14/02/17

Paîs Catalans: tacât il procès cuintri Mas, Ortega e Rigau

Ai 6 di Zenâr, denant dal tribunâl superiôr di justizie de Catalogne, si à vude la prime udience dal procès cuintri dal ex president dal guvier catalan Artur Mas, de ex presidente vicjarie Joana Ortega e de ex assessore pe educazion Irene Rigau. Il procès al à vût un grues rivoc mediatic par vie dal so pês politic. I trê a son acusâts di disubidience e di abûs aministratîf pal rûl vût intal inmaneâ la consultazion su la indipendence de Catalogne dai 9 di Novembar dal 2014, dopo che il tribunâl costituzionâl spagnûl ur veve inibît ogni partecipazion ative cuntun at dât fûr ai 4 di Novembar. Dopo vê scoltât i trê acusâts e disinis di testemonis, une volte rivade insom la fase dibatimentâl, ai 10 di Fevrâr il public ministeri al à confermât lis sôs acusis domandant 9 agns e 6 mês di inabilitazion di ogni incarghe publiche par Mas e 8 agns e 7 mês par Ortega e Rigau. I avocats de difese a àn invezit domandât la assoluzion plene par vie che i trê, une volte ricevût l’at dal tribunâl costituzionâl, no varessin plui davuelt nissune azion istituzionâl a pro dal vôt popolâr che al jere stât gjestît di plante fûr dai 42 mil volontaris che si vevin dâts dongje par inmaneâlu. I trê imputâts a gjoldin de poie plene dal guvier catalan in carghe e di milions di citadins catalans. Cun di plui in tancj di lôr, ancje fûr de Catalogne, a stimin che il procès al sedi un atac ae democrazie. Un altri procès, simpri peât al percors di autodeterminazion catalan, al è in program ai 27 di Fevrâr denant dal tribunâl suprem. Ta chel câs a jessi sot acuse al è l’ex assessôr pe presidence dal guvier catalan, Francesc Homs.
Font: El Punt Avui, 06-10/02/17; VilaWeb, 06-10/02/17; Naiz:, 06-10/02/17

Ongjarie: comunitâts rom menaçadis, polizie condanade

Dopo di chê rivade in Zenâr de Cort europeane dai dirits umans, lis istituzions ongjaresis a àn patît une gnove condane par no vê tutelât lis comunitâts rom des intimidazions de diestre xenofobe. Cheste volte la sentence e je stade dade fûr de Kúria, la Cort supreme de Ongjarie, che e à condanât la polizie locâl par no vê difindût la comunitât rom di Gyöngyöspata vie pal 2011 cuant che grups paramilitârs de diestre ongjarese a vevin inmaneât rondis e altris azions intimidatoriis cuintri des fameis rom dal paîs.
Font: Politics.hu, 09/02/17

Irlande: la cuistion de lenghe al esam dai tribunâi dal Nord

Ai 8 di Fevrâr la cause inviade de organizazion Conradh na Gaeilge cuintri dal esecutîf de Irlande dal Nord e je rivade al esam dal tribunâl superiôr di Béal Feirste / Belfast. Il procediment judiziari al jere partît l’an passât e al è leât ae boçadure de bande dal guvier nordirlandês (e, plui in detai, de sô part unioniste) de Strategjie pe lenghe irlandese che e varès vût di regolâ lis misuris a pro de lenghe proprie de isule dal 2015 al 2035. La cause si poie sul fat che, cu la sô decision, l’esecutîf nol à rispietât i impegns cjapâts cui acuardis internazionâi di S. Andree, che a son part dal procès di pâs, e cul stes program di guvier 2011-2015. Pal president de organizazion pe lenghe irlandese, Cóilín Ó Cearbhaill, cumò i tocje duncje ai tribunâi intervignî là che no lu à fat il guvier. Intant de udience disinis di ativiscj pe lenghe a àn manifestât fûr dal tribunâl.
Font: CnG, 08/02/17

Gales: mobilitazion pe devoluzion de radiotelevision

Une delegazion de organizazion Cymdeithas yr Iaith Gymraeg si è cjatade ai 7 di Fevrâr cui rapresentants di diviers grups parlamentârs rapresentâts a Westminster. Al centri dal incuintri al è l’avignî di S4C e, plui in gjenerâl, dal sisteme radiotelevisîf in lenghe galese. Dal 2010 incà la television publiche par galês e à za patît il tai dal 40% dal so belanç, ma tal lôr program eletorâl i Conservadôrs si vevin impegnâts a evitâ altris tais e a difindi la indipendence de emitente. Sul prin tacâ dal an però, il ministri britanic pe culture – il conservadôr Matt Hancock – al à anticipât la pussibilitât di taiâ un altri 10% dai fonts pe television galese: une ipotesi che e à fat saltâ sù i stes Conservadôrs galês. Dal moment che in curt il guvier britanic al varà di presentâ une revision de strategjie par S4C, la Cymdeithas e je impegnade a racuei consens ancje dentri dal Parlament di Londre par trasferî ae Assemblee Nazionâl dal Gales lis competencis su la radiotelevision publiche. In gracie de devoluzion si larès a infuartî il sisteme public par galês che, dongje di S4C, al varès trê emitentis radiofonichis publichis in lenghe proprie e si podaressin fissâ cuotis minimis pe presince dal galês inta chei altris mieçs di comunicazion.
Font: Cymdeithas yr Iaith Gymraeg, 07/02/17

Asturiis: cartelonistiche feroviarie cence asturian

La societât RENFE/FEVE e je daûr a rignuvî la cartelonistiche in ûs intes stazions e dilunc des liniis feroviariis des Asturiis. La associazion Inicitiva pol Asturianu e denuncie il fat che lis tabelis a son dome par spagnûl e par inglês. La lenghe proprie però no je lassade fûr dome de cartelonistiche e dai messaçs informatîfs, ma fintremai de toponomastiche. Un tant, e ricuarde la organizazion, al va cuintri de leç dal 1998 sul ûs e su la promozion dal asturian che e previôt che i toponims des Asturiis a vedin di jessi ducj ancje in lenghe proprie.
Font: Asturies.com, 07/02/17

Cossovo: associazion dai Comuns serps inmò blocade

Se la Lista Srpska, o sei la rapresentance politiche de comunitât serbe dal Cossovo, no tornarà a partecipâ aes istituzions statâls, ancje il procès pe nassite de Zajednica, la Assemblee dai comuns serps, al restarà ret e fer. A dîlu a son lis autoritâts cossovanis dopo che il prin ministri de Serbie Aleksandar Vučić lis veve acusadis di no rispietâ i acuardis internazionâi. La Zajednica, di fat, e jere previodude dai acuardis sotscrits a Bruxelles dai doi guviers intal Avost dal 2015. Daûr dal pat, la Assemblee dai comuns a maiorance serbe e sarà indotade di competence primarie su salût, svilup economic, educazion e planificazion urbanistiche. La Lista Srpska e à decidût di boicotâ lis istituzions di guvier cossovanis intal Otubar stât dopo che si veve fate buine une leç che e leve cuintri dai interès serps. La nassite de Zajednica e je contrastade cun fuarce de oposizion nazionaliste albanese che le viôt tant che une pierdite di sovranitât dal Cossovo.
Font: Balkan Insight, 07/02/17

Albanie: si domande di ricognossi i bulgars come minorance

I europarlamentârs bulgars a son daûr a sburtâ su lis autoritâts comunitariis par che a pratindin de Albanie il rispiet dai dirits de minorance di lenghe bulgare che e sarès a stâ tes provinciis di Prespa, Golo Brdo e Gora. I deputâts bulgars a stimin che te part orientâl de Albanie a vivin tra lis 50 e lis 100 mil personis di divignince bulgare che in dì di vuê no gjoldin dal ricognossiment di minorance nazionâl o linguistiche. Di fat, cundut che propit cumò lis istituzions albanesis a son daûr a meti jù une leç di pueste pes minorancis, chestis dôs categoriis a esistin bielzà intal ordenament dal paîs. Te prime, par esempli, a jentrin lis comunitâts greghis, macedonis, serbis e montenegrinis che a vivin dentri dai confins statâi. Pes autoritât albanesis però no esistin elements storics e sientifics par calcolâ di bulgaris chês comunitâts che, dongje dal confin cu la Macedonie, a fevelin varietâts slavis diviersis dal macedon o dal serp.
Font: Balkan Insight, 07/02/17

Galizie: dirits linguistics violâts, denunciis in cressi

Vie pal 2016 il servizi di scolte de organizazion A Mesa pola Normalización Lingüistica al à ricevût plui dal dopli des segnalazions di violazion dai dirits linguistics in Galizie rispiet al an prime e, plui in detai, 339 rispiet aes 157 dal 2015. Lis denunciis a jerin leadis pe plui part a toponomastiche strassomeade (25%), ae esclusion o a discriminazions intal ûs dal galizian (21%), e al refût di vê rispuestis ta cheste lenghe (19%). Il 51% des segnalazions si riferìs al compuartament di aministrazions publichis e il 26% a impresis di servizi. Marcos Maceira, president di A Mesa, al fevele duncje di une presince continuade di “razisim linguistic” che, in diviers câs, e devente ancje ricat par cui che al à bisugne di un servizi e, par vêlu, al scugne rinunciâ ae sô lenghe proprie. Par provâ a superâ cheste situazion, ai 3 di Fevrâr, la organizazion e à regjistrât intal Parlament de Galizie une iniziative legjislative popolâr che e sarà po presentade in maniere uficiâl ai citadins ai 18 di Fevrâr.
Font: Galicia Hoxe, 06/02/17

Paîs Basc: disponibii par ducj centenârs di sottitui par euskara

Il dipartiment pe culture e pe politiche linguistiche de Comunitât Autonome Basche al à metût a disposizion di citadins e agjents culturâi i sottitui par euskara di cines e seriis televisivis produsudis in lenghis forestis che a son stâts prontâts adun cu la distribudore di television digjitâl DTS. Par cumò, sul sît “Open Data Euskadi”, si cjatin i sottitui di 279 films e di 225 pontadis di 24 seriis diferentis. La colaborazion cu la DTS e jere tacade ancjemò sul finî dal 2014 pe sottitulazion dai cines e des seriis televisivis ufiertis de plateforme Movistar+ Estrenos. Chel progjet al à permetût di meti adun i sottitui par basc di 548 films e di uns 600 pontadis di 67 seriis. Su “Open Data Euskadi” a son stâts metûts fûr i sottitui produsûts tra 2014 e 2015, ma ca di pôc a varessin di jessi metûts a disposizion ancje chei svilupâts l’an passât. Cussì i sottitui a podaran jessi doprâts sore nuie di associazions, centris scolastics o ancje privâts citadins che a vuelin viodi un film o une serie televisive ancje par euskara.
Font: Euskadi.eus, 03/02/17

Europe: dirits des minorancis, Comission Europeane smentide

Il tribunâl di justizie de Union Europeane al à anulât la decision de Comission Europeane di dineâ la regjistrazion di une propueste di iniziative citadine che e domandave di difindi i dirits des personis che a partegnin a comunitâts nazionâls e linguistichis minorizadis. Si fevele dal progjet “MinoritySafePack” che al proponeve une serie di azions che lis istituzions comunitariis a varessin vût di meti in vore tant che la nassite di un centri pe diversitât linguistiche, la lote cuintri des discriminazions e la promozion de avualiance di tratament pai membris des comunitâts minorizadis. La propueste e il ricors seguitîf a jerin stâts coordenâts de FUEN, o sei la Union Federâl des Nazionalitâts Europeanis, che e veve metût adun realtâts associativis e citadins di comunitâts minorizadis cjapadis dentri intal stât talian, in Gjermanie, in Austrie, inte Belgjiche, intai Paîs Bas, in Danimarcje e in Romanie. La Comission e veve boçât la propueste calcolantle fûr de sô competence, ma pe cort europeane e varès vût di specificâ cualis e su la fonde di ce elements che lis diviersis azions proponudis a jerin fûr de sô competence. Loránt Vincze, president de FUEN, al à fevelât di vitorie impuartante che però e je dome un passaç dentri di un percors plui lunc. Il prossim pas i tocje cumò ae Comission Europeane che, in plui di paiâ i coscj dal procès, e varà di tornâ a cjapâ in man la propueste e di dâi une rispueste pont par pont.
Font: FUEN, 03/02/17; La Vanguardia, 03/02/17

Scozie: publicâts i indreçaments pe educazion par gaelic

La agjenzie scozese pe lenghe gaeliche Bòrd na Gàidhlig e à publicât lis Liniis uficiâls pe educazion gaeliche che a van a sclarî plui in detai, par chel che al rivuarde il gaelic, lis misuris previodudis de leç su la educazion fate buine dal Parlament scozês l’an passât. La publicazion dal document si compagne a di un infuarciment dai dirits dai gjenitôrs che a domandin pai lôr fîs l’insegnament cul gaelic veicolâr e e ven a colâ tun moment là che la domande di scuelis gaelichis e je daûr a cressi ator pe Scozie. Lis liniis a spieghin a clâr i servizis e lis azions che lis autoritâts a son clamadis a garantî e che i gjenitôrs a puedin pretindi pai lôr fîs inte suaze de educazion par gaelic, des scuelis de infanzie fintremai la istruzion superiôr.
Font: Bòrd na Gàidhlig, 01/02/17