23/12/14

Paîs Catalans: leç popolâr par radio e tv valenzianis

Il Parlament dal Paîs Valenzian al à votât a maiorance assolude la amission de iniziative legjislative popolâr par une radiotelevision publiche par catalan (te sô varietât valenziane) che e je stade firmade di 90 mil citadins. Il test, che cumò al varà di jessi esaminât de assemblee legjislative, al previôt di tornâ a meti in vore chel servizi radiotelevisîf public valenzian che l’esecutîf di cheste comunitât autonome al veve sierât za fa un an. Al moment dal vôt, nissun dai membris dal guvier valenzian (che al è intes mans de diestre spagnoliste) si à fat viodi in aule.
Font: VilaWeb, 19/12/14

Galizie: campagne su Twitter pal galizian

I Comités Abertos de Galizie a àn decidût di imbastî une campagne su Twitter par marcâ la impuartance de lenghe proprie e par fâi cuintri aes politichis linguistichis puartadis indenant dal guvier galizian e di chel spagnûl (ducj i doi intes mans de diestre spagnoliste) che in chescj agns a àn dât colps une vore dûrs ae lenghe. La iniziative e je stade inmaneade subite dopo de publicazion di une ricercje dal Istitût Galizian di Statistiche che e mostre cemût che jenfri il 2001 e il 2011 la popolazion che e à il galizian tant che prime lenghe e je colade jù dal 57 al 45%. Un pôc par volte, a disin i Comités, lis politichis dal esecutîf a son daûr a butâ fûr il galizian de scuele e de aministrazion publiche. Cussì, par mostrâ la poie popolâr ae lenghe, massime tra i plui zovins, si à decidût di lançâ la campagne che vie pe gnotolade dai 17 di Dicembar e je stade segnade dal hastag #EuEnGalego. Il sucès al è stât cussì tant che i “vuits” cun chest messaç si son plaçâts al prin puest in Galizie e fintremai al tierç puest a nivel statâl.
Font: Codigo Cero, 17/12/14; Galicia Confidencial, 18/12/14

Asturiis: fûr l’asturian dal curriculum pes scuelutis

Ai 12 di Dicembar al è stât publicât sul boletin uficiâl dal Principât des Asturiis il test che al fisse il curriculum pes scuelis de infanzie, là che a cjatin acet i fruts fin a 3 agns. Si trate di un test che, e dîs la organizazion Iniciativa pol Asturianu, al mostre ancjemò une volte cemût che la aministrazion des Asturiis e cîr di butâ fûr la lenghe proprie dal sisteme educatîf. In chel che al è forsit il moment plui critic pal aprendiment des lenghis, il gnûf curriculum al calcole la culture asturiane di semplice curiositât e nol previôt nissune strategjie par meti lis fondis o par infuartî lis competencis linguistichis pal asturian. La organizazion e invide duncje il guvier asturian a ritirâ il proviodiment e a sostituîlu cuntun là che la lenghe proprie des Asturiis e vedi un tratament coret che si acuardi cu la legjislazion linguistiche de comunitât.
Font: InfoAsturies, 16/12/14

Paîs Basc: in place pai dirits linguistics in dute la Navare

Ai 14 di Dicembar, cundut che al sglavinave, centenârs di personis a àn manifestât pes stradis di Tafalla par rivendicâ il dirit di vivi e di studiâ par euskara. Cun di fat, in Navare, il teritori de Comunitât autonome al è dividût in trê areis: une là che si à un ricognossiment formâl dai dirits linguistics dai bascs, une altre là che si ufrìs dome cualchi servizi, e une tierce là che cui che al fevele par euskara nol à nissun dirit. A manifestâ, in rispueste al invît fat de organizazion Euskaraz Bizi eta Ikasi, a jerin citadins rivâts massime di chestis dôs ultimis areis, delegâts dai partîts nazionalitaris Bildu e Geroa Bai, e rapresentants di diviersis associazions. Se e je vere che alc al à tacât a movisi sul plan politic cu la propueste di modificâ la leç su la lenghe basche, i manifestants a àn domandât di meti fin ae division de Navare e di garantî i dirits linguistics a ducj i siei citadins. La iniziative e pontave massime a clamâ la atenzion sul teme dal insegnament, dal moment che te aree no bascofone no si à acès al insegnament par euskara e aree miste il dirit al è ricognossût ma cence che cui che al sielç lis scuelis baschis al puedi gjoldi dai jutoris di cui che al cjape lis scuelis par spagnûl. La iniziative e à ancje permetût di meti lis fondis par gnovis azions rivendicativis a pro dai dirits linguistics.
Font: Noticias de Navarra, 15/12/14

Bosgne: zûcs politics cu la partignince etniche

Il sisteme eletorâl in Bosgne al previôt che i puescj a sedin dividûts tra i elets daûr di cuotis etnichis che a previodin cuatri categoriis, ven a dî bosgnacs, cravuats, serps e altris. Intes ultimis elezions si à però viodût che la partignince etniche e pues deventâ un element secondari denant dal obietîf di jessi elets. Par esempli te entitât serbe de federazion (Republika Serpska) si à vût un elet che si veve presentât tant che “altri” cuant che tes elezions locâls di doi agns prime si veve declarât “bosgnac” e un altri che prime si veve presentât tant che “bosgnac” e cumò si à notât come “cravuat”. Un tant al è stât pussibil par vie che par ciertis categoriis no jerin avonde candidâts. La comission eletorâl e à però fat savê che no si pues confermâ la elezion di cui che intai ultins agns al à declarât partignincis etnichis diviersis.
Font: Balkan Insight, 15/12/14

Alsazie: la proteste cuintri de fusion e rive al Europarlament

Ai 13 di Dicembar miârs di personis a son tornadis in place a Strasburc par difindi la autonomie de Alsazie e impedî che si meti in vore la riforme des regjons a pene fate buine dal Parlament francês che e previôt la sô fusion cu la Lorene e cu la Champagne – Ardenne. Dopo des manifestazions des setemanis stadis, i coletîfs alsazians unîts a àn puartât la lôr proteste denant dal Parlament european là che une lôr delegazion e je stade ricevude de eurodeputade alsaziane Anne Sander (UMP) e i à consegnât lis 15 mil firmis tiradis sù in pocjis zornadis par domandâ che i citadins a puedin dî la lôr su la fusion par mieç di un referendum popolâr. I organizadôrs de mobilitazion a son cumò daûr a studiâ ancje la pussibilitât di un ricors denant des istituzions europeanis par che la riforme regjonâl e vegni anulade. In place si à viodût ancje une presince significative di militants dal partît autonomist Unser Land e di cualchi militant breton. Ta chê stesse zornade, propit in Bretagne, si àn vûts dai presidis denant des sezions dal Partît Socialist par protestâ cuintri di chel che al ven judicât un “tradiment” de bande dai deputâts bretons di chest partît che no àn votât a pro de riunificazion dal dipartiment de Loire Atlantiche cul rest de Bretagne storiche.
Font: Le Monde, 13/12/14

Paîs Basc: l’euskara al fâs comunitât ancje tai videozûcs

Un grup di apassionâts bascs di videozûcs al à metût sù une comunitât virtuâl dulà condividi cheste lôr passion comunicant, confrontantsi e zuiant dome par euskara. Game Erauntsia, cussì e je stade batiade la gnove comunitât, nol è però dome un spazi su la rêt dulà che si à il basc tant che lenghe uficiâl, ma ancje un sît che al permet di inmaneâ iniziativis che a cubiin la passion pai videozûcs cul euskara. A son cussì za stadis inmaneadis lis primis competizions tra plui zuiadôrs in rêt cun titui innomenâts e si à imbastît une campagne di autofinanziament par creâ la version in lenghe basche di un altri videozûc tra i plui impuartants.
Font: VascoPress, 13/12/14

Corsiche: prins pas par une riforme teritoriâl

Ta chestis zornadis si inviin intal Parlament francês i prins pas par rivâ a di une gnove organizazion des aministrazions locâls che si volarès fâ buine dentri dal Avrîl di chest an che al ven. La cuistion e à metût in moviment ancje lis istituzions corsis che a son daûr a viodi cemût jentrâ ta chest percors di riforme. La cuistion e je une vore ingredeade, ma par cumò la maiorance dai rapresentants de Assemblee corse e à cjatât almancul un pont di acuardi, ven a dî la fusion intun unic organisim de Coletivitât Teritoriâl Corse e dai doi dipartiments che e je dividude la isule. Une gnove istituzion che e varès di permeti di superâ i cjampanilisims locâi a vantaç dal interès comun. In mert al avignî dai comuns, la aree nazionaliste, plui che su lis fusions, e ponte su associazions di ents locâi (Cunsiglii di pieve) che a svilupin politichis comunis su cierts temis. Cuant che il progjet al varà cjatât cuarp, la Assemblee lu inviarà al prin ministri francês par che lu proponi tant che emendament al test de riforme teritoriâl statâl.
Font: Corse Matin, 12-17/12/14

Sami: une tastiere sole par scrivi lis varietâts sami

La lenghe sami e à diviersis varietâts, ancje avonde diviersis tra di lôr e par scrivilis a coventin diviers caratars speciâi che par solit no si cjatin su lis tastieris. Ai 12 di Dicembar e je stade presentade in maniere uficiâl une gnove aplicazion par smartphone (sistemis Android e iOS) che e met a disposizion une tastiere uniche par scrivi lis trê varietâts sami plui dopradis in Norvegje e in Svezie (setentrionâl, meridionâl e Lule), ma che si pues doprâ par altris trê varietâts feveladis ancje in Finlande e in Russie (Pite, Inari e Skolt). Il lavôr al è stât svilupât de universitât di Tromsø adun cul centri Giellatekno pe tecnologjie in lenghe sami. Pal ministri norvegjês pes autonomiis locâls, Jan Tore Sanner, si trate di un contribût impuartant par infuartî la lenghe sami e par judâ a doprâle, massime framieç dai zovins.
Font: Barents Observer, 12/12/14

Irlande: Gmail disponibile cumò ancje par gaelic

Gmail, il servizi di pueste eletroniche di Google, al è cumò disponibil ancje par gaelic irlandês. La iniziative e je partide di un professôr de universitât di St Louis, in Missouri, che cul lavôr di vot tradutôrs e il contribût di diviers volontaris ator pal mont al à voltât par gaelic i 60 mil tra tiermins e messaçs che a coventin par garantî il servizi. Puartade insom la traduzion, un grup di lavôr di Google le à sperimentade par doi mês e cumò le à metude a disposizion di ducj i utents. Il lavôr fat però no si ferme dome a Gmail, ma al permet di inzornâ la base di dâts linguistiche dal archivi condividût di un pocjis des plui grandis compagniis dal setôr che a puedin cussì zovâsi di chest materiâl pal svilup di altris aplicazions e slargjâ la presince e la cualitât dal irlandês su internet.
Font: Irish Times, 11/12/14

Gales: plui presince de lenghe tai servizis sanitaris

Daûr di une inchieste svilupade dal comissari pe lenghe galese al ven fûr che cundut che cetantis personis a varessin miôr doprâ la lôr lenghe proprie cuant che a àn a ce fâ cun miedis di base, dentiscj o oculiscj, dome il 28% al à po la pussibilitât di fâlu. Cumò il ministri galês pe salût, Mark Drakeford, al è intervignût in maniere uficiâl sul teme e al à declarât che al cressarà il numar di operadôrs sanitaris che a fevelin par galês e che si impegnarà par che si passi di un sisteme là che al è il pazient a vê di domandâ di podê doprâ il galês a di un là che e varà di jessi la rêt sanitarie locâl a ufrîi i siei servizis inte lenghe che al à miôr. Un tant, al à dite il ministri, nol diven dome dal rispiet che si à di vê pal pazient, ma ancje de stesse cualitât des curis che si va a dâ.
Font: BBC, 10/12/14

09/12/14

Corsiche: in place i zovins indipendentiscj

Ai 3 di Dicembar mieç miâr di fantats al à manifestât pes stradis di Corti / Corte in rispueste al apel de organizazion zovanîl corse Ghjuventù Indipendentista. La iniziative e je stade inmaneade par denunciâ lis politichis metudis in at des istituzions francesis cuintri de Corsiche e lis manifestazions simpri plui marcadis di razisim anticors che a rivin di une cierte part de societât francese. La manifestazion si è davuelte pe plui part cence problemis, ma cuant che e je rivade denant dai uficis de prefeture si àn vûts scuintris violents jenfri zovins indipendentiscj e polizie.
Font: Alta Frequenza, 03/12/14

Irlande: si domande il rispiet dal gaelic tes istituzions dal Nord

I rapresentants des organizazions Pobal, che e met adun lis associazions impegnadis a pro dal gaelic irlandês, e Turas, che e promôf cheste lenghe framieç de comunitât a maiorance unioniste di Belfast Est, a àn presentât un document unitari al Parlament de Irlande dal Nord par domandâ il rispiet dal gaelic de bande des istituzions dopo che coments ofensîfs su la lenghe proprie de Irlande a àn cjatât spazi fintremai intant dai lavôrs de Assemblee. Lis dôs organizazions, che a àn vût un incuintri ancje cui deputâts dal Sinn Féin e dal Alliance Party, a àn ancje domandât al Parlament di fâ buine une leç pe difese e pe promozion de lenghe gaeliche cemût che zaromai di agns a previodaressin i acuardis di pâs pe Irlande dal Nord.
Font: BBC, 02/12/14

Serbie: primis rispuestis ai atacs cuintri dai rom

Il guvier serp al à fat savê che la polizie e je impegnade a cjatâ fûr i responsabii de organizazion Srbska Akcija che tes ultimis zornadis di Novembar e à fat cjatâ tes casselutis pes letaris di Belgrât e di altris citâts serbis volantins che a menaçavin i membris des comunitâts rom e a invidavin a linçâju. Tra i prins a rispuindi a cheste azion la comissarie pe avualiance, Nevena Petrusič, che e à inviât une azion legâl cuintri dai responsabii, e il president dal comitât parlamentâr pai dirits des minorancis, Meho Omerovič, che al à invidât ducj a fâi cuintri cun fuarce a cheste azion di stamp fassist che e rapresente une menace par dute la societât.
Font: Balkan Insight, 01/12/14

Alsazie: in miârs in place cuintri de fusion regjonâl

Ai 30 di Novembar diviers miârs di personis a àn partecipât a Kolmar / Colmar ae manifestazion plui gruesse viodude intai ultins agns in Alsazie par difindi la autonomie regjonâl e par rivendicâ la identitât specifiche di cheste tiere. La iniziative, che e replicave chê di une setemane prime a Strasburc, e je stade però pidimentade in dutis lis manieris des autoritâts francesis che a àn ancje fevelât de pussibilitât di infiltrazions di grups violents. Il coletîf organizadôr al à cussì decidût di rinunciâ ae manifestazion che e je stade invezit confermade dal partît autonomist Unser Land. No acetìn che la nestre identitât e la nestre lenghe a vegnin scancelâts – al à dite il president vicjari dal partît alsazian Jean-Georges Trouillet – e no acetìn nancje di no podê esprimisi sul nestri avignî. Propit i atacs ae manifestazion rivâts fintremai dal ministeri dal interni a àn puartât in place tante int e ancje tancj aministradôrs che si son dâts dongje, di là des diferencis di partît, sot des Rot un’ Wis, o sei il ros e il blanc des bandieris de Alsazie.
Font: Agence Bretagne Presse, 01/12/14

Bretagne: consulte popolâr su la unitât bretone, prins sì

Si è tignude ai 30 di Novembar intal comun di Sant-Widel-Skovrid / Saint-Viaud la prime consultazion popolâr su la riunificazion de Bretagne. La partecipazion e je stade dal 20%: un dât judicât positîf dai organizadôrs viodude la novitât rapresentade de iniziative e la sô dimension dal dut volontarie. Dai citadins che a son lâts a votâ il 75% si è declarât a pro de union dal dipartiment de Loire Atlantiche cul rest de Bretagne intune regjon aministrative sole, e l’80% al à votât a pro de fusion dai conseis dai dipartiments e de regjon intune uniche Assemblee de Bretagne.
Font: Agence Bretagne Presse, 01/12/14

Scozie: a rivin lis gnovis propuestis di devoluzion

A son stâts presentâts i risultâts de comission Smith, il grup di lavôr metût sù dal guvier britanic la vilie dal referendum pe indipendence scozese cun chê di meti lis fondis par une gnove devoluzion di podês ae Scozie. Chescj indreçaments a varan cumò di jessi svilupâts in progjets normatîfs di un altri grup di lavôr.

Paîs Basc: scuintri istituzionâl su la gnove segnaletiche

Il Parlament de Navare al à votât une declarazion che e conteste la gnove segnaletiche metude fûr su lis stradis principâls de Gipuzkoa, une des trê provinciis che a formin la Comunitât Autonome Basche. La mozion, passade cul vôt dai partîts spagnoliscj e de diestre regjonaliste (UPN, PP e PSN), e je stade po ricjapade e fate sô ancje dal esecutîf de Navare. Dut al nas dal fat che i cartei metûts su lis stradis che a puartin in Navare a segnalin ancje localitâts turistichis di cheste regjon e lis compagnin cul non Euskal Herria, cemût che al è clamât il Paîs Basc inte sô lenghe proprie. Sei la diestre navare che i spagnoliscj a refudin però la partignince di cheste regjon al Paîs Basc e no acetin duncje che i cartei i fasin riferiment. A contestâ la segnaletiche al è ancje il delegât dal guvier spagnûl inte Comunitât Autonome Basche ma par vie che i nons des localitâts a son dome par basc e no bilengâi.
Font: EFE:, 27/11/14; Naiz:, 01/12/14

Paîs Catalans: lis propuestis di Mas pal percors sovranist

Il president dal guvier catalan (Generalitat) Artur Mas al à fat indenant la sô propueste pal lâ indenant dal procès di sovranitât de Catalogne dopo de consultazion popolâr su la indipendence dai 9 di Novembar. Il prin pas al sarès chel di meti adun une liste uniche formade di rapresentants di ducj i partîts sovraniscj e di rapresentants de societât civîl cuntune clare impostazion indipendentiste in maniere di trasformâ lis prossimis elezions catalanis intun secont referendum che al dedi une maiorance assolude par imbastî la indipendence catalane. In câs di risultât positîf de liste, la legjislature e varès di durâ dome un an e mieç, ven a dî il timp che al covente par fâ sù chês struturis aministrativis che a coventin a di une Catalogne indipendente e par svilupâ un percors di partecipazion popolâr che al puarti a di un stampon di Costituzion. Intal framieç si provarès a puartâ indenant lis tratativis cul guvier di Madrid, se al covente ancje cu la mediazion internazionâl. Il prin pidiment di frontâ al è però propit chel de liste uniche, un sacrifici no di pôc massime pe ERC che, daûr dai sondaçs, in chest moment si cjate a gjoldi di une grande poie popolâr, cetant di plui de formazion politiche vuidade di Mas.
Font: El Punt Avui, 26/11/14

Sami: prins pas par une union des organizazions in Russie

Intal mês di Novembar si è tignût il tierç congrès dai sami che a vivin inte Federazion Russe e, plui in particolâr, inte penisule di Kola. Ta cheste suaze si à proviodût a elei i gnûfs membris dal Sam Sobbar, o sei la Assemblee rapresentative dai sami, e si à ancje decidût di inviâ il percors par meti adun lis diviersis organizazions espression di cheste comunitât intune uniche Union dai Sami de Russie.
Font: Finugor, 26/11/14

Portugal: si domande la ratifiche de Cjarte des lenghis

Intal 1999 il Parlament portughês al à ricognossût il mirandês tant che lenghe regjonâl dal teritori di Miranda do Douro, te aree nordorientâl dal stât, là che al è fevelât di sù par jù 10 mil personis. La Associazion de Lenghe e de Culture Mirandese e domande cumò al guvier portughês che al ratifichi la Cjarte europeane des lenghis regjonâls o minoritariis. Chest pas, a disin i rapresentants de organizazion, al permetarès di infuartî il status di chest lengaç dal grup asturian – leonês, la sô presince intes scuelis, che par cumò e je dome facoltative, e la sô jentrade intai mieçs di comunicazion.
Font: Publico.pt, 22/11/14

Asturiis: si domande di normalizâ l’insegnament par asturian

La Assemblee des Asturiis e à fate buine une mozion che e impegne l’esecutîf regjonâl a tratâ cul guvier spagnûl par che al tegni cont ancje dal asturian inte riforme dal sisteme scolastic e par che al normalizi la situazion dai professôrs di cheste lenghe e le vualivi cun chê di chei altris insegnants. I unics a no votâ la mozion a son stâts i conseîrs dal PP, o sei la diestre spagnoliste.
Font: 20minutos, 21/11/14

Stât francês: cu la riforme regjonâl e sparìs la Alsazie

La Assemblee dai deputâts e à fate buine in seconde leture la riforme teritoriâl dal stât francês che e previôt di ridusi il numar des regjons di 22 a 13 a partî dal 2016. Tra i siei efiets si varà ancje la disparizion de Alsazie tant che entitât aministrative autonome e la sô fusion intune regjon uniche cun Lorene e Champagne – Ardenne. No si à duncje tignût cont de propueste fate buine in Senât di mantignî separade cheste regjon là che e vîf une impuartante comunitât di lenghe todescje e si à un sens identitari fuart. Ae fin la maiorance socialiste e à rivât duncje a fâ passâ il proviodiment cundut dal ostruzionisim puartât indenant cun fuarce massime dai deputâts alsazians. Nuie di fâ nancje pe riunificazion de Bretagne cul passaç dal dipartiment de Loire Atlantiche che al reste ancjemò cu la regjon dal Paîs de Loire. Boçade ancje la propueste di une part dai deputâts de çampe che a vevin miôr che la regjon dai Pireneus di Mieç si des dongje cu la Aquitanie e no cu la Lenghedoc – Roussillon. La riforme no à duncje tignût in nissun cont lis rivendicazions des regjons storichis e nancje des comunitâts minorizadis.
Font: Libération, 20/11/14

Irlande: gaelic natîf simpri plui menaçât

Une ricercje svilupade de agjenzie dal guvier irlandês che e viôt des scuelis gaelichis (COGG) e mostre cemût che ancje intai fruts che a àn tant che lenghe native l’irlandês lis competencis par inglês a sedin miôr di chês par gaelic. Un tant al dipent de presince invasive dal inglês in ducj i cjamps, de culture al sport, dai media aes relazions sociâls. Si riscje duncje che l’irlandês al sparissi tant che lenghe native ancje ta chês areis de isule là che al è calcolât di prime lenghe. La ricercje e invide alore lis istituzions statâls e lis scuelis a intervignî par garantî ducj i jutoris che a coventin ai fruts che a cressin in fameis di lenghe gaeliche, ma e domande ancje a gjenitôrs e insegnants di svilupâ rêts sociâls là che i fruts a puedin fevelâ il plui pussibil par irlandês.
Font: RTE, 20/11/14

Gales: si domande une agjenzie indipendente pal galês

Une gnove agjenzie indipendente pe lenghe galese cun funzions di propueste e di control su lis ativitâts che il guvier al puarte indenant ta chest cjamp. A proponile al è Gareth Jones, za deputât de Assemblee dal Gales e cumò membri dal comitât consultîf dal comissari pe lenghe galese. Cun di fat, par Jones, la manarie doprade dal esecutîf galês sui nivei pe tutele linguistiche tes societâts publichis proponûts dal comissari e je la dimostrazion plui clare di trop che al coventi un organisim in stât di difindi e di promovi il galês in maniere indipendente dal podê politic.
Font: BBC, 19/11/14

28/11/14

Paîs Catalans: la procure di stât e atache il guvier catalan

Sot de pression politiche dal guvier spagnûl e cundut dal parê contrari de procure catalane, la procure gjenerâl dal stât e à presentât une denuncie cuintri dal president dal guvier catalan (Generalitat) Artur Mas, de presidente vicjarie Joana Ortega e de assessore pe educazion Irene Rigau pes ativitâts leadis ae consultazion popolâr su la indipendence che si è tignude ai 9 di Novembar in Catalogne. Lis acusis cuintri dai trê rapresentants de Generalitat a son di disubidience grave, prevaricazion, malversazion e usurpazion di funzions. Cemût che si podeve previodi, la iniziative e à jevât la proteste di ducj i partîts sovraniscj catalans che cui lôr dirigjents e elets in Parlament, intune cun cetancj altris catalans che a àn sostignût e partecipât ae consultazion, si son autodenunciâts. La denuncie e à fat saltâ sù ancje i socialiscj catalans (PSC) che, cundut che no jerin dacuardi cul referendum, a calcolin che la azion judiziarie e vedi dome resons politichis e no juridichis e e dedi ancjemò plui fuarce al front indipendentist.
Font: El Punt Avui, 19-21/11/14; VilaWeb, 19-21/11/14; El Pais, 19-21/11/14

Bretagne: consulte su la unitât bretone, si tache di un comun

La legjislazion francese no previôt la pussibilitât di referendums di iniziative popolâr, ma no proibìs ai citadins di inmaneâ des consultazions cu la poie des aministrazions locâls che, daûr di une procedure ametude de leç, a puedin ancje meti a disposizion locâi publics e listis eletorâls par permeti chest vôt. Propit cheste e je la strade che la associazion Dibab (o sei “e decît la Bretagne”), metude in pîts ai 25 di Otubar, e à decidût di cjapâ par permeti ai citadins de Bretagne di dî la lôr su dôs cuistions, ven a dî su la union intune regjon aministrative sole dal dipartiment de Loire Atlantiche cul rest de Bretagne, e su la fusion dai conseis dai dipartiments e de regjon intune uniche Assemblee de Bretagne. La propueste e je stade fate buine dal comun di Sant-Widel-Skovrid / Saint-Viaud là che la consultazion si davuelzarà ai 30 di Novembar.
Font: Agence Bretagne Presse, 18/11/14

Paîs Basc: no spagnolist al passaç di Trebiñu cu la CAB

Il Congrès dai deputâts di Madrid al à decidût di no acetâ la propueste di leç pal passaç dai comuns di Trebiñu e Argantzun de provincie di Burgos, che e fâs part de regjon Castilie e Leon, a chê di Araba inte Comunitât Autonome Basche. La domande, poiade des dôs aministrazions locâls e fate indenant dal Parlament de Comunitât Autonome Basche, e nas par vie che i doi comuns no àn un contat diret cu la provincie di Burgos ma a son une isule aministrative cercenade di teritoris che a fasin part di chê di Araba. Chest al vûl dî che dispès i citadins di Trebiñu e Argantzun a àn di poiâsi su servizis sanitaris, scolastics o di altre nature ufierts de provincie basche e no di chê castiliane leonese. Chel istès, cul vôt dai doi principâi partîts spagnoliscj (PP e PSOE), la Cjamare spagnole si è refudade di vignî incuintri ae domande des dôs comunitâts parcè che al mancje il parê positîf dal guvier regjonâl de Castilie e Leon. Une decision, a àn comentât i sindics dai doi comuns, che ancjemò une volte no ten in nissun cont la volontât e lis dibisugnis dai citadins di chestis comunitâts.
Font: Naiz:, 18/11/14

Romanie: prin president che al parten ae minorance todescje

Cuintri des previsions de vilie, il gnûf president de Romanie al è Klaus Iohannis, segretari dal Partît Liberâl Nazionâl e sindic de citât di Hermannstadt / Sibiu. Intal secont turni des presidenziâls, che si è tignût domenie ai 16 di Novembar, Iohannis al à batût il rapresentant dal Partît Sociâl Democratic e prin ministri Victor Ponta. Intal prin turni Ponta al veve cjapât uns 40% dai vôts, cuintri dal 30% dal so aversari. A ribaltâ la situazion e je stade la partecipazion une vore alte che si à vude intal secont turni adun cul vôt dai rumens intal forest, rabiâts par vie che intal prin turni dispès no vevin podût votâ. Tra lis novitâts di chestis elezions, si à ancje il fat che Iohannis al parten ae minorance todescje che di secui e vîf in Transilvanie. Intune campagne eletorâl là che la lote cuintri de coruzion e jere un dai temis centrâi, Iohannis si à zuiât ben ancje la cjarte de sô comunitât di divignince che e gjolt di une innomine di eficience e di onestât.
Font: Balkan Insight, 17/11/14

Ongjarie: jutori par insegnâ lis lenghis ugrofinichis in Russie

Lis autoritâts ongjaresis, par mieç dal Collegium Fenno-Ugricum e dal Istitût pes politichis linguistichis, a finanziaran un program par formâ i insegnants e par svilupâ imprescj educatîfs intes lenghis de famee ugrofiniche feveladis inte federazion russe. La iniziative, in program tra 2014 e 2017, e puarte indenant il percors inviât cul progjet pe preparazion di dizionaris specialistics par dîs materiis scolastichis. Tra lis lenghis interessadis di cheste azion o cjatìn l’udmurt, il komi e il mari.
Font: Finugor, 17/11/14

Sardegne: gnove mozion pe ratifiche de Cjarte europeane

Intal consei regjonâl de Sardegne e je stade fate indenant une gnove mozion par domandâ che il stât talian al ratifichi la Cjarte europeane des lenghis regjonâls o minoritariis. A grande maiorance i conseîrs sarts a domandin al guvier regjonâl di impegnâsi par che la presidence dal consei dai ministris talian e lis comissions parlamentârs competentis a puartin insom il percors di ratifiche de Cjarte.
Font: Sa limba sarda, 14/11/14

Corsiche: pe LFP la bandiere corse e je une provocazion

Dopo dai incidents capitâts ae fin de partide jenfri OGC Nice e SC Bastia, ai 13 di Novembar la comission dissiplinâr de Leghe dal Balon Professionâl (LFP) francês e à decidût la sierade par doi turnis de tribune popolâr dal stadi dal Nize e la scualifiche par dôs zornadis dal portîr di riserve de formazion corse Jean-Louis Leca. Une decision, cheste ultime, che e calcole tant che une provocazion il fat che ae fin de partide il zuiadôr al vedi puartât in cjamp une bandiere corse. La societât di balon dal Bastia e à za presentât ricors cuintri di une sentence judicade injuste, par vie che e punìs plui cui che al è stât vitime dai incidents che no i responsabii, e raziste parcè che e judiche provocatorie l’ûs di une bandiere teritoriâl. La dirigjence de societât e à ancje denunciât i rapresentants de prefeture di Nize pes lôr declarazions discriminatoriis e ofensivis cuintri dai cors.
Font: Alta Frequenza, 14/11/14

Paîs Catalans: no sindacâl al tai dal catalan te scuele valenziane

I sindacâts dai insegnants e la organizazion Escola Valenciana a àn domandât al guvier de Comunitât Autonome Valenziane di ritirâ il decret che al va a fissâ gnovis regulis pal insegnament plurilengâl. Ducj i sindacâts di categorie, adun cun altris sogjets atîfs intal setôr de educazion, a concuardin intal judicâ il proviodiment un atac al insegnament de lenghe catalane, cuntun aument arbitrari des oris di insegnament par spagnûl che al savolte i percors pedagogjics svilupâts ta chescj agns de scuele valenziane là che, par altri, no si veve ancjemò garantît ducj i spazis previodûts pal insegnament dal e par catalan. I sindacâts a domandin al guvier valenzian di tornâ a vierzi la taule di confront cui diviers sogjets impegnâts intal setôr par cjatâ un percors di riforme che al sedi il plui pussibil condividût.
Font: La Vanguardia, 13/11/14

Scozie: progjet par miorâ i struments di insegnament dal gaelic

Ricercjadôrs des universitâts di Obar Dheathain / Aberdeen e di Glaschu / Glasgow a àn inviât un progjet par svilupâ un cuadri di riferiment comun par insegnâ e par imparâ il gaelic scozês. La iniziative si insuaze inte rêt di ricercje Soillse impegnade intal difindi e intal promovi la lenghe e la culture gaeliche. Il progjet al à chê di fissâ i diviers nivei di competence linguistiche par gaelic in acuardi cui indreçaments previodûts de autoritât scozese pe certificazion linguistiche. I nivei a permetaran di capî miôr i obietîfs di rivâ par otignî un ciert nivel di competence e lis areis là che lis capacitâts linguistichis a àn di jessi cressudis in maniere di judâ sei cui che al insegne, sei cui che al è impegnât a imparâ il gaelic.
Font: The Press and Journal, 12/11/14

Paîs Basc: 2,3% di fonts in plui pal euskara te CAB

Il guvier de Comunitât Autonome Basche al aumentarà vie pal 2015 i fonts pal euskara. La gnove e je stade comunicade de assessore pe educazion de Comunitât, Cristina Uriarte, intal presentâ i contignûts de part di sô competence de leç finanziarie par chest an che al ven. Il totâl des risorsis pe promozion de lenghe basche al tocjarà cussì i 48,2 milions di euros. A cressaran massime i fonts pai euskaltegis, o sei i istitûts che a ufrissin cors di lenghe par adults, ma ancje chei par sburtâ l’euskara intal timp libar e intes impresis. A restin confermâts po i 4,9 milions di euros pai jutoris ai mieçs di comunicazion in lenghe basche. Propit par chel che al rivuarde i media, EH Bildu, PNV e socialiscj a domandin però di riviodi i gnûfs criteris pe concession dai finanziaments par vie che a laressin a penalizâ i sogjets che a lavorin di plui e miôr pe lenghe, a tacâ di Berria, l’unic cuotidian par euskara, che chest an si à cjatât cuntun tai dai jutoris dal 14%.
Font: El Pais, 11/11/14; EiTB, 13/11/14

Scozie: il gaelic al pues zovâ ae economie par passe 100 milions

Une ricercje svilupade de Highland and Islands Enterprise, in acuardi cun altris agjenziis scozesis e cun diviersis aministrazions locâls, e à dimostrât cemût che l’ûs de lenghe gaeliche al permeti di incressi la atrativitât e il valôr ancje comerciâl di cetantis realtâts economichis, sociâls e associativis in vore no dome intes areis là che cheste lenghe e je ancjemò inlidrisade intal teritori, ma ancje in citâts tant che Dùn Èideann / Edimburc e Glaschu / Glasgow.

Gales: pe plui part de int al covente plui galês te scuele

Daûr di un sondaç publicât ai 10 di Novembar e metût adun di YouGov e Cymdeithas yr Iaith Gymraeg, il 63% dai citadins dal Gales al è dacuardi sul fat che lis scuelis a varessin di garantî a ducj i students di imparâ il galês avonde ben di permetiur di comunicâ in maniere normâl ta cheste lenghe. Vuê come vuê, invezit, la pussibilitât di saltâ fûr de scuele cuntun nivel di competence che al permeti di doprâ pardabon il galês inte vite di ogni dì e dipent di fatôrs i plui diviers tant che lis disponibilitâts economichis dai gjenitôrs o il lûc là che si è a stâ. Par chest la Cymdeithas e propon che in dutis lis scuelis dal Gales une part des materiis e vedi di jessi insegnade inte lenghe proprie. Su chest pont però la opinion publiche e je dividude: daûr dal sondaç, di fat, al ven fûr che il 42% dai intervistâts al è dacuardi a insegnâ materiis par galês ancje intes scuelis cul inglês tant che lenghe veicolâr, e il 48% al è contrari. Un risultât che la Cymdeithas e calcole distès tant che positîf, viodude la scjarse informazion che si à su cheste tematiche.
Font: Cymdeithas, 10/11/14

Paîs Catalans: dople promozion pal domini .cat

Dopo de iniziative “navighe par catalan” pensade par sensibilizâ cui che al viaze su internet a doprâ il catalan in maniere di incressi la domande di contignûts ta cheste lenghe, la fondazion PuntCat e à cumò inviât une campagne par aumentâ il numar di sogjets che a doprin il domini .cat . In buine sostance si ufrìs une dople pussibilitât, ven a dî chê di comprâ doi dominis al presit di un, o ben chê di cjoli un domini .cat par doi agns al presit di un an sôl. Si ponte cussì a superâ il pidiment rapresentât dal cost plui alt dal domini catalan rispiet a altris plui vieris – tant che i .es o i .com – che in gracie de lôr difusion a son disponibii a presits plui bas.
Font: Generalitat de Catalunya, 07/11/14

Gales: un altri milion par svilupâ i centris pe lenghe

Il prin ministri galês Carwyn Jones al à comunicât che al rivarà un altri milion di sterlinis par sburtâ i citadins a imparâ e a doprâ la lenghe galese. La clâf par incressi l’ûs de lenghe, al à dite Jones, e je chê di creâ lis ocasions par doprâle a nivel locâl. Par chest il finanziament al larà a zontâsi al milion e 250 mil sterlinis za assegnât pe dade 2014 – 2015 ai centris pe lenghe, o sei lis struturis logadis intai comuns e alì dai istitûts scolastics par favorî l’ûs sociâl dal galês.
Font: BBC, 04/09/14

11/11/14

Paîs Catalans: in 2,3 milions a votâ su la indipendence

Cundut de impugnazion de consulte volude dal guvier di Madrid, de sospensive decidude dal tribunâl costituzionâl spagnûl, des menacis des procuris e dal boicotaç dai partîts spagnoliscj, la metât dai catalans e je lade a votâ inte consultazion popolâr su la indipendence che si è tignude domenie ai 9 di Novembar. Si fevele di passe doi milions e 300 mil partecipants sui cinc milions e mieç di citadins cun dirit di vôt. Un risultât straordenari se si pense che denant de sospensive dal tribunâl costituzionâl, la votazion e à vût di jessi inmaneade cence la disponibilitât des listis eletorâls uficiâls e cul lavôr di 40 mil volontaris. Chel istès, i osservadôrs internazionâi che a àn seguît la consultazion le àn judicade regolâr.

Montenegro: denuncie cuintri dai atacs di stampe ai albanês

Doi membris dal Parlament montenegrin e i dirigjents dai partîts de minorance albanese a àn denunciât il diretôr responsabil e doi gjornaliscj dal Informer par vê publicât articui che a sticin la violence cuintri di cheste comunitât che e rapresente il 5% de popolazion dal Montenegro. Un tant al jere sucedût dopo des violencis sclopadis intant de partide di balon jenfri Serbie e Albanie dai 15 di Otubar. I responsabii dai articui a àn po domandât scuse pal lengaç doprât cuintri dai albanês, ma pai rapresentants de minorance il nivel di asse pandût al jere cussì fuart che e covente une sentence judiziarie esemplâr che e impedissi di tornâ a vê episodis di cheste fate.
Font: Balkan Insight, 7/11/14

Romanie: minorance ongjarese neutrâl tes presidenziâls

Intal secont turni des elezions presidenziâls rumenis in program ai 16 di Novembar si frontaran il prin ministri Victor Ponta (Partît Sociâl Democratic) e Klaus Iohannis, sindic de citât di Hermannstadt / Sibiu. La sfide però e cjate avonde frede la Union Democratiche Magjare in Romanie (UDMR), partît di riferiment de minorance ongjarese de Romanie, che e à lassât libertât di vôt ai siei eletôrs. La cuistion no je di pôc se si pense che i ongjarês a son il 7% de popolazion totâl. La sielte di no poiâ nissun dai doi candidâts e diven dal fat che Iohannis si à refudât di discuti lis propuestis fatis indenant de UDMR par incressi l’autoguvier de minorance ongjarese, intant che Ponta al à za otignût la poie dal Partît de Grande Romanie, formazion di estreme diestre contrarie a ogni forme di tutele des minorancis. Di segnalâ che chest partît al à sielzût di poiâ Ponta par vie che Iohannis al parten a di une altre minorance presinte in Transilvanie, o sei chê todescje.
Font: Balkan Insight, 7/11/14

Ocitanie: Euroregjon pirenaiche mediteranie, ocitan couficiâl

Cu la aprovazion dal gnûf statût, fat bon a Palma ai 27 di Otubar, l’ocitan al è deventât la cuarte lenghe uficiâl de Euroregjon pirenaiche mediteranie, adun cun catalan, francês e spagnûl. Si trate de prime volte che la lenghe d’oc e gjolt di un status uficiâl intun organisim internazionâl partecipât ancje dal stât francês. Un tant al è stât pussibil ancje in gracie dal sburt une vore fuart rivât dai rapresentants catalans che a son dentri di cheste realtât di cooperazion teritoriâl. L’ocitan al sarà duncje doprât sui documents uficiâi di chest organisim, sul so sît internet e i citadins a podaran fâ ûs di cheste lenghe intai lôr rapuarts cu la Euroregjon.
Font: Jornalet, 5/11/14

Bosgne: la cort federâl e boce la division etniche tes scuelis

In Bosgne a son passe cincuante istitûts scolastics là che fruts des comunitâts bosgnache e cravuate a van inte stesse scuele, ma a studiin in classis separadis e daûr di curricola diferents. Sul prin tacâ di Novembar la cort federâl dal paîs balcanic e à dât fûr une sentence che e condane chest sisteme tant che discriminatori. La gnove e à cjatât il bon acet sei dal guvier federâl che des organizazions pai dirits umans che cumò a domandin di inviâ un percors che al puarti a di un program scolastic multiculturâl che al permeti di svicinâ lis dôs comunitâts. La competence però no je tes mans dal guvier federâl, ma des autoritâts regjonâls che fin cumò no si son mostradis masse cjaldis su la cuistion.
Font: Balkan Insight, 4/11/14

Irlande: razisim linguistic intal Parlament dal Nord

Ai 3 di Novembar al à jevât une vore di scjas l’intervent dal deputât unionist Gregory Campbell intant di une riunion dal Parlament de Irlande dal Nord là che, intal indreçâsi ae assemblee, al à doprât une parodie de lenghe gaeliche irlandese. Par vie dal so compuartament Campbell al à vût une sospension temporanie e cetantis critichis, ma si à refudât di scusâsi. Il deputât unionist al à declarât di sintîsi in dirit di fâlu par vie che al jere “stomeât” di sintî i parlamentârs dal Sinn Féin, il partît di riferiment dai republicans irlandês, che a tacavin i lôr intervents simpri cui salûts par gaelic. Pal president de Assemblee nordirlandese, Mitchel McLaughlin, se Campbell al crodeve di fâ dal umorisim nissun fûr di lui lu à capît. La ministre de culture, Carál Ni Chuilín, e à fevelât invezit di “rude ignorance”. Critichis duris a son rivadis ancje di rapresentants de comunitât unioniste là che, un pôc par volte, la lenghe irlandese e tache a jessi calcolade un patrimoni comun di dute la int de Irlande dal Nord.
Font: BBC, 4/11/14

Paîs Basc: in Navare tai dai fonts pal euskara a scuele

La organizazion Euskara Kultur Elkargoa e à metût adun un rapuart su la evoluzion dai finanziaments pe educazion in lenghe basche in Navare. Dal 2009 a vuê i fonts par chest setôr si son sbassâts dal 88%, o sei di 639 mil a sì e no 78 mil euros. E je vere che ta chescj agns il guvier de Comunitât autonome al à ridusût lis risorsis pe scuele, ma intune misure ben divierse che e je tor dal 12%. Dal 2009 a vuê a son stâts scancelâts dal dut i fonts pal materiâl educatîf par euskara, i contribûts aes scuelis baschis che a son fûr des “areis bascofonis”, i finanziaments pe formazion dai dipendents comunâi e pai istitûts di insegnament par adults, e ancje i jutoris aes fameis pal traspuart dai fîs intai centris scolastics par basc. Intal stampon de leç finanziarie de Navare pal 2015 a son stâts puartâts cuasi a zero ancje i fonts pe promozion dal basc e chei pai programs di svilup des capacitâts di ûs de lenghe. La uniche vôs in cuintritindince e je chê pai programs europeans pal svilup de diversitât linguistiche là che pe prime volte si metin bêçs in belanç.
Font: Noticias de Navarra, 2/11/14

Corsiche: prin sì al PADDUC cul contribût dai nazionaliscj

Il prin di Novembar la Assemblee corse e à fat bon il PADDUC, o sei il Plan di svilup de Corsiche che al varès di indreçâ il svilup de isule pai prossims agns. Il progjet al à vût 38 vôts a pro dai rapresentants de çampe e dai nazionaliscj cors e un sôl contrari. I 12 conseîrs di diestre a àn invezit sielzût di no partecipâ ae votazion finâl. Il test al à cumò di vê i parês di altris autoritâts e dai citadins de isule prime di tornâ in Assemblee pe aprovazion finâl. Il plan al à vût la poie sei dai nazionaliscj moderâts, sei dai indipendentiscj cors dal moment che al previôt une suaze uficiâl pe identitât, pe culture e pe lenghe corse, ma ancje parcè che al difint lis carateristichis naturalistichis e agriculis de isule limitant cun fuarce i risis di speculazion edilizie.
Font: France Bleu, 01/11/14

Gales: la leç su la planificazion no ten cont de lenghe

La gnove leç galese su la planificazion teritoriâl no ten cont des carateristichis linguistichis dal Gales. A dîlu no je dome la organizazion pe lenghe galese Cymdeithas yr Iaith Gymraeg, ma ancje il consei provinciâl dal Sir Gâr / Carmarthenshire che cuntune letare uficiâl al ministri pe planificazion Carl Sargeant al lamente cheste situazion e al invide a meti dentri intal test indreçaments plui fuarts che a permetin aes aministrazions locâls di garantî un svilup sostenibil des comunitâts ancje sul plan linguistic. Il slargjament e la costruzion di gnovis areis urbanis, di fat, a puedin vê un impat cetant penç sui ecuilibris linguistics di un teritori.
Font: BBC, 31/10/14

Paîs Catalans: campagne pal ûs de lenghe te justizie

Cui 3 di Novembar si à inviade la gnove campagne dal guvier de Catalogne par saborâ l’ûs de lenghe proprie ancje intal cjamp de justizie. L’intindiment de azion al è di une bande di informâ i citadins sui lôr dirits intal ûs dal catalan intai rapuarts cul mont de justizie, e di chê altre di invidâ i professioniscj dal setôr a doprâlu inte lôr ativitât cuotidiane. Chel de justizie al è un dai cjamps là che il catalan al è mancul doprât. Juste par fâ un esempli, dilunc vie dal an passât dome une sentence ogni dîs e je stade metude jù par catalan.
Font: Generalitat de Catalunya, 31/10/14

Scozie: a bon la prime part dal archivi digjitâl gaelic

I ricercjadôrs de universitât di Glaschu / Glasgow a àn puartât insom la prime part dal plui grant archivi digjitâl di tescj par gaelic che, in dì di vuê, al è formât di dîs milions di peraulis. Une volte completade, si stime che la base di dâts e varà trente milions di peraulis. Ta cheste prime fase dal lavôr a son stâts metûts intal archivi digjitâl tescj gaelics che a van dal secul XII al dì di vuê. In zonte ae part dedicade ai scrits, e je ancje une sezion là che a son dentri 22 mil peraulis cjapadis sù di materiâi orâi regjistrâts tra i agns ’60 e i ’80 dal secul stât intes areis di lenghe gaeliche de Scozie e de Gnove Scozie.
Font: The Herald Scotland, 30/10/14

Sami: si lavore par une rapresentance te UE

Il Consei Sami, che al met adun lis organizazions principâls di cheste comunitât che a operin in Norvegje, Svezie, Finlande e Russie, al à inviât i prins pas par meti sù un ufici di rapresentance a Bruxelles. “O vin bisugne di jessi plui visibii pai politics europeans – e spieghe la presidente vicjarie dal Consei Sami, Christina Henriksen – par vie che la UE no mostre masse interès pe dimension umane de regjon artiche”. In buine sostance, a disin i rapresentants de comunitât sami, lis politichis europeanis a son centradis su la estrazion petrolifare, su la ricercje sientifiche e su la tutele de faune di cheste aree, ma no tegnin cont de presince dai sami che a vivin di secui ta chestis tieris e che a àn svilupât stîi di vite e un rapuart cul ambient che Bruxelles nol ten in nissun cont.
Font: Barents Observer, 29/10/14

Grecie: presentât il prin film par turc de Tracie

La Grecie no ricognòs la esistence di minorancis nazionâls e linguistichis intal so teritori. Dut câs, par vie di un tratât internazionâl, e à vût di ricognossi la esistence di une minorance religjose, chê musulmane, dulà che daûr si plate in realtât la presince di une minorance turche o turcofone che e vîf di secui inte regjon de Tracie ocidentâl. Par chest e cjape une dimension ancjemò plui impuartante la presentazion dal prin luncmetraç par turc zirât ta cheste regjon cun atôrs che pe plui part a partegnin ae minorance turche. La opare no je stade facile di puartâ insom, massime par vie dai fonts limitâts. Il film, di fat, nol à gjoldût di nissun jutori public, ma al è stât autofinanziât.
Font: Independent Balkan News Agency, 28/10/14

31/10/14

Paîs Catalans: consultazion popolâr alternative pai 9/N

Nol sarà un referendum uficiâl pe indipendence, ma une consultazion popolâr che i larà une vore dongje. Cheste la linie cjapade dal esecutîf catalan dopo de sospensive dal tribunâl costituzionâl spagnûl che i impedìs di inmaneâ la votazion in maniere normâl. Ai 9 di Novembar si podarà duncje votâ in 938 dai 947 comuns che a formin il principât di Catalogne, là che a saran a disposizion 6.430 cabinis eletorâls. A stâi daûr aes operazions di vôt a saran i passe 30 mil volontaris che si son fats indenant ta chestis setemanis, sot de supervision di plui di 6 mil funzionaris publics che a àn aderît ae iniziative.

Paîs Basc: propueste par risolvi il conflit cu la France

Rapresentants de maiorance des fuarcis politichis di Ipar Euskal Herria, o sei il Paîs Basc setentrionâl, a àn metût adun e presentât intant di une conference stampe a Baiona / Bayonne une propueste indreçade al guvier francês par facilitâ la soluzion dal conflit basc.

Stât francês: novitâts in Senât su la riforme teritoriâl

La comission dal Senât francês che e à vût la incarghe di viodi de leç di riforme teritoriâl e à decidût di proponi des modifichis al test za fat bon des dôs cjamaris in prime leture e che al è cumò in spiete di jessi fat bon in seconde leture. L’organisim parlamentâr al propon di ridusi il numar des regjons a 15 e no plui a 13. Ta cheste maniere si mantignarès la autonomie de Alsazie, là che e vîf la plui part de minorance di lenghe todescje, che sul imprin so voleve fondi cu lis regjons de Lorene e de Champagne – Ardenne. Chê altre modifiche e ponte a evitâ la fusion tra lis dôs regjons ocitanis dai Pireneus di Mieç e de Lenghedoc – Roussillon che, par altri, e cjape dentri ancje la Catalogne setentrionâl sot aministrazion francese. L’acuardi cjatât in comission nol garantìs però in automatic che chestis propuestis di modifiche a passin ancje intant dal vôt dal Senât in assemblee plenarie.
Font: Agence Bretagne Presse, 22/10/14

Paîs Basc: gnûf coretôr ortografic cun conseis lessicâi

Ai 22 di Otubar al è stât presentât Hobelex, il gnûf coretôr ortografic pe lenghe basche che si podarà discjariâ sore nuie di Internet e che al è stât metût adun de organizazion UZEI su incarghe de Euskaltzaindia, o sei la Academie de Lenghe Basche. Hobelex al partìs di une base di dâts di passe 117 mil jentradis e al pues atualizâ ogni dì lis sôs informazions linguistichis. Il coretôr al segne cul ros i erôrs di ortografie, lis formis che no son justis o che no son dentri intal dizionari e po, a man a man che si va indenant a scrivi, al segne cul vert lis peraulis che no son faladis, ma che si propon di cambiâ cun formis miôr. Hobelex duncje no si ferme ai erôrs ortografics cemût che a fasevin chei altris coretôrs pe lenghe basche, ma al va a controlâ ancje il lessic e al propon al utent formis par miorâ la lôr scriture. Par svilupâ chest coretôr si à lavorât trê agns a dilunc.
Font: Diario Vasco, 22/10/14