Il riç leterari 03 – Edorta Jimenez

Te tierce pontade de rubriche leterarie di Internazionalitari o tornìn intal Paîs Basc par fevelâ di Edorta Jimenez. Il tocut che si propon chi disot al è gjavât fûr dal romanç “Baleen berbaroa” publicât tal 1997 de cjase editore Txalaparta (publicât par talian tal 2003 cul titul “La voce delle balene” dal editôr Tranchida). Si trate di une conte lungje che si davuelç intal Paîs Basc vie pal secul XVI. La muart di un marinâr e sburte il zovin Sebastian a lâ plui a fonts ta chel che al pense che al sedi un sassinament. La sô ricercje lu puartarà a scuvierzi cetant di plui di chel che al varès pensât e a cjatâ fûr chê che e sarà la sô strade.

Al jere un satûl, di un len scûr preseôs che sul tapon al veve scrit il gno non cun letaris indoradis. Di aur a jerin ancje la clavute, la bochetute de clavarie e lis bertuelis daûr.

“Sù po om, vierzilu!”

Chel “sù po om” e jere la musiche dai agnui pes mês orelis. Plui che no dutis chês altris voltis che te mê vite mi vevin clamât “om”. O vierzei chel satûl. Par ducj i agnui dal Cîl e par ducj i diaui dal Unfier, ce che nol jere li dentri!

O tirai sù il tapon che tal so didentri al veve une sorte di sachete fodrade di sede turchine che, dentri vie, si lumave une bergamine. Cundut che chel che o viodevi al fos maraveôs tant che il Cîl, ce che al jere dentri al jere ancjemò plui biel dal arc di Sant Marc. I miei voi i rivarin sbrissant su la sede turchine.

“Sâr mestri, ce che al è?”

“Al è par te.”

A jerin ducj i imprescj che a coventin a di un pilote par imbastî une traviersade sigure: un compàs; un canocjâl, par svicinâ ce che al è lontan; une sfere armilâr par calcolâ i calendaris par cent agns cui lôr mês, i lôr dîs, lis lôr oris; une bussule; e, par finî, une clessidre che il so savalon blanc al slusive di fine purece.

“Gr… grazie une vore.” Cuasi no rivavi a dî peraule. “Us ai agrât une vore.”

“O soi jo che ti ai agrât.” Mi rispuindè tant che difûr si podevin sintî i pas di Martin.

Cuant che i disei “us ai agrât” mi visai che ducj chei che ju vevi sintûts a dî chel istès – Agirre, Luzien, barbe Juan e Zubiaur – a jerin dentri tune societât segrete. Mi vignì fintremai di pensâ che cul doprâ chês peraulis, sâr Zubiaur mi varès tignût par un membri di chê societât dome par vêlis sintudis sui miei lavris. Se e je vite ta chel altri mont al è di sperâ che si puedi jessi contents come che o ai stât jo ta chel moment. Se nol è cussì, alore miôr che no sedi!

Edorta Jimenez, nassût a Mundaka tal 1953, al à completât i siei studis universitariis cuntune lauree in filologjie basche. Al à publicât libris di poesie (cul pseudonim di Omar Nabarro), contis curtis e lungjis, e romançs, cun di plui al à ancje scrit senegjaturis par documentaris e par programs televisîfs e al à scrit par diviers cuotidians tant che Egin, Egunkaria e Gara e par rivistis. Doi dai siei romançs a son stâts publicâts ancje par talian: “Baleen berbaroa” (La voce delle balene, 2003, Tranchida) e “Azken fusila” (L’ultimo fucile, 2004, Tranchida). Par vê acès a plui informazions su chest scritôr e a diviersis des sôs oparis si pues lâ su cheste pagjine.

Il riç leterari / Literatura trikua: Flann O’Brien

Seconde pontade par cheste rubriche che daspò dal Paîs Basc e tocje cumò la Irlande, par fevelâ di Flann O’Brien autôr che al à scrit sei par gaelic irlandês, sei par inglês. Chi disot al è un tocut gjavât fûr di une rubriche (Cruiskeen Lawn) che par agns al à curât sul cuotidian “The Irish Times” là che al à mostrât plui a clâr la sô vene satiriche.

Chê altre dì o soi stât a cjatâ un amì fresc di gnocis e la robe mi à dât di pensâ. Il gno amì al è une vore siôr, ma ancje une vore grês. Tant che al jere daûr a comprâ i cavalets dai jets, lis taulis, lis cjadreis e dut il rest, i à saltât sù di cjoli ancje une librarie. No sai se al è bon di lei o no, ma un spirt di osservazion primarûl al à di vêlu sburtât a pensâ che par solit la int plui rispietade e innomenade e à in cjase une sdrume di libris. Cussì al à decidût di cjoli un pocjis di librariis e al à paiât un trafichin par che jes jemplàs cun ogni sorte di novitâts, là che a jerin ancje diviers volums costôs che a vevin tant che argoment la piture paisazistiche francese.
Intant che o jeri là, o ai viodût che nissun di chei libris al jere stât viert o tocjât e o ai fat notâ la robe.
“A pene che o varai finît di sistemâmi – mi à dite chel pote – o tornarai a butâmi su lis mês leturis.”
E propite chel mi à fat pensâ. Cemût mai un siorat di chê fate aial bisugne di fâsi passâ par un che al lei? No saressial miôr se un espert liuladôr di libris al les a cjase sô e i fruiàs come cu va dute la biblioteche par un tant a riplan? Une persone che e vedi mistîr ta chê sorte di lavôr e sarès in stât di meti dongje un grum di bêçs.
O vuei spiegâus miôr ce che o intint. I libris che o viodês tes buteghis a mostrin a clâr di no jessi mai stâts lets. Il dizionari di latin di un student, invezit, al pâr che al sedi stât let cussì tant di jessi aromai a sflics. Al è clâr che chel dizionari al è stât viert e cjalât milante voltis, ma se daûr no fossin un pôcs di sberlots, us vignarès di pensâ che chel student al va mat pal latin e che nol rive a stâ lontan dal so dizionari. Il stes al vâl pal nestri amì ignorant che al vûl che i siei ospits a pensin, cuntune voglade a cjase sô, che al è une persone di grande culture. Metìn che al vedi cjolt un libri sul balet rus, magari scrit te lenghe di chê tiere lontane, ma cetant biele. Il nestri lavôr al sta tal fruiâlu avonde in curt di maniere che ducj chei che lu cjalaran a pensaran che il so proprietari al à vivût, mangjât e durmît cun chel volum par mês a dilunc. A vê voie, si podarès discuti se al è il câs di inventâ une machine, alimentade di un motôr a benzine picinin ma che al lavore ben, che e sedi buine di lei cualsisei libri in cinc minûts. Ta chê maniere, bastarès zirâ un menul fin che al pâr che si lu vedi let par cinc o dîs agns. Dut câs, chest al è il mût di fâ frêt e pôc fin che al è tipic de nestre ete. Nissune machine, di fat, e je buine di fâ il stes lavôr dai dêts delicâts di une man. La sole vere soluzion a chest probleme sociâl dal nestri timp e diven dal liuladôr di libris espert e pratic. Ce fasial? Cemût puartial indenant il so lavôr? Trop varessial di cjapâ par ce che al fâs? In tropis manieris si puedino fruiâ i libris?
A chestis e a altris domandis o rispuindarai passantdoman.

Flann O’Brien (1911 – 1966), pseudonim di Brian O’Nolan, al è stât un dai plui impuartants scritôrs irlandês dal Nûfcent. Origjinari dal Gaeltacht (la zone de Irlande là che il gaelic al è inmò doprât in maniere significative), al à vivût buine part de sô vite a Dublin, là che daspò dai studis al University College al à lavorât tant che impleât intai uficis ministeriâi. Al è cognossût massime pai siei romançs “At Swim-Two-Birds” (1939), “The Dalkey archive” (1964) e “The Third Policeman” (jessût tal 1967 cuant che al jere za muart) scrits par inglês, e “An Béal Bocht” (1941) scrit par gaelic irlandês. Cheste ultime opare, amare e comiche tal stes timp, e je une critiche cuintri di chê part dal moviment pe rinassince gaeliche che e piturave il Gaeltacht in maniere convenzionâl e stereotipade. Intai siei libris l’umorisim irlandês e l’amôr pal fantastic si messedin in maniere ecuilibrade, adun cuntun stîl di scriture moderni, ma cun riclams profonts ae antighe leterature gaeliche. Dut câs, il so spirt satiric al ven fûr massime tai tocs scrits pe rubriche “Cruiskeen Lawn” che al à curât par sù par jù vincj agns sul cuotidian “The Irish Times”. La rubriche, scrite sul imprin par gaelic, e passarà po al inglês par rivâ plui a larc al public dublinês. Tai siei tocs, firmâts cul pseudonim Myles na Gopaleen, O’Brien al fâs satire su ciertis categoriis professionâls e su cierts personaçs innomenâts (tant che il president irlandês Eamon de Valera), ma al presente ancje machinaris, mistîrs e associazions di fantasie che a dan une cerce de sô imagjinazion e des sôs capacitâts leterariis.

Il riç leterari / Literatura trikua: Joseba Sarrionandia

Chest contribût al va a vierzi une gnove rubriche dentri dal blog di Internazionalitari, daûr di une idee che si veve bielzà sul principi, ma che fin cumò no si veve inmò metût in vore. Ven a dî, une rubriche che e dedi une piçule cerce de produzion leterarie di altris nazionalitâts tibiadis. Par fâlu o proponarai la traduzion par furlan di une poesie, di une cjançon o magari ancje di un bocon di prose di autôrs che a partegnin a comunitâts minorizadis. La sperance e je chê di insiorâ chest blog cun contignûts che a ledin di là de rude cronache di ce che al sucêt ator par chês altris nazions cence stât e di invoiâ la int a leiju, ancje se lis traduzions che o proponarai no àn nissune ambizion leterarie dal moment che par voltâ leterature i vûl tant mistîr e nol è il gno câs. O profiti par disi grazie al amì Ivo, che mi à dât un sburt a tirâ fûr e a voltâ une poesie che e jere li tal scansel di masse timp. Si trate di “Esklabu erremintaria” (Il sclâf fari) dal scritôr basc Joseba Sarrionandia.

Il sclâf fari

Fat presonîr intai boscs dal ocident,
ti àn menât a Rome, sclâf,
ti àn dât un lavôr di fari
e tu tu fasis cjadenis.
Il fier in bore che tu gjavis de fusine
tu puedis lavorâlu come che tu vûs,
tu puedis fâ spadis
par che i tiei paisans a rompin lis lôr cjadenis,
ma tu, di sclâf,
tu fasis cjadenis, inmò cjadenis.

Joseba Sarrionandia, al è un dai autôrs bascs plui impuartants dal dì di vuê. Nassût a Iurreta tal 1958, si è laureât in filologjie basche e al à po insegnât in diviersis universitâts baschis, in plui di colaborâ cun variis rivistis di stamp culturâl, leterari o linguistic. Tal 1980 al è stât arestât cu la acuse di jessi un membri di ETA e al è stât condanât a 28 agns di preson. Tal 1985 al è scjampât de preson di Martutene e di in chê volte al vîf in clandestinitât. La sô fughe e je stade cussì straordenarie di deventâ il sogjet di une cjançon dai Kortatu – Sarri Sarri – deventade aromai part dal repertori musicâl nazionalitari basc (che si pues sintî a cjantâ tai moments di gjonde). Ancje in clandestinitât, Sarrionandia al va dilunc a scrivi poesiis, contis curtis e lungjis, e la cualitât dal so lavôr e je ricognossude a nivel internazionâl e e je stade premiade plui voltis.
La uniche opare voltade par talian (si dopre chest riferiment cu la cussience che pe plui part dai furlans e je cheste la lenghe plui doprade par lei, in spiete che lis robis a cambiin...) e je “Narrazioak” (publicade pe prime volte tal 1983 a Donostia), jessude tal 2002 par Tranchida cul titul “Lo scrittore e la sua ombra”.