11/05/10

Ream Unît: Conservadôrs indenant, nazionaliscj avonde stabii


Cuadri gjenerâl

Intes elezions gjenerâls che si son davueltis ai 6 di Mai intal Ream Unît i Conservadôrs a son stâts i plui votâts, cul 36,1% des preferencis, ma no àn otignût avonde parlamentârs par podê guviernâ di bessôi. Cun di fat, par podê imbastî un guvier di maiorance a coventin almancul 326 deputâts, ma i Conservadôrs a ‘nd àn vûts dome 306. Rispiet aes elezions stadis i Tories a son cressûts dal 3,8%, ma in graciis dal sisteme eletorâl britanic a àn otignût 98 parlamentârs in plui de volte stade. I Laburiscj, invezit, a àn cjapât il 29% dai vôts, ven a dî il 6,2% in mancul des ultimis elezions, e a àn vût 258 elets, o sei 91 in mancul de legjislature stade. Se lis dificoltâts dal Labour a jerin za di timp sot dai voi di ducj, la delusion plui fuarte forsit e je chê che si à vude tra i Liberâi Democratics che si proponevin tant che partît vêr dal cambiament e che a pensavin di podê fâ un biel salt indenant. Il partît vuidât di Nick Clegg, invezit, al à otignût il 23% des preferencis, o sei un 1% in plui de volte stade, ma si è ricjatât dome cun 57 elets, ven a stâi 5 in mancul di chei che al veve. Chel istès, intun Parlament cence une maiorance clare, a son propit i Liberâi Democratics la clâf pal prossim guvier. I Verts (Green) a àn cjapât l’un par cent dai vôts, ma a àn rivât pe prime volte a elei un deputât intal Parlament di Londre.


Scozie

Chest cambiament dai ecuilibris nol à nancje sfiliât la Scozie là che i Laburiscj, in plui di confermâ ducj i 41 parlamentârs che a vevin, a àn otignût il 42% des preferencis, o sei il 2,5% in plui de volte stade. I Conservadôrs a àn vût il 16,7% dai vôts, il 0,9% in plui des ultimis elezions, ma a àn rivât juste a mantignî l’unic parlamentâr che a vevin. Ancje i Liberâi Democratics a àn mantignût il stes numar di deputâts che a vevin, o sei 11, ma a àn pierdût il 3,7% dai consens, fermantsi al 18,9% des preferencis. Pas indenant pal Scottish National Party che cul 19,9% dai vôts al è cressût dal 2,3% e al à superât i Liberâi Democratics. I nazionaliscj scozês, dut câs, no àn rivât a lâ plui innà dai 6 parlamentârs che a vevin te legjislature stade. Juste une note finâl pal Scottish Socialist Party, moviment indipendentist di çampe radicâl, che al à cjapât a pene il 0,1% dai vôts e che aromai al à pierdût cuasi dute la sô base eletorâl (-1,7% rispiet ae volte stade). In cuintritindince cul rest dal Ream Unît, almancul sul plan dai vôts, la Scozie e à premiât Laburiscj e nazionaliscj e limitât l’atac dai Conservadôrs.


Gales

In Gales, invezit, i Tories a son cressûts dal 4,7% puartantsi al 26,1% dai vôts e a son passâts di 3 a 8 elets. I Liberâi Democratics a son cressûts dal 1,7% rivant al 20,1% des preferencis, ma a son passâts di 4 a 3 deputâts. I Laburiscj si confermin il partît plui fuart dal Gales cul 36,2% dai vôts e 26 elets, ma a pierdin il 6,5% dai consens e 4 parlamentârs rispiet ae volte stade. Deludûts i nazionaliscj galês dal Plaid Cymru che a àn pierdût il 1,3% des preferencis fermantsi al 11,3%, ma che a àn cressût di 2 a 3 il numar dai parlamentârs elets. Ieuan Wyn Jones, che al vuide il partît galês, al à ametût che no si trate dal sigûr dal risultât che si spietavin.


Irlande dal Nord

In Irlande dal Nord il cuadri dai partîts al è avonde diviers rispiet a chel de Grande Bretagne. Ta chestis ultimis elezions a son doi i dâts plui significatîfs. Prin di dut il fat che il Sinn Féin cui siei passe 170 mil vôts, o sei il 25,5%, al è deventât il partît plui votât. La formazion republicane irlandese e je cressude dal 1,2% e e mandarà a Londre 5 parlamentârs. Par vie dal sisteme eletorâl britanic, si ben che al vedi cjapât il 25% dai vôts il Democratic Unionist Party al à rivât a elei 8 deputâts. Dut câs, propit achì si cjate il secont element plui significatîf des elezions in Irlande dal Nord. Cun di fat, il DUP al à pierdût il 8,7% des preferencis e un elet: si trate propit dal prin ministri nordirlandês e referent dal partît Peter Robinson che al è stât batût inte circoscrizion “sigure” di Belfast Est de candidade dal Alliance Party che, pe prime volte, al rive a mandâ un so rapresentant a Londre. A rindi inmò plui penzis chestis elezions sul front unionist si à ancje il brut risultât dai Ulster Conservatives and Unionists che a nassevin de aleance jenfri Ulster Unionist Party e Conservadôrs. Cheste formazion, cul so 15,2%, e à pierdût il 2,6% des preferencis e no à rivât a elei nancje un deputât. Sul front nazionalist irlandês, invezit, il Social Democratic and Labour Party al à pierdût il 1% dai vôts (16,5%), ma al à mantignût i siei 3 deputâts.


Cornualie

In Cornualie, piçule nazion celtiche che no gjolt nancje di une circoscrizion eletorâl autonome, si à vût un salt indenant dai Conservadôrs che a àn concuistât trê des sîs circoscrizions cornichis che, te legjislature stade, a jerin dutis intes mans dai Liberâi Democratics. I LibDems a àn mantignût dome trê dai elets che a vevin ta chest teritori. Pe prime volte, i nazionaliscj cornics dal Mebyon Kernow a àn rivât a presentâsi in dutis e sîs lis circoscrizions, ma a àn otignût percentuâls che a van dal 0,8% di Porth Ia / Saint Ives al 4,2% di Austol ha Tewynn Pleustri / Saint Austell and Newquay.

Font: BBC, 07-08/05/10


Rom: denuncie dal ERRC pes espulsions dai cjamps


Il Centri european pai dirits dai rom (ERRC) al à domandât al comissari pai dirits umans dal Consei de Europe, ae Agjenzie pai dirits fondamentâi de Union Europeane e a altris sogjets impegnâts ta chest setôr di cjapâ posizion su lis politichis metudis in at intal stât talian cuintri di rom e sinti. Al centri de denuncie e je massime la situazion che si à a Milan là che, dome dal principi dal an, si àn za vudis passe sessante operazions di espulsion sfuarçade di fameis rom e sinti dai sîts là che a jerin a vivi. Si trate di une situazion che no à precedents e che in plui di lassâ cetantis fameis cence tet, e puarte efiets pesants sei pai oms che a lavorin, sei pai fruts che a van a scuele.

Font: ERRC, 05/05/10


Irlande: mobilitazion a pro des scuelis gaelichis


Intai ultins vincj agns la domande di insegnament in lenghe gaeliche e je cressude une vore in Irlande e e je stade compagnade di un aument intal numar des scuelis che a doprin l’irlandês tant che lenghe veicolâr (gaelscoileanna), ma cumò lis organizazions impegnadis inte promozion di cheste lenghe a pandin la lôr preocupazion pe politiche metude in at ta chest setôr dal ministeri pe educazion de Republiche irlandese. Al è di plui di doi agns, di fat, che il ministeri nol ricognòs gnovis scuelis gaelichis. L’ultin dinei di ricognossiment al à interessât, propit sul principi di chest an, la gaelscoil di Ráth Tó / Rath Oath inte contee dal An Mhí / Meath. Denant di chest gnûf dinei cinc organizazions gaelichis si son dadis dongje par inviâ la campagne “Aitheantas” che e ponte a otignî il ricognossiment uficiâl de gaelscoil di Ráth Tó. La campagne e à ancje chê di puartâ il ministeri a ricognossi ancje chel linguistic tant che criteri pal ricognossiment des gnovis scuelis primariis. E je une bataie che lis organizazions gaelichis no intindin pierdi e duncje a àn za tacât a tirâ dongje fonts par permeti ae gaelscoil di Ráth Tó di partî distès a Setembar ancje cence dal ricognossiment e dai bêçs dal ministeri. Si trate – a disin – di bati une politiche che e menace l’avignî dal insegnament par gaelic.

Font: Gaelport, 04/05/10


Galizie: in vore la edizion 2010 di Correlingua


E je tacade lunis ai 3 di Mai di Sant Jacum di Galizie (Santiago de Compostela) la edizion numar undis di Correlingua, la corse che e à chê di promovi e di rivendicâ l’ûs de lenghe galiziane. La manifestazion si sierarà vinars ai 14 di Mai a Verín, inte provincie di Monterrei. La prime tape de corse si è davuelte cu la partecipazion di 4 mil students de provincie di Santiago. Il sproc che al compagne la edizion di chest an e je “Galizian: la fuarce dal nestri amôr” e e je ispirade ae poesie di Uxío Novoneyra.

Font: Vieiros Galiza Hoxe, 04/05/10


Stât spagnûl: prin pas pal ûs in Senât di basc, catalan e galizian


Il Senât spagnûl, cun 134 vôts a pro e 122 cuintri, al à decidût che al cjaparà in esam la propueste par modificâ il so regolament interni di maniere di permeti intant dai siei lavôrs ancje l’ûs dal basc, dal catalan e dal galizian. A fâ indenant la propueste al jere stât un grup trasversâl di 34 senatôrs (ERC, PSC, CiU, PNV, BNG, ICV-IU, Grup Mist) che a partegnin a chestis trê comunitâts nazionâls. A fâi cuintri ae propueste a son stâts massime i senatôrs dal PP che a àn piturât la iniziative tant che “ridicule”, “anticostituzionâl”, “che no covente” e “che e coste”. Chest vôt, dut câs, al previôt dome che si cjaparà in esam la propueste e nuie di plui.

Font: Avui, 28/04/10; Vieiros Galiza Hoxe, 28/04/10


Paîs Catalans: catalan lenghe di acet pai imigrâts


Il Parlament de Catalogne al à fate buine la leç sul acet des personis imigradis e dai emigrâts che a tornin in patrie. Il test al previôt la nassite di un Servizi di prin acet che al varà la incarghe di informâ cui che al rive dal forest su la lenghe catalane, sul marcjât dal lavôr, sui dirits e sui dovês di fonde e sul model sociâl de Catalogne. Ta cheste suaze, la lenghe catalane e ven definide tant che “lenghe comune” e, duncje, primarie pal procès di integrazion. Su la fonde des cognossincis linguistichis ufiertis par mieç dal Servizi, il guvier catalan (Generalitat) al darà un certificât che al judarà i imigrâts a rignuvî i permès di permanence, ma ancje par cjatâ un lavôr o intal percors par otignî la residence. La leç e je passade cun 117 vôts a pro (socialiscj, çampe radicâl, nazionaliscj catalans) e juste 17 cuintri (popolârs).

Font: Avui, 28/04/10


Ongjarie: il paîs si bute a diestre


Il secont turni des elezions politichis in Ongjarie al à consegnât il guvier dal paîs intes mans dal partît di centri diestre Fidesz che al à cjapât cuasi il 68% des preferencis. Si trate pardabon di une vitorie cence precedents dal moment che la formazion vuidade di Viktor Orbán e à otignût 263 dai 386 puescj disponibii in Parlament, ven a dî une maiorance di plui dai doi tierçs che i permetarà di fâ di bessôl des modifichis di nivel costituzionâl. Orbán al à za fat savê che al ponte a “tornâ a fâ sù il paîs” e che al larà a riformâ il sisteme di guvier sei a nivel centrâl che locâl. Tra lis riformis anticipadis si à ancje la leç sui mieçs di comunicazion e su la citadinance pai membris des minorancis ongjaresis che a vivin fûr dai confins dal stât. Il partît socialist (MSZP) che al veve guviernât il paîs la legjislature stade al à cjapât pôc plui dal 15% dai vôts e al è passât di 190 a a pene 59 parlamentârs. Daûr dai socialiscj, cul 12% des preferencis e 47 elets, si à plaçât il moviment di estreme diestre Jobbik che tes elezions dal 2006 nol veve vût nancje un parlamentâr. Il salt indenant di chest partît al spaurìs plui di cualchidun, sei dentri che fûr de Ongjarie, par vie des sôs posizions che a son judicadis xenofobis. Chest moviment, leât ad in dopli cul grup paramilitâr Magyar Gárda metût fûr leç tra il 2008 e il 2009, al à palesât plui voltis ategjaments discriminatoris tai confronts dai rom che a rapresentin la plui grande minorance dal paîs (passe 200 mil daûr dal ultin censiment, ma stimis a fevelin fintremai di un milion di personis). Nol è un câs che propite la poie di Jobbik e vedi permetût la elezion al secont turni dal candidât indipendent Oszkár Molnár butât fûr di Fidesz pes sôs declarazions ferocis cuintri dai rom. Intal gnûf Parlament ongjarês al à rivât a jentrâ dome un altri partît, si trate dal LMP: un moviment ecologjist e di çampe che al à cjapât pôc plui dal 4% des preferencis e al à elet 16 dai siei rapresentants.

Font: Budapest Times, 26/04/1


Paîs Catalans: gnûf apontament cul vôt su la indipendence


Ai 25 di Avrîl si à vût un gnûf apontament cu lis votazions popolârs su la indipendence de Catalogne. Chest colp la consulte popolâr e à interessât 212 comuns là che si à vude une partecipazion medie tor dal 20,2% dal eletorât. Dai 265 mil citadins che a son lâts a votâ, il 92,2% al à dite di sì ae indipendence. I risultâts, dut câs, a son une vore diferents tra di lôr: par esempli, par chel che al rivuarde lis capitâls di provincie, si va di une partecipazion dal 26% a Olot i Valls al 8,2% di Lleida. Se e je vere che la partecipazion e pues someâ basse, si à dut câs di ricuardâ che si trate di votazions inmaneadis in maniere volontarie cun ducj i problemis logjistics dal câs e cence un valôr uficiâl. A vuê, par mieç di chest gjenar di votazions, uns mieç milion di catalans si à za declarât a pro de indipendence.

Font: VilaWeb, 26/04/10


Paîs Basc: un altri pas de ezkerra abertzale pe soluzion politiche dal conflit


Ai 24 di Avrîl a Iruñea / Pamplona la çampe indipendentiste basche e à presentât un gnûf document che al marche la volontât di cjatâ une soluzion politiche pal conflit che al cjape dentri chest toc di Europe. Ancje su la fonde de declarazion fate indenant a Bruxelles di diviersis personalitâts internazionâls, si invide ETA a declarâ un fermait il fûc continuatîf e il guvier spagnûl a meti fin aes azions repressivis di maniere di inviâ un percors di negoziazion tra lis parts che al puarti a di une soluzion pacifiche dal conflit. La çampe indipendentiste e à marcât di jessi pronte al dialic cun dutis lis fuarcis politichis par rivâ a cjatâ fûr un cuadri democratic che al permeti ai citadins bascs di decidi in maniere libare dal lôr avignî. I rapresentants de ezkerra abertzale a àn zontât di vê za tacât a lavorâ par lâ ta cheste direzion cuntun procès che al viôt la partecipazion di altris sogjets politics di aree indipendentiste, ma soredut di une part significative de citadinance. La reazion plui cjalde ae azion de ezkerra abertzale e je rivade di Eusko Alkartasuna che e à confermât la sô disponibilitât a lavorâ adun pe costruzion di un spazi politic unitari dal indipendentisim basc. Par Alternatiba si trate di un pas positîf che al svicine la pâs e che no si pues lassâ colâ. Coments avonde positîfs a son rivâts dal PNV, di Hamaikabat e di Ezker Batua, che a viodin segnâi di novitât intes declarazions de çampe indipendentiste, ancje se le invidin a sveltî chest procès e a taiâ ducj i puints cun ETA. A restin critics invezit i socialiscj (PSE / PSOE) che a domandin ae çampe indipendentiste une condane clare di ETA. Pai popolârs (PP) cheste ultime iniziative e je dome une cuvierzidure par cirî di svuincâ la ilegalizazion e tornâ a presentâsi aes elezions.

Font: Gara, 25-29/04/10


Corsiche: nuie assembleis comunâls in lenghe corse


Il tribunâl aministratîf di Bastia al à decidût di dâi reson al sotprefet di Calvi e di boçâ la decision cjapade dal consei comunâl di Galeria di davuelzi lis sôs riunions une volte par francês e une volte par cors e di compagnâlis cun verbâi simpri bilengâi. Il sotprefet al veve calcolât cheste decision “anticostituzionâl” e le veve puartade denant dal tribunâl. Il fat che i ats a varessin simpri vût ancje une version par francês nol à zovât a salvâ il proviodiment. Pal moviment indipendentist Corsica Libera si trate de dimostrazion clare che intal stât francês il rispiet des lenghis minoritariis al è dome su la cjarte e si domande, duncje, ae Assemblee de Corsiche di meti in at il plan di promozion linguistiche fat bon te legjislature stade e di cjapâ posizion pe couficialitât pe lenghe corse su dute la isule.

Font: Radio Alta Frequenza, 23-25/04/10


Paîs Basc: par Batera coletivitât teritoriâl in Iparralde dentri dal 2014


Il coordenament Batera al ponte a rivâ a di une coletivitât teritoriâl basche che e cjapi dentri dut il Paîs Basc setentrionâl (Iparralde), sot aministrazion francese, dentri dal 2014. Ancje su la fonde de poie otignude cu lis consultazions popolârs dai 14 e dai 21 di Març (34.610 citadins a son lâts a votâ e pal 78,22% si son declarâts a pro de nassite dal gnûf sogjet aministratîf) Batera e à presentât une sorte di calendari dal procès che al varès di puartâ a di une coletivitât teritoriâl basche. Tra il 2010 e il 2011 si spiete che il guvier francês al invii il procès pe creazion di chest gnûf sogjet inte suaze de riforme aministrative dal stât. Tal stes timp Batera si propon di cjapâ dentri ducj i sogjets politics e sociâi dal teritori par resonâ sul model di coletivitât che si vûl imbastî. Tal 2012 si varès di davuelzi une consultazion uficiâl par permeti ai citadins dal Paîs Basc setentrionâl di pandi la lôr opinion e, su la fonde dai risultâts di cheste votazion, intal 2013 si varès di completâ il cuadri normatîf e regolamentâr pe nassite di chest sogjet aministratîf. Intal 2014, invezit, si varès di vê lis primis elezions par nomenâ i conseîrs e il guvier de gnove comunitât teritoriâl. Intal ordenament aministratîf francês a esistin i comuns, i dipartiments, lis regjons, lis coletivitâts di oltri mâr e la coletivitât teritoriâl corse: propit cheste ultime e je stade cjapade di model pe iniziative di Batera.

Font: Journal du Pays Basque, 22/04/10


Romanie: propueste di riforme costituzionâl, gnovis pes minorancis


Il guvier rumen al à fate buine une propueste di riforme de Costituzion. Intal test de propueste al è stât metût dentri ancje un emendament fat indenant de Aleance Democratiche dai Ongjarês in Romanie (RMDSz) che al previôt la zonte di un paragraf al articul 6 de Cjarte costituzionâl. Intal emendament si dîs che: “Lis istituzions statâls a àn di sintî lis organizazions des minorancis nazionâls par dutis lis decisions che a tocjin la difese, la incressite e la espression de identitât etniche, culturâl e religjose”.

Font: Rmdsz, 21/04/10


Gales: une strategjie unitarie pe educazion par galês


Il ministri galês pe educazion, Leighton Andrews, al à presentât ae Assemblee nazionâl la Strategjie pe educazion in lenghe galese. Si ben che tai ultins vincj agns si vedi vude une incressite massive de presince dal galês intes scuelis, si trate dal prin proviodiment che al fisse un model unitari pe educazion ta cheste lenghe su dut il teritori dal Gales. Il document al fisse un program di incressite dal insegnament par galês cun obietîfs e struments di intervent sul medi e sul lunc periodi. Si previôt un aument sei dal numar des scuelis cun ûs veicolâr de lenghe, sei des oportunitâts di vê une educazion bilengâl ancje inte scuele secondarie. Andrews al à ancje comunicât che al zontarà 1 milion e 725 mil sterlinis ai fonts za impegnâts ta chest setôr. Sei l’Ufici pe lenghe galese (Bwrdd yr Iaith Gymraeg) che la Societât pe lenghe galese (Cymdeithas yr Iaith Gymraeg) a àn dât un judizi avonde positîf sul proviodiment, ancje se a àn segnalât cualchi pont critic. L’Ufici pe lenghe galese al à domandât al guvier di sigurâ aes scuelis e aes aministrazions locâls ducj i fonts che a coventin par meti in at la gnove strategjie. Pe Cymdeithas, invezit, no si veve di svilupâ il proviodiment dome su la fonde des domandis dai gjenitôrs, ma suntun model di intervent là che la lenghe galese e ves la stesse impuartance di chê inglese.

Font: Welsh Assembly Government, 20/04/10; Cymdeithas, 22/04/10; Welsh Language Board, 26/04/10