Paîs Basc: disinis di miârs in place pai presonîrs

Tal dopodimisdì dai 12 di Zenâr disinis di miârs di personis a àn partecipât in contemporanie aes manifestazions inmaneadis a Bilbo / Bilbao e Baiona / Bayonne par domandâ la fin dal regjim di ecezionalitât in at cuintri dai presonîrs bascs sei intal stât spagnûl che ta chel francês. Cundut de fin dal procès di disarmament di ETA ai 8 di Avrîl dal 2017 e de dissoluzion de organizazion armade basche ai 4 di Mai dal 2018 e di là dal impegn dal guvier di Parîs intal 2017 e di chel di Madrid l’an passât di procedi almancul a trasferî i presonîrs in struturis carcerariis lis plui dongje ae lôr aree di divignince, cemût che par altri e proviodarès la leç, la situazion e reste ancjemò une vore grivie. Plui in detai, tal stât francês il 40% dai presonîrs si cjate ancjemò in struturis lontanis dal Paîs Basc, tal stât spagnûl chest dât al rive al 90%. A son po 21 i militants bascs cun malatiis seriis che par podê curâsi a varessin di gjoldi di misuris di carcerazion alternative e invezit si cjatin inmò in preson. Cun di plui al 95% dai presonîrs bascs intal stât spagnûl i vegnin dineâts chei permès e chei sconts di pene che a valin invezit par ducj chei altris condanâts. I manifestants a domandin duncje di meti fin a cheste situazion di ecezionalitât e di garantî ai presonîrs bascs il svicinament e chei altris dirits che a son ricognossûts a ducj i presonîrs. Ae iniziative a àn partecipât ancje delegazions rivadis de Catalogne là che, dopo dal prin di Otubar dal 2017, la cuistion dai presonîrs politics e je deventade magari cussì no une vore di atualitât.

Font: Naiz:, 12-13/01/19; EiTB, 12-13/01/19

Macedonie: poie dai partîts albanês al cambi di non

Ai 11 di Zenâr il Parlament macedon al à fats bogns, cu la maiorance di doi tierçs previodude pai mudaments di nature costituzionâl, i proviodiments che a cambiin il non dal stât in Republiche de Macedonie dal Nord. Il non gnûf, contestât cun fuarce de diestre nazionaliste, al varès di permeti di superâ il scuintri istituzionâl in at di agns cu la Grecie che al à impedît fin cumò al paîs balcanic di inviâ il percors pe jentrade te Union Europeane. Par rivâ ae maiorance cualificade che e coventave par aprovâ il cambi di non a son stâts fondamentâi i vôts dai trê partîts che a rapresentin la comunitât albanese, ven a dî la Union Democratiche pe Integrazion, che e fâs part de maiorance, il moviment BESA e la Aleance pai Albanês che a son invezit ae oposizion. Par otignî la poie di chescj ultins doi partîts, il guvier al à prometût che al incressarà i dirits ricognossûts ae comunitât albanese se dal câs ancje cun mendis ae Costituzion.

Font: Balkan Insight, 11/01/19

Stât spagnûl: visite ONU par viodi de situazion des minorancis

Il relatôr speciâl de ONU su lis minorancis, Fernand de Varennes, al sarà in visite tal stât spagnûl tra i 14 e i 25 di Zenâr par racuei informazions su la situazion des minorancis nazionâls, linguistichis e religjosis che a vivin intal ream di Spagne, in particolâr su temis tant che la educazion, la partecipazion politiche e la lote cuintri de intolerance. A son duncje previodûts incuintris cun funzionaris dal guvier centrâl e di chei autonomics, cun rapresentants de societât civîl e cun membris des minorancis. De Varennes in plui che a Madrid, al à in program visitis intai Paîs Catalans, tal Paîs Basc, in Galizie e in Andalusie. Ta cheste ultime comunitât e sarà frontade in particolâr la situazion des comunitâts gjitanis.

Font: VilaWeb, 11/01/19

Paîs Catalans: gnovis azions cuintri de “catalanofobie”

An dopo an l’ûs dal catalan intal cjamp de justizie al va dilunc a calâ. Lis dificoltâts che i citadins e i professioniscj si cjatin denant par impleâ la lenghe proprie tai tribunâi a puartin a pidimentâ la tutele juridiche e fintremai a discriminazions palesis di cui che al fevele par catalan. Par chest la organizazion Plataforma per la Llengua, te suaze de sô campagne “Prou de catalanofòbia” (vonde cu la catalanofobie), e à dât fûr un spot recitât dai atôrs Carme Sansa e Ricard Borràs che, a partî di fats reâi, al denuncie cheste situazion. Il contrast tra la situazion intal stât spagnûl e chê di altris paîs e je saltade tai voi cun clarece propit in ocasion des vicendis judiziariis dai esiliâts catalans in Belgjiche là che i avocats dai acusâts a àn podût sielzi tra un percors judiziari par francês o par flamant. Il dirit al ûs de lenghe catalane ancje te justizie invezit al reste dome su la cjarte dal moment che i judiçs e il personâl che al lavore intai tribunâi dai Paîs Catalans no àn nissun oblic di cognossi la lenghe e par vie che, viodûts i precedents discriminatoris, tancj no riscjin di doprâ il catalan par pôre di jessi penalizâts. Pe Plataforma e covente une gnove leç cuintri des discriminazions linguistichis che e previodi ancje sanzions dal moment che, se la pedagogjie e reste la strade principâl, cuant che no son alternativis al covente punî. Par lâ ta cheste direzion e à ancje inviât une racuelte di firmis in rêt là che tai prins dîs si son notâts za uns 15 mil citadins (www.proudecatalanofobia.cat).

Font: Plataforma per la Llengua, 11/01/19

Ocitanie: gnove campagne pe uficialitât dal ocitan

Il moviment de çampe radicâl ocitane Libertat al à fat savê che sul finî di Fevrâr al lançarà une campagne pe uficialitât dal ocitan e par chest al invide ducj i coletîfs che a condividin cheste bataie a mobilitâsi, a puartâ il lôr contribût e a metisi in rêt. Cun di fat, a disin, nissun moviment, par trop grant che al sedi, al pues rivâ di bessôl a chest obietîf. Par Libertat la lenghe e je la fonde de identitât e cence di jê nol è pussibil nissun avignî pe Ocitanie. Cu la uficialitât, la lenghe proprie e à duncje di cjatâ il so puest inte educazion, inte formazion, inte aministrazion e tai servizis publics, intai mieçs di comunicazion e in dute la societât ocitane.

Font: Jornalet, 11/01/19

Paîs Catalans: la Viquipèdia e rive a 600 mil articui

La Viquipèdia, la version catalane de enciclopedie libare in rêt, e je rivade a 600 mil articui. La cifre e je stade tocjade ai 10 di Zenâr cuntun toc dedicât ae biografie de ativiste Pura Velarde. Des 303 versions regjistradis di cheste enciclopedie ator pal mont, chê in lenghe catalane e je la vincjesime par numar di contignûts, inant che sul plan de cualitât dai siei articui si cjate tra lis primis trê. Nassude tal 2001, si à svilupade in gracie dal contribût di 300 mil personis che a àn scrit, editât o comedât i articui che le componin. Vie pal 2018 la version catalane de enciclopedie libare e à vût passe 196 milions di consultazions.

Font: Generalitat de Catalunya, 10/01/19

Paîs Basc: presentade la edizion 21 de Korrika

Ai 9 di Zenâr la organizazion AEK (Coordenament pe alfabetizazion e pe baschizazion) e à presentât la vincjeunesime edizion de Korrika, la corse inmaneade ogni doi agns par cjapâ sù fonts pe promozion e pal insegnament de lenghe basche e par slargjâ il so ûs inte societât. La manifestazion si davuelzarà dai 4 ai 14 di Avrîl. Si partìs de localitât di Gares / Puente la Reina, in Navare, e dopo di vê scjavaçât dutis lis regjons storichis dal Paîs Basc si rivarà a Gasteiz. La corse e tocjarà ancje dutis lis citâts principâls e, plui in detai, Iruñea / Pamplona ai 6 di Avrîl, Baiona / Bayonne ai 7, Bilbo / Bilbao ai 11 e Donostia ai 12.

Font: MediaBask, 09/01/19; EiTB, 09/01/19

Asturiis: asturian simpri plui margjinalizât su la RTPA

La Xunta pola Defensa de la Llingua Asturiana e a screât il 2019 cuntun comunicât là che e denuncie la incressite de margjinalizazion de lenghe proprie inte RTPA, la Radiotelevision dal Principât des Asturiis. La organizazion e segnale cemût che la emitente publiche e va cuintri dal Statût di autonomie, de leç sui ûs linguistics e fintremai de stesse normative che le regole, che e previôt che la RTPA e sedi un imprest par promovi l’asturian. Vie pal 2018 la situazion e je lade fintremai in piês cu la scancelazion de direte mensîl par asturian di une partide e cence che si dopleàs in lenghe proprie nancje une trasmission. I programs lâts in onde par asturian a son stâts une vore pôcs e ancje chei programâts intai oraris piês. Par chel che al rivuarde la radio publiche, in plui de lenghe, si à penalizât fintremai la musiche asturiane che no à rivât a passâ nancje la ore di presince par setemane.

Font: InfoAsturies, 05/01/19

Paîs Catalans: tes Baleârs si invie Cinemacat

La organizazion Obra Cultural Balear, in gracie de colaborazion cun CineCiutat e cu la direzion gjenerâl pe politiche linguistiche, e inviarà ca di pôc il progjet Cinemacat par promovi il cine par catalan ancje su la isule di Mallorca. Par intant si proponarà ogni joibe un film in version origjinâl o sottitulât par catalan ma l’intindiment al è di rivâ a di une programazion stabile dal cine par catalan prime a Palma e po ancje in altris localitâts de isule.

Font: La Vanguardia, 04/01/19

Aragon: pas indenant pal insegnament di catalan e aragonês

Daûr dai dâts dal dipartiment pe educazion, intal Aragon a son cuasi cent i istitûts scolastics là che si insegne il catalan o l’aragonês. Ca di cualchi setemane e varès di jessi fate buine une gnove ordenance par regolâ l’insegnament e l’ûs di chestis lenghis intai istitûts autorizâts. Lis novitâts a varessin di previodi la pussibilitât di insegnâ par catalan o par aragonês tra lis cuatri e lis sîs voltis par setemane tes scuelis de infanzie e di doprâ in maniere veicolâr la lenghe proprie par insegnâ une materie tes primariis e tes secondariis.

Font: Hoy Aragon, 03/01/19

Irlande: in cressi il gaelic tes scuelis dal Gaeltacht

Il ministri pe educazion de Republiche de Irlande, Joe McHugh, al à comentât cun sodisfazion i risultâts dal prin rapuart su la metude in vore dal program di valorizazion des scuelis dal Gaeltacht, o sei lis areis là che l’irlandês al è ancjemò fevelât in maniere significative. Il program, che al interesse 105 scuelis primariis e 28 secondariis, al è stât inviât intal 2017 cun chê di slargjâ e di incressi la cualitât dal insegnament in lenghe gaeliche. Il rapuart al diven des ispezions davueltis intes scuelis tra il mês di Setembar e chel di Dicembar. Il program al à za permetût di slargjâ l’ûs de imersion linguistiche tai prins agns di scuele e al à cjatât une grande adesion de bande dai insegnants e des fameis. Tra i problemis segnalâts si à invezit la dificoltât a fâ doprâ l’irlandês ai students des superiôrs fûr dal orari di lezion. Dut câs lis primis misuris imbastidis par fâi cuintri a cheste problematiche a àn za tacât a dâ risultâts positîfs. McHugh al à fat savê che vie pal 2019 lis risorsis pe educazion intal Gaeltacht a saran cressudis a 5 milions di euros, cuasi il dopli di chês dal an passât.

Font: Galway Daily, 29/12/18