28/04/09

Irlande: fonts dal guvier par insegnâ il gaelic fûr de isule

Internazionalitari 05 2008


Il guvier irlandês al à metût fûr passe 700 mil euros par sburtâ l’insegnament de lenghe gaeliche fûr de isule. Cuasi un tierç dai fonts al larà intai Stâts Unîts par finanziâ progjets par insegnâ il gaelic ta chel paîs, là che e vîf une gruesse comunitât di divignince irlandese. Dut câs, i bêçs a coventaran a insegnâ la lenghe ancje in altris stâts, tant che la republiche ceche, là che il centri di riferiment e sarà la universitât Carli IV di Praghe.

Font: Gaelport, 20/04/09


Galizie: e cres la mobilitazion in difese de leç sul galizian

Internazionalitari 05 2008


E cres la mobilitazion in difese de leç su la politiche linguistiche che il gnûf president dal guvier galizian, Alberto Núñez Feijoo, al à in progjet di cambiâ. A domandâ un incuintri urgjent cul president de Xunta par frontâ la cuestion, a son i membris de EDNL, o sei il coordenament galizian dai grups pe normalizazion e pal svilup linguistic. Si trate di une realtât che e met adun passe 400 grups che a operin intai centris educatîfs publics e privâts de Galizie. Si trate di sogjets in prime linie inte azion di politiche linguistiche e, duncje, a domandin di podê dî la lôr su la cuestion. La lôr preocupazion pal progjet di limitâ la leç fate buine inte legjislature stade e je stade pandude ancje par mieç di un manifest sotscrit di centenârs di grups di normalizazion.

Font: Galiza Hoxe, 20/04/09


Tatarstan: iniziative pe difese dai dirits linguistics

Internazionalitari 05 2008


Une racuelte di firmis par sburtâ la Duma, il Parlament federâl rus, a discuti su la pussibilitât di ricognossi il tatar tant che seconde lenghe uficiâl de Federazion. La iniziative, sburtade de organizazion Uzebez e dal Forum zovanîl tatar, e à chê di riclamâ la atenzion su lis dificoltâts che cheste lenghe – la plui fevelade daspò dal rus – e je daûr a vivi inte Federazion. Cun di fat, il tatar, doprât di passe 5 milions di personis, al gjolt di un status di uficialitât dome inte republiche federade dal Tatarstan, cun dut che e je fevelade di cetancj di lôr ancje fûr di chê aree. La Union zovanîl tatare Azatliq, cun di plui, e denuncie ancje lis pressions che a rivin di Mosche e che a limitaressin lis ativitâts de stesse republiche dal Tatarstan.

Font: Nationalia, 17/04/09


Cecenie: finît il regjim antiterorist rus

Internazionalitari 05 2008


Ai 16 di Avrîl a son jentrâts in vore i decrets dal Servizi federâl di sigurece e dal Comitât antiterorist rus che a previodin la fin dal cussì clamât “regjim antiterorist” metût in vore des autoritâts russis in Cecenie. Chest al vûl dî che il ministeri federâl pal interni al varès di ritirâ dal paîs caucasic cuasi 20 mil dai siei oms e che a varessin di jessi gjavadis une schirie di limitazions di nature legâl e socioeconomiche che a jerin in vore ta chescj agns in Cecenie. La decision e sarès motivade dal sucès des operazions cuintri dai grups armâts cecens e de volontât di dimostrâ ae opinion publiche russe che la situazion e je sot control. Il cussì clamât “regjim antiterorist” al jere in vore bielzà dal 1999, ancje se il conflit si veve svilupât ancjemò tai prins agns novante. La vuere in at jenfri i indipendentiscj cecens, che vie pai agns si son spostâts dispès su posizions di stamp fondamentalist islamic, e lis fuarcis armadis russis, poiadis dai guviers cecens filorus e à puartât a di un vêr gjenocidi, come che al è stât denunciât milante voltis des organizazions pai dirits umans.

Font: RIA Novosti, 16/04/09


Letonie: vierte une sezion dal EBLUL

Internazionalitari 05 2008


Sul principi dal mês di Avrîl al è stât metût sù ancje in Letonie un comitât locâl dal EBLUL (l’Ufici european pes lenghis mancul dopradis). Par cumò, intal organisim, a son rapresentadis cuatri comunitâts minorizadis, ven a dî livons, latgalians, rus e võro. La comunitât plui gruesse e je chê russe, che si calcole che e vedi uns 700 mil membris, che si cjate a vivi une situazion dificile massime par vie che, cu la indipendence de republiche baltiche, e je passade di un status di maiorance a un di minorance. Situazion une vore divierse pal livon, lenghe de famee ugrofiniche, che e je aromai fevelade juste di cualchi disine di personis. Propit di cheste comunitât, dut câs, al rive il president dal gnûf comitât dal EBLUL (LatBLUL): Jānis Mednis. Il latgalian al ven tignût plui di varietât dal leton che no di lenghe indipendente. Il võro al è fevelât massime in Estonie, dulà che si lu calcole dispès di varietât de lenghe uficiâl di chel paîs.

Font: Eurolang, 15/04/09


Romanie: partîts ongjarês adun par une leç su la autonomie

Internazionalitari 05 2008


Daspò dal pat eletorâl pes europeanis, e de nassite dal Consei di coordenament dai ongjarês de Transilvanie, la Aleance Democratiche dai Ongjarês in Romanie (RMDSz) e il Consei Nazionâl Székely (SZNT) a lavoraran adun ancje par un disen di leç su la autonomie des regjons a maiorance magjare de Romanie. La gnove e je stade comunicade dai referents principâi dai doi partîts, Marko Bela e László Tőkés. In curt si metarà sù un grup di vore che al permeti di superâ i ponts di diference che i doi partîts a àn ancjemò su la cuestion di maniere di rivâ po a preparâ un test di leç condividût. La propueste e varès di jessi metude adun dentri dal mês di Jugn.

Font: Divers.ro, 13/04/09


Bretagne: disponibil l’archivi toponomastic dal Ufici pe lenghe bretone

Internazionalitari 05 2008


L'Ufici de Lenghe Bretone al à metût sul so sît internet, a disposizion dai studiôs e dal public, KerOfis, o sei la base di dâts sui toponims metude adun cuntun lavôr lât indenant par cuindis agns. Si trate di passe 46 mil nons di lûc, compagnâts di uns 37 mil pronunciis, 14 mil variantis ortografichis e plui di 60 mil formis antighis. In cierts câs, i nons a son compagnâts ancje di notis etimologjichis. L’obietîf di fonde di chest lavôr al è chel di ufrî un cuadri sigûr, ancje dal pont di viste de grafie, massime pal ûs public de toponomastiche, a tacâ de segnaletiche stradâl. In plui dai nons di lûc, des aministrazions e dai monuments principâi de Bretagne, KerOfis al ufrìs ancje la version bretone dai toponims forescj plui impuartants.

Font: Ofis ar brezhoneg, 04/09