Paîs Catalans: El Segell al rive ancje tal Alguer

E je rivade ancje tal Alguer / Alghero, aree catalanofone de Sardegne, la iniziative El Segell promovude de organizazion Plataforma per la llengua cun chê di valorizâ la etichetadure par catalan dai prodots comerciâi. Ae campagne a àn za tacât a aderî lis primis impresis citadinis. L’ûs de lenghe proprie tes etichetis al permet di miorâ la visibilitât dai prodots e di dâi une imagjin di imprese responsabile e atente al teritori e aes sôs specificitâts. Cui che al aderìs ae iniziative, in plui di gjoldi di un servizi di traduzion gratuit, al ven ancje metût in contat cun distributôrs che a operin intai Paîs Catalans in maniere di fâju cognossi, in gracie de lenghe comun, intune aree cetant plui grande di chê di partence.

Font: PFPLL, 28/10/20

Sardegne: pas indenant pes lenghis minorizadis a scuele

Ai 25 di Setembar il guvier regjonâl de Sardegne al à publicât l’avîs public pal insegnament e l’ûs veicolâr des lenghis propriis inte scuele e tal specific dal sart, dal catalan dal Alguer / Alghero e des varietâts galurese, sassarese e tabarchine. Il bant al met a disposizion pôc mancul di un milion di euros su dôs liniis di intervent batiadis Insulas e Frailes, la prime dedicade al ûs e al insegnament des lenghis in orari curicolâr (660 mil euros) e la seconde ai laboratoris didatics extracuricolârs (sù par jù 284 mil euros). Lis risorsis a son a disposizion des scuelis de infanzie, di chês primariis e di chês secondariis de isule. Te stesse zornade si à metût sù ancje il bant pal catalic dai laboratoris didatics intes lenghis minorizadis. Un pâr di setemanis prime, invezit, al jere jessût l’avîs pe costituzion de liste regjonâl dai insegnants di lenghe sarde e catalane. Si trate di azions che, intune cu la delibare dal esecutîf regjonâl che e fisse lis liniis di indreçament sul ûs e sul insegnament des lenghis propriis, a permetin di struturâ miôr e di infuartî la presince di chestis lenghis intes scuelis de Sardegne.

Font: RAS, 25/09/20

Sardegne: ancje par catalan il sît dal comun dal Alguer

La aministrazion comunâl dal Alguer, citât sarde di lenghe catalane, e à dât fûr la gnove version dal so sît internet istituzionâl che, pe prime volte, al propon dongje dal talian ancje la version par catalan. Si trate di une des azions imbastidis par valorizâ la lenghe proprie e che si zonte al ufici linguistic comunâl inviât intal Jugn dal an passât e ae incressite des iniziativis culturâls dedicadis ae lenghe catalane.

Font: El Nacional, 10/05/19

Paîs Catalans: “Apparella’t” al rive ancje tal Alguer

Ai 27 di Avrîl e je disbarcjade ancje tal Alguer la aplicazion “Apparella’t” metude adun de organizazion Plataforma per la Llengua cun chê di facilitâ lis conversazions par catalan e la formazion di cubiis linguistichis sul model dai volontaris pe lenghe operatîfs za di agns in Catalogne. Si trate duncje di un imprest pensât par infuartî l’ûs sociâl de lenghe e che, in gracie di un sisteme di gjeolocalizazion e di criteris specifics di selezion, al jude a cjatâ la persone miôr par podê esercitâsi a fevelâ par catalan. Dopo di jessi stade presentade ator pai Paîs Catalans la aplicazion e je stade presentade ancje te uniche localitât sarde là che si fevele ancjemò par catalan.

Font: PFPLL, 26/04/19

Sardegne: sucès dal centri diestre talian intes regjonâls

Domenie ai 24 di Fevrâr si son tignudis in Sardegne lis elezions par rignuvî la Assemblee e il guvier de Regjon autonome. La partecipazion al vôt e je stade dal 53,75%. Cuntun sisteme eletorâl che e met al centri la figure dal president dal esecutîf, la vitorie e je lade a Christian Solinas e ae coalizion che e met adun lis fuarcis dal centri diestre statâl e regjonalist. Solinas – che al rive dal Partito Sardo d’Azione ma che al è il responsabil de aleance tra i regjonaliscj de isule e la Leghe (al pont di jessi stât elet senatôr propit cun chest partît) – al à otignût il 47,81% des preferencis intant che la coalizion che lu poiave e à cjapât il 51,76% e a varan duncje a disposizion la maiorance assolude te Assemblee regjonâl.

Sardegne: fate buine la gnove leç di politiche linguistiche

Ai 27 di Jugn il consei regjonâl de Sardegne al à fat bon – cun 25 vôts a pro e 20 cuintri – il test unificât su la politiche linguistiche regjonâl. Dongje di chês pe lenghe sarde, il test al ricognòs une serie di misuris di tutele e di promozion ancje pal catalan dal Alguer e pes varietâts galuresis, sassaresis e tabarchinis feveladis su la isule. Pes azions previodudis de leç si assegnin mieç milion di euros intal 2018, 3,2 milions intal 2019 e 3,3 milions intal 2020. Sul plan de istruzion il proviodiment al met in pîts la Obreria pro s’imparu de su sardu tant che organisim paritetic cul ufici scolastic regjonâl cun chê di fissâ lis liniis di indreçament pal insegnament dal sart e dal catalan intes scuelis; si met po in vore la cuote regjonâl dai plans di studi par garantî l’insegnament de storie de lenghe sarde. Sul model za in vore in Friûl – Vignesie Julie, si cjapin sù dal stât centrâl lis competencis inte gjestion aministrative dai sportei linguistics. Si previodin contribûts pe editorie, pai mieçs di comunicazion, pai sîts internet e pai imprescj informatics proporzionâts al ûs reâl de lenghe proprie. Cun funzions consultivis su la metude in vore de leç e nas po la Consulta de su sardu, clamade ancje a tornâ a meti man sul standard linguistic: un element – chest ultin – che al va a meti in discussion il procès di standardizazion de lenghe sarde che tal 2006 al veve puartât ae nassite de Limba Sarda Comuna.

Font: RAS, 27/06/18; ANSA, 27/06/18; Unione Sarda, 27/06/18

Sardegne: rinviât in comission il progjet di leç su lis lenghis

Dopo di une discussion avonde vivarose, il consei regjonâl de Sardegne al à decidût di rinviâ al esam de comission culture il test unificât su la politiche linguistiche che al viôt tant che prin firmatari il conseîr Paolo Zedda. I contignûts dal test a vevin jevât avonde dubis sei framieç dai rapresentants de maiorance che tra chei des oposizions e, no par nuie, a jerin stâts presentâts uns tresinte emendaments. A contestâ la propueste di riforme de normative su lis lenghis de Sardegne al jere stât ancje il coordenament Pro Su Sardu Ufitziale che al segnalave dute une rieste di problematichis, a tacâ de maniere contraditorie che si frontave il procès di standardizazion de lenghe sarde che tal 2006 al veve puartât ae nassite de Limba Sarda Comuna.

Font: La Provincia del Sulcis Iglesiente, 13/06/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.

Corsiche: leams plui fuarts cu la Galure

Ai 21 di Avost, Saveriu Luciani, delegât pe lenghe dal esecutîf cors, si à cjatât cui sindics e cui rapresentants dal associazionisim culturâl de Alte Galure cun chê di infuartî i rapuarts jenfri la Corsiche e cheste regjon de Sardegne là che si fevele une varietât linguistiche une vore dongje di chê corse. Si àn cussì metudis jù lis fondis par un acuardi di cooperazion che al puarti ae nassite di un centri culturâl cors – galurês a Tempiu / Tempio Pausania cun chê di promovi la lenghe e la culture comune. La colaborazion si slargjarà ancje sul plan de scuele cu la pussibilitât pai students galurês di frecuentâ i centris di imersion linguistiche in vore in Corsiche e cul svilup di percors formatîfs ancje pal personâl scolastic.

Font: Corse-Matin, 22/08/17

Europe: svilup digjitâl, publicâts i risultâts dal DLDP

A son stâts publicâts i risultâts dal progjet DLDP, o sei il progjet su la diversitât linguistiche tal digjitâl, che al cjapave in esam l’ûs di cuatri lenghis minorizadis – il basc, il breton, il carelian e il sart – intal setôr digjitâl par capî cemût che a vegnin dopradis, ce che al è acessibil o mancul ta chestis lenghis, e la ande dai utents in proposit. Ce che al ven fûr al è, prin di dut, che cui che al fevele chestis lenghis al à gust di doprâlis in ducj i contescj sociolinguistics ufierts dal digjitâl. Di chest pont di viste, lis rêts di comunicazion sociâl a àn un grues potenziâl che però al è disfrutât inmò masse pôc e al covente duncje sburtâ cui che al fevele lenghis minorizadis a doprâlis simpri di plui ancje par creâ contignûts digjitâi. Cun di plui si domande a fuart une incressite dal ûs des lenghis minorizadis intal setôr public e la lôr poie sul plan struturâl (par vie che no si pues e nol è just poiâsi dome sul lavôr volontari dai ativiscj). Su la fonde di cheste ricercje, svilupade dal Istitût di linguistiche computazionâl dal CNR di Pisa, si larà cumò a meti jù des liniis di indreçament par sburtâ la diversitât linguistiche digjitâl. La iniziative e podarès jessi ancje il pont di partence par une ricercje che e cjapi dentri dutis lis lenghis minorizadis de Europe.

Font: ELEN, 24/07/17

Sardegne: iniziative par promovi il cine tes lenghis propriis

Ai 30 di Avrîl si à la ultime zornade par presentâ i progjets cinematografics de prime edizion di Kentzeboghes, concors imbastît par sburtâ la produzion di curtmetraçs e di documentaris fevelâts almancul pal 60% intune des lenghis o des varietâts feveladis in Sardegne, ven a dî sart e catalan ma ancje galurês, sassarês e tabarchin. La iniziative e je stade metude adun de Società Umanitaria - Cineteca Sarda di Casteddu / Cagliari, de associazion Babel, di Eja TV e di Areavisuale Film. Il concors al è dividût in dôs sezions, une pes scuelis e une pai autôrs. I films che a vessin di jessi metûts adun su la fonde dai progjets premiâts a saran po presentâts in anteprime tal Babel Film Festival, manifestazion di riferiment pes produzions cinematografichis intes lenghis minorizadis e intes varietâts linguistichis locâls.

Font: La Cineteca Sarda, 09/04/17

Sardegne: e torne in Rai la programazion par sart

Di lunis ai 6 di Març su la radiotelevision publiche a son tornâts a tacâ i programs in lenghe sarde. Un tant al è stât pussibil in gracie dal acuardi anuâl tra la aministrazion regjonâl sarde e la sede locâl de Rai che al previôt 144 oris di programazion radiofoniche in limba su lis 344 totâls garantidis de radiotelevision publiche ae Sardegne. La assessore regjonâl pe culture, Claudia Firino, e spieghe però che si trate dome di un pont di partence dal moment che l’esecutîf nol è par nuie content di cemût che la lenghe sarde e ven tratade a nivel statâl, là che no je stade nancje calcolade intal moment che si à metude jù la leç di riforme de Rai.

Font: IteNovas, 02/03/17

Corsiche - Sardegne: prin pas par un pat tra lis dôs isulis

Pai presidents des dôs Regjons, Gilles Simeoni e Francesco Pigliaru, chê metude su la declarazion di intindiments tra Corsiche e Sardegne e je une firme “storiche” par vie che e met lis fondis par un pat tra lis dôs isulis che si propon di inviâ une colaborazion plui strente par frontâ i problemis comuns, ma ancje di promovi adun i propris interès sei tai confronts dai guviers centrâi, sei a nivel di istituzions europeanis. Un front unic duncje che al dedi plui fuarce aes rivendicazions dai doi popui sul plan politic, sociâl, economic, culturâl e linguistic. Un pat che si intint po di infuartî cu la zonte des Baleârs, in maniere di imbastî une aleance tra lis isulis dal mediterani ocidentâl che, tra i tancj elements in comun, a àn chê di jessi patrie di comunitâts nazionâls e linguistichis diviersis rispiet a chei dai stâts di partignince.

Font: RAS, 14/03/16

Sardegne: ae Regjon la gjestion des risorsis de leç 482/99

Lis normis pe metude in vore dal Statût di autonomie de Sardegne che a son stadis fatis buinis ai 4 di Dicembar dal Consei dai ministris talian i permetaran ae Regjon di vê cualchi spazi di autonomie in plui su lis politichis linguistichis. Tra lis primis novitâts si varà il passaç ae Regjon de gjestion direte dai fonts de leç statâl 482/99 su lis minorancis linguistichis assegnâts dal guvier talian pe lenghe sarde e par chê catalane dal Alguer. Fin cumò a decidi il ripart di chestis risorsis al jere il dipartiment pai afârs regjonâi dal guvier talian. Un pas dal gjenar al jere za stât fat agns indaûr cu la Regjon autonome Friûl – Vignesie Julie pai fonts assegnâts aes lenghis furlane, slovene e todescje.

Font: Unione Sarda, 05/12/15

Sardegne: coordenament su “minorancis” cun Trentin e Friûl

Intant dal apontament dal festival european Suns dedicât aes arts performativis in lenghe minorizade che si è tignût a Casteddu / Cagliari, si à vût un incuintri tra la assessore regjonâl pe lenghe e pe culture sarde Claudia Firino e i siei coleghis Gianni Torrenti dal Friûl – Vignesie Julie e Giuseppe Detomas dal Trentin – Sud Tirôl. Ta cheste riunion si à decidût di meti sù un coordenament tra lis regjons dal stât talian là che si àn “minorancis linguistichis” che al tegni di voli lis politichis linguistichis in vore e che al meti in cjamp imprescj e azions in comun pe promozion des lenghis propriis. Il coordenament al varès di partî in ocasion de prossime riunion de comission culture de conference taliane stât – regjons. Intant dal incuintri in Sardegne i trê assessôrs a àn invidât il Parlament talian a sierâ in curt il percors di ratifiche de Cjarte europeane des lenghis regjonâls o minoritariis che si strissine di agns cence mai rivâ insom.

Font: RAS, 30/11/15

Sardegne: il Comun di Casteddu al slargje l’ûs dal sart

Il consei comunâl di Casteddu / Cagliari al à fat bon il gnûf statût dal ent che al previôt novitâts significativis ancje pe lenghe sarde. L’articul 12 de gnove cjarte comunâl, fat bon cu la poie unanime dai conseîrs, al impegne l’ent a promovi l’implei dal sart tant che lenghe di ûs cuotidian, a partî des comunicazions istituzionâls cui citadins. Il statût al va duncje te direzion di meti in vore la leç statâl e chê regjonâl su lis lenghis “minoritariis” intal sens plui larc. Ta cheste suaze e jentre ancje le prevision dal bilinguisim visîf cu la presince dal sart dongje dal talian inte toponomastiche e te segnaletiche stradâl.

Font: Sardinia Post, 03/11/15

Sardegne: gnove propueste di leç pe lenghe sarde

Il grup “Sardegna Vera” al à presentât in Consei regjonâl une gnove propueste di leç su la valorizazion de lenghe sarde. La iniziative, metude adun cul Coordenament pal Sart Uficiâl, e ponte a saltâ fûr dal inclapament là che si cjate la politiche linguistiche pal sart. Tra i ponts di fonde de propueste o cjatìn il ricognossiment de Limba Sarda Comuna tant che lenghe couficiâl de Regjon, la introduzion di dutis lis facilitazions pe lenghe sarde che si puedin za meti in vore cence bisugne di modifichis dal Statût di autonomie, il passaç de competence su la lenghe dal assessorât pe istruzion publiche ae presidence de Regjon, la nassite di une agjenzie pe politiche linguistiche, l’inseriment dal sart tant che lenghe curicolâr e veicolâr intes scuelis, la creazion di regjistris pai insegnants e pai operadôrs linguistics, e dute une schirie di misuris specifichis par sburtâ il sart intes aministrazions publichis, tai mieçs di comunicazion, te editorie, tal associazionisim e tes realtâts produtivis. Si previôt po une dotazion anuâl di 3 milions di euros, almancul pai prins trê agns. La propueste e previôt misuris di tutele ancje par chês altris varietâts linguistichis feveladis su la isule tant che il catalan algherês, il sassarês, il galurês e il tabarchin.

Font: Casteddu On Line, 27/06/15

Sardegne: propueste par sburtâ l’insegnament dal sart

Une propueste di leç sul insegnament de lenghe sarde intes scuelis sotscrite dai presidents dai grups consiliârs di maiorance e di oposizion e je stade presentade intal Consei regjonâl de Sardegne e e varès di jessi fate buine za tai prins mês dal 2015. Daûr di ce che e previôt la leç statâl 482/99 la adesion al insegnament dal sart e sarà volontarie, ma rispiet a ce che e previodeve la leç regjonâl sul sart dal 1997 la propueste e ponte a garantî continuitât didatiche e uniformitât intal insegnament de lenghe sarde. Cun di fat, ogni an si previodin almancul 120 oris dedicadis ae lenghe proprie de isule intes scuelis de infanzie e 80 oris tes primariis. Il test al previôt un regjistri regjonâl dai insegnants di sart cu la certificazion des lôr competencis linguistichis e didatichis, e une comission cun funzions di coordenament e di vuide de ativitât des istituzions scolastichis. Par inviâ cheste riforme si previôt une dotazion finanziarie di trê milions di euros ad an pai prossims trê agns.

Font: Castedduonline, 16/01/15; La Nuova Sardegna, 17/01/15

Sardegne: gnove mozion pe ratifiche de Cjarte europeane

Intal consei regjonâl de Sardegne e je stade fate indenant une gnove mozion par domandâ che il stât talian al ratifichi la Cjarte europeane des lenghis regjonâls o minoritariis. A grande maiorance i conseîrs sarts a domandin al guvier regjonâl di impegnâsi par che la presidence dal consei dai ministris talian e lis comissions parlamentârs competentis a puartin insom il percors di ratifiche de Cjarte.

Font: Sa limba sarda, 14/11/14