Pontade 12 08 (20/05/08) - 16

Galizie: 25 mil personis in place pe lenghe

A son stadis 25 mil i galizians che ai 18 di Mai a àn sfidât il brut timp par sfilâ pes stradis di Sant Jacum di Galizie (Santiago de Compostela) a pro de lenghe. La iniziative e je stade inmaneade de organizazion “A Mesa pola Normalización Lingüística”, ma e à cjatât la poie ancje di altris sogjets politics, sindacâi, e culturâi. A Mesa e denuncie l'aument dai atacs cuintri dai dirits linguistics dai galizians e i pidiments che ancjemò a son par no meti in vore lis leçs a pro de lenghe proprie de Galizie. A Mesa e à mostrât grande sodisfazion pe gruesse partecipazion de int ae manifestazion.
Font: Galiza Hoxe, 19/05/08; Nationalia, 19/05/08

Pontade 12 08 (20/05/08) - 15

Rom: la OSCE e denuncie la situazion in Italie

L’Ufici pes istituzions democratichis e i dirits umans de OSCE al è intervignût in maniere uficiâl par manifestâ la sô preocupazion par chel che al è daûr a sucedi intal stât talian cuintri de popolazion rom. La denuncie no si riferìs dome ai atacs cuintri dai cjamps rom, massime te zone di Napoli, ma ancje aes declarazions des autoritâts talianis che invezit di impegnâsi par impedî chescj episodis di violence a butin inmò plui benzine sul fûc. “Nol pues jessi spazi intune societât democratiche par stereotips raziâi e par incitazions al odi e ae violence” al à dite il diretôr dal Ufici, Christian Strohal. Il stât talian al è za stât riclamât plui voltis des autoritâts europeanis pe sô politiche su rom e sinti.
Font: OSCE, 16/05/08

Pontade 12 08 (20/05/08) - 14

France: une leç pes lenghis minoritariis, ma cence modificâ la Costituzion

Se fevelâ de pluralitât linguistiche dal stât francês nol è plui un tabù, al reste inmò dificil passâ des peraulis ai fats. A dimostrâlu al è il dibatiment sul ricognossiment des lenghis regjonâls che si è tignût ai 7 di Mai inte Assemblee francese e la setemane daspò intal Senât dal paîs transalpin. Intant de discussion tancj parlamentârs no jerin in Aule, ma la grande part di chei che a son intervignûts, sei di çampe che di drete, a àn cjapât posizion a pro dal ricognossiment uficiâl des lenghis minoritariis feveladis intal stât francês. Pe prime volte un deputât catalan al à ancje doprât in Aule la sô lenghe proprie, prime che il president de Assemblee lu blocàs invidantlu a fevelâ par francês. Prime dal dibatiment, une trentine di deputâts de UMP a àn ancje fat indenant un document là che si rivendiche la pluralitât linguistiche dal stât, parcè che – a àn scrit tal test – “unitât no significhe uniformitât”. Dut câs, se cheste discussion al somee che e vedi fat colâ un tabù, la rispueste dal Guvier francês e à disfredât ogni entusiasim. Cun di fat, la ministre pe culture, Christine Albanel, e à dite a clâr che il Guvier nol ratificarà la Cjarte europeane pes lenghis regjonâls o minoritariis e no si movarà par modificâ la Costituzion là che e dîs che la lenghe uficiâl dal stât e je chê francese. La rapresentante dal Guvier, dut câs, e à ancje fevelât de pussibilitât di une leç che e previodi formis di tutele pes lenghis minoritariis. Il proviodiment al varès di garantî misuris di tutele, massime inte scuele, ma – e à sclarît la Albanel – intes istituzions publichis si podarà doprâ dome il francês. Il dibatiment in Parlament al à jevât un grant interès framieç dai mieçs di comunicazion des minorancis, ma nol è stât calcolât dai grancj orghins di informazion francês, gjavade la meretorie ecezion di “France Soir”.
Font: Ouiaubreton, 07-15/05/08; Mon Divers, 07 e 15/05/08; Vilaweb, 07/05/08; Journal du Pays Basque, 07/05/08; Nationalia, 08/05/08; Eurolang, 09/05/08; France Soir, 09/05/08

Pontade 12 08 (20/05/08) - 13

Scozie: i Laburiscj a ziruchin sul referendum

Cuant che Wendy Alexander, che e vuide il partît laburist in Scozie, e à declarât di jessi a pro dal referendum su la indipendence e che al sarès stât miôr fâlu dentri di un an e no tal 2010 come proponût dal SNP, sei i Conservadôrs che i Liberâi Democratics – che a son cuintri dal referendum – a son saltâts sù. I prins, in particolâr, a àn fat un grant davoi par che il prin ministri britanic, il laburist Gordon Brown (scozês ancje lui), al metès in rie i dirigjents dal Labour scozês. Lis pressions dai partîts dal front unionist e chês de direzion centrâl dal partît, a àn obleât la Alexander a fâ ziruc e a domandâ ai parlamentârs laburiscj scozês di no poiâ il referendum. Il prin ministri scozês, Alex Salmond, che al vuide un guvier di minorance poiât dal SNP e dai Verts, si ricjate duncje da cjâf a cirî une maiorance parlamentâr che e poi il so progjet di referendum.
Font: Nationalia, 15/05/08; The Daily Record, 14/05/08; BBC, 09/05/08; Mon Divers, 09/05/08

Pontade 12 08 (20/05/08) - 12

Romanie: e jentre in vore la Cjarte europeane

Cul mês di Mai e jentre in vore in Romanie la Cjarte europeane pes lenghis regjonâls o minoritariis che il guvier rumen al veve ratificât ai 29 di Zenâr di chest an. A son simpri di mancul, duncje, i paîs là che il proviodiment nol cjate aplicazion, tra chescj il stât talian, chel francês e chel grêc. A son vincj lis minorancis che la Romanie ur garantìs lis misuris di tutele previodudis de Cjarte europeane: il numar plui alt tra i stâts che a àn ratificât il document. Cun di fat, in plui des minorancis storichis, il guvier rumen al cjape dentri ancje lis comunitâts rivadis intal paîs fin al secul XIX. La liste des lenghis tuteladis e à dentri: albanês, armen, bulgar, cec, cravuat, grêc, macedon, ongjarês, polac, romanès, rus, ruten, serp, slovac, talian, tatar, todesc, turc, ucrain e yiddish.
Font: Mon Divers, 15/05/08

Pontade 12 08 (20/05/08) - 11

Galizie: rêt di blogs pe lenghe

Denant dal cressi dai atacs cuintri dal galizian, ancje i blogs si mobilitin. Cun di fat, cualchi zornade indaûr si è dade dongje une rêt di blogs in difese de lenghe proprie de Galizie che si à batiade cul non “Blogues pola lingua”. I promotôrs de iniziative a spieghin che a àn chê di promovi il galizian inte rêt, massime cul doprâ lis potenzialitâts ufiertis dal web 2.0, e di trasformâlu te lenghe veicolâr dai galizians che a doprin internet. Tal zîr di 48 oris a jerin za 120 i blogs che a vevin aderît ae iniziative.
Font: Galiza Hoxe, 14 e 16/05/08

Pontade 12 08 (20/05/08) - 10

Paîs Catalans: imigrâts al centri de bataie pe lenghe

Doprâ il catalan cuant che si fevele cu lis personis rivadis di un altri paîs al infuartìs l’ûs sociâl de lenghe e al jude la integrazion. Al è ce che a pensin la Plataforma per la Llengua, il Consorci per a la Normalització Lingüística e la Fondazion “Jaume Bofill” che a àn inviât la campagne “Si us plau, parla’m en català” che e à propit chê di sburtâ i catalans a doprâ la lôr lenghe ancje cun cui che al rive di inaltrò. Come testemonis de campagne a son ancje personalitâts di divignince foreste che a àn fat lôr il catalan, tant che i scritôrs Najat El Hachmi e Laila Karrouch, il sociolic Miguel Fernández, e il sportîf Bojan Krkic. Sul valôr dal catalan pe integrazion si veve za ativade ancje une campagne de associazion Immi.cat.
Font: Mon Divers, 14/05/08

Pontade 12 08 (20/05/08) - 9

Galizie: contribûts aes impresis ancje daûr dal ûs dal galizian

Il Parlament galizian al à fate buine, cui vôts a pro dal BNG e dai socialiscj, une iniziative par sburtâ l’ûs de lenghe galiziane intes impresis. In sostance, si previôt che un dai criteris par sotscrivi contrats e par dâ contribûts pes aziendis al sedi l’ûs e la promozion dal galizian intes impresis. Cun di plui, il Guvier autonomic al varà di meti in vore gnovis azions par informâ e sburtâ lis aziendis e lis associazions di categorie a doprâ il galizian tes lôr comunicazions internis e esternis.
Font: Galiza Hoxe, 14/05/08

Pontade 12 08 (20/05/08) - 8

Galizie: dizionari su lis gnovis tecnologjiis

Ai 13 di Mai, a Sant Jacum di Galizie (Santiago de Compostela), al è stât presentât il progjet pal “Dizionari Enciclopedic Galizian des Tecnologjiis Informatichis e de Comunicazion” là che a àn za tacât a lavorâi parsore une trentine di esperts. Si trate di une iniziative promovude dal Ordin dai inzegnîrs des telecomunicazions che e gjolt de supervision tecniche e sientifiche de Scuele superiôr dai inzegnîrs des telecomunicazions di Vigo, e di chê linguistiche de Academie reâl galiziane. Par produsi cheste opare si calcole che a coventaran trê agns, ma il lâ indenant dai lavôrs si podarà tignîlu di voli sui sîts des trê istituzions cjapadis dentri tal progjet.
Font: Galiza Hoxe, 13/05/08

Pontade 12 08 (20/05/08) - 7

Macedons: gnovis intimidazions in Bulgarie

Tes ultimis setemanis la polizie bulgare e à tornât a inviâ une campagne di intimidazion cuintri dai membris dal moviment politic OMO “Ilinden” PIRIN, che si bat pai dirits de minorance macedone de Bulgarie. Fin cumò a son 180 i militants che a son stâts clamâts a presentâsi alì des stazions di polizie par jessi interogâts. In nissun câs a son stadis dadis spiegazions su lis resons legâls par chescj interogatoris, in cierts câs lis convocazions a son stadis fintremai cence di une notifiche scrite. Une volte tai uficis de polizie, ai militants ur è stât domandât di dâ informazions su la lôr partignince etniche e politiche e a son stâts obleâts a firmâ sfueis blancs cu la scuse di verificâ la autenticitât des lôr sotscrizions a pro dal partît macedon, cul risi che po si doprin chestis firmis in blanc par altris finalitâts. Vie pal 2006 la polizie e veve interogât cun sistemis intimidatoris passe 6000 membris dal partît macedon. La Bulgarie e à za vût diviers riclams des autoritâts europeanis pes sôs azions cuintri dal moviment politic de minorance macedone.
Font: EFA, 12/05/08

Pontade 12 08 (20/05/08) - 6

Romanie: si domandin soiârs plui bas pal ûs dal ongjarês

La associazion dai zovins ongjarês dal Ardeal, in Transilvanie, e domande al president rumen Traian Basescu di sbassâ dal 20 al 10% il nivel di presince de minorance par podê doprâ l’ongjarês inte aministrazion publiche. Cun di fat, in dì di vuê, la leç e permet di doprâ une lenghe minoritarie inte aministrazion publiche dome là che i membris de minorance a son almancul il 20% de popolazion totâl. Chest soiâr al ven contestât massime te citât di Kolozsvár / Cluj, là che intal ultin censiment (2002) il 19% de popolazion si à declarade di lenghe magjare, ma che, se si ten cont dai students o des personis che a rivin dal rest de provincie tai uficis de citât, si varès une presince di ongjarês inmò plui alte. Cun di plui, a zontin i rapresentants de minorance, si à di visâsi ancje de storie di chestis tieris. Di fat, massime tes citâts plui grandis de Transilvanie, daspò de fin de seconde vuere mondiâl, i guviers rumens a àn fat rivâ cetancj imigrâts di altris regjons de Romanie propit cun chê di cambiâ i ecuilibris nazionâi jenfri ongjarês e rumens.
Font: Divers.ro, 12/05/08

Pontade 12 08 (20/05/08) - 5

Romanie: invît ae diaspore todescje a tornâ in Transilvanie

Tes zornadis stadis, il president dal Forum Democratic dai Todescs de Romanie, Klaus Johannis, che al è ancje sindic de citât di Hermannstadt / Sibiu, al à partecipât a Dinkelsbuehl, in Gjermanie, al incuintri dai sassons ator pal mont. Ta chê ocasion al à podût incuintrâ cetancj membris de minorance todescje che a son emigrâts in Gjermanie daspò de fin dal regjim di Ceauşescu, massime par vie di resons economichis. Johannis ju à invidâts a tornâ a cjase, ancje par vie che la situazion economiche e je daûr a cambiâ. La minorance todescje de Romanie si veve za sbassade a fuart intant e daspò de fin de seconde vuere mondiâl e la emigrazion dai agns ’90 i à dât un altri colp fuart.
Font: Divers.ro, 12/05/08

Pontade 12 08 (20/05/08) - 4

Asturiis: in miârs in place a pro de uficializazion dal asturian

Diviers miârs di citadins a àn manifestât ai 9 di Mai pes stradis di Uviéu / Oviedo par domandâ che l’asturian al vegni ricognossût tant che lenghe uficiâl tal gnûf Statût des Asturiis. A inmaneâ la iniziative e je stade la organizazion Xunta pola Defensa de la Llingua cu la poie di altris associazions culturâls, ma ancje di partîts tant che Izquierda Xunida- Bloque por Asturies-Verdes e Andecha Astur, e organizazions sindacâls tant che Comissiones Obreres e Union Xeral de Traballadores. Za tal Novembar stât 20 mil personis a vevin sfilât pe capitâl asturiane par reclamâ la uficialitât pe lôr lenghe che e va dilunc a jessi margjinalizade tes istituzions, tal sisteme educatîf, e tai mieçs di comunicazion. Dut câs, ni il guvier che al è tes mans dai popolârs, ni la oposizion socialiste a mostrin masse interès pe cuestion. In dì di vuê, si calcole che a sedin tra i 300 e i 450 mil i asturians che a fevelin ancjemò la lôr lenghe proprie.
Font: Mon Divers, 08/05/08; Nationalia, 09/05/08

Pontade 12 08 (20/05/08) - 3

Paîs Basc: sì de UE a di un sisteme fiscâl diferent

Pes autoritâts judiziariis europeanis la Comunitât Autonome Basche e à dirit a decidi par so cont il sisteme fiscâl di meti in vore tal so teritori. Cun di fat, ancje se no si trate ancjemò de sentence finâl, la posizion de avocade gjenerâl dal Tribunâl di justizie de Union Europeane, Juliane Kokott, e poie ad in plen la autonomie fiscâl basche rispiet al stât. Se confermade dal Tribunâl, cheste posizion e darès inmò plui fuarce ae autonomie des provinciis baschis tun dai cjamps plui delicâts, come chel de fiscalitât. Cun di plui, si tratarès di un precedent impuartant par altris comunitâts europeanis, daspò di chel des isulis Açoris rispiet al Portugal.
Font: Nationalia, 08/05/08

Pontade 12 08 (20/05/08) - 2

Gales: ancje lis Puestis a varan di tratâ compagn galês e inglês

A son 57 i gnûfs ents publics che a varan di meti in vore i plans di politiche linguistiche previodûts de leç su la lenghe galese dal 1993. Tra di chescj a son ancje lis Puestis che, duncje, a varan di garantî ai citadins galês il dirit di doprâ ad in plen la lôr lenghe proprie e a varan di informâ ducj i lôr utents di cheste pussibilitât che ur ven ufierte e di ducj i servizis disponibii par galês. In dì di vuê, cu chestis ultimis zontis, a son 426 i organisims publics clamâts a meti in vore la leç su la lenghe galese. La gnove e à vût il bon acet dal Ufici pe Lenghe Galese, invezit i ativiscj de Cymdeithas – la societât pe lenghe galese – a àn dite che il Guvier galês, impen di slargjâ il numar dai ents publics che a àn di meti in vore la leç dal ‘93, al varès di fâ une leç gnove che e impegni ancje lis societâts privadis a rispietâ i dirits linguistics dai galês.
Font: Welsh Language Board, 08/05/08; Mon Divers, 08/05/08

Pontade 12 08 (20/05/08) - 1

Paîs Catalans: campagne a pro de scuele par catalan tal Paîs Valenzian

Intal Paîs Valenzian a esistin diviers modei educatîfs, doi di chescj, ven a dî il Program di insegnament par valenzian e il Program di imersion linguistiche, a ufrissin un insegnament cualificât dal catalan tant che lenghe veicolâr principâl. In dì di vuê, tes scuelis primariis valenzianis, si calcole che il 25% dai arlêfs al studii par catalan. Par incressi cheste percentuâl, la organizazion Escola Valenciana e à inviât une gnove campagne che e à tant che sproc: “Iscriviti al avignî, iscriviti par valenzian”. Cun di fat – a spieghin i promotôrs de iniziative – sielzi il catalan par studiâ al ufrìs un sisteme scolastic plui atent aes dibisugnis dai fruts, al jude la comprension di plui lenghis e al da plui pussibilitâts pal avignî. La campagne e je indreçade massime aes fameis imigradis o no catalanofonis, par cheste e je stade fate ancje par castilian, par inglês, par romanès e par arap.
Font: Nationalia, 06/05/08

Pontade 11 08 (06/05/08) - 13

Paîs Basc: e cres inmò la repression cuintri de çampe indipendentiste

Su ordin dal judiç de “Audiencia Nacional”, Baltasar Garzón, e je stade arestade la sindiche di Arrasate, Ino Galparsoro. La decision e je stade cjapade nancje une setemane daspò che la mozion cuintri di jê sostignude dai partîts spagnoliscj e dal PNV e jere stade boçade de maiorance dai conseîrs dal Comun basc. La candidature de Galparsoro e jere une di chês che, tes aministrativis dal 2007, no jere stade improibide des autoritâts spagnolis che a vevin impedît a cetantis listis leadis ae çampe indipendentiste basche di presentâsi aes elezions. Cuant che, ai 8 di Fevrâr di chest an, il stes Garzón al veve decidût di suspindi lis ativitâts di ANV (Azion Nazionaliste Basche) al veve ancje sclarît che lis ativitâts davueltis dai elets di chel partît inte suaze des lôr incarghis istituzionâls no vevin di jessi calcoladis tra chês impedidis ai membris di ANV. Cun di fat, in câs contrari, si varès blocade la ativitât istituzionâl des aministrazions là che i citadins a vevin elet conseîrs dal partît nazionalitari basc. Cul arest de sindiche di Arrasate, Garzón al mostre di vê cambiât idee dal moment che la acuse di “colaborazion cun organizazion teroriste” e di “violazion de sospension des ativitâts di ANV” si poie dome su la ativitât davuelte de Galparsoro tant che prime citadine dal so Comun. Cun di plui, cun cheste decision si vierç la strade pal arest di altris 432 conseîrs elets tal 2007 tes filis di ANV e pal bloc des ativitâts aministrativis tai Comuns là che i rapresentants nazionalitaris a son al guvier. Denant di cheste decision si son tignudis diviersis manifestazion di solidarietât cu la sindiche arestade sei in Arrasate che in altris localitâts baschis. “Cemût si puedial clamâ democrazie un sisteme là che si impresone un sindic parcè che al fâs il lavôr che i eletôrs lu àn votât par che al fasi?” a àn declarât i rapresentants de çampe indipendentiste basche, che a àn dite che par cjatâ alc dal gjenar si à di tornâ al ’36 cuant che i franchiscj a impresonavin e a fusilavin i sindics.

Lis ultimis setemanis, intal Paîs Basc, a son stadis segnadis de violence: di une bande cui atentâts (cence muarts) che la organizazion armade basche ETA e à fat il prin di Mai cuintri des sedis di partîts e sindacâts spagnoliscj, e di chê altre cui atacs de polizie autonomiche cuintri de manifestazion che si è davuelte ai 26 di Avrîl a Durango par celebrâ i 30 agns de nassite di Herri Batasuna (moviment di riferiment de çampe indipendentiste basche vuê metût fûr leç des autoritâts spagnolis) e che a àn puartât al arest e al feriment di diviers dai partecipants.

Font: Gara, 01-04/05/08 e 27/04/08

Pontade 11 08 (06/05/08) - 12

Gales: tes aministrativis i nazionaliscj a cressin, ma a pierdin il Gwynedd

Lis elezions aministrativis che si son davueltis in Gales a àn dât un risultât une vore negatîf pal Partît Laburist che al à vût in dut 344 conseîrs locâi, ven a dî 122 in mancul de legjislature stade. Cun di plui, i Laburiscj a àn pierdût la maiorance assolude in sîs Conseis provinciâi (Merthyr Tydfil, Blaenau Gwent, Torfaen, Caerphilly, Flintshire e Newport), conservantle dome in doi di chei che za a vevin (Neath Port Talbot e Rhondda Cynon Taff). I Conservadôrs, invezit, a àn concuistât 62 conseîrs in plui de volte stade e cumò a ‘nd àn in dut 173 e a àn zontât une Provincie a chê che za a controlavin (Monmouthshire e Glamorgan). I Liberâi Democratics a son cressûts di 21 conseîrs e cumò a ‘nd àn in dut 162. Il Plaid Cymru al à concuistât 33 conseîrs in plui de volte stade e si conferme seconde fuarce intal Gales cui siei 207 elets totâi. Dut câs, i nazionaliscj galês a pierdin la maiorance assolude te uniche Provincie che a controlavin, o sei il Gwynedd. Ta cheste aree il Plaid Cymru al à paiât a fuart la sô politiche di riorganizazion scolastiche, cun di fat il gnûf moviment Llais Gwynedd (la vôs dal Gwynedd) nassût propit par fâi cuintri a chestis misuris al à otignût plui di une disine di elets che a puedin jessi decisîfs par aministrâ la Provincie.
Font: BBC, 02-03/05/08; Agence Bretagne Presse, 02/05/08

Pontade 11 08 (06/05/08) - 11

Corsiche: iniziativis a pro dal ricognossiment uficiâl dal cors

In spiete dal dibatiment sul ricognossiment des lenghis regjonâls in program ai 7 di Mai intal Parlament francês, une schirie di associazions nazionalistis corsis a àn clamât dongje ai 3 di Mai dai presidis simbolics intes citâts principâls de isule. La iniziative, che e je stade inmaneade dal Associu di i Parenti Corsi, de Cunsulta di i Studenti Corsi, de Ghjuventù Indipendentista e de Ghjuventù Paolina, e veve chê di sburtâ la modifiche dal secont articul de Costituzion francese che e previôt il francês tant che uniche lenghe de Republiche. Ta chescj agns lis bataiis a pro dal cors a àn puartât bogns risultâts, massime te scuele, ma la strade di fâ e je inmò tante, a spieghin i grups nazionaliscj. In dì di vuê, in Corsiche a esistin 46 scuelis primariis bilengâls che a cuvierzin il 13% dai arlêfs. Dut câs, si calcole che il 92% dai fruts al studiedi il cors, di chescj il 27% par almancul trê oris la setemane. Lis cifris a son une vore plui bassis, invezit, tes scuelis secondariis.

Font: AFP, 03/05/08; Ouiaubreton, 04/05/08

Pontade 11 08 (06/05/08) - 10

Bretagne: une corse pe lenghe e pai 30 agns des Diwan

Dai 30 di Avrîl ai 3 di Mai si è davuelte in Bretagne la prime edizion di Ar Redadeg, une corse pe lenghe imbastide sul stamp de Korrika basche e de Correllengua catalane. I partecipants a àn corût dilunc di une percors di 600 chilometris di Naoned / Nantes a Karaez / Carhaix. Par partecipâ i coridôrs a vevin di paiâ une iscrizion di 100 euros par chilometri: i bêçs cjapâts sù ta cheste maniere, chei metûts di ents o impresis che a poiavin la iniziative e chei tirâts sù cu la vendite di materiâl memoreatîf a laran par finanziâ lis scuelis bretonis a imersion Diwan, che propit ta chescj dîs a fasin fieste pai lôr 30 agns di esistence. Cheste rêt scolastiche privade e à permetût di scolarizâ miârs di fruts bretons te lôr lenghe. Il tentatîf di finanziâlis ancje cun fonts publics, inviât tal 2000, al è ancjemò blocât par vie dai ricors imbastîts di doi sindacâts di insegnants francês che a gjoldin ancje di fuartis poiis politichis.

Font: Agence Bretagne Presse, 01-03/05/08; Eurolang, 01/05/08; Mon Divers, 29/04/08