Sápmi: comunitât dividude su la vuere in Ucraine

La Tiere dai Sami (Sápmi) e je dividude tra cuatri stâts: Norvegje, Svezie, Finlande e Federazion Russe. La agression inviade di cheste ultime ae Ucraine, in plui di alçâ la tension ancje ta cheste part de Europe, e à jevât divisions dentri de stesse comunitât sami. Subite dopo sclopât il conflit, l’ativist Andrei Danilov – che al rapresentave la popolazion sami de Federazion Russe dentri de comission culture dal Consei Sami – al à manifestât la sô contrarietât ae vuere cuntune azion fûr de ambassade russe di Oslo e al à inviât il percors par domandâ asîl politic ae Norvegje, une iniziative poiade dai rapresentants dai Sami norvegjês. Danilov al à declarât che, di là dai confins, i Sami a son un popul sôl e duncje, ancje se nol podarà tornâ a cjase, al larà dilunc a batisi pai dirits de sô int intune altre part de sô patrie. La sô posizion e je condividude ancje di diviers rapresentants di altris popolazions nativis cjapadis dentri te Federazion Russe che ta chescj agns a àn vût di bandonâ la lôr tiere par vie de repression dal guvier. Divierse invezit la posizion dal president dai Consei des minorancis nativis de provincie di Murmansk e dal rapresentant de associazion dai Sami de penisule di Kola che a àn aderît aes iniziativis par sostignî la politiche dal Cremlin. Raipon – la associazion dai popui natîfs dal Nord de Federazion Russe – e à condanât cun fuarce lis declarazions dai esiliâts declarant che no rapresentin plui i lôr popui.

Font: The Barents Observer, 04/04/22

Sápmi: comunitâts in azion cuintri dai gnûfs progjets eolics

Tai ultins agns al è cressût l’interès pes risorsis naturâls de Tiere dai Sami (Sápmi). Tra lis ultimis iniziativis si segnale il progjet di dôs compagniis energjetichis (la finlandese ST1 e la Grenselandet AS) che a volaressin fâ sù dai parcs eolics inte aree sami dal stât norvegjês. Une delegazion dal Consei sami e dal Parlament sami de Norvegje si son cjatâts cui dirigjents des dôs aziendis par motivâ la oposizion de popolazion locâl al lôr progjet e par lamentâ il compuartament dai lôr rapresentants sul teritori che, in plui di tentâ di stiçâ contrascj dentri des comunitâts locâls, a àn fintremai menaçât di espropriâ lis tieris dai contraris. La presince di un rêt di implants eolics te tiere dai sami, no dome no ur puartarès nissun vantaç, ma e metarès a risi l’ambient, la culture e la economie tradizionâl de popolazion locâl, a partî dal arlevament des renis. Intant dal incuintri i delegâts sami a àn metût su la taule ancje une sentence resinte de cort supreme de Norvegje che e anule lis concessions par doi parcs eolics inte Tiere dai Sami propite par vie che a violin i dirits ricognossûts ai popui natîfs des convenzions internazionâls.

Font: The Barents Observer, 01/12/21

Sápmi: lenghe, gjenar e gákti al centri dal Pride di chest an

Dai 5 ai 8 di Avost si à davuelt a Ohcejohka / Utsjoki, dongje dal confin jenfri Norvegje e Finlande, il Sápmi Pride. Nassude tal 2014, la manifestazion e cîr di pontâ la atenzion su lis rivendicazions e lis bataiis di cui che al patìs une dople minorizazion, o sei chê nazionâl e chê di gjenar. In plui de marcje tipiche di chest apontament, la iniziative e proponeve ancje diviers laboratoris e moments di discussion. Tra i temis discutûts chest an si à ancje cemût rindi il lessic des varietâts sami plui atent al gjenar e cemût adatâ il codiç di ûs dal gákti, o sei il costum tradizionâl dai sami, a cui che no si identifiche cu lis normis tradizionâls di division di gjenar.

Font: The Barents Observer, 11/08/21

Sápmi: impat penç sui sami dal bloc de pescje dal salmon

Il flum Deatnu / Teno / Tana al scjavace la tiere dai Sami (Sápmi) e par 256 dai siei 361 chilometris al fâs di confin jenfri Finlande e Norvegje. Si trate de aree cu la plui alte biodiversitât di salmons e par chest e je mete di cetancj pescjadôrs che a rapresentin une des risorsis principâls pe economie dal teritori. Di diviers agns incà però la popolazion di chest pes e je daûr a calâ e cussì il guvier norvegjês al à decidût di imponi un bloc totâl de pescje dal salmon di Mai a Dicembar dilunc dal flum, dai siei afluents e de aree di mâr dulintor de sô bocje, convincint ancje la Finlande a fâ compagn. Si trate di un colp dûr ae economie locâl che, par vie de crisi sanitarie, e veve za pierdût buine part de stagjon de pescje dal 2020 e dal cumierç transfrontalîr. Chel istès la popolazion locâl e à cjapât avonde ben la decision lamentantsi però pe sielte dai timps, o sei par vie che la decision e je stade cjolte cuant che lis struturis turistichis locâls a jerin za dutis prenotadis. Ce che invezit al è stât cjapât une vore mâl al è il fat che, pe prime volte, il bloc de pescje al è totâl, ven a dî che no si permet nancje aes comunitâts sami che a vivin ad ôr dal flum di pescjâ daûr dai sistemis tradizionâi. Si trate di une decision imponude dal alt cence nancje consultâ i orghins di autoguvier dal teritori e che – e no je la prime volte – no ten in nissun cont la culture e lis tradizions de popolazion indigjene che a son invezit tuteladis par leç.

Font: The Barents Observer, 09/06/21

Norvegje: non dal stât ancje tes lenghis minorizadis

Il Parlament norvegjês al à fate buine une leç che e ricognòs e i da uficialitât ai nons dal stât intes lenghis minorizadis feveladis intal paîs. Par infuartî il significât de decision la stesse propueste di leç presentade dal guvier e jere scrite par norvegjês, par sami (te sô varietât setentrionâl che e je la plui fevelade) e par kven. Cheste ultime e je une varietât finlandese fevelade tune aree setentrionâl de Norvegje de comunitât kven e che e je stade ricognossude come lenghe minoritarie tal 2005. Cui che al rivarà de Svezie, de Finlande o de Federazion Russe tune des areis de Norvegje là che a vivin comunitâts minorizadis si cjatarà i cartei cul non dal stât in dutis lis lenghis ricognossudis (a seconde de aree duncje, dongje di Norge, si podarà lei Vuoda, Nöörje, Norga o Norja): un at simbolic che però al vûl dâi uficialitât e dignitât compagne a chestis lenghis.

Font: The Barents Observer, 06/05/21

 

Sapmi: seconde edizion pe setemane de lenghe sami

Ai 25 di Otubar si à sierade la seconde edizion de setemane de lenghe sami. La iniziative e à tocjât cuasi dut il Sapmi, o sei lis tieris sami di Finlande, Norvegje e Svezie. La prime edizion si veve tignude tal 2019 inte suaze dal an internazionâl des lenghis nativis. La setemane e je une iniziative disvilupade in maniere coletive che si propon di stiçâ istituzions publichis e privadis, ativitâts economichis, organizazions e altris realtâts sociâls a doprâ la lenghe sami (o miôr, lis diviersis lenghis sami) e a studiâ azions par rindi la lenghe plui fuarte e visibile te vite di ogni dì. Viodude la situazion particolâr di chest an, la plui part des ativitâts programadis si à davuelte su la Rêt.

Font: The Barents Observer, 21/10/20

Sápmi: la Walt Disney e prodûs Frozen 2 ancje par sami

Il sequel de megaproduzion disneyane Frozen, che al jessarà tes salis cinematografichis tal Unvier dal 2019, al sarà disponibil bielzà dal principi ancje in lenghe sami (o miôr te sô varietât cognossude come sami setentrionâl). La gnove e je stade comunicade cuntune note unitarie dade fûr dai studis di animazion de Walt Disney, dai Parlaments Sami di Norvegje, Svezie e Finlande, e dal Consei Sami. Par svilupâ la seconde jessude di Frozen i autôrs si son ispirâts a elements cjapâts sù intant di un viaç di studi che al à tocjât Islande, Norvegje e Finlande. In particolâr, no son pôcs i elements leâts ae culture e al ambient dai sami che a son stâts racuelts in gracie de colaborazion cuntun grup di lavôr espression di cheste comunitât. Di chi la decision di produsi daurman une version dal film ancje par sami che e sarà distribuide tes salis cinematografichis in Dicembar, in contemporanie cu lis versions par norvegjês, svedês e finlandês.

Font: The Barents Observer, 24/07/19

Finlande/Norvegje: Consei Sami critic cu la ferovie artiche

Il Consei Sami – organizazion no governative che e promôf i dirits e i interès des comunitâts sami – al è intervignût sul progjet di une ferovie artiche che e scjavaci lis regjons plui setentrionâls de Finlande e de Norvegje par peâ il rest de rêt feroviarie cul Mâr di Barents, plui o mancul tra Rovaniemi e Kirkenes. Pal Consei Sami, di là de sielte di percors che si fasarà, cheste linie e taiarà areis di passon e trois migratoris fondamentâi pes renis dant un colp une vore dûr ae economie tradizionâl e ae culture des popolazions locâls. Cun di plui, cul lassâ fûr lis comunitâts sami dal procès di svilup dal progjet, si za à violât i dirits di fonde de popolazion native di chestis tieris. La presidente dal Consei, Åsa Larsson Blind, e crôt ancje che daûr de ferovie a rivaran altris realtâts industriâls che a laran a incressi i problemis pal ambient, pes ativitâts e pe culture sami. Come prin pas, il Consei al domande ai guviers finlandês e norvegjês di inviâ daurman une consultazion di dutis lis realtâts rapresentativis des comunitâts nativis e di coinvolzilis in ducj i passaçs decisionâi leâts al progjet.

Font: The Barents Observer, 24/09/18

Sápmi: a risi l’orghin sorestatâl di politiche linguistiche

Il Sámi Giellagáldu – l’ent fondât intal 2013 par coordenâ i servizis e lis politichis linguistichis pes diviersis varietâts sami feveladis in Finlande, Norvegje e Svezie – al riscje di meti fin aes sôs ativitâts chest an che al ven par vie dal sotfinanziament. Cun di fat il ministeri des financis finlandês al à fat savê che tal 2019 al finanziarà l’ent cun mancul di 200 mil euros cundut che, dome par cuvierzi lis ativitâts davueltis in Finlande, si stime che a coventin almancul 370 mil euros. L’organisim al colabore ancje cul Parlament Sami de Finlande par difindi e par promovi la culture sami tai progjets di cooperazion internazionâl. Chel dal sotfinanziament al è un probleme che al tocje diviersis realtâts espression des comunitâts sami, comprendûts i Parlaments Sami de Norvegje e de Svezie.

Font: YLE, 21/08/18

Norvegje: scuintri istituzionâl tra guvier centrâl e Finnmark

A deventin inmò plui tiradis lis relazions tra la regjon plui setentrionâl de Norvegje e il guvier centrâl di Oslo, dopo che la presidente dal Consei regjonâl dal Finnmark, Ragnhild Vassvik, e à refudât di incuintrâsi cu la ministre pai afârs regjonâi, Monica Mæland. Al centri dal contindi e je la decision dal esecutîf norvegjês di procedi cu la fusion dal Finnmark cu la regjon dal Troms. Il Parlament de Norvegje al à za votât a pro de misure, ma il Consei dal Finnmark al refude di acetâ la decision e al à inmaneât un referendum popolâr là che la plui part de popolazion si à mostrade cuintri de decision dal guvier centrâl. Il Finnmark al è part de Tiere dai Sami (Sápmi), al confine cu la Federazion Russe e cu la Finlande e al à duncje une lungje tradizion di rapuarts internazionâi. Cheste regjon i da acet al Parlament Sami de Norvegje e la plui part des monts e dai boscs di cheste regjon a son gjestîts in maniere unitarie propite dal Consei dal Finnmark e dal Parlament Sami. In plui di sami e di norvegjês, intal so teritori e vîf ancje une impuartante comunitât finlandese (Kven) ricognossude come minorance. Par dutis chestis resons – e à spiegât Ragnhild Vassvik – no si intint di fâ nissun pas indaûr su la autonomie dal Finnmark.

Font: The Barents Observer, 19/08/18

Sápmi: prin confront sul disfrutament dal Násafjäll

Ai 19 di Lui il ministeri norvegjês pes ativitâts produtivis al à invidât rapresentants dai Parlaments Sami de Norvegje e de Svezie, dai ents locâi e di altris realtâts interessadis par un sorelûc e un prin confront sul progjet di disfrutament minerari che al interesse il Násafjäll, un teritori a cjaval tra Norvegje e Svezie che, in plui di jessi doprât di secui come passon pes renis, si cjate ad ôr di un parc nazionâl e di une aree di tutele dal paisaç. La compagnie Elkem AS e à intenzion di vierzi une miniere di cuarç che e pense di sgjavâ par 6/8 mês ad an par almancul 30 agns a dilunc. Cuatri secui indaûr, simpri ta cheste aree, si veve vût une miniere di arint che il so disfrutament al veve puartât fintremai a sclavizâ la popolazion locâl e si veve lassât daûr un incuinament che si viôt inmò in dì di vuê. Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn cussì proclamât l’autoguvier dal Násafjäll e decidût une moratorie che e impedissi cualsisei ativitât minerarie. La maiorance dai delegâts che a àn partecipât al sorelûc, in plui di lamentâ i ritarts par no dî la mancjance di informazions sul progjet, e à mostrât di vê pôre dai efiets negatîfs che la miniere e varès sui Sami, sul ambient e su la economie tradizionâl dal teritori, in primis l’arlevament des renis che al da di vivi a passe dusinte personis. I rapresentants de Elkem AS a àn fat savê che a son disponibii a di un acuardi cu lis comunitâts locâls ma che, se nol ves di rivâ, a fasaran valê la lôr concession e a laran indenant distès cul progjet. I Sami a àn rispuindût che fintremai che i progjets di disfrutament minerari no saran blocâts la aree e restarà ad in plen sot dal lôr control.

Font: The Barents Observer, 19/07/18

Sápmi: moratorie cuintri des minieris tal Násafjäll

Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn proclamât l’autoguvier inte aree dal Násafjäll, a cjaval tra Norvegje e Svezie, e a àn decidût une moratorie par cualsisei ativitât minerarie ta chest teritori. La decision e je stade cjapade dopo che si à savût che lis autoritâts norvegjesis a vevin autorizât la compagnie Elkem AS a espropriâ part de aree par inviâ ativitâts estrativis. Il disfrutament minerari nol va dome a pidimentâ la economie tradizionâl sami e, massime, l’arlevament des renis, ma al puarte ae memorie la ete tragjiche des minieris inviadis tai secui stâts intes tieris dai sami che a vevin puartât fintremai a sclavizâ la popolazion locâl e che si son lassadis daûr inmò in dì di vuê l’incuinament di une part dal teritori. Su la fonde dai dirits ricognossûts ai popui natîfs des leçs internazionâls, i sami dal Násafjäll a àn duncje decidût di no ricognossi il valôr des normativis e dai proviodiments de Norvegje e de Svezie fintremai che i progjets di disfrutament minerari no saran blocâts.

Font: The Barents Observer, 03/07/18

Sápmi: lançât il Font pal Cine dai Popui Artics (AIFF)

Inte suaze de conference sul cine dai popui natîfs che si à tignude te prime metât di Març a Kautokeino, te tiere dai Sami (Sápmi), al à stât inviât il Font pal Cine dai Popui Artics (AIFF) che si propon di sostignî lis produzions e coproduzions cinematografichis e televisivis di cualitât che a cjapin dentri i popui natîfs des regjons artichis di Canadà, Federazion Russe, Finlande, Norvegje e Svezie, dal Alaska e de Groenlande. L’intindiment al è ancje di infuartî la colaborazion tra lis realtâts che a operin za ta chest setôr e di creâ gnovis oportunitâts di lavôr pai zovins des comunitâts nativis intal setôr dal cine, dal digjitâl e dai mieçs di comunicazion. A metilu sù a son stâts l’Istitût cinematografic sami internazionâl, il Font pai media dal Canadà, la Societât di svilup cinematografic dal Nunavut, la Associazion dai autôrs di cine de Groenlande e la organizazion russe Archy, intant che i prins finanziaments a rivin dal guvier norvegjês.

Font: The Independent Barents Observer, 14/03/18

Norvegje: Aili Keskitalo presidente dal Parlament sami

Aili Keskitalo e je stade confermade ae presidence dal Parlament Sami de Norvegje dopo che il so partît (NSR – Union dai Sami de Norvegje) al à otignût il 27% dai vôts e 16 deputâts intes elezions che si son tignudis ai 11 di Setembar. Al secont puest, cuntun distac di cuasi dîs ponts, al è rivât il partît laburist che al à vût 9 parlamentârs elets. Chei altris 14 puescj a disposizion inte assemblee a son lâts dividûts tra dîs partîts che, te plui part dai câs, a àn vût di contentâsi di un elet. Il Parlament Sami de Norvegje al è nassût intal 1989 e a votâlu a son i 17 mil citadins norvegjês iscrits al regjistri dai Sami, là che a puedin notâsi chei che, in plui di sintî la partignince a di chest grup nazionâl, a rivin di une famee là che si fevele par sami. Cun cheste elezion Aili Keskitalo e je rivade al so tierç mandât. Par cheste legjislature lis sôs prioritâts a son lis politichis pe lenghe e la colaborazion tra lis diviersis comunitâts sami par di là dai confins di stât.

Font: The Independent Barents Observer, 12/09/17

Sápmi: ancje azions diretis pe autogjestion dal Deatnu

Dopo dal acuardi tra Finlande e Norvegje pal disfrutament de pescje dilunc dal flum Deatnu / Teno / Tana che al scjavace la tiere dai Sami (Sápmi), i rapresentants des comunitâts locâls e i ambientaliscj si son dâts adun par decidi cemût pidimentâ la sô metude in vore. Prin di dut al è stât metût jù un document là che si declare che il flum al parten aes comunitâts sami che a àn il dirit e il dovê di viodi di lui e di gjestîlu in maniere autonome cence dal intervent e dal control dai stâts. Si trate di une declarazion di autodeterminazion des comunitâts che a vivin dilunc dal flum che cumò e sarà fate cognossi ator par cirî la poie di altris comunitâts, realtâts associativis e citadins. I ativiscj a àn decidût di inviâ ancje une azion direte cu la ocupazion de isule di Čearretsuolu tant che base par impedî il disfrutament dal flum.

Font: The Independent Barents Observer, 12/07/17

Norvegje: comission pe veretât e pe riconciliazion cui Sami

Il Parlament norvegjês al à fate buine une leç che e invie il percors par meti sù une comission pe veretât e pe riconciliazion cun chê di fâ cognossi lis violencis, i abûs e lis discriminazions metudis in at cuintri des comunitâts sami e dai cussì clamâts Kvens, o sei i dissendents dai finlandês imigrâts intal secul XIX. Se il teme al è stât al centri di diviersis ricercjis storichis, lis istituzions norvegjesis a àn fat pôc o nuie fin cumò par riparâ ai efiets di chestis politichis repressivis che, massime tra i sami, a àn lassât daûr une ereditât di vergogne, di dinei de proprie lenghe e identitât, e di tabûs. La decision dal Parlament norvegjês e rive juste pocjis setemanis dopo che la stesse strade e jere stade cjapade des autoritâts finlandesis. La leç e je stade poiade di dutis lis fuarcis politichis fale chês de diestre nazionaliste, o sei il Partît dal Progrès (Fremskrittspartiet) e chel Conservadôr (Høyre).

Font: The Barents Observer, 22/06/17

Sápmi: indenant cu la lote su la pescje tal Deatnu

Dopo di chel finlandês ancje il Parlament norvegjês al à fat bon l’acuardi pal disfrutament de pescje dilunc dal flum Deatnu / Teno / Tana che al scjavace la tiere dai Sami (Sápmi) a cjaval tra i doi stâts. Il progjet al à cjatât la oposizion dure des comunitâts nativis rapresentadis sul plan istituzionâl dai Parlaments sami di Norvegje e Finlande dal moment che al larès a violâ i dirits umans e chei storics di cheste comunitât. Lis dôs istituzions si son dadis adun cumò par domandâ la poie di altris popui natîfs e di organizazions internazionâls. Diviers esperts si son za fats indenant par ufrî lis lôr competencis legâls ai singui e aes associazions di pescjadôrs che a puedin svantâ dirits su la pescje tal flum. I rapresentants dai Parlaments sami a àn fat savê che a poiaran lis causis che a vessin di jessi inviadis ta cheste suaze e che a fasaran apel pe tutele dai dirits dai sami denant de ONU e des istituzions europeanis.

Font: The Barents Observer, 06/04/17

Sápmi: solidarietât cu la lote dai Lakota

Intun at di solidarietât internazionâl, il Parlament sami de Norvegje al à rivât a convinci KLP, il secont font pensionistic dal paîs, a gjavâ ducj i invistiments che al veve fat intes compagniis impegnadis te costruzion di un oleodot di 1.900 chilometris contestât dai ativiscj des comunitâts nativis americanis. La opare e varès di fat di scjavaçâ ancje lis tieris sacris de nazion Lakota menaçant lis aghis dal Missouri e par chest i ativiscj di cheste comunitât a son impegnâts intune lote dure cuintri de sô costruzion che ju à viodûts scuintrâsi ancje cu la vuardie nazionâl. Intune logjiche di solidarietât tra popui natîfs, lis organizazions sami de Norvegje, plui voltis impegnadis in bataiis pe difese de lôr tiere dai interès des multinazionâls, a àn inviât diviers azions par poiâ la lote dai Lakota. Ancje in gracie di cheste mobilitazion, a son za diviers i grups finanziaris e i istitûts bancjaris norvegjês che a vevin invistît ta chel progjet che si son gjavadis fûr.

Font: The Guardian, 17/03/17

Sapmi: adunance a 100 agns de prime assemblee unitarie

Ai 6 di Fevrâr dal 1917 te citât di Trondheim, in Norvegje, si son dâts dongje in assemblee pe prime volte rapresentants rivâts di dutis lis tieris dal Sami (Sapmi) par inviâ adun la lote pal ricognossiment dai lôr dirits e de lôr identitât. Za di agns cheste date e je stade sielzude tant che Zornade nazionâl dai Sami. Chest an, a cent agns di chê assemblee storiche, delegâts sami rivâts di Norvegje, Svezie, Finlande e Russie a àn tornât a cjatâsi a Trondheim. Ae iniziative e à partecipât ancje la prime ministre norvegjese Erna Solberg che e à denunciât i dams causâts des politichis di snazionalizazion puartadis indenant cuintri dai Sami e e à dite che, cundut che si à fat tancj pas indenant, lis politichis di tutele e di promozion de lenghe, de culture e de economie tradizionâl dai Sami a van infuartidis. La fieste e cole juste tal moment che i Parlaments dai Sami de Norvegje, de Svezie e de Finlande a son daûr a ratificâ la gnove convenzion che e ponte a vualivâ la suaze normative e lis azions di rivendicazion dai Sami tai trê stâts.

Font: The Independent Barents Observer, 06-07/02/17

Sami: prin program di dotorât in partence in Norvegje

Intal mês di Març dal 2016 al varès di partî il prin program di dotorât in lenghe e leterature sami dal college universitari di Guovdageaidnu, in Norvegje. La diference tra cheste e chês altris universitâts e je che achì no si fevele dome di insegnâ lenghe e leterature sami, ma si dopre cheste lenghe ancje pal insegnament e pe aministrazion. Cumò, cu la partence dal dotorât, si spere di infuartî l’ûs dal sami ancje tant che lengaç sientific. Il college, che i da acet ae comunitât di students sami plui grande, al veve tacât tal 1989 cun cors di sami par insegnants, par zontâ po a man a man cors universitaris e masters.

Font: Hettema, 20/11/15