Moldove: rus ricognossût come lenghe semiuficiâl

Il Parlament de Moldove al à fate buine in seconde leture une gnove leç su lis lenghis che e ricognòs al rus il status di lenghe pe comunicazion interetniche. Il proviodiment al è passât cul vôt a pro di 55 dai 101 deputâts; lis fuarcis di oposizion i àn fat cuintri e a àn boicotât i lavôrs parlamentârs. La leç e garantìs ai citadins la pussibilitât di doprâ il rus in dut il teritori de Republiche, di vê une educazion ancje ta cheste lenghe e di ricevi rispuestis par rus, sei in forme scrite che orâl, dai uficis e des istituzions publichis ancje se il moldâf al reste la uniche lenghe uficiâl inte documentazion des istituzions statâls. La normative gnove e va a cjapâ il puest di chê judicade decjadude cuntune sentence de cort costituzionâl intal 2018. Si stime che almancul un tierç de popolazion de Republiche ex sovietiche al dopri il rus inte vite di ogni dì o cuntune cierte frecuence.

Font: TASS, 16/12/20

Moldove: istruzion par rumen, scuintri cu la Transnistrie

Lis autoritâts de Moldove, ancje su la fonde di une sentence de cort europeane pai dirits umans, a acusin chês de Transnistrie di pidimentâ l’acès dai students aes scuelis in lenghe rumene. La cussì clamade Republiche moldave dal Dniester, regjon a maiorance russe che e à otignût une indipendence di fat intal 1992 dopo cuatri mês di conflit, e à sierât in maniere progressive la plui part des scuelis di lenghe rumene e si calcole che dome tai ultins sîs agns i iscrits di chescj istitûts a sedin calâts dal 35% par vie des politichis metudis in at des autoritâts di Tiraspol. La prime ministre vicjarie de Moldove, Cristina Lesnic, dongje di criticâ chestis politichis e à invidât il guvier de Transnistrie a autorizâ i students di chest teritori a frecuentâ lis scuelis moldavis di lenghe rumene su la fonde di une tessare di studi che e eviti i berdeis burocratics che in dì di vuê a discoragjin lis fameis di lenghe rumene che a vivin par di là dal Dniester a cjapâ cheste strade.

Font: Balkan Insight, 25/10/18

Moldove: a cressin lis tensions tra filorumens e filorùs

La situazion in Moldove e je simpri plui tirade, cul cressi des tensions tra la part de popolazion che e domande la unificazion de Republiche nassude de implosion de Union Sovietiche cu la Romanie e chê che invezit no vûl la anession e e cjale cun plui simpatie ae Federazion Russe. Il prin di Setembar miâr di personis si son dadis adun te capitâl Chisinau par domandâ la unificazion, intant che i partidants de indipendence a àn comunicât dome sul ultin la rinuncie a manifestâ tal stes puest. Juste une setemane prime, di fat, lis manifestazions des dôs fazions si vevin cjatadis inte stesse place e dome l’intervent de polizie al veve evitât che si rivàs al scuintri fisic tra i partidants dai doi grups. Il procès di unificazion cu la Romanie, se al ves di concretizâsi, al oblearès ancje la Union Europeane a confrontâsi cu la situazion de Transnistrie, regjon a maiorance russe che, si ben no ricognossude sul plan internazionâl, si guvierne di bessole come se e fos un stât indipendent. Juste ai 2 di Setembar lis autoritâts di chest teritori a àn celebrât i 28 agns de proclamazion de indipendence. La cussì clamade Republiche moldave dal Dniester, nassude tal 1990, e veve otignût la sô indipendence di fat intal 1992 dopo cuatri mês di conflit in gracie dal intervent massîf dal esercit rus. Inmò in dì di vuê la Transnistrie i da acet a 1.500 soldâts rus che a vegnin calcolâts di Mosche tant che fuarce di pâs.

Font: Balkan Insight, 02-03/09/18

Moldova: scuintri sui programs radiotelevisîfs rus

Ai 7 di Dicembar il Parlament moldâf al à fat bon un codiç su lis emissions radiotelevisivis che al previôt che no si puedin mandâ in onde contignûts che a rivin di stâts che no àn ratificât la convenzion europeane su la television transfrontaliere. In buine sostance la norme si propon di eliminâ chê che il Partît Liberâl Democratic, cumò al guvier, al definìs “propagande russe”. In plui di minorancis significativis che a àn il rus come prime lenghe, la plui part de popolazion de Moldova e cognòs ancje il rus e duncje dutis lis emitentis principâls a trasmetin cetancj programs ta cheste lenghe, programs che pe plui part a rivin de Federazion Russe o che si poin su materiâi e fonts di chel paîs. Diviers organisims di control a segnalin cemût che cheste situazion e fasi passâ cence mediazion la linie dal Cremlin su cetancj temis sensibii. Il president de Moldova, il filorus Igor Dodon, al à fat savê daurman che nol firmarà la leç. No sarès però la prime volte che il so “no” al ven superât di un intervent de cort costituzionâl che lu suspint dal mandât il timp che al covente par ratificâ il proviodiment. Di là dai siei contignûts politics, la gnove leç e va però ancje a limitâ l’acès de popolazion di lenghe russe a programs radiotelevisîfs te lôr lenghe. Ancje par chest, il guvier de regjon autonome de Gagauzie al à dite che nol metarà in vore la gnove norme e nol imponarà nissune limitazion ae programazion par rus.

Font: Balkan Insight, 08/12/17

Transnistrie: domandade la anession ae Russie

I ultins acjadiments capitâts in Ucraine e massime la anession de Crimee de bande de Federazion Russe a àn puartât il consei suprem de Transnistrie a domandâ in maniere uficiâl aes autoritâts di Mosche di jentrâ inte Federazion. Regjon a maiorance russe de Moldova, la Transnistrie e veve proclamât la sô indipendence ancjemò intal 1990 e, cundut che a nivel internazionâl no ven ricognossude di nissun, di in chê volte si guvierne di bessole cence che il guvier moldâf al rivi a esercitâ la sô autoritât. Par cumò il guvier rus nol à dât ancjemò une rispueste uficiâl, ma la situazion e preocupe une vore il guvier moldâf. Il prin ministri vicjari Eugen Carpov al difint la integritât de Moldova e, in rispueste aes acusis di Mosche, al sigure che no son veris lis vôs di un bloc economic de Transnistrie. Su la cuistion al è intervignût ancje il president rumen Traian Basescu domandant la poie de comunitât internazionâl par evitâ che la Transnistrie e ledi daûr de strade za cjapade de Crimee.

Font: Balkan Insight, 17/04/14

Moldova: si ricognòs come rumene la lenghe dal stât

Tra lis republichis nassudis de implosion de Union Sovietiche, la uniche là che la maiorance de popolazion e fevele une lenghe neolatine e je la Moldova. In dì di vuê a fevelâle al è il 64% de popolazion, intant che il 13% al à di prime lenghe il rus o l’ucrain. Inte costituzion dal 1994 e ven clamade moldâf ancje se pe maiorance dai linguiscj e je dome une varietât rumene. Ai 5 di Dicembar la Cort costituzionâl moldave e à decidût di saltâ fûr di cheste ambiguitât declarant che il non di doprâ pe lenghe dal stât al è rumen. La cuistion e va plui innà di une semplice definizion, sei dentri che fûr de republiche che vuê e je guviernade di une coalizion clopadice di partîts filoeuropeans, intant che la oposizion e varès miôr infuartî i rapuarts cu la Russie. Inte vicine Romanie, la gnove e je stade cjapade cun sodisfazion sei dal president che dal prin ministri a àn let la sentence come un pas indenant par rivâ a di un avignî comun dai doi stâts dentri de UE.

Font: Balkan Insight, 06/12/13

Transnistrie: e cres la tension cu la Moldova

E torne a alçâsi la tension tra Moldova e Transnistrie, regjon a maiorance russe che si è autoproclamade indipendente ancjemò intal 1990. A causâ il gnûf scuintri al è un decret sotscrit ai 10 di Jugn dal guvier de Transnistrie che al marche i confins dal so teritori e al cjape dentri ancje areis che a son sot dal control moldâf. In rispueste a chest at, il guvier de Moldova al à fat savê di jessi pront a difindi il so teritori des provocazions des “autoritâts separatistis”. Par cirî di evitâ che des peraulis si passi ai fats, su la cuistion a son intervignûts sei la responsabile pe politiche foreste de UE, Catherine Ashton, sei il ministri pai forescj rumen Titus Corlatean.

Font: Balkan Insight, 24/06/13

Ucraine: si slargje il ricognossiment des lenghis minoritariis

Ai 10 di Avost di chest an in Ucraine e je jentrade in vore la leç che e garantìs un statût di couficialitât aes diviersis lenghis minoritariis dal paîs. Il proviodiment al permet di doprâ chestis lenghis ancje inte aministrazion publiche, ma dome là che a son feveladis tant che prime lenghe di almancul il 10% de popolazion. A gjoldi di cheste leç e je stade massime la lenghe russe: cun di fat in dì di vuê a son za 6 lis provinciis e 9 lis citâts principâls che si son zovadis dal proviodiment par rindi couficiâl il rus. Dut câs il proviodiment al à judât ancje altris lenghis che, rispiet al rus, si cjatavin a vivi pardabon intune condizion di fuarte minorizazion. Al è il câs dal ongjarês che al è stât za ricognossût inte citât di Beregszász / Berehove in Transcarpazie (Zakarpats’ka / Kárpátalja) e dal moldâf a Tărăsăuţi / Tarasivtsi inte provincie di Çernivtsi / Cernăuţi. Un câs emblematic al è ancje chel dal rumen che al è stât cumò ricognossût a Biserica Alba / Bila Tserkva, intal distret di Rahău / Rakhiv in Transcarpazie, là che daûr dal ultin censiment il 11,6% de popolazion al fevele par rumen.

Font: Interfax.com.ua, 24/09/12

Moldova: prime condane par ofesis razistis cuintri dai rom

Inte republiche di Moldova un tribunâl al à condanât un ex alt funzionari dal guvier, Anatol Plugaru, par vie di declarazions sui rom che a son stadis judicadis di stamp razist. L’om al è stât condanât a scusâsi pes sôs afermazions e a fâlu inte stesse suaze là che lis veve fatis, ven a dî une conference stampe. E je la prime volte che in Moldova si condane cualchidun par ofesis cuintri dai membris di cheste comunitât e si lu oblee a domandâ scuse pes sôs peraulis. Daûr dai dâts uficiâi inte republiche ex sovietiche a vivin 12 mil rom, ma lis stimis fatis dai ativiscj pai dirits umans a fevelin di almancul 140 mil personis: cheste diference e je leade al fat che la plui part dai rom no declarin la lôr partignince nazionâl par pôre di jessi discriminâts.

Font: RFE/RL, 13/01/12

Moldova: il gnûf president a pro de union cu la Romanie

In Moldova, daspò de sconfite dai Comuniscj intes ultimis elezions politichis, chei altris partîts (ven a dî Liberâi Democratics, Liberâi, il Partît Democratic, e la Aleance Moldova Nestre) a àn sielzût il liberâl Mihai Ghimpu tant che gnûf president dal Parlament. Ghimpu si à declarât a pro de unificazion tra il so paîs e la Romanie, ancje se al à specificât daurman che si trate dome di une opinion personâl. La vicende, di fat, e je une vore delicade ancje par vie che a restin in pîts cuestions tant che chê dal avignî de regjon autonome de Gagausie e soredut chê de Transnistrie, regjon a maiorance russe che bielzà di agns si è autoproclamade indipendente. Propit il president di chest teritori, Igor Smirnov, al à confermât che no je nissune intenzion di tornâ a meti adun la Transnistrie cu la Moldova.

Font: Món Divers, 09/09/09

Moldova: i comuniscj a pierdin la maiorance in Parlament

Lis elezions anticipadis che si son davueltis ai 29 di Lui in Moldova i àn gjavât la maiorance al Partît Comunist che, intai ultins agns, al veve guviernât la republiche ex sovietiche. Cun di fat, i Comuniscj a àn otignût il 44,7% des preferencis e 48 dai 101 puescj in Parlament. I Liberâi Democratics, cul 16,4% dai vôts, a àn cjapât 17 parlamentârs; i Liberâi, cul 14,4%, a ‘nd àn otignûts 15; il Partît Democratic, cul 12,6%, a ‘nd à vûts 13; e la Aleance Moldova Nestre, cul 7,4% des preferencis, e à elet 8 deputâts. I Comuniscj a àn fat savê di jessi pronts a frontâ la legjislature dai bancs de oposizion e, a chest pont, la uniche alternative di guvier pussibile e je formade di une coalizion tra ducj chei altris partîts. Nancje cheste coalizion, dut câs, e permetarà di elei il prossim president de Republiche, dal moment che par fâlu e covente une maiorance di 61 vôts. Par superâ chest probleme, duncje, si podarès fintremai viodi un pat jenfri i Comuniscj e il Partît Democratic, vuidât dal ex comunist Marian Lupu. La sconfite dal Partît Comunist, dut câs, e podarès tornâ a impiâ la tension sei in Transnistrie, regjon a maiorance russe che si è autoproclamade indipendente, sei inte regjon autonome de Gagausie. Diviers rapresentants dai front liberâl, di fat, a àn dite di volê risolvi une volte par dutis la cuestion de Transnistrie, intant che i gagaus a son stâts definîts “une ulçare” intal cuarp dal stât.
Font: RIA Novosti, 30-31/07/09; Nationalia, 30/07/09; Món Divers, 30/07/09

Transnistrie: si trate par rivâ a di un acuardi sul avignî dal paîs

Ai 18 di Març, pôc lontan di Mosche, si son dâts dongje i presidents de Federazion russe, Dimitri Medvedev, de Moldove, Vladimir Voronin, e de Transnistrie, Igor Smirnov. Al centri dal incuintri al jere propit l’avignî di chest ultin paîs che, cul sfantâsi de Union Sovietiche, nol veve acetât di jessi part de Moldove e, daspò di un conflit che al veve fat un miâr di muarts, al veve proclamât la sô indipendence. In dì di vuê, la Transnistrie e je, intai fats, un teritori indipendent, ancje se nol gjolt dal ricognossiment uficiâl di nissun stât. A garantî chest status e je la presince di une fuarce di interposizion russe. Cumò, daspò de azion militâr metude in cjamp par Abkhazie e Ossezie meridionâl, la aministrazion russe e vûl dimostrâ di jessi in stât di risolvi i conflits internazionâi ancje par vie diplomatiche. L’incuintri tra i trê presidents al à produsût dome un document là che dutis lis parts si impegnin a lâ indenant cui sfuarçs par cjatâ un acuardi sul destin de Transnistrie. Dut câs, alc si à mot, viodût che si trate dal secont incuintri diret in vot agns jenfri Voronin e Smirnov. Lis tratativis a varessin cumò di lâ indenant ancje cu la partecipazion di rapresentants de Ucraine e de OSCE e cu la presince, tant che osservatôrs, di delegâts de UE e dai Stâts Unîts. Se si cjatarà un acuardi tra lis parts, il cuarp militâr rus che si cjate inte regjon al podarès lassâ il puest a di une fuarce internazionâl vuidade de OSCE. Il president de Moldove, Voronin, nol è tornât a cjase mans scjassant. Il president rus i à prometût 50 mil toneladis di nafte di dâ fûr tant che jutori umanitari ai contadins dal so paîs, un dai plui puars de Europe.

Font: RFE, 18/03/09; Món Divers, 19/03/09

Pontade 15 08 (15/07/08) - 4

Moldova: gnove ufierte par risolvi il conflit cu la comunitât russe

Daspò 17 agns di conflit par risolvi il status de Transnistrie, cumò il guvier de Moldova al à fat indenant une propueste che e rapresente un grues pas indenant in direzion des domandis che a rivin de aree russofone dal paîs. Cun di fat, il ministri moldâf pe riunificazion, Vasile Sova, al à proponût che la Transnistrie e torni a fâ part de Moldova, ma che e puedi conservâ sei il status di Republiche, sei la sô Costituzion e ancje il so Parlament. Cun di plui, tal câs che la Moldova e decidi di dâsi dongje cu la Romanie, la Transnistrie e podarà esercitâ il dirit ae autodeterminazion. O ricuardìn che, daspò de implosion de Union Sovietiche e de nassite de Republiche di Moldova, la part dal paîs a maiorance russe e veve decidût di meti sù une Republiche par so cont, batiade Transnistrie, che però no jere stade ricognossude a nivel internazionâl tant che sogjet indipendent.
Font: Món Divers, 02/07/08