Cossovo: siopars e gnovis protestis de minorance serbe

I magjistrâts, i funzionaris judiziaris e i rapresentants politics espression de minorance serbe in Cossovo a àn fat siopar ai 25 di Març par protestâ cuintri de sospension de presidente dal tribunâl di Mitrovica, Liljana Stefanovič, e de decision dal consei judiziari dal Cossovo di meti sù une comission di inchieste par investigâ sul so compuartament. Daûr di chestis decisions al è l’incuintri che la magjistrade, intune cun altris membris de minorance, e à vût a Belgrât cul president serp Aleksandar Vučič dopo che lis istituzions cossovanis si son refudadis di permeti che lis urnis pes elezions serbis dai 3 di Avrîl a fossin metudis ancje tai comuns dal Cossovo là che a vivin comunitâts serbis. Un dinei, chel des autoritâts di Pristina, che par Vučič al va cuintri dai acuardis di Bruxelles dal 2013 che a cirivin di normalizâ i rapuarts tra Serbie e Cossovo. In plui dal siopar, ai 25 di Març si son tignudis ancje manifestazions di proteste cu la partecipazion di centenârs di lôr a Mitrovica e in altris localitâts a maiorance serbe.

Font: Balkan Insight, 25/03/22

Cossovo: ancjemò scuintris e violencis a Mitrovica

No si fermin lis violencis e lis tensions inte part setentrionâl dal Cossovo a maiorance serbe. La mediazion europeane e veve permetût di cjatâ un acuardi tra lis parts dopo che il guvier di Pristina al veve introdusût l’oblic pai veicui cun targhe serbe di gjavâle e sostituîle cuntune cossovane cuant che a passavin il confin: une decision che e veve causât scuintris tra i membris de comunitât serbe che a vevin ocupât il passaç di confin di Brnjak / Bernjak e i reparts speciâi de polizie mandâts des autoritâts statâls. Par garantî la tignude de intese sul puest a jerin stâts inviâts ancje reparts des fuarcis di interposizion de NATO. Cuant che la crisi e someave aromai superade, i cuartîrs setentrionâi di Mitrovica – aree là che si centre la plui part de minorance serbe – a son stâts interessâts di une operazion di polizie che e à puartât al arest di vot personis. La iniziative e jere indreçade a colpî la criminalitât organizade ma, te clime di tension che za e jere, e je stade lete come une vere invasion puartant grups di serps a tirâ sù baricadis pes stradis a e confrontâsi cu la polizie a colps di molotovs. Tai scuintris un serp al è stât ferît cuntune arme di fûc. Il president serp, Aleksandar Vučić, intant di un incuintri cui rapresentants de minorance, ju à invidâts a rispuindi in maniere pacjifiche ma al à ancje zontât che a àn il dirit di difindisi cuant che a son atacâts cu la violence e che, se al ves di sucedi, la Serbie ju poiarà. Invîts ae calme a son rivâts sei dai Stâts Unîts che de UE che e à ancje invidât lis autoritâts di Pristina a no meti in at azions unilaterâls.

Font: Balkan Insight, 13/10/21

Cossovo: tensions e violencis al confin cu la Serbie

A butâ gnove benzine sul fûc des tensions tra lis istituzions cossovanis e la minorance serbe, che e vîf massime te aree setentrionâl de regjon balcaniche, si à la decision dal guvier di Pristina di introdusi l’oblic pai veicui cun targhe serbe di gjavâle cuant che a passin il confin par sostituîle cuntune cossovane. Il proviodiment al va a colpî cuasi dome i membris de minorance serbe che a son la grande maiorance di chei che a àn mieçs imatricolâts in Serbie e che a passin dispès il confin. Par protestâ cuintri di chel che a calcolin un abûs, par diviers dîs a dilunc, disinis di membris de comunitât serbe a àn ocupât e blocât il passaç di confin di Brnjak / Bernjak. Il guvier cossovan al à mandât sul puest i reparts speciâi de polizie statâl. La situazion e à causât diviers incidents. I media locâi a àn segnalât il feriment di trê oms de comunitât serbe che a saressin stâts pacâts de polizie: episodi che cheste ultime e à dineât (ricognossint però che trê personis a son finidis in ospedâl ma cence spiegâ il parcè).

Font: Balkan Insight, 24/09/21

Cossovo: gnovis tensions pe condane di un deputât serp

La condane a doi agns di preson dal deputât de Srpska Lista, Ivan Todosijevič, par intolerance etniche o religjose de bande de cort di apel dal Cossovo e à discjadenât la proteste sei de minorance serpe dal paîs che des autoritâts di Belgrât. Ai 25 di Avost i judiçs serps dal distret di Mitrovica a àn fat siopar par denunciâ che il procès imbastît cuintri dal parlamentâr nol à rispietât lis regulis fissadis dai acuardis jenfri Cossovo e Serbie. La denuncie e je stade sostignude ancje dai aministradôrs dai comuns cossovans a maiorance serbe, intant che il partît di racuelte de minorance – la Srpska Lista – al à fevelât di sentence politiche. Todosijevič al è stât condanât par vê declarât che i fats capitâts a Racak / Recak intal 1999, là che a vevin pierdût la vite 45 cossovans albanês, nol jere un maçalizi indiscriminât di civîi ma une azion militâr cuintri dai milizians dal UÇK. La vicende e presente inmò dai aspiets pôc clârs e la sô interpretazion e va dilunc a dividi cun fuarce serps e cossovans, ancje parcè che propit chest episodi al è stât doprât par justificâ i bombardaments de NATO su la Jugoslavie.

Font: Balkan Insight, 25-26/08/21

Cossovo: in cressi i ats di violence cuintri dai serps

La polizie cossovane e à arestât trê personis acusadis di vê pacât ai 17 di Avost un fantat serp a Mitrovica par vie de sô partignince nazionâl. Si trate dal cuart episodi di violence etniche cuintri di membris de minorance serbe che e vîf in Cossovo tal zîr di un mês. Su la cuistion al è intervignût ancje il guvier di Belgrât par marcâ cemût che chescj episodis a sedin cressûts une vore dal principi di chest an par vie dai discors di intolerance cuintri de comunitât serbe che a rivin dal gnûf guvier cossovan. Par cjalcjâ la coresponsabilitât istituzionâl che e je daûr di chestis agressions, il guvier serp al à segnalât che un dai responsabii dal ultin at di violence capitât a Mitrovica al partignarès aes fuarcis di polizie cossovanis: declarazion che par cumò no je stade ancjemò smentide dal guvier di Pristina.

Font: Balkan Insight, 18/08/21

Bosgne: invît a discuti la separazion pacjifiche de federazion

Lis vôs suntun document confidenziâl presentât al Consei European che al previôt la implosion de Bosgne e la revision dai confins tra i stâts de ex Jugoslavie, a àn tornât a alçâ la tension framieç des trê comunitâts principâls che a formin cheste realtât, o sei bosgnacs, cravuats e serps. I rapresentants dai partîts di riferiment de Republika Srpska si son dâts adun par frontâ la cuistion e ae fin si son cjatâts in cunvigne tal domandâ in maniere formâl di discuti dal avignî dal paîs cui delegâts des formazions politichis de Federazion bosgnache cravuate. Su la taule a metin la propueste di une tratative che e permeti une separazion pacjifiche de Bosgne. Une strade che però no plâs ae cuintripart, cul rapresentant dal principâl partît bosgnac che al à fintremai declarât ae stampe di no podê escludi la pussibilitât di un gnûf conflit armât. Che a sedin o no jessudis pensadis par sviâ la atenzion di altris problemis, cemût che a stimin diviers osservadôrs internazionâi, chel istès a palesin une situazion di tension che invezit di cuietâsi e somee scjaldâsi cul passâ dal timp.

Font: Balkan Insight, 20/04/21

Cravuazie: minorance serbe inmò vitime di intolerance

Ai 13 di Avrîl il Consei Nazionâl Serp al à presentât il rapuart anuâl che al met adun i episodis di violence fisiche, intolerance, menacis, ofesis, discors di odi e revisionisim storic indreçâts cuintri de minorance serbe de Cravuazie. I câs denunciâts vie pal 2020 a son stâts 214 a front dai 400 dal 2019 e dai 381 dal 2018. Il dât al è però falsât dal fat che, par vie de pandemie, cetantis ativitâts no jerin pussibilis e duncje si à vude ancje une strente su lis ocasions – tant che lis partidis di balon – là che i atacs cuintri de comunitât serbe a jerin frecuents. Il president dal Consei, Milorad Pupovač, al à segnalât cemût che, cundut che la legjislazion cravuate e calcoli di reât i discors di odi, inte plui part dai câs cuant che a son indreçâts ai serps no ven metude in vore. Chel istès, al à zontât, si viodin ancje segnâi di riconciliazion tra lis dôs comunitâts, massime sul plan istituzionâl. Par esempli, a ocupâ la incarghe di prin ministri vicjari al è Boris Milosevič dal Partît Indipendent Democratic Serp (SDSS).

Font: Balkan Insight, 13/04/21

Cossovo: minorancis decisivis pe gnove maiorance

Tes elezions politichis cossovanis dai 14 di Fevrâr il moviment Vetevendosje al à cjapât plui dal 48% dai consens e 56 parlamentârs e al larà a vuidâ il paîs balcanic intai prossims agns. Il sucès al nas in primis de disilusion di une gruesse part de popolazion pes politichis e pai compuartaments di chei altris partîts che si vevin alternâts al guvier. Il Partît Democratic dal Cossovo (PDK) al à vût pôc plui dal 17% dai vôts e 20 elets, la Leghe Democratiche dal Cossovo (LDK) e je colade al 13% dai consens otignint juste 15 deputâts e la Aleance pal Avignî dal Cossovo (AAK) e à cjapât sù par jù il 7% des preferencis e 9 parlamentârs. La Srpska Lista, partît leât ad in dopli cul guvier di Belgrât, e à otignût ducj i 10 puescj risiervâts ae minorance serbe cul 5,54% dai vôts. A front di une maiorance parlamentâr di 61 elets e devente decisive la posizion dai rapresentants des comunitâts plui piçulis che si dividin chei altris 10 puescj garantîts aes minorancis. Cheste prospetive, pronosticade bielzà ae vilie dal vôt, e veve sburtât i partîts plui grues a lavorâ sot vie par indreçâ il vôt su chei candidâts des minorancis che ur jerin plui favorevui.

Font: Balkan Insight, 15/02/21

Cossovo: crepaduris intal model eletorâl “etnic”

20 dai 120 puescj dal Parlament dal Cossovo a son risiervâts aes minorancis etnichis. Di chescj, par solit, 10 a van a rapresentants de comunitât serbe e 3 a chei de minorance bosgnache. Tes elezions che si tignaran ai 14 di Fevrâr il moviment Vetevendosje al ven dât tor dal 48% dai consens, un risultât che i permetarès di guviernâ ancje dome cu la poie di cualchidun tra i deputâts des minorancis. Une prospetive che e preocupe e no pôc la part de comunitât serbe plui leade al guvier di Belgrât. Il vôt des minorancis al devente cussì centrâl intal scuintri politic. Ve che alore la Union Democratiche Sociâl e à acusât la Srpska Lista, partît leât ad in dopli cul guvier di Belgrât e che tes ultimis elezions al à simpri otignût ducj i dîs puescj risiervâts ae minorance serbe, di zuiâ sporc. Si stime che il partît al puedi fâ stât su almancul 10 mil vôts in plui di chei che i coventin par sigurâsi i dîs deputâts e che ju implearà par mandâ in Parlament candidâts “amîs” che si presentin intes listis di altris minorancis. Sot de lint a son in particolâr il partît bosgnac de Comunitât Unide (Ujedijnena Zajednica) e il moviment Iniziative Rom. Dut câs, a movisi ta cheste direzion, no saressin dome i serps. Di fat al è stât segnalât ancje il câs di un candidât albanês che si presente cul Gnûf Partît Democratic, che al varès invezit di rapresentâ i bosgnacs.

Font: Balkan Insight, 28-29/01/21

Montenegro: guvier gnûf cence ministris des minorancis

Il gnûf guvier di coalizion nassût in Montenegro dopo des elezions dai 30 di Avost al sarà il prin, di agnorums incà, cence ministris espression des minorancis che a vivin intal paîs. Il prin ministri incjariât di formâ il guvier, Zdravko Krivokapič, al à fat savê che il gnûf esecutîf al sarà formât di dodis ministris “tecnics”. A sostignî il guvier e je une aleance formade dai trê principâi grups di oposizion che a àn rivât a meti in minorance il Partît Democratic dai Socialiscj (DPS) che di passe vincj agns al jere ae vuide dal paîs balcanic. Ancjemò ai 18 di Otubar la dirigjence dal Partît Bosgnac, che al à trê deputâts inte Assemblee montenegrine, al veve fat savê di no cjatâsi in cunvigne cu la posizion di une part des fuarcis de gnove maiorance, judicadis masse filoserbis. Cumò ancje i doi partîts di riferiment de minorance albanese, che a àn doi rapresentants in Parlament, a àn sierât la puarte a ogni partecipazion ae coalizion dal guvier. Ta chest câs, a no lâi jù, e sarès stade propit la composizion dal guvier là che si spietavin la presince di rapresentants des minorancis. Al jere dal 1998 incà che tal guvier dal Montenegro si veve almancul un ministri nomenât tra i membris dai moviments politics des minorancis. Daûr dal ultin censiment, dome il 45% de popolazion dal stât balcanic si ricognòs come montenegrin intant che un 29% si declare di nazionalitât serbe, passe il 8% bosgnache e un 5% albanese.

Font: Balkan Insight, 17/11/20

Cossovo / Serbie: si slontane la nassite de Zajednica

Ai 13 di Otubar il prin ministri cossovan Avdullah Hoti al à sierât la puarte ae istituzion in timps curts de Zajednica, o sei la Associazion dai Comuns Serps dal Cossovo. Par Hoti no je nissune pussibilitât che cheste istituzion e cjapi vite fintremai che no si rivarà a di un ricognossiment uficiâl dal Cossovo de bande de Serbie, ipotesi cheste che e je ben lontane dal concretizâsi. In plui di incressi inmò di plui la tension cu lis autoritâts di Belgrât, la posizion dal prin ministri cossovan e à sustât ancje lis istituzions europeanis che a son daûr a cirî une mediazion tra lis parts. Peter Stano, puartevôs de UE pe politiche foreste, al à ricuardât cemût che il Cossovo ancjemò tal 2013 al veve cjapât un prin impegn pe costituzion de Associazion, ratificât a maiorance dal so stes Parlament. Po a Bruxelles, tal 2015, al veve concuardât i detais di cheste istituzion che e varès di vê competence su educazion, disvilup economic, salût e planificazion teritoriâl e finanziaments direts dal guvier serp.

Font: Balkan Insight, 14/10/20

Cravuazie: deputâts des minorancis dentri dal gnûf guvier

Ai 23 di Lui il Parlament cravuat al à votât la fiducie al gnûf guvier vuidât di Andrej Plenković che cul so partît – la Union Democratiche Cravuate (HDZ) – al veve otignût la maiorance relative tes elezions politichis dai 5 di Lui. Par rivâ a otignî la poie di almancul 76 dai 151 deputâts de assemblee, Plenković – che al partive dai 66 elets otignûts de HDZ – al à sielzût di no sbelançâ il guvier a diestre aleantsi cul Moviment Patriotic (DPMS) di Miroslav Škoro – che i varès puartât 16 parlamentârs – ma di meti adun une coalizion moderade che si poiàs sui vôts di dôs piçulis formazions di aree liberâl (il Partît dal Popul Cravuat e i Riformiscj) e sui vôt deputâts des minorancis (serps, ongjarês, rom, talians, albanês, cecs e slovacs), che a deventin cussì decisîfs pe tignude dal guvier. Cheste situazion e varès duncje di favorî politichis plui atentis ai dirits linguistics e nazionâi di chestis comunitâts. Il Partît Democratic Indipendent Serp (SDSS), che cui siei 3 elets al devente une des fuarcis plui impuartantis di cheste coalizion, al contribuìs al guvier cuntun dai cuatri vicepresidents che al à ancje la deleghe su dirits umans e des minorancis.

Font: Balkan Insight, 23/07/20

Cravuazie: a van indenant i atacs cuintri des minorancis

Ai 17 di Avrîl la Cjase pai Dirits Umans di Zagabrie e à publicât il so rapuart anuâl là che si segnale cemût che no calin i episodis di intolerance tai confronts des minorancis che a vivin in Cravuazie. Pe plui part si trate di discors di odi pandûts su lis rêts sociâls, su cierts mieçs di comunicazion e te suaze dal confront politic, ma ancje di menacis e fintremai di agressions fisichis. La comunitât plui colpide e reste chê serbe, che cui siei passe 180 mil membris e je la plui grande minorance nazionâl dal paîs e che si cjate ancjemò a paiâ un presit alt pes feridis lassadis de vuere jenfri Serbie e Cravuazie. I discors di odi a son favorîts ancje di un sisteme educatîf e mediatic che di chei fats al da une vision unilaterâl e di stamp nazionalistic. Dilunc vie dal 2019 a son stâts segnalâts almancul cuatri grues episodis di agressions xenofobichis di grup cuintri membris de minorance serbe o citadins serps che a jerin in visite in Cravuazie.

Font: Balkan Insight, 17/04/20

Bosgne: la part serbe e torne a sburtâ pe separâsi

Cundut dai invîts ae cautele e al rispiet de legjislazion statâl rivâts dal president de Republiche serbe, Aleksandar Vučić, il membri serp de presidence unitarie bosgnache, Milorad Dodik, al à manifestât la intenzion di imbastî une consultazion par decidi l’avignî de Republika Srpska, o sei la part serbe de Bosgne. No je la prime volte che si fâs indenant la volontât di davuelzi un referendum su la autodeterminazion ma fin cumò i tentatîfs di lâ ta cheste direzion par viis legâls a son stâts blocâts des autoritâts centrâls. La boçadure de bande de cort costituzionâl di une leç de Republika Srpska su la proprietât dai terens agricui e à tornât però a scjaldâ i spirts, ancje parcè che la presince te cort di judiçs forescj e ven considerade come une menace continuade ae autonomie dai serps. Par altri la cuistion dai judiçs forescj – espression dai stâts intervignûts intai conflits balcanics (USA, Grande Bretagne, Gjermanie, France e Italie) – e ven cumò contestade ancje de part cravuate de federazion. Dodik al à dite che no si vûl destabilizâ la regjon ma che i serps de Bosgne no i stan plui a subî lis decisions cjapadis di altris e a àn di podê decidi di bessôi il lôr avignî.

Font: Balkan Insight, 15/02/20

Cossovo: minorancis penalizadis des gnovis regulis eletorâls

La comission eletorâl centrâl dal Cossovo e à dât fûr une circolâr là che si previôt che tes prossimis elezions parlamentârs in program ai 6 di Otubar a podedin votâ dome i citadins che a presentin un document identificatîf emetût des autoritâts cossovanis. La decision e à jevât lis protestis une vore duris dai rapresentants politics e istituzionâi des comunitâts serbis e montenegrinis dal Cossovo che le judichin contrarie ae stesse suaze normative statâl. Se e fos metude in vore, cheste circolâr e impedirès di votâ a cetancj membris des dôs minorancis che, cundut che a son iscrits intes listis eletorâls, a doprin cjartis di identitât dadis fûr des autoritâts serbis. Pal cjâf dal ufici pal Cossovo dal guvier serp, Marko Djurić, se no interven la comunitât internazionâl par comedâ la situazion lis prossimis elezions cossovanis a pierdaran ogni legjitimitât. I citadins a son clamâts a votâ in maniere anticipade pal gnûf Parlament dopo des dimissions dal prin ministri Ramush Hardinaj, sot acuse par crimins di vuere.

Font: Balkan Insight, 12/09/19

Montenegro: a van indenant lis tensions tra minorancis

E reste alte la tension in Montenegro tra lis diviersis minorancis e tra chestis e il stât centrâl. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe e un 5% albanese. I contrascj tra lis comunitâts che a vivin ta cheste regjon no mancjin duncje di tocjâ ancje chest paîs balcanic. Dopo des critichis jevadis cuintri de decision des autoritâts statâls di sanzionâ i organizadôrs di doi events par vie di un ûs judicât strumentâl des bandieris albanesis e serbis, cumò a alçâ la temperadure e je stade la scree te aree di Tuzi – teritori a maiorance albanese tacât de capitâl Podgorica – di un monument a Dede Gjon Luli, nazionalist e combatent albanês vivût a cjaval tra i secui XIX e XX. Rapresentants dal Front Democratic, moviment di oposizion vicin ae comunitât serbe, a àn let chest episodi come une provocazion dal moment che – a disin – Dede Gjon Luli al rivendicave pe Albanie, ancje cu lis armis, la fasse meridionâl dal Montenegro là che e vîf la minorance albanese. I membris de oposizion a acusin il guvier centrâl di lassâ man libare ae comunitât albanese par vie che e poie l’esecutîf in cjarie.

Font: Balkan Insight, 26/08/19

Cravuazie: gnovis agressions cuintri de minorance serbe

No si fermin in Cravuazie lis agressions e i atacs cuintri di membris de comunitât serbe che, cun passe 180 mil personis, e je la plui grande minorance nazionâl dal paîs. Tor de metât di Avost nazionaliscj cravuats a àn fate iruzion in doi bars là che a trasmetevin une partide de Stele Rosse di Belgrât e a àn ferît cinc personis, dutis membris de minorance. Si trate dome dai ultins episodis di une rie di violencis che, tal Jugn di chest an, a àn viodût ancje la muart di Radoje Petkovič, vicepresident dal Consei de Minorance Nazionâl Serbe di Kastav, par vie des feridis patidis intant de agression de bande di un veteran di vuere cravuat. Dongje di tornâ a denunciâ cheste situazion, il president dal Consei Nazionâl Serp, Boris Milosevič, al à invidât lis istituzions cravuatis a no minimizâ chestis vicendis o cirî di fâlis passâ par violencis causadis di ultras di societâts sportivis.

Font: Balkan Insight, 22/08/19

Montenegro: scuintri sul ûs des bandieris des minorancis

Lis autoritâts statâls montenegrinis a àn fat savê che a sanzionaran i organizadôrs di dôs manifestazions là che si varessin davueltis azions contrariis ae leç. Intun câs, a finî sot acuse, a son stadis lis cjançons patriotichis e lis bandieris serbis dopradis intant di un conciert inmaneât par tirâ sù fonts pe ricostruzion di sîts religjôs de glesie ortodosse serbe in Cossovo. Il secont câs al è invezit leât al ûs di bandieris de Albanie intune manifestazion tradizionâl che si davuelzeve te aree di Tuzi, teritori a maiorance albanese che si cjate tacât de capitâl Podgorica. Daûr dal ultin censiment, il 29% de popolazion dal Montenegro si declare di nazionalitât serbe e il 5% albanese. La leç e permet l’ûs des bandieris di chestis comunitâts, ma dome associât cun chê montenegrine. Cun di plui, pes autoritâts dal paîs balcanic, lis manifestazions culturâls no puedin jessi dopradis par alimentâ il nazionalisim. Lis sanzions menaçadis dal guvier a àn però jevât critichis duris e acusis di violazion dai dirits nazionâi sei de aleance eletorâl de minorance albanese (che par altri e poie l’esecutîf montenegrin), sei dal ministri pai forescj de Serbie.

Font: Balkan Insight, 19/08/19

Cossovo: dubis sui risultâts des comunâls inte aree serbe

Intes elezions comunâls che si son tignudis ai 19 di Mai inte aree a maiorance serbe dal Cossovo la vitorie e je lade pardut ae Srpska Lista, partît di racuelte de comunitât serbe leât ad in dopli cul guvier di Belgrât. Diviers osservadôrs internazionâi a àn però jevât critichis su la plene democraticitât dal vôt. La Srpska Lista e à passât il 90% dai consens in ducj i cuatri comuns a maiorance serbe, o sei Mitrovica / Kosovska Mitrovica, Leposavić / Leposaviq, Zvečan / Zveçan e Zubin Potok, ma chest risultât al diven dal fat che no si à presentade nissune altre liste serbe. Cun di fat, il partît Justizie, Democrazie, Serbie al à decidût di no partecipâ al vôt par vie de clime di intimidazion intai siei confronts, massime dopo dal sassinament dal so leader Oliver Ivanović che i siei responsabii a restin ancjemò discognossûts. Si son invezit presentâts doi moviments albanês – il PDK (Partît Democratic dal Cossovo) e Vetevendosje (Autodeterminazion) – che però a àn cjapât sù dome i vôts de piçule comunitât di lenghe albanese che ancjemò e vîf inta chescj comuns.

Font: Balkan Insight, 21/05/19

Albanie: plui dirits pai albanês di Macedonie e Montenegro

Inte riunion di guvier dai 10 di Mai l’esecutîf vuidât dal prin ministri Edi Rama al à decidût di slargjâ ancje ai citadins macedons e montenegrins di nazionalitât albanese i stes dirits di acès al lavôr dai citadins albanês. La misure e vâl dome par chei puescj di vore là che no si domande in maniere esplicite la citadinance albanese e e à un valôr plui simbolic che pratic. La stesse decision e jere stade cjapade ancjemò intal 2014 pai cossovans di lenghe albanese e pe minorance albanese che e vîf in Serbie. Il messaç che si vûl dâ al è chel di une Albanie vierte, ancje sul plan dal lavôr, a ducj i albanês, di là dal stât là che a son citadins. Par chel che al rivuarde la Macedonie dal Nord i albanês a rapresentin un cuart de popolazion totâl, intant che in Montenegro a son uns cinc par cent dal totâl.

Font: Balkan Insight, 14/05/19