21/07/09

Macedonie: turc tierce lenghe uficiâl a Gostivar


Cul 2010 il turc al deventarà la tierce lenghe uficiâl dal comun di Gostivar, in Macedonie. Cun di fat, la aministrazion comunâl e à fate buine la domande rivade di un partît espression de comunitât turche che e rapresente il 10% dai 80 mil abitants de citât. Daûr de leç macedone, ogni comun al pues decidi in autonomie lis lenghis che, sul so teritori, a gjoldin di un status di uficialitât. Chest al vûl dî, tra lis altris robis, che la aministrazion locâl e à di fâ ducj i documents e i avîs uficiâi intes lenghis ricognossudis tant che uficiâls. A Gostivar a jerin bielzà uficiâls il macedon e l’albanês.
Font: Món Divers, 17/07/09

Bretagne: progjet par sburtâ l’audiovisîf par breton


Trê associazions bretonis – Kaouenn.net, Féa e Blaz Produktion – si son dadis dongje cun chê di dâi un sburt ae produzion audiovisive par breton. In graciis di internet e des tecnologjiis digjitâls, chestis trê realtâts a cirin di dâ une man ai apassionâts dal setôr a formâsi e a svilupâ il lôr progjets. A front dal interès nassût par cheste ativitât, lis trê associazions a son daûr a lavorâ par imbastî intal 2010 un festival di cinematografie a bas cost dulà presentâ i miôr curtmetraçs in lenghe bretone (no plui di 7 minûts di durade). Cul jutori de Regjon de Bretagne si volarès po fâ zirâ chest materiâl sul teritori cun seradis di pueste e lavorâ par une sorte di television in rêt produsude cui contribûts video de int.
Font: Agence Bretagne Presse, 14/07/09

Ocitanie: la Val di Aran e domande plui autoguvier


Un aument dal nivel di autoguvier de valade, il ricognossiment de specificitât nazionâl de sô comunitât e un sisteme di bilateralitât intai rapuarts tra i doi guviers. A son chestis lis liniis di fonde dal progjet di riforme de leç di specialitât che il sindic de Val di Aran, Francés Boya, al à presentât al guvier de Gjeneralitât de Catalogne. La riforme de leç di specialitât de comunitât aranese e je previodude dal Statût di autonomie fat bon dal Parlament catalan intal 2006. La Val di Aran e à fevelât cuntune vôs sole, al à marcât il sindic di cheste comunitât ocitane, dal moment che il progjet al à vût la adesion di ducj e trê i partîts rapresentâts intal Consei gjenerâl de valade. La riforme de leç di specialitât, a àn rispuindût i rapresentants dal guvier catalan, e sigurarà un ricognossiment clâr de identitât nazionâl de comunitât, un aument des competencis e des risorsis par metilis in vore.
Font: Món Divers, 14/07/09; Nationalia, 14/07/09

Gales: strategjie gnove pal insegnament dal galês


Inte suaze de riforme de strategjie pal insegnament in lenghe galese, l’Ufici pe Lenghe Galese al à judicât une vore positive la propueste di une planificazion fate su scjale nazionâl e no plui a nivel locâl. Cun di fat, une strategjie plurienâl che e cjapi dentri dut il teritori dal Gales e ven considerade un pas indenant pal svilup dal insegnament par galês. Par lâ ta cheste direzion, l’Ufici pe Lenghe Galese al propon di misurâ la domande che e rive dal teritori di maniere di garantî che a sedin avonde scuelis e avonde insegnants par garantî a ducj chest servizi. Cun di plui, si invide ancje a sigurâ a di un numar plui grant di students l’insegnament par galês ancje intai istitûts superiôrs.
Font: Welsh Language Board, 13/07/09

Galizie: gnove campagne par difindi il galizian


E à non “Galizian patrimoni de umanitât” la gnove campagne inviade par difindi la legjislazion imbastide intai ultins agns par tutelâ e promovi la lenghe proprie de Galizie, metude sot atac dal gnûf guvier de Comunitât che al è intes mans dal PP. La iniziative e je stade presentade ai 11 di Lui, cuntune grande partecipazion di public, inte Cjase galiziane de Culture di Vigo. Lis liniis di fonde de campagne si lis cjate intun manifest publicât in rêt (su cheste direzion) che, inte prime setemane di esposizion, al veve cjapât sù passe un miâr di adesions. I promotôrs de iniziative a àn spiegât che la Galizie e je une societât là che si fevelin dôs lenghis che a son intune situazion disavuâl, par chest il galizian al à bisugne di une protezion speciâl: dome cussì si pues dî di compuartâsi daûr justizie e intun sisteme di avualiance tra lis dôs lenghis. Vinci lis elezions – a àn zontât – nol da la autoritât par sdrumâ une des fondis di convivence de nestre societât e un dai segnâi de nestre esistence tant che comunitât. La campagne e sarà al centri di une gnove iniziative publiche in program in Setembar a Sant Jacum di Galizie (Santiago de Compostela). Tra lis iniziativis che i organizadôrs a son daûr a studiâ e je ancje chê di inviâ une leç di iniziative popolâr sul argoment.
Font: Vieiros Galiza Hoxe, 11/07/09

Irlande: publicâts i plans gnûfs di politiche linguistiche


Il ministri irlandês pes politichis di comunitât, pai afârs rurâi e pal Gaeltacht, Éamon Ó Cuív, al à publicât il secont Plan pal svilup dal gaelic, che al cjape dentri la dade 2009 – 2012. Il document al puarte indenant lis liniis di politiche linguistiche za fissadis intal prin Plan e al slargje i servizis par gaelic ufierts des struturis dal ministeri sei pes aministrazions publichis, sei pai citadins. Une atenzion particolâr e je dedicade pal Gaeltacht, o sei lis areis de Irlande là che il gaelic al è ancjemò doprât in maniere significative. Ta chestis zonis si ponte a incressi l’ûs de lenghe, massime, intes areis urbanis là che e je plui debule. Intal teritori de Republiche, in dì di vuê, 1 milion e 600 mil personis a declarin di vê une cierte competence in gaelic e 85 mil di fevelâlu une vore ben. Il guvier irlandês al ponte a incressi chestis cifris puartantlis, in vincj agns, a 2 milions pai prins e a 250 mil pai seconts.
Font: Gaelport, 10 e 14/07/09

Flandris e Valonie: formâts i gnûfs guviers di coalizion


Ai 9 di Lui al è nassût il gnûf guvier des Flandris che al viôt adun i cristians democratics (CD&V, Christen-Democratisch en Vlaams), i socialiscj (SP.A, Socialistische Partij - Anders) e i indipendentiscj de Gnove Aleance Flamande (N-VA, Nieuw-Vlaamse Alliantie) e che al sarà vuidât dal cristian democratic Kris Peeters. Un dai obietîfs dal gnûf guvier al è chel di aumentâ il nivel di autoguvier des Flandris. Il program di guvier al previôt ancje di incressi lis misuris di assistence sociâl e sanitarie pes fameis, pai fruts e pai disabii. Chest pont dal program, dut câs, al à jevât lis protestis dai politics valons par vie che il sisteme de assistence sociosanitarie al è di competence federâl. Ai 12 di Lui e je stade presentade ancje la coalizion che e aministrarà la Valonie pai prossims cinc agns. A formâle a son socialiscj, ecologjiscj e cristians democratics.
Font: Nationalia, 09/07/09; Món Divers, 13/07/09

Irlande: intal Nord inmò in vore leçs dal ‘700 cuintri dal gaelic


Il tribunâl di Béal Feirste / Belfast nol à fat bon il ricors presentât di un citadin di marilenghe irlandese che si veve viodût a refudâ une licence pe vendite temporanie di alcolics parcè che e jere stade scrite par gaelic. Cun di fat, pal judiç che si è ocupât dal câs, ducj i procediments legâi a àn di jessi fats par inglês su la fonde di une leç dal 1737. Par fâi cambiâ idee no àn coventât ni il fat che chê leç e je contrarie ai impegns internazionâi di tutele des minorancis linguistichis sotscrits dal Ream Unît, ni che l’ûs di altris lenghis minorizadis (galês e gaelic scozês) e je za previodude intai tribunâi dal Ream Unît, e nancje la testemoneance di storics che a àn presentât la leç dal 1737 come part dal regjim discriminatori in vore cuintri dai irlandês intai secui stâts, ma no plui in vore. Par ribaltâ la decision dal tribunâl nordirlandês si varès cumò di cjapâ la strade dal apel.
Font: Belfast Telegraph, 09/07/09; The Irish Times, 09/07/09


Gales: pas indenant pal galês intai rapuarts cu la Comission Europeane


La lenghe galese e fâs un altri pas indenant intai rapuarts cu lis istituzions europeanis. Cun di fat, su la fonde di un acuardi sotscrit tra lis autoritâts comunitariis e chês britanichis, di cumò indenant i citadins galês a podaran indreçâsi ae Comission Europeane inte lôr lenghe proprie. Chest risultât al diven, in particolâr, dal impegn dal rapresentant dal Plaid Cymru intal Parlament de Europe, Jill Evans.
Font: EFA, 08/07/09

Bulgarie: i risultâts dai rapresentants des minorancis intes politichis


Intes elezions politichis bulgaris, la vitorie e je lade al partît di centri diestre “Citadins pal svilup european de Bulgarie” (GERB) che al à cjapât sù par jù il 40% des preferencis e che al à otignût dome 5 deputâts in mancul di chei che i varessin permetût di vê la maiorance assolude. La coalizion socialiste, che e cjape dentri ancje la “Union Civiche Roma” (partît che al rapresente la comunitât rom bulgare), si è fermade al 17% dai consens. Al è cressût, invezit, il “Moviment pai Dirits e pes Libertâts” (DPS) che al è leât ae minorance turche che e vîf intal paîs e che e rapresente il 9,4% de popolazion. Cun di fat, il DPS al à otignût 38 deputâts, 4 in plui di chei che al veve intal 2005. Dut câs, a front de sconfite de aleance socialiste, nol podarà ripeti la coalizion di guvier che la legjislature stade al veve metût sù cui socialiscj. A cressi e je stade ancje la formazion di estreme diestre Ataka che e fâs cuintri cun fuarce ae minorance turche e che, tra lis altris robis, e domande di scancelâ lis trasmission par turc che a van in onde su la radiotelevision publiche BNT.

Font: Nationalia, 07/07/09

UE: ancje basc, catalan e galizian intal Erasmus


La Comission Europeane e à comunicât che basc, catalan e galizian a saran zontâts ae liste des lenghis che a son a disposizion dai cors di preparazion linguistiche pai students Erasmus. La novitât e jentrarà in vore cul an academic 2010 – 2011. In dì di vuê, chescj cors finanziâts des autoritâts europeanis, a jerin disponibii dome intes lenghis uficiâls de UE e, in plui, par islandês, norvegjês e turc.
Font: Eurolang, 03/07/09

Slovachie: leç su la lenghe, proteste de minorance ongjarese


Ai 30 di Jugn il Parlament slovac al à fat bon un emendament ae leç pe lenghe slovache une vore contestât dai rapresentants des minorancis che a vivin intal paîs, a tacâ di chê ongjarese che e rapresente passe il 10% de popolazion. Il test, che al jentrarà in vore in Setembar, al previôt che citadins, associazions e ents, in dutis lis formis di comunicazion no privadis, a vedin di doprâ il slovac. Par cui che no lu fâs a son previodudis multis tra i cent e i 5 mil euros. A son permetudis ancje traduzions in altris lenghis che però a àn di jessi compagnis peraule par peraule al test slovac e, tal câs di documents scrits, a àn di jessi stampadis in caratars plui piçui. Ecezions a son previodudis pe lenghe ceche, pes comunicazions jenfri miedi e pazient e, se dal câs, par trasmissions radiotelevisivis in lenghe minoritarie. L’emendament al è passât cul vôt di 76 dai 150 deputâts e al è stât contestât a fuart massime dal partît de comunitât ongjarese. Critichis a son rivadis ancje dal guvier di Budapest.
Font: Eurolang, 01/07/09; Nationalia, 06/07/09