Paîs Catalans: cun Setembar in vore l’OPLC tal Nord

Al tacarà a funzionâ cun Setembar inte Catalogne dal Nord l’ufici public de lenghe catalane (OPLC) imbastît dal consei dipartimentâl dai Pireneus Orientâi cu la poie de regjon aministrative de Ocitanie e dal guvier francês. Tal framieç si proviodarà a formâ i siei organisims internis, o sei il consei di aministrazion, il consei sientific e la assemblee gjenerâl. La gnove agjenzie no si limitarà a cjapâ in man lis politichis linguistichis pal catalan inte Catalogne sot aministrazion francese ma si propon di incressi lis azions a pro de lenghe proprie tal insegnament, te creazion culturâl e tal ûs sociâl.

Font: Generalitat de Catalunya, 28/06/19

Paîs Basc: la Wikipedia par euskara e va dilunc a cressi

Dal 2017 a vuê la lenghe basche e je passade dal trenteunesim al vincjenovesim puest a nivel mondiâl par contignûts presints su Wikipedia cun 336 mil articui e cun 30 milions di visitis vie pal an passât. Un tant al è stât pussibil ancje in gracie dal acuardi sotscrit doi agns indaûr dal guvier de Comunitât Autonome Basche e de associazion dai utents di lenghe basche de enciclopedie libare (Euskal Wikilarien Kultura Elkartea) che, cuntun invistiment di 200 mil euros ad an, al à permetût di zovâsi de colaborazion di uns 2.500 students, pe plui part de Universitât dal Paîs Basc, che a àn contribuît a scrivi centenârs di vôs gnovis e di miorânt cetantis altris.

Font: EiTB, 27/06/19

France: fate buine la Coletivitât europeane de Alsazie

Ai 26 di jugn, dopo doi dîs di dibatiment, la Assemblee francese e à fat bon il progjet di leç che al met sù la Coletivitât europeane de Alsazie. Il test al à vût 441 vôts a pro, 30 cuintri e 61 astensions. Il gnûf sogjet aministratîf al nas de fusion dai doi dipartiments dal Alt e dal Bas Ren, al restarà dentri de regjon dal Grant Est ma al varà competencis specifichis in materie di cooperazion transfrontaliere, turisim, bilinguisim e gjestion des stradis che a varan però di jessi definidis miôr par mieç di regolaments di pueste. La Coletivitât si inviarà cul prin di Zenâr dal 2021. Pai presidents dai doi conseis dipartimentâi dal Alt e dal Bas Ren, Frédéric Bierry e Brigitte Klinkert, cheste leç e segne la rinassince de Alsazie come sogjet aministratîf e e ven lete tant che prin pas in direzion di formis di autoguvier plui marcadis. A fevelin di un prin pas ancje i cuatri deputâts dal grup des Regjons e dai Popui Solidaris – trê cors e un breton – che a vevin puartât in aule la rivendicazion dal moviment autonomist alsazian Unser Land par une Coletivitât a statût speciâl, fûr de regjon dal Grant Est. Pal partît di guvier La République en marche, chest gnûf sogjet istituzionâl al va in direzion di chê «diferenziazion teritoriâl» prometude dal president francês Emmanuel Macron.

Font: Dernières Nouvelles d’Alsace, 26/06/19; RPS, 28/06/19

Bretagne: a Parîs lis firmis pal referendum su la riunificazion

Ai 25 di Jugn une delegazion de associazion Bretagne Réunie e à consegnât a di une cuindisine di deputâts bretons elets inte Assemblee francese lis 105 mil firmis tiradis sù par domandâ un referendum su la riunificazion de Bretagne tune uniche regjon aministrative. Il grup al è rivât a Parîs in biciclete dopo di un viaç di une disine di zornadis. Sul imprin lis firmis a jerin stadis consegnadis al consei dipartimentâl de Loire Atlantiche par che al promovès une consultazion sul teme, ma i aministradôrs locâi si vevin refudâts di clamâ al vôt i citadins suntun teme che a calcolavin di interès statâl. I deputâts bretons si son impegnâts a presentâ une propueste di leç par permeti il referendum. Cundut che e je part de Bretagne storiche, la Loire Atlantiche e fâs part di une regjon aministrative diferente. La separazion e jere stade decidude uns setante agns indaûr dal guvier Pétain ma ducj i tentatîfs par superâle a son simpri stâts blocâts des autoritâts statâls.

Font: Agence Bretagne Presse, 25/06/19

Ocitanie: dossier de Assemblada Occitana sul ocitan a scuele

La riforme dai liceus francês imbastide dal ministri pe educazion Jean-Michel Blanquer e je lade a colpî ancje lis cussì clamadis “dotazions orariis”, o sei la cuvierzidure economiche pai professôrs disponibii a davuelzi oris di insegnament intune lenghe minorizade. Un dai risultâts al è che, cul prossim an scolastic, l’ocitan al riscje di disparî tant che lenghe di insegnament des oris opzionâls. La misure e je dome la ultime di une rie di azions che a metin sot atac ancje chei spazis che lis lenghis minorizadis a vevin rivât a otignî te scuele publiche francese. A fâ il pont su la situazion, in particolâr par chel che al rivuarde la Ocitanie, al è un dossier publicât in Jugn de organizazion Assemblada Occitana. Il document al conte il percors storic e legjislatîf de presince dal ocitan inte scuele, la posizion che i diviers sogjets politics francês a àn in proposit e i atacs puartâts plui di resint de politiche francese. Intal test si propon ancje une rie di rivendicazions che citadins e organizazions ocitanis a varessin di puartâ indenant a muse dure. Cun di fat, il stât francês al à molât alc dome cuant che si à scuintrât cun rivendicazions e mobilitazions fuartis – come tal câs di Corsiche, Paîs Basc e Bretagne – e no si à mai çugnât di cui che al faseve indenant domandis minimâls come tal câs dai ocitans.

Font: Assemblada Occitana, 24/06/19

Gales: presentât un sogjet gnûf che al cjapi il puest dal OfCom

Ai 24 di Jugn al è stât presentât il gnûf sogjet che al varès di controlâ e regolâ il setôr radiotelevisîf in Gales al puest dal OfCom (Office of Communications) britanic. La gnove e rive dopo di une rie di decisions cjapadis dal organisim statâl che a son stadis calcoladis negativis pal Gales e, massime, pe presince de lenghe galese tai mieçs di comunicazion tant che la concession par trasmeti a di une emitente (Radio Ceredigion) che e trasmet dome par inglês intune aree là che sù par jù la metât de popolazion e à il galês come prime lenghe. Il gnûf sogjet, batiât Consei Nazionâl des Comunicazions (Cyngor Cyfathrebu Cenedlaethol), si indotarà di une struture in stât di regolâ il sisteme radiotelevisîf e des comunicazions che al permeti di rivâ ae devoluzion di cheste competence di Londre al Gales.

Font: Cymdeithas, 24/06/19

Gales: celebrâts i 70 agns de prime scuele par galês di Cardiff

Cuntune parade là che a àn partecipât centenârs di students e ex arlêfs a son scomençadis lis celebrazions pai setante agns de prime scuele primarie par galês di Caerdydd / Cardiff. Intal Setembar dal 1949 alì de Ninian Park’s Boys’ School si inviave la prime classe de citât cul galês tant che lenghe di insegnament. A frecuentâle a jerin 19 fruts che a rivavin ducj di fameis che a vevin il galês come prime lenghe. A varan po di passâ cuasi trente agns par che te capitâl dal Gales e tacàs lis lezions la prime scuele secondarie par galês. In dì di vuê, la citât i da acet a 17 scuelis primariis e 3 secondariis, cuntune cuarte che e varès di partî avonde in curt. Plui dal 70% dai students che lis frecuentin a rivin di fameis là che in cjase no si fevele par galês. Chescj istitûts a àn di fat une capacitât di atrat che e va ancje plui innà de lenghe e tra i siei ex students si cjatin personaçs innomenâts tant che i atôrs Ioan Gruffydd e Matthew Rhys e i zuiadôrs di rugby Jamie Roberts e Rhys Patchell.

Font: BBC, 22/06/19

Irlande: il gaelic a scuele ancje cu la educazion fisiche

Si moltiplichin lis azions par sburtâ l’insegnament dal gaelic intes scuelis de Republiche di Irlande. La ultime in ordin di timp e je stade lançade ai 20 di Jugn dal ministri pe educazion Joe McHugh. Si trate di un progjet pilote trienâl che al previôt l’ûs dal irlandês come lenghe veicolâr intant des lezions di educazion fisiche. La iniziative si propon di stiçâ i students a doprâ la lenghe ancje fûr des oris di irlandês intun contest plui informâl e divertent là che i fruts a àn plui pussibilitât di cjacarâ ancje tra di lôr. Il progjet al è indreçât tant ai students des primariis che a chei des secondariis.

Font: Irish Mirror, 21/06/19

Paîs Catalans: dal InformeCAT un cuadri cun clârs e scûrs

Ai 20 di Jugn la organizazion Plataforma per la llengua e à presentât l’InformeCAT 2019, il rapuart anuâl che al met adun i cincuante dâts plui significatîfs par presentâ il stât di salût de lenghe catalane. Justizie e cine a son i cjamps là che lis robis a van piês. Tal prin câs al baste un dât par sclarî la situazion: a pene 2 personis su 10 che a cjacarin par catalan a crodin che doprâ la lôr lenghe no varà consecuencis negativis denant di un judiç che ur fevele par castilian, cundut che la normative e previôt ancje l’ûs dal catalan inte aministrazion de justizie. Par chel che al rivuarde il cine invezit dome il 10,6% des peliculis finanziadis dal istitût des impresis culturâls de Catalogne al è stât zirât par catalan. Chel istès, il rapuart al ufrìs ancje elements positîfs che a mostrin cemût che il catalan al reste une lenghe utile tal marcjât dal lavôr, di inclusion e fintremai di incressite sociâl. Un dât su ducj: lis personis che no àn il catalan come prime lenghe ma che a son bogns di doprâlu a àn un nivel di disocupazion che al è la metât di chei che no son in stât o no vuelin fevelâlu.

Font: PFPLL, 20/06/19

Gales: l’indipendentisim al fâs pas indenant

Par agns a dilunc l’indipendentisim in Gales al è stât un fenomen margjinâl ma za di cualchi timp al cres il so atrat framieç de int. Daûr dal ultin sondaç curât di YouGov, chei a pro de indipendence a son tor dal 29%, il 5% in plui dal 2017, intant che chei che si mostrin interessâts a cheste pussibilitât a son un altri 29%, cuntun aument dal 2% rispiet a doi agns indaûr. I contraris, che tal 2017 a jerin il 49%, a son cumò il 42%. I favorevui (40%) e i interessâts (32%) a son po deventâts maioritaris framieç dai eletôrs laburiscj, o sei il partît che par solit al è il plui votât in Gales. La plateforme indipendentiste Yes Cymru e à invezit inviât une campagne framieç dai ents locâi par che a cjapin posizion in proposit. Ai 28 di Mai la aministrazion comunâl di Machynlleth e je stade la prime a cjapâ posizion a pro di un Gales indipendent, intant che in Jugn i son vignûts daûr i comuns di Porthmadog, Ffestiniog e Nefyn. E che alc al sedi daûr a cambiâ si lu à viodût ancje cuant che ai 11 di Mai, in rispueste al apel dal coordenament All Under One Banner Cymru, diviers miârs di personis a àn partecipât a Caerdydd / Cardiff ae prime manifestazion par domandâ la indipendence.

Font: Nation Cymru, 20-22/06/19

Scozie: consultazions sul gnûf plan di politiche linguistiche

La agjenzie scozese pe lenghe gaeliche, Bòrd na Gàidhlig, e à inviât une consultazion publiche sul stampon dai indreçaments pal gnûf plan di politiche linguistiche. I plans plurienâi a son previodûts de leç su la lenghe gaeliche fate buine tal 2005. La consultazion e restarà in vore fintremai i 17 di Setembar di chest an. Lis osservazions cjapadis sù ta cheste dade a laran a integrâ o a mendâ i indreçaments metûts jù de agjenzie prime di trasmetiju al guvier scozês pe aprovazion finâl. Il gnûf plan al larà a cjapâ il puest di chel jessût intal 2007. I plans di politiche linguistiche a partissin de suaze gjenerâl par proponi po azions specifichis par miorâ la presince de lenghe gaeliche inte educazion, intes aministrazions publichis, intai media e te vite di ogni dì.

Font: Bòrd na Gàidhlig, 19/06/19