La gnove
comissarie pe lenghe galese, Meri Huws, e à inviât une consultazion
par tirâ sù parês e propuestis sui nivei di tutele dai dirits
linguistics che i ents publics e ciertis aziendis di publiche
utilitât a saran clamâts a garantî. La leç di politiche
linguistiche che e à metût sù la figure dal comissari e previôt
ancje une incressite dal nivel dai dirits linguistics che chescj
sogjets a àn di ufrî ai citadins. Si fevele di aministrazions
publichis, ospedâi, tribunâi, ma ancje di aziendis des
telecomunicazions, compagniis di servizis, impresis di traspuart
public e aziendis pe edilizie residenziâl.
Tra lis realtâts
clamadis a garantî nivei plui alts di tutele dai dirits linguistics
a son ancje lis organizazions dal volontariât che a cjapin plui di
400 mil sterlinis di contribûts publics. Ducj chescj sogjets a varan
di proviodi a garantî dai servizis che a sedin ad in plen bilengâi,
in câs contrari si cjataran obleâts a paiâ multis. Tra i efiets di
cheste politiche si varà ancje l’aument di assunzions di personâl
in stât di doprâ ben il galês. No si trate di incressi la
burocrazie – e à spiegât la comissarie pe lenghe galese – ma di
ufrî servizis di cualitât plui alte. La consultazion e rivarà
insom ai 11 di Avost, dificil però che i gnûfs nivei di tutele a
jentrin in vore prime dal 2013. Un prin
scuintri su cheste gnove linie di azion si lu à vût inte sanitât,
là che i rapresentants de Associazion Mediche Britaniche a àn
lamentât i coscj de operazion e il risi che la domande di competence
linguistiche e limiti il reclutament dal personâl. No le pensin
cussì la Societât pe Lenghe Galese (Cymdeithas yr Iaith Gymraeg) e
la Union des Glesiis Indipendentis dal Gales che a disin che un
servizi sanitari dât intune lenghe divierse di chê dal pazient nol
è dome un esempli di servizi fat mâl, ma ancje une violazion dai
dirits dal om.
Font:
BBC, 16-17/05/12
Nessun commento:
Posta un commento