pues dî pal stât spagnûl che al va dilunc sei cu la politiche di dispersion e di dinei dai dirits dai presonîrs e des lôr fameis, sei cu la persecuzion politiche e judiziarie de çampe indipendentiste. Ta cheste categorie, par esempli, e jentre ad in plen la situazion di Arnaldo Otegi impresonât par terorisim si ben che al fos il prin promotôr dal procès di pâs e che al davuelzès dome ativitât politiche. A van cussì indenant lis iniziativis pe liberazion sô e di chei altris presonîrs politics bascs che ai 17 di Otubar a àn puartât in place a Donostia passe 18 mil personis.
Font: Naiz:, 20/10/15

Irlande: il DUP al torne a jentrâ tal guvier tal Nord

Il prin ministri Peter Robinson e chei altris membris dal DUP che a componevin il guvier compartecipât de Irlande dal Nord adun cul Sinn Féin a àn decidût di tornâ a ocupâ i lôr puescj dopo des dimissions fatis indenant in Setembar. La decision e je rivade dopo de relazion presentade intal Parlament britanic de segretarie di stât pe Irlande dal Nord su la ativitât dai grups paramilitârs inta cheste part dal Ream Unît. I unioniscj si vevin gjavâts dal esecutîf nordirlandês dopo che l’Esercit Republican Irlandês (IRA) e il Sinn Féin a jerin stâts tirâts dentri intes investigazions sul sassinament di doi ex membris dal moviment armât irlandês. Intal rapuart elaborât de polizie e dai servizis segrets britanics si dîs che la struture di comant dal IRA, ma ancje dai moviments paramilitârs unioniscj, e je ancjemò in pîts ma e opere dome cun mieçs pacifics e cence nissune intenzion di tornâ ae lote armade. Personis che a àn fat part di chestis organizazions a varessin inmò acès a armis e rapuarts cu la criminalitât comune, ma si fevele di câs isolâts za al centri di ativitâts investigativis. E cole cussì la operazion di delegjitimazion cuintri dal Sinn Féin, organizazion politiche di riferiment pai republicans irlandês, puartade indenant di ambients unioniscj.
Font: BBC, 20/10/15

Paîs Basc: progjet par une federazion comunâl basche tal Nord

La prefeture dal dipartiment dai Pireneus Atlantics e à fate sô la idee di une istituzion aministrative proprie par Ipar Euskal Herria, o sei pes provinciis dal Paîs Basc sot aministrazion francese. La gnove istituzion, par cetancj agns al centri di rivendicazions popolârs, e podarès nassi intal 2017 tant che organizazion publiche di cooperazion intercomunâl (ÈPCI) inte suaze de riforme aministrative inviade intal stât francês. Sul imprin cheste federazion comunâl e varès competence su svilup economic, politichis urbanistichis e gjestion de aghe, ma e podarès cjapâ sù ancje politichis linguistichis, culturâls e ambientâls. Il percors pe sô istituzion al previôt che i conseis comunâi de aree interessade a votin su la propueste dentri de fin dal 2016. Denant di cheste pussibilitât, il coordenament Batera, nassût propit cun chê di sburtâ la nassite di une aministrazion specifiche par Ipar Euskal Herria, al è cumò daûr a inmaneâ une caravane che e scjavaçarà i passe 150 comuns de aree basche par sensibilizâ citadins e aministradôrs su chest teme.
Font: Jornalet, 18/10/15

Asturiis: vie libare in Parlament pal plan di svilup linguistic

Ai 16 di Otubar il Parlament asturian al à fate buine une propueste no di leç fate indenant di Izquierda Unida là che al è dentri un plan par valorizâ e svilupâ la lenghe asturiane dilunc vie de legjislature in at. In plui dal partît che lu à proponût, il plan al à vût il vôt a pro ancje dai socialiscj (PSOE), di Podemos e di Foro Asturias, intant che i deputâts di Ciudadanos si son astignûts e chei dal PP a àn votât cuintri. Il plan al previôt une incressite des risorsis pal asturian, il so ûs progressîf intai boletins uficiâi, te comunicazion e te publicitât istituzionâl, inte tabelonistiche dai uficis publics e te radiotelevision publiche cun chê di rivâ a di une presince de lenghe intal 30% de programazion televisive e intal 50% di chê radiofoniche. Sul front de istruzion, invezit, l’intindiment al è chel di rivâ a di un ricognossiment specific pai insegnants di lenghe asturiane (ma ancje galiziane des Asturiis) in dut il cicli scolastic, di svilupâ un progjet pilote di ûs veicolâr dal asturian e di garantî la pussibilitât di vê il so insegnament in dutis lis scuelis.
Font: El Comercio, 16/10/15

Stât francês: consultazion su la Cjarte europeane des lenghis

Ai 13 di Otubar il ministeri de justizie francês al à ativât une consultazion in linie su la ratifiche de Cjarte europeane des lenghis regjonâls o minoritariis. Intal cuestionari disponibil in rêt i citadins a puedin segnalâ i trentenûf tra i novantevot ponts che a formin la Cjarte che si à di fâ bogns par podê ratificâ il document. Si trate di une azion di valôr consultîf, ma che i ativiscj des diviersis comunitâts minorizadis dal stât francês a judichin impuartant par mostrâ l’interès de int par cheste tematiche. Tra la fin di Otubar e i prins di Novembar il Parlament francês al sarà po clamât a votâ par decidi se dî di sì o di no ae ratifiche de Cjarte. Pe aprovazion al covente almancul il 60% di vôts a pro.
Font: Jornalet, 16/10/15

Paîs Basc: prin studi sul impat economic dal euskara

Inte suaze di un apontament inmaneât dal guvier de Comunitât Autonome Basche e de rêt europeane NPLD al è stât presentât un rapuart sul impat economic dal euskara. Si trate dal prin studi sientific european che al fronte in detai il pês reâl di une lenghe minorizade intal tiessût economic de societât che le fevele. Pal referent de politiche linguistiche de CAB, Patxi Baztarrika, il studi al mostre a clâr la impuartance dal euskara ancje sul plan economic e al permet di sdrumâ i prejudizis che a metaressin in dubi la utilitât di cheste lenghe. L’euskara al rapresente il 4,2% dal prodot interni sporc de Comunitât Autonome basche e al garantìs il 6,28% de ocupazion, ven a dî passe 56 mil puescj di vore: sù par jù 43 mil direts, passe 3 mil indirets e cuasi 10 mil di indot.
Font: El Diario, 15/10/15

Paîs Catalans: di gnûf in vore il Consei sociâl de lenghe

Intes Baleârs al torne a dâsi adun il Consei sociâl de lenghe catalane, restât fer par cuatri agns tant che efiet dal dismantelament de direzion gjenerâl di politiche linguistiche metût in at de diestre spagnoliste cuant che e jere al guvier. Cul tornâ a metilu in vore, il gnûf guvier progressist e nazionalitari des isulis al vûl duncje mostrâ il so impegn a pro dal ûs sociâl de lenghe proprie des Baleârs. Intal organisim, che al à une funzion consultive su la politiche linguistiche, a son dentri uns 50 rapresentants des realtâts plui significativis des isulis.
Font: El Dia, 14/10/15

Sami: i dirits antîcs su tiere e aghe tal archivi UNESCO

La UNESCO e à decidût di cjapâ dentri intal so Archivi de memorie dal mont ancje i tratâts jenfri la Russie zariste e i sami Skolt là che si ricognossevin i dirits antîcs di cheste comunitât su la tiere e su la aghe e là che si ur garantive ancje libertât di pescje e di arlevament. Si trate di documents che a van dal 1601 al 1775, ma che a confermin dirits ricognossûts za di prime. La part plui antighe dai documents, di fat, e je lade pierdude intal 1859 intant de vuere jenfri Russie e Svezie. I tratâts a son cumò conservâts intal centri culturâl sami di Aanaar / Inari in Finlande. L’Archivi UNESCO al ten dentri i documents judicâts fondamentâi pe storie dal mont che, in dì di vuê, a son plui o mancul 340. Pe presidente dal Parlament sami de Finlande, Tiina Sanila-Aikio, la sielte de UNESCO e rapresente un ricognossiment dai dirits di cheste comunitât native e de sô capacitât di difindiju intai secui a dilunc.
Font: Barents Observer, 13/10/15

Scozie: plui fuarce al gaelic te educazion

Intant des audizions sul progjet di leç su la istruzion che al è cumò al esam dal Parlament scozês, i rapresentants dal Bòrd na Gàidhlig si son cjatâts cul ministri pe educazion Alasdair Allan e i àn proponût cualchi modifiche al test par infuartî la presince dal gaelic inte scuele. In particolâr si à domandât di favorî la presince di scuelis cul gaelic curicolâr pardut là che si vedi une domande suficiente de bande des fameis, di garantî l’ûs de lenghe in dut il percors scolastic e no dome intes primariis, e di mantignî i finanziaments pe formazion dai insegnants di e par gaelic. Par intant il guvier al à assegnât al Bòrd un contribût di 50 mil sterlinis par inviâ une gnove campagne che e promovi i vantaçs di une educazion bilengâl e cul gaelic veicolâr. Intai ultins trê agns la agjenzie pe lenghe gaeliche e à za puartât indenant diviersis campagnis cun chest obietîf e i risultâts si viodin inte incressite dai fruts iscrits aes scuelis gaelichis che di 406 tal an scolastic 2011/12 a son passâts a 556 tal 2014/15. Ancje a Edimburc, là che la lenghe no à une presince significative, si môf alc. Cun di fat, intal gnûf plan educatîf imbastît dal consei comunâl si previôt che in dutis lis scuelis citadinis si vedi la pussibilitât di inserî come seconde o tierce lenghe ancje il gaelic (adun cun francês, spagnûl, cinês mandarin, polac e farsi).
Font: Bòrd na Gàidhlig, 12 e 14/10/15; BBC, 13/10/15

Gales: plui galês tes scuelis, l’impegn dal guvier

Inte suaze des iniziativis par lançâ la strategjie “Global Futures”, che si propon di formâ citadins bilengâi cun competencis ancje tune tierce lenghe, il ministri galês pe educazion Huw Lewis si è cjatât cuntune delegazion de Cymdeithas yr Iaith Gymraeg, organizazion in prime linie inte difese dai dirits linguistics. Lis scuelis cul galês tant che seconde lenghe no àn dât i risultâts che si sperave e, pal ministri, si à di pontâ intal zîr di cinc agns a slargjâ l’ûs dal galês veicolâr, o sei doprât par insegnâ un pocjis di materiis, in maniere di ufrî a ducj i students la pussibilitât di imparâ pardabon il galês. La linie di Lewis e cjate in cunvigne la Cymdeithas che di agns e sburte par lâ ta cheste direzion. La organizazion e domande però al guvier di meti jù chest principi tal so plan strategjic e tai obietîfs pe scuele, in câs contrari al sarà dificil cambiâ la situazion di vuê.
Font: Cymdeithas, 12/10/15

23/10/15

Cornualie: plan par sburtâ i operadôrs publics a doprâ il cornic

Il Consei de Cornualie al è daûr a svilupâ un plan che al ponte a promovi la lenghe proprie e a sburtâ il so ûs. Il cornic, lenghe celtiche imparintade cul galês, al è calcolât tant che prime lenghe di uns 300 personis, o sei mancul dal un par cent de popolazion, ma al è fevelât di cualchi miâr di lôr e il so atrat al va dilunc a cressi. Il plan pe lenghe corniche, che la sô discussion intal Consei e je in program ai 4 di Novembar, al vûl duncje infuartî chest procès e ufrî plui ocasions ae int par viodile scrite, par sintîle e par doprâle. Tra lis novitâts previodudis si fevele ancje di sburtâ ducj i dipendents des aministrazions publichis locâls a imparâ e a doprâ almancul cualchi frase par cornic in maniere di tacâ a rindi la lenghe une presince cuotidiane, ancje se limitade, e a infuartî il leam che operadôrs publics e citadins a àn cu la identitât specifiche de Cornualie.
Font: The Guardian, 07/10/15

Irlande: mobilitazion par une vere politiche linguistiche

Ai 7 di Otubar la organizazion Conradh na Gaeilge e la Union dai Students in Irlande (USI) a àn inmaneât une manifestazion denant dal Parlament de Republiche de Irlande par domandâ che il guvier che al jessarà des prossimis elezions al puarti indenant une politiche linguistiche che e permeti pardabon di valorizâ e di promovi il gaelic irlandês. A peraulis, di fat, ducj a son a pro de lenghe proprie de isule, ma intai fats si lasse che lis robis a ledin juste de bande contrarie cemût che a mostrin vicendis capitadis ancje di resint sei sul plan dai curricola formatîfs, sei su chel de toponomastiche uficiâl. Cence dismenteâ che tra il 2008 e il 2015 i fonts pe autoritât che e gjestìs lis areis là che il gaelic al è ancjemò lenghe de comunitât (Gaeltacht) si son smiezâts passant di 45 a 22 milions di euros. Lis prossimis elezions a son duncje calcoladis tant che un pont centrâl par savoltâ cheste situazion e inviâ une politiche vere di normalizazion linguistiche. Ta cheste direzion al va ancje il manifest pe lenghe presentât juste la vilie de manifestazion di Conradh na Gaeilge, USI e altris setante organizazions impegnadis pal irlandês. Intal document si ricuarde ancje che invistî su la lenghe al è ancje un sburt pe ocupazion, massime chê zovanîl.
Font: UTV Ireland, 07/10/15