09/05/20

Irlande: la sierade des scuelis estivis e menace il Gaeltacht

E monte la preocupazion intal Gaeltacht, o sei lis areis là che l’irlandês al è ancjemò doprât in maniere significative, dopo de decision di tignî sieradis vie pal 2020 lis scuelis estivis a imersion che a permetin a cuasi 27 mil students ogni an di perfezionâ lis lôr competencis linguistichis par gaelic. Se ducj a capissin lis resons de decision – cjapade dal guvier di Dublin par limitâ la difusion de pandemie – ce che al spaurìs al è il fat che l’esecutîf irlandês, almancul par cumò, nol à previodût compensazions pes ativitâts economichis colpidis de decision. Cun di fat si calcole che lis scuelis estivis a movin un zîr economic di 50 milions di euros ad an, che al rapresente la jentrade principâl par tantis comunitâts dal Gaeltacht che, pe plui part, a vivin une situazion di disvantaç economic. Cence compensazions nol è dome il risi che diviersis di chestis scuelis no sedin plui in stât di vierzi chest an che al ven, ma che la depression economiche e sburti une part de popolazion a lâ vie dant un colp mortâl ae tignude des ultimis areis là che l’irlandês al è ancjemò lenghe vive.
Font: The Irish Times, 30/04/20

Paîs Basc: il 36% dai pamplonês al vûl il basc tes scuelutis

Daûr de inchieste comissionade de coalizion di diestre (Navarra Suma) che e guvierne il comun di Iruñea/Pamplona, se al ves la pussibilitât di decidi framieç di diviers modei di scuele infantîl (par fruts jenfri 0 e 3 agns) il 13% dai residents al sielzarès pai siei fîs il model a imersion par basc, il 10% chel bilengâl euskara e inglês, il 8% chel bilengâl basc e castilian e il 5% chel cun dutis e trê chestis lenghis. Par un 36% di citadins, duncje, la lenghe basche e à di jessi presinte in forme primarie o parziâl inte educazion dai fîs. Al reste di capî cemût che la aministrazion comunâl de capitâl de Navare e tignarà cont di chescj dâts dal moment che il sindic Enrique Maya al veve progjetât di smiezâ, a partî dal an scolastic 2020-2021, la ufierte di classis in lenghe basche pai fruts di 0 a 3 agns. Ufierte che tal 2015, cuant che al guvier de citât e jere une coalizion nazionalitarie progressiste, e jere cressude dal 11 al 28%: percentuâl che dut câs – cemût che e palese ancje cheste inchieste – e je plui basse rispiet ae domande des fameis.
Font: Noticias de Navarra, 29/04/20

Romanie: atacs incrosâts ae minorance magjare

Il president rumen Klaus Iohannis al à acusât i sociâi democratics (PSD), o sei il principâl partît di oposizion, di lavorâ parsot cul guvier di Budapest par consegnâ la Transilvanie ae Ongjarie. Un tant al è sucedût dopo che une propueste di leç presentade de Union Democratiche dai Ongjarês in Romanie (UDMR) su la autonomie dal Székelyföld e je passade in prime leture te Cjamare dai deputâts. Il Székelyföld al rapresente il teritori de Transilvanie là che la minorance ongjarese e je ancjemò maioritarie. In realtât il test al è passât dome pal fat che la legjislazion rumene e previôt che cuant che une propueste di leç e reste in aule par plui di 45 dîs e ven aprovade in automatic. Il PSD al à duncje vût zûc facil intal mostrâ di vê votât cuintri de propueste in comission e a ribaltâ la acuse sui liberâi nazionâi aleâts di Iohannis che no àn convocât il Parlament in timp par podê votâ. I dirits e lis rivendicazions de minorance ongjarese a tornin cussì al centri dal conflit politic tant che vitimis principâls di un nazionalisim rumen simpri plui agressîf. In maniere paradossâl, viodude la sô partignince ae minorance todescje de Romanie, il president Iohannis al è un dai prins a stiçâ lis sflamiadis xenofobichis cuintri des comunitâts minorizadis dal paîs.
Font: Balkan Insight, 29/04/20

Paîs Catalans: nassude une gnove television par catalan

Cui 27 di Avrîl a son scomençadis lis emissions di Teve.cat, une gnove television in lenghe catalane che e trasmet in digjitâl inte aree dal principât di Catalogne. Daûr dai siei ideadôrs, la sô programazion si poiarà su trê gjambis, o sei intratigniment, dibatiments e atualitât. Teve.cat e dopre lis frecuencis che fint al an passât a jerin dopradis de television metude sù dal grup editoriâl El Punt Avui.
Font: Info Periodistas, 28/04/20

Irlande: CnaG e ufrìs ancje un servizi di traduzions

Cui 27 di Avrîl la organizazion pe lenghe irlandese Conradh na Gaeilge e à inviât un servizi di traduzion disponibil par ducj. A garantîlu e je une scuadre di tradutôrs esperts e al è disponibil par tescj di ogni sorte e di ogni lungjece, sei dal gaelic al inglês che dal inglês al gaelic. Cundut che no si trate di une des ativitâts statutariis de organizazion, si à decidût di metile in vore dopo che tai ultins agns si à vude une incressite impuartante te domande di traduzions dal e par irlandês.
Font: CnaG, 27/04/20

Scozie: gnovis risorsis par gaelic pai frutins plui piçui

E varès vût di jessi publicade intal mês di Avost ma, viodude la situazion causade de crisi epidemiologjiche in at, e je za stade metude fûr la gnove plateforme digjitâl Gàidhlig nan Òg che e ufrìs cetantis risorsis par imparâ il gaelic scozês. Metude adun de agjenzie gaeliche pes risorsis educativis (Stòrlann Nàiseanta na Gàidhlig), la plateforme e propon oris di materiâi visîfs e audio par insegnâ peraulis e frasis par gaelic, ma ancje piçulis storiis e ativitâts di fâ, dut dividût su trê nivei progressîfs di competence linguistiche. La iniziative e je pensade in primis pai frutins plui piçui (di 0 a 5 agns) che a àn di tacâ a imparâ il gaelic ma e permet ancje ai adults di svicinâsi a cheste lenghe in maniere facile e divertente.
Font: WHFP, 26/04/20

Bretagne: suspindûts i programs par breton di France 3

Dopo di jessi sparît des ondis di France Bleu Breizh Izel, cumò il breton al è stât eliminât ancje di France 3 Bretagne. Cun chê di sbassâ il risi di infezion pal personâl, la direzion de television publiche francese e à decidût di ridusi la sô programazion locâl. Si à cussì unificât lis emissions di France 3 Pays de la Loire, France 3 Centre Val de Loire e France 3 Bretagne e suspindût dutis lis produzions curadis di cheste ultime a partî di chês in lenghe bretone e no si sa ancjemò cuant che a podaran tornâ a tacâ. La emitente si à difindût cul dî che sul so portâl Internet e à metût a disposizion cetant materiâl di archivi par breton tant che lis produzions pensadis pes filieris scolastichis bilengâls e a imersion.
Font: Ouest France, 25/04/20

Paîs Basc: campagne pe declarazion dai redits par euskara

La normalizazion di une lenghe minorizade e passe pe pussibilitât di doprâle pardut, fintremai te declarazion dai redits. Par chest inte Comunitât Autonome Basche e massime te provincie de Gipuzkoa a son stadis inviadis za di cualchi an des campagnis par sburtâ i citadins a doprâ la modulistiche disponibile par euskara. Cundut che il numar di chei che a sielzin cheste opzion al è daûr a cressi, e je ancjemò marcade la diference tra chei che lu fasin e chei che a varessin la capacitât linguistiche par fâlu. In Gipuzkoa, di fat, il 45% de popolazion jenfri i 25 e i 70 agns al è alfabetizât par basc ma chei che lu doprin par compilâ la declarazion dai redits a son sù par jù il 17%. Ancje chest an, duncje, e je tornade a partî la campagne par doprâ l’euskara te declarazion dai redits là che in prime linie a son diviersis aministrazions comunâls: tra lis plui ativis su chest front vie pal 2020 o cjatìn chê di Elgoibar.
Font: Diario Vasco, 24/04/20

Irlande: tal Nord gaelic fûr des risorsis educativis in rêt

La autoritât pe educazion de Irlande dal Nord e je stade acusade di escludi il gaelic irlandês dai materiâi pal insegnament a distance e di chei par informâ su la pandemie in at. In plui che par inglês, i materiâi publicâts in rêt a son stâts voltâts in altris dîs lenghis (tant che arabic, polac, portughês e slovac) ma, tra chestis, no je olme di irlandês. La agjenzie publiche si à difindude cul dî che i materiâi a son stâts disvilupâts su domande di realtâts ativis intal cjamp de assistence sociâl e a son stâts pensâts par chês fameis che no àn l’inglês come lenghe di cjase e si cjatin duncje plui in dificoltât. Chel istès, a disin lis organizazions pe lenghe, l’irlandês al è stât tratât come se nol jentràs nuie cu la Irlande dal Nord e a son stâts dismenteâts i 6.813 arlêfs che tal an scolastic 2019/2020 a àn l’irlandês come lenghe di insegnament.
Font: BBC, 23/04/20

Paîs Catalans: in linie i dâts inzornâts sul stât de lenghe

Il dipartiment pe culture dal guvier catalan al à publicât intune sezion di pueste i dâts inzornâts e integrâts su la situazion sociolinguistiche dai Paîs Catalans. Dentri si cjatin dutis lis informazions che a divegnin dai censiments davuelts intes diviersis tieris di lenghe catalane jenfri il 2013 e il 2015 intune cun chês de inchieste sui ûs linguistics de popolazion dal 2018. Il cuadri gjenerâl al mostre un numar stabil di 12 milions di personis che a capissin il catalan e di 10 milions in stât di fevelâlu. Cundut che a son fassis di popolazion o areis là che la lenghe e je debule, il catalan al reste la lenghe europeane cence stât che e gjolt dal miôr stât di salût e che e risulte plui atrative. La aree là che la lenghe e je plui fuarte e reste chê dal principât de Catalogne cun cuasi 6 milions di personis che le fevelin e altris 900 mil che le capissin, i vegnin daûr il Paîs Valenzian – cun doi milions e mieç che le fevelin e un altri milion che le capìs – e lis isulis Baleârs cun 883 mil fevelants e altris 163 mil che le capissin. A chestis trê comunitâts autonomis là che lis formis di tutele linguistiche a son altis, si à po di zontâ il piçul stât di Andorra – là che il catalan al è fevelât di 66 mil personis – e diviersis areis là che la lenghe e gjolt di pocje tutele tant che la Catalogne dal Nord sot aministrazion francese (131 mil fevelants), la Franja de Ponent intal Aragon (38 mil) e la citât dal Alguer in Sardegne (20 mil).
Font: Generalitat de Catalunya, 20/04/20