04/08/10

Paîs Catalans: presentâts doi gnûfs sogjets indipendentiscj


Il panorame politic catalan al è in moviment daspò de sentence dal tribunâl costituzionâl spagnûl sul Statût di autonomie e de boçadure de bande dal Parlament catalan de leç di iniziative popolâr par inviâ un referendum su la indipendence. Tune conference stampe tignude ai 20 di Lui i deputâts catalans Uriel Bertran (ERC) e Alfons López Tena (CiU), intune cul fondadôr di Democràcia Catalana Joan Laporta, a àn presentât Solidaritat Catalana per la Independència, un cartel là che a àn invidât dutis lis formazions nazionalistis catalanis a dâsi dongje cun doi obietîfs di fonde, ven a dî: presentâ une candidature unitarie pes prossimis elezions cul impegn a proclamâ la indipendence de Catalogne di ratificâ po cuntun referendum popolâr; e meti in pîts un guvier provisori che al puarti ae creazion di un stât catalan dentri de Union Europeane. Une setemane dopo, denant dal cidin o des reazions clipis rivadis dai principâi partîts catalans tant che CiU e ERC, i trê a àn comunicât che a laran indenant cul progjet cence spietâ chei altris. Une adesion e je invezit rivade dal president di Entesa de Progrés Municipal, Jordi Fàbrega, intant che la associazion politiche Reagrupament e à mostrât di jessi interessade a aderî al progjet. Intes prossimis elezions pal Parlament catalan, dut câs, il spazi dal indipendentisim al sarà rapresentât ancje de liste Sí – Coalició per la Independència cu la partecipazion di diviers sogjets politics extraparlamentârs e personaçs di prin plan dal catalanisim militant.

Font: Nationalia, 29/07/10; VilaWeb, 20/07/1o


Irlande: Long Kesh nol sarà sdrumât


La ex preson di Long Kesh (The Maze pai britanics) e rapresente un lûc simbul de storie resinte de Irlande dal Nord, baste pensâ ai siopars de fam dal 1981 o ancje ae funzion impuartante che e à vût pal riscat de lenghe gaeliche. Zaromai di agns si fevelave di sdrumâle jù di plante fûr par lassâ puest a gnovis areis comerciâls e residenziâls. Cumò però la bataie par fâ in maniere che e deventàs un lûc de memorie, puartade indenant soredut dai republicans, e à fat un pas indenant. Cun di fat, il guvier nordirlandês al à decidût che diviersis struturis de ex preson, tant che la infermarie e il Bloc 6, a saran conservadis e che ta chel sît si crearà un centri di nivel european pe risoluzion dai conflits e pe costruzion de pâs. Cun di plui, in altris areis ristruturadis, si darà acet ancje ai uficis de Royal Ulster Agricultural Society.

Font: BBC, 29/07/10


France: preocupazion pes misuris cuintri dai rom


La decision anticipade dal president francês Nicolas Sarkozy di disbratâ vie ducj i cjamps rom e di inviâ la espulsion massive dai rom rumens e bulgars e à jevât reazions preocupadis sedi dentri che fûr dal stât francês. Lis organizazions pai dirits umans e diviers partîts francês a àn za fevelât di iniziative di stamp razist e xenofobic. Il Centri european pai dirits dai rom (ERRC) al à dite che il guvier francês, impen di menaçâ chest gjenar di azions, al varès di rispietâ la Cjarte sociâl europeane che al è za daûr a violâ propit par chel che si riferìs aes condizions abitativis dai rom. Cun di plui, dal moment che i rom rumens e bulgars a son citadins comunitaris, no si pues intervignî cun espulsions arbitrariis e massivis. Il guvier rumen si è declarât disponibil a colaborâ cun chel francês, ma dome par favorî la integrazion dai siei citadins, cence diferencis etnichis, intal stât francês.

Font: ERRC, 29/07/10; Balkan Insight, 29/07/10


Irlande: polemiche intal Nord sui fonts pes scuelis gaelichis


Un grup di parlamentârs unioniscj al à contestât la decision de ministre pe istruzion de Irlande dal Nord, Caitriona Ruane, di finanziâ cuatri gnovis scuelis là che la lenghe veicolâr e je il gaelic. Pai rapresentants unioniscj, di fat, chestis scuelis a ufrissin plui puescj di chei che a son domandâts e invezit di vierzint di gnovis si varès di proviodi a razionalizâlis. No le pense cussì la ministre che e spieghe che il numar di fruts che a frecuentin lis scuelis gaelichis al è daûr a cressi e, viodût che di struturis dal gjenar no ‘nd è tantis, si à di rispuindi aes domandis che a rivin dal teritori.

Font: BBC, 28/07/10


Gales: pal Plaid Cymru il guvier britanic al penalize il galês


Il Plaid Cymru al à domandât ai rapresentants dal guvier britanic, poiât di une coalizion tra Conservadôrs e Liberâi Democratics, dai sclariments in mert al progjet di taiâ di un cuart i fonts pe radiotelevision publiche in lenghe galese S4C. Un tai di cheste fate, al lamente il partît nazionalist galês, in plui di meti in pericul la programazion de emitente al larès a colpî cun fuarce ancje la industrie audiovisive galese. Il Plaid Cymru al segnale ancje i pericui des modifichis ae leç su la imigrazion che a previodin che cui che al ven a studiâ intal Ream Unît al vedi di dimostrâ almancul un nivel medi di cognossince dal inglês. Pal partît galês si à di pensâ des deroghis par cui che al rive par studiâ dome il galês, come tal câs dai students des comunitâts di divignince galese de Patagonie.

Font: Plaid Cymru, 23/07/10


Paîs Basc: nuie multis pes aziendis che no rispietin i dirits linguistics


L’esecutîf de Comunitât Autonome Basche, vuidât dal socialist Patxi López, al à fat savê che al cambiarà il decret sui dirits linguistics dai consumadôrs. In pratiche si gjavaran vie lis sanzions previodudis pes aziendis che no garantissin il rispiet dai dirits linguistics dai bascs. Dal moment che il procès di modifiche al domande un pôc di timp, il guvier basc al à decidût di spostâ di un an indenant la jentrade in vore dal decret che al varès vût di deventâ operatîf ai 17 di Lui. Dal moment che lis multis no saran plui in vore, al reste di capî cemût che si sanzionarà chês impresis che a cjapin bêçs par svilupâ l’ûs de lenghe basche, ma po ju doprin par altris fins.

Font: Gara, 23/07/10


Sud Tirôl: e je vuere vierte su la toponomastiche


Scuintri dûr jenfri il guvier talian e la Provincie autonome di Bolzan par vie de segnaletiche metude sù de AVS, o sei la associazion alpine sudtirolese, sui trois di mont dal Sud Tirôl. La plui part dai cartei e je dome par todesc e chest al à jevât lis protestis prime dai CAI e po des autoritâts talianis che a àn pretindût che la Provincie di Bolzan e gjavàs dute la segnaletiche monolengâl par meti al so puest dai cartei bilengâi. La Provincie e à ricuardât che la segnaletiche e je stade metude di un sogjet privât e cence spindi bêçs publics e che, duncje, no i tocjarès a jê di intervignî. Dut câs, ogni acuardi cul guvier talian al è stât impussibil ancje par vie dai timps imponûts di Rome (cuasi 40 mil cartei di sostituî intun an) e de pretese di meti formis talianis ancje là che no ‘nd è di tradizionâls. Sot vie, la cuestion principâl e somee jessi propite cheste, ven a dî la imposizion di nons talians che no son mai esistûts ma che a son stâts inventâts e imponûts intai agns dal fassisim. Propit il teme cjalt de toponomastiche al è ancje al centri di une propueste di leç fate indenant ta chestis zornadis de SVP, partît maioritari in Sud Tirôl, par cirî une soluzion al probleme.

Font: Alto Adige, 22-26/07/10


Cossovo: la Cort internazionâl di justizie e poie la indipendence


La Cort internazionâl di justizie e à dite che la declarazion unilaterâl di indipendence dal Cossovo no va cuintri de legalitât internazionâl. La sentence e va a rispuindi ae risoluzion presentade de Serbie denant de ONU par domandâ che la Cort si pronunciàs su la legalitât de indipendence declarade dal Cossovo intal Fevrâr dal 2008. Cundut che no je une sentence vincolante, chel istès si trate di un at impuartant che al è stât saludât cun sodisfazion des autoritâts cossovanis e che si crôt che al slargjarà il numar dai stâts che a àn ricognossût la sô indipendence (dai 191 membris de ONU a son dome 69 chei che lu àn za fat). Reazions une vore critichis a son invezit rivadis de Serbie, di dulà che si à fat savê che no si ricognossarà la indipendence dal Cossovo. Di plui bandis si à ancje segnalât che cheste sentence e darà un sburt a dutis chês comunitâts nazionâls che a vuelin deventâ indipendentis, tant che la Catalogne o la Scozie, o che a domandin il ricognossiment de lôr indipendence, tant che la Ossezie meridionâl o la Transnistrie. Dut câs, un dai stâts plui preocupâts pe sentence al è chel bosgnac che al à pôre che cheste decision e dedi un sburt ae indipendence de part serbe de Bosgne (Republika Srpska). Al è ancje cui che al pense che daspò di cheste sentence si varà di fâ un altri sfuarç par normalizâ i rapuarts tra Serbie e Cossovo cul ricognossiment di une autonomie speciâl pe part a maiorance serbe o fintremai cuntune modifiche dai confins.

Font: Nationalia, 22 e 27/07/10; Balkan Insight, 22/07/10


Kurdistan: il PKK al propon un acuardi pe fin de lote armade


Il Partît dai Lavoradôrs dal Kurdistan (PKK) al à fat indenant une gnove propueste par bandonâ in maniere definitive la lote armade. In cambi de rinuncie ae violence, il PKK al domande al guvier turc di acetâ un fermait il fûc e di meti fin ai atacs cuintri dai civîi e ae repression in at cuintri des organizazions politichis curdis. Il procès di pâs, al zonte il moviment curdi, al varès di davuelzisi sot de supervision de ONU. Se la Turchie e ves invezit di refudâ ancje cheste propueste, al zonte il PKK, la uniche soluzion pussibile e sarà chê de indipendence dal Kurdistan.

Font: Nationalia, 21/07/10


Sardegne: evitât il tai dai fonts pe lenghe sarde


E je lade a bon fin la proteste inmaneade cuintri dal tai des risorsis pe lenghe sarde che la aministrazion regjonâl e veve pensât di meti in vore. Sul imprin, la Zonte regjonâl e veve chê di smiezâ i fonts pe lenghe (che a rapresentavin l’un par cent des risorsis a disposizion dal assessorât pe culture). Daspò des azions di proteste metudis in at dai operadôrs dal setôr la Regjon e à decidût di mantignî dome i tais previodûts pes universitâts, che a àn ancjemò di spindi i bêçs che a àn vût pe lenghe sarde. Lis iniziativis di proteste a son stadis coordenadis dal Comitât pe lenghe sarde (Comitadu pro sa limba sarda) che ai 22 di Lui al à ancje inmaneât une manifestazion denant dal palaç dal Consei regjonâl a Casteddu / Cagliari.

Font: LsU / Comitadu pro sa limba sarda, 20-23/07/10


21/07/10

Paîs Catalans: plui di un milion in place cuintri de boçadure dal Statût


I efiets de sentence dal tribunâl costituzionâl sul gnûf Statût di autonomie de Catalogne, che e à declarât incostituzionâi 14 ponts dal Statût e a ‘nd à riviodûts al ribàs altris 27, no si son fats spietâ. Cun di fat, ai 10 di Lui plui di un milion di personis al à sfilât pes stradis di Barcelone par protestâ cuintri de decision dai judiçs spagnûi. Ae manifestazion, clamade dongje dal Òmnium Cultural, a àn dât la lôr poie ancje se cun acents diviers ducj i partîts catalans, fale la diestre spagnoliste. Iniziativis di proteste a son stadis inmaneadis ancje des comunitâts catalanis ator pal mont, intant che manifestazions di solidarietât a son rivadis di altris nazionalitâts minorizadis europeanis. La sentence e à ancje dât un colp ae aleance che e ten sù il guvier catalan: cun di fat i socialiscj catalans (PSC) a àn domandât a chei spagnûi (PSOE) di superâ lis boçaduris dal tribunâl costituzionâl par mieç di une schirie di acuardis direts jenfri Madrid e Barcelone; ICV-EUiA e à dite che la uniche strade pussibile e je chê di sburtâ par permeti ai catalans di esercitâ il dirit di autodeterminazion; intant che ERC e à dât par sierade la aleance cumò in vore par cjapâ la strade de indipendence de Catalogne. Par CiU, il principâl partît di oposizion, il pat costituzionâl al è stât crevât e i spiete dome ai catalans di sielzi il lôr avignî cence limitazions imponudis di altris.

Il cambiament domandât di CiU, dut câs nol rivarà par mieç de leç di iniziative popolâr par inviâ un referendum su la indipendence. Cun di fat, la propueste par lâ ta cheste direzion e je stade boçade daspò che il consei pes garanziis statutariis le à judicade fûr des competencis dal statût di autonomie. Cundut che il parê nol fos vincolant, CiU e ICV a àn gjavât ae propueste la poie che i vevin dât sul imprin.

Font: VilaWeb, 10-17/06/10; Avui, 10-11/06/10; Món Divers, 13/07/10


Paîs Basc: miârs in place pe autodeterminazion e par Udalbiltza


Passe dîs mil personis a àn manifestât ai 10 di Lui pes stradis di Donostia in rispueste al apel fat indenant di Eusko Alkartasuna, Alternatiba e de çampe indipendentiste basche. La iniziative e je stade inmaneade par rivendicâ il dirit di decidi di bessôi il lôr avignî e par pandi la proprie solidarietât ai catalans daspò de sentence dal tribunâl costituzionâl spagnûl sul gnûf Statût di autonomie de Catalogne.

Une setemane dopo, ai 17 di Lui, une manifestazion similâr si è davuelte pes stradis di Bilbo / Bilbao par pandi solidarietât ai aministradôrs locâi cjapâts dentri intal procès cuintri di Udalbiltza tacât cualchi zornade indaûr a Madrid. Il progjet di Udalbiltza al meteve adun aministradôrs locâi di dut il Paîs Basc e di diviers partîts cun chê di creâ une struture rapresentative basche che e partìs dal bas e che e les plui innà dai atuâi confins aministratîfs. Dut câs, ancje cheste struture e je stade cjapade dentri intune azion repressive e judiziarie cu la acuse di jessi leade a ETA. Une acuse refudade di ducj i imputâts che si cjatin cumò sot procès, ma ancje de grande part de societât basche. Ae manifestazion, di fat, no àn partecipât dome i rapresentants de çampe indipendentiste basche, ma ancje chei dal PNV, di Eusko Alkartasuna, Aralar, Alternatiba e fintremai cualchi conseîr comunâl socialist (PSE).

Font: Gara, 11 e 18/07/10


Gales: mozion di poie ae Catalogne dal Plaid Cymru


Intal Ream Unît la solidarietât ai catalans daspò de boçadure dal Statût di autonomie de bande dal tribunâl costituzionâl spagnûl e à cjapât la forme di une mozion presentade intal Parlament britanic. A fâle indenant al è stât il deputât galês Hywel Williams dal Plaid Cymru. Intal test si ricognòs che la Catalogne e je une nazion e si domande il rispiet dal dirit dai catalans di decidi in maniere democratiche dal lôr avignî.

Font: Vieiros Galiza Hoxe, 15/07/10


Irlande: inmò violence intal Nord par vie des marcis oranzistis


Ancjemò une volte il mês di Lui al è stât segnât di un aument de tension in Irlande dal Nord par vie des marcis oranzistis che a ricuardin la vitorie di Vielm III di Orange su Jacum II su la Boyne intal 1690. Tal inovâl di cheste bataie, di fat, i unioniscj a sfilin in diviersis localitâts de Irlande dal Nord e in cierts câs a pretindin di passâ ancje pai cuartîrs là che a son a stâ comunitâts nazionalistis. Chestis marcis a son deventadis dispès il pretest par violencis e atacs cuintri de popolazion nazionaliste. La istituzion di comissions par decidi il percors di chestis paradis no à rivât a eliminâ il probleme e la propueste di une riforme de legjislazion che e regole chest setôr e je stade refudade propit ai prins di Lui de maiorance dai membris dal Ordin di Orange. Chest an i incidents a àn interessât diviersis areis nordirlandesis, ma chei plui grues a son sclopâts ai 12 di Lui intal cuartîr nazionalist di Ardoyne a Béal Feirste / Belfast là che zovins republicans a àn atacât i oranziscj che a rivavin di Crumlin Road scortâts des fuarcis di polizie. I scuintris a àn causât diviers ferîts sei tra i zovins nazionaliscj che tra i poliziots. I incidents a son lâts indenant ancje tes zornadis seguitivis, ma cun mancul intensitât. Di plui bandis si à acusât i dissidents republicans di jessi i autôrs des violencis, ma si à ancje ricognossût che si à di cjatâ une soluzion definitive pes marcis di maniere che no sedin plui ocasion di incidents. De bande de polizie si à invidât dutis lis parts politichis a evitâ di stiçâ lis violencis setariis. Lis critichis de polizie cuintri de classe politiche nordirlandese a son alc di gnûf, come che al è gnûf il fat che lis critichis cuintri des fuarcis di polizie a rivin cumò plui de bande unioniste che no di chê republicane.

Font: BBC, 07-15/07/10; The Guardian, 13/07/10


Bretagne: ricognossiment pe cualitât dal insegnament par breton


L’istitût Diwan di Karaez-Plougêr / Carhaix-Plouguer al è otignût il secont puest inte classifiche des miôr scuelis secondariis dal stât francês che il cuotidian Le Figaro al da fûr ogni an. Il dât nol è di pôc se si pense che lis Diwan a son scuelis là che si dopre il sisteme di imersion linguistiche par breton e che no gjoldin dai stes jutoris che a àn lis scuelis statâls. La classifiche e je stade metude jù su la fonde dai dâts comunicâts dal ministeri pe educazion e e à cjapât dentri cuasi doi mil istitûts scolastics.

Font: Nationalia, 13/07/10


Danimarcje: preocupazion pes espulsions dai rom


L’arest e la espulsion di 23 rom de bande des autoritâts danesis sul principi di Lui e à jevât la preocupazion di diviersis organizazions pai dirits umans. Cun di fat, daûr de decision no sarès une vere investigazion che e à puartât a incriminâ i rom par cualchi reât, ma dome la clime di intolerance stiçade des declarazions di diviers politics danês. In prime linie ta cheste campagne al somee jessi il sindic di Copenhagen, Frank Jensen, che al à invidât a liberâ la sô citât dai “rom criminâi”. La situazion e je stade denunciade in particolâr dal Centri european pai dirits dai rom (ERRC) che al à invidât lis autoritâts danesis a evitâ declarazions razistis o di istigazion cuintri dai rom, a no arestâ nissun rom dome par vie de sô partignince etniche e a rispietâ lis diretivis europeanis su la libertât di circolazion des personis.

Font: ERRC, 12/07/10


Gales: premi pes aziendis che a promovin il galês


Tai ultins agns la Societât pe lenghe galese (Cymdeithas yr Iaith Gymraeg) si è impegnade une vore par denunciâ i compuartaments discriminatoris des grandis impresis cuintri dal ûs de lenghe galese. Cumò e à decidût di doprâ ancje une linie di azion positive cuntun premi pensât par chês aziendis che a judin la produzion locâl e a ufrissin un servizi di cualitât par galês. Il prin dai premis “caru’r gymraeg” al è lât ai 8 di Lui ae buteghe di oresin Trysor di Caerfyrddin / Carmarthen.

Font: Cymdeithas, 08/07/10


Asturiis: la RTVE no rispiete l’asturian


La associazion dai juriscj pal asturian e à denunciât denant de comission parlamentâr pai servizis radiotelevisîfs di Madrid il compuartament de cjadene televisive RTVE. Cun di fat la leç statâl su la radiotelevision dal 2006 e previôt che intes comunitâts autonomis al sedi garantît l’ûs des lenghis propriis di chei teritoris. Intes Asturiis, invezit, la RTVE no lu fâs.

Font: Aruelu, 08/07/10


Scozie: presentât il plan dal guvier pal gaelic


Il guvier scozês al à presentât il so plan cuincuenâl pal gaelic. L’intindiment dal plan al è chel di incressi la visibilitât de lenghe inte vite cuotidiane e di sburtâ la int a imparâ e a doprâ cheste lenghe. La ministre pal gaelic, Fiona Hyslop, e à spiegât che di cumò indenant cui che al scrivarà par gaelic al guvier al varà une rispueste inte stesse lenghe e che si larà a incressi i documents uficiâi produsûts ancje par gaelic, cun di plui a saran inmaneâts dai cors pal personâl public che al à voie di imparâ o di miorâ l’ûs di cheste lenghe. La gnove e je stade cjapade cun sodisfazion dal Bòrd na Gàidhlig, l’organisim di riferiment pe lenghe gaeliche scozese, che al à ancje sburtât chei altris organisims publics presints in Scozie e lâ daûr dal esempli dal guvier di Edimburc.

Font: Bòrd na Gàidhlig, 07/07/10


Corsiche: l’I-Phone al fevele ancje par cors


Il prin di Lui la coletivitât teritoriâl corse e à presentât “parlu corsu” o sei une aplicazion par I-Phone che e ponte a judâ a imparâ in forme ludiche la lenghe corse. Il progjet al è stât svilupât in gracie de colaborazion cuntune imprese corse specializade in tecnologjie par telefonie celulâr. La iniziative si insuaze tun progjet di politiche linguistiche plui larc che al à chê di favorî la trasmission dal cors ai zovins e di infuartî la posizion di cheste lenghe dentri de societât de isule.

Font: Radio Alta Frequenza, 01-02/07/10


06/07/10

Paîs Basc: propueste par slargjâ la aleance indipendentiste


Daspò che ai 20 di Jugn Eusko Alkartasuna e la çampe indipendentiste a àn metût lis fondis par un acuardi strategjic tra lis fuarcis indipendentistis baschis, i rapresentants dai doi sogjets politics a àn slargjât ancje a Aralar l’invît a partecipâ al progjet. Il coordenadôr di Aralar, Patxi Zabaleta, al à fat savê che il so partît al à acetât di discuti la propueste cui rapresentants di Eusko Alkartasuna e de çampe indipendentiste, ma al à ancje dite che nol acetarà limitazions al confront. L’acuardi sotscrit di chei altris partîts indipendentiscj al à des mancjancis e dai ponts che Aralar nol è dacuardi e che a varan duncje di jessi frontadis par podê rivâ a di un pat condividût. Eusko Alkartasuna, Alternatiba e la çampe indipendentiste a àn po clamât dongje une manifestazion a Donostia par sabide ai 10 di Lui par rivendicâ il dirit ae autodeterminazion e par pandi la proprie solidarietât ai catalans daspò de sentence dal tribunâl costituzionâl spagnûl sul gnûf Statût di autonomie de Catalogne. Intant a Madrid la comission costituzionâl parlamentâr e à fate buine une gnove propueste di riforme de leç eletorâl concuardade tra socialiscj e popolârs par impedî ogni rapresentance de çampe indipendentiste basche. In sostance si slargjarès la pussibilitât di meti fûr leç une liste fintremai dopo des elezions, di maniere di impedî la proclamazion dai siei elets. La uniche maniere par restâ in carghe e sarès une sorte di auto de fe: une proclamazion publiche di refût des ideis e des posizions che a son daûr de ilegalizazion compagnade po di un compuartament in linie cun cheste condane. In pratiche, sul cjâf di ogni elet indipendentist basc e pesarès une manarie pronte a colâ a pene che al ves di declarâ alc che a Madrid nol plâs. Pai nazionaliscj bascs e pe çampe radicâl spagnole si trate di une propueste dal dut incostituzionâl: un dubi che al à jevât fintremai cualchidun dai siei sostenidôrs.

Font: Gara, 01-03/07/10


Groenlande: sfrutament dal teritori al centri de adunance inuit


Lis consecuencis dal sfrutament des risorsis minerariis e energjetichis sul ambient a son stadis al centri de diesime prime adunance dal Consei Circumpolâr Inuit che si è tignude a Nuuk, la capitâl de Groenlande. La plui part dai rapresentants inuit – che in plui de Groenlande a son rivâts dal Alaska, dal Canada e de Siberie – e à pandût la sô contrarietât par chestis ativitâts che a van a alterâ l’ambient naturâl là che a vivin. A jevâ la atenzion dai inuit a son massime i doi poçs di petroli che si volarès inviâ in Groenlande e la miniere di urani che si ponte a vierzi intal Nunavut canadês. Tal câs che chestis ativitâts a vedin di jessi autorizadis, i inuit a domandin che une part dai vuadagns e vegni gjestide des comunitâts locâls.

Font: Galdu, 02/07/10


Paîs Catalans: sburt al catalan de gnove leç sul cine


Il Parlament catalan al à fate buine la gnove leç sul cine che e met suntun nivel paritari catalan e castilian. Il test al previôt che par ogni luncmetraç che al ven metût fûr in Catalogne lis cjasis di distribuzion a vedin di garantî metât des copiis sottituladis o dopleadis par catalan. Cun di plui il proviodiment al à chê di sburtâ la produzion cinematografiche catalane e di favorî la difusion dal cine european in version origjinâl cui sottitui. Il proviodiment al à cjatât la oposizion di une part dai impresaris dal setôr che a vevin ancje decidût di protestâ cuntune sierade des salis cinematografichis. La leç e je stade votade dai trê partîts che a formin la maiorance di guvier (PSC, ERC e ICV-EUiA) e di CiU, intant che la diestre spagnoliste e à votât cuintri.

Font: VilaWeb, 30/06/10


Paîs Catalans: tribunâl costituzionâl cuintri dal Statût


E sarà publicade ai 12 di Lui la version integrâl de sentence che il tribunâl costituzionâl spagnûl al à dât fûr ai 28 di Jugn in mert al gnûf Statût di autonomie de Catalogne. A son coventâts cuatri agns par rivâ a cheste sentence, cun di fat la cjarte di fonde de autonomie catalane e jere stade fate buine dal Parlament catalan, di chel spagnûl e po di un referendum popolâr ancjemò intal 2006. La decision dal tribunâl costituzionâl spagnûl, cjapade cuntune maiorance di sîs vôts su dîs, e à declarât incostituzionâi 14 ponts dal Statût e a ‘nd à riviodûts al ribàs altris 27. Tra i ponts boçâts o cjatìn diviers dai passaçs di fonde dal gnûf Statût tant che l’ûs preferenziâl dal catalan inte aministrazion publiche e intai mieçs di comunicazion, il decentrament dal podê judiziari in Catalogne e la pussibilitât di cierts spazis di autonomie finanziarie. In particolâr par chel che si riferìs ae lenghe catalane, a son diviers i aspiets ancje dome simbolics che il tribunâl costituzionâl spagnûl al à boçât o al à dât une interpretazion plui strente dal test origjinâl. La definizion de Catalogne tant che nazion che si cjate intal preambul dal Statût no je stade scancelade, ma si le à declarade cence nissun valôr juridic. La sentence e je stade cjapade cuntune vore di marum in Catalogne là che diviersis aministrazions locâls a àn decidût di protestâ cul meti fûr la bandiere catalane a mieze aste o ben cuntun floc neri o ancje cul tirâ vie la bandiere spagnole. Cun di plui une manifestazion di proteste e je stade clamade dongje pai 10 di Lui dal Òmnium Cultural e e à cjatât la poie di ducj i partîts catalans, fale la diestre spagnoliste. Dut câs se cierts partîts tant che ERC e CiU a fevelin di imbastî un referendum intal 2011 par che i citadins catalans a puedin esprimisi sul lôr avignî, il president de Generalitat (il guvier catalan), il socialist José Montilla, al pant la sô indignazion pe sentence ma al zonte che il Statût al è distès un pas indenant.

Font: Avui, 29-30/06/10; VilaWeb, 29-30/06/10


Scozie: mancul scuelis, ma plui gaelic intes isulis ocidentâls


Il Bòrd na Gàidhlig, l’organisim di riferiment pe lenghe gaeliche scozese, al à valutât in maniere positive il rapuart produsût dal guvier scozês su la educazion primarie par gaelic. Il document al fâs un cuadri de situazion e al segnale i problemis principâi di risolvi. In dì di vuê a son 127 i centris che a ufrissin ai fruts plui piçui une educazion par gaelic, pe plui part logâts intes Highlands e intes isulis ocidentâls. La maiorance dai fruts che ju frecuentin a rivin di fameis che no àn il gaelic tant che prime lenghe. I problemis principâi a son invezit leâts al numar dai insegnants in stât di paronâ il gaelic e al numar limitât di materiâi didatics ta cheste lenghe. Il Bòrd na Gàidhlig al à ancje esaminât il plan scolastic metût adun dal Consei des isulis ocidentâls che al previôt une riduzion dal numar di scuelis presintis intal so teritori. Il Bòrd al à fat savê che no i fasarà cuintri al plan par vie che, si ben che la sierade di diviers centris no je une sielte facile di cjapâ, al ponte a incressi e a miorâ la ufierte scolastiche in lenghe gaeliche.

Font: Bòrd na Gàidhlig, 25-30/06/10


Bretagne: unanimitât in Consei pe riunificazion bretone


Ai 25 di Jugn il Consei regjonâl de Bretagne al à votât ae unanimitât une mozion a pro de riunificazion aministrative dal teritori storic breton. Cun di fat, in dì di vuê, il teritori de Loire Atlantiche, che di un pont di viste storic al à simpri fat part de Bretagne, si cjate fûr de regjon aministrative che e cjape chest non. Zaromai di agns si à inviât une campagne pe riunificazion, ma fin cumò cence sucès. Intal document fat bon dal Consei regjonâl breton si propon ancje di imbastî une consultazion popolâr intai teritoris interessâts par che la int e puedi dî ce che e pense sul argoment. Cun di plui si larà a meti in pîts un grup di lavôr formât ancje di esperts esternis par studiâ la maniere miôr par rivâ ae riunificazion aministrative de Bretagne.

Font: Agence Bretagne Presse, 26/06/10


Corsiche: l’esecutîf al promet un ufici pe lenghe corse


L’esecutîf cors al à fat savê che al è daûr a lavorâ par meti in pîts un ufici pe lenghe corse. La nassite di une struture dal gjenar e jere stade domandade, che nol è tant, ancje de associazion dai insegnants di lenghe e culture corse. La gnove e je stade cjapade in maniere positive ancje dal coletîf Parlemu Corsu che al à proponût un plan di azion pe difese e pe promozion de lenghe proprie de isule. Dut câs, a disin i membris de associazion, l’ufici di bessôl nol è avonde, a son misuris inmò plui urgjentis di cjapâ a scomençâ di un statût di couficialitât de lenghe corse su dute la isule.

Font: Radio Alta Frequenza, 23-26/06/10


Paîs Catalans: catalan fin inte universitât ancje tal Aragon


I assessôrs pe educazion de Catalogne e dal Aragon a àn sotscrit un protocol che al à chê di garantî la pussibilitât di svilupâ un percors scolastic par catalan de scuele de infanzie fin ae universitât. L’acuardi, che al durarà trê agns, al previôt la promozion dal insegnament dal e par catalan, il svilup di materiâi didatics ta cheste lenghe e il scambi di students e di professôrs. Il protocol al varès di judâ massime i students de Franja, o sei la part dal Aragon là che si fevele par catalan.

Font: VilaWeb, 20/06/10


Serbie: manifestazions violentis cuintri dai rom


Dai 10 di Jugn indenant, intal paîs serp di Jabuka, si son svilupadis des manifestazions cuintri de comunitât rom che e vîf ta chel teritori. Des menacis si è passâts in curt ai atacs cuintri des proprietâts dai rom e ancje dai membris di cheste comunitât. Une cjase e je stade fiscade di plante fûr, doi fruts a son restâts ferîts e diviersis fameis rom a àn decidût di scjampâ par evitâ consecuencis inmò plui penzis. Il Centri european pai dirits dai rom (ERRC) e il Centri pai dirits des minorancis (MRC) a àn domandât al ministri pal interni e al comandant in cjâf de polizie serbe di intervignî par meti fin a chst vêr pogrom cuintri dai rom di Jabuka e di puartâ indenant une inchieste che e sclarissi miôr la vicende e punissi i responsabii.

Font: ERRC, 17/06/10


Paîs Basc: consei dal euskara blocât dal guvier socialist


Il president de Comunitât Autonome Basche, il socialist Patxi López, al à clamât dongje in Jugn il Consei pal euskara, o sei l’organisim che al à di coordenâ lis politichis di normalizazion linguistiche dal basc. E je la prime volte che al sucêt daspò che i socialiscj a àn cjapât in man il guvier de CAB, o sei plui di un an indaûr. Cheste sielte e à blocât lis ativitâts dal Consei che al jere impegnât inte revision dal plan gjenerâl pe promozion dal ûs dal euskara. A front des critichis simpri plui fuartis che a rivavin dai partîts nazionaliscj e des associazions pe lenghe basche, López al à decidût di clamâ dongje il Consei ma plui par une riunion formâl che di lavôr. Cun di fat, López al à fat savê che il Consei nol lavorarà vie pal Astât e al sarà tornât a clamâ dongje in Autun, ven a dî cuant che al scjât il mandât dai cuarante membris dal organisim nomenâts dal guvier precedent. Ta cheste maniere la revision dal plan pal euskara e sarà intes mans dai membris nomenâts dal atuâl guvier che, in plui di une ocasion, al à mostrât di jessi plui interessât a limitâ i spazis cumò ocupâts dal basc, che no a svilupânt di gnûfs.

Font: Deia, 11-12/06/10


22/06/10

Paîs Basc: acuardi par une aleance indipendentiste


Eusko Alkartasuna e la çampe indipendentiste a àn metût lis fondis par un acuardi strategjic tra lis fuarcis indipendentistis baschis. I rapresentants dai doi sogjets politics a àn declarât che il lôr obietîf al è chel di rivâ a creâ un stât basc indipendent, ma che cumò la prioritât e je chê dal superament dal conflit in at e de sparizion definitive de violence. Par chest si lavorarà par tirâ dongje ancje altris sogjets impegnâts pe autodeterminazion dal Paîs Basc. L’acuardi al fronte ancje altris temis tant che chel dal lavôr, de lote pe justizie sociâl e pe paritât tra oms e feminis. Par puartâ indenant chescj intindiments si proviodarà ancje a imbastî des aleancis eletorâls che a permetin di meti adun lis diviersis fuarcis indipendentistis baschis. Eusko Alkartasuna e la çampe indipendentiste a rivin di tradizions e di metodologjiis politichis diviersis, ma a àn spiegât che chest moment storic al domande la unitât di dutis lis fuarcis impegnadis pe autodeterminazion. Cheste aleance storiche e il so impegn par une soluzion politiche dal conflit a àn cjatât frêts sei i socialiscj che i popolârs che a domandin ae çampe indipendentiste une condane totâl di ETA.

Font: Gara, 20-11/06/10


Paîs Catalans: catalan couficiâl a Perpignan


Ai 15 di Jugn il comun di Perpignan (Perpinyà) al à fate buine la Cjarte municipâl pe lenghe catalane che e ricognòs la couficialitât di cheste lenghe, dongje dal francês, in dut il teritori comunâl. L’intindiment al è chel di tutelâ i dirits linguistics dai citadins e di promovi l’ûs de lenghe catalane inte scuele, intai uficis publichis, intai mieçs di comunicazion e inte segnaletiche stradâl. Par chel che al rivuarde la scuele si ponte in particolâr a svilupâ un plan pe vierzidure di classis bilengâls o a imersion, ma ancje percors di formazion pai adults e pai dipendents publics. La aministrazion di Perpignan si è po impegnade a sburtâ ancje chei altris comuns de Catalogne Nord a fâ il stes.

Font: VilaWeb, 16/06/10


Slovachie: ongjarês decisîfs pal gnûf guvier


Intes elezions dai 12 di Jugn cuasi il 35% dai slovacs al à dât il so vôt al partît socialdemocratic Smer che al à otignût 62 dai 150 puescj dal Parlament di Bratislava. Une vore divierse, invezit, la situazion par chei altris doi partîts che inte legjislature stade a formavin la coalizion di guvier. Cun di fat, il Moviment par une Slovachie Democratiche (HZDS) nol à rivât a passâ il soiâr dal 5% che al permet di jessi rapresentâts in Parlament e i ultranazionaliscj dal SNS (Partît Nazionâl Slovac) lu àn passât par un friç e a àn vût dome 9 elets: masse pôc par rivâ a meti adun une maiorance parlamentâr. I trê partîts di centri diestre rapresentâts in Parlament – la Union Cristiane e Democratiche Slovache (SDKÚ) cun 28 elets, Libertât e Solidarietât (SaS) cun 22, e il Moviment Democratic Cristian (KDH) cun 15 – a vevin za fat savê ae vilie des elezions che no si saressin aleâts cul Smer. La clâf dal gnûf guvier slovac e je cussì intes mans dal moviment Most – Híd nassût l’an passât di une division dentri dal SMK – MKP, il Partît de Coalizion Ongjarese. Cun di fat, se il SMK – MKP, cul 4,33% des preferencis, al è restât fûr dal Parlament, Most – Híd al à cjapât il 8,12% dai vôts e 14 parlamentârs. Most – Híd, che al vûl dî “puint” par slovac e par ongjarês, si propon di meti adun lis dôs comunitâts inte prospetive di un paîs multietnic, multiculturâl e multilinguistic. Il gnûf partît de minorance ongjarese al à, duncje, i numars par decidi cui che al à di guviernâ la Slovachie e al à sielzût di formâ une coalizion di guvier alternative cui partîts di centri diestre. I risultâts eletorâi a àn mandât in bestie la dirigjence dal Partît Nazionâl Slovac che, a bote cjalde, e à declarât che si trate di “une brute sconfite pe Slovachie” che cumò e sarà guviernade di “ongjarês e omosessuâi”.

Font: Rozhlas, 16-17/06/10; The Slovak Spectator, 13-15/06/10; Món Divers, 14/06/10


Irlande: publicade la inchieste sul Bloody Sunday


Chê dai 15 di Jugn e je stade une zornade storiche pe Irlande dal Nord cuant che a son stadis rindudis publichis lis conclusions de Comission Saville che e à puartât indenant une inchieste sul sassinament di 14 manifestants a Derry ai 30 di Zenâr dal 1972. Daspò di 38 agns, duncje, e ven pandude in maniere uficiâl la veretât su chê che, a nivel internazionâl, e je cognossude tant che Bloody Sunday. La inchieste e je lade indenant par 12 agns e e à puartât al esam di 160 volums di provis, 2500 testemoneancis, cuasi un miâr di testemonis direts e plui di 200 tra regjistrazions audio e video. Lis conclusions de inchieste no lassin spazi a dubis: ta chê zornade i parecjadutiscj britanics a àn trat cuintri di personis disarmadis che a partecipavin a di une manifestazion pai dirits civîi, nissun di lôr al rapresentave une menace pai soldâts che prime di trai no àn nancje dât un avîs che a jerin par vierzi il fûc. Une stragje che – daûr des peraulis dal prin ministri britanic, David Cameron – no veve nissune reson e che no si pues justificâ. Denant dal Parlament di Londre Cameron al à ancje domandât scuse a non dal guvier britanic. Pes fameis des vitimis chê dai 15 di Jugn e je stade la zornade che si à ristabilide la veretât. Cun di fat, une prime inchieste, davuelte subite daspò dai fats, e veve dineât cualsisei responsabilitât de bande dal esercit e e veve presentât lis vitimis come membris dal IRA. Cussì, par rivâ a di une inchieste indipendente, lis fameis des vitimis a vevin vût di puartâ indenant une lungje bataie. La stragje dal Bloody Sunday e à vût un pês une vore impuartant intal conflit nordirlandês, cun di fat propit la indignazion e la rabie par chel maçalizi a vevin sburtât cetancj zovins a jentrâ intes filis dal IRA e a radicalizâ la lote cuintri dal esercit britanic.

Font: BBC, 15/06/10; The Guardian, 15/06/10


Lusazie: a mancjin professôrs di lenghe serbiane


E cres la preocupazion in Lusazie pe tignude dal sisteme di imersion linguistiche prescolâr serbian. Cun di fat, il numar di insegnants nol è avonde par cuvierzi lis dibisugnis dai 25 centris scolastics là che si dopre cheste lenghe. In dì di vuê a son 111 i insegnants in stât di davuelzi il lôr lavôr par serbian, ma si calcole che a ‘nt coventaressin ancjemò uns 15 par garantî la tignude dal servizi di imersion linguistiche. In Lusazie, che si cjate a cjaval di Sassonie e Brandeburc, si calcole che a sedin tra lis 15 e lis 30 mil lis personis che a fevelin par serbian, la uniche lenghe slave autoctone de Gjermanie.

Font: Nationalia, 16/06/10


Belgjiche: sucès eletorâl pai indipendentiscj flamants


Lis elezions politichis dai 13 di Jugn inte Belgjiche a àn lassât daûrsi une situazion ingredeade pe formazion dal gnûf guvier federâl dal paîs. Cun di fat, i indipendentiscj de Gnove Aleance Flamande (N-VA, Nieuw-Vlaamse Alliantie) a son stâts i plui votâts (17,4% dai vôts totâi e passe il 28% intes Flandris) e a àn otignût 27 dai 150 puescj de Cjamare dai deputâts. In Valonie, o sei la part francofone de Belgjiche, invezit, la maiorance dai eletôrs e à votât pal Partît Socialist (13,7% dai vôts totâi e plui dal 37% in Valonie). Intes Flandris, daûr dai indipendentiscj si son plaçâts i cristians democratics (CD&V, Christen-Democratisch en Vlaams) che a àn otignût 17 deputâts, i socialiscj (SP.A, Socialistische Partij - Anders) e i liberâi democratics (Open VLD, Open Vlaamse Liberalen en Democraten) cun 13 elets parom e ducj i doi in diminuzion rispiet aes elezions dal 2007. Dut câs la riduzion di vôts plui marcade le à patide la estreme diestre indipendentiste dal Vlaams Belang che e à pierdût plui dal 4% dai vôts e, si ben che e à otignût 12 deputâts, a ‘nd à pierdûts 5 rispiet ae volte stade. Par completâ il cuadri dai elets intes Flandris si àn 5 deputâts verts (Groen!) e un dai populiscj de Lijst Dedecker. In Valonie, invezit, i liberâi dal Moviment Riformadôr (Mouvement Réformateur) a àn vût 18 elets, o sei 5 in mancul de volte stade. Daûr di lôr a son rivâts i democratics cristians (cdH, Centre démocrate humaniste) cun 9 deputâts e i verts dal Ecolo cun 8. Inte part francofone dal paîs al è po stât elet ancje un deputât de diestre dal PP (Parti Populaire). Lis elezions a mostrin, duncje, une Belgjiche inmò plui dividude tra la part flamande che e cjale simpri di plui ai partîts indipendentiscj e di diestre, e la part francofone che si poie su la çampe. Il prossim guvier al podarès jessi vuidât dal socialist Elio Di Rupo, ma dome se al sarà bon di cjatâ un acuardi cu la Gnove Aleance Flamande. Bart De Wever, che al vuide i indipendentiscj flamants, al à fat capî che l’acuardi al è pussibil, ma dome se si larà a di une riforme radicâl dal implant statâl belgjic che e cressi in maniere fuarte il nivel di autoguvier des Flandris, massime sul plan finanziari. I flamants, dut câs, a rivendichin ancje la gjestion plene dal distret di Bruxelles-Hal-Vilvorde che cumò al è dentri inte aree bilengâl de capitâl belgjiche e che al è stât il motîf che al veve puartât aes elezions politichis anticipadis.

Font: Le Monde, 13-14/06/10; La Libre, 14/06/10; Gara, 14/06/10; Món Divers, 14/06/10


Gales: protestis pe nomine di un proretôr che nol fevele galês


Sei la Societât pe lenghe galese (Cymdeithas yr Iaith Gymraeg) che l’Ufici pe lenghe galese (Bwrdd yr Iaith Gymraeg) a àn protestât pe sielte de Universitât di Bangor di nomenâ tant che proretôr il professôr John Hughes. La proteste e nas dal fat che Hughes nol fevele par galês. Pal Ufici pe lenghe galese cheste decision e va cuintri dal plan di politiche linguistiche che la universitât si veve dât. Pe Cymdeithas, di cumò indenant, chê di Bangor no podarà plui svantâsi di jessi la universitât di riferiment pal galês. A Bangor cuasi la metât de popolazion e fevele par galês, tal teritori dulintor si rive cuasi al 70% e, inte universitât, a son almancul 700 i students che a seguissin cors ta cheste lenghe. La direzion de universitât si è justificade cul fat che si trate di un professôr che al à fat cressi, ancje sul plan economic, dutis lis istituzions là che al à lavorât e che inte universitât irlandese di Maynooth al à sburtât cun fuarce l’ûs dal gaelic. Cun di plui, a àn zontât i rapresentants dal senât academic, Hughes al à za cjapât l’impegn di imparâ il galês.

Font: BBC, 11/06/10; Ufici pe Lenghe Galese, 10/06/10


Kurdistan: il PKK al met fin ae tregue unilaterâl


Il Partît dai Lavoradôrs dal Kurdistan (PKK) al à decidût di meti fin al fermait il fûc unilaterâl che al veve inviât plui di un an indaûr. I rapresentants de vuerilie curde a spieghin che cheste decision e diven de mancjance totâl di disponibilitât de bande dal guvier turc par rivâ a di une soluzion dialogade dal conflit. In plui di refudâ ogni propueste di dialic – a zontin i rapresentants dal PKK – il guvier turc al à profitât dal fermait il fûc par meti in at une repression violente che e à puartât a meti fûr leç il partît principâl de comunitât curde (DTP), a arestâ uns 1500 rapresentants politics e aministradôrs curdis, a arestâ e a sassinâ diviers gjornaliscj curdis, a meti in at passe 250 azions militârs in Kurdistan, e a perseguitâ ancje i minôrs che a partecipin aes manifestazions di place. La prime azion armade de vuerilie curde, che e à causât la muart di sîs soldâts, si è davuelte ai 31 di Mai daspò che l’esercit turc al veve copât 24 personis bombardant un incjampament curdi intes monts dal Irak.

Font: Nationalia, 10/06/10


Stât spagnûl: la regjon Castilie e León no difint l’asturian


Cuatri associazions ativis inte provincie spagnole di León e Zamora a àn mandât une segnalazion ae segretarie dal Consei de Europe che e viôt de Cjarte europeane pes lenghis regjonâls o minoritariis par denunciâ la mancjance di intervents de bande de aministrazion regjonâl di Castilie e León par tutelâ e par promovi la lenghe asturiane. Cun di fat, in plui di jessi fevelât inte regjon des Asturiis, l’asturian al è doprât ancje in ciertis zonis dal León (là che si lu clame leonês) e tal teritori portughês di Miranda do Douro (là che al è clamât mirandês), ma – a disin lis cuatri associazions – dome inte comunitât di Castilie e León e mancje cualsisei politiche ative di difese e di promozion di cheste lenghe.

Font: Aruelu, 09/06/10


Paîs Catalans: sì dal Parlament ae iniziative popolâr pal referendum su la indipendence


Il Parlament catalan al à dât il so parê positîf ae iniziative popolâr par davuelzi un referendum uficiâl su la indipendence in gracie dal vôt dai partîts nazionaliscj catalans (CiU, ERC e ICV-EUiA). Chest passaç al permet cumò ai promotôrs di inviâ une racuelte di firmis par che il Parlament si dedi dongje par votâ pe convocazion di un referendum su la indipendence de Catalogne. Par rivâ a di un tant si varan sîs mês di timp par tirâ sù 220 mil firmis. I socialiscj e i popolârs a àn fat savê che a domandaran un pronunciament al Consei pes garanziis statutariis. Chest ricors, duncje, al podarès ritardâ la partence de iniziative. Par ERC si à cjapât la strade che e puartarà drete al davuelziment dal referendum, ma CiU e ricuarde che cence de autorizazion statâl dut al riscje di lâ sù pai stecs.

Font: VilaWeb, 09/06/10


Galizie: galizian ancje pe siencie, universitâts in cjamp


La associazion dai insegnants di siencis de Galizie (Enciga), che e met adun passe 650 professôrs, e à dât fûr un document là che si critiche cun fuarce il decret sul ûs des lenghis inte scuele fat bon dal guvier galizian vuidât di Alberto Núñez Feijoo (PP). Cun di fat, il test al impon il castilian tant che lenghe prioritarie o fintremai uniche intes aulis di siencis. Intant trê universitâts de Galizie – chês di Vigo, A Coruña e Sant Jacum (Santiago) – a àn inviât une campagne che e cîr di sdrumâ i prejudizis leâts al ûs dal galizian pes siencis. La iniziative, batiade “ancje par galizian si fâs sience”, si poie suntun sît internet là che si puedin cjatâ ancje videos là che professôrs e ricercjadôrs a contin la lôr esperience intal ûs cuotidian dal galizian in materiis sientifichis (engalegotamensefaiciencia).

Font: Vieiros Galiza Hoxe, 09/06/10 e 31/05/10


Albanie: si domande di ricognossi i arumens tant che minorance nazionâl


Intant de sô visite uficiâl in Albanie, il president rumen Traian Basescu al à domandât al guvier di Tirane di ricognossi i arumens tant che minorance nazionâl. Nol è tant che la Albanie e à ricognossût chest status a grêcs, macedons e montenegrins, intant che i arumens a vegnin calcolâts dome di minorance linguistiche. Daûr dal ultin censiment, che al rimonte ancjemò al 1989, cheste comunitât no rapresente nancje l’un par cent de popolazion albanese.

Font: BalkanInsight, 08/06/10


Serbie: elets i conseis des minorancis


Ai 6 di Jugn si son davueltis in Serbie lis elezions pai Conseis nazionâi che a àn il compit di svilupâ lis politichis linguistichis e culturâls des lôr comunitâts di riferiment in setôrs impuartants tant che educazion e mieçs di comunicazion. Il vôt al à interessât 16 des 19 comunitâts nazionâls ricognossudis dal stât serp, dal moment che chês altris trê – cravuats, macedons e slovens – a doprin sistemis eletîfs diferents. Lis elezions a son stadis controladis di osservatôrs internazionâi che lis àn judicadis regolârs. Chel istès no son mancjâts i ponts critics. Cun di fat, i rapresentants de Aleance dai Ongjarês de Vojvodine – si ben che a son stâts i plui votâts – a àn acusât il principâl partît serp di vê cirût di condizionâ il vôt. Framieç de minorance albanese, invezit, a son dome doi i partîts che a àn decidût di no boicotâ il vôt: cundut achel la partecipazion tra i albanês e je stade tor dal 55%.

Font: BalkanInsight, 07-10/06/10


Circassie: domandade al guvier rus une republiche autonome


Za di cualchi mês la Caracie – Circassie, une des republichis caucasichis de Federazion Russe, e je scjassade di tensions etnichis jenfri caracis e circàs, che a son sù par jù l’11% de popolazion di chel teritori. Dal principi dal an a son za stâts sassinâts doi rapresentants di prin plan de comunitât circasse che e lamente ancje une esclusion dai organisims rapresentatîfs e une margjinalizazion simpri plui gruesse sul front economic e culturâl. Par chest i rapresentants de comunitât circasse a àn domandât al guvier di Mosche la creazion di une republiche autonome dentri de Federazion Russe. Pal guvier rus, dut câs, cheste ipotesi e sarès une vore dificile di meti in at. A chest pont i circàs a àn domandât che si proviodi almancul a sostituî l’atuâl president, il caraci Ebzeiev, cuntun membri de comunitât russe.

Font: Nationalia, 07/06/10


08/06/10

Paîs Basc: par Esait si vûl “spagnolizâ” il sport basc


Pe organizazion Esait, che si bat pal plen ricognossiment des selezions sportivis baschis, i socialiscj e i popolârs a vuelin spagnolizâ ancje il sport intal Paîs Basc. Daûr di cheste cjolte di posizion a son diviersis azions metudis in vore dal guvier basc che cumò al è intes mans dal partît socialist e, par stâ in pîts, al à bisugne dal jutori dai popolârs. L’ultin episodi si riferìs ae decision di fâ meti sù su ducj i mieçs uficiâi de scuadre di ciclisim basc Euskaltel Euskadi la scrite “Spagne”. La denuncie di Esait e à cjatât daurman la poie di ducj i partîts nazionaliscj bascs (PNV, Eusko Alkartasuna, Aralar, çampe indipendentiste basche).

Font: Gara, 04/06/10


Corsiche: pai insegnants il cors nol pues jessi opzionâl


Tune conference stampe che si è davuelte ai 2 di Jugn, i rapresentants de associazion dai professôrs di secont grât impegnâts intal insegnament de lenghe corse a àn domandât une revision dal sisteme di insegnament de lenghe proprie de isule. Se il cors al restarà une materie opzionâl di davuelzi fûr dal orari di lezion normâl al riscje di lâ al mancul, a disin i insegnants che a proponin di integrâ l’insegnament de lenghe e de culture corse intal orari curicolâr. La propueste di revision dal sisteme di insegnament de lenghe, in vore di cuasi 20 agns, e sarà presentade ai 23 di Jugn aes autoritâts scolastichis de isule e ai rapresentants de Assemblee de Corsiche.

Font: Radio Alta Frequenza, 03/06/10


Irlande: intal Nord confermât il bant dal gaelic de justizie


Il tribunâl di apel di Béal Feirste / Belfast al à boçât il ricors presentât di un citadin di marilenghe irlandese che si veve viodût a refudâ la domande par une licence pe vendite temporanie di alcolics parcè che e jere stade scrite par gaelic. La autorizazion e jere stade refudade su la fonde di une leç dal 1737 che e previôt che ducj i procediments che a àn a ce fâ cu la legjislazion a vedin di jessi fats par inglês. Intal ricors si ricuardave che il proviodiment che al bandìs l’ûs de lenghe gaeliche al va cuintri de convenzion europeane sui dirits umans e che l’ûs des lenghis propriis ancje ta chest setôr al è za in vore in Scozie e in Gales, ma chestis motivazions no son stadis fatis buinis dal tribunâl di apel. Pai judiçs, di fat, l’ûs di une lenghe che no je cognossude de maiorance dai citadins al larès cuintri dai “interès de justizie”.

Font: BBC, 02/06/10


Sardegne: tes aministrativis e cres la presince indipendentiste


Ai 30 e ai 31 di Mai in Sardegne si à votât par rignuvî lis vot aministrazions provinciâls e chês di diviers comuns de isule. In trê des provinciis sardis la vitorie e je lade ai candidâts dal centri çampe, in dôs a chei dal centri diestre. Par cognossi i vincidôrs di chês altris trê provinciis si varà invezit di spietâ il secont turni eletorâl. Par chel che al rivuarde il front autonomist, il PSd’AZ si à presentât cu la aleance di centri diestre cun risultâts che a van dal 4,36% de provincie dal Surcis – Iglesiente / Carbonia – Iglesias al 12,83% di chê di Nùgoro / Nuoro, là che al è il prin partît de coalizion. In spiete dal secont turni eletorâl, il partît sardist al à za siet conseîrs elets. I Rossomori, invezit, a àn sielzût di poiâ i candidâts dal centri çampe o de çampe cun risultâts che a van dal 0,40% di Aristanis / Oristano al 7,07% dal Campidanu / Medio Campidano e cun almancul doi conseîrs elets. In cuatri des vot provinciis sardis a corevin ancje candidâts de autoproclamade republiche di Malu Entu (une isulute pôc fûr de Sardegne) che in nissun câs a àn rivât a passâ l’un par cent dai vôts. A rapresentâ l’indipendentisim sart, invezit, al jere il moviment iRS (indipendentzia Repubrica de Sardigna) che intes provinciâls al à cjapât passe 32 mil vôts e al à cuasi triplicât lis percentuâls otignudis dai siei candidâts, passadis di une medie dal 1,48% intal 2005 al 3,86% di chest an. A cressi a son stâts ancje i elets intai conseis provinciâls che a son passâts di un a trê. Il moviment al è ben inlidrisât massime intes provinciis di Tàtari / Sassari (6,49% pal candidât president e 5,83% pe liste) e di Aristanis / Oristano (5,85% pal candidât president e 5,79% pe liste). Di segnalâ ancje la elezion dal prin sindic di iRS su la isule, si trate di Mario Satta intal comun di Pèifugas / Perfugas.

Font: L’Unione Sarda, 01/06/10; La Repubblica, 01/06/10; iRS, 02/06/10


Irlande: sisteme gnûf di finanziament pai progjets pal gaelic


Ta chestis zornadis, Foras na Gaeilge, l’organisim di riferiment pal gaelic irlandês, al à presentât il gnûf sisteme di finanziament dai progjets pal svilup di cheste lenghe. Al jere zaromai di cualchi mês che si veve tacât a lavorâi parsore cu la poie dal Consei Ministeriâl Nord Sud, che al fâs di coordenament tra la Republiche de Irlande e lis istituzions dal Nord de isule, e cu la colaborazion des organizazions ativis ta chest setôr. I progjets a fasaran riferiment a siet cjamps di intervent diferents, ven a dî: radios locâls; art; educazion; jutori pes fameis; setôr public; zovins; promozion e ricercje. Par ogni setôr a saran prontâts dai schemis di intervent cu lis prioritâts e cui fonts disponibii par chescj fins. Ogni an si proviodarà a di une revision dai schemis ancje su la fonde dai risultâts otignûts.

Font: Gaelport, 01/06/10


Paîs Catalans: ancje Sabadell al à votât su la indipendence


Ai 30 di Mai si à vût un gnûf apontament cu lis votazions popolârs su la indipendence de Catalogne. La consulte popolâr e à interessât la citât di Sabadell, la plui grande tra chês tocjadis fin cumò dal vôt. Suntune popolazion cun dirit di vôt di sù par jù 173 mil personis, a son stâts 23.870 chei che si son presentâts aes urnis metudis sù dai volontaris che a puartin indenant la campagne referendarie. Tra chei che a son lâts a votâ il 92,4% al à dite di sì ae indipendence de Catalogne. Cun cheste votazion si à passât il mieç milion di catalans che a àn partecipât al vôt su la indipendence.

Font: Avui, 31/05/10


Galizie: ricors cuintri dal decret sul “plurilinguisim” te scuele


Il principâl sindacât dai insegnants galizians, CIG-Ensino, al à confermât il ricors al tribunâl superiôr di justizie de Galizie cuintri dal decret sul ûs des lenghis inte scuele fat bon dal guvier galizian vuidât di Alberto Núñez Feijoo (PP). Il cussì clamât “decret sul plurilinguisim”, che al jentrarà in vore cul prossim an scolastic, al ven acusât dal sindacât, ma ancje des organizazions impegnadis pal galizian e dai partîts politics de oposizion, di jessi un atac cuintri de lenghe galiziane. Pai rapresentants sindacâi, il test al rapresente “il piês pas indaûr pe lenghe galiziane” e un “atentât” che al pant il dispresi che cheste aministrazion e mostre no dome pe lenghe, ma ancje pai insegnants.

Font: Vieiros Galiza Hoxe, 25/05/10


Gales: si slargje la domande di modificâ la leç sul galês


E va indenant la mobilitazion de Cymdeithas yr Iaith Gymraeg par modificâ il test de gnove leç su la lenghe galese. Pe associazion, che di agns e je in prime linie inte bataie pai dirits linguistics dai galês, la misure e je masse debule, no garantìs ae lenghe un status uficiâl e no da rispueste al avignî de television par galês S4C. Dut câs, la Cymdeithas no je la uniche a domandâ di tornâ a meti man al test: di resint un grup di avocats al à inviât une letare vierte là che al marche che il test fat indenant dal guvier galês, che al met adun laburiscj e nazionaliscj dal Plaid Cymru, al riscje di no vê un impat positîf su la politiche linguistiche e nol manten dutis lis promessis fatis in campagne eletorâl. A proponi dai cambiaments al test, dut câs, a son ancje dai membris de Assemblee nazionâl galese tant che Jonathan Edwards dal Plaid Cymru che al domande ai siei coleghis un sfuarç par miorâ il test almancul su trê ponts, o sei il status uficiâl dal galês, la indipendence dal comissari pe lenghe e l’aument dai dirits linguistics individuâi.

Font: Cymdeithas, 24/05/10


Ocitanie: seconde edizion dal Premi Ostana pes scrituris in lenghe mari


Ai 19 e ai 20 di Jugn si davuelzarà a Ostana, piçule comunitât de Ocitanie taliane, la seconde edizion dal Premi Ostana dedicât aes scrituris in lenghe mari. La iniziative e à chê di slargjâ la cognossince dai autôrs che a scrivin intune lenghe minorizade e di sburtâ l’ûs di chestis lenghis inte leterature e intes variis formis de comunicazion. La prime edizion dal premi si veve davuelte intal 2008 e e veve premiât il scritôr galizian Alfredo Conde e chel furlan Carlo Sgorlon. Ta cheste edizion il numar di sezions al è cressût di dôs a sîs: inte sezion internazionâl si à sielzût Witi Ihimaera (maori); ta chê dedicade aes comunitâts minorizadis dal stât talian il premi al è stât assegnât al scritôr sloven Boris Pahor; pe lenghe ocitane, invezit, la sielte e je colade su Ives Roqueta; te sezion des traduzions il premi al è lât a Arturo Viano; tra i zovins si à sielzût l’autôr messican Constantino Canales che al scrîf in lenghe huave; e, in fin, il premi speciâl al è stât dât al sart Gavino Ledda.

Font: Premi Ostana, 05/10