29/09/14

Scozie, Catalogne, Europe: cualchi riflession

Cun riferiment a ce che al è sucedût o al è daûr a sucedi in Scozie e in Catalogne, in plui dai fats za presentâts chi disot, al è il câs di zontâ ancje un pâr di riflessions. Prin di dut al è di dî che il vôt scozês al dimostre che il dogme de impussibilitât di tocjâ i confins di stât al è colât aromai ancje inte Europe ocidentâl e che, se e je la volontât politiche (e la responsabilitât e cole su lis spalis dai guviers centrâi e dal sigûr no su lis comunitâts che a rivendichin il dirit di decidi dal lôr avignî), il percors pe autodeterminazion si pues gjestî in maniere civîl e democratiche. Si à po di zontâ che, intun moment là che la int e je simpri plui schifade de [classe] politiche e là che il populisim al fâs di paron, cui che al è bon di proponi un progjet vêr di cambiament al rive a tirâ dongje lis personis e a rindilis part vive dal progjet stes. Par finî, in Scozie compagn che in Catalogne, o sin testemonis di un confront tra doi modei une vore diviers tra di lôr: chel indipendentist che al fâs indenant propuestis, al svilupe modei sociâi e economics alternatîfs, e al rive a jessi inclusîf; e chel unionist che al ponte su lis pôris de int, nol è bon di ufrî alternativis crodibilis al sisteme in vore e si plate daûr dal “no, parcè che di no”. A ‘nd è plui che avonde par resonâi ben parsore, ator pe Europe e ancje in Friûl.