29/04/14

Ucraine: tensions e violencis tra filorus e governatîfs

Lis tratativis di Gjinevre tra Ucraine, Russie, UE e USA – che a previodevin di meti fin aes violencis e aes provocazions, di disarmâ lis miliziis e di inviâ un dialic par une riforme costituzionâl – no àn vût grancj risultâts sul teren, se e je vere che fintremai la tregue proclamade par Pasche no à rivât a tignî bot fint insom. I incidents e lis provocazions a son lâts indenant e une gnove ofensive dai reparts speciâi dal guvier di Kiev e di milizians de estreme diestre ucraine che e à causât diviers muarts e ferît e je stade fermade dome dopo de menace russe di un intervent come chel viodût cualchi an indaûr in Gjeorgjie. Il president e il prin ministri ad interim, Oleksandr Turčinov e Arseny Yatseniuk, a àn prometût che a poiaran une modifiche costituzionâi par dâi plui competencis ai conseis locâi e par infuartî i dirits linguistics des comunitâts russofonis. Il Partît des Regjons, che al poiave il guvier di prime e che al à la sô scune massime intes regjons dal Est, al stime chestis propuestis masse flapis e al domande une riforme costituzionâl che e siguri un decentrament fuart dai podês aes regjons e un status di couficialitât pe lenghe russe. A restin però realtâts come chês di Kharkiv, Donetsk, Gorlovka, Kramatorsk e Slaviansk là che a son lis miliziis folorussis a controlâ il teren e a rivendicâ consultazions come chês che a àn puartât la Crimee a jessi anetude de Federazion Russe.
Font: Ria Novosti, 24/04/14; Reuters, 18/04/14

Paîs Catalans: inviade une gnove tv par catalan

Ai 23 di Avrîl e à tacât la sô programazion regolâr une gnove television par catalan. La trasmission di scree de gnove emitente si le à vude però za la sere prime cuntune interviste al president de Generalitat, Artur Mas, seguide di un dibatiment cun diviersis personalitâts catalanis e de presentazion dal palinsest. Si trate di El Punt Avui TV, metude in pîts dal omonim grup editoriâl dopo vê cjolt la licence di emission di Canal Català. La television e cuvierç sù par jù il 50% dal teritori de Catalogne e l’80% dai siei abitants, ma e ponte cul timp a slargjâ la sô aree di difusion.
Font: Generalitat de Catalunya, 23/04/14

Cornualie: ricognossiment tant che minorance nazionâl

Dopo agns di mobilitazions e diviers tentatîfs mancjâts, cumò ancje i cornics a vegnin ricognossûts tant che minorance nazionâl dentri dal Ream Unît. Il segretari dal ministeri dal tesaur britanic, Danny Alexander, al à confermât in maniere uficiâl che ancje pe comunitât di lenghe celtiche de Cornualie si metaran in vore i indreçaments previodûts de Convenzion cuadri pe protezion des minorancis nazionâls dal Consei de Europe che a jerin za in vore pai galês e pes comunitâts di lenghe gaeliche de Scozie e de Irlande dal Nord. Chest ricognossiment, par cumò, nol puartarà a incressi l’autoguvier de Cornualie e nancje i fonts pe sô lenghe, ma al rapresente un ricognossiment impuartant e par chest la gnove e je stade saludade cun sodisfazion sei dai grups impegnâts intal promovi la lenghe e la identitât corniche, sei dal partît nazionalitari Mebyon Kernow. Propit chest moviment, un mês e mieç indaûr, al à ancje inviât une campagne che e ponte ae nassite di une Assemblee Nazionâl de Cornualie sul model di chê galese che e permeti a chest piçule nazionalitât celtiche di incressi il so nivel di autoguvier.
Font: Mebyon Kernow, 23/04/14; BBC, 24/04/14

Irlande: prins manifescj eletorâi unioniscj par gaelic

Un altri tabù al è colât intal rapuart jenfri lenghe gaeliche irlandese e moviments politics unioniscj de Irlande dal Nord. Cun di fat, il gnûf partît unionist NI21 al à decidût di meti fûr un sest dai siei cartelons eletorâi gjigants pes elezions europeanis par gaelic. E je la prime volte che un moviment politic che al sosten la union de Irlande dal Nord cul Ream Unît al dopre l’irlandês intune campagne eletorâl. O sin un partît inclusîf e o crodìn che in Irlande dal Nord ducj a àn di vê la pussibilitât di mostrâ la proprie identitât e ancje se o crodìn che la Irlande dal Nord e stedi miôr dentri dal Ream Unît no son resons par no jessi pluraliscj e dâi spazi ae diversitât linguistiche e culturâl di cheste tiere, al à spiegât il president dal partît Basil McCrea. Cun di plui, NI21 si è declarât disponibil a poiâ la propueste di leç pal irlandês fate indenant dal Sinn Féin, ancje par vie che nol vûl che la cuistion de lenghe e vegni strumentalizade par resons di partît. La candidade di NI21 pes europeanis, Tina McKenzie, e à spiegât il concet in maniere ancjemò plui clare: “la lenghe irlandese e parten a ducj i citadins de Irlande dal Nord e nus tocje a ducj di valorizâle”.
Font: Belfast Telegraph, 21/04/14

Paîs Basc: miârs di personis in place pal Aberri Eguna

Si stime che a sedin stadis uns 25 mil lis personis che ai 20 di Avrîl a àn partecipât a Iruñea / Pamplona ae manifestazion pal Aberri Eguna, la Zornade de Patrie Basche, inmaneade de rêt Independentistak. La iniziative – là che a àn partecipât rapresentants di Sortu, Eusko Alkartasuna, Aralar, Alternatiba, EH Bildu, Abertzaleen Batasuna, ma ancje delegazions rivadis de Scozie, de Catalogne e di altris nazions cence stât – e à vût tant che teme centrâl la indipendence dal Paîs Basc.

Bretagne: manifestazion storiche a Nantes pe riunificazion

Uns 10 mil personis a àn manifestât sabide ai 19 di Avrîl a Naoned / Nantes par domandâ la riunificazion dal dipartiment de Loire Atlantiche cul rest de Bretagne. La maiorance de popolazion di chest dipartiment, che cumò al fâs part de regjon aministrative dal Pays de la Loire, al è dacuardi sul passaç di regjon, ma fin cumò il progjet nol à mai cjatât la poie dal guvier francês. Il gnûf prin ministri Manuel Valls, pôc dopo de sô nomine, al à fevelât di une revision de organizazion regjonâl e la manifestazion di Nantes e vûl duncje mostrâi une des modifichis di podê fâ. Al è po di dî che, cundut che no si trate de prime manifestazion pe riunificazion de Bretagne, chê dai 19 di Avrîl e je stade chê che e à vût il rivoc plui grant intai mieçs di comunicazions francês. Altri element impuartant de iniziative al è stât chel de presince trasversâl di rapresentants politics bretons che e leve de aree nazionalitarie e indipendentiste fintremai ai conservadôrs de UMP. Ae manifestazion, inmaneade dai coletîfs Bretagne Réunie e 44=Breizh, a àn partecipât ancje diviers grups dal moviment dai Bonnets Rouges.
Font: Agence Bretagne Presse, 19-20/04/14

Transnistrie: domandade la anession ae Russie

I ultins acjadiments capitâts in Ucraine e massime la anession de Crimee de bande de Federazion Russe a àn puartât il consei suprem de Transnistrie a domandâ in maniere uficiâl aes autoritâts di Mosche di jentrâ inte Federazion. Regjon a maiorance russe de Moldova, la Transnistrie e veve proclamât la sô indipendence ancjemò intal 1990 e, cundut che a nivel internazionâl no ven ricognossude di nissun, di in chê volte si guvierne di bessole cence che il guvier moldâf al rivi a esercitâ la sô autoritât. Par cumò il guvier rus nol à dât ancjemò une rispueste uficiâl, ma la situazion e preocupe une vore il guvier moldâf. Il prin ministri vicjari Eugen Carpov al difint la integritât de Moldova e, in rispueste aes acusis di Mosche, al sigure che no son veris lis vôs di un bloc economic de Transnistrie. Su la cuistion al è intervignût ancje il president rumen Traian Basescu domandant la poie de comunitât internazionâl par evitâ che la Transnistrie e ledi daûr de strade za cjapade de Crimee.
Font: Balkan Insight, 17/04/14

UE: diviers partîts de EFA in corse pes europeanis

Lis elezions pal Parlament european che si tignaran sul finî di Mai a cjapin dentri ancje diviers partîts che a àn il lôr eletorât massime tra i membris des comunitâts nazionâls minorizadis, tra di lôr a ‘nd è tancj che a fasin part dal grup European Free Alliance. Viodudis lis dimensions dal vôt, par tancj moviments nazionalitaris la partecipazion aes europeanis e je soredut un at simbolic, ma in cualchi câs e je ancje la pussibilitât di rivâ a vê dai elets.

Irlande: publicât il diesim rapuart su la lenghe

Il gnûf comissari pe lenghe irlandese Rónán Ó Domhnaill al à presentât il diesim rapuart de ativitât anuâl davuelte dal so ufici. Vie pal 2013 si àn vudis 775 segnalazions di berdeis leâts al otignî servizis publics par gaelic. La plui part dai problemis e je stade comedade cun intervents informâi, intant che in 13 câs si à vût di vierzi investigazions formâls pe violazion de normative su la lenghe irlandese che a àn cjapât dentri fintremai il dipartiment statâl pe educazion. Inte sô relazion il comissari al à ancje segnalât che a son 72 lis autoritâts publichis che no àn proviodût a prontâ i gnûfs plans linguistics che a àn di cjapâ il puest di chei rivâts insom intal 2013. Ó Domhnaill al à invezit mostrât di preseâ la decision dal guvier irlandês di mantignî la indipendence dal so ufici refudant il progjet di leç che, par sparagnâ, al previodeve di meti il comissari pe lenghe irlandese sot dal ufici dal difensôr civic.
Font: Irish Times, 17/04/14

Paîs Basc: 1,3 milions pal euskara inte justizie

Dopo vêlu prometût vie pal 2013, il guvier de Comunitât Autonome Basche al à confermât che al metarà un milion e 300 mil euros par sburtâ il procès di normalizazion linguistiche inte justizie, di maniere che sei i funzionaris che i citadins a vedin la pussibilitât di doprâ l’euskara ad in plen ancje ta chest setôr. Dilunc vie dal an passât il servizi di traduzion dai organisims judiziaris al à voltât cuasi 1.200 documents uficiâi, cuntune incressite di sù par jù il 15% rispiet al an prime.
Font: Deia, 14/04/14

Paîs Basc: dirits linguistics, plui denunciis cuintri dai privâts

Vie pal 2013 Elebide, organisim che al dipent dal dipartiment pe educazion e pe politiche linguistiche de Comunitât Autonomie Basche, al à ricevût plui di 350 segnalazions fatis indenant di citadins, ents o realtâts associativis che a segnalin violazions dai lôr dirits linguistics e, plui in detai, la impussibilitât di rapuartâsi in lenghe basche cu lis istituzions publichis o cun societâts che a davuelzin un servizi public. La plui part des segnalazions si riferìs al ûs scrit de lenghe, no dome tai documents e tes comunicazions diretis ma ancje tai elements che a formin il paisaç linguistic tant che segnaletiche, cartelonistiche e vie indenant. Trê cuarts des denunciis a àn a ce viodi cu lis aministrazions publichis, e un cuart cul setôr privât che al davuelç ativitâts di interès public tant che servizis, bancjis, sigurazions e grancj centris comerciâi. Dilunc vie dal 2013 al è propit il setôr privât chel là che al è cressût di plui il numar des segnalazions. Ancje par chest, intal presentâ i dâts metûts adun di Elebide, il delegât pe lenghe basche Patxi Baztarrika al à ricuardât al setôr privât la dibisugne di rispietâ i oblics previodûts de leç par chel che al rivuarde l’ûs dal euskara cui clients. Ancje parcè che, al à zontât il rapresentant dal guvier basc, l’aument des segnalazions al mostre prin di dut la incressite de cussience dai lôr dirits linguistics de bande dai citadins.
Font: Deia, 13 e 18/04/14