Il guvier des Asturiis al à fat bogns i curricola pes scuelis secondariis (ESO, o sei educazion secondarie dal oblic, e formazion preuniversitarie) e al à cussì sierât il procès par adatâ ae realtât locâl la suaze de gnove leç statâl su la educazion (LOMLOE). Tra lis novitâts che a jentraran in vore cul gnûf an scolastic si à ancje une incressite de presince dal asturian intal insegnament, cuntun aument medi di 3 oris setemanâls in plui.
Font: AsturNews, 31/08/22
La Casa de las Lenguas de universitât di Uviéu / Oviedo e proponarà vie pal an academic 2022-2023 l’insegnament di 15 lenghis inte sô sede centrâl e ta chês distacadis di Xixón / Gijón e Avilés. Tra chestis nol è l’asturian che invezit al jere fin al an passât. L’insegnament de lenghe proprie al è stât sostituît cun chel dal ucrain. A denunciâ cheste situazion e je la organizazion Xunta pola Defensa de la Llingua Asturiana (XDLA) che e atribuìs la responsabilitât al gnûf retôr Ignacio Villaverde che si veve mostrât plui di une volte critic sul ûs dal asturian inte universitât rivant a considerâlu di rude «posizion ideologjiche» in dispresi dal Statût di autonomie, de leç di ûs e promozion dal asturian e dal stes statût de universitât.
Font: Asturies.com, 02/08/22
Il guvier des Asturiis al à inviât il percors par meti sù l’ufici pai dirits linguistics, une gnove unitât aministrative che e centralizarà la gjestion di dutis lis denunciis, lis segnalazions e lis domandis di informazion o di jutori fatis indenant dai citadins ae aministrazion publiche in materie linguistiche. La norme istitutive e je previodude intal plan normatîf de aministrazion publiche asturiane pal 2022. La gnove realtât, che no varà une funzion sanzionatorie, e vûl jessi un pas indenant inte metude in vore de normative su la normalizazion linguistiche dentri de aministrazion publiche, sei par chel che si riferìs al asturian che pal galizian fevelât inte part plui ocidentâl de Comunitât autonome. Cun di plui, une volte ad an, e proponarà ancje une relazion sul stât dai dirits linguistics intes Asturiis.
Font: La Voz de Asturias, 02/07/22
Ai 7 di Mai si à tignude a Uviéu / Oviedo une gnove manifestazion pe uficialitât de lenghe asturiane. Par cierts aspiets si trate di un apontament rivendicatîf “tradizionâl”, inmaneât zaromai di agns in ocasion de Setemane de leterature asturiane, ma al veve ancje une impuartance specifiche par capî la tignude dal moviment a pro de lenghe proprie. Cun di fat, si tratave dal prin apontament di place dopo de manifestazion massive pe uficialitât che si veve tignude in Otubar ma che e jere stade seguide dal fracàs dal ricognossiment uficiâl de lenghe proprie tal procès di riscriture dal Statût. Par rivâ a di un tant, la maiorance progressiste che e guvierne lis Asturiis e veve bisugne di almancul un altri vôt in Parlament ma la domande di une revision dal sisteme fiscâl pretindude di Foro Asturias in cambi dal vôt pe uficialitât e leve masse innà par jessi acetade des fuarcis progressistis. Intant de manifestazion, duncje, no si à viodût nissun rapresentant di Foro Asturias e nancje dal guvier in cjarie. In place a jerin invezit i partîts a pro de uficialitât – Podemos, IU e socialiscj – e i sindacâts maioritaris. Ae fin, cundut che no je stade partecipade come chê di Otubar, la manifestazion e à vût une adesion plui alte di chê dai agns stâts. La Xunta Pola Defensa de Llingua Asturiana, organizadore de iniziative, e bat par lâ indenant distès cul percors di uficializazion prime de fin de legjislature, ma socialiscj e IU a àn za sierade la cuistion e a invidin invezit i citadins a dâur plui fuarce tes prossimis elezions in maniere di podê procedi cu la riforme cence vê bisugne di lâ a cirî vôts ator.
L’esecutîf des Asturiis al à fat bon il decret che al met sù la Rêt de Normalizazion Linguistiche che si propon di infuartî il coordenament tra la aministrazion de Comunitât autonome e i ents locâi par promovi l’ûs public e istituzionâl des lenghis propriis. La Rêt e coventarà par coordenâ progjets, ativitâts e intervents dai diviers servizis linguistics ma ancje par disvilupânt di gnûfs. In dì di vuê metât dai comuns asturians al è indotât di unitâts aministrativis che a lavorin su la normalizazion linguistiche. La adesion ae Rêt e je di nature volontarie e, plui indenant, e podarès slargjâsi ancje a sogjets privâts cence fins di vuadagn. Il decret al previôt ancje la creazion di une comission tecniche par disvilupâ studis, plans e propuestis in materie di politiche linguistiche e si propon di miorâ la dotazion economiche e organiche dai servizis linguistics teritoriâi.
Intant di un incuintri cui rapresentants de Academia de la Llingua Asturiana e de Iniciativa pol Asturianu, la rapresentante pe educazion dal guvier des Asturiis e à anticipât che e cressarà la presince de lenghe proprie dentri des scuelis superiôrs de comunitât, là che cumò e je di une ore par setemane. Ta cheste direzion e va ancje la volontât di ricognossi lis certificazions linguistichis B2 e C di asturian come credits intai prossims concors par professôrs des superiôrs. La iniziative e je stade decidude profitant dal adatament dai curricola ae gnove leç su la educazion. Ta cheste suaze si intint di incressi ancje la presince dal asturian tes scuelis infantîls. Al reste invezit viert, a front de indisponibilitât mostrade fin cumò dal guvier di Madrid, il cjapitul dal ricognossiment de classe di insegnament di asturian. Il teme al interesse uns 250 insegnants precaris che no si rive ancjemò a ricognossiur un puest fis.
Daûr di un studi coordenât de universitât di Uviéu / Oviedo lis ativitâts economichis leadis aes lenghis propriis des Asturiis – l’asturian e la varietât galiziane fevelade te part plui ocidentâl de comunitât – a rapresentin il 5% dal prodot interni sporc asturian e il 7,3% de ocupazion complessive, une dimension similâr a chê dal compart energjetic o de edilizie. Il setôr che al pese di plui al è chel de educazion ma, a contribuî a chest risultât, a son ancje lis ativitâts culturâls, in primis editorie, musiche e produzions audiovisivis. Cundut che la normative in vore no favorìs plui di tant lis lenghis propriis, il lôr pês economic al è plui fuart di chel che al ven fûr di un studi similâr fat pal catalan intal Paîs Valenzian.
Ai 3 di Fevrâr centenârs di personis a àn manifestât a Uviéu / Oviedo formant une grande “O” ator dal Parlament des Asturiis par reclamâ la uficialitât des lenghis propriis (l’asturian ma ancje il galizian fevelât inte part plui ocidentâl de Comunitât). La mobilitazion, inmaneade de Xunta pola Defensa de la Llingua Asturiana, e je continuade po denant dal palaç de presidence dal guvier. I manifestants a domandin di sblocâ i lavôrs pe modifiche dal Statût di autonomie che, tra lis novitâts, a varessin di previodi ancje il ricognossiment de uficialitât des lenghis propriis dongje dal castilian. Ae maiorance progressiste i mancje un vôt in Parlament par podê procedi cu la riforme e la uniche pussibilitât e je la poie dai conservadôrs dal Foro che però, par garantî il lôr vôt a pro, a son daûr a poni cundizions che no jentrin cu la riforme statutarie.
Il coletîf Fala Ceibe al à fat indenant une rie di domandis ai partîts che a partecipin aes elezions autonomichis che si tignaran inte comunitât di Castilie e León ai 13 di Fevrâr. La prime e je chê di riformâ il Statût di autonomie par ricognossi la uficialitât dal galizian intal Bierzo e in Sanabria, areis di lenghe galiziane che a partegnin aes provinciis di León e Zamora, dal basc a Trebiñu / Treviño, isule aministrative castiliane dentri dal teritori de Comunitât Autonome Basche, e de varietât asturiane leonese. Pal Bierzo si domande po di slargjâ la pussibilitât di studiâ il e par galizian in dutis lis scuelis publichis dal teritori, di uficializâ i toponims in lenghe proprie e di meti sù un servizi linguistic provinciâl.
A blocâ la riforme dal Statût di autonomie des Asturiis nol è il gnûf articul 4, su la uficialitât des lenghis propriis, ma la modifiche de tassazion. A socialiscj, çampe e Podemos i mancje un vôt in Parlament par podê procedi cu la riforme statutarie e la uniche pussibilitât e je chê di otignî la poie dai conservadôrs dal Foro che a àn metût su la taule diviersis domandis e, tra chestis, la eliminazion de impueste di sucession che e je cumò daûr a blocâ la tratative. Al pâr invezit che cu la ultime version fate indenant dai socialiscj si vedin superâts i berdeis sul articul dedicât aes lenghis uficiâls. Il test concuardât al previôt cuatri comis. Il prin al declare asturian e eonaviego lenghis propriis des Asturiis. Il secont al dîs che chestis dôs, intune cul castilian, a son lis lenghis uficiâls des Asturiis e al rimande lis modalitâts pratichis de lôr uficialitât a di une leç di pueste di aprovâ cuntune maiorance dai trê cuints dal Parlament. Intal tierç come si impegnin lis istituzions publichis a garantî l’ûs normâl des lenghis ricognossudis e a promovi lis lenghis propriis garantint i mieçs adats pal lôr disvilup. Il cuart al aferme che nissun al pues jessi discriminât par vie de lenghe che al dopre.
La manovre di belanç de Comunitât des Asturiis pal 2022 e previôt 2 milions e 205 mil euros pal asturian, cuasi 130 mil euros in plui dal an prime. In realtât, dal moment che si à vût un aument complessîf des risorsis a disposizion de Comunitât, la percentuâl dai fonts pal asturian rispiet al totâl dal belanç e reste simpri ferme sul 0,04%. I fonts a laran ai servizis di normalizazion linguistiche di une cuindisine di ents locâi, ae federazion dai conseis comunâi asturians, ae universitât di Uviéu / Oviedo, ae radiotelevision publiche RTPA, ae societât publiche che e gjestìs la promozion turistiche e culturâl, ae Academie de Lenghe Asturiane, e a di une serie di progjets di promozion de lenghe proprie. Cundut dal progjet di riformâ il Statût di autonomie cu la introduzion de couficialitât dal asturian, intal belanç no son stadis previodudis risorsis par concretizâ cheste novitât.
Axuntar, la gnove associazion pe normalizazion dal galizian des Asturiis, e à presentât lis sôs propuestis intant di un incuintri cul diretôr gjenerâl de politiche linguistiche dal principât des Asturiis. Tant che asturians di lenghe galiziane i delegâts di Axuntar a rivendichin un procès di normalizazion vêr de lôr lenghe proprie a partî de riforme dal Statût di autonomie che il guvier e il Parlament a son cumò daûr a frontâ. In chest sens, la associazion e domande che tal Statût gnûf si ricognossi che lis lenghis propriis de Comunitât a son l’asturian e il galizian des Asturiis e che chestis dôs lenghis, intune cul castilian, a sedin declaradis uficiâls e che si garantissi il dirit di ducj i citadins di cognossilis e di doprâlis. La normalizazion e la dignitât de lenghe a àn dut câs di partî dal non, cul ricognossiment de forme “galizian des Asturiis” par superâ il stigme vivût di cui che lu fevele, che par agns si à sintût a dî che la sô no jere une varietât galiziane ma une fevele “di transizion”. Lis propuestis fatis indenant a cjapin dentri une leç che e regoli la zonizazion, la tutele e la promozion de lenghe, ma ancje une revision de toponomastiche locâl e des normis grafichis che e tegni cont di chê dal galizian standard.
Intant di une audizion denant de Assemblee asturiane, Francisco González Orejas, il diretôr gjenerâl de RTPA – la Radio Television dal Principât des Asturiis –, al à fat il pont su la presince de lenghe proprie te radiotelevision publiche di cheste Comunitât. Al à ricognossût che a son ancjemò tantis robis di podê fâ par miorâ, ma al à ancje ricuardât che, tai prins sîs mês di chest an, lis oris di emission par asturian a son stadis 349, come a dî il 10% di dute la programazion. Par González Orejas si trate di une cuantitât ancjemò limitade ma, chel istès, impuartante e al à domandât che al sedi il guvier o il Parlament locâl a meti jù un document di suaze cui obietîfs di rivâi, in maniere di judâ dirigjents e lavoradôrs de radiotelevision publiche a capî ce percentuâls di programazion in lenghe proprie che si vûl vê e su cualis areis tematichis.
Intant de prime riunion dai grups parlamentârs su la riforme dal Statût di autonomie des Asturiis, il PSOE – partît che al vuide il guvier in cjarie – al à proponût di cjapâ di model il Statût de Galizie par meti jù la part riferide ae uficialitât de lenghe asturiane. Cuâi sono i passaçs riferîts al galizian che si cjatin inta chel document? Prin di dut si lu definìs lenghe proprie de Comunitât. Po si declare la sô uficialitât, intune cul castilian, e il dirit di ducj i citadins di cognossilu e di doprâlu. Si aferme ancje che nissun al pues jessi discriminât par vie de lenghe doprade e si impegne lis istituzions publichis a garantî l’ûs normâl e uficiâl des lenghis ricognossudis e a promovi la lenghe proprie. Chescj, duncje, i principis che si volarès meti dentri pal asturian inte riforme dal Statût. Dut câs, al à sclarît il president de Comunitât Adrián Barbón, il model galizian al sarà di esempli dome pe scriture dal Statût intant che pe metude in vore dai principis elencâts intal document lis Asturiis a sielzaran un sisteme diferent che si adati ae realtât sociâl e politiche de Comunitât. La uficialitât dal asturian e viôt cuintri sei il PP che Ciudadanos, intant che il partît de estreme diestre Vox no si à nancje presentât ae riunion su la riforme dal Statût.
La organizazion Xunta pola Defensa de la Llingua Asturiana e à clamât adun pai 16 di Otubar a Uviéu / Oviedo une manifestazion par rivendicâ la uficialitât dal asturian. La iniziative e je stade convocade dopo che il president dal guvier asturian al à fat savê che in curt si vierzarà il procès di riforme dal Statût di autonomie. La Xunta e domande che, te suaze de riforme, si ricognossi tal Statût l’asturian (e ancje la varietât galiziane asturiane fevelade te part plui ocidentâl des Asturiis) come lenghe uficiâl de Comunitât, adun cul castilian. Si spere – a disin i organizadôrs – che cheste e sedi la ultime manifestazion di place pe uficialitât de lenghe: une sperance leade al fat che, pe prime volte, ancje la maiorance dai deputâts des Asturiis si à declarade a pro de uficialitât. Duncje, almancul su la cjarte, la volontât dal guvier e de maiorance parlamentâr a son. La manifestazion e vûl mostrâ cumò ancje la poie popolâr e par chest la Xunta e invide a di une partecipazion massive.
L’esecutîf des Asturiis al à cjapât posizion in maniere esplicite par no doprâ plui “galizian-asturian” ma “eonaviego” o “fala eonaviega” par indicâ la varietât galiziane fevelade te part plui ocidentâl de Comunitât autonome. Cheste linie si poie suntune propueste de Academie de Lenghe Asturiane che e sosten cemût che il tiermin doprât fin cumò nol cjate une grande poie popolâr. No je par nuie dacuardi Xera – la associazion che di agns si bat pal galizian asturian – che e lamente che cheste sielte no dome e scancele la linie tignude, ancje sul plan normatîf, intai ultins trente agns ma e ven fat cence nissun confront cun cui che al lavore par promovi cheste lenghe. Par Xera cheste manovre e vûl dome fâ confusion par platâ la mancjance di politichis linguistichis seriis pal galizian des Asturiis de bande dal guvier locâl.
La organizazion Iniciativa pol Asturianu e à denunciât un altri câs di discriminazion linguistiche te universitât di Uviéu / Oviedo. Intant di un cors dedicât ae storie e ae culture asturiane, cualchi student al à presentât i siei scrits in lenghe proprie però, cuant che a son stâts publicâts i risultâts finâi, si à scuviert che chestis provis a risultavin come no presentadis impedintji cussì di superâ il cors. Intal domandâ sclariments ur è stât dite che se a volevin che lis lôr provis a fossin calcoladis validis a vevin di presentâlis ancje par castilian. La cuistion e je stade comedade te session seguitive ma dome pe disponibilitât di un professôr a esaminâ i tescj par asturian. Iniciativa pol Asturianu e domande ae universitât di meti fin a cheste discriminazion e a garantî il plen rispiet dai dirits linguistics che no puedin poiâsi sul volontariât o la disponibilitât dai singui.
Ai 8 di Mai, in ocasion de Zornade de leterature asturiane, la Xunta pola Defensa de la Llingua e je tornade in place par domandâ la uficialitât dal asturian. Dopo che l’an passât, par vie de crisi sanitarie, no si veve podût davuelzi la manifestazion programade, chest an si à imbastît une iniziative publiche che e rispietàs lis misuris di sigurece. Cussì te place de catedrâl di Uviéu / Oviedo cinccent personis a àn componût un mosaic di bandieris di colôrs diviers cu la peraule “oficialidá”. Tun moment là che la riforme dal Statût di autonomie e je sostignude dal stes president de Comunitât, Adrián Barbon, si domande che l’asturian al sedi ricognossût ad in plen tant che lenghe uficiâl des Asturiis, intune cul castilian, e che si garantissi la tutele plene ancje pal galizian fevelât intes areis plui ocidentâls de Comunitât. Intal discors che al à sierât la manifestazion, la puartevôs de Xunta, María Xosé Martínez, e à declarât che e je ore di meti di bande lis strategjiis di partît e di ricognossi daurman e cence scurtis l’asturian lenghe uficiâl.
