15/07/08

Pontade 15 08 (15/07/08) - 12

Asturiis: tal gnûf Statût l’asturian nol sarà lenghe uficiâl

L’asturian nol sarà ricognossût tant che lenghe uficiâl intal gnûf Statût che si è daûr a prontâ ta cheste comunitât dal stât spagnûl. Cun di fat, il Partît Socialist e chel Popolâr a àn concuardât che intal test si fasarà riferiment al asturian dome tant che “patrimoni linguistic”. Dal moment che i doi partîts a àn la maiorance intal Parlament locâl al è dificil che e passi la propueste dal asturian lenghe uficiâl fate indenant dai moviments nazionalitaris des Asturiis e di Izquierda Xunida. Inte stesse maniere, intal test che si va a meti jù, lis Asturiis no saran presentadis tant che nazionalitât, ma dome come “comunitât storiche”.
Font: Món Divers, 11/07/08


Pontade 15 08 (15/07/08) - 11

Italie: riclam dal Parlament european pe politiche sui rom

Cun 336 vôts a pro, 220 cuintri e 77 astignûts il Parlament european al à fate buine une risoluzion là che si condane la politiche dal guvier talian su rom e sinti, in particolâr pes schedaturis inviadis in diviers localitâts talianis dai membris di chestis comunitâts. Pai rapresentants dal guvier talian si trate di acusis cence fonde. Intant a son daûr a cressi, ancje a nivel talian, lis protestis di citadins e associazions cuintri des azions decidudis dal ministeri pal interni tai confronts di rom e sinti.
Font: Sucardrom, 01-11/07/08; Repubblica, 10/07/08


Pontade 15 08 (15/07/08) - 10

France: lis lenghis minoritariis a tornin tal test di riforme de Costituzion

Daspò che il Senât al veve boçât il test di modifiche dal prin articul de Cjarte costituzionâl là che si ricognossevin lis lenghis regjonâls tant che patrimoni de France, la Assemblee francese lu à tornât a meti dentri, ancje se cheste volte sot forme di emendament al articul 75 de Costituzion francese. Dut câs, par che la modifiche e jentri in vore, ancje il Senât al disi di sì al test. Se la maiorance dai senatôrs e votarà compagn dai deputâts par fâ passâ la modifiche, al covente che almancul i trê cuints dai membris des dôs ramis dal Parlament unidis a votin a pro de revision de Cjarte costituzionâl.
Font: Ouiaubreton, 02-10/07/08; Món Divers, 03 e 10/07/08


Pontade 15 08 (15/07/08) - 9

Romanie: la ALE e domande la autonome pe Transilvanie

Daspò di une visite dai siei rapresentants in Romanie, la Aleance Libare Europeane (ALE / EFA), che e met adun diviers partîts indipendentiscj e nazionalitaris europeans, e à domandât che i vegni ricognossude la autonomie ae Transilvanie, in maniere di judâle ancje tal procès di integrazion europeane. In particolâr e coventarès – a àn dite i rapresentants de ALE – une autonomie speciâl pe regjon a maiorance ongjarese dal Székelyföld.
Font: Món Divers, 08/07/08


Pontade 15 08 (15/07/08) - 8

Corsiche: provis di convergjence tra i moviments nazionaliscj

I rapresentants dai diviers moviments nazionaliscj cors si son dâts dongje a Corti cun chê di cirî formis gnovis di colaborazion. Al incuintri a àn partecipât delegâts di Corsica Nazione, U Rinnovu, ANC/Fronte Populare, A Cunsulta Naziunale, CAR, Ghjuventù Paolina e Ghjuventù Indipendentista. Plui che lavorâ suntun cartel eletorâl, i rapresentants des diviersis animis dal nazionalisim cors a àn fevelât di “meti adun lis fuarcis intun spazi convergjent”. Za chest, dut câs, al è un obietîf ambiziôs, dal moment che la aree nazionaliste corse e à simpri palesât une tindince gruesse a dividisi e la plui part des aleancis e à vût vite curte.
Font: Món Divers, 07/07/08; Radio Alta Frequenza, 07/07/08


Pontade 15 08 (15/07/08) - 7

Paîs Basc: sì faturôs dal Parlament de CAB al referendum di Ibarretxe

Il Parlament de Comunitât Autonome Basche al à votât a pro dal disen di leç par inviâ un referendum popolâr su la riforme dal implant istituzionâl cumò in vore. Il progjet al à cjatât cuintri i partîts spagnoliscj, ven a dî PSE e PP. A poiâlu a son stâts, invezit, i trê partîts che a guviernin la CAB, ven a stâi PNV, Eusko Alkartasuna e Ezker Batua, plui i nazionalitaris bascs di Aralar. La çampe indipendentiste (EHAK) e à sielzût la strade de astension, ma, tal stes timp, e à garantît chel vôt che al à permetût al disen di leç di passâ. Cun di fat – a àn spiegât i rapresentants di cheste aree politiche – chest referendum, cussì cemût che al è stât pensât, nol permetarà di saltâ fûr dal implant istituzionâl cumò in vore, ma no si podeve permeti che la colpe dal insucès dal referendum e fos discjariade su la çampe indipendentiste basche; cumò si viodarà a clâr che al è il stât spagnûl chel che al vûl impedî pardabon il referendum e che il PNV ae fin al acetarà la volontât di Madrid. Intal progjet di consultazion popolâr volût dal guvier vuidât di Juan José Ibarretxe (PNV) si previodin dôs domandis: une su la fin des azions armadis di ETA e une sul procès di negoziazion tra ducj i partîts par rivâ a di un acuardi sul avignî dal Paîs Basc. La prime setemane di Lui, tune assemblee che si è davuelte a Donostia, i rapresentants de çampe indipendentiste basche a àn denunciât il compuartament antidemocratic dal guvier spagnûl che nol intint permeti nissune consultazion popolâr e nissune revision vere dal implant istituzionâl basc, ma ancje chel dal PNV che nol à fat nissun pas concret par rispuindi ai atacs che a rivin di Madrid. Il dirit dai bascs a decidi in maniere libare dal lôr avignî e la cuestion de unitât di ducj i teritoris bascs a restin i ponts di fonde par risolvi il conflit in at – a àn zontât i rapresentants de çampe indipendentiste – e no si pues rivâi a nissun di chescj doi obietîfs se no si va plui innà di ce che e previôt in dì di vuê la Costituzion spagnole.
Font: Gara, 05/07/08; Nationalia, 26/06/08


Pontade 15 08 (15/07/08) - 6

Bretagne, Gales, Galizie: chest an che al ven la decision sui dominis web

La pussibilitât di meti sù dai dominis web di pueste par galês, bretons e galizians ( .cym, .bzh, .gal) e sarà frontade te prossime conference de ICANN – l’organisim internazionâl che al fisse lis regulis par internet – in program sul principi di chest an che al ven in Messic. La cuestion e je saltade fûr za te ultime riunion dal organisim, ma si à vût miôr rimandâ la decision par lâ plui a fonts te cuestion. Lis campagnis puartadis indenant in Gales, in Bretagne e in Galizie a àn otignût la poie di miârs di citadins e des istituzions locâls, dispès ancje di là des divisions dai partîts. Ancje la UNESCO e à cjapât posizion a pro de presince des lenghis minorizadis inte rêt cun dominis propris. Cheste bataie e je za stade vinçude dai catalans, che di un pâr di agns a àn a disposizion il domini .cat che al è za doprât di 24 mil sîts internet.
Font: Eurolang, 03/07/08


Pontade 15 08 (15/07/08) - 5

Rom: la minorance plui discriminade in Europe

Daûr di une inchieste davuelte par cont de Comission europeane (Eurobarometri) al ven fûr che cuasi un citadin european su cuatri (24%) al varès fastidis a vê tant che vicin un rom. Si trate di un dât avonde pesant, massime se si pense che “dome” un 6% des personis al à dite che no si sintarès sigûr a vê dongje une persone di divignince etniche divierse. Ancjemò une volte, duncje, al salte fûr che e je propit chê rom la comunitât di minorance plui odeade. Simpri daûr de inchieste, i stâts là che chest sintiment al somee plui fuart a saressin la Italie e la Republiche ceche. Preocupazion par chescj risultâts e je stade manifestade dal comissari european pe paritât, Vladimír Špidla, che al à ancje dite che i rom a van dilunc a patî une discriminazion continuade in cetancj paîs de Europe.
Font: Món Divers, 03/07/08


Pontade 15 08 (15/07/08) - 3

Cossovo: nassût il Parlament serp

Come che al jere stât anticipât tes setemanis stadis, ai 20 di Jugn al è nassût il Parlament dai serps dal Cossovo. La sô sede e je a Mitrovica e al varà plui funzions simbolichis che reâls, dal moment che i serps dal Cossovo a van dilunc a ricognossi la autoritât dal Parlament di Belgrât. Lis autoritâts de Republiche cossovare, a maiorance albanese, a judichin ilegâl la gnove assemblee serbe.
Font: Món Divers, 29/06/08


Pontade 15 08 (15/07/08) - 4

Moldova: gnove ufierte par risolvi il conflit cu la comunitât russe

Daspò 17 agns di conflit par risolvi il status de Transnistrie, cumò il guvier de Moldova al à fat indenant une propueste che e rapresente un grues pas indenant in direzion des domandis che a rivin de aree russofone dal paîs. Cun di fat, il ministri moldâf pe riunificazion, Vasile Sova, al à proponût che la Transnistrie e torni a fâ part de Moldova, ma che e puedi conservâ sei il status di Republiche, sei la sô Costituzion e ancje il so Parlament. Cun di plui, tal câs che la Moldova e decidi di dâsi dongje cu la Romanie, la Transnistrie e podarà esercitâ il dirit ae autodeterminazion. O ricuardìn che, daspò de implosion de Union Sovietiche e de nassite de Republiche di Moldova, la part dal paîs a maiorance russe e veve decidût di meti sù une Republiche par so cont, batiade Transnistrie, che però no jere stade ricognossude a nivel internazionâl tant che sogjet indipendent.
Font: Món Divers, 02/07/08


Pontade 15 08 (15/07/08) - 2

Paîs Basc: la lenghe e cres tal Sud, e cale intal Nord

Il guvier de Comunitât Autonome Basche al à presentât i risultâts de cuarte inchieste sociolinguistiche che e à interessât ducj i teritoris che a formin il Paîs Basc. Intes trê provinciis de CAB, ven a dî Gipuzkoa, Bizkaia e Araba, il numar des personis cun plui di 16 agns che a fevelin par basc a son il 30,1% dal totâl, ven a dî il 6% in plui rispiet ae prime inchieste che e jere stade fate 15 agns indaûr. La situazion intes trê provinciis, dut câs, no je vualive. Cun di fat in Gipuzkoa a fevelâ par euskara al è il 49,1% des personis cun plui di 16 agns, in Bizkaia il 23%, e in Araba dome il 14,2%. Si à ancje di dî che ta chescj ultins doi teritoris lis personis che a capissin il basc, ma no son in stât di fevelâlu ben a son sul 20%. Ancje in Navare la situazion e je lade in miôr intai ultins 15 agns, ancje se in maniere mancul significative che inte CAB. Tal 1991 lis personis che a savevin fevelâ par euskara a jerin il 9,6%, invezit cumò a son l’11,1%, cu la zonte di un 7,6% che lu capìs, ma nol è bon di paronâlu. La situazion e je une vore divierse, invezit, in Iparralde, ven a dî te part dal Paîs Basc che e je sot aministrazion francese. Achì, di fat, dome il 22,4% des personis cun plui di 16 agns al fevele par basc, cuant che 15 agns indaûr al jere il 33%. La situazion e je dificile massime te regjon atlantiche dal Lapurdi, invezit tes provinciis pirenaichis de Basse Navare e de Zuberoa la lenghe e je fevelade inmò dal 55,5% de popolazion. I dâts a son il spieli dai trê diviers modei educatîfs e di promozion linguistiche in vore te CAB, te Navare e in Iparralde: il prin al funzione avonde ben, il secont cussì cussì, il tierç par nuie.
Font: Món Divers, 18/06/08


Pontade 15 08 (15/07/08) - 1

Irlande dal Nord: fonts pe programazion televisive par gaelic

Il guvier britanic, intant dai incuintris cui rapresentants dal partît republican irlandês Sinn Féin, si è impegnât a investî uns 6 milions di sterlinis (ven a dî sù par jù 7 milions e mieç di euros) par svilupâ la programazion televisive par gaelic metude adun dal Irish Language Broadcast Fund pe Irlande dal Nord. In dì di vuê, intun an, cheste struture e prodûs plui o mancul 75 oris di programazion in lenghe irlandese.
Font: Món Divers, 17/06/08