30/09/08

Pontade 20 08 (30/09/08) - 9

Paîs Basc: metûts fûr leç ancje EAE-ANV e EHAK-PCTV


La sentence

Al è rivât in buine sostance insom, intal stât spagnûl, il procès par meti fûr leç lis associazions e i partîts de çampe indipendentiste basche. Cun di fat, il Tribunâl Suprem spagnûl, che al à cjapât sù la ereditât dai tribunâi speciâi di ete franchiste, al à metût fûr leç ai 16 di Setembar EAE-ANV (Azion Nazionaliste Basche) e, doi dîs dopo, EHAK-PCTV (Partît Comunist des Tieris Baschis). In ducj e doi i câs, i magjistrâts a àn fat bon il teoreme judiziari imbastît dal guvier spagnûl e de publiche acuse che al lee lis dôs formazions politichis ae za ilegalizade Batasuna e lis calcole di struments politics che a operin daûr des indicazions de organizazion armade ETA.


Lis reazions

La decision e à cjatât il bon acet dal PSOE, cumò al guvier intal stât spagnûl, dal PP e des lôr sezions inte CAB e in Navare. Pal guvier de CAB, invezit, cheste sentence e palese l’ûs par fins eletorâi di une leç (la “Ley de Partidos”) che e slontane la fin de violence e di ogni soluzion politiche pal avignî dal Paîs Basc. Il PNV al à fevelât di decision une vore grivie e cence precedents a nivel european. La decision e à cjatât la condane ancje di Eusko Alkartasuna che e à po acusât il guvier di Zapatero (PSOE) di no jessi bon di puartâ indenant une politiche alternative a chê di Aznar (PP). Par Nafarroa Bai si trate di “une gnove negative pe democrazie e pe societât basche”. La contrarietât totâl par une sentence che “e met fûr leç lis ideis e e impedìs che une part de societât basche e puedi jessi rapresentade” e je rivade di Ezker Batua (EB-IU). Par Aralar la decision dal Tribunâl Suprem e je “un atac ae democrazie” e “une aberazion politiche e juridiche che no cjate pareli inte Europe di vuê”. Manifestazions di solidarietât pai doi partîts metûts fûr leç a son rivadis, in plui che dal Paîs Basc, de Galizie, dai Paîs Catalans e di diviers paîs de Europe.


Lis consecuencis

EHAK-PCTV al veve otignût 9 deputâts intes elezions dai 17 di Avrîl dal 2005 pal Parlament de Comunitât Autonome Basche. EAE-ANV, cundut che in diviers lûcs si veve cjatade cun diviersis listis anuladis, e veve otignût vie pes elezions aministrativis dal 2007 e dal 2008 uns 180 mil vôts, 430 conseîrs e la aministrazion di une cuarantine di Comuns bascs. Metûts fûr leç chescj doi partîts, duncje, si lasse cence rapresentance politiche la çampe indipendentiste basche (ezkerra abertzale) e une fete significative di eletorât. Prime di chestis dôs formazions politichis, di fat, a jerin za stadis metudis fûr leç Batasuna (intune cun Herri Batasuna e Euskal Herritarrok), AuB (Autodeterminaziorako Bilguneak), Herritarren Zerrenda, Aukera Guztiak, Abertzale Sozialistak, e cetantis organizazions ancje di stamp zovanîl, culturâl e pai dirits umans.


Cualchi note storiche

A lassâ scaturîts e je massime la decision cjapade cuintri di Azion Nazionaliste Basche, la prime formazion politiche de ezkerra abertzale, fondade intal 1930 e, cundut che e a son logadis inte stesse aree politiche, cuntune storie indipendente di chê di Batasuna. Baste pensâ che EAE-ANV inte lote pe difese de Republiche spagnole, intai agns de clandestinitât e de resistence al franchisim e jere stade flanc a flanc cun chei stes socialiscj che vuê a àn decidût di metile fûr leç. Par difindi il guvier basc e la Republiche spagnole, il partît al veve lassât sul cjamp centenârs di siei militants incuadrâts in trê batalions (Olabarri, Eusko Indarra e ANV3) e in altris reparts (repart pionîrs Askatasuna e batalion Gordexola) cuntun nivel di pierditis tra lis plui altis de vuere. Azion Nazionaliste Basche e veve partecipât cui siei rapresentants al guvier republican vuidât dal socialist Juan Negrín, e ai guviers bascs in patrie e in esili. Chê che fintremai i siei aversaris politics a àn presentât tant che “une sigle storiche plene di dignitât e di eroisim” e je stade, duncje, metude fûr leç pe seconde volte: la prime volte lu veve fat Franco intal 1939, vuê lu fasin i socialiscj (che tal 1939 a jerin ancje lôr te liste dai partîts fûr leç). Cun EAE-ANV fûr leç, al partît i vegnin dineâts ancje i risarciments previodûts pai bens (stimâts in 700 mil euros) e pai locâi (un centenâr) che i jerin stâts confiscâts sot dal franchisim. Ancje i archivis storics dal partît, tornâts a meti adun cun tante fature, a son stâts secuestrâts di gnûf de polizie spagnole.


Intal stât francês

Se chest al è il cuadri intal Paîs Basc meridionâl, chel sot aministrazion spagnole, la situazion e riscje di lâ in piês ancje par di là dal confin cul stât francês, intal Paîs Basc setentrionâl. Cun di fat, dilunc vie de setemane stade la polizie francese e à arestât 14 membris di Batasuna – che in France e je ancjemò une formazion politiche legâl – e percuisît par trê dîs la sede dal partît a Baiona / Bayonne. Ducj i arestâts a son stâts liberâts daspò di cualchi zornade cence nissune acuse e ai 27 di Setembar i membris dal partît a son tornâts a jentrâ te lôr sede compagnâts di une manifestazion là che a àn partecipât almancul 2 mil personis, cundut dai blocs de polizie che a àn impedît a cetancj di lôr di partecipâ ae iniziative. E je stade la plui gruesse manifestazion che si à vude a Baiona intai ultins agns. Cheste operazion poliziâl – a àn dite i rapresentants di Batasuna – e mostre che ancje in France si è daûr a cjapâ la strade de ilegalizazion de çampe indipendentiste basche.
Font: Gara, 28-18/09/08; Món Divers, 24 e 18/09/08; Galiza Hoxe, 27 e 18/09/08; Nationalia, 16/09/08


Pontade 20 08 (30/09/08) - 8

Gales: pressions su Brown par incressi l’autoguvier

Il Plaid Cymru, partît nazionalitari che al guvierne il Gales in coalizion cui Laburiscj, al sburte sul prin ministri britanic Gordon Brown par che al dedi la sô poie a di une incressite dal autoguvier galês. Tra lis condizions pe aleance di guvier tra Laburiscj e Plaid Cymru e je ancje chê di davuelzi, dentri de fin de legjislature, un referendum par slargjâ l’autoguvier dal Gales. Brown al è stât une vore clâr tal poiâ la devoluzion plene des competencis ae Assemblee de Irlande dal Nord, ma cumò – a disin i rapresentants dal Plaid Cymru – ancje i galês a domandin un Parlament vêr che al puedi decidi pe lôr nazion e, duncje, il prin ministri britanic al à di decidi se dâ ai galês lis competencis che a domandin o lâ daûr des pressions dai rapresentants plui reazionaris dal so partît. Daûr di une ricercje fate che al è pôc de Universitât di Aberystwyth al ven fûr che il 10% dai galês al domande la indipendence de lôr nazion, il 39% al vûl che il Gales al vedi un Parlament cun capacitât legjislative e fiscâl plene, e il 31% al è content dal nivel di autoguvier cumò in vore. Duncje, gjavât un 5% di personis che no àn rispuindût, dome al 15% dai intervistâts no i poche il procès di devoluzion inviât in Gales.
Font: Plaid Cymru, 23/09/08; News Wales, 22/09/08; Món Divers, 24/09/08


Pontade 20 08 (30/09/08) - 7

Paîs Basc: la rispueste dal guvier de CAB ae consultazion proibide

Daspò dal no dal Tribunâl Costituzionâl spagnûl ae consultazion popolâr che il guvier de Comunitât Autonome Basche al voleve davuelzi par sapontâ un procès di autodecision sul avignî dal popul basc, l’esecutîf de CAB al à lassât in man ai partîts che lu poin la rispueste di dâ a cheste proibizion. Plui che une denuncie denant dal Tribunâl european dai dirits umans, la strade proponude dal PNV – la fuarce principâl de coalizion di guvier – e je chê di internazionalizâ la cuestion lavorant a nivel di Consei de Europe e di chei altris organisims comunitaris. Par dâi plui fuarce a chestis iniziativis si à inviât ancje une racuelte di firmis che si pues cjatâle su sît www.kontsulta.eu . Dut câs, la propueste, al ribàs rispiet ae denuncie denant dal Tribunâl european dai dirits umans anticipade dal stes president de CAB Juan José Ibarretxe, no i à plasude masse ai aleâts di guvier dal PNV, massime a Eusko Alkartasuna e a Aralar. I doi partîts, di fat, a àn fat savê che no intindin rinunciâ al ricors denant dal Tribunâl european.
Font: Gara, 20/09/08


Pontade 20 08 (30/09/08) - 6

Scozie: tacadis lis emissions dal gnûf canâl de BBC par gaelic

Al à tacât la programazion ai 19 di Setembar il gnûf canâl televisîf BBC Alba, dut par gaelic scozês: la lenghe celtiche che in Scozie e ven fevelade di uns 70 mil personis. Lis trasmissions di chest canâl si podarà viodilis in dut il teritori dal Ream Unît par mieç de rêt satelitâr Sky e Freesat. I programs, che a previodin ancje un notiziari informatîf cuotidian, a saran trasmetûts ogni dì tra lis cinc sot sere e miezegnot. I studis di BBC Alba si cjatin sei te aree insulâr gaelofone (isulis di Sgitheanach / Skye, Leòdhas / Lewis, e Hearadh / Harris) sei tes citâts di Inverness e Glasgow. Il canâl al ven finanziât in part dal guvier scozês e in part de BBC. Lis trasmissions a son indreçadis prin di dut ai utents gaelics, ma o sperìn che a vedin atrat ancje sul rest dal public – e à dite la diretore di BBC Alba, Margaret Mary Murray – cun di fat i programs a son sottitulâts par inglês. La ministre scozese pe culture, Linda Fabiani, e à dite che il canâl al varà une funzion centrâl par promovi il gaelic e par rindilu disponibil par dut il public.
Font: BBC, 19/09/08; Món Divers, 19/09/08


Pontade 20 08 (30/09/08) - 5

Bretagne: acuardi par incressi la visibilitât de lenghe in politiche

I Verts a son il prin partît a sotscrivi il pat “Ya d’ar brezhoneg” proponût dal Ufici pe lenghe bretone (Ofis ar brezhoneg) par sburtâ l’ûs de lenghe proprie de Bretagne intes aministrazions publichis e intal rest de societât. L’acuardi al è stât firmât ai 19 di Setembar cu la partecipazion dai rapresentants bretons e francês dal partît. Cun chest pat, i Verts si impegnin lavorâ par valorizâ il breton inte lôr struture interne e inte comunicazion esterne. In Bretagne, duncje, il partît al sviluparà in forme bilengâl dut il so materiâl (de cjarte intestade al sît internet, de comunicazion interne e esterne aes tabelis dai lôr uficis), al sburtarà i siei dipendents a partecipâ a cors par imparâ la lenghe bretone o par miorâ la lôr capacitât di doprâle, e al lavorarà par poiâ lis iniziativis a pro de lenghe intes aministrazions locâls là che al è presint cui siei rapresentants.
Font: Ofis ar brezhoneg, 19/09/08


Pontade 20 08 (30/09/08) - 4

Bretagne: manifestazion pai dirits linguistics e pe riunificazion

Si è davuelte ai 20 di Setembar a Naoned / Nantes, cuntune grande partecipazion di public, la Festimanif, un apontament a mieç jenfri fieste e manifestazion rivendicative, inmaneât dal Consei Culturâl de Bretagne e di altris realtâts associativis bretonis, tant che l’Istitût Culturâl de Bretagne, la organizazion Bretagne Riunide, e la rêt des Diwan: lis scuelis là che si studie par breton. La iniziative e veve chê di dâi visibilitât a trê domandis indreçadis al stât francês, ven a dî: di inviâ la riunificazion aministrative de Bretagne, cumò dividude tra dipartiment de Loire Atlantiche e regjon de Bretagne (ducj e doi a pro de riunificazion); di trasferî dal stât ae regjon lis competencis e lis risorsis pe lenghe e pe culture bretone, intune cu la ratifiche de Cjarte europeane pes lenghis; e di bandonâ il progjet di leç su lis ativitâts amatoriâls che, intai fats, al larès a colpî cun fuarce ancje lis espressions popolârs de culture bretone.
Font: BZH+; Món Divers, 18/09/08; Nationalia, 19/09/08; Eurolang, 25/09/08


Pontade 20 08 (30/09/08) - 3

Gales, Irlande, Scozie: torneu di balon tra lis nazions celtichis

Lis federazions di balon dal Gales, de Republiche de Irlande, de Irlande dal Nord e de Scozie a àn comunicât che, a tacâ dal 2011, si inviarà il Torneu des 4 Associazions. Ae manifestazion sportive, che la prime edizion si davuelzarà a Dublin, a parteciparan lis cuatri formazions di balon che a rivin di chestis nazions celtichis. La competizion si disviluparà su sîs garis che si zuiaran tra il Fevrâr e il Mai di chel an.
Font: Món Divers, 18/09/08


Pontade 20 08 (30/09/08) - 2

ONU: si domande une declarazion universâl pai dirits linguistics

Il president dal CIEMEN e membri dal Ufici european pes lenghis mancul pandudis (EBLUL), Aureli Argemí, al è intervignût ai 17 di Setembar a Gjinevre ae assemblee dal Consei pai dirits umans de ONU par domandâ che si fasi buine une Declarazion universâl sui dirits linguistics, che e ledi a dâsi dongje a chê plui gjenerâl sui dirits umans. Il progjet, che al partìs di lontan, al cjape fuarce chest an ancje par vie che il 2008 al è stât proclamât de ONU tant che “an internazionâl des lenghis”. La diviersitât linguistiche e va difindude intal cjamp dai dirits umans e no ta chel de culture – al à dite Argemí – par vie che lis lenghis no àn dirits, ma a son ben lis personis che lis fevelin a vêju. La propueste e à za cjatât l’interès di diviers stâts, che a àn cjatât tal ambassadôr messican un prin pont di riferiment.
Font: Nationalia, 17/09/08


Pontade 20 08 (30/09/08) - 1

Rom: prime cunvigne europeane sui Rom

Rapresentants dai stâts membris, des diviersis comunitâts rom dal continent e di organizazions pai dirits umans si son dâts adun a Bruxelles, alì de Comission Europeane, pal prin incuintri di chest stamp a nivel comunitari. I obietîfs principâi de riunion a jerin trê, ven a dî: fâ cognossi lis dibisugnis des comunitâts rom; cirî fûr lis stradis miôr par miorâ la lôr condizion; sigurâ des liniis di azion par rivâ a di un tant. I indreçaments saltâts fûr di chest incuintri a saran cjapâts sù de Comission Europeane par deventâ part des politichis comunitariis. Lis diviersis comunitâts rom, si fevele di une popolazion di 10-12 milions di lôr, a van dilunc a patî condizions di discriminazion tai cjamps de cjase, dal lavôr, de salût e de educazion. Lis autoritâts comunitariis, duncje, a sburtin i stâts membris a lavorâ par combati chestis discriminazions, massime ta chei paîs – tant che la Italie – là che la situazion e je plui grivie.
Font: European Commission, 16/09/08; Nationalia, 16/09/08