Gales: pe Cymdeithas l’avignî di S4C nol à di dipendi di Londre

Ai 22 di Avost si à sierade la consultazion inviade dal Comitât pai afârs galês in mert al avignî dal servizi radiotelevisîf public in Gales. Il cuadri gjenerâl al è cambiât une vore tai ultins agns e si à resonât se a son lis cundizions par mantignî in vore un servizi di cheste fate in clâr. Il guvier di Londre al à ridusût in maniere progressive la sô poie economiche ae television publiche par galês S4C (nassude ancjemò tal 1982) che cumò e ven finanziade cul cjanul pal servizi public tirât sù de BBC. La impression e je che si vueli lâ in direzion di un servizi a paiament sul model des plateformis privadis. Cuintri di cheste ipotesi si fâs sintî la Cymdeithas yr Iaith che e rivendiche il trasferiment aes istituzions galesis des competencis e des risorsis pal setôr radiotelevisîf gjestidis fin cumò di Londre. Za di timp la organizazion pe lenghe galese e à inviât une campagne pe devoluzion dal setôr e si augure che cheste e sedi la ultime volte che un organisim di Westminster al è clamât a decidi dal avignî dal servizi radiotelevisîf public par galês.

Font: Nation Cymru, 26/08/22

Gales: propueste par incressi il galês intes scuelis

Ae vilie de publicazion de bande dal guvier galês dal stampon de leç pe educazion in lenghe galese, la organizazion Cymdeithas yr Iaith e à presentât la sô cuintripropueste là che si bat su la oportunitât che il ministeri al à di garantî la educazion par galês a ducj cuancj. In dì di vuê dome il 20% dai students al à la pussibilitât di vê il galês tant che lenghe veicolâr, intant che chei altris a àn di contentâsi di vêlu, cuant che e va ben, come seconde lenghe e duncje di no vê une fluence suficiente par vivi ad in plen la lôr comunitât e la lôr culture o par podê spindi la cognossince de lenghe sul plan lavoratîf. Tra i ponts di fonde che si cjatin inte propueste de Cymdeithas si à di fissâ come obietîf che tal 2050 il galês al sedi la lenghe veicolâr di dutis lis scuelis dal Gales, che dutis lis scuelis gnovis metudis sù di cumò indenant a sedin a imersion par galês, e che i plans educatîfs locâi pe lenghe galese a lassin il puest a di un plan strategjic nazionâl.

Font: Nation Cymru, 02/08/22

Gales: plan par fâ sù gnovis scuelis par galês

Lis aministrazions locâls dal Gales a son daûr a imbastî i lôr plans strategjics pe educazion in lenghe galese e a àn timp par fâlu ancjemò fin al prin di Setembar. L’intindiment al è chel di disvilupâ tai prossims dîs agns l’insegnament imersîf par galês. In chest sens, ai 12 di Lui, l’esecutîf galês al à fat savê che si à in program di inviâ 23 gnovis scuelis primariis imersivis e di aumentâ la capacitât di altris 25 che a son za operativis.

Font: Cambrian News, 12/07/22

Gales: plan linguistic ambiziôs pe universitât di Swansea

La universitât di Abertawe / Swansea e à lançât une gnove strategjie cuincuenâl pal galês. Dopo di un lavôr di confront e scolte lât indenant par 18 mês cul personâl, cui students e cui puartadôrs di interès, la direzion dal ateneu e à metût jù un plan strategjic pe lenghe galese pe dade 2022-2027. Il document si poie su cuatri as di intervent, o sei: lavorâ par che la universitât e sedi un lûc di acet par une comunitât multiculturâl e plurilengâl; creâ un ambient che al judi il plui pussibil a favorî i progrès di cui che al è daûr a imparâ il galês; sburtâ la istituzion a lâ ancje plui innà dai standards linguistics fissâts de normative; sostignî la presince dal galês intes ativitâts di ricercje e di inovazion. La strategjie e je compagnade di un plan des azions che al cjape dentri ducj i organisims e i membris de universitât.  

Font: Prifysgol Abertawe, 23/06/22

Gales: sît dedicât a cui che al impare la lenghe proprie

Inte suaze dal festival zovanîl Urdd Eisteddfod si à presentât Lingo360, un gnûf sît informatîf dedicât a cui che al è daûr a imparâ il galês o che nol à ancjemò avonde confidence cun cheste lenghe. In plui di proponi articui su diviers argoments scrits di pueste par chest public, il sît al propon ancje risorsis lessicâls par judâ la leture e zûcs par praticâ la lenghe.

Font: Nation Cymru, 01/06/22

Gales: precedent judiziari a pro de lenghe proprie

Un precedent a pro dal galês. Al è cemût che e ven lete la vicende judiziarie che e à interessât Toni Schiavone, militant storic pe lenghe galese. Dut al jere scomençât intant di une visite a Llangrannog, cuant che l’om al veve ricevût une multe de societât privade che e gjestìs i puescj machine a paiament inta chê localitât. Par paiâ la multe, che e jere dome par inglês, Schiavone al veve domandât che e fos voltade par galês. La societât gjestore dal servizi però, invezit di voltâ il document, e veve clamât l’om in judizi. Schiavone alore al à esercitât il so dirit a jessi processât par galês cul risultât che il tribunâl al à obleât la aziende a voltâ, no dome la multe, ma dut la sô documentazion processuâl inta chê lenghe. A chel pont, la societât no si à nancje presentade ae udience finâl dal procès che si à sierât cu la assoluzion di Schiavone e cuntun precedent bon par ducj i citadins di lenghe galese.

Font: Nation Cymru, 11/05/22

Gales: propuestis par incressi il galês inte sanitât

La strategjie par incressi l’ûs de lenghe galese dentri dai servizis sanitaris metude jù dal guvier dal Gales intal 2016 e je in scjadince e dentri dal mês di Avrîl si spietisi che e vegni fate buine chê pai prossims agns. Inta cheste suaze la organizazion pe lenghe Cymdeithas yr Iaith e à racomandât che si fissin dai obietîfs clârs par sigurâ che il personâl sanitari a contat cui pazients al vedi un nivel minim di competence linguistiche che i permeti di interagjî cu lis personis inte lôr lenghe proprie. Propit pe lôr cundizion, i pazients a vivin za une cundizion di fragjilitât e no puedin cjatâsi a patî ancje par vie de lenghe che i ven plui naturâl di doprâ. Par lâ ta cheste direzion Cymdeithas yr Iaith e domade al esecutîf di slargjâ ancje al personâl sanitari la oportunitât za garantide a insegnants e personâl educatîf, ven a dî chê di podê seguî i cors par imparâ o miorâ lis competencis di galês in forme gratuite. La organizazion e domande che si procedi in maniere progressive ancje a fissâ des cuotis di assunzion di personâl sanitari peadis aes competencis linguistichis.

Font: Nation Cymru, 15/03/22

Gales: iniziativis par favorî l’aprendiment de lenghe proprie

Il guvier galês al à fat savê che cul mês di Setembar di chest an i zovins tra i 18 e i 25 agns a varan la pussibilitât di iscrivisi e partecipâ sore nuie ai cors di lenghe dal Centri nazionâl pal aprendiment dal galês. Si trate di cors di nivel diferent adats par dutis lis necessitâts, di cui che nol à nissune cognossince de lenghe a cui che invezit al à dome bisugne di perfezionâ lis sôs competencis. Par dongje si metarà a disposizion ancje un gnûf imprest digjitâl par miorâ la cognossince de lenghe framieç dai fantats tra i 16 e i 18 agns. Lis dôs iniziativis a son pensadis par incressi lis oportunitâts par imparâ il galês in maniere che simpri plui personis a puedin doprâ la lenghe te lôr vite cuotidiane. Par rispuindi ae dibisugne di plui educadôrs cuntune buine competence dal galês, si à previodût ancje l’acès gratuit di ducj i insegnants ai cors di lenghe.

Font: Nation Cymru, 10/02/22

Gales: in cressi lis risorsis par S4C

Il guvier britanic al à fat savê che chest Avrîl, cu la partence dal gnûf an finanziari, al jentrarà in vore il gnûf acuardi sul finanziament dal sisteme radiotelevisîf public che, tra lis altris, al previôt il bloc par doi agns dal cjanul paiât dai citadins. La television publiche in lenghe galese S4C che fin cumò e vigneve finanziade cun 74 milions e mieç di sterlinis rigjavadis dal cjanul e cuntun contribût diret di 6,8 milions dal ministeri pe culture, pai media e pal sport e ricevarà altris 7 milions e mieç rigjavâts des jentradis tiradis sù cul cjanul. L’acuardi, che al à une durade di cinc agns, al puartarà duncje ae television publiche galese cuasi 89 milions di euros par an. Cheste incressite des risorsis e à cjatât un bon acet de direzion de compagnie televisive ma l’acuardi nol sclarìs cuâl che al sarà il so avignî. In Gales e je simpri plui fuarte la domande par che il guvier di Londre al trasferissi a chel galês lis competencis e lis risorsis par gjestî il sisteme radiotelevisîf nazionâl.

Font: Nation Cymru, 17/01/22; Wales On Line, 18/01/22

Gales: campagne par rindi la lenghe proprie acessibile a ducj

La organizazion pai dirits linguistics Cymdeithas yr Iath e à inviât une campagne par sburtâ il guvier galês a impegnâsi par che la lenghe proprie e deventi un mieç di comunicazion cuotidian acessibil par dute la popolazion. L’esecutîf al à chê di rivâ a di un milion di personis in stât di fevelâ par galês dentri dal 2050 ma – e dîs la associazion – in dì di vuê a son bariduris sociâls, economichis e gjeografichis che a impedissin a cetancj citadins di vê acès ae lenghe. Par chest a coventin politichis ativis centradis sul ûs cuotidian dal galês intes comunitâts, tai puescj di vore e tai servizis publics, in maniere di superâ i limits che a pidimentin a une part de popolazion di imparâ e di doprâ la lenghe ma ancje par superâ il prejudizi che al piture il galês come alc di no inclusîf. La Cymdeithas e invide ducj i citadins a sostignî cheste gnove campagne e a sburtâ il guvier galês a lâ ta cheste direzion.

Font: Nation Cymru, 03/01/22

Gales: cu la pandemie câl te abilitât dai fruts di doprâ il galês

Cuasi dutis lis scuelis là che si dopre il galês tant che lenghe di insegnament a àn segnalât intal ultin an une diminuzion intes abilitâts linguistichis dai fruts. Un tant al è leât massime al fat che tancj fruts, tai moments plui dûrs de emergjence sanitarie, no àn vût la pussibilitât di praticâ la lenghe. Il probleme al à colpît in primis i students che lis lôr fameis a fevelin pôc o nuie par galês, ma ancje chei che a rivin di cundizions sociâls plui dificilis che no vevin imprescj digjitâi adats par seguî lis lezions di cjase (didatiche a distance) o no vevin familiârs in stât di judâju cui compits. Cheste situazion, compagnade de mancjance di ocasions di socializazion, e à fat in maniere che, une volte tornâts a scuele in presince, tancj fruts si vedin mostrâts in dificoltât cul ûs orâl dal galês.

Font: Nation Cymru, 01/12/21

Gales: lenghe e crisi abitative tal pat tra guvier e Plaid Cymru

Il guvier galês vuidât dai Laburiscj al à sotscrit un acuardi trienâl cui nazionalitaris dal Plaid Cymru che al cjape dentri 46 areis di intervent. No si trate di un pat di coalizion ma di un plan di lavôr par rivâ a obietîfs condividûts che al lasse libars i firmataris di movisi in autonomie su chei altris temis. I contignûts dal acuardi a son stâts presentâts ai 20 di Novembar dal prin ministri galês, Mark Drakeford, e dal leader dal Plaid Cymru, Adam Price. Tra i ponts dal plan o cjatìn un intervent radicâl e imediât par frontâ la crisi de secondis cjasis e dai presits dai alozaments, diviersis azions pe transizion ecologjiche, l’inviament di un sisteme sociosanitari gratuit, une riforme de Assemblee nazionâl galese, l’insegnament curicolâr de storie dal Gales, la incressite dai spazis scolastics di e par galês, la difese de microtoponomastiche in lenghe galese.

Gales: in cressi la rêt dai centris a imersion linguistiche

Il guvier galês al à fat savê che si slargjarà la rêt dai centris a imersion in lenghe galese. Si trate di struturis educativis indreçadis massime ai arlêfs des primariis che no àn familiaritât cul galês e che, par mieç di chescj centris, a puedin cjapâ sù chês competencis che i permetaran po di frecuentâ lis scuelis bilengâls cence restâ indaûr. In gracie di une dotazion di 2 milions e 200 mil sterlinis si previôt la creazion di vot centris gnûfs in areis là che fin cumò no ‘nd jere e di infuartî altris struturis za operativis.

Font: Nation Cymru, 22/11/21

Gales: si invistìs su lis scuelis a imersion, il câs di Caerffili

L’obietîf di incressi il numar des personis buinis di fevelâ par galês al è condividût di diviersis istituzions e, tra chestis, o cjatìn ancje l’esecutîf provinciâl di Caerffili / Caerphilly, une contee dal Gales sudorientâl cun sù par jù 180 mil abitants là che dome une persone su cuatri e fevele la lenghe proprie. La aministrazion provinciâl e à decidût in particolâr di pontâ su la scuele cul aumentâ i istitûts cul sisteme a imersion par galês. Inte suaze dal plan strategjic pe educazion imbastît dal guvier galês, l’esecutîf provinciâl al à programât invistiments par 6,4 milions di sterlinis in doi agns, come a dî cuasi 7 milions e mieç di euros. Dopo dal milion e 800 mil sterlinis za spindûts chest an par completâ la Ysgol Y Castell, chest an che al ven a varessin di rivâ insom i lavôrs par altris trê scuelis, intant che tal Fevrâr dal 2023 e sarà disponibile une cuinte scuele a imersion in maniere di rispuindi al cressi de domande e di stiçâ ancje altris fameis a sielzi chest percors pai lôr fîs.

Font: Nation Cymru, 10/11/21

Gales: 20% dai galês discoragjât dal doprâ il galês

Un galês su cinc al declare di jessi stât discoragjât intune cualchi maniere dal doprâ la lenghe proprie cun altris personis in stât di fevelâle. Il dât si lu cjate tal ultin rapuart publicât dal comissari pe lenghe galese, Aled Roberts, e al ven fûr di une inchieste puartade indenant intal ultin an. Cheste situazion – si lei te informative – e je in cressi dal 5% rispiet al an prime. Roberts al spieghe che la emergjence sanitarie e à contribuît a palesâ la diference tra lis organizazions publichis inte capacitât di impleâ il galês cui citadins, metint in mostre i ponts di crisi che za a jerin. In ogni câs, la ricercje cjapade dentri tal rapuart e mostre ancje che l’82% dai citadins che a doprin la lenghe proprie al è par solit in stât di relazionâsi cu lis organizazion publichis par galês: une pussibilitât che, tal ultin an, e je in calâ pal 20% di lôr, in cressi pal 35% e compagne par chel altri 45%.

Font: Nation Cymru, 01/10/21

Gales: progjet par rilançâ il galês a Newport

In dì di vuê inte aree urbane di Casnewydd / Newport, dome il 25% de popolazion al è in stât di doprâ cuntune buine paronance il galês. Pe aministrazion comunâl citadine però, ancje a nivel locâl, si à di lavorâ par slargjâ l’ûs de lenghe proprie e contribuî al obietîf gjenerâl di rivâ a un milion di fevelants dentri dal 2050. Par chest e à imbastît un plan di politiche linguistiche decenâl che si propon di incressi la cuantitât e la cualitât intal ûs dal galês. Lis liniis di azion principâls a son trê e a tocjin la educazion, la visibilitât publiche de lenghe e il so pês dentri dal mont dal lavôr. Il stampon dal plan al è cumò al centri di une consultazion publiche inviade ai 27 di Setembar e che si sierarà ai 22 di Novembar. La aministrazion locâl e à intant za tacât a movisi sul plan de istruzion cuntune incressite dai puescj cul galês come lenghe di insegnament. Juste chest mês si à screât une altre scuele che e puarte a cuatri il totâl des primariis a imersion. La prime – e par cumò uniche – secondarie e je stade invezit inviade tal 2017.

Font: Nation Cymru, 27/09/21

Gales: sburt al galês de bande dal grup HSBC

Une des bataiis in vore za di cualchi an in Gales e je chê di vê garantît il rispiet dai dirits linguistics ancje de bande dai grups privâts che a ufrissin servizis di interès public. Ta cheste suaze a jentrin ancje i istitûts di credit che, in plui di cualchi câs, a son stâts al centri di scuintris dûrs cu lis organizazions pe lenghe. Cumò il colòs bancjari HSBC al à fat savê che al ponte a impleâ il galês come prime lenghe in dute la segnaletiche e la cartelonistiche interne e tai materiâi informatîfs a disposizion intes filiâls che al à in Gales. Cheste gnove linie aziendâl e sarà compagnade di percors di formazion a disposizion dai lavoradôrs par che a imparin la lenghe o a miorin il lôr nivel di cognossince de stesse. La direzion dal grup bancjari e à fat savê che a son za une cincuantine i dipendents che a àn profitât di cheste pussibilitât. Propit su lis competencis linguistichis dal personâl si ponte par garantî ai clients che a vuelin doprâ il galês la pussibilitât di fâlu.

Font: Nation Cymru, 22/09/21

Gales: polemichis su lenghe e discriminazion etniche

Al à jevât no pocjis polemichis il rapuart che The Arts Council e il Museu Nazionâl dal Gales a àn comissionât ae Welsh Anti-Racist Union e che tes sôs conclusions al invide i doi ents publics a slizerî il pês de lenghe galese tes sôs politichis pal personâl e di meti dongje, tai puescj là che la competence te lenghe proprie e je sante scugne, une persone che no cognòs il galês cuntune che lu parone. Un tant par no favorî politichis che a podaressin escludi lis personis di divignince extraeuropeane. La gnove e je stade ricjapade di une part de stampe britaniche che e je rivade al pont di piturâ la lenghe galese di “raziste” e contrarie aes minorancis etnichis. Sul teme e je intervignude la organizazion pai dirits linguistics Cymdeithas yr Iaith che e à contestât cun fuarce lis conclusions dal rapuart. Il probleme nol è il galês che, come dutis lis lenghis, nol è escludent o ereditari ma al pues jessi imparât di ducj – a disin – ma dal sisteme istituzionâl che al met bariduris e nol garantìs a ducj la pussibilitât di imparâ la lenghe. Pe Cymdeithas il guvier galês al à di ufrî un sisteme educatîf gratuit e viert a ducj che al permeti di imparâ il galês, di garantî politichis dal lavôr che a metin a disposizion dai lavoradôrs che no lu san percors di formazion linguistiche e di imbastî azions specifichis par favorî l’aprendiment dal galês ancje tra i membris des minorancis etnichis. Su la stesse linie ancje il Race Council Cymru, un ent nassût par combati il razisim dentri des istituzions e de societât.

Font: Nation Cymru, 20-24/08/21

Gales: continuitât de lenghe menaçade dal marcjât imobiliâr

La incressite dal presit des cjasis in Gales e je la plui alte tal Ream Unît, ven a dî il 2,3% dome tal ultin mês e il 10,9% intun an. Cheste situazion e impedìs ai zovins dal puest di vê acès al marcjât imobiliâr e ju sburte a emigrâ. Si trate di une menace une vore serie ae tignude des comunitâts di lenghe galese che dispès si cjatin propit intes areis plui interessadis dal marcjât turistic e des secondis cjasis. La associazion pe lenghe galese Cymdeithas yr Iaith e je cussì impegnade tune campagne par denunciâ cheste situazion che e à puartât a diviersis azions simbolichis tant che la scjalade des monts plui altis dal Gales là che a son stâts metûts fûr strissons cu la scrite «Nid yw Cymru ar Werth» (il Gales nol è in vendite). La organizazion e domande al guvier di procedi cuntune leç di setôr che e dedi aes comunitâts locâls il control sul marcjât imobiliâr e su la planificazion urbanistiche, cu la pussibilitât ancje di meti un tet aes secondis cjasis e di controlâ i presits di vendite e di afit. Ancje il partît nazionalitari Plaid Cymru al domande al esecutîf galês di meti di bande i progjets pilote e di procedi cuntune azion radicâl e urgjente che e tuteli lis comunitâts locâls.

Font: Nation Cymru, 16/08/21