Gales: prin sisteme di gjestion video par galês

Une multinazionâl americane e à disvilupât il prin sisteme di gjestion video par galês. La Panopto e je specializade in software par impresis e istitûts pe educazion superiôr e universitarie. Ancje a front dal cressi de domande di sistemis di gjestion video de bande di istituzions publichis e scolastichis, cul jutori di dôs universitâts locâls, la multinazionâl e à decidût di meti a disposizion i siei prodots ancje par galês. In cheste maniere la Panopto, di une bande, e permet aes istituzions dal Gales di garantî i dirits linguistics e di rispietâ la normative sul galês e, di chê altre, e jentre tun marcjât là che no à concorince, recuperant cence sfuarç i invistiments fats par adatâ i siei sistemis di gjestion video al galês.

Font: Nation Cymru, 04/08/21

Paîs Catalans: dirits linguistics, pas indenant tes Baleârs

Ai 29 di Lui si à presentât il tierç stampon de leç sui dirits dai consumadôrs e dai utents metût adun dal guvier des Baleârs che al cjape dentri une sezion di pueste pai dirits linguistics. Pe organizazion Plataforma per la Llengua il document al à novitâts impuartantis. Par esempli, se il test al deventarà leç, ai utents e ai consumadôrs di lenghe catalane i sarà ricognossût il dirit di no jessi discriminâts cuant che a doprin la lôr lenghe e chel di jessi informâts par catalan su contrats, faturis, scontrins e etichetis. Cundut di chescj pas indenant, la Plataforma e segnale che tal stampon no si specifiche il dirit di ricevi rispueste scrite e orâl inte lenghe doprade e nancje l’oblic di doprâ il catalan intai cartei e te segnaletiche informative pal public.

Font: PFPLL, 30/07/21

Paîs Catalans: seconde edizion di #NormalitzaLaPlatja

La Associazion Civiche Valenziane “Tirant Lo Blanc” e la organizazion Plataforma per la Llengua a promovin pal secont an di file la campagne “Normalitza la platja” che si propon di sensibilizâ sul ûs dal catalan (te sô varietât valenziane) inte segnaletiche e te cartelonistiche che si cjate tes localitâts di mâr dal Paîs Valenzian. La iniziative e domande ai citadins di fotografâ ducj i cartei o i segnâi là che al mancje il catalan o là che no ven rispietade la normative linguistiche, di cjariâ lis fotos sul canâl sociâl di pueste in maniere che po lis dôs realtâts associativis a puedin segnalâ chestis violazions aes aministrazions locâls interessadis e al ufici pai dirits linguistics dal guvier valenzian.

Font: PFPLL, 30/07/21

Galizie: presentade la gnove edizion di FalaRedes

Ai 30 di Lui il segretariât gjenerâl pe politiche linguistiche de Galizie al à presentât la diesime edizion dal program di promozion de lenghe proprie FalaRedes. I siei obietîfs a son di slargjâ lis ativitâts culturâls e di intrateniment par galizian, di promovi une vision positive de lenghe proprie e di poiâ lis ativitâts dai artiscj che le doprin. FalaRedes si davuelzarà a cjaval tra Astât e Autun intai teritoris dai ents locâi che a formin la Rêt di Promozion Linguistiche (RDL). Te edizion 2021 a son 26 i comuns tocjâts dal program e plui di une trentine lis iniziativis che ju cjaparan dentri.

Font: Lingua.gal, 30/07/21

Irlande: campagne di odi cuintri di une scuele gaeliche

Une scuele de infanzie in lenghe irlandese che e varès vût di vierzi in Setembar alì de Braniel Primary School, intune des areis di plui fuarte tradizion unioniste a Béal Feirste / Belfast Est, e à vût di cjatâ un altri sît che i des acet. La decision di spostâle e je stade cjapade dai siei fondadôrs par vie di une campagne di odi inviade su lis rêts sociâls di un grup di estremiscj che si presente come puartevôs de comunitât lealiste locâl e dai gjenitôrs de primarie che e veve di dâi acet ae scuelute. No je la prime volte che scuelis gaelichis o frecuentadis di fruts de comunitât nazionaliste a son al centri di atacs verbâi e ancje fisics de bande dai lealiscj e duncje, ancje se inmaneade di pôcs di lôr, la menace e je stade cjapade sul seri. La scuele de infanzie e nassarà tun altri sît, che pal moment nol è stât ancjemò comunicât, ma simpri a Béal Feirste / Belfast Est. Daûr dal progjet, di fat, a son ancje ativiscj pe lenghe irlandese che a rivin de comunitât unioniste e no intindin fâsi mandâ vie di cheste aree. Dai 16 frutins za iscrits, il 40% al rive di fameis lealistis e il 40% di fameis nazionalistis. La iniziative e cîr di dâ rispueste al cressi dal interès pe lenghe irlandese ancje framieç de comunitât unioniste che, tai agns dal conflit nordirlandês, le calcolave alc di forest e duncje di combati.

Font: Irish Times, 28/07/21

 

Paîs Catalans: inmò invistiments sul cine par catalan

Il guvier de Catalogne al à aumentât lis risorsis pai trê bants che a sburtin la sottitulazion e la dopleadure di prodots audiovisîfs par catalan cu la zonte di pôc mancul di 3 milions di euros. Pal 2021 la dotazion complessive e je cussì cressude a 6 milions e 295 mil euros. Il prin bant al ponte a incressi i films sottitulâts o dopleâts par catalan intai cines, il secont lis seriis televisivis distribuidis su lis plateformis digjitâls e pe vendite, il tierç i titui presentâts intai festivals e tes manifestazions cinematografichis de Catalogne. Daûr di une inchieste davuelte di resint par cont de direzion gjenerâl di politiche linguistiche, il 78% dai citadins al vûl peliculis e seriis televisivis dopleadis par catalan intes plateformis digjitâls, par television e tai cines.

Font: Generalitat de Catalunya, 27/07/21