04/04/14

France: sucès de diestre tes aministrativis

Ai 30 di Març in France si è tignût il secont turni des elezions aministrativis che a son stadis segnadis dal salt indenant de diestre nazionaliste francese cun passe 150 comuns piçui e grancj che a son passâts dai socialiscj al UMP o fintremai al FN. La Bretagne e je une des areis là che la çampe e à tignût miôr e e à vinçût intes citâts plui impuartantis tant che Naoned / Nantes, Roazhon / Rennes, Brest e An Oriant / Lorient. Di segnalâ po la vitorie a Karaez / Carhaix ancjemò al prin turni di Christian Troadec, un dai puartevôs dal moviment dai Bonnets rouges, e che in diviers comuns il Parti Breton al à rivât a otignî dai conseîrs. A Perpinyà / Perpignan, capitâl de Catalogne setentrionâl, la vitorie e je lade a Jean-Marc Pujol de UMP, poiât ancje dal moviment Unitat Catalana, che al à batût il candidât de estreme diestre. In Corsiche lis fuarcis nazionalistis a àn otignût dai risultâts pardabon impuartants, massime cun Femu a Corsica che e à rivât pe prime volte a otignî la vitorie a Bastia cun Gilles Simeoni e che le à sfiliade cun Jean-Christophe Angelini a Purti Vechju / Porto-Vecchio. A Aiacciu / Ajaccio la convergjence des fuarcis nazionalistis e à permetût di passâ il 10% e di cori ancje pal secont turni. In Ocitanie si à vude une fuarte incressite de diestre francese, sei chê moderade de UMP, sei chê estreme dal FN. Tra lis citâts pierdudis dai socialiscj a vantaç de diestre o dai centriscj o cjatìn Tolosa / Toulouse, Lemòtges / Limoges, Pau e Valença / Valence, intant che a Montpelhièr / Montpellier il candidât socialist al è stât batût di un candidât dissident di çampe. Une novitât di chestis elezions aministrativis e jere la presince dal cartel ocitanist Bastir! cun 116 candidâts conseîrs, 36 di chescj za elets intal prin turni. Intal Paîs Basc setentrionâl si à viodût dai pas indenant impuartants pe çampe nazionalitarie basche cun risultâts dispès sore dal 10% e la maiorance otignude in diviers comuns. A Baiona / Bayonne, la capitâl regjonâl, la vitorie e je lade ai centriscj par un pugn di vôts, intant che la liste nazionalitarie e à vût il 10,5% dai vôts.
Font: Journalet, 31/03/14; Agence Bretagne Presse, 31/03/14; Naiz:, 31/03/14; Alta Frequenza, 31/03/14; VilaWeb, 31/03/14

Slovachie: Budapest e domande di mantignî lis scuelis magjaris

Il guvier ongjarês, par bocje dal ministri Zoltan Balog, al à domandât a chel slovac di no sierâ lis scuelis de minorance magjare inte suaze de riforme scolastiche che e previôt une riduzion dai istitûts scolastics là che a son iscrits mancul fruts. Balog al à ancje sigurât che la Ongjarie e fasarà compagn cu lis scuelis là che si studie par slovac. Il ministri pe istruzion de Slovachie, Dušan Čaplovič, al à spiegât che la responsabilitât pe gjestion des scuelis e je comunâl, ma al à ancje dite che il guvier al intint mantignî l’insegnament in dutis lis lenghis minoritariis dal paîs par garantî a ducj i citadins lis stessis oportunitâts di gjoldi di une istruzion di cualitât.
Font: Politics.hu, 27/03/14

Galizie: A Mesa e vûl denunciâ ae Unesco i atacs ae lenghe

A Mesa pola Normalización Lingüística e à chê di denunciâ ae Unesco la violazion dai dirits linguistics in Galizie. Lu à comunicât il president de organizazion, Carlos Callón, intant di une conference stampe che si è tignude ai 26 di Març a S. Jacum di Galizie. A Mesa e à inviât une schirie di incuintris e di confronts par tirâ dongje altris sogjets che a intindin poiâ la iniziative in maniere di dâi ancjemò plui fuarce ae denuncie internazionâl. Tancj i esemplis di violazion dai dirits linguistics che a son stâts ricuardâts, si va de proibizion di insegnâ ciertis materiis par galizian ae riduzion de presince de lenghe intai mieçs di comunicazion, fintremai ae eliminazion de cognossince dal galizian tant che competence par podê lavorâ inte aministrazion publiche.
Font: Galicia Hoxe, 27/03/14

Paîs Catalans: no de cort costituzionâl al vôt pe indipendence

Il tribunâl costituzionâl spagnûl al à declarât incostituzionâl il riferiment ae Catalogne tant che sogjet politic e juridic sovran e duncje la pussibilitât di davuelzi un referendum pe indipendence fûr dai limits fissâts de Costituzion spagnole. La sentence e rispuint cussì ae impugnazion de bande des autoritâts di Madrid de Declarazion di sovranitât dal popul catalan fate buine ai 23 di Zenâr dal 2013 dal Parlament de Catalogne. Il massim orghin judiziari spagnûl nol dinee il dirit ae autodeterminazion, ma al dîs che par podêlu esercitâ al covente prime modificâ la Costituzion: passaç impussibil a front dal no za manifestât dai doi principâi partîts spagnûi (PP e PSOE). Pai partîts catalans che a poin il percors referendari pe indipendence (CiU, ERC, ICV-EUiA e CUP), chê dal tribunâl costituzionâl e je une sentence politiche che e mostre la mancjance di imparzialitât di chest organisim e che no larà a cambiâ il procès pe indipendence inviât in Catalogne. Judizis similârs a son rivâts ancje dai sogjets che a àn saborât chest procès, a tacâ de Assemblee Nazionâl Catalane e dal Òmnium Cultural.
Font: Naiz:, 26/03/14

Ongjarie: i dirits dai ongjarês de Ucraine, prioritât par Budapest

Ai 26 di Març il prin ministri ongjarês Viktor Orbán si è cjatât a Budapest cul president vicjari de Federazion Culturâl Magjare de Transcarpatie, Laszlo Brenzovics, par jessi inzornât su la situazion de comunitât ongjarese che e vîf ta cheste regjon de Ucraine. Ducj i doi a àn concuardât su la dibisugne di favorî il procès di svicinament di chest paîs ae Union Europeane. Par Orbán però, la poie dal guvier di Budapest e sarà condizionade dal plen rispiet dai dirits des minorancis, a tacâ dai 150 mil ongjarês che a vivin in Transcarpatie.
Font: Politics.hu, 26/03/14

Paîs Basc: a Iruñea in tancj a vuelin lis scuelis par basc

Dai 3 ai 18 di Març une cincuantine di volontaris si son plaçâts fûr dai uficis pal benstâ sociâl di Iruñea / Pamplona, dulà che i gjenitôrs a vevin di lâ par notâ i lôr fruts intes scuelis de infanzie de capitâl de Navare. Ai paris e aes maris ur è stât domandât se a varessin vût gust di iscrivi i lôr fîs intune scuele là che l’insegnament al jere ancje in lenghe basche. Ae fin a son stât 466 i gjenitôrs che a àn rispuindût di sì. La iniziative e veve chê di mostrâ trop fuarte che e je la domande par une scuele basche dal moment che la aministrazion comunâl, che e je intes mans de diestre navare (UPN), e autorize lis scuelis de infanzie par euskara dome intun cuartîr par un totâl di a pene 164 puescj disponibii.
Font: Noticias de Navarra, 25/03/14

Macedonie: i albanês a domandin un sisteme presidenziâl gnûf

Il principâl partît albanês de Macedonie, la Union Democratiche pe Integrazion, e à inviât une campagne par un implant gnûf des elezions presidenziâls. La campagne eletorâl par sielzi il gnûf president dal paîs balcanic e je tacade ai 24 di Març e si sierarà ai 13 di Avrîl cul vôt pal prin turni. La Union Democratiche pe Integrazion e à fat savê che no poiarà nissun dai cuatri candidâts in corse, ma e doprarà la campagne eletorâl par informâ i citadins su la injustizie di un model presidenziâl che nol ten cont de comunitât albanese, cundut che e rapresente un cuart de popolazion de Macedonie. Dome un consens larc e multietnic al pues dâ une credibilitât vere ae figure e aes funzions dal president, in câs contrari, a zontin i rapresentants dal partît albanês, a tignaran par no legjitim un president che la sô sielte e rive dome di une part de popolazion.
Font: Balkan Insight, 25/03/14

Paîs Basc: in miârs in place in Navare pal euskara

A jerin sù par jù dîs mil lis personis che ai 22 di Març a àn partecipât a Iruñea / Pamplona ae manifestazion pal dirit a vivi in euskara in Navare. Cun di fat, ta cheste comunitât autonome, a son cetancj i pidiments che si cjatin a vê di frontâ i citadins che a àn il basc tant che prime lenghe. Il prin ostacul al è chel de division de Navare in trê areis, une là che si à un ricognossiment formâl dai dirits linguistics dai bascs, une altre là che si ‘nt ricognòs dome cualchidun, e une tierce là che cui che al fevele par euskara nol à nissun dirit. A son po lis politichis discriminatoriis metudis in at dal guvier locâl che no previodin la cognossince dal basc tant che criteri par lavorâ inte aministrazion publiche nancje inte aree bascofone, la proibizion di vê in digjitâl la radiotelevision publiche de Comunitât Autonome Basche e il dinei de licence par Euskalerria Irratia, la uniche radio a vê dute la sô programazion par euskara, cundut des sentencis dai tribunâi che a dan reson ae emitente. A son po di zontâ i tais ai finanziaments, massime a partî dal 2011, che a àn obleât a ridusi ancjemò di plui i servizis comunâi par euskara e a sierâ diviers mieçs di comunicazion bascs, e che a àn lassât cence un franc i istitûts par insegnâ l’euskara ai adults. Par dutis chestis resons i manifestants a àn domandât un cambiament radicâl inte politiche navare par garantî il dirit a vivi ad in plen par basc. Ae iniziative a àn aderît ancje aministrazions locâls, organizazions culturâls e di volontariât, sindacâts e partîts politics tant che EH Bildu, Geroa Bai, Aralar, Sortu e EA.
Font: Noticias de Navarra, 22/03/14

Cornualie: 120 mil sterlinis di Londre pe lenghe

Il prin ministri vicjari britanic, Nick Clegg, al à comunicât che in Avrîl la organizazion Cornish Language Partnership e ricevarà un finanziament di 120 mil sterlinis cun chê di svilupâ gnovis azions par promovi e svilupâ la lenghe proprie de Cornualie. Par Clegg, il cornic al è un element centrâl pe identitât di cheste tiere e vê une lenghe vive e che e cres al jude la Cornualie a jessi diferente di chês altris regjons e duncje a promovile e a clamâ dongje plui visitadôrs. L’interès pe lenghe al va dilunc a cressi, e conferme la presidente de organizazion Jennifer Lowe, e no dome framieç de int de Cornualie, ma ancje tra cui che le visite. I fonts che a rivaran di Londre a coventaran par promovi l’ûs dal cornic sui prodots e su lis marcjis tipichis de Cornualie e par slargjâ la presince di cheste lenghe intes scuelis.
Font: BBC, 21/03/14

Serbie: la minorance albanese e vûl fâ come la Crimee

Jonuz Musliu, president de municipalitât di Bujanovac, citât a maiorance albanese che si cjate inte Serbie meridionâl, al à rivendicât il dirit des comunitâts albanesis che a son dentri dai confins serps di dâsi adun cul Cossovo. Denant de anession de Crimee de bande de Federazion Russe, al à spiegât Musliu, ancje i guviers di Pristina e di Tirana a varessin di domandâ une soluzion similâr pe valade di Preševo / Presheva, a maiorance albanese ma part de Serbie. Ta cheste aree, là che a vivin uns 50 mil albanês e si cjatin ancje lis citâts di Bujanovac e Medveđa, ancjemò intal 1992 si veve tignude une consultazion no uficiâl par domandâ di passâ cul Cossovo. Lis autoritâts serbis, par cumò, no àn fat nissun coment su cheste rivendicazion.
Font: Balkan Insight, 21/03/14

Friûl: il Consei regjonâl dal Friûl – VJ al jentrarà intal NPLD

I furlans a fasìn il prin pas par jentrâ inte rêt europeane plui impuartante par chel che al rivuarde lis politichis pes lenghis minorizadis. Cun di fat, l’Ufici di presidence dal Consei regjonâl al à decidût di aderî ae NPLD, o sei la Rêt par promovi la diversitât linguistiche. Si fevele di une istituzion europeane impegnade tal cjamp de politiche e de planificazion linguistiche là che a son dentri guviers statâi e regjonâi, ONG, universitâts e associazions impegnadis inte promozion des lenghis minorizadis. La Rêt e je impegnade intal mostrâ la diversitât linguistiche tant che une oportunitât, tant che imprest centrâl pal svilup personâl, sociâl e economic di dute la Europe, in plui che jessi un jutori pal dialic interculturâl. La istituzion e lavore dongje de Comission europeane par saborâ chestis finalitâts e e jude il scambi di buinis pratichis intal cjamp des politichis linguistichis tra aministradôrs, professioniscj e esperts. In dì di vuê inte Rêt a son dentri tant che membris a plen dirit il guvier de Republiche di Irlande, i guviers dal Gales, de Catalogne, de Comunitât Autonome Basche, de Navare e de Galizie, la Coletivitât Teritoriâl Corse, la Provincie de Frisie, l’Ufici public de lenghe bretone e il Folktinget, che al rapresente la comunitât svedese de Finlande. Plui lungje la liste des realtâts associadis, là che o cjatìn, tra i altris, ancje il Parlament sami de Finlande, lis universitâts di Stocolm e Cardiff, l’istitût Mercator, l’Istitût di Studis Ocitans e la Academie Frisone.
Font: Radio Onde Furlane, 20/03/14

Asturiis: prin boletin informatîf par asturian su la RPA

Cui 17 di Març, la RPA, o sei la radio publiche dal principât des Asturiis, e à scomençât a trasmeti il so prin notiziari informatîf par asturian. Il radiogjornâl al proponarà lis stessis gnovis di chel par spagnûl, voltadis par asturian, e al larà in onde ogni dì, di lunis a vinars, a une dopodimisdì. Fin cumò la emitente publiche e veve ufiert dai programs par asturian, ma simpri limitâts a argoments culturâi. Il notiziari al è nassût par iniziative dai dipendents de RPA, ma ancje in gracie dal sburt rivât des organizazions pai dirits linguistics che di agns a domandin une presince normâl dal asturian dentri dai programs radiotelevisîfs publics.
Font: Asturies.com, 14/03/14

Irlande: la revision de leç sul gaelic e sbasse la tutele

La anticipazion de bande de stampe dai contignûts dal stampon pe modifiche de leç su lis lenghis e à jevât cetantis critichis ator pe Republiche irlandese. Tra lis novitâts che il guvier di Dublin al sarès pront a meti in vore si à, par esempli, la eliminazion dal oblic di publicâ in forme bilengâl i plui impuartants documents di interès public, il slungjament dai plans di politiche linguistiche di trê a siet agns che al puartarès a di une lôr metude in vore cetant plui lente e la fusion dal ufici dal comissari pe lenghe irlandese cun chel dal garant public. Pal partît republican Sinn Féin modifichis dal gjenar a varessin l’unic efiet di rindi plui debulis lis politichis a pro de lenghe irlandese. Critichis al test a son rivadis ancje dai rapresentants dal partît Fianna Fáil. Inmò plui dure la reazion de organizazion pe lenghe Conradh na Gaeilge che e piture il stampon tant che esempli di disinterès totâl pai dirits dai citadins che a fevelin par gaelic, formât dome di tais e di promessis no mantignudis.
Font: Irish Times, 06/03/14